එවං භො ගොතමාති{1}.
කිම්පන ත්වං බ්රාහ්මණ අත්ථවසං සම්පස්සමානො උදකසුද්ධිකො උදකෙන පරිසුද්ධිං{2} පච්චෙසි. සායපාතං උදකොරොහනානුයොගමනුයුත්තො විහරසීති?
ඉධ මෙ භො ගොතම යං දිවා පාපකම්මං කතං හොති, තං සාය නහානෙන{3} පවාහෙමි. යං රත්තිං පාපකම්මං කතං හොති, තං පාත{4} නහානෙන පවාහෙමි. ඉමං ඛ්වාහං භො ගොතම අත්ථවසං සම්පස්සමානො උදකසුද්ධිකො උදකෙන පරිසුද්ධිං පච්චෙමි. සායපාතං උදකොරොහනානුයොගමනුයුත්තො විහරාමීති.
[භගවා:]
ධම්මො රහදො බ්රාහ්මණ සීලතිත්ථො අනාවිලො සබ්භි සතං පසත්ථො, යත්ථ හවෙ වෙදගුනො සිනාතා අනල්ලගත්තා’ව තරන්ති පාරන්ති.
එවං වුත්තෙ සඞ්ගාරවො බ්රාහ්මණො භගවන්තං එතදවොච: අභික්කන්තං භො ගොතම, -පෙ- උපාසකං මං භවං ගොතමො ධාරෙතු අජ්ජතග්ගෙ පාණුපෙතං සරණං ගතන්ති.
7. 2. 12.
ඛොමදුස්සසුත්තං
208. එවං මෙ සුතං: එකං සමයං භගවා සක්කෙසු විහරති ඛොමදුස්සං නාමං සක්යානං නිගමො. අථ ඛො භගවා පුබ්බන්හසමයං නිවාසෙත්වා පත්තචීවරමාදාය ඛොමදුස්සං නිගමං{5} පිණ්ඩාය පාවිසි.
තෙන ඛො පන සමයෙන ඛොමදුස්සකා බ්රාහ්මණගහපතිකා සභායං සන්නිපතිතා හොන්ති කෙනචි දෙව කරණීයෙන. දෙවො ච එකමෙකං ඵුසායති.
අථ ඛො භගවා යෙන සා සභා තෙනුපසඞ්කමි. අද්දසංසු ඛො ඛොමදුස්සකා බ්රාහ්මණගහපතිකා භගවන්තං දූරතොව ආගච්ඡන්තං. දිස්වාන එතදවොචුං: කෙ ච මුණ්ඩකා සමණකා කෙ ච සභාධම්මං ජානිස්සන්තීති?
අථ ඛො භගවා ඛොමදුස්සකෙ බ්රාහ්මණගහපතිකෙ ගාථාය අජ්ඣභාසි.
නෙසා සභා යත්ථ න සන්ති සන්තො සන්තො න තෙ යෙ න වදන්ති ධම්මං, රාගඤ්ච දොසඤ්ච පහාය මොහං ධම්මං වදන්තාව{1} භවන්ති සන්තොති.
එවං වුත්තෙ ඛොමදුස්සකා බ්රාහ්මණගහපතිකා භගවන්තං එතදවොචුං: අභික්කන්තං භො ගොතම අභික්කන්තං භො ගොතම. සෙය්යථාපි භො ගොතම නික්කුජ්ජිතං වා උක්කුජ්ජෙය්ය පටිච්ඡන්නං වා විවරෙය්ය, මූළ්හස්ස වා මග්ගං ආචික්ඛෙය්ය, අන්ධකාරෙ වා තෙලපජ්ජොතං ධාරෙය්ය චක්ඛුමන්තො රූපානි දක්ඛින්ති. එවමෙවං භොතා ගොතමෙන අනෙකපරියායෙන ධම්මො පකාසිතො. එතෙ මයං භවන්තං ගොතමං සරණං ගච්ඡාම ධම්මඤ්ච භික්ඛුසඞ්ඝඤ්ච. උපාසකෙ නො භවං ගොතමො ධාරෙතු අජ්ජතග්ගෙ පාණුපෙතෙ සරණං ගතෙති.
උපාසකවග්ගො දුතියො.
තත්රුද්දානං:
කසී උදයො දෙවහිතො අඤ්ඤතර මහාසාළං මානත්ථද්ධඤ්ච පච්චනීකඤ්ච නවකම්මකට්ඨහාරකං{2} මාතුපොසකො{3} භික්ඛකො සඞ්ගාරවො ඛොමදුස්සෙන ද්වාදසාති.
බ්රාහ්මණසංයුත්තං සමත්තං.
8. වඞ්ගීසසංයුත්තං
1. වඞ්ගීසවග්ගො
8. 1. 1.
නික්ඛන්තසුත්තං
209. එවං මෙ සුතං: එකං සමයං ආයස්මා වඞ්ගීසො ආළවියං විහරති අග්ගාළවෙ චෙතියෙ ආයස්මතා නිග්රොධකප්පෙන උපජ්ඣායෙන සද්ධිං. තෙන ඛො පන සමයෙන ආයස්මා වඞ්ගීසො නවො හොති අචිරපබ්බජිතො ඔහිය්යකො විහාරපාලො.
අථ ඛො සම්බහුලා ඉත්ථියො සමලඞ්කරිත්වා යෙන අග්ගාළවකො ආරාමො{4} තෙනුපසඞ්කමිංසු, විහාරපෙක්ඛිකායො. අථ ඛො ආයස්මතො වඞ්ගීසස්ස තා ඉත්ථියො දිස්වා අනභිරති උප්පජ්ජති, රාගො චිත්තං අනුද්ධංසෙති.
අථ ඛො ආයස්මතො වඞ්ගීසස්ස එතදහොසි. අලාභා වත මෙ, න වත මෙ ලාභා. දුල්ලද්ධං වත මෙ, න වත මෙ සුලද්ධං. යස්ස මෙ අනභිරති උප්පන්නා, රාගො චිත්තං අනුද්ධංසෙති. තං කුතෙත්ථ ලබ්භා යම්මෙ පරො අනභිරතිං විනොදෙත්වා අභිරතිං උප්පාදෙය්ය. යන්නූනාහං අත්තනාව අත්තනො අනභිරතිං විනොදෙත්වා අභිරතිං උප්පාදෙය්යන්ති.
අථ ඛො ආයස්මා වඞ්ගීසො අත්තනාව අත්තනො අනභිරතිං විනොදෙත්වා අභිරතිං උප්පාදෙත්වා තායං වෙලායං ඉමා ගාථායො අභාසි.
නික්ඛන්තං වත මං සන්තං අගාරස්මානගාරියං, විතක්කා උපධාවන්ති පගබ්භා කණ්හතො ඉමෙ.
උග්ගපුත්තා මහිස්සාසා සික්ඛිතා දළ්හධම්මිනො, සමන්තා පරිකිරෙය්යුං සහස්සං අපලායිනං.
සචෙපි එත්තතො{1} භිය්යො ආගමිස්සන්ති ඉත්ථියො, නෙව මං බ්යාධයිස්සන්ති ධම්මෙ සම්හි පතිට්ඨිතං.{2}
සක්ඛීහි මෙ සුතං එතං බුද්ධස්සාදිච්චබන්ධුනො, නිබ්බාණගමනං මග්ගං තත්ථ මෙ නිරතො මනො.
එවඤ්චෙ මං විහරන්තං පාපිමා{3} උපගච්ඡසි, තථා මච්චු කරිස්සාමි න මෙ මග්ගම්පි දක්ඛසීති.
8. 1. 2.
අරතිසුත්තං
210. එකං සමයං{4} ආයස්මා වඞ්ගීසො ආළවියං විහරති අග්ගාළවෙ චෙතියෙ ආයස්මතා නිග්රොධකප්පෙන උපජ්ඣායෙන සද්ධිං. තෙන ඛො පන සමයෙන ආයස්මා නිග්රොධකප්පො පච්ඡාභත්තං පිණ්ඩපාතපටික්කන්තො විහාරං පවිසති සායං වා නික්ඛමති අපරජ්ජු වා කාලෙ. තෙන ඛො පන සමයෙන ආයස්මතො වඞ්ගීසස්ස අනභිරති උප්පන්නා හොති, රාගො චිත්තං අනුද්ධංසෙති.
අථ ඛො ආයස්මතො වඞ්ගීසස්ස එතදහොසි. අලාභා වත මෙ, න වත මෙ ලාභා. දුල්ලද්ධං වත මෙ, න වත මෙ සුලද්ධං. යස්ස මෙ අනභිරති උප්පන්නා, රාගො චිත්තං අනුද්ධංසෙති. තං කුතෙත්ථ ලබ්භා යං මෙ පරො අනභිරතිං විනොදෙත්වා අභිරතිං උප්පාදෙය්ය. යන්නූනාහං අත්තනාව අත්තනො අනභිරතිං විනොදෙත්වා අභිරතිං උප්පාදෙය්යන්ති. අථ ඛො ආයස්මා වඞ්ගීසො අත්තනාව අත්තනො අනභිරතිං විනොදෙත්වා අභිරතිං උප්පාදෙත්වා තායං වෙලායං ඉමා ගාථායො අභාසි.
අරතිඤ්ච රතිඤ්ච පහාය සබ්බසො ගෙහසිතඤ්ච විතක්කං, වනථං න කරෙය්ය කුහිඤ්චි නිබ්බනථො අරතො{5} ස හි භික්ඛු.
යමිධ පුථුවිඤ්ච වෙහාසං රූපගතඤ්ච ජගතොගධං, කිඤ්චි පරිජීයති{6} සබ්බමනිච්චං එවං සමෙච්ච චරන්ති මුතත්තා.
උපධීසු ජනා ගධිතාසෙ දිට්ඨසුතෙ පටිඝෙ ච මුතෙ ච, එත්ථ විනොදය ඡන්දමනෙජො යො එත්ථ න ලිම්පති තං මුනිමාහු.
අථ සට්ඨිනිස්සිතා{1} සවිතක්කා{*} පුථුජනතාය{2} අධම්මා නිවිට්ඨා, න ච වග්ගගතස්ස{3} කුහිඤ්චි නො පන දුට්ඨුල්ලභාණී ස භික්ඛු.
දබ්බො චිරරත්තසමාහිතො අකුහකො නිපකො අපිහාලු, සන්තං පදං අජ්ඣගමා මුනි පටිච්ච පරිනිබ්බුතො කඞ්ඛති කාලන්ති.
8. 1. 3.
පෙසලඅතිමඤ්ඤනාසුත්තං
211. එකං සමයං ආයස්මා වඞ්ගීසො ආළවියං විහරති අග්ගාළවෙ චෙතියෙ ආයස්මතා නිග්රොධකප්පෙන උපජ්ඣායෙන සද්ධිං. තෙන ඛො පන සමයෙන ආයස්මා වඞ්ගීසො අත්තනො පටිභානෙන අඤ්ඤෙ පෙසලෙ භික්ඛූ අතිමඤ්ඤති.
අථ ඛො ආයස්මතො වඞ්ගීසස්ස එතදහොසි. අලාභා වත මෙ න වත මෙ ලාභා, දුල්ලද්ධං වත මෙ න වත මෙ සුලද්ධං. ය්වාහං අත්තනො පටිභානෙන අඤ්ඤෙ පෙසලෙ භික්ඛූ අතිමඤ්ඤාමීති. අථ ඛො ආයස්මා වඞ්ගීසො අත්තනාව අත්තනො විප්පටිසාරං උප්පාදෙත්වා තායං වෙලායං ඉමා ගාථායො අභාසි.
මානං{4} පජහස්සු ගොතම, මානපථඤ්ච ජහස්සු, අසෙසං මානපථස්මිං සමුච්ඡිතො{5} විප්පටිසාරහුවා{6} චිරරත්තං.
මක්ඛෙන මක්ඛිතා පජා මානහතා{7} නිරයං පපතන්ති, සොචන්ති ජනා චිරරත්තං මානහතා{7} නිරයං උපපන්නා.
න හි සොචති භික්ඛු කදාචි මග්ගජිනො සම්මාපටිපන්නො, කිත්තිඤ්ච සුඛඤ්ච අනුභොති ධම්මදසොති තමාහු තථත්තං{8}.
තස්මා අඛිලොධ පධානවා නීවරණානි පහාය විසුද්ධො, මානඤ්ච පහාය අසෙසං විජ්ජායන්තකරො සමිතාවීති.
8. 1. 4.
ආනන්දසුත්තං
212. එකං සමයං ආයස්මා ආනන්දො සාවත්ථියං විහරති ජෙතවනෙ අනාථපිණ්ඩිකස්ස ආරාමෙ. අථ ඛො ආයස්මා ආනන්දො පුබ්බන්හසමයං නිවාසෙත්වා පත්තචීවරමාදාය සාවත්ථිං පිණ්ඩාය පාවිසි ආයස්මතා වඞ්ගීසෙන පච්ඡාසමණෙන.
තෙන ඛො පන සමයෙන ආයස්මතො වඞ්ගීසස්ස අනභිරති උප්පන්නා හොති, රාගො චිත්තං අනුද්ධංසෙති. අථ ඛො ආයස්මා වඞ්ගීසො ආයස්මන්තං ආනන්දං ගාථාය අජ්ඣභාසි:
කාමරාගෙන ඩය්හාමි චිත්තං මෙ පරිඩය්හති, සාධු නිබ්බාපනං බ්රූහි අනුකම්පාය ගොතමාති.
[ආනන්දො:]
සඤ්ඤාය විපරියෙසා චිත්තං තෙ පරිඩය්හති, නිමිත්තං පරිවජ්ජෙහි සුභං රාගූපසංහිතං.{1}
සඞ්ඛාරෙ පරතො පස්ස දුක්ඛතො මා ච අත්තතො, නිබ්බාපෙහි මහාරාගං මා ඩය්හිත්ථො පුනප්පුනං.
අසුභාය චිත්තං භාවෙහි එකග්ගං සුසමාහිතං, සති කායගතා ත්යත්ථු නිබ්බිදාබහුලො භව.
අනිමිත්තඤ්ච භාවෙහි මානානුසයමුජ්ජහ, තතො මානාභිසමයා උපසන්තො චරිස්සසීති.
8. 1. 5.
සුභාසිතසුත්තං
213. එකං සමයං භගවා සාවත්ථියං විහරති ජෙතවනෙ අනාථපිණ්ඩිකස්ස ආරාමෙ. තත්ර ඛො භගවා භික්ඛූ ආමන්තෙසි භික්ඛවොති, භදන්තෙති තෙ භික්ඛූ භගවතො පච්චස්සොසුං. භගවා එතදවොච:
චතූහි භික්ඛවෙ අඞ්ගෙහි සමන්නාගතා වාචා සුභාසිතා හොති නො දුබ්භාසිතා අනවජ්ජා ච, අනනුවජ්ජා ච විඤ්ඤූනං. කතමෙහි චතූහි? ඉධ භික්ඛවෙ භික්ඛු සුභාසිතං යෙව භාසති නො දුබ්භාසිතං. ධම්මං යෙව භාසති නො අධම්මං. පියං යෙව භාසති නො අප්පියං. සච්චං යෙව භාසති නො අලිකං. ඉමෙහි ඛො භික්ඛවෙ චතූහි අඞ්ගෙහි සමන්නාගතා වාචා සුභාසිතා හොති නො දුබ්භාසිතා අනවජ්ජා ච අනනුවජ්ජා ච විඤ්ඤූනන්ති.
ඉදමවොච භගවා ඉදං වත්වා{2} සුගතො අථාපරං එතදවොච සත්ථා:
සුභාසිතං උත්තමමාහු සන්තො ධම්මං භණෙ නාධම්මං තං දුතියං, පියං භණෙ නාප්පියං තං තතියං සච්චං භණෙ නාලිකං තං චතුත්ථන්ති.
අථ ඛො ආයස්මා වඞ්ගීසො උට්ඨායාසනා එකංසං උත්තරාසඞ්ගං කරිත්වා යෙන භගවා තෙනඤ්ජලිම්පණාමෙත්වා භගවන්තං එතදවොච: පටිභාති මං භගවා පටිභාති මං සුගතාති.
පටිභාතු තං වඞ්ගීසාති භගවා අවොච. අථ ඛො ආයස්මා වඞ්ගීසො භගවන්තං සම්මුඛා සරූපාහි{1} ගාථාහි අභිත්ථවි.
තමෙව වාචං භාසෙය්ය යායත්තානං න තාපයෙ, පරෙ ච න විහිංසෙය්ය සා වෙ වාචා සුභාසිතා.
පියවාචමෙව{2} භාසෙය්ය යා වාචා පටිනන්දිතා, යං අනාදාය පාපානි පරෙසං භාසතෙ පියං.
සච්චං වෙ අමතා වාචා එස ධම්මො සනන්තනො, සච්චෙ අත්ථෙ ච ධම්මෙ ච ආහු සන්තො පතිට්ඨිතා.
යං බුද්ධො භාසතෙ වාචං ඛෙමං නිබ්බාණපත්තියා, දුක්ඛස්සන්තකිරියාය සා වෙ වාචානමුත්තමාති.
8. 1. 6.
සාරිපුත්තසුත්තං
214. එකං සමයං ආයස්මා සාරිපුත්තො සාවත්ථියං විහරති ජෙතවනෙ අනාථපිණ්ඩිකස්ස ආරාමෙ. තෙන ඛො පන සමයෙන ආයස්මා සාරිපුත්තො භික්ඛූ ධම්මියා කථාය සන්දස්සෙති සමාදපෙති සමුත්තෙජෙති සම්පහංසෙති පොරියා වාචාය විස්සට්ඨාය අනෙලගලාය{3} අත්ථස්ස විඤ්ඤාපනියා. තෙ ච භික්ඛූ අට්ඨිකත්වා{4} මනසිකත්වා සබ්බචෙතසො{5} සමන්නාහරිත්වා ඔහිතසොතා ධම්මං සුණන්ති.
අථ ඛො ආයස්මතො වඞ්ගීසස්ස එතදහොසි. අයං ඛො ආයස්මා සාරිපුත්තො භික්ඛූ ධම්මියා කථාය සන්දස්සෙති සමාදපෙති සමුත්තෙජෙති සම්පහංසෙති පොරියා වාචාය විස්සට්ඨාය අනෙලගලාය{3} අත්ථස්ස විඤ්ඤාපනියා. තෙ ච භික්ඛූ අට්ඨිකත්වා{4} මනසිකත්වා සබ්බචෙතසො සමන්නාහරිත්වා ඔහිතසොතා ධම්මං සුණන්ති. යන්නූනාහං ආයස්මන්තං සාරිපුත්තං සම්මුඛා සරූපාහි ගාථාහි අභිත්ථවෙය්යන්ති.
අථ ඛො ආයස්මා වඞ්ගීසො උට්ඨායාසනා එකංසං උත්තරාසඞ්ගං කරිත්වා යෙනායස්මා සාරිපුත්තො තෙනඤ්ජලිම්පණාමෙත්වා ආයස්මන්තං සාරිපුත්තං එතදවොච. පටිභාති මං ආවුසො සාරිපුත්ත, පටිභාති මං ආවුසො සාරිපුත්තාති. පටිභාතු තං ආවුසො වඞ්ගීසාති. අථ ඛො ආයස්මා වඞ්ගීසො ආයස්මන්තං සාරිපුත්තං සම්මුඛා සරූපාහි ගාථාහි අභිත්ථවි:
ගම්භීරපඤ්ඤො මෙධාවී මග්ගාමග්ගස්ස කොවිදො, සාරිපුත්තො මහාපඤ්ඤො ධම්මං දෙසෙති භික්ඛූනං.
සංඛිත්තෙන’පි දෙසෙති විත්ථාරෙන’පි භාසති, සාළිකායිව නිග්ඝොසො පටිභානං උදීරයි{1}.
තස්ස තං දෙසයන්තස්ස සුණන්ති මධුරං ගිරං, සරෙන රජනීයෙන සවණීයෙන වග්ගුනා, උදග්ගචිත්තා මුදිතා සොතං ඔධෙන්ති භික්ඛවොති:
8. 1. 7.
පවාරණසුත්තං
215. එකං සමයං භගවා සාවත්ථියං විහරති පුබ්බාරාමෙ මිගාරමාතුපාසාදෙ මහතා භික්ඛුසඞ්ඝෙන සද්ධිං පඤ්චමත්තෙහි භික්ඛුසතෙහි සබ්බෙහෙව අරහන්තෙහි. තෙන ඛො පන සමයෙන භගවා තදහුපොසථෙ පණ්ණරසෙ පවාරණාය භික්ඛුසඞ්ඝපරිවුතො අජ්ඣොකාසෙ නිසින්නො හොති.
අථ ඛො භගවා තුණ්හීභූතං තුණ්හීභූතං{2} භික්ඛුසඞ්ඝං අනුවිලොකෙත්වා භික්ඛූ ආමන්තෙසි: හන්දදානි භික්ඛවෙ, පවාරයාමි{3} වො. න ච මෙ කිඤ්චි ගරහථ කායිකං වා වාචසිකං වා’ති.
එවං වුත්තෙ ආයස්මා සාරිපුත්තො උට්ඨායාසනා එකංසං උත්තරාසඞ්ගං කරිත්වා යෙන භගවා තෙනඤ්ජලිම්පණාමෙත්වා භගවන්තං එතදවොච: න ඛො මයං භන්තෙ, භගවතො කිඤ්චි ගරහාම කායිකං වා වාචසිකං වා. භගවා හි භන්තෙ, අනුප්පන්නස්ස මග්ගස්ස උප්පාදෙතා, අසඤ්ජාතස්ස මග්ගස්ස සඤ්ජනෙතා, අනක්ඛාතස්ස මග්ගස්ස අක්ඛාතා, මග්ගඤ්ඤූ මග්ගවිදූ මග්ගකොවිදො. මග්ගානුගා ච භන්තෙ, එතරහි සාවකා විහරන්ති පච්ඡාසමන්නාගතා. අහං ච ඛො භන්තෙ, භගවන්තං පවාරෙමි. න ච මෙ භගවා කිඤ්චි ගරහති කායිකං වා වාචසිකං වා’ති.
න ඛ්වාහං තෙ සාරිපුත්ත කිඤ්චි ගරහාමි කායිකං වා වාචසිකං වා. පණ්ඩිතො ත්වං සාරිපුත්ත, මහාපඤ්ඤො ත්වං සාරිපුත්ත, පුථුපඤ්ඤො ත්වං සාරිපුත්ත, හාසපඤ්ඤො{1} ත්වං සාරිපුත්ත, ජවනපඤ්ඤො ත්වං සාරිපුත්ත, තික්ඛපඤ්ඤො ත්වං සාරිපුත්ත, නිබ්බෙධිකපඤ්ඤො ත්වං සාරිපුත්ත. සෙය්යථාපි සාරිපුත්ත, රඤ්ඤො චක්කවත්තිස්ස ජෙට්ඨපුත්තො පිතරා පවත්තිතං චක්කං සම්මදෙව අනුප්පවත්තෙති. එවමෙව ඛො ත්වං සාරිපුත්ත මයා අනුත්තරං ධම්මචක්කං පවත්තිතං සම්මදෙව අනුප්පවත්තෙසීති.
නො චෙ කිර මෙ භන්තෙ භගවා කිඤ්චි ගරහති කායිකං වා වාචසිකං වා. ඉමෙසම්පි භන්තෙ භගවා පඤ්චන්නං භික්ඛුසතානං න කිඤ්චි ගරහති කායිකං වා වාචසිකං වා ති.
ඉමෙසම්පි ඛ්වාහං සාරිපුත්ත පඤ්චන්නං භික්ඛුසතානං න කිඤ්චි ගරහාමි කායිකං වා වාචසිකං වා. ඉමෙසං{2} හි සාරිපුත්ත පඤ්චන්නං භික්ඛුසතානං සට්ඨි භික්ඛූ තෙවිජ්ජා, සට්ඨි භික්ඛූ ඡළභිඤ්ඤා, සට්ඨි භික්ඛූ උභතොභාගවිමුත්තා. අථ ඉතරෙ පඤ්ඤාවිමුත්තාති.
අථ ඛො ආයස්මා වඞ්ගීසො උට්ඨායාසනා එකංසං උත්තරාසඞ්ගං කරිත්වා යෙන භගවා තෙනඤ්ජලිම්පණාමෙත්වා භගවන්තං එතදවොච: පටිභාති මං භගවා පටිභාති මං සුගතාති. පටිභාතු තං වඞ්ගීසාති භගවා අවොච. අථ ඛො ආයස්මා වඞ්ගීසො භගවන්තං සම්මුඛා සරූපාහි ගාථාහි අභිත්ථවි:
අජ්ජ පණ්ණරසෙ විසුද්ධියා භික්ඛූ පඤ්චසතා සමාගතා, සඤ්ඤොජනබන්ධනච්ඡිදා අනීඝා ඛීණපුනබ්භවා ඉසී.
චක්කවත්තී යථා රාජා අමච්චපරිවාරිතො, සමන්තා අනුපරියෙති සාගරන්තං මහිං ඉමං.
එවං විජිතසඞ්ගාමං සත්ථවාහං අනුත්තරං, සාවකා පයිරුපාසන්ති තෙවිජ්ජා මච්චුහායිනො.
සබ්බෙ භගවතො පුත්තා පලාපෙත්ථ න විජ්ජති, තණ්හාසල්ලස්ස හන්තාරං වන්දෙ ආදිච්චබන්ධුනන්ති.
8. 1. 8.
පරොසහස්සසුත්තං
216. එකං සමයං භගවා සාවත්ථියං විහරති ජෙතවනෙ අනාථපිණ්ඩිකස්ස ආරාමෙ මහතා භික්ඛුසඞ්ඝෙන සද්ධිං අඩ්ඪතෙළසෙහි භික්ඛුසතෙහි. තෙන ඛො පන සමයෙන භගවා භික්ඛූ නිබ්බාණපටිසංයුත්තාය{2} ධම්මියා කථාය සන්දස්සෙති සමාදපෙති සමුත්තෙජෙති සම්පහංසෙති. තෙ ච භික්ඛූ අට්ඨිකත්වා මනසිකත්වා සබ්බචෙතසා සමන්නාහරිත්වා ඔහිතසොතා ධම්මං සුණන්ති.
අථ ඛො ආයස්මතො වඞ්ගීසස්ස එතදහොසි: අයං ඛො භගවා භික්ඛූ නිබ්බාණපටිසංයුත්තාය ධම්මියා කථාය සන්දස්සෙති සමාදපෙති සමුත්තෙජෙති සම්පහංසෙති. තෙ ච භික්ඛූ අට්ඨිකත්වා මනසිකත්වා සබ්බචෙතසො සමන්නාහරිත්වා ඔහිතසොතා ධම්මං සුණන්ති. යන්නූනාහං භගවන්තං සම්මුඛා සරූපාහි ගාථාහි අභිත්ථවෙය්යන්ති. අථ ඛො ආයස්මා වඞ්ගීසො උට්ඨායාසනා එකංසං උත්තරාසඞ්ගං කරිත්වා යෙන භගවා තෙනඤ්ජලිම්පණාමෙත්වා භගවන්තං එතදවොච: පටිභාති මං භගවා, පටිභාති මං සුගතාති. පටිභාතු තං වඞ්ගීසාති භගවා අවොච. අථ ඛො ආයස්මා වඞ්ගීසො භගවන්තං සම්මුඛා සරූපාහි ගාථාහි අභිත්ථවි:
පරොසහස්සං භික්ඛූනං සුගතං පයිරුපාසති, දෙසෙන්තං විරජං ධම්මං නිබ්බානං අකුතොභයං.
සුණන්ති ධම්මං විමලං සම්මාසම්බුද්ධදෙසිතං, සොභති වත සම්බුද්ධො භික්ඛුසඞ්ඝපුරක්ඛතො.
නාගනාමොසි භගවා ඉසීනං ඉසිසත්තමො, මහාමෙඝොව හුත්වාන සාවකෙ අභිවස්සති.
දිවාවිහාරා නික්ඛම්ම සත්ථුදස්සනකම්යතා{1}, සාවකො තෙ මහාවීර පාදෙ වන්දති වඞ්ගීසොති.
කින්නු තෙ වඞ්ගීස ඉමා ගාථායො පුබ්බෙ පරිවිතක්කිතා උදාහු ඨානසොව තං පටිභන්තීති?