නත්ථි නිස්සරණං ලොකෙ කිං විවෙකෙන කාහසි, භුඤ්ජස්සු කාමරතියො මාහු පච්ඡානුතාපිනීති.
අථ ඛො ආළවිකාය භික්ඛුනියා එතදහොසි: ‘කො නුඛ්වායං{1} මනුස්සො වා අමනුස්සො වා ගාථං භාසතී’ති? අථ ඛො ආළවිකාය භික්ඛුනියා එතදහොසි: ‘මාරො ඛො අයං පාපිමා මම භයං ඡම්භිතත්තං ලොමහංසං උප්පාදෙතුකාමො විවෙකම්හා චාවෙතුකාමො ගාථං භාසතී’ති. අථ ඛො ආළවිකා භික්ඛුනී මාරො අයං පාපිමා ඉති විදිත්වා මාරං පාපිමන්තං ගාථාහි පච්චභාසි:{2}
අත්ථි නිස්සරණං ලොකෙ පඤ්ඤාය මෙ සුඵස්සිතං,{1} පමත්තබන්ධු පාපිම න ත්වං ජානාසි තං පදං.
සත්තිසූලූපමා කාමා ඛන්ධාසං අධිකුට්ටනා, යං ත්වං කාමරතිං බ්රූසි අරති මය්හං{2} සා අහූති.
අථ ඛො මාරො පාපිමා ජානාති මං ආළවිකා භික්ඛුනීති දුක්ඛී දුම්මනො තත්ථෙවන්තරධායීති.
5. 1. 2.
සොමාසුත්තං.
163. සාවත්ථියං–
අථ ඛො සොමා භික්ඛුනී පුබ්බණ්හසමයං නිවාසෙත්වා පත්තචීවරමාදාය සාවත්ථිං පිණ්ඩාය පාවිසි. සාවත්ථියං පිණ්ඩාය චරිත්වා පච්ඡාභත්තං පිණ්ඩපාතපටික්කන්තා යෙන අන්ධවනං තෙනුපසඞ්කමි දිවාවිහාරාය. අන්ධවනං අජ්ඣොගහෙත්වා අඤ්ඤතරස්මිං රුක්ඛමූලෙ දිවාවිහාරං{3} නිසීදි.
අථ ඛො මාරො පාපිමා සොමාය භික්ඛුනියා භයං ඡම්භිතත්තං ලොමහංසං උප්පාදෙතුකාමො සමාධිම්හා චාවෙතුකාමො යෙන සොමා භික්ඛුනී තෙනුපසඞ්කමි. උපසඞ්කමිත්වා සොමං භික්ඛුනිං ගාථාය අජ්ඣභාසි:
යන්තං ඉසීහි පත්තබ්බං ඨානං දුරභිසම්භවං, න තං ද්වඞ්ගුලපඤ්ඤාය සක්කා පප්පොතුමිත්ථියාති.
අථ ඛො සොමාය භික්ඛුනියා එතදහොසි: ‘කො නුඛ්වායං{4} මනුස්සො වා අමනුස්සො වා ගාථං භාසතී’ති. අථ ඛො සොමාය භික්ඛුනියා එතදහොසි: ‘මාරො ඛො අයං පාපිමා මම භයං ඡම්භිතත්තං ලොමහංසං උප්පාදෙතුකාමො සමාධිම්හා චාවෙතුකාමො ගාථං භාසතී’ති. අථ ඛො සොමා භික්ඛුනී මාරො අයං පාපිමා ඉති විදිත්වා මාරං පාපිමන්තං ගාථාහි අජ්ඣභාසි:
ඉත්ථිභාවො කිං කයිරා චිත්තම්හි සුසමාහිතෙ, ඤාණම්හි වත්තමානම්හි සම්මා ධම්මං විපස්සතො.
යස්ස නූන සියා එවං ඉත්ථාහං{5} පුරිසොති වා, කිඤ්චි වා පන අඤ්ඤස්මිං තං මාරො වත්තුමරහතීති.
අථ ඛො මාරො පාපිමා ජානාති මං සොමා භික්ඛුනීති දුක්ඛී දුම්මනො තත්ථෙවන්තරධායීති.
5. 1. 3.
ගොතමීසුත්තං.
164. සාවත්ථියං–
අථ ඛො කිසාගොතමී භික්ඛුනී පුබ්බන්හසමයං නිවාසෙත්වා පත්තචීවරමාදාය සාවත්ථිං පිණ්ඩාය පාවිසි. සාවත්ථියං පිණ්ඩාය චරිත්වා පච්ඡාභත්තං පිණ්ඩපාතපටික්කන්තා යෙන අන්ධවනං තෙනුපසඞ්කමි දිවාවිහාරාය. අන්ධවනං අජ්ඣොගහෙත්වා අඤ්ඤතරස්මිං රුක්ඛමූලෙ දිවාවිහාරං නිසීදි.
අථ ඛො මාරො පාපිමා කිසාගොතමියා භික්ඛුනියා භයං ඡම්භිතත්තං ලොමහංසං උප්පාදෙතුකාමො සමාධිම්හා චාවෙතුකාමො යෙන කිසාගොතමී භික්ඛුනී තෙනුපසඞ්කමි. උපසඞ්කමිත්වා කිසාගොතමිං භික්ඛුනිං ගාථාය අජ්ඣභාසි:
කින්නු ත්වං හතපුත්තාව එකමාසි{1} රුදම්මුඛී, වනමජ්ඣගතා එකා පුරිසං නු ගවෙසසීති.
අථ ඛො කිසාගොතමියා භික්ඛුනියා එතදහොසි: කො නුඛ්වායං මනුස්සො වා අමනුස්සා වා ගාථං භාසතී ති. අථ ඛො කිසාගොතමියා භික්ඛුනියා එතදහොසි: මාරො ඛො අයං පාපිමා මම භයං ඡම්භිතත්තං ලොමහංසං උප්පාදෙතුකාමො සමාධිම්හා චාවෙතුකාමො ගාථං භාසතීති. අථ ඛො කිසාගොතමී භික්ඛුනී මාරො අයං පාපිමා ඉති විදිත්වා මාරං පාපිමන්තං ගාථාහි පච්චභාසි:{2}
අච්චන්තං මතපුත්තා’ම්හි{3} පුරිසා එතදන්තිකා, න සොචාමි න රොදාමි න තං භායාමි ආවුසො.
සබ්බත්ථ විහතා{4} නන්දී තමොක්ඛන්ධො පදාලිතො, ජෙත්වාන මච්චුනො{5} සෙනං විහරාමි අනාසවාති.
අථ ඛො මාරො පාපිමා ජානාති මං කිසාගොතමී භික්ඛුනීති දුක්ඛී දුම්මනො තත්ථෙවන්තරධායීති.
5. 1. 4.
විජයාසුත්තං
165. සාවත්ථියං–
අථ ඛො විජයා භික්ඛුනී පුබ්බන්හසමයං නිවාසෙත්වා පත්තචීවරමාදාය සාවත්ථිං පිණ්ඩාය පාවිසි. සාවත්ථියං පිණ්ඩාය චරිත්වා පච්ඡාභත්තං පිණ්ඩපාතපටික්කන්තා යෙන අන්ධවනං තෙනුපසඞ්කමි දිවාවිහාරාය. අන්ධවනං අජ්ඣොගහෙත්වා අඤ්ඤතරස්මිං රුක්ඛමූලෙ දිවාවිහාරං නිසීදි.
අථ ඛො මාරො පාපිමා විජයාය භික්ඛුනියා භයං ඡම්භිතත්තං ලොමහංසං උප්පාදෙතුකාමො සමාධිම්හා චාවෙතුකාමො යෙන විජයා භික්ඛුනී තෙනුපසඞ්කමි. උපසඞ්කමිත්වා විජයං භික්ඛුනිං ගාථාය අජ්ඣභාසි:
දහරා ත්වං රූපවතී අහඤ්ච දහරො සුසු, පඤ්චඞ්ගිකෙන තුරියෙන එහය්යෙභිරමාමසෙති{1}
අථ ඛො විජයාය භික්ඛුනියා එතදහොසි: ‘කො නු ඛ්වායං{2} මනුස්සො වා අමනුස්සො වා ගාථං භාසතී’ති. අථ ඛො විජයාය භික්ඛුනියා එතදහොසි: ‘මාරො ඛො අයං පාපිමා මම භයං ඡම්භිතත්තං ලොමහංසං උප්පාදෙතුකාමො සමාධිම්හා චාවෙතුකාමො ගාථං භාසතී’ති. අථ ඛො විජයා භික්ඛුනී මාරො අයං පාපිමා ඉති විදිත්වා මාරං පාපිමන්තං ගාථාහි පච්චභාසි:{3}
රූපා සද්දා රසා ගන්ධා ඵොට්ඨබ්බා ච මනොරමා, නිය්යාතයාමි තුය්හෙව{4} මාර නාහං තෙනත්ථිකා{5}.
ඉමිනා පූතිකායෙන භින්දනෙන පභඞ්ගුනා, අට්ටීයාමි{6} හරායාමි කාමතණ්හා සමූහතා.
යෙ ච රූපූපගා සත්තා යෙ ච ආරුප්පඨායිනො{7}, යා ච සන්තා සමාපත්ති සබ්බත්ථ විහතො තමොති.
අථ ඛො මාරො පාපිමා ජානාති මං විජයා භික්ඛුනීති දුක්ඛී දුම්මනො තත්ථෙවන්තරධායීති.
5. 1. 5.
උප්පලවණ්ණාසුත්තං.
166. සාවත්ථියං–
අථ ඛො උප්පලවණ්ණා භික්ඛුනී පුබ්බණ්හසමයං නිවාසෙත්වා පත්තචීවරමාදාය සාවත්ථිං පිණ්ඩාය පාවිසි. සාවත්ථියං පිණ්ඩාය චරිත්වා පච්ඡාභත්තං පිණ්ඩපාතපටික්කන්තා යෙන අන්ධවනං තෙනුපසඞ්කමි දිවාවිහාරාය. අන්ධවනං අජ්ඣොගහෙත්වා අඤ්ඤතරස්මිං සුපුප්ඵිතසාලරුක්ඛමූලෙ අට්ඨාසි.
අථ ඛො මාරො පාපිමා උප්පලවණ්ණාය භික්ඛුනියා භයං ඡම්භිතත්තං ලොමහංසං උප්පාදෙතුකාමො සමාධිම්හා චාවෙතුකාමො යෙන උප්පලවණ්ණා භික්ඛුනී තෙනුපසඞ්කමි. උපසඞ්කමිත්වා උප්පලවණ්ණං භික්ඛුනිං ගාථාය අජ්ඣභාසි:
සුපුප්ඵිතග්ගං උපගම්ම භික්ඛුනී එකා ත්වං තිට්ඨසි සාලමූලෙ, න චත්ථි තෙ දුතියා වණ්ණධාතු ඉධාගතා තාදිසිකා භවෙය්යුං බාලෙ න ත්වං භායසි ධුත්තකානන්ති.
අථ ඛො උප්පලවණ්ණාය භික්ඛුනියා එතදහොසි: ‘කො නු ඛ්වායං මනුස්සො වා අමනුස්සො වා ගාථං භාසතී’ති. අථ ඛො උප්පලවණ්ණාය භික්ඛුනියා එතදහොසි: ‘මාරො ඛො අයං පාපිමා මම භයං ඡම්භිතත්තං ලොමහංසං උප්පාදෙතුකාමො සමාධිම්හා චාවෙතුකාමො ගාථං භාසතී’ති. අථ ඛො උප්පලවණ්ණා භික්ඛුනී මාරො අයං පාපිමා ඉති විදිත්වා මාරං පාපිමන්තං ගාථාහි පච්චභාසි:{8}
සතං සහස්සානපි ධුත්තකානං ඉධාගතා තාදිසිකා{1} භවෙය්යුං, ලොමං න ඉඤ්ජාමි න සන්තසාමි න මාර භායාමි තමෙකිකාපි.
එසා අන්තරධායාමි කුච්ඡිං වා පවිසාමි තෙ, පඛුමන්තරිකායම්පි තිට්ඨන්තිං මං න දක්ඛසි.
චිත්තස්මිං වසීභූතාම්හි ඉද්ධිපාදා සුභාවිතා, සබ්බබන්ධනමුත්තාම්හි න තං භායාමි ආවුසොති.
අථ ඛො මාරො පාපිමා ජානාති මං උප්පලවණ්ණා භික්ඛුනීති දුක්ඛී දුම්මනො තත්ථෙවන්තරධායීති.
5. 1. 6.
චාලාසුත්තං.
167. සාවත්ථියං–
අථ ඛො චාලා භික්ඛුනී පුබ්බණ්හසමයං නිවාසෙත්වා පත්තචීවරමාදාය සාවත්ථිං පිණ්ඩාය පාවිසි. සාවත්ථියං පිණ්ඩාය චරිත්වා පච්ඡාභත්තං පිණ්ඩපාතපටික්කන්තා යෙන අන්ධවනං තෙනුපසඞ්කමි දිවාවිහාරාය. අන්ධවනං අජ්ඣොගහෙත්වා අඤ්ඤතරස්මිං රුක්ඛමූලෙ දිවාවිහාරං නිසීදි.
අථ ඛො මාරො පාපිමා යෙන චාලා භික්ඛුනී තෙනුපසඞ්කමි. උපසඞ්කමිත්වා චාලං භික්ඛුනිං එතදවොච:
කින්නු{2} ත්වං භික්ඛුනී න රොචෙසීති.
[චාලාභික්ඛුනී:]
ජාතිං ඛ්වාහං ආවුසො න රොචෙමීති.
[මාරො:]
කින්නු ජාතිං න රොචෙසි ජාතො කාමානි භුඤ්ජති, කො නු තං ඉදමාදපයි ජාතිං මාරොච{3} භික්ඛුනීති.
[චාලාභික්ඛුනී:]
ජාතස්ස මරණං හොති ජාතො දුක්ඛානි ඵුස්සති{4}, බන්ධං වධං පරික්ලෙසං තස්මා ජාතිං න රොචයෙ.
බුද්ධො ධම්මමදෙසෙසි ජාතියා සමතික්කමං, සබ්බදුක්ඛප්පහාණාය යො මං{5} සච්චෙ නිවෙසයි.
යෙ ච රූපූපගා සත්තා යෙ ච ආරුප්පඨායිනො, නිරොධං අප්පජානන්තා ආගන්තාරො පුනබ්භවන්ති.
අථ ඛො මාරො පාපිමා -පෙ- තත්ථෙවන්තරධායීති.
5. 1. 7.
උපචාලාසුත්තං.
168. සාවත්ථියං–
අථ ඛො උපචාලා භික්ඛුනී පුබ්බණ්හසමයං නිවාසෙත්වා පත්තචීවරමාදාය සාවත්ථිං පිණ්ඩාය පාවිසි. සාවත්ථියං පිණ්ඩාය චරිත්වා පච්ඡාභත්තං පිණ්ඩපාතපටික්කන්තා යෙන අන්ධවනං තෙනුපසඞ්කමි දිවාවිහාරාය. අන්ධවනං අජ්ඣොගහෙත්වා අඤ්ඤතරස්මිං රුක්ඛමූලෙ දිවාවිහාරං නිසීදි.
අථ ඛො මාරො පාපිමා යෙන උපචාලා භික්ඛුනී තෙනුපසඞ්කමි. උපසඞ්කමිත්වා උපචාලං භික්ඛුනිං එතදවොච:
කත්ථ නු ත්වං භික්ඛුනී උප්පජ්ජිතුකාමාති?
[උපචාලා:]
න ඛ්වාහං ආවුසො කත්ථචි උප්පජ්ජිතුකාමාති.
[මාරො:]
තාවතිංසා ච යාමා ච තුසිතා චාපි දෙවතා, නිම්මාණරතිනො දෙවා යෙ දෙවා වසවත්තිනො, තත්ථ චිත්තං පණිධෙහි රතිං පච්චනුභොස්සසීති.
[උපචාලා:]
තාවතිංසා ච යාමා ච තුසිතා චාපි දෙවතා, නිම්මාණරතිනො දෙවා යෙ දෙවා වසවත්තිනො, කාමබන්ධනබද්ධා{1} තෙ එන්ති මාරවසං පුන.
සබ්බො ආදීපිතො{2} ලොකො සබ්බො ලොකො පධූපිතො, සබ්බො පජ්ජලිතො ලොකො සබ්බො ලොකො පකම්පිතො.
අකම්පිතං අජලිතං{3} අපුථුජ්ජනසෙවිතං, අගති යත්ථ මාරස්ස තත්ථ මෙ නිරතො මනොති.
අථ ඛො මාරො පාපිමා -පෙ- තත්ථෙවන්තරධායීති.
5. 1. 8.
සීසූපචාලාසුත්තං{*}
169. සාවත්ථියං–
අථ ඛො සීසූපචාලා භික්ඛුනී පුබ්බන්හසමයං නිවාසෙත්වා පත්තචීවරමාදාය සාවත්ථිං පිණ්ඩාය පාවිසි. සාවත්ථියං පිණ්ඩාය චරිත්වා පච්ඡාභත්තං පිණ්ඩපාතපටික්කන්තා යෙන අන්ධවනං තෙනුපසඞ්කමි දිවාවිහාරාය. අන්ධවනං අජ්ඣොගහෙත්වා අඤ්ඤතරස්මිං රුක්ඛමූලෙ දිවාවිහාරං නිසීදි.
අථ ඛො මාරො පාපිමා යෙන සීසූපචාලා භික්ඛුනී තෙනුපසඞ්කමි. උපසඞ්කමිත්වා සීසූපචාලං භික්ඛුනිං එතදවොච:
කස්ස නු ත්වං භික්ඛුනී පාසණ්ඩං රොචෙසීති?
[සීසූපචාලා:]
න ඛ්වාහං ආවුසො කස්සචි පාසණ්ඩං රොචෙමීති,
[මාරො:]
කින්නු උද්දිස්ස මුණ්ඩාසි සමණී විය දිස්සසි, න ච රොචෙසි පාසණ්ඩං කිමිව{4} චරසි මොමූහාති.
[සීසූපචාලා:]
ඉතො බහිද්ධා පාසණ්ඩා දිට්ඨීසු පසීදන්ති තෙ, න තෙසං ධම්මං රොචෙමි න තෙ ධම්මස්ස කොවිදා.
අත්ථි සක්යකුලෙ ජාතො බුද්ධො අප්පටිපුග්ගලො, සබ්බාභිභූ මාරනුදො සබ්බත්ථමපරාජිතො, සබ්බත්ථ මුත්තො අසිතො{1} සබ්බං පස්සති චක්ඛුමා. සබ්බකම්මක්ඛය{2}ප්පත්තො විමුත්තො උපධිසඞ්ඛයෙ, සො මය්හං භගවා සත්ථා තස්ස රොචෙමි සාසනන්ති.
අථ ඛො මාරො පාපිමා -පෙ- තත්ථෙවන්තරධායීති.
5. 1. 9.
සෙලාසුත්තං.
170. සාවත්ථියං–
අථ ඛො සෙලා භික්ඛුනී පුබ්බණ්හසමයං නිවාසෙත්වා පත්තචීවරමාදාය සාවත්ථිං පිණ්ඩාය පාවිසි. සාවත්ථියං පිණ්ඩාය චරිත්වා පච්ඡාභත්තං පිණ්ඩපාතපටික්කන්තා යෙන අන්ධවනං තෙනුපසඞ්කමි දිවාවිහාරාය. අන්ධවනං අජ්ඣොගහෙත්වා අඤ්ඤතරස්මිං රුක්ඛමූලෙ දිවාවිහාරං නිසීදි.
අථ ඛො මාරො පාපිමා සෙලාය භික්ඛුනියා භයං ඡම්භිතත්තං ලොමහංසං උප්පාදෙතුකාමො සමාධිම්හා චාවෙතුකාමො යෙන සෙලා භික්ඛුනී තෙනුපසඞ්කමි. උපසඞ්කමිත්වා සෙලං භික්ඛුනිං ගාථාය අජ්ඣභාසි:
කෙනිදං පකතං බිම්බං ක්වන්නු{3} බිම්බස්ස කාරකො, ක්වන්නු{4} බිම්බං සමුප්පන්නං ක්වන්නු{3} බිම්බං නිරුජ්ඣතීති.
අථ ඛො සෙලාය භික්ඛුනියා එතදහොසි: කො නු ඛ්වායං මනුස්සො වා අමනුස්සො වා ගාථං භාසතීති. අථ ඛො සෙලාය භික්ඛුනියා එතදහොසි: මාරො ඛො අයං පාපිමා. මම භයං ඡම්භිතත්තං ලොමහංසං උප්පාදෙතුකාමො සමාධිම්හා චාවෙතුකාමො ගාථං භාසතීති. අථ ඛො සෙලා භික්ඛුනී මාරො අයං පාපිමා ඉති විදිත්වා මාරං පාපිමන්තං ගාථාහි පච්චභාසි:
නයිදං අත්තකතං{5} බිම්බං නයිදං පරකතං{6} අඝං, හෙතුං පටිච්ච සම්භූතං හෙතුභඞ්ගා නිරුජ්ඣති.
යථා අඤ්ඤතරං බීජං ඛෙත්තෙ වුත්තං විරූහති, පඨවීරසඤ්ච{7} ආගම්ම සිනෙහඤ්ච තදූභයං.