4. 1. 2.
නාගසුත්තං.
138. එවං මෙ සුතං: එකං සමයං භගවා උරුවෙලායං විහරති නජ්ජා නෙරඤ්ජරාය තීරෙ අජපාලනිග්රොධමූලෙ පඨමාභිසම්බුද්ධො . තෙන ඛො පන සමයෙන භගවා රත්තන්ධකාරතිමිසායං අජ්ඣොකාසෙ{1} නිසින්නො හොති. දෙවො ච එකමෙකං ඵුසායති.
අථ ඛො මාරො පාපිමා භගවතො භයං ඡම්භිතත්තං ලොමහංසං උප්පාදෙතුකාමො මහන්තං හත්ථිරාජවණ්ණං අභිනිම්මිනිත්වා යෙන භගවා තෙනුපසඞ්කමි. සෙය්යථාපි නාම මහාඅරිට්ඨකො මණි, එවමස්ස සීසං හොති. සෙය්යථාපි නාම සුද්ධං රූපියං, එවමස්ස දන්තා හොන්ති. සෙය්යථාපි නාම නඞ්ගලීසා{2}, එවමස්ස සොණ්ඩො හොති.
අථ ඛො භගවා මාරො අයං පාපිමා ඉති විදිත්වා මාරං පාපිමන්තං ගාථාය අජ්ඣභාසි:
සංසරං{3} දීඝමද්ධානං වණ්ණං කත්වා සුභාසුභං, අලං තෙ තෙන පාපිම නිහතො ත්වමසි අන්තකාති.
අථ ඛො මාරො පාපිමා ජානාති මං භගවා ජානාති මං සුගතොති දුක්ඛී දුම්මනො තත්ථෙවන්තරධායීති.
4. 1. 3.
සුභසුත්තං.
139. එවං මෙ සුතං: එකං සමයං භගවා උරුවෙලායං විහරති -පෙ- පඨමාභිසම්බුද්ධො. තෙන ඛො පන සමයෙන භගවා රත්තන්ධකාරතිමිසායං අජ්ඣොකාසෙ{1} නිසින්නො හොති. දෙවො ච එකමෙකං ඵුසායති.
අථ ඛො මාරො පාපිමා භගවතො භයං ඡම්භිතත්තං ලොමහංසං උප්පාදෙතුකාමො යෙන භගවා තෙනුපසඞ්කමි. උපසඞ්කමිත්වා භගවතො අවිදූරෙ උච්චාවචා වණ්ණනිභා උපදංසෙති සුභා චෙව අසුභා ච.
අථ ඛො භගවා මාරො අයං පාපිමා ඉති විදිත්වා මාරං පාපිමන්තං ගාථාහි අජ්ඣභාසි:
සංසරං දීඝමද්ධානං වණ්ණං කත්වා සුභාසුභං, අලං තෙ තෙන පාපිම නිහතො ත්වමසි අන්තක.
යෙ ච කායෙන වාචාය මනසා ච සුසංවුතා, න තෙ මාරවසානුගා න තෙ මාරස්ස බද්ධගූති{4}.
අථ ඛො මාරො පාපිමා ජානාති මං භගවා ජානාති මං සුගතොති දුක්ඛී දුම්මනො තත්ථෙවන්තරධායීති.
4. 1. 4.
පඨමපාසසුත්තං.
140. එවං මෙ සුතං. එකං සමයං භගවා බාරාණසියං විහරති ඉසිපතනෙ මිගදායෙ. තත්ර ඛො භගවා භික්ඛූ ආමන්තෙසි: භික්ඛවොති, භදන්තෙති තෙ භික්ඛූ භගවතො පච්චස්සොසුං. භගවා එතදවොච:
මය්හං ඛො භික්ඛවෙ යොනිසො මනසිකාරා යොනිසො සම්මප්පධානා අනුත්තරා විමුත්ති අනුප්පත්තා, අනුත්තරා විමුත්ති සච්ඡිකතා. තුම්හෙපි භික්ඛවෙ යොනිසො මනසිකාරා යොනිසො සම්මප්පධානා අනුත්තරං විමුත්තිං අනුපාපුණාථ. අනුත්තරං විමුත්තිං සච්ඡිකරොථාති.
අථ ඛො මාරො පාපිමා යෙන භගවා තෙනුපසඞ්කමි. උපසඞ්කමිත්වා භගවන්තං ගාථාය අජ්ඣභාසි:
බද්ධො’සි{1} මාරපාසෙන යෙ දිබ්බා යෙ ච මානුසා, මාරබන්ධනබද්ධොසි{1} න මෙ සමණ මොක්ඛසීති.
[භගවා:]
මුත්තොහං{2} මාරපාසෙන යෙ දිබ්බා යෙ ච මානුසා, මාරබන්ධනමුත්තොම්හි නිහතො ත්වමසි අන්තකාති.
අථ ඛො මාරො පාපිමා ජානාති මං භගවා, ජානාති මං සුගතොති දුක්ඛී දුම්මනො තත්ථෙවන්තරධායීති.
4. 1. 5.
දුතියපාසසුත්තං.
141. එවං මෙ සුතං එකං සමයං භගවා බාරාණසියං විහරති ඉසිපතනෙ මිගදායෙ. තත්ර ඛො භගවා භික්ඛූ ආමන්තෙසි: භික්ඛවොති, භදන්තෙති තෙ භික්ඛූ භගවතො පච්චස්සොසුං. භගවා එතදවොච:
මුත්තොහං{2} භික්ඛවෙ සබ්බපාසෙහි යෙ දිබ්බා යෙ ච මානුසා. තුම්හෙපි භික්ඛවෙ මුත්තා සබ්බපාසෙහි යෙ දිබ්බා යෙ ච මානුසා. චරථ භික්ඛවෙ චාරිකං බහුජනහිතාය බහුජනසුඛාය ලොකානුකම්පාය{3} අත්ථාය හිතාය සුඛාය දෙවමනුස්සානං. මා එකෙන ද්වෙ අගමිත්ථ{4}. දෙසෙථ භික්ඛවෙ ධම්මං ආදිකල්යාණං මජ්ඣෙකල්යාණං පරියොසානකල්යාණං සාත්ථං සබ්යඤ්ජනං කෙවලපරිපුණ්ණං පරිසුද්ධං බ්රහ්මචරියං පකාසෙථ. සන්ති සත්තා අප්පරජක්ඛජාතිකා අස්සවණතා ධම්මස්ස පරිහායන්ති. භවිස්සන්ති ධම්මස්ස අඤ්ඤාතාරො. අහම්පි භික්ඛවෙ යෙන උරුවෙලා සෙනානිනිගමො{5} තෙනුපසඞ්කමිස්සාමි ධම්මදෙසනායාති.
අථ ඛො මාරො පාපිමා යෙන භගවා තෙනුපසඞ්කමි. උපසඞ්කමිත්වා භගවන්තං ගාථාය අජ්ඣභාසි:
බද්ධොසි සබ්බපාසෙහි යෙ දිබ්බා යෙ ච මානුසා, මහාබන්ධනබද්ධොසි න මෙ සමණ මොක්ඛසීති.
[භගවා:]
මුත්තොහං සබ්බපාසෙහි යෙ දිබ්බා යෙ ච මානුසා, මහාබන්ධනමුත්තොම්හි නිහතො ත්වමසි අන්තකාති.
අථ ඛො මාරො පාපිමා ජානාති මං භගවා, ජානාති මං සුගතොති දුක්ඛී දුම්මනො තත්ථෙවන්තරධායීති.
4. 1. 6.
සප්පසුත්තං.
142. එවං මෙ සුතං: එකං සමයං භගවා රාජගහෙ විහරති වෙළුවනෙ කලන්දකනිවාපෙ. තෙන ඛො පන සමයෙන භගවා රත්තන්ධකාරතිමිසායං අජ්ඣොකාසෙ{1} නිසින්නො හොති. දෙවො ච එකමෙකං ඵුසායති.
අථ ඛො මාරො පාපිමා භගවතො භයං ඡම්භිතත්තං ලොමහංසං උප්පාදෙතුකාමො මහන්තං සප්පරාජවණ්ණං අභිනිම්මිනිත්වා යෙන භගවා තෙනුපසඞ්කමි. සෙය්යථාපි නාම මහතී එකරුක්ඛිකා නාවා, එවමස්ස කායො හොති. සෙය්යථාපි නාම මහන්තං සොණ්ඩිකාකිලඤ්ජං, එවමස්ස ඵණො හොති. සෙය්යථාපි නාම මහතී කොසලිකා කංසපාතී, එවමස්ස අක්ඛීනි භවන්ති. සෙය්යථාපි නාම දෙවෙ ගලගලායන්තෙ විජ්ජුල්ලතා නිච්ඡරන්ති, එවමස්ස මුඛතො ජිව්හා නිච්ඡරති. සෙය්යථාපි නාම කම්මාරගග්ගරියා ධමමානාය සද්දො හොති, එවමස්ස අස්සාසපස්සාසානං සද්දො හොති.
අථ ඛො භගවා මාරො අයං පාපිමා ඉති විදිත්වා මාරං පාපිමන්තං ගාථාහි අජ්ඣභාසි:
යො සුඤ්ඤගෙහානි සෙවති සෙය්යා සො මුනි අත්තසඤ්ඤතො, වොස්සජ්ජ චරෙය්ය තත්ථ සො පතිරූපං හි තථාවිධස්ස තං.
චරකා බහූ භෙරවා බහූ අථො ඩංසසිරිංසපා{2} බහූ, ලොමම්පි න තත්ථ{3} ඉඤ්ජයෙ සුඤ්ඤාගාරගතො මහාමුනි.
නභං ඵලෙය්ය පඨවී චලෙය්ය සබ්බෙ ච පාණා උද සන්තසෙය්යුං, සල්ලම්පි චෙ උරසි පකප්පයෙය්යුං{4} උපධීසු තාණං න කරොන්ති බුද්ධාති.
අථ ඛො මාරො පාපිමා ජානාති මං භගවා, ජානාති මං සුගතොති දුක්ඛී දුම්මනො තත්ථෙවන්තරධායීති.
4. 1. 7.
සොප්පසිසුත්තං.
143. එකං සමයං භගවා රාජගහෙ විහරති වෙළුවනෙ කලන්දකනිවාපෙ. අථ ඛො භගවා බහුදෙවරත්තිං අබ්භොකාසෙ චඞ්කමිත්වා රත්තියා පච්චූසසමයං පාදෙ පක්ඛාලෙත්වා විහාරං පවිසිත්වා දක්ඛිණෙන පස්සෙන සීහසෙය්යං කප්පෙසි, පාදෙ පාදං අච්චාධාය සතො සම්පජානො උට්ඨානසඤ්ඤං මනසි කරිත්වා.
අථ ඛො මාරො පාපිමා යෙන භගවා තෙනුපසඞ්කමි. උපසඞ්කමිත්වා භගවන්තං ගාථාය අජ්ඣභාසි:
කිං සොප්පසි කින්නු සොප්පසි කිමිදං සොප්පසි දුබ්භගො{1} විය, සුඤ්ඤමගාරන්ති සොප්පසි කිමිදං සොප්පසි සූරියෙ{2} උග්ගතෙ.
[භගවා:]
යස්ස ජාලිනී විසත්තිකා තණ්හා නත්ථි කුහිඤ්චි නෙතවෙ, සබ්බූපධීනං{3} පරික්ඛයා බුද්ධො සොප්පති කිං තවෙත්ථ මාරාති.
අථ ඛො මාරො පාපිමා ජානාති මං භගවා, ජානාති මං සුගතොති දුක්ඛී දුම්මනො තත්ථෙවන්තරධායීති.
4. 1. 8.
නන්දතිසුත්තං.
144. එවං මෙ සුතං: එකං සමයං භගවා සාවත්ථියං විහරති ජෙතවනෙ අනාථපිණ්ඩිකස්ස ආරාමෙ. අථ ඛො මාරො පාපිමා යෙන භගවා තෙනුපසඞ්කමි. උපසඞ්කමිත්වා භගවතො සන්තිකෙ ඉමං ගාථං අභාසි:
නන්දති පුත්තෙහි පුත්තිමා ගොමිකො{4} ගොහි තථෙව නන්දති, උපධී හි නරස්ස නන්දනා න හි සො නන්දති යො{5} නිරූපධීති.
[භගවා:]
සොචති පුත්තෙහි පුත්තිමා ගොමිකො ගොහි තථෙව සොචති, උපධීහි නරස්ස සොචනා න හි සො සොචති යො නිරූපධීති.
අථ ඛො මාරො පාපිමා ජානාති මං භගවා -පෙ- තත්ථෙවන්තරධායීති.
4. 1. 9.
පඨමආයුසුත්තං.
145. එවං මෙ සුතං: එකං සමයං භගවා රාජගහෙ විහරති වෙළුවනෙ කලන්දකනිවාපෙ. තත්ර ඛො භගවා භික්ඛූ ආමන්තෙසි, භික්ඛවොති. භදන්තෙති තෙ භික්ඛූ භගවතො පච්චස්සොසුං. භගවා එතදවොච:
අප්පමිදං භික්ඛවෙ මනුස්සානං ආයු, ගමනීයො සම්පරායො, කත්තබ්බං කුසලං, චරිතබ්බං බ්රහ්මචරියං, නත්ථි ජාතස්ස අමරණං. යො{1} භික්ඛවෙ චිරං ජීවති, සො වස්සසතං අප්පං වා භිය්යොති.
අථ ඛො මාරො පාපිමා යෙන භගවා තෙනුපසඞ්කමි. උපසඞ්කමිත්වා භගවන්තං ගාථාය අජ්ඣභාසි:
දීඝමායු මනුස්සානං න නං හීළෙ සුපොරිසො, චරෙය්ය ඛීරමත්තොව නත්ථි මච්චුස්ස ආගමොති.
[භගවා:]
අප්පමායු මනුස්සානං හීළෙය්ය නං සුපොරිසො, චරෙය්යාදිත්තසීසොව නත්ථි මච්චුස්ස නාගමොති.
අථ ඛො මාරො පාපිමා -පෙ- තත්ථෙවන්තරධායීති.
4. 1. 10.
දුතියආයුසුත්තං.
146. එවං මෙ සුතං: එකං සමයං භගවා රාජගහෙ විහරති වෙළුවනෙ කලන්දකනිවාපෙ. තත්ර ඛො භගවා භික්ඛූ ආමන්තෙසි, භික්ඛවොති. භදන්තෙති තෙ භික්ඛූ භගවතො පච්චස්සොසුං. භගවා එතදවොච:
අප්පමිදං භික්ඛවෙ මනුස්සානං ආයු. ගමනීයො සම්පරායො, කත්තබ්බං කුසලං, චරිතබ්බං බ්රහ්මචරියං. නත්ථි ජාතස්ස අමරණං. යො භික්ඛවෙ චිරං ජීවති, සො වස්සසතං අප්පං වා භිය්යොති{2}.
අථ ඛො මාරො පාපිමා යෙන භගවා තෙනුපසඞ්කමි. උපසඞ්කමිත්වා භගවන්තං ගාථාය අජ්ඣභාසි:
නාච්චයන්ති අහොරත්තා ජීවිතං නොපරුජ්ඣති, ආයු අනුපරියාති{3} මච්චානං නෙමීව රථකුබ්බරං.
[භගවා:]
අච්චයන්ති අහොරත්තා ජීවිතං උපරුජ්ඣති, ආයු ඛීයති මච්චානං කුන්නදීනංව ඔදකන්ති.
අථ ඛො මාරො පාපිමා ජානාති මං භගවා, ජානාති මං සුගතොති දුක්ඛී දුම්මනො තත්ථෙවන්තරධායීති.
ආයුවග්ගො පඨමො.
තත්රුද්දානං:
තපොකම්මඤ්ච නාගො ච සුභං පාසෙන තෙ දුවෙ, සප්පො සොප්පසි නන්දතිං ආයුනා අපරෙ දුවෙති.
2. රජ්ජවග්ගො
4. 2. 1.
පාසාණසුත්තං.
147. එවං මෙ සුතං: එකං සමයං භගවා රාජගහෙ විහරති ගිජ්ඣකූටෙ පබ්බතෙ. තෙන ඛො පන සමයෙන භගවා රත්තන්ධකාරතිමිසායං අජ්ඣොකාසෙ{1} නිසින්නො හොති. දෙවො ච එකමෙකං ඵුසායති.
අථ ඛො මාරො පාපිමා භගවතො භයං ඡම්භිතත්තං ලොමහංසං උප්පාදෙතුකාමො යෙන භගවා තෙනුපසඞ්කමි. උපසඞ්කමිත්වා භගවතො අවිදූරෙ මහන්තෙ පාසාණෙ{2} පදාලෙසි{3}.
අථ ඛො භගවා මාරො අයං පාපිමා ඉති විදිත්වා මාරං පාපිමන්තං ගාථාය අජ්ඣභාසි:
සචෙමං{4} කෙවලං සබ්බං ගිජ්ඣකූටං චලෙය්යසි,{5} නෙව සම්මා විමුත්තානං බුද්ධානං අත්ථි ඉඤ්ජිතන්ති.
අථ ඛො මාරො පාපිමා ජානාති මං භගවා, ජානාති මං සුගතොති දුක්ඛී දුම්මනො තත්ථෙවන්තරධායීති.
4. 2. 2.
සීහසුත්තං{6}
148. එකං සමයං භගවා සාවත්ථියං විහරති ජෙතවනෙ අනාථපිණ්ඩිකස්ස ආරාමෙ. තෙන ඛො පන සමයෙන භගවා මහතියා පරිසාය පරිවුතො ධම්මං දෙසෙති.
අථ ඛො මාරස්ස පාපිමතො එතදහොසි: අයං ඛො සමණො ගොතමො මහතියා පරිසාය පරිවුතො ධම්මං දෙසෙති. යන්නූනාහං යෙන සමණො ගොතමො තෙනුපසඞ්කමෙය්යං විචක්ඛුකම්මායාති. අථ ඛො මාරො පාපිමා යෙන භගවා තෙනුපසඞ්කමි. උපසඞ්කමිත්වා භගවන්තං ගාථාය අජ්ඣභාසි:
කින්නු සීහොව නදසි පරිසායං විසාරදො, පටිමල්ලො හි තෙ අත්ථි විජිතාවී නු මඤ්ඤසීති.
[භගවා:]
නදන්ති වෙ මහාවීරා පරිසාසු විසාරදා, තථාගතා බලප්පත්තා තිණ්ණා ලොකෙ විසත්තිකන්ති.
අථ ඛො මාරො පාපිමා ජානාති මං භගවා, ජානාති මං සුගතොති දුක්ඛී දුම්මනො තත්ථෙවන්තරධායීති.
4. 2. 3.
සකලිකසුත්තං
149. එවං මෙ සුතං: එකං සමයං භගවා රාජගහෙ විහරති මද්දකුච්ඡිස්මිං මිගදායෙ. තෙන ඛො පන සමයෙන භගවතො පාදො සකලිකාය ඛතො හොති. භුසා{1} සුදං භගවතො වෙදනා වත්තන්ති සාරීරිකා දුක්ඛා තිබ්බා ඛරා කටුකා අසාතා අමනාපා. තා සුදං භගවා සතො සම්පජානො අධිවාසෙති අවිහඤ්ඤමානො. අථ ඛො භගවා චතුග්ගුණං සඞ්ඝාටිං පඤ්ඤපෙත්වා දක්ඛිණෙන පස්සෙන සීහසෙය්යං කප්පෙසි පාදෙ{2} පාදං අච්චාධාය සතො සම්පජානො.
අථ ඛො මාරො පාපිමා යෙන භගවා තෙනුපසඞ්කමි. උපසඞ්කමිත්වා භගවන්තං ගාථාය අජ්ඣභාසි:
මන්දියා නු ඛො{3} සෙසි උදාහු කාවෙය්යමත්තො අත්ථා නු තෙ සම්පචුරා න සන්ති, එකො විවිත්තෙ සයනාසනම්හි නිද්දාමුඛො{4} කිමිදං සොප්පසෙවාති.
[භගවා:]