නන්දති{1}සුත්තං
12. සාවත්ථියං–
එකමන්තං ඨිතා ඛො සා දෙවතා භගවතො සන්තිකෙ ඉමං ගාථං අභාසි:
නන්දති පුත්තෙහි පුත්තිමා ගොමිකො{2} ගොහි තථෙව නන්දති, උපධී හි නරස්ස නන්දනා න හි සො නන්දති යො නිරූපධීති{3}
[භගවා:]
සොචති පුත්තෙහි පුත්තිමා ගොමිකො ගොහි තථෙව සොචති, උපධී හි නරස්ස සොචනා න හි සො සොචති යො නිරූපධීති.
1. 2. 3.
නත්ථිපුත්තසුත්තං
13. සාවත්ථියං–
එකමන්තං ඨිතා ඛො සා දෙවතා භගවතො සන්තිකෙ ඉමං ගාථං අභාසි:
නත්ථි පුත්තසමං පෙමං නත්ථි ගොසමිතං ධනං, නත්ථි සුරියසමා{4} ආභා සමුද්දපරමා සරාති.
[භගවා:]
නත්ථි අත්තසමං පෙමං නත්ථි ධඤ්ඤසමං ධනං, නත්ථි පඤ්ඤාසමා ආභා වුට්ඨි වෙ පරමා සරාති.
1. 2. 4.
ඛත්තියසුත්තං
14. සාවත්ථියං–
එකමන්තං ඨිතා ඛො සා දෙවතා භගවතො සන්තිකෙ ඉමං ගාථං අභාසි:
ඛත්තියො දිපදං{5} සෙට්ඨො බලිවද්දො{6} චතුප්පදං, කොමාරී{7} සෙට්ඨා භරියානං යො ච පුත්තාන{8} පුබ්බජොති.
[භගවා:]
සම්බුද්ධො ද්විපදං{5} සෙට්ඨො ආජානීයො චතුප්පදං, සුස්සූසා සෙට්ඨා භරියානං යො ච පුත්තානමස්සවොති.
1. 2. 5.
සනමාන{1}සුත්තං
15. සාවත්ථියං–
[දෙවතා:]
ඨිතෙ මජ්ඣන්තිකෙ කාලෙ සන්නිසීවෙසු{2} පක්ඛිසු, සනතෙව{3} බ්රහාරඤ්ඤං{4} තං භයං පටිභාති මන්ති.
[භගවා:]
ඨිතෙ මජ්ඣන්තිකෙ කාලෙ සන්නිසීවෙසු{2} පක්ඛිසු, සනතෙව බ්රහාරඤ්ඤං{4} සා රතී{5} පටිභාති මන්ති.
1. 2. 6.
නිද්දාතන්දීසුත්තං
16. සාවත්ථියං–
[දෙවතා:]
නිද්දා තන්දි{6} විජම්භිකා{7} අරතී භත්තසම්මදො, එතෙන නප්පකාසති අරියමග්ගො ඉධ පාණිනන්ති.
[භගවා:]
නිද්දං තන්දිං විජම්භිකං{8} අරතිං භත්තසම්මදං විරියෙන{9} නං පණාමෙත්වා අරියමග්ගො විසුජ්ඣතීති.
1. 2. 7.
දුක්කරසුත්තං
17. සාවත්ථියං–
[දෙවතා:]
දුක්කරං දුත්තිතික්ඛඤ්ච අබ්යත්තෙන හි{10} සාමඤ්ඤං, බහූ හි තත්ථ සම්බාධා යත්ථ බාලො විසීදතීති.
[භගවා:]
කතිහං චරෙය්ය සාමඤ්ඤං චිත්තං චෙ න නිවාරයෙ,{11} පදෙ පදෙ විසීදෙය්ය සඞ්කප්පානං වසානුගො.
කුම්මොව අඞ්ගානි සකෙ කපාලෙ සමොදහං භික්ඛු මනොවිතක්කෙ, අනිස්සිතො අඤ්ඤමහෙඨයානො පරිනිබ්බුතො න උපවදෙය්ය{12} කඤ්චීති.
1. 2. 8.
හිරිසුත්තං
18. සාවත්ථියං–
[දෙවතා:]
හිරීනිසෙධො පුරිසො කො චි ලොකස්මිං විජ්ජති, යො නින්දං අප්පබොධති අස්සො භද්රො කසාමිවාති.
[භගවා:]
හිරීනිසෙධා තනුයා යෙ චරන්ති සදා සතා, අන්තං දුක්ඛස්ස පප්පුය්ය චරන්ති විසමෙ සමන්ති.
1. 2. 9.
කුටිකාසුත්තං
19. සාවත්ථියං–
[දෙවතා:]
කච්චි තෙ කුටිකා නත්ථි කච්චි නත්ථි කුලාවකා, කච්චි සන්තානකා නත්ථි කච්චි මුත්තොසි බන්ධනාති.
[භගවා:]
තග්ඝ මෙ කුටිකා නත්ථි තග්ඝ නත්ථි කුලාවකා, තග්ඝ සන්තානකා නත්ථි තග්ඝ මුත්තො’ස්මි බන්ධනාති.
[දෙවතා:]
කින්තාහං කුටිකං බ්රූමි කින්තෙ බ්රූමි කුලාවකං, කින්තෙ සන්තාන{1}කං බ්රූමි කින්තාහං බ්රූමි බන්ධනන්ති.
[භගවා:]
මාතරං කුටිකං බ්රූසි භරියං බ්රූසි කුලාවකං, පුත්තෙ සන්තානකෙ බ්රූසි තණ්හං මෙ බ්රූසි බන්ධනන්ති.
[දෙවතා:]
සාහු තෙ කුටිකා නත්ථි සාහු නත්ථි කුලාවකා, සාහු සන්තානකා නත්ථි සාහු මුත්තොසි බන්ධනාති.
1. 2. 10.
සමිද්ධිසුත්තං
20. එවම්මෙ සුතං එකං සමයං භගවා රාජගහෙ විහරති තපොදාරාමෙ.
අථ ඛො ආයස්මා සමිද්ධි රත්තියා පච්චූසසමයං පච්චුට්ඨාය යෙන තපොදා තෙනුපසඞ්කමි ගත්තානි පරිසිඤ්චිතුං. තපොදෙ ගත්තානි පරිසිඤ්චිත්වා පච්චුත්තරිත්වා එකචීවරො අට්ඨාසි ගත්තානි පුබ්බාපයමානො{1}.
අථ ඛො අඤ්ඤතරා දෙවතා අභික්කන්තාය රත්තියා අභික්කන්තවණ්ණා කෙවලකප්පං තපොදං ඔභාසෙත්වා යෙනායස්මා සමිද්ධි තෙනුපසඞ්කමි. උපසඞ්කමිත්වා වෙහාසං ඨිතා ආයස්මන්තං සමිද්ධිං ගාථාය{2} අජ්ඣභාසි:
අභුත්වා භික්ඛසි භික්ඛු න හි භුත්වාන භික්ඛසි, භුත්වාන භික්ඛු භික්ඛස්සු මා තං කාලො උපච්චගාති.
[සමිද්ධි:]
කාලං වො’හං න ජානාමි ඡන්නො කාලො න දිස්සති, තස්මා අභුත්වා භික්ඛාමි මා මං කාලො උපච්චගාති.
අථ ඛො සා දෙවතා පඨවියං{3} පතිට්ඨහිත්වා ආයස්මන්තං සමිද්ධිං එතදවොච:
දහරො ත්වං භික්ඛු පබ්බජිතො සුසුකාලකෙසො භද්රෙන{4} යොබ්බනෙන සමන්නාගතො පඨමෙන වයසා අනිකීළිතාවී{5} කාමෙසු. භුඤ්ජ භික්ඛු මානුසකෙ කාමෙ. මා සන්දිට්ඨිකං හිත්වා කාලිකං අනුධාවීති.
[සමිද්ධි:]
න ඛ්වාහං ආවුසො සන්දිට්ඨිකං හිත්වා කාලිකං අනුධාවාමි. කාලිකඤ්ච ඛ්වාහං ආවුසො හිත්වා සන්දිට්ඨිකං අනුධාවාමි. කාලිකාහි ආවුසො කාමා වුත්තා භගවතා බහුදුක්ඛා බහුපායාසා ආදීනවො එත්ථ භිය්යො{6}. සන්දිට්ඨිකො අයං ධම්මො අකාලිකො එහිපස්සිකො ඔපනයිකො{7} පච්චත්තං වෙදිතබ්බො විඤ්ඤූහීති.
[දෙවතා:]
කථඤ්ච භික්ඛු කාලිකා කාමා වුත්තා භගවතා බහුදුක්ඛා බහුපායාසා ආදීනවො එත්ථ භිය්යො. කථං සන්දිට්ඨිකො අයං ධම්මො අකාලිකො එහිපස්සිකො ඔපනයිකො පච්චත්තං වෙදිතබ්බො විඤ්ඤූහීති.
[සමිද්ධි:]
අහං ඛො ආවුසො නවො අචිරපබ්බජිතො අධුනාගතො ඉමං ධම්මවිනයං. න ඛ්වාහං{8} සක්කොමි විත්ථාරෙන ආචික්ඛිතුං. අයං සො භගවා අරහං සම්මාසම්බුද්ධො රාජගහෙ විහරති තපොදාරාමෙ. තං භගවන්තං උපසඞ්කමිත්වා එතමත්ථං පුච්ඡෙය්යාසි{9}. යථා තෙ භගවා ව්යාකරොති,{10} තථා නං ධාරෙය්යාසී”ති.
[දෙවතා:]
න ඛො භික්ඛු සුකරො සො භගවා අම්හෙහි උපසඞ්කමිතුං. අඤ්ඤාහි මහෙසක්ඛාහි දෙවතාහි පරිවුතො. සචෙ ඛො ත්වං භික්ඛු තං භගවන්තං උපසඞ්කමිත්වා එතමත්ථං පුච්ඡෙය්යාසි. මයම්පි ආගච්ඡෙය්යාම ධම්මසවණායාති.{1}
එවමාවුසොති ඛො ආයස්මා සමිද්ධි තස්සා දෙවතාය පටිස්සුත්වා{2} යෙන භගවා තෙනුපසඞ්කමි. උපසඞ්කමිත්වා භගවන්තං අභිවාදෙත්වා එකමන්තං නිසීදි. එකමන්තං නිසින්නො ඛො ආයස්මා සමිද්ධි භගවන්තං එතදවොච:
ඉදාහං භන්තෙ රත්තියා පච්චූසසමයං{3} පච්චුට්ඨාය යෙන තපොදා තෙනුපසඞ්කමිං ගත්තානි පරිසිඤ්චිතුං. තපොදෙ ගත්තානි පරිසිඤ්චිත්වා පච්චුත්තරිත්වා එකචීවරො අට්ඨාසිං ගත්තානි පුබ්බාපයමානො. අථ ඛො භන්තෙ අඤ්ඤතරා දෙවතා අභික්කන්තාය රත්තියා අභික්කන්තවණ්ණා කෙවලකප්පං තපොදං ඔභාසෙත්වා යෙනාහං තෙනුපසඞ්කමි. උපසඞ්කමිත්වා වෙහාසං ඨිතා ඉමාය ගාථාය අජ්ඣභාසි:
අභුත්වා භික්ඛසි භික්ඛු න හි භුත්වාන භික්ඛසි, භුත්වාන භික්ඛු භික්ඛස්සු මා තං කාලො උපච්චගා”ති.
එවං වුත්තෙ අහං භන්තෙ තං දෙවතං ගාථාය පච්චභාසිං.{4}
කාලං වො’හං න ජානාමි ඡන්නො කාලො න දිස්සති, තස්මා අභුත්වා භික්ඛාමි මා මං කාලො උපච්චගා”ති.
අථ ඛො භන්තෙ සා දෙවතා පඨවියං පතිට්ඨහිත්වා මං එතදවොච: දහරො ත්වං භික්ඛු පබ්බජිතො සුසු කාළකෙසො භද්රෙන යොබ්බනෙන සමන්නාගතො පඨමෙන වයසා, අනිකීළිතාවී කාමෙසු. භුඤ්ජ භික්ඛු මානුසකෙ කාමෙ. මා සන්දිට්ඨිකං හිත්වා කාලිකං අනුධාවීති.
එවං වුත්තෙ හං{5} භන්තෙ තං දෙවතං එතදවොචං: “න ඛ්වාහං ආවුසො සන්දිට්ඨිකං හිත්වා කාලිකං අනුධාවාමි. කාලිකඤ්ච ඛ්වාහං ආවුසො හිත්වා සන්දිට්ඨිකං අනුධාවාමි. ‘කාලිකා හි ආවුසො කාමා වුත්තා භගවතා බහුදුක්ඛා බහුපායාසා ආදීනවො එත්ථ භිය්යො.’ සන්දිට්ඨිකො අයං ධම්මො අකාලිකො එහිපස්සිකො ඔපනයිකො පච්චත්තං වෙදිතබ්බො විඤ්ඤූහීති.”
එවං වුත්තෙ භන්තෙ සා දෙවතා මං එතදවොච: කථඤ්ච භික්ඛු කාලිකා කාමා වුත්තා භගවතා බහුදුක්ඛා බහුපායාසා ආදීනවො එත්ථ භිය්යො. කථං සන්දිට්ඨිකො අයං ධම්මො අකාලිකො එහිපස්සිකො ඔපනයිකො පච්චත්තං වෙදිතබ්බො විඤ්ඤූහීති.
එවං වුත්තෙ’හං භන්තෙ තං දෙවතං එතදවොචං: අහං ඛො ආවුසො නවො අචිරපබ්බජිතො අධුනාගතො ඉමං ධම්මවිනයං. න ඛ්වාහං සක්කොමි විත්ථාරෙන ආචික්ඛිතුං. අයං සො භගවා අරහං සම්මාසම්බුද්ධො රාජගහෙ විහරති තපොදාරාමෙ. තං භගවන්තං උපසඞ්කමිත්වා එතමත්ථං පුච්ඡෙය්යාසි. යථා තෙ භගවා ව්යාකරොති තථා නං ධාරෙය්යාසීති.
එවං වුත්තෙ භන්තෙ සා දෙවතා මං එතදවොච: “න ඛො භික්ඛු සුකරො සො භගවා අම්හෙහි උපසඞ්කමිතුං, අඤ්ඤාහි මහෙසක්ඛාහි දෙවතාහි පරිවුතො. සචෙ ඛො ත්වං භික්ඛු තං භගවන්තං උපසඞ්කමිත්වා එතමත්ථං පුච්ඡෙය්යාසි. මයම්පි ආගච්ඡෙය්යාම ධම්මස්සවනායා”ති. සචෙ භන්තෙ තස්සා දෙවතාය සච්චං වචනං, ඉධෙව සා දෙවතා අවිදූරෙති.
එවං වුත්තෙ සා දෙවතා ආයස්මන්තං සමිද්ධිං එතදවොච: පුච්ඡ භික්ඛු, පුච්ඡ භික්ඛු, අයමහං{1} අනුප්පත්තාති.
අථ ඛො භගවා තං දෙවතං ගාථාය අජ්ඣභාසි:
අක්ඛෙය්ය සඤ්ඤිනො සත්තා අක්ඛෙය්යස්මිං පතිට්ඨිතා, අක්ඛෙය්යෙ අපරිඤ්ඤාය යොගමායන්ති මච්චුනො.
අක්ඛෙය්යෙ ච{2} පරිඤ්ඤාය අක්ඛාතාරං න මඤ්ඤති, තඤ්හි තස්ස න හොතීති යෙන නං වජ්ජා න තස්ස අත්ථි, සචෙ විජානාසි වදෙහි යක්ඛාති.
[දෙවතා:]
න ඛ්වාහං භන්තෙ ඉමස්ස භගවතා සඞ්ඛිත්තෙන භාසිතස්ස විත්ථාරෙන අත්ථං ආජානාමි. සාධු මෙ භන්තෙ භගවා තථා භාසතු. යථාහං ඉමස්ස භගවතා සඞ්ඛිත්තෙන භාසිතස්ස විත්ථාරෙන අත්ථං ආජානෙය්යන්ති.{3}
[භගවා:]
සමො විසෙසී උදවා{4} නිහීනො යො මඤ්ඤතී සො විවදෙථ තෙන, තීසු විධාසු අවිකම්පමානො සමො විසෙසීති න තස්ස හොති, සචෙ විජානාසි වදෙහි යක්ඛ.
[දෙවතා:]
ඉමස්සපි ඛ්වාහං භන්තෙ භගවතා සඞ්ඛිත්තෙන භාසිතස්ස න විත්ථාරෙන අත්ථං ආජානාමි. සාධු මෙ භන්තෙ භගවා තථා භාසතු, යථාහං ඉමස්ස භගවතා සඞ්ඛිත්තෙන භාසිතස්ස විත්ථාරෙන අත්ථං ආජානෙය්යන්ති.{3}