අථ ඛො ආයස්මා උපවාණො යෙන භගවා තෙනුපසඞ්කමි. උපසඞ්කමිත්වා භගවන්තං උණ්හොදකෙන නහාපෙත්වා උණ්හොදකෙන ඵාණිතං ආලොළෙත්වා භගවතො පාදාසි. අථ ඛො භගවතො සො{4} ආබාධො පටිප්පස්සම්භි.
අථ ඛො දෙවහිතො බ්රාහ්මණො යෙන භගවා තෙනුපසඞ්කමි. උපසඞ්කමිත්වා භගවතා සද්ධිං සම්මොදි. සම්මොදනීයං කථං සාරාණීයං වීතිසාරෙත්වා එකමන්තං නිසීදි.
එකමන්තං නිසින්නො ඛො දෙවහිතො බ්රාහ්මණො භගවන්තං ගාථාය අජ්ඣභාසි.
කත්ථ දජ්ජා දෙය්යධම්මං කත්ථ දින්නං මහප්ඵලං, කථං හි යජමානස්ස කත්ථ{5} ඉජ්ඣති දක්ඛිණාති?
[භගවා:]
පුබ්බෙනිවාසං යො වෙදී සග්ගාපායඤ්ච පස්සති, අථො ජාතික්ඛයං පත්තො අභිඤ්ඤාවොසිතො මුනි.
එත්ථ දජ්ජා දෙය්යධම්මං එත්ථ දින්නං මහප්ඵලං, එවං හි යජමානස්ස එවං ඉජ්ඣති දක්ඛිණාති.
එවං වුත්තෙ දෙවහිතො බ්රාහ්මණො භගවන්තං එතදවොච: අභික්කන්තං භො ගොතම -පෙ- උපාසකං මං භවං ගොතමො ධාරෙතු අජ්ජතග්ගෙ පාණුපෙතං සරණං ගතන්ති.
7. 2. 4.
මහාසාලසුත්තං.
200. සාවත්ථියං–
අථ ඛො අඤ්ඤතරො බ්රාහ්මණමහාසාළො ලූඛො{1} ලූඛපාපුරණො යෙන භගවා තෙනුපසඞ්කමි. උපසඞ්කමිත්වා භගවතා සද්ධිං සම්මොදි. සම්මොදනීයං කථං සාරාණීයං වීතිසාරෙත්වා එකමන්තං නිසීදි. එකමන්තං නිසින්නං ඛො තං බ්රාහ්මණමහාසාළං භගවා එතදවොච. කින්නු ත්වං බ්රාහ්මණ ලූඛො{1} ලූඛපාපුරණොති.
[බ්රාහ්මණො:]
ඉධ මෙ භො ගොතම චත්තාරො පුත්තා. තෙ මං දාරෙහි සම්පුච්ඡ ඝරා නික්ඛාමෙන්තීති.
[භගවා:]
තෙන හි ත්වං බ්රාහ්මණ ඉමා ගාථායො පරියාපුණිත්වා සභායං මහාජනකායෙ සන්නිපතිතෙ පුත්තෙසු ච සන්නිසින්නෙසු භාසස්සු:
යෙහි ජාතෙහි නන්දිස්සං යෙසඤ්ච භවමිච්ඡිසං, තෙ මං දාරෙහි සම්පුච්ඡ සාව වාරෙන්ති සූකරං.
අසන්තා කිර මං ජම්මා තාත තාතාති භාසරෙ, රක්ඛසා පුත්තරූපෙන තෙ පජහන්ති{2} වයොගතං.
අස්සොව ජිණ්ණො නිබ්භොගො ඛාදනා අපනීයති, බාලකානං{3} පිතා ථෙරො පරාගාරෙසු භික්ඛති.
දණ්ඩොව කිර මෙ සෙය්යො යඤ්චෙ පුත්තා අනස්සවා, චණ්ඩම්පි ගොණං වාරෙති අථො චණ්ඩම්පි කුක්කුරං.
අන්ධකාරෙ පුරෙ හොති ගම්භීරෙ ගාධ මෙධති, දණ්ඩස්ස අනුභාවෙන ඛලිත්වා පටිතිට්ඨතීති{4}.
අථ ඛො සො බ්රාහ්මණමහාසාළො භගවතො සන්තිකෙ ඉමා ගාථායො පරියාපුණිත්වා සභායං මහාජනකායෙ සන්නිපතිතෙ පුත්තෙසු ච සන්නිසින්නෙසු අභාසි.
“යෙහි ජාතෙහි නන්දිස්සං යෙසඤ්ච භවමිච්ඡිසං, තෙ මං දාරෙහි සම්පුච්ඡ සාව වාරෙන්ති සූකරං.
අසන්තා කිර මං ජම්මා තාත තාතාති භාසරෙ, රක්ඛසා පුත්තරූපෙන පජහන්ති වයොගතං.
අස්සොව ජිණ්ණො නිබ්භොගො ඛාදනා අපනීයති, බාලකානං පිතා ථෙරො පරාගාරෙසු භික්ඛති.
දණ්ඩොව කිර මෙ සෙය්යො යඤ්චෙ පුත්තා අනස්සවා, චණ්ඩම්පි ගොණං වාරෙති අථො චණ්ඩම්පි කුක්කුරං.
අන්ධකාරෙ පුරෙ හොති ගම්භීරෙ ගාධ මෙධති, දණ්ඩස්ස ආනුභාවෙන ඛලිත්වා පටිතිට්ඨතී”ති.
අථ ඛො නං බ්රාහ්මණමහාසාළං පුත්තා ඝරං නෙත්වා නාහාපෙත්වා පච්චෙකං දුස්සයුගෙන අච්ඡාදෙසුං.
අථ ඛො සො බ්රාහ්මණමහාසාළො එකං දුස්සයුගං ආදාය යෙන භගවා තෙනුපසඞ්කමි. උපසඞ්කමිත්වා භගවතා සද්ධිං සම්මොදි. සම්මොදනීයං කථං සාරාණීයං වීතිසාරෙත්වා එකමන්තං නිසීදි. එකමන්තං නිසින්නො ඛො බ්රාහ්මණමහාසාළො භගවන්තං එතදවොච:
මයං භො ගොතම බ්රාහ්මණා නාම ආචරියස්ස ආචරියධනං පරියෙසාම. පටිගණ්හාතු මෙ භවං ගොතමො ආචරියො ආචරියධනන්ති.{1} පටිග්ගහෙසි භගවා අනුකම්පං උපාදාය.
අථ ඛො සො බ්රාහ්මණමහාසාළො භගවන්තං එතදවොච: අභික්කන්තං, භො ගොතම -පෙ- උපාසකං මං භවං ගොතමො ධාරෙතු අජ්ජතග්ගෙ පාණුපෙතං සරණං ගතන්ති.
7. 2. 5.
මානත්ථද්ධසුත්තං.
201. සාවත්ථියං–
තෙන ඛො පන සමයෙන මානත්ථද්ධො නාම බ්රාහ්මණො සාවත්ථියං පටිවසති. සො නෙව මාතරං අභිවාදෙති. න පිතරං අභිවාදෙති. න ආචරියං අභිවාදෙති. න ජෙට්ඨභාතරං අභිවාදෙති.
තෙන ඛො පන සමයෙන භගවා මහතියා පරිසාය පරිවුතො ධම්මං දෙසෙති. අථ ඛො මානත්ථද්ධස්ස බ්රාහ්මණස්ස එතදහොසි: අයං ඛො සමණො ගොතමො මහතියා පරිසාය පරිවුතො ධම්මං දෙසෙති. යන්නූනාහං යෙන සමණො ගොතමො තෙනුපසඞ්කමෙය්යං. සචෙ මං සමණො ගොතමො ආලපිස්සති, අහම්පි තං ආලපිස්සාමි. නො චෙ මං සමණො ගොතමො ආලපිස්සති අහම්පි නාලපිස්සාමීති.
අථ ඛො මානත්ථද්ධො බ්රාහ්මණො යෙන භගවා තෙනුපසඞ්කමි. උපසඞ්කමිත්වා තුණ්හීභූතො{1} එකමන්තං අට්ඨාසි. අථ ඛො භගවා තං නාලපි{2}. අථ ඛො මානත්ථද්ධො බ්රාහ්මණො නායං සමණො ගොතමො කිඤ්චි ජානාතීති. තතොව පුන නිවත්තිතුකාමො අහොසි.
අථ ඛො භගවා මානත්ථද්ධස්ස බ්රාහ්මණස්ස චෙතසා චෙතොපරිවිතක්කමඤ්ඤාය මානත්ථද්ධං බ්රාහ්මණං ගාථාය අජ්ඣභාසි:
න මාන බ්රූහණා සාධු{*} අත්ථිකස්සීධ බ්රාහ්මණ, යෙන අත්ථෙන ආගඤ්ඡි{3} තමෙවමනුබ්රූහයෙති{†}.
අථ ඛො මානත්ථද්ධො බ්රාහ්මණො චිත්තං මෙ සමණො ගොතමො ජානාතීති තත්ථෙව භගවතො පාදෙසු සිරසා නිපතිත්වා භගවතො පාදානි මුඛෙන{4} පරිචුම්බති, පාණීහි ච පරිසම්බාහති, නාමඤ්ච සාවෙති: ‘මානත්ථද්ධොහං භො ගොතම මානත්ථද්ධොහං භො ගොතමා’ති.
අථ ඛො සා පරිසා අබ්භුතචිත්තජාතා අහොසි. අච්ඡරියං වත භො අබ්භුතං වත භො අයං හි මානත්ථද්ධො බ්රාහ්මණො නෙව මාතරං අභිවාදෙති. න පිතරං අභිවාදෙති. න ආචරියං අභිවාදෙති. න ජෙට්ඨභාතරං අභිවාදෙති. අථ ච පන සමණෙ ගොතමෙ එවරූපං පරමනිපච්චාකාරං{5} කරොතීති.
අථ ඛො භගවා මානත්ථද්ධං බ්රාහ්මණං එතදවොච: අලං බ්රාහ්මණ උට්ඨෙහි, සකෙ ආසනෙ නිසීද, යතො තෙ මයි චිත්තං පසන්නන්ති.
අථ ඛො මානත්ථද්ධො බ්රාහ්මණො සකෙ ආසනෙ නිසීදිත්වා භගවන්තං ගාථාය අජ්ඣභාසි:
කෙසු න මානං කයිරාථ{6} කෙසු චස්ස{7} සගාරවො, ක්යස්ස අපචිතා අස්සු ක්යස්ස{8} සාධු සුපූජිතා.
[භගවා:]
මාතරි පිතරි චාපි{9} අථො ජෙට්ඨම්හි භාතරි, ආචරියෙ චතුත්ථංහි{‡} තෙසු න මානං කයිරාථ. තෙසු අස්ස සගාරවො ත්යස්සු{10} අපචිතා අස්සු තෙචස්සු සාධු පූජිතා{11}.
අරහන්තෙ සීතිභූතෙ{12} කතකිච්චෙ අනාසවෙ, නිහච්ච මානං අත්ථද්ධො තෙ නමස්ස{13} අනුත්තරෙ.
එවං වුත්තෙ මානත්ථද්ධො බ්රාහ්මණො භගවන්තං එතදවොච අභික්කන්තං භො ගොතම -පෙ- උපාසකං මං භවං ගොතමො ධාරෙතු අජ්ජතග්ගෙ පාණුපෙතං සරණං ගතන්ති.
7. 2. 6.
පච්චනීකසුත්තං.
202. එවං මෙ සුතං: එකං සමයං භගවා සාවත්ථියං විහරති ජෙතවනෙ අනාථපිණ්ඩිකස්ස ආරාමෙ.
තෙන ඛො පන සමයෙන පච්චනීකසාතො නාම බ්රාහ්මණො සාවත්ථියං පටිවසති. අථ ඛො පච්චනීකසාතස්ස බ්රාහ්මණස්ස එතදහොසි: යන්නූනාහං යෙන සමණො ගොතමො තෙනුපසඞ්කමෙය්යං. යං යදෙව සමණො ගොතමො භාසිස්සති, තං තදෙවස්සාහං පච්චනීකාස්සන්ති.
තෙන ඛො පන සමයෙන භගවා අජ්ඣොකාසෙ චඞ්කමති. අථ ඛො පච්චනීකසාතො බ්රාහ්මණො යෙන භගවා තෙනුපසඞ්කමි. උපසඞ්කමිත්වා භගවන්තං චඞ්කමන්තං අනුචඞ්කමමානො{1} භගවන්තං එතදවොච: භණ සමණ ධම්මන්ති.
[භගවා:]
න පච්චනීකසාතෙන සුවිජානං සුභාසිතං, උපක්කිලිට්ඨචිත්තෙන සාරම්භබහුලෙන ච.
යො ච විනෙය්ය සාරම්භං අප්පසාදඤ්ච චෙතසො, ආඝාතං පටිනිස්සජ්ජ ස වෙ{2} ජඤ්ඤා සුභාසිතන්ති.
එවං වුත්තෙ පච්චනීකසාතො බ්රාහ්මණො භගවන්තං එතදවොච: අභික්කන්තං භො ගොතම -පෙ- උපාසකං මං භවං ගොතමො ධාරෙතු අජ්ජතග්ගෙ පාණුපෙතං සරණං ගතන්ති.
7. 2. 7.
නවකම්මිකසුත්තං.
203. එකං සමයං භගවා කොසලෙසු විහරති අඤ්ඤතරස්මිං වනසණ්ඩෙ.
තෙන ඛො පන සමයෙන නවකම්මිකභාරද්වාජො බ්රාහ්මණො තස්මිං වනසණ්ඩෙ කම්මන්තං කාරාපෙති. අද්දසා ඛො නවකම්මිකභාරද්වාජො බ්රාහ්මණො භගවන්තං අඤ්ඤතරස්මිං සාලරුක්ඛමූලෙ නිසින්නං පල්ලඞ්කං ආභුජිත්වා උජුං කායං පණිධාය පරිමුඛං සතිං උපට්ඨපෙත්වා. දිස්වානස්ස එතදහොසි: අහං ඛො පන{3} ඉමස්මිං වනසණ්ඩෙ කම්මන්තං කාරාපෙන්තො රමාමි. අයං සමණො ගොතමො කිං කාරාපෙන්තො රමතීති.
අථ ඛො නවකම්මිකභාරද්වාජො බ්රාහ්මණො යෙන භගවා තෙනුපසඞ්කමි. උපසඞ්කමිත්වා භගවන්තං ගාථාය අජ්ඣභාසි:
කෙ නු කම්මන්තා කයිරන්ති{4} භික්ඛු සාලවනෙ තව, යදෙකකො අරඤ්ඤස්මිං රතිං වින්දසි ගොතමාති.{5}
න{1} මෙ වනස්මිං කරණීයමත්ථි උච්ඡින්නමූලං මෙ වනං විසූකං, ස්වාහං{2} වනෙ නිබ්බනථො විසල්ලො එකො රමෙ අරතිං විප්පහායාති.
එවං වුත්තෙ නවකම්මිකභාරද්වාජො බ්රාහ්මණො භගවන්තං එතදවොච: අභික්කන්තං භො ගොතම -පෙ- උපාසකං මං භවං ගොතමො ධාරෙතු අජ්ජතග්ගෙ පාණුපෙතං සරණං ගතන්ති.
7. 2. 8.
කට්ඨහාරසුත්තං
204. එකං සමයං භගවා කොසලෙසු විහරති අඤ්ඤතරස්මිං වනසණ්ඩෙ.
තෙන ඛො පන සමයෙන අඤ්ඤතරස්ස භාරද්වාජගොත්තස්ස බ්රාහ්මණස්ස සම්බහුලා අන්තෙවාසිකා කට්ඨහාරකා{3} මාණවකා යෙන සො{4} වනසණ්ඩො තෙනුපසඞ්කමිංසු. උපසඞ්කමිත්වා අද්දසංසු භගවන්තං තස්මිං වනසණ්ඩෙ නිසින්නං පල්ලඞ්කං ආභුජිත්වා උජුං කායං පණිධාය පරිමුඛං සතිං උපට්ඨපෙත්වා.
දිස්වාන යෙන භාරද්වාජගොත්තො බ්රාහ්මණො තෙනුපසඞ්කමිංසු. උපසඞ්කමිත්වා භාරද්වාජගොත්තං බ්රාහ්මණං එතදවොචුං: යග්ඝෙ භවං ජානෙය්ය{5} අසුකස්මිං වනසණ්ඩෙ සමණො{6} නිසින්නො පල්ලඞ්කං ආභුජිත්වා උජුං කායං පණිධාය පරිමුඛං සතිං උපට්ඨපෙත්වාති.
අථ ඛො භාරද්වාජගොත්තො බ්රාහ්මණො තෙහි මාණවකෙහි සද්ධිං යෙන සො වනසණ්ඩො තෙනුපසඞ්කමි. උපසඞ්කමිත්වා අද්දසා ඛො භගවන්තං තස්මිං වනසණ්ඩෙ නිසින්නං පල්ලඞ්කං ආභුජිත්වා උජුං කායං පණිධාය පරිමුඛං සතිං උපට්ඨපෙත්වා. දිස්වාන යෙන භගවා තෙනුපසඞ්කමි. උපසඞ්කමිත්වා භගවන්තං ගාථාහි අජ්ඣභාසි:
ගම්භීරරූපෙ බහුභෙරවෙ වනෙ සුඤ්ඤං අරඤ්ඤං විජනං විගාහිය, අනිඤ්ජමානෙන ඨිතෙන{7} වග්ගුනා සුචාරුරූපං{8} වත භික්ඛු ඣායසි.
න යත්ථ ගීතා න පි යත්ථ වාදිතං එකො අරඤ්ඤෙ වනමස්සිතො මුනි, අච්ඡෙරරූපං පටිභාති මං ඉදං යදෙකකො පීතිමනො වනෙ වසෙ. මඤ්ඤාමහං{9} ලොකාධිපතී සහව්යතං{10} ආකඞ්ඛමානො තිදිවං අනුත්තරං, කස්මා භවං විජනමරඤ්ඤමස්සිතො තපො ඉධ කුබ්බසි{11} බ්රහ්මපත්තියාති.
[භගවා:]
යා කාචි කඞ්ඛා අභිනන්දනා වා අනෙකධාතූසු පුථූ සදාසිතා, අඤ්ඤාණමූලප්පභවා පජප්පිතා සබ්බා මයා බ්යන්තිකතා{1} සමූලිකා.
ස්වාහං අකඞ්ඛො අසිතො අනූපයො සබ්බෙසු ධම්මෙසු විසුද්ධදස්සනො, පප්පුය්ය සම්බොධිමනුත්තරං සිවං ඣායාමහං බ්රාහ්මණ{2} රහො විසාරදොති.
එවං වුත්තෙ භාරද්වාජගොත්තො බ්රාහ්මණො භගවන්තං එතදවොච: අභික්කන්තං භො ගොතම, -පෙ- උපාසකං මං භවං ගොතමො ධාරෙතු අජ්ජතග්ගෙ පාණුපෙතං සරණං ගතන්ති.
7. 2. 9.
මාතුපොසකසුත්තං
205. සාවත්ථියං–
අථ ඛො මාතුපොසකො බ්රාහ්මණො යෙන භගවා තෙනුපසඞ්කමි. උපසඞ්කමිත්වා භගවතා සද්ධිං සම්මොදි. සම්මොදනීයං කථං සාරාණීයං වීතිසාරෙත්වා එකමන්තං නිසීදි. එකමන්තං නිසින්නො ඛො මාතුපොසකො බ්රාහ්මණො භගවන්තං එතදවොච. අහං හි භො ගොතම ධම්මෙන භික්ඛං පරියෙසාමි. ධම්මෙන භික්ඛං පරියෙසිත්වා මාතාපිතරො පොසෙමි. කච්චාහං භො ගොතම එවංකාරී කිච්චකාරී හොමීති?
[භගවා:]
තග්ඝ ත්වං බ්රාහ්මණ එවංකාරී කිච්චකාරී හොසි{3}. යො ඛො බ්රාහ්මණ ධම්මෙන භික්ඛං පරියෙසති. ධම්මෙන භික්ඛං පරියෙසිත්වා මාතාපිතරො පොසෙති. බහුං{4} සො පුඤ්ඤං පසවතීති.
යො මාතරං වා{5} පිතරං වා මච්චො ධම්මෙන පොසති, තාය නං පාරිචරියාය මාතාපිතුසු පණ්ඩිතා, ඉධෙව නං පසංසන්ති පෙච්ච සග්ගෙ පමොදතීති.
එවං වුත්තෙ මාතුපොසකො බ්රාහ්මණො භගවන්තං එතදවොච: අභික්කන්තං භො ගොතම -පෙ- උපාසකං මං භවං ගොතමො ධාරෙතු අජ්ජතග්ගෙ පාණුපෙතං සරණං ගතන්ති.
7. 2. 10.
භික්ඛකසුත්තං
206. සාවත්ථියං–
අථ ඛො භික්ඛකො බ්රාහ්මණො යෙන භගවා තෙනුපසඞ්කමි. උපසඞ්කමිත්වා භගවතා සද්ධිං සම්මොදි. සම්මොදනීයං කථං සාරාණීයං වීතිසාරෙත්වා එකමන්තං නිසීදි. එකමන්තං නිසින්නො ඛො භික්ඛකො බ්රාහ්මණො භගවන්තං එතදවොච: අහම්පි ඛො{1} භො ගොතම භික්ඛකො භවම්පි භික්ඛකො ඉධ නො කිං නානාකරණන්ති?
[භගවා:]
න තෙන භික්ඛකො හොති යාවතා භික්ඛතෙ පරෙ, විස්සං ධම්මං සමාදාය භික්ඛු හොති න තාවතා.
යොධ පුඤ්ඤඤ්ච පාපඤ්ච බාහිත්වා{2} බ්රහ්මචරියවා{3}, සඞ්ඛාය ලොකෙ චරති ස වෙ භික්ඛූති වුච්චති.
එවං වුත්තෙ භික්ඛකො බ්රාහ්මණො භගවන්තං එතදවොච: අභික්කන්තං භො ගොතම, -පෙ- උපාසකං මං භවං ගොතමො ධාරෙතු අජ්ජතග්ගෙ පාණුපෙතං සරණං ගතන්ති.
7. 2. 11.
සඞ්ගාරවසුත්තං
207. සාවත්ථියං–
තෙන ඛො පන සමයෙන සඞ්ගාරවො{4} නාම බ්රාහ්මණො සාවත්ථියං පටිවසති. උදකසුද්ධිකො උදකෙන පරිසුද්ධිං{5} පච්චෙති. සායපාතං{6} උදකොරොහනානුයොගමනුයුත්තො විහරති.
අථ ඛො ආයස්මා ආනන්දො පුබ්බණ්හසමයං නිවාසෙත්වා පත්තචීවරමාදාය සාවත්ථිං පිණ්ඩාය පාවිසි. සාවත්ථියං පිණ්ඩාය චරිත්වා පච්ඡාභත්තං පිණ්ඩපාතපටික්කන්තො යෙන භගවා තෙනුපසඞ්කමි. උපසඞ්කමිත්වා භගවන්තං අභිවාදෙත්වා එකමන්තං නිසීදි. එකමන්තං නිසින්නො ඛො ආයස්මා ආනන්දො භගවන්තං එතදවොච: ඉධ භන්තෙ සඞ්ගාරවො{4} නාම බ්රාහ්මණො සාවත්ථියං පටිවසති, උදකසුද්ධිකො උදකෙන පරිසුද්ධිං{5} පච්චෙති සායපාතං{6} උදකොරොහනානුයොගමනුයුත්තො විහරති. සාධු භන්තෙ භගවා යෙන සඞ්ගාරවස්ස බ්රාහ්මණස්ස නිවෙසනං තෙනුපසඞ්කමතු අනුකම්පං උපාදායාති. අධිවාසෙසි භගවා තුණ්හීභාවෙන.
අථ ඛො භගවා පුබ්බන්හසමයං නිවාසෙත්වා පත්තචීවරමාදාය යෙන සඞ්ගාරවස්ස බ්රාහ්මණස්ස නිවෙසනං තෙනුපසඞ්කමි. උපසඞ්කමිත්වා පඤ්ඤත්තෙ ආසනෙ නිසීදි.
අථ ඛො සඞ්ගාරවො බ්රාහ්මණො යෙන භගවා තෙනුපසඞ්කමි. උපසඞ්කමිත්වා භගවතා සද්ධිං සම්මොදි. සම්මොදනීයං කථං සාරාණීයං වීතිසාරෙත්වා එකමන්තං නිසීදි. එකමන්තං නිසින්නං ඛො සඞ්ගාරවං බ්රාහ්මණං භගවා එතදවොච: සච්චං කිර ත්වං බ්රාහ්මණ උදකසුද්ධිකො උදකෙන පරිසුද්ධිං පච්චෙසි. සායපාතං උදකොරොහනානුයොගමනුයුත්තො විහරසීති.