අථ ඛො මාරො පාපිමා ආයස්මතො සමිද්ධිස්ස චෙතසා චෙතොපරිවිතක්කමඤ්ඤාය යෙනායස්මා සමිද්ධි තෙනුපසඞ්කමි. උපසඞ්කමිත්වා ආයස්මතො සමිද්ධිස්ස අවිදූරෙ මහන්තං භයභෙරවසද්දං අකාසි, අපිස්සුදං පඨවී මඤ්ඤෙ උද්රීයතීති.{1}
අථ ඛො ආයස්මා සමිද්ධි යෙන භගවා තෙනුපසඞ්කමි. උපසඞ්කමිත්වා භගවන්තං අභිවාදෙත්වා එකමන්තං නිසීදි. එකමන්තං නිසින්නො ඛො ආයස්මා සමිද්ධි භගවන්තං එතදවොච: ඉධාහං භන්තෙ භගවතො අවිදූරෙ අප්පමත්තො ආතාපී පහිතත්තො විහරාමි. තස්ස මය්හං භන්තෙ රහොගතස්ස පටිසල්ලීනස්ස එවං චෙතසො පරිවිතක්කො උදපාදි: ලාභා වත මෙ, සුලද්ධං වත මෙ, යස්ස මෙ සත්ථා අරහං සම්මාසම්බුද්ධො. ලාභා වත මෙ, සුලද්ධං වත මෙ, යො’හං එවං ස්වාක්ඛාතෙ ධම්මවිනයෙ පබ්බජිතො. ලාභා වත මෙ, සුලද්ධං වත මෙ, යස්ස මෙ සබ්රහ්මචාරයො සීලවන්තො කල්යාණධම්මාති. තස්ස මය්හං භන්තෙ අවිදූරෙ මහාභයභෙරවසද්දො අහොසි, අපිස්සුදං පඨවී මඤ්ඤෙ උද්රීයතීති.{1}
[භගවා:]
නෙසා සමිද්ධි පඨවී උද්රීයති. මාරො එසො පාපිමා. තුය්හං විචක්ඛුකම්මාය ආගතො. ගච්ඡ ත්වං සමිද්ධි තත්ථෙව අප්පමත්තො ආතාපී පහිතත්තො විහරාහීති.
එවම්භන්තෙති ඛො ආයස්මා සමිද්ධි භගවතො පටිස්සුත්වා{2} උට්ඨායාසනා භගවන්තං අභිවාදෙත්වා පදක්ඛිණං කත්වා පක්කාමි. දුතියම්පි ඛො ආයස්මා සමිද්ධි තත්ථෙව අප්පමත්තො ආතාපී පහිතත්තො විහාසි. දුතියම්පි ඛො ආයස්මතො සමිද්ධිස්ස රහොගතස්ස පටිසල්ලීනස්ස එවං චෙතසො පරිවිතක්කො උදපාදි. ලාභා වත මෙ, සුලද්ධං වත මෙ -පෙ- යස්ස මෙ සබ්රහ්මචාරයො සීලවන්තො කල්යාණධම්මාති. දුතියම්පි ඛො මාරො පාපිමා ආයස්මතො සමිද්ධිස්ස චෙතසා චෙතොපරිවිතක්කමඤ්ඤාය -පෙ- අපිස්සුදං පඨවී මඤ්ඤෙ උද්රීයතීති.{2}
අථ ඛො ආයස්මා සමිද්ධි මාරො අයං පාපිමා ඉති විදිත්වා මාරං පාපිමන්තං ගාථාය අජ්ඣභාසි:
සද්ධායාහං පබ්බජිතො අගාරස්මා අනගාරියං, සති පඤ්ඤා ච මෙ බුද්ධා චිත්තඤ්ච සුසමාහිතං, කාමං කරස්සු රූපානි නෙව මං බ්යාධයිස්සසීති.
අථ ඛො මාරො පාපිමා ජානාති මං සමිද්ධි භික්ඛූති දුක්ඛී දුම්මනො තත්ථෙවන්තරධායීති.
4. 3. 3.
ගොධිකසුත්තං.
159. එවං මෙ සුතං: එකං සමයං භගවා රාජගහෙ විහරති වෙළුවනෙ කලන්දකනිවාපෙ. තෙන ඛො පන සමයෙන ආයස්මා ගොධිකො ඉසිගිලිපස්සෙ විහරති කාළසිලායං. අථ ඛො ආයස්මා ගොධිකො අප්පමත්තො ආතාපී පහිතත්තො විහරන්තො සාමයිකං{1} චෙතොවිමුත්තිං ඵුසි. අථ ඛො ආයස්මා ගොධිකො තාය{2} සාමයිකාය චෙතොවිමුත්තියා පරිහායි.
දුතියම්පි ඛො ආයස්මා ගොධිකො අප්පමත්තො -පෙ- විහරන්තො සාමයිකං{1} චෙතොවිමුත්තිං ඵුසි. දුතියම්පි ඛො ආයස්මා ගොධිකො තාය{2} සාමයිකාය චෙතොවිමුත්තියා පරිහායි. තතියම්පි ඛො ආයස්මා ගොධිකො -පෙ- පරිහායි. චතුත්ථම්පි ඛො ආයස්මා ගොධිකො -පෙ- පරිහායි. පඤ්චමම්පි ඛො ආයස්මා ගොධිකො -පෙ- පරිහායි. ඡට්ඨම්පි ඛො ආයස්මා ගොධිකො -පෙ- පරිහායි.
සත්තමම්පි ඛො ආයස්මා ගොධිකො අප්පමත්තො ආතාපී පහිතත්තො විහරන්තො සාමයිකං චෙතොවිමුත්තිං ඵුසි. අථ ඛො ආයස්මතො ගොධිකස්ස එතදහොසි: යාව ඡට්ඨං ඛ්වාහං සාමයිකාය චෙතොවිමුත්තියා පරිහීනො. යන්නූනාහං සත්ථං ආහරෙය්යන්ති.
අථ ඛො මාරො පාපිමා ආයස්මතො ගොධිකස්ස චෙතසා චෙතොපරිවිතක්කමඤ්ඤාය යෙන භගවා තෙනුපසඞ්කමි. උපසඞ්කමිත්වා භගවන්තං ගාථාහි අජ්ඣභාසි:
මහාවීර මහාපඤ්ඤ ඉද්ධියා යසසා ජලං{3}, සබ්බවෙරභයාතීත පාදෙ වන්දාමි චක්ඛුම.
සාවකො තෙ මහාවීර මරණං මරණාභිභූ, ආකඞ්ඛති චෙතයති තං නිසෙධ ජුතින්ධර.
කථං හි භගවා තුය්හං සාවකො සාසනෙ රතො, අප්පත්තමානසො සෙඛො කාලං කයිරා ජනෙසුතාති.
තෙන ඛො පන සමයෙන ආයස්මතො ගොධිකෙන සත්ථං ආහරිතං හොති.
අථ ඛො භගවා මාරො අයං පාපිමා ඉති විදිත්වා මාරං පාපිමන්තං ගාථාය අජ්ඣභාසි:
එවං හි ධීරා කුබ්බන්ති නාවකඞ්ඛන්ති ජීවිතං, සමූලං තණ්හං අබ්බුය්හ{4} ගොධිකො පරිනිබ්බුතොති.
අථ ඛො භගවා භික්ඛූ ආමන්තෙසි: ආයාම භික්ඛවෙ යෙන ඉසිගිලිපස්සං කාළසිලා තෙනුපසඞ්කමිස්සාම, යත්ථ ගොධිකෙන කුලපුත්තෙන සත්ථං ආහරිතන්ති. එවං භන්තෙති ඛො තෙ භික්ඛූ භගවතො පච්චස්සොසුං. අථ ඛො භගවා සම්බහුලෙහි භික්ඛූහි සද්ධිං යෙන ඉසිගිලිපස්සං කාළසිලා තෙනුපසඞ්කමි. අද්දසා ඛො භගවා ආයස්මන්තං ගොධිකං දූරතොව මඤ්චකෙ විවත්තක්ඛන්ධං සෙමානං{1}
තෙන ඛො පන සමයෙන ධූමායිතත්තං තිමිරායිතත්තං ගච්ඡතෙව පුරිමං දිසං, ගච්ඡති පච්ඡිමං දිසං, ගච්ඡති උත්තරං දිසං, ගච්ඡති දක්ඛිණං දිසං, ගච්ඡති උද්ධං, ගච්ඡති අධො, ගච්ඡති අනුදිසං.
අථ ඛො භගවා භික්ඛූ ආමන්තෙසි: පස්සථ නො තුම්හෙ භික්ඛවෙ එතං ධූමායිතත්තං තිමිරායිතත්තං. ගච්ඡතෙව පුරිමං දිසං, ගච්ඡති පච්ඡිමං දිසං, ගච්ඡති උත්තරං දිසං, ගච්ඡති දක්ඛිණං දිසං, ගච්ඡති උද්ධං, ගච්ඡති අධො, ගච්ඡති අනුදිසන්ති. එවං භන්තෙ. එසො ඛො භික්ඛවෙ මාරො පාපිමා ගොධිකස්ස කුලපුත්තස්ස විඤ්ඤාණං සමන්නෙසති{2}, කත්ථ ගොධිකස්ස කුලපුත්තස්ස විඤ්ඤාණං පතිට්ඨිතන්ති. අප්පතිට්ඨිතෙන ච භික්ඛවෙ විඤ්ඤාණෙන ගොධිකො කුලපුත්තො පරිනිබ්බුතොති.
අථ ඛො මාරො පාපිමා බෙලුවපණ්ඩුවීණමාදාය යෙන භගවා තෙනුපසඞ්කමි. උපසඞ්කමිත්වා භගවන්තං ගාථාය අජ්ඣභාසි:
උද්ධං අධො ච තිරියඤ්ච දිසා අනුදිසාස්වහං, අන්වෙසං නාධිගච්ඡාමි ගොධිකො සො කුහිං ගතොති?
[භගවා:]
සො ධීරො ධිතිසම්පන්නො ඣායී ඣානරතො සදා, අහොරත්තං අනුයුඤ්ජං ජීවිතං අනිකාමයං. ජෙත්වාන මච්චුනො සෙනං අනාගන්ත්වා පුනබ්භවං, සමූලං තණ්හමබ්බුය්හ ගොධිකො පරිනිබ්බුතොති.
[ථෙරා:]
තස්ස සොකපරෙතස්ස වීණා කච්ඡා අභස්සථ, තතො සො දුම්මනො යක්ඛො තත්ථෙවන්තරධායථාති{3}.
4. 3. 4.
සත්තවස්සසුත්තං.
160. එවං මෙ සුතං: එකං සමයං භගවා උරුවෙලායං විහරති නජ්ජා නෙරඤ්ජරාය තීරෙ අජපාලනිග්රොධෙ. තෙන ඛො පන සමයෙන මාරො පාපිමා සත්තවස්සානි භගවන්තං අනුබන්ධො{4} හොති ඔතාරාපෙක්ඛො ඔතාරං අලභමානො. අථ ඛො මාරො පාපිමා යෙන භගවා තෙනුපසඞ්කමි. උපසඞ්කමිත්වා භගවන්තං ගාථාය අජ්ඣභාසි:
සොකාවතිණ්ණො නු වනම්හි{5} ඣායසි විත්තං නු ජිතො උද පත්ථයානො, ආගුං නු ගාමස්මිමකාසි කිඤ්චි කස්මා ජනෙන න කරොසි සක්ඛිං සක්ඛි න සම්පජ්ජති කෙන චි තෙති.
[භගවා:]
සොකස්ස මූලං පලිඛාය සබ්බං අනාගු ඣායාමි අසොචමානො, ඡෙත්වාන සබ්බං භවලොභජප්පං අනාසවො ඣායාමි පමත්තබන්ධු.
[මාරො:]
යං වදන්ති මමෙදන්ති යෙ වදන්ති මමන්ති ච, එත්ථ චෙ තෙ මනො අත්ථි න මෙ සමණ මොක්ඛසීති.
[භගවා:]
යං වදන්ති න තං මය්හං යෙ වදන්ති න තෙ අහං, එවං පාපිම ජානාහි න මෙ මග්ගම්පි දක්ඛසීති.
[මාරො:]
සචෙ මග්ගං අනුබුද්ධං ඛෙමං අමතගාමිනං, අපෙහි ගච්ඡ ත්වමෙවෙකො කිමඤ්ඤමනුසාසසීති.
[භගවා:]
අමච්චුධෙය්යං පුච්ඡන්ති යෙ ජනා පාරගාමිනො, තෙසාහං පුට්ඨො අක්ඛාමි යං සච්චං තං{1} නිරූපධින්ති.
සෙය්යථාපි භන්තෙ ගාමස්ස වා නිගමස්ස වා අවිදූරෙ පොක්ඛරණී. තත්ර’ස්ස කක්කටකො. අථ ඛො භන්තෙ සම්බහුලා කුමාරකා වා කුමාරිකායො වා තම්හා ගාමා වා නිගමා වා නික්ඛමිත්වා යෙන සා පොක්ඛරණී තෙනුපසඞ්කමෙය්යුං. උපසඞ්කමිත්වා තං කක්කටකං උදකා උද්ධරිත්වා ථලෙ පතිට්ඨාපෙය්යුං. යං යදෙව හි සො භන්තෙ කක්කටකො අළං අභිනින්නාමෙය්ය, තං තදෙව තෙ කුමාරකා වා කුමාරිකායො වා කට්ඨෙන වා කඨලාය වා සඤ්ඡින්දෙය්යුං සම්භඤ්ජෙය්යුං. එවං හි සො භන්තෙ කක්කටකො සබ්බෙහි අළෙහි සඤ්ඡින්නෙහි සම්භග්ගෙහි සම්පළිභග්ගෙහි අභබ්බො තං පොක්ඛරණිං පුන{2} ඔතරිතුං සෙය්යථාපි පුබ්බෙ.{2}
එවමෙව ඛො භන්තෙ යානි{3} විසූකායිකානි{4} විසෙවිතානි විප්ඵන්දිතානි කානිචි කානිචි සබ්බානි{5} තානි භගවතා සඤ්ඡින්නානි, සම්භග්ගානි සම්පළිභග්ගානි. අභබ්බො දානාහං{6} භන්තෙ පුන භගවන්තං උපසඞ්කමිතුං යදිදං ඔතාරාපෙක්ඛොති. අථ ඛො මාරො පාපිමා භගවතො සන්තිකෙ ඉමා නිබ්බෙජනීයා ගාථායො අභාසි:
මෙදවණ්ණඤ්ච පාසාණං වායසො අනුපරියගා, අපෙත්ථ මුදු{7} වින්දෙම අපි අස්සාදනා සියා.
අලද්ධා තත්ථ අස්සාදං වායසෙත්තො{8} අපක්කමෙ, කාකොව සෙලමාසජ්ජ නිබ්බිජ්ජාපෙම ගොතමාති.
අථ ඛො මාරො පාපිමා භගවතො සන්තිකෙ ඉමා නිබ්බෙජනීයා ගාථායො අභාසිත්වා තම්හා ඨානා අපක්කම්ම භගවතො අවිදූරෙ පඨවියං පල්ලඞ්කෙන නිසීදි තුණ්හීභූතො මඞ්කුභූතො පත්තක්ඛන්ධො අධොමුඛො පජ්ඣායන්තො. අප්පටිභානො කට්ඨෙන භූමිං විලිඛන්තොති.
4. 3. 5.
මාරධීතුසුත්තං
161. උරුවෙලායං –
අථ ඛො තණ්හා ච අරති{1} රගා ච මාරධීතරො යෙන මාරො පාපිමා තෙනුපසඞ්කමිංසු. උපසඞ්කමිත්වා මාරං පාපිමන්තං ගාථාය අජ්ඣභාසිංසු:
කෙනාසි දුම්මනො තාත පුරිසං කන්නු සොචසි? මයං තං රාගපාසෙන ආරඤ්ඤමිව{2} කුඤ්ජරං, බන්ධිත්වා ආනයිස්සාම වසගො තෙ භවිස්සතීති.
[මාරො:]
අරහං සුගතො ලොකෙ න රාගෙන සුවානයො, මාරධෙය්යමතික්කන්තො තස්මා සොචාමහං භුසන්ති.
අථ ඛො තණ්හා ච අරතිරගා{3} ච මාරධීතරො යෙන භගවා තෙනුපසඞ්කමිංසු. උපසඞ්කමිත්වා භගවන්තං එතදවොචුං: පාදෙ තෙ සමණ පරිචාරෙමාති. අථ ඛො භගවා න මනසාකාසි යථා තං අනුත්තරෙ උපධිසඞ්ඛයෙ විමුත්තො.
අථ ඛො තණ්හා ච අරතිරගා ච මාරධීතරො එකමන්තං අපක්කම්ම එවං සමචින්තෙසුං: උච්චාවචා ඛො පුරිසානං අධිප්පායා. යන්නූන මයං එකසතං එකසතං කුමාරිවණ්ණසතං අභිනිම්මිනෙය්යාමාති.
අථ ඛො තණ්හා ච අරතිරගා ච මාරධීතරො එකසතං එකසතං කුමාරිවණ්ණසතං අනිභිම්මිනිත්වා යෙන භගවා තෙනුපසඞ්කමිංසු. උපසඞ්කමිත්වා භගවන්තං එතදවොචුං: පාදෙ තෙ සමණ පරිචාරෙමාති. තම්පි භගවා න මනසාකාසි යථා තං අනුත්තරෙ උපධිසඞ්ඛයෙ විමුත්තො.
අථ ඛො තණ්හා ච අරතිරගා ච මාරධීතරො එකමන්තං අපක්කම්ම එවං සමචින්තෙසුං: උච්චාවචා ඛො පුරිසානං අධිප්පායා. යන්නූන මයං එකසතං එකසතං අවිජාතවණ්ණසතං අභිනිම්මිනෙය්යාමාති.
අථ ඛො තණ්හා ච අරතිරගා ච මාරධීතරො එකසතං එකසතං අවිජාතවණ්ණසතං අභිනිම්මිනිත්වා යෙන භගවා තෙනුපසඞ්කමිංසු. උපසඞ්කමිත්වා භගවන්තං එතදවොචුං: පාදෙ තෙ සමණ පරිචාරෙමාති. තම්පි භගවා න මනසාකාසි යථා තං අනුත්තරෙ උපධිසඞ්ඛයෙ විමුත්තො.
අථ ඛො තණ්හා ච -පෙ- සමචින්තෙසුං: යන්නූන මයං එකසතං එකසතං සකිං විජාතවණ්ණසතං අභිනිම්මිනෙය්යාමාති.
අථ ඛො තණ්හා ච -පෙ- සකිං විජාතවණ්ණසතං අභිනිම්මිනිත්වා යෙන භගවා -පෙ- අනුත්තරෙ උපධිසඞ්ඛයෙ විමුත්තො.
අථ ඛො තණ්හා ච -පෙ- යන්නූන මයං -පෙ- දුවිජාතවණ්ණසතං අභිනිම්මිනෙය්යාමාති.
අථ ඛො තණ්හා ච -පෙ- දුවිජාතවණ්ණසතං අභිනිම්මිනිත්වා යෙන භගවා -පෙ- අනුත්තරෙ උපධිසඞ්ඛයෙ විමුත්තො.
අථ ඛො තණ්හා ච -පෙ- යන්නූන මයං -පෙ- මජ්ඣිමිත්ථිවණ්ණසතං අභිනිම්මිනෙය්යාමාති.
අථ ඛො තණ්හා ච -පෙ- මජ්ඣිමිත්ථිවණ්ණසතං අභිනිම්මිනිත්වා යෙන භගවා -පෙ- අනුත්තරෙ උපධිසඞ්ඛයෙ විමුත්තො.
අථ ඛො තණ්හා ච -පෙ- යන්නූන මයං -පෙ- මහිත්ථිවණ්ණසතං අභිනිම්මිනෙය්යාමාති.
අථ ඛො තණ්හා ච -පෙ- මහිත්ථිවණ්ණසතං අභිනිම්මිනිත්වා යෙන භගවා -පෙ- අනුත්තරෙ උපධිසඞ්ඛයෙ විමුත්තො.
අථ ඛො තණ්හා ච අරතිරගා ච මාරධීතරො එකමන්තං අපක්කම්ම එතදවොචුං: සච්චං කිර නො පිතා අවොච:
“අරහං සුගතො ලොකෙ න රාගෙන සුවානයො මාරධෙය්යං අතික්කන්තො තස්මා සොචාමහං භුස”න්ති.
යං හි මයං සමණං වා බ්රාහ්මණං වා අවීතරාගං ඉමිනා උපක්කමෙන උපක්කමෙය්යාම හදයං වාස්ස ඵලෙය්ය. උණ්හං වා ලොහිතං මුඛතො උග්ගච්ඡෙය්ය. උම්මාදං වා පාපුණෙය්ය චිත්තවික්ඛෙපං වා. සෙය්යථා{1} වා පන නළො හරිතො ලුතො උස්සුස්සති විසුස්සති මිලායති. එවමෙව උස්සුස්සෙය්ය විසුස්සෙය්ය මිලායෙය්යාති.
අථ ඛො තණ්හා ච අරතිරගා ච මාරධීතරො යෙන භගවා තෙනුපසඞ්කමිංසු. උපසඞ්කමිත්වා එකමන්තං අට්ඨංසු. එකමන්තං ඨිතා ඛො තණ්හා මාරධීතා භගවන්තං ගාථාය අජ්ඣභාසි:
සොකාවතිණ්ණො නු වනම්හි ඣායසි විත්තං නු ජිතො උද පත්ථයානො ආගුං නු ගාමස්මිමකාසි කිඤ්චි කස්මා ජනෙන න කරොසි සක්ඛිං සක්ඛී න සම්පජ්ජති කෙනචි තෙති.
[භගවා:]
අත්ථස්ස පත්තිං හදයස්ස සන්තිං ජෙත්වාන සෙනං පියසාතරූපං එකාහං ඣායං සුඛමන්වබොධිං තස්මා ජනෙන න කරොමි සක්ඛිං සක්ඛී න සම්පජ්ජති කෙනචි මෙති.
අථ ඛො අරති මාරධීතා භගවන්තං ගාථාය අජ්ඣභාසි:
කථං විහාරීබහුලොධ භික්ඛු පඤ්චොඝතිණ්ණො අතරී ධ ඡට්ඨං, කථං ඣායිං බහුලං කාමසඤ්ඤා පරිබාහිරා හොන්ති අලද්ධ යො තන්ති.
[භගවා:]
පස්සද්ධකායො සුවිමුත්තචිත්තො අසඞ්ඛරානො සතිමා අනොකො, අඤ්ඤාය ධම්මං අවිතක්කඣායී න කුප්පති න සරති න ථිනො.
එවංවිහාරී බහුලොධ භික්ඛු පඤ්චොඝතිණ්ණො අතරීධ ඡට්ඨං, එවං ඣායිං බහුලං කාමසඤ්ඤා පරිබාහිරා හොන්ති අලද්ධ යො තන්ති.
අථ ඛො රගා මාරධීතා භගවතො සන්තිකෙ ඉමං ගාථං අභාසි:
අච්ඡෙචි තණ්හං ගණසඞ්ඝචාරී අද්ධා චරිස්සන්ති බහූ ච සත්තා, බහුං වතායං ජනතං අනොකො අච්ඡෙජ්ජ නෙස්සති මච්චුරාජස්ස පාරන්ති.
[භගවා:]
නයන්ති වෙ මහාවීරා සද්ධම්මෙන තථාගතා ධම්මෙන නයමානානං කා උසූයා විජානතන්ති.
අථ ඛො තණ්හා ච අරතිරගා ච මාරධීතරො යෙන මාරො පාපිමා තෙනුපසඞ්කමිංසු. අද්දසා ඛො මාරො පාපිමා තණ්හඤ්ච අරතිඤ්ච රගඤ්ච මාරධීතරො දූරතොව ආගච්ඡන්තියො දිස්වාන ගාථාහි අජ්ඣභාසි:
බාලා කුමුදනාළෙහි පබ්බතං අභිමන්ථථ ගිරිං නඛෙන ඛණථ අයො දන්තෙහි ඛාදථ.
සෙලංව සිරසූහච්ච{2} පාතාලෙ ගාධමෙසථ ඛාණුංව උරසාසජ්ජ නිබ්බිජ්ජාපෙථ ගොතමාති.{3}
[ථෙරා]
දද්දල්ලමානා ආගඤ්ඡුං තණ්හා ච අරතීරගා තා තත්ථ පනුදී සත්ථා තූලං භට්ඨංව මාලුතොති.
මාරවග්ගො තතියො.
තත්රුද්දානං:
සම්බහුලා සමිද්ධී ච ගොධිකං සත්තවස්සානි ධීතරං දෙසිතං බුද්ධසෙට්ඨෙන ඉමං මාරපඤ්චකන්ති.
මාරසංයුත්තං සමත්තං.
5. භික්ඛුනීසංයුත්තං
1. භික්ඛුනීවග්ගො
5. 1. 1.
ආළවිකාසුත්තං.
162. එවං මෙ සුතං: එකං සමයං භගවා සාවත්ථියං විහරති ජෙතවනෙ අනාථපිණ්ඩිකස්ස ආරාමෙ.
අථ ඛො ආළවිකා භික්ඛුනී පුබ්බණ්හසමයං නිවාසෙත්වා පත්තචීවරමාදාය සාවත්ථිං පිණ්ඩාය පාවිසි. සාවත්ථියං පිණ්ඩාය චරිත්වා පච්ඡාභත්තං පිණ්ඩපාතපටික්කන්තා යෙන අන්ධවනං තෙනුපසඞ්කමි විවෙකත්ථිනී.
අථ ඛො මාරො පාපිමා ආළවිකාය භික්ඛුනියා භයං ඡම්භිතත්තං ලොමහංසං උප්පාදෙතුකාමො විවෙකම්හා චාවෙතුකාමො යෙන ආළවිකා භික්ඛුනී තෙනුපසඞ්කමි. උපසඞ්කමිත්වා ආළවිකං භික්ඛුනිං ගාථාය අජ්ඣභාසි: