න ඛො මෙ භන්තෙ ඉමා ගාථායො පුබ්බෙ පරිවිතක්කිතා. අථ ඛො ඨානසොව මං පටිභන්තීති.
තෙන හි තං වඞ්ගීස භිය්යොසොමත්තාය පුබ්බෙ අපරිවිතක්කිතා ගාථායො පටිභන්තූති.
එවං භන්තෙති ඛො ආයස්මා වඞ්ගීසො භගවතො පටිස්සුත්වා භිය්යොසොමත්තාය භගවන්තං පුබ්බෙ අපරිවිතක්කිතාහි ගාථාහි අභිත්ථවි:
උම්මග්ගපථං{2} මාරස්ස අභිභුය්ය චරති පභිජ්ජ ඛිලානි{3}, තං පස්සථ බන්ධපමුඤ්චකරං අසිතං භාගසො පවිභජ්ජං.
ඔඝස්ස හි{1} නිත්ථරණත්ථං අනෙකවිහිතං මග්ගං අක්ඛාසි, තස්මිං තෙ{2} අමතෙ අක්ඛාතෙ ධම්මද්දසා ඨිතා අසංහීරා.
පජ්ජොතකරො අතිවිජ්ඣ ධම්මං{3} සබ්බට්ඨිතීනං{4} අතික්කමමද්දස, ඤත්වා ච සච්ඡිකත්වා ච අග්ගං සො දෙසයි දසද්ධානං{5}.
එවං සුදෙසිතෙ ධම්මෙ කො පමාදො විජානතං{6}, තස්මා හි තස්ස භගවතො සාසනෙ අප්පමත්තො සදා නමස්සමනුසික්ඛෙති.
8. 1. 9.
කොණ්ඩඤ්ඤසුත්තං
217. එකං සමයං භගවා රාජගහෙ විහරති වෙළුවනෙ කලන්දකනිවාපෙ. අථ ඛො ආයස්මා අඤ්ඤාකොණ්ඩඤ්ඤො{7} සුචිරස්සෙව යෙන භගවා තෙනුපසඞ්කමි. උපසඞ්කමිත්වා භගවතො පාදෙසු සිරසා නිපතිත්වා භගවතො පාදානි මුඛෙන ච පරිචුම්බති. පාණීහි ච පරිසම්බාහති. නාමඤ්ච සාවෙති “කොණ්ඩඤ්ඤොහං භගවා කොණ්ඩඤ්ඤොහං සුගතා”ති.
අථ ඛො ආයස්මතො වඞ්ගීසස්ස එතදහොසි. අයං ඛො ආයස්මා අඤ්ඤාකොණ්ඩඤ්ඤො සුචිරස්සෙව යෙන භගවා තෙනුපසඞ්කමි. උපසඞ්කමිත්වා භගවතො පාදෙසු සිරසා නිපතිත්වා භගවතො පාදානි මුඛෙන ච පරිචුම්බති. පාණීහි ච පරිසම්බාහති. නාමඤ්ච සාවෙති “කොණ්ඩඤ්ඤොහං භගවා කොණ්ඩඤ්ඤොහං සුගතා”ති. යන්නූනාහං ආයස්මන්තං අඤ්ඤාකොණ්ඩඤ්ඤං භගවතො සම්මුඛා සරූපාහි ගාථාහි අභිත්ථවෙය්යන්ති.
අථ ඛො ආයස්මා වඞ්ගීසො උට්ඨායාසනා එකංසං උත්තරාසඞ්ගං කරිත්වා යෙන භගවා තෙනඤ්ජලිං පණාමෙත්වා භගවන්තං එතදවොච: පටිභාති මං භගවා පටිභාති මං සුගතාති. පටිභාතු තං වඞ්ගීසාති භගවා අවොච.
අථ ඛො ආයස්මා වඞ්ගීසො ආයස්මන්තං අඤ්ඤාකොණ්ඩඤ්ඤං භගවතො සම්මුඛා සරූපාහි ගාථාහි අභිත්ථවි.
බුද්ධානුබුද්ධො සො ථෙරො කොණ්ඩඤ්ඤො තිබ්බනික්කමො, ලාභී සුඛවිහාරානං විවෙකානං අභිණ්හසො.
යං සාවකෙන පත්තබ්බං සත්ථුසාසනකාරිනා, සබ්බස්ස තං අනුප්පත්තං අප්පමත්තස්ස සික්ඛතො.
මහානුභාවො තෙවිජ්ජො චෙතොපරියායකොවිදො, කොණ්ඩඤ්ඤො බුද්ධදායාදො{1} පාදෙ වන්දති සත්ථුනොති.
8. 1. 10.
මොග්ගල්ලානසුත්තං
218. එකං සමයං භගවා රාජගහෙ විහරති ඉසිගිලිපස්සෙ කාළසිලායං මහතා භික්ඛුසඞ්ඝෙන සද්ධිං පඤ්චමත්තෙහි භික්ඛුසතෙහි සබ්බෙහෙව අරහන්තෙහි. තෙසං සුදං ආයස්මා මහාමොග්ගල්ලානො චෙතසා චිත්තං සමන්නෙසති විප්පමුත්තං නිරුපධිං{2}.
අථ ඛො ආයස්මතො වඞ්ගීසස්ස එතදහොසි: අයං ඛො භගවා රාජගහෙ විහරති ඉසිගිලිපස්සෙ කාළසිලායං මහතා භික්ඛුසඞ්ඝෙන සද්ධිං පඤ්චමත්තෙහි භික්ඛුසතෙහි සබ්බෙහෙව අරහන්තෙහි. තෙසං සුදං ආයස්මා මහාමොග්ගල්ලානො චෙතසා චිත්තං සමන්නෙසති විප්පමුත්තං නිරුපධිං{2}. යන්නූනාහං ආයස්මන්තං මහාමොග්ගල්ලානං භගවතො සම්මුඛා සරූපාහි ගාථාහි අභිත්ථවෙය්යන්ති.
අථ ඛො ආයස්මා වඞ්ගීසො උට්ඨායාසනා එකංසං උත්තරාසඞ්ගං කරිත්වා යෙන භගවා තෙනඤ්ජලිං පණාමෙත්වා භගවන්තං එතදවොච: පටිභාති මං භගවා පටිභාති මං සුගතාති. පටිභාතු තං වඞ්ගීසාති භගවා අවොච. අථ ඛො ආයස්මා වඞ්ගීසො ආයස්මන්තං මහාමොග්ගල්ලානං භගවතො සම්මුඛා සරූපාහි ගාථාහි අභිත්ථවි:
නගස්ස පස්සෙ ආසීනං මුනිං දුක්ඛස්ස පාරගුං, සාවකා පයිරුපාසන්ති තෙවිජ්ජා මච්චුහායිනො.
තෙ චෙතසා අනුපරියෙති{3} මොග්ගල්ලානො මහිද්ධිකො, චිත්තං නෙසං සමන්නෙසං විප්පමුත්තං නිරූපධිං.
එවං සබ්බඞ්ගසම්පන්නං මුනිං දුක්ඛස්ස පාරගුං, අනෙකාකාරසම්පන්නං පයිරුපාසන්ති ගොතමන්ති.
8. 1. 11.
ගග්ගරාසුත්තං
219. එකං සමයං භගවා චම්පායං විහරති ගග්ගරාය පොක්ඛරණියා තීරෙ මහතා භික්ඛුසඞ්ඝෙන සද්ධිං පඤ්චමත්තෙහි භික්ඛුසතෙහි සත්තහි ච උපාසකසතෙහි{4} අනෙකෙහි ච දෙවතාසහස්සෙහි. ත්යාස්සුදං භගවා අතිරොචති වණ්ණෙන චෙව යසසා ච{5}.
අථ ඛො ආයස්මතො වඞ්ගීසස්ස එතදහොසි: අයං ඛො භගවා චම්පායං විහරති ගග්ගරාය පොක්ඛරණියා තීරෙ මහතා භික්ඛුසඞ්ඝෙන සද්ධිං පඤ්චමත්තෙහි භික්ඛුසතෙහි සත්තහි ච උපාසකසතෙහි අනෙකෙහි දෙවතාසහස්සෙහි. ත්යාස්සුදං භගවා අතිරොචති වණ්ණෙන චෙව යසසා ච. යන්නූනාහං භගවන්තං{1} සම්මුඛා සරූපාය ගාථාය අභිත්ථවෙය්යන්ති.
අථ ඛො ආයස්මා වඞ්ගීසො උට්ඨායාසනා එකංසං උත්තරාසඞ්ගං කරිත්වා යෙන භගවා තෙනඤ්ජලිම්පණාමෙත්වා භගවන්තං එතදවොච: පටිභාති මං භගවා පටිභාති මං සුගතාති. පටිභාතු තං වඞ්ගීසාති භගවා අවොච.
අථ ඛො ආයස්මා වඞ්ගීසො භගවන්තං{1} සම්මුඛා සරූපාය ගාථාය අභිත්ථවි:
චන්දො යථා විගතවලාහකෙ නභෙ විරොචති විගතමලො{2} ව භාණුමා, එවම්පි අඞ්ගීරස ත්වං මහාමුනි අතිරොචසි යසසා සබ්බලොකන්ති.
8. 1. 12.
වඞ්ගීසසුත්තං
220. එකං සමයං භගවා සාවත්ථියං විහරති ජෙතවනෙ අනාථපිණ්ඩිකස්ස ආරාමෙ. තෙන ඛො පන සමයෙන ආයස්මා වඞ්ගීසො අචිරඅරහත්තප්පත්තො හොති{3} විමුත්තිසුඛ{4}පටිසංවෙදී. තායං වෙලායං ඉමා ගාථායො අභාසි.
කාවෙය්යමත්තා විචරිම්හ පුබ්බෙ ගාමා ගාමං පුරා පුරං, අථද්දසාම සම්බුද්ධං සද්ධා නො උදපජ්ජථ{*}.
සො මෙ ධම්මමදෙසෙසි ඛන්ධායතනධාතුයො{5}, තස්සාහං ධම්මං සුත්වාන පබ්බජිං අනගාරියං.
බහුන්නං වත අත්ථාය බොධිං අජ්ඣගමා මුනි, භික්ඛූනං භික්ඛුනීනඤ්ච යෙ නියාමගතද්දසා.
ස්වාගතං වත මෙ ආසි මම බුද්ධස්ස සන්තිකෙ, තිස්සො විජ්ජා අනුප්පත්තා කතං බුද්ධස්ස සාසනං.
පුබ්බෙනිවාසං ජානාමි දිබ්බචක්ඛුං විසොධිතං, තෙවිජ්ජො ඉද්ධිපත්තොම්හි චෙතොපරියාය කොවිදොති.
වඞ්ගීසවග්ගො පඨමො.
තත්රුද්දානං:
නික්ඛන්තං අරති චෙව පෙසලා අතිමඤ්ඤනා, ආනන්දෙන සුභාසිතා සාරිපුත්ත පවාරණා, පරොසහස්සං කොණ්ඩඤ්ඤො මොග්ගල්ලානෙන ගග්ගරා වඞ්ගීසෙන ද්වාදසාති.
වඞ්ගීසසංයුත්තං සමත්තං
9. වනසංයුත්තං
1. වනවග්ගො
9. 1. 1.
විවෙකසුත්තං
221. එවං මෙ සුතං: එකං සමයං අඤ්ඤතරො භික්ඛු කොසලෙසු විහරති අඤ්ඤතරස්මිං වනසණ්ඩෙ. තෙන ඛො පන සමයෙන සො භික්ඛු දිවාවිහාරගතො පාපකෙ අකුසලෙ විතක්කෙ විතක්කෙති ගෙහනිස්සිතෙ.
අථ ඛො යා තස්මිං වනසණ්ඩෙ අධිවත්ථා දෙවතා තස්ස භික්ඛුනො අනුකම්පිකා අත්ථකාමා තං භික්ඛුං සංවෙජෙතුකාමා යෙන සො භික්ඛු තෙනුපසඞ්කමි. උපසඞ්කමිත්වා තං භික්ඛුං ගාථාහි අජ්ඣභාසි:
විවෙකකාමොසි වනං පවිට්ඨො අථ තෙ මනො නිච්ඡරතී බහිද්ධා, ජනො{1} ජනස්මිං විනයස්සු ඡන්දං තතො සුඛී හොහිසි වීතරාගො.
අරතිං පජහාසි සතො{2} භවාසි සතං තං සාදයාමසෙ{3}, පාතාලරජො හි දුත්තරො{4} මා තං කාමරජො අවාහරි.
සකුණො යථා පංසුකුණ්ඩිතො{5} විධුතං{6} පාතයති සිතං රජං, එවං භික්ඛු පධානවා සතිමා විධුනං පාතයති සිතං රජන්ති.
අථ ඛො සො භික්ඛු තාය දෙවතාය සංවෙජිතො සංවෙගමාපාදීති.
9. 1. 2.
උපට්ඨානසුත්තං
222. එකං සමයං අඤ්ඤතරො භික්ඛු කොසලෙසු විහරති අඤ්ඤතරස්මිං වනසණ්ඩෙ. තෙන ඛො පන සමයෙන සො භික්ඛු දිවාවිහාරගතො සුපති. අථ ඛො යා තස්මිං වනසණ්ඩෙ අධිවත්ථා දෙවතා තස්ස භික්ඛුනො අනුකම්පිකා අත්ථකාමා තං භික්ඛුං සංවෙජෙතුකාමා යෙන සො භික්ඛු තෙනුපසඞ්කමි.
උපසඞ්කමිත්වා තං භික්ඛුං ගාථාහි අජ්ඣභාසි:
උට්ඨෙහි භික්ඛු කිං සෙසි{1} කො අත්ථො සුපිනෙන{2} තෙ, ආතුරස්ස හි කා{3} නිද්දා සල්ලවිද්ධස්ස රුප්පතො.
යාය සද්ධා{4} පබ්බජිතො අගාරස්මානගාරියං, තමෙව සද්ධං බ්රූහෙහි මා නිද්දාය වසඞ්ගමීති.
අනිච්චා අද්ධුවා කාමා යෙසු මන්දො’ව මුච්ඡිතො, ඛන්ධෙසු{5} මුත්තං අසිතං කස්මා පබ්බජිතං තපෙ.
ඡන්දරාගස්ස විනයා අවිජ්ජාසමතික්කමා, තඤ්ඤාණං පරමවොදානං{6} කස්මා පබ්බජිතං තපෙ.
භෙත්වා{7} අවිජ්ජං විජ්ජාය ආසවානං පරික්ඛයා, අසොකං අනුපායාසං කස්මා පබ්බජිතං තපෙ.
ආරද්ධවිරියං පහිතත්තං නිච්චං දළ්හපරක්කමං, නිබ්බානං අභිකඞ්ඛන්තං කස්මා පබ්බජිතං තපෙති.
9. 1. 3.
කස්සපගොත්තසුත්තං.
223. එකං සමයං ආයස්මා කස්සපගොත්තො කොසලෙසු විහරති අඤ්ඤතරස්මිං වනසණ්ඩෙ. තෙන ඛො පන සමයෙන ආයස්මා කස්සපගොත්තො දිවාවිහාරගතො අඤ්ඤතරං වෙතං{8} ඔවදති.
අථ ඛො යා තස්මිං වනසණ්ඩෙ අධිවත්ථා දෙවතා ආයස්මතො කස්සපගොත්තස්ස අනුකම්පිකා අත්ථකාමා ආයස්මං කස්සපගොත්තං සංවෙජෙතුකාමා යෙනායස්මා කස්සපගොත්තො තෙනුපසඞ්කමි. උපසඞ්කමිත්වා ආයස්මන්තං කස්සපගොත්තං ගාථාහි අජ්ඣභාසි:
ගිරිදුග්ගචරං චෙතං අප්පපඤ්ඤං අචෙතසං, අකාලෙ ඔවදං භික්ඛු මන්දො’ව පටිභාති මං.
සුණාති{9} න විජානාති ආලොකෙති න පස්සති, ධම්මස්මිං භඤ්ඤමානස්මිං අත්ථං බාලො න බුජ්ඣති.
සචෙපි දස පජ්ජොතෙ ධාරයිස්සසි කස්සප, නෙව දක්ඛිති{10} රූපානි චක්ඛු හි’ස්ස න විජ්ජතීති.
අථ ඛො ආයස්මා කස්සපගොත්තො තාය දෙවතාය සංවෙජිතො සංවෙගමාපාදීති.
9. 1. 4.
සම්බහුලාසුත්තං.
224. එකං සමයං සම්බහුලා භික්ඛූ කොසලෙසු විහරන්ති අඤ්ඤතරස්මිං වනසණ්ඩෙ. අථ ඛො තෙ භික්ඛූ වස්සං වුත්ථා{1} තෙමාසච්චයෙන චාරිකං පක්කමිංසු. අථ ඛො යා තස්මිං වනසණ්ඩෙ අධිවත්ථා දෙවතා තෙ භික්ඛූ අපස්සන්තී පරිදෙවමානා තායං වෙලායං ඉමං ගාථං අභාසි:
අරති විය මෙ’ජ්ජ{2} ඛායති බහුකෙ දිස්වාන විවිත්තෙ ආසනෙ, තෙ චිත්තකථා බහුස්සුතා කො’මෙ ගොතමසාවකා ගතාති.
එවං වුත්තෙ අඤ්ඤතරා දෙවතා තං දෙවතං ගාථාය අජ්ඣභාසි:
මගධං ගතා කොසලං ගතා එකච්චියා පන වජ්ජිභූමියා, මගා{3} විය අසඞ්ගචාරිනො අනිකෙතා විහරන්ති භික්ඛවොති.
9. 1. 5.
ආනන්දසුත්තං.
225. එකං සමයං ආයස්මා ආනන්දො කොසලෙසු විහරති අඤ්ඤතරස්මිං වනසණ්ඩෙ.
තෙන ඛො පන සමයෙන ආයස්මා ආනන්දො අතිවෙලං ගිහීසඤ්ඤත්තිබහුලො විහරති.
අථ ඛො යා තස්මිං වනසණ්ඩෙ අධිවත්ථා දෙවතා ආයස්මතො ආනන්දස්ස අනුකම්පිකා අත්ථකාමා ආයස්මන්තං ආනන්දං සංවෙජෙතුකාමා යෙනායස්මා ආනන්දො තෙනුපසඞ්කමි. උපසඞ්කමිත්වා ආයස්මන්තං ආනන්දං ගාථාය අජ්ඣභාසි:
රුක්ඛමූලගහණං පසක්කිය නිබ්බානං හදයස්මිං ඔපිය, ඣාය{4} ගොතම මා ච{5} පමාදො කිං තෙ බිළිබිළිකා කරිස්සතීති.
අථ ඛො ආයස්මා ආනන්දො තාය දෙවතාය සංවෙජිතො සංවෙගමාපාදීති.
9. 1. 6.
අනුරුද්ධසුත්තං.
226. එකං සමයං ආයස්මා අනුරුද්ධො කොසලෙසු විහරති අඤ්ඤතරස්මිං වනසණ්ඩෙ. අථ ඛො අඤ්ඤතරා තාවතිංසකායිකා දෙවතා ජාලිනී නාම ආයස්මතො අනුරුද්ධස්ස පුරාණදුතියිකා යෙනායස්මා අනුරුද්ධො තෙනුපසඞ්කමි. උපසඞ්කමිත්වා ආයස්මන්තං අනුරුද්ධං ගාථාහි අජ්ඣභාසි:
තත්ථ චිත්තං පණිධෙහි යත්ථ තෙ වුසිතං පුරෙ, තාවතිංසෙසු දෙවෙසු සබ්බකාමසමිද්ධිසු, පුරක්ඛතො පරිවුතො දෙවකඤ්ඤාහි{6} සොභසීති.
දුග්ගතා දෙවකඤ්ඤායො සක්කායස්මිං පතිට්ඨිතා, තෙ චාපි දුග්ගතා සත්තා දෙවකඤ්ඤාහි පත්ථිතාති.
න තෙ සුඛං පජානන්ති යෙ න පස්සන්ති නන්දනං, ආවාසං නරදෙවානං තිදසානං යසස්සිනන්ති.
[අනුරුද්ධො:]
න ත්වං බාලෙ විජානාසි යථා අරහතං වචො, අනිච්චා සබ්බෙ සඞ්ඛාරා උප්පාදවයධම්මිනො, උප්පජ්ජිත්වා නිරුජ්ඣන්ති තෙසං වූපසමො සුඛො.
නත්ථිදානි පුනාවාසො දෙවකායස්මිං{1} ජාලිනී, වික්ඛීණො ජාතිසංසාරො නත්ථිදානි පුනබ්භවොති.
9. 1. 7.
නාගදත්තසුත්තං.
227. එකං සමයං ආයස්මා නාගදත්තො කොසලෙසු විහරති අඤ්ඤතරස්මිං වනසණ්ඩෙ. තෙන ඛො පන සමයෙන ආයස්මා නාගදත්තො අතිකාලෙන ගාමං පවිසති, අතිදිවා පටික්කමති. අථ ඛො යා තස්මිං වනසණ්ඩෙ අධිවත්ථා දෙවතා ආයස්මතො නාගදත්තස්ස අනුකම්පිකා අත්ථකාමා ආයස්මන්තං නාගදත්තං සංවෙජෙතුකාමා යෙනායස්මා නාගදත්තො තෙනුපසඞ්කමි. උපසඞ්කමිත්වා ආයස්මන්තං නාගදත්තං ගාථාහි අජ්ඣභාසි:
කාලෙ පවිස්ස{2} නාගදත්ත දිවා ච ආගන්ත්වා අතිවෙලචාරී, සංසට්ඨො ගහට්ඨෙහි සමානසුඛදුක්ඛො.
භායාමි නාගදත්තං සුප්පගබ්භං කුලෙසු විනිබද්ධං,{3} මා හෙව මච්චුරඤ්ඤො බලවතො අන්තකස්ස වසමෙසීති.{4}
අථ ඛො ආයස්මා නාගදත්තො තාය දෙවතාය සංවෙජිතො සංවෙගමාපාදීති.
9. 1. 8.