එතාහි තීහි විජ්ජාහි තෙවිජ්ජො හොති බ්රාහ්මණො, විජ්ජාචරණසම්පන්නො සො මං භුඤ්ජෙය්ය පායසන්ති{2}.
[බ්රාහ්මණො:]
භුඤ්ජතු භවං{3} ගොතමො. බ්රාහ්මණො භවන්ති.
[භගවා:]
ගාථාභිගීතං මෙ අභොජනෙය්යං{4} සම්පස්සතං බ්රාහ්මණ නෙස ධම්මො, ගාථාභිගීතං පනුදන්ති බුද්ධා ධම්මෙ සති බ්රාහ්මණ වුත්තිරෙසා.
අඤ්ඤෙන ච කෙවලිනං මහෙසිං ඛීණාසවං කුක්කුච්චවූපසන්තං, අන්නෙන පානෙන උපට්ඨහස්සු ඛෙත්තං හි තං පුඤ්ඤපෙක්ඛස්ස හොතීති.
එවං වුත්තෙ අග්ගිකභාරද්වාජො බ්රාහ්මණො භගවන්තං එතදවොච: අභික්කන්තං භො ගොතම -පෙ- අඤ්ඤතරො ච පනායස්මා භාරද්වාජො අරහතං අහොසීති.
7. 1. 9.
සුන්දරිකසුත්තං.
195. එකං සමයං භගවා කොසලෙසු විහරති සුන්දරිකාය නදියා තීරෙ. තෙන ඛො පන සමයෙන සුන්දරිකභාරද්වාජො බ්රාහ්මණො සුන්දරිකාය නදියා තීරෙ අග්ගිං ජුහති. අග්ගිහුත්තං පරිචරති. අථ ඛො සුන්දරිකභාරද්වාජො බ්රාහ්මණො අග්ගිං ජුහිත්වා අග්ගිහුත්තං පරිචරිත්වා උට්ඨායාසනා සමන්තා චතුද්දිසා අනුවිලොකෙසි: කො නු ඛො ඉමං හබ්යසෙසං භුඤ්ජෙය්යාති. අද්දසා ඛො සුන්දරිකභාරද්වාජො බ්රාහ්මණො භගවන්තං අඤ්ඤතරස්මිං රුක්ඛමූලෙ සසීසං{5} පාරුතං නිසින්නං. දිස්වාන වාමෙන හත්ථෙන හව්යසෙසං ගහෙත්වා දක්ඛිණෙන හත්ථෙන කමණ්ඩලුං ගහෙත්වා යෙන භගවා තෙනුපසඞ්කමි.
අථ ඛො භගවා සුන්දරිකභාරද්වාජස්ස බ්රාහ්මණස්ස පදසද්දෙන සීසං විවරි.
අථ ඛො සුන්දරිකභාරද්වාජො බ්රාහ්මණො මුණ්ඩො අයං භවං මුණ්ඩකො අයං භවන්ති තතොව පුන නිවත්තිතුකාමො අහොසි. අථ ඛො සුන්දරිකභාරද්වාජස්ස බ්රාහ්මණස්ස එතදහොසි: මුණ්ඩාපි හි ඉධෙකච්චෙ බ්රාහ්මණා භවන්ති. යන්නූනාහං තං උපසඞ්කමිත්වා ජාතිං පුච්ඡෙය්යන්ති. අථ ඛො සුන්දරිකභාරද්වාජො බ්රාහ්මණො යෙන භගවා තෙනුපසඞ්කමි. උපසඞ්කමිත්වා භගවන්තං එතදවොච: කිංජච්චො භවන්ති.
[භගවා:]
මා ජාතිං පුච්ඡ චරණඤ්ච පුච්ඡ කට්ඨා හවෙ ජායති ජාතවෙදො, නීචා කුලීනොපි මුනී ධිතීමා ආජානීයො හොති හිරීනිසෙධො.
සච්චෙන දන්තො දමසා උපෙතො වෙදන්තගූ වුසිතබ්රහ්මචරියො, යඤ්ඤූපනීතො තමුපව්හයෙථ කාලෙන සො ජුහති දක්ඛිණෙය්යොති.
[බ්රාහ්මණො:]
අද්ධා සුයිට්ඨං සුහුතං මමයිදං යං තාදිසං වෙදගුමද්දසාමි, තුම්හාදිසානං හි අදස්සනෙන අඤ්ඤො ජනො භුඤ්ජති හව්යසෙසන්ති.
භුඤ්ජතු භවං ගොතමො. බ්රාහ්මණො භවන්ති.
[භගවා:]
ගාථාභිගීතං මෙ අභොජනෙය්යං සම්පස්සතං බ්රාහ්මණ නෙසධම්මො, ගාථාභිගීතං පනුදන්ති බුද්ධා ධම්මෙ සති බ්රාහ්මණ වුත්තිරෙසා.
අඤ්ඤෙන ච{1} කෙවලිනං මහෙසිං ඛීණාසවං කුක්කුච්චවූපසන්තං, අන්නෙන පානෙන උපට්ඨහස්සු ඛෙත්තං හි තං පුඤ්ඤපෙක්ඛස්ස හොතීති.
[බ්රාහ්මණො:]
අථ කස්ස චාහං භො ගොතම ඉමං හව්යසෙසං{2} දම්මීති.
[භගවා:]
න ඛ්වාහන්තං{3} බ්රාහ්මණ පස්සාමි සදෙවකෙ ලොකෙ සමාරකෙ සබ්රහ්මකෙ සස්සමණබ්රාහ්මණියා පජාය සදෙවමනුස්සාය යස්සෙසො හව්යසෙසො{4} භුත්තො සම්මා පරිණාමං ගච්ඡෙය්ය අඤ්ඤත්ර බ්රාහ්මණ{5} තථාගතස්ස වා තථාගතසාවකස්ස වා. තෙන හි ත්වං බ්රාහ්මණ තං හව්යසෙසං{4} අප්පහරිතෙ වා ඡඩ්ඩෙහි අප්පාණකෙ වා උදකෙ ඔපිලාපෙහීති.
අථ ඛො සුන්දරිකභාරද්වාජො බ්රාහ්මණො තං හව්යසෙසං{1} අප්පාණකෙ උදකෙ ඔපිලාපෙසි. අථ ඛො සො හව්යසෙසො උදකෙ පක්ඛිත්තො චිච්චිටායති, චිටිචිටායති, සන්ධූපායති, සම්පධූපායති. සෙය්යථාපි නාම ඵාලො දිවසෙ{1} සන්තත්තො උදකෙ පක්ඛිත්තො චිච්චිටායති, චිටිචිටායති, සන්ධූපායති, සම්පධූපායති, එවමෙව සො හව්යසෙසො උදකෙ පක්ඛිත්තො චිච්චිටායති, චිටිචිටායති, සන්ධූපායති, සම්පධූපායති. අථ ඛො සුන්දරිකභාරද්වාජො බ්රාහ්මණො සංවිග්ගො ලොමහට්ඨජාතො යෙන භගවා තෙනුපසඞ්කමි. උපසඞ්කමිත්වා එකමන්තං අට්ඨාසි. එකමන්තං ඨිතං ඛො සුන්දරිකභාරද්වාජං බ්රාහ්මණං භගවා ගාථාහි අජ්ඣභාසි:
මා බ්රාහ්මණ දාරුසමාදහානො සුද්ධිං අමඤ්ඤී බහිද්ධා හි එතං, න හි තෙන සුද්ධිං කුසලා වදන්ති යො බාහිරෙන පරිසුද්ධිමිච්ඡෙ.
හිත්වා අහං බ්රාහ්මණ දාරුදාහං අජ්ඣත්තමෙව ජලයාමි{2} ජොතිං, නිච්චග්ගිනි{3} නිච්චසමාහිතත්තො අරහං අහං බ්රහ්මචරියං චරාමි.
මානො හි තෙ බ්රාහ්මණ ඛාරිභාරො කොධො ධූමො භස්මනි මොසවජ්ජං,{4} ජිව්හා සුජා හදයං ජොතිඨානං අත්තා සුදන්තො පුරිසස්ස ජොති.
ධම්මො රහදො බ්රාහ්මණ සීලතිත්ථො අනාවිලො සබ්භි සතං පසත්ථො, යත්ථ හවෙ වෙදගුනො සිනාතා අනල්ලගත්තා{5}ව තරන්ති පාරං.
සච්චං ධම්මො සංයමො බ්රහ්මචරියං මජ්ඣෙසිතා බ්රාහ්මණ බ්රහ්මපත්ති, ස තුජ්ජුභූතෙසු නමො කරොහි තමහං නරං ධම්මසාරීති බ්රූමීති.
එවං වුත්තෙ සුන්දරිකභාරද්වාජො බ්රාහ්මණො භගවන්තං එතදවොච: අභික්කන්තං භො ගොතම -පෙ- අඤ්ඤතරො ච පනායස්මා භාරද්වාජො අරහතං අහොසීති.
7. 1. 10.
බහුධීතුසුත්තං.{*}
196. එකං සමයං භගවා කොසලෙසු විහරති අඤ්ඤතරස්මිං වනසණ්ඩෙ. තෙන ඛො පන සමයෙන අඤ්ඤතරස්ස භාරද්වාජගොත්තස්ස බ්රාහ්මණස්ස චතුද්දස බලිවද්දා{6} නට්ඨා හොන්ති. අථ ඛො භාරද්වාජගොත්තො බ්රාහ්මණො තෙ බලිවද්දෙ{6} ගවෙසන්තො යෙන සො වනසණ්ඩො තෙනුපසඞ්කමි. උපසඞ්කමිත්වා අද්දස භගවන්තං තස්මිං වනසණ්ඩෙ නිසින්නං පල්ලඞ්කං ආභුජිත්වා උජුං කායං පණිධාය පරිමුඛං සතිං උපට්ඨපෙත්වා. දිස්වාන යෙන භගවා තෙනුපසඞ්කමි. උපසඞ්කමිත්වා භගවතො සන්තිකෙ ඉමා ගාථායො අභාසි:
න හි{1} නූනිමස්ස සමණස්ස බලිවද්දා චතුද්දස, අජ්ජ සට්ඨි න දිස්සන්ති තෙනායං සමණො සුඛී.
න හි නූනිමස්ස සමණස්ස තිලා ඛෙත්තස්මිං{2} පාපකා{3}, එකපණ්ණා දුපණ්ණා{4} ච තෙනායං සමණො සුඛී.
න හි නූනිමස්ස සමණස්ස තුච්ඡකොට්ඨස්මිං{5} මූසිකා, උස්සොළ්හිකාය නච්චන්ති තෙනායං සමණො සුඛී.
න හි නූනිමස්ස සමණස්ස, සන්ථාරො සත්තමාසිකො, උප්පාටකෙහි{6} සංඡන්නො තෙනායං සමණො සුඛී.
න හි නූනිමස්ස සමණස්ස විධවා සත්ත{7}ධීතරො, එකපුත්තා දුපුත්තා ච තෙනායං සමණො සුඛී.
න හි නූනිමස්ස සමණස්ස පිඞ්ගලා තිලකාහතා, සොත්තං පාදෙන බොධෙති{8} තෙනායං සමණො සුඛී.
න හි නූනිමස්ස සමණස්ස පච්චූසම්හි ඉණායිකා, දෙථ දෙථාති චොදෙන්ති තෙනායං සමණො සුඛීති.
[භගවා:]
න හි මය්හං බ්රාහ්මණ බලිවද්දා චතුද්දස, අජ්ජ සට්ඨි න දිස්සන්ති තෙනාහං බ්රාහ්මණා සුඛී.
න හි මය්හං බ්රාහ්මණ තිලාඛෙත්තම්හි පාපකා, එකපණ්ණා දුපණ්ණා ච තෙනාහං බ්රාහ්මණා{9} සුඛී.
න හි මය්හං බ්රාහ්මණ තුච්ඡකොට්ඨස්මිං මූසිකා, උස්සොළ්හිකාය නච්චන්ති තෙනාහං බ්රාහ්මණා{9} සුඛී.
න හි මය්හං බ්රාහ්මණ සන්ථාරො සත්තමාසිකො, උප්පාටකෙහි සඤ්ඡන්නො තෙනාහං බ්රාහ්මණා{9} සුඛී.
න හි මය්හං බ්රාහ්මණ විධවා සත්තධීතරො, එකපුත්තා දුපුත්තා ච තෙනාහං බ්රාහ්මණා{9} සුඛී.
න හි මය්හං බ්රාහ්මණ පිඞ්ගලා තිලකාහතා, සොත්තං පාදෙන බොධෙති{8} තෙනාහං බ්රාහ්මණා{9} සුඛී.
න හි මය්හං බ්රාහ්මණ පච්චූසම්හි ඉණායිකා, දෙථ දෙථාති චොදෙන්ති තෙනාහං බ්රාහ්මණා සුඛීති.
එවං වුත්තෙ භාරද්වාජගොත්තො බ්රාහ්මණො භගවන්තං එතදවොච: අභික්කන්තං භො ගොතම අභික්කන්තං භො ගොතම. සෙය්යථාපි භො ගොතම නික්කුජ්ජිතං වා උක්කුජ්ජෙය්ය, පටිච්ඡන්නං වා විවරෙය්ය මූළ්හස්ස වා මග්ගං ආචික්ඛෙය්ය අන්ධකාරෙ වා තෙලපජ්ජොතං ධාරෙය්ය චක්ඛුමන්තො රූපානි දක්ඛින්ති, එවමෙවං භොතා ගොතමෙන අනෙකපරියායෙන ධම්මො පකාසිතො. එසාහං භවන්තං ගොතමං සරණං ගච්ඡාමි ධම්මඤ්ච භික්ඛුසඞ්ඝඤ්ච. ලභෙය්යාහං භොතො ගොතමස්ස සන්තිකෙ පබ්බජ්ජං ලභෙය්යං උපසම්පදන්ති.
අලත්ථ ඛො භාරද්වාජගොත්තො බ්රාහ්මණො භගවතො සන්තිකෙ පබ්බජ්ජං අලත්ථ උපසම්පදං. අචිරූපසම්පන්නො ච පනායස්මා භාරද්වාජො එකො වූපකට්ඨො අප්පමත්තො ආතාපී පහිතත්තො විහරන්තො න චිරස්සෙව යස්සත්ථාය කුලපුත්තා සම්මදෙව අගාරස්මා අනගාරියං පබ්බජන්ති, තදනුත්තරං බ්රහ්මචරියපරියොසානං දිට්ඨෙව ධම්මෙ සයං අභිඤ්ඤා සච්ඡිකත්වා උපසම්පජ්ජ විහාසි. ඛීණා ජාති, වුසිතං බ්රහ්මචරියං, කතං කරණීයං, නාපරං ඉත්ථත්තායාති අබ්භඤ්ඤාසි. අඤ්ඤතරො ච පනායස්මා භාරද්වාජො අරහතං අහොසීති.
අරහන්තවග්ගො පඨමො.
තත්රුද්දානං:
ධනඤ්ජානී{1} ච අක්කොසං අසුරින්දං බිලඞ්ගිකං, අහිංසකං ජටා චෙව සුද්ධිකඤ්චෙ ව අග්ගිකා, සුන්දරිකං බහුධීතුකෙන{2} ච තෙ දසාති.
2. උපාසකවග්ගො
7. 2. 1.
කසීසුත්තං.
197. එවං මෙ සුතං: එකං සමයං භගවා මගධෙසු විහරති දක්ඛිණාගිරිස්මිං එකනාළායං බ්රාහ්මණගාමෙ. තෙන ඛො පන සමයෙන කසිභාරද්වාජස්ස බ්රාහ්මණස්ස පඤ්චමත්තානි නඞ්ගලසතානි පයුත්තානි හොන්ති වප්පකාලෙ.
අථ ඛො භගවා පුබ්බණ්හසමයං නිවාසෙත්වා පත්තචීවරමාදාය යෙන කසිභාරද්වාජස්ස බ්රාහ්මණස්ස කම්මන්තො තෙනුපසඞ්කමි. තෙන ඛො පන සමයෙන කසිභාරද්වාජස්ස බ්රාහ්මණස්ස පරිවෙසනා වත්තති. අථ ඛො භගවා යෙන පරිවෙසනා තෙනුපසඞ්කමි. උපසඞ්කමිත්වා එකමන්තං අට්ඨාසි.
අද්දසා ඛො කසීභාරද්වාජො බ්රාහ්මණො භගවන්තං පිණ්ඩාය ඨිතං. දිස්වාන භගවන්තං එතදවොච: අහං ඛො සමණ කසාමි ච වපාමි ච. කසිත්වා ච වපිත්වා ච භුඤ්ජාමි. ත්වම්පි සමණ කසස්සු ච, වපස්සු ච, කසිත්වා ච වපිත්වා ච භුඤ්ජස්සූති.
[භගවා:]
අහම්පි ඛො බ්රාහ්මණ කසාමි ච වපාමි ච කසිත්වා ච වපිත්වා ච භුඤ්ජාමීති.
[බ්රාහ්මණො:]
න ඛො පන මයං{1} පස්සාම භොතො ගොතමස්ස යුගං වා නඞ්ගලං වා ඵාලං වා පාචනං වා බලිවද්දෙ වා. අථ ච පන භවං ගොතමො එවමාහ. අහම්පි ඛො බ්රාහ්මණ කසාමි ච වපාමි ච කසිත්වා ච වපිත්වා ච භුඤ්ජාමීති.
අථ ඛො කසීභාරද්වාජො බ්රාහ්මණො භගවන්තං ගාථාය අජ්ඣභාසි:
කස්සකො පටිජානාසි න ච පස්සාමි තෙ කසිං, කස්සකො පුච්ඡිතො බ්රූහි කථං ජානෙමු තං කසින්ති?
[භගවා:]
සද්ධා බීජං තපො වුට්ඨී පඤ්ඤා මෙ යුගනඞ්ගලං, හිරි{2} ඊසා මනො යොත්තං සති මෙ ඵාලපාචනං.
කායගුත්තො වචීගුත්තො ආහාරෙ උදරෙ යතො, සච්චං කරොමි නිද්දානං සොරච්චං මෙ පමොචනං.
විරියං මෙ ධුරධොරය්හං යොගක්ඛෙමාධිවාහනං, ගච්ඡති අනිවත්තන්තං යත්ථ ගන්ත්වා න සොචති.
එවමෙසා කසී කට්ඨා සා හොති අමතප්ඵලා, එතං කසිං කසිත්වාන සබ්බදුක්ඛා පමුච්චතීති.
[බ්රාහ්මණො:]
භුඤ්ජතු භවං ගොතමො. කස්සකො භවං{3}, යඤ්හි{4} භවං ගොතමො අමතඵලං කසිං{5} කසතීති.
[භගවා:]
ගාථාභිගීතම්මෙ අභොජනෙය්යං සම්පස්සතං බ්රාහ්මණ නෙසධම්මො, ගාථාභිගීතං පනුදන්ති බුද්ධා ධම්මෙ සති බ්රාහ්මණ වුත්තිරෙසා.
අඤ්ඤෙන ච කෙවලිනං මහෙසිං ඛීණාසවං කුක්කුච්ච වූපසන්තං, අන්නෙන පානෙන උපට්ඨහස්සු ඛෙත්තඤ්හි තං පුඤ්ඤපෙක්ඛස්ස{6} හොතීති.
එවං වුත්තෙ කසිභාරද්වාජො බ්රාහ්මණො භගවන්තං එතදවොච: අභික්කන්තං භො ගොතම අභික්කන්තං භො ගොතම. සෙය්යථාපි භො ගොතම නික්කුජ්ජිතං වා උක්කුජ්ජෙය්ය පටිච්ඡන්නං වා විවරෙය්ය මූළ්හස්ස වා මග්ගං ආචික්ඛෙය්ය අන්ධකාරෙ වා තෙල පජ්ජොතං ධාරෙය්ය චක්ඛුමන්තො රූපානි දක්ඛින්ති, එවමෙවං භොතා ගොතමෙන අනෙකපරියායෙන ධම්මො පකාසිතො. එසාහං භවන්තං ගොතමං සරණං ගච්ඡාමි ධම්මඤ්ච භික්ඛුසඞ්ඝඤ්ච. උපාසකං මං භවං ගොතමො ධාරෙතු අජ්ජතග්ගෙ පාණුපෙතං සරණං ගතන්ති.
7. 2. 2.
උදයසුත්තං.
198. සාවත්ථියං–
අථ ඛො භගවා පුබ්බණ්හසමයං නිවාසෙත්වා පත්තචීවරමාදාය යෙන උදයස්ස බ්රාහ්මණස්ස නිවෙසනං තෙනුපසඞ්කමි. අථ ඛො උදයො බ්රාහ්මණො භගවතො පත්තං ඔදනෙන පූරෙසි. දුතියම්පි ඛො භගවා පුබ්බණ්හසමයං නිවාසෙත්වා පත්තචීවරමාදාය යෙන උදයස්ස බ්රාහ්මණස්ස නිවෙසනං තෙනුපසඞ්කමි. දුතියම්පි ඛො උදයො බ්රාහ්මණො භගවතො පත්තං ඔදනෙන පූරෙසි. තතියම්පි ඛො භගවා පුබ්බණ්හසමයං නිවාසෙත්වා පත්තචීවරමාදාය යෙන උදයස්ස බ්රාහ්මණස්ස නිවෙසනං තෙනුපසඞ්කමි. තතියම්පි ඛො උදයො බ්රාහ්මණො භගවතො පත්තං ඔදනෙන පූරෙත්වා භගවන්තං එතදවොච: පකට්ඨකොයං{1} සමණො ගොතමො පුනප්පුනං ආගච්ඡතීති.
[භගවා:]
පුනප්පුනං චෙව වපන්ති බීජං පුනප්පුනං වස්සති දෙවරාජා, පුනප්පුනං ඛෙත්තං කසන්ති කස්සකා පුනප්පුනං ධඤ්ඤමුපෙති රට්ඨං.
පුනප්පුනං යාචකා{2} යාචයන්ති පුනප්පුනං දානපතී දදන්ති, පුනප්පුනං දානපතී දදිත්වා පුනප්පුනං සග්ගමුපෙන්ති ඨානං.
පුනප්පුනං ඛීරනිකා{3} දුහන්ති පුනප්පුනං වච්ඡො උපෙති{4} මාතරං, පුනප්පුනං කිලමති ඵන්දති ච පුනප්පුනං ගබ්භමුපෙති මන්දො.
පුනප්පුනං ජායති මීයති ච පුනප්පුනං සීවථිකං හරන්ති, මග්ගඤ්ච ලද්ධා අපුනබ්භවාය න පුනප්පුනං ජායති භූරිපඤ්ඤොති.
එවං වුත්තෙ උදයො බ්රාහ්මණො භගවන්තං එතදවොච: අභික්කන්තං භො ගොතම -පෙ- උපාසකං මං භවං ගොතමො ධාරෙතු අජ්ජතග්ගෙ පාණුපෙතං සරණං ගතන්ති.
7. 2. 3.
දෙවහිතසුත්තං.
199. සාවත්ථියං–
තෙන ඛො පන සමයෙන භගවා වාතෙහි ආබාධිකො හොති. ආයස්මා ච උපවානො භගවතො උපට්ඨාකො හොති.
අථ ඛො භගවා ආයස්මන්තං උපවානං ආමන්තෙසි: ඉඞ්ඝ මෙ ත්වං උපවාණ උණ්හොදකං ජානාහී ති.
එවං භන්තෙති ඛො ආයස්මා උපවානො භගවතො පටිස්සුත්වා නිවාසෙත්වා පත්තචීවරමාදාය යෙන දෙවහිතස්ස බ්රාහ්මණස්ස නිවෙසනං තෙනුපසඞ්කමි. උපසඞ්කමිත්වා තුණ්හීභූතො එකමන්තං අට්ඨාසි.
අද්දසා ඛො දෙවහිතො බ්රාහ්මණො ආයස්මන්තං උපවානං තුණ්හීභූතං එකමන්තං ඨිතං. දිස්වාන ආයස්මන්තං උපවානං ගාථාය අජ්ඣභාසි:
තුණ්හීභූතො භවං තිට්ඨං මුණ්ඩො සඞ්ඝාටිපාරුතො, කිං පත්ථයානො කිං එසං කින්නු යාචිතුමාගතොති?
[උපවානො:]
අරහං සුගතො ලොකෙ වාතෙහාබාධිකො මුනි, සචෙ උණ්හොදකං අත්ථි මුනිනො දෙහි බ්රාහ්මණ.
පූජිතො පූජනෙය්යානං සක්කරෙය්යාන{1} සක්කතො, අපචිතො අපචෙය්යානං{2} තස්ස ඉච්ඡාමි හාතවෙති.
අථ ඛො දෙවහිතො බ්රාහ්මණො උණ්හොදකස්ස කාජං පුරිසෙන ගාහාපෙත්වා{3} ඵාණිතස්ස ච පුටං ආයස්මතො උපවානස්ස පාදාසි.