[භගවා:]
කුසලී භාසසි තෙසං මාරපාසප්පහායිනං, කස්ස තෙ ධම්මමඤ්ඤාය අච්ඡිදුං භවබන්ධනන්ති.
[දෙවපුත්තො:]
න අඤ්ඤත්ර භගවතා නාඤ්ඤත්ර තව සාසනා, යස්ස තෙ ධම්මමඤ්ඤාය අච්ඡිදුං භවබන්ධනං.
යත්ථ නාමඤ්ච රූපඤ්ච අසෙසං උපරුජ්ඣති, තං තෙ ධම්මං ඉධඤ්ඤූය අච්ඡිදුං භවබන්ධනන්ති.
[භගවා:]
ගම්භීරං වාචසි වාචං දුබ්බිජානං සුදුබ්බුධං, කස්ස ත්වං ධම්මමඤ්ඤාය වාචං භාසසි ඊදිසන්ති.
[දෙවපුත්තො:]
කුම්භකාරො පුරෙ ආසිං වෙහලිඞ්ගෙ ඝටීකරො, මාතාපෙත්තිභරො ආසිං කස්සපස්ස උපාසකො.
විරතො මෙථුනා ධම්මා බ්රහ්මචාරී නිරාමිසො, අහුවා තෙ සගාමෙය්යො අහුවා තෙ පුරෙ සඛා.
සොහං එතෙ පජානාමි විමුත්තෙ සත්ත භික්ඛවො, රාගදොසපරික්ඛීණෙ තිණ්ණෙ ලොකෙ විසත්තිකන්ති.
[භගවා:]
එවමෙතං තදා ආසි යථා භාසසි භග්ගව, කුම්භකාරො පුරෙ ආසි වෙහලිඞ්ගෙ ඝටීකරො. මාතාපෙත්තිභරො ආසි කස්සපස්ස උපාසකො.
විරතො මෙථුනා ධම්මා බ්රහ්මචාරී නිරාමිසො, අහුවා මෙ සගාමෙය්යො අහුවා මෙ පුරෙ සඛාති.
[ථෙරා:]
එවමෙතං පුරාණානං සහායානං අහු සඞ්ගමො, උභින්නං භාවිතත්තානං සරීරන්තිමධාරිනන්ති.
2. 3. 5.
ජන්තුසුත්තං.
106. එවං මෙ සුතං එකං සමයං සම්බහුලා භික්ඛූ කොසලෙසු විහරන්ති හිමවන්තපස්සෙ අරඤ්ඤකුටිකායං{1} උද්ධතා උන්නළා චපලා මුඛරා විකිණ්ණවාචා මුට්ඨස්සතිනො අසම්පජානා අසමාහිතා විබ්භන්තචිත්තා පාකතින්ද්රියා.
අථ ඛො ජන්තු දෙවපුත්තො තදහුපොසථෙ පණ්ණරසෙ යෙන තෙ භික්ඛූ තෙනුපසඞ්කමි, උපසඞ්කමිත්වා තෙ භික්ඛූ ගාථාහි අජ්ඣභාසි:
සුඛජීවිනො පුරෙ ආසුං භික්ඛූ ගොතමසාවකා, අනිච්ඡා පිණ්ඩමෙසනා අනිච්ඡා සයනාසනං, ලොකෙ අනිච්චතං ඤත්වා දුක්ඛස්සන්තං අකංසු{2} තෙ.
දුප්පොසං කත්වා අත්තානං ගාමෙ ගාමණිකා විය, භුත්වා භුත්වා නිපජ්ජන්ති පරාගාරෙසු මුච්ඡිතා.
සඞ්ඝස්ස අඤ්ජලිං කත්වා ඉධෙකච්චෙ වදාමහං, අපවිද්ධා{1} අනාථා තෙ යථා පෙතා තථෙව ච.{2}
යෙ ඛො පමත්තා විහරන්ති තෙ මෙ සන්ධාය භාසිතං, යෙ අප්පමත්තා විහරන්ති නමො තෙසං කරොමහන්ති.
2. 3. 6.
රොහිතස්සසුත්තං.
107. සාවත්ථියං–
එකමන්තං ඨිතො ඛො රොහිතස්සො දෙවපුත්තො භගවන්තං එතදවොච.
යත්ථ නු ඛො භන්තෙ, න ජායති න ජීයති න මීයති න චවති න උප්පජ්ජති{3} සක්කා නු ඛො සො භන්තෙ ගමනෙන ලොකස්ස අන්තො ඤාතුං වා දට්ඨුං වා පාපුණිතුං වාති.
යත්ථ ඛො ආවුසො න ජායති න ජීයති න මීයති න චවති න උප්පජ්ජති{3} නාහං තං ගමනෙන ලොකස්ස අන්තං ඤාතෙය්යං දට්ඨෙය්යං පත්තෙය්යන්ති වදාමීති.
අච්ඡරියං භන්තෙ, අබ්භුතං භන්තෙ, යාවසුභාසිතමිදං භන්තෙ, භගවතා, යත්ථ ඛො ආවුසො න ජායති න ජීයති න මීයති න චවති න උප්පජ්ජති{3} නාහං තං ගමනෙන ලොකස්ස අන්තං ඤාතෙය්යං දට්ඨෙය්යං පත්තෙය්යන්ති වදාමීති.
භූතපුබ්බාහං භන්තෙ, රොහිතස්සො නාම ඉසි අහොසිං භොජපුත්තො ඉද්ධිමා වෙහාසඞ්ගමො. තස්ස මය්හං භන්තෙ එවරූපො ජවො අහොසි: සෙය්යථාපි නාම දළ්හධම්මා{4} ධනුග්ගහො සික්ඛිතො{5} කතහත්ථො කතයොග්ගො කතූපාසනො ලහුකෙන අසනෙන අප්පකසිරෙනෙව තිරියං තාලච්ඡායං අතිපාතෙය්ය.
තස්ස මය්හං භන්තෙ, එවරූපො පදවීතිහාරො අහොසි: සෙය්යථාපි{6} නාම පුරත්ථිමසමුද්දා පච්ඡිමො සමුද්දො. තස්ස මය්හං භන්තෙ, එවරූපං ඉච්ඡාගතං උප්පජ්ජි: “අහං ගමනෙන ලොකස්ස අන්තං පාපුණිස්සාමී”ති.
සො ඛ්වාහං භන්තෙ එවරූපෙන ජවෙන සමන්නාගතො එවරූපෙන ච පදවීතිහාරෙන අඤ්ඤත්රෙව අසිතපීතඛායිතසායිතා අඤ්ඤත්ර උච්චාරපස්සාවකම්මා අඤ්ඤත්ර නිද්දාකිලමථපටිවිනොදනා වස්සසතායුකො වස්සසතජීවී වස්සසතං ගන්ත්වා අප්පත්වා ව{7} ලොකස්ස අන්තං අන්තරාව කාලකතො.{8}
අච්ඡරියං භන්තෙ, අබ්භුතං භන්තෙ, යාවසුභාසිතමිදං භන්තෙ, භගවතා: “යත්ථ ඛො ආවුසො න ජායති, න ජීයති, න මීයති, න චවති, න උප්පජ්ජති, නාහං තං ගමනෙන ලොකස්ස අන්තං ඤාතෙය්යං දට්ඨෙය්යං පත්තෙය්යන්ති වදාමී”ති.
න ඛො පනාහං ආවුසො, අප්පත්වා ලොකස්ස අන්තං දුක්ඛස්ස අන්තකිරියං වදාමි. අපි චාහං ආවුසො ඉමස්මිඤ්ඤෙව බ්යාමමත්තෙ කලෙබරෙ සසඤ්ඤිම්හි සමනකෙ ලොකඤ්ච පඤ්ඤාපෙමි, ලොකසමුදයඤ්ච ලොකනිරොධඤ්ච ලොකනිරොධගාමිනිඤ්ච පටිපදන්ති.
ගමනෙන න පත්තබ්බො ලොකස්සන්තො කුදාචනං, න ච අප්පත්වා ලොකන්තං දුක්ඛා අත්ථි පමොචනං.
තස්මා හවෙ ලොකවිදූ සුමෙධො ලොකන්තගූ වුසිතබ්රහ්මචරියො, ලොකස්ස අන්තං සමිතාවි ඤත්වා නාසිංසති{1} ලොකමිමං පරඤ්චාති.
2. 3. 7.
නන්දසුත්තං.
108. සාවත්ථියං–
එකමන්තං ඨිතො ඛො නන්දො දෙවපුත්තො භගවතො සන්තිකෙ ඉමං ගාථං අභාසි:
අච්චෙන්ති කාලා තරයන්ති රත්තියො වයොගුණා අනුපුබ්බං ජහන්ති, එතං භයං මරණෙ පෙක්ඛමානො පුඤ්ඤානි කයිරාථ සුඛාවහානීති.
[භගවා:]
අච්චෙන්ති කාලා තරයන්ති රත්තියො වයොගුණා අනුපුබ්බං ජහන්ති, යං මරණෙ පෙක්ඛමානො ලොකාමිසං පජහෙ සන්තිපෙක්ඛොති.
2. 3. 8.
නන්දිවිසාලසුත්තං.
109. සාවත්ථියං–
එකමන්තං ඨිතො ඛො නන්දිවිසාලො දෙවපුත්තො භගවන්තං ගාථාය අජ්ඣභාසි:-
චතුචක්කං නවද්වාරං පුණ්ණං ලොභෙන සංයුතං, පඞ්කජාතං මහාවීර කථං යාත්රා භවිස්සතීති.
[භගවා:]
ඡෙත්වා නද්ධිං වරත්තඤ්ච ඉච්ඡා ලොභඤ්ච පාපකං, සමූලං තණ්හං අබ්බුය්හ එවං යාත්රා භවිස්සතීති.
2. 3. 9.
සුසීමසුත්තං.
110. සාවත්ථියං–
අථ ඛො ආයස්මා ආනන්දො යෙන භගවා තෙනුපසඞ්කමි. උපසඞ්කමිත්වා භගවන්තං අභිවාදෙත්වා එකමන්තං නිසීදි. එකමන්තං නිසින්නං ඛො ආයස්මන්තං ආනන්දං භගවා එතදවොච: තුය්හම්පි නො ආනන්ද සාරිපුත්තො රුච්චතීති.
කස්ස හි නාම භන්තෙ, අබාලස්ස අදුට්ඨස්ස අමූළ්හස්ස අවිපල්ලත්ථචිත්තස්ස ආයස්මා සාරිපුත්තො න රුච්චෙය්ය. පණ්ඩිතො භන්තෙ, ආයස්මා සාරිපුත්තො. මහාපඤ්ඤො භන්තෙ, ආයස්මා සාරිපුත්තො. පුථුපඤ්ඤො භන්තෙ, ආයස්මා සාරිපුත්තො. හාසුපඤ්ඤො{1} භන්තෙ, ආයස්මා සාරිපුත්තො. ජවනපඤ්ඤො භන්තෙ, ආයස්මා සාරිපුත්තො. තික්ඛපඤ්ඤො භන්තෙ, ආයස්මා සාරිපුත්තො. නිබ්බෙධිකපඤ්ඤො භන්තෙ, ආයස්මා සාරිපුත්තො. අප්පිච්ඡො භන්තෙ, ආයස්මා සාරිපුත්තො. සන්තුට්ඨො භන්තෙ, ආයස්මා සාරිපුත්තො. පවිවිත්තො භන්තෙ, ආයස්මා සාරිපුත්තො. අසංසට්ඨො භන්තෙ, ආයස්මා සාරිපුත්තො. ආරද්ධවිරියො භන්තෙ, ආයස්මා සාරිපුත්තො. වත්තා භන්තෙ, ආයස්මා සාරිපුත්තො. වචනක්ඛමො භන්තෙ, ආයස්මා සාරිපුත්තො. චොදකො භන්තෙ, ආයස්මා සාරිපුත්තො. පාපගරහී භන්තෙ, ආයස්මා සාරිපුත්තො. කස්ස හි නාම භන්තෙ, අබාලස්ස අදුට්ඨස්ස අමූළ්හස්ස අවිපල්ලත්ථචිත්තස්ස ආයස්මා සාරිපුත්තො න රුච්චෙය්යාති.
එවමෙතං ආනන්ද, එවමෙතං ආනන්ද. කස්ස හි නාම ආනන්ද, අබාලස්ස අදුට්ඨස්ස අමූළ්හස්ස අවිපල්ලත්ථචිත්තස්ස සාරිපුත්තො න රුච්චෙය්ය. පණ්ඩිතො ආනන්ද සාරිපුත්තො. මහාපඤ්ඤො ආනන්ද සාරිපුත්තො. පුථුපඤ්ඤො ආනන්ද සාරිපුත්තො. හාසුපඤ්ඤො ආනන්ද සාරිපුත්තො. ජවනපඤ්ඤො ආනන්ද සාරිපුත්තො. තික්ඛපඤ්ඤො ආනන්ද සාරිපුත්තො. නිබ්බෙධිකපඤ්ඤො ආනන්ද සාරිපුත්තො. අප්පිච්ඡො ආනන්ද සාරිපුත්තො. සන්තුට්ඨො ආනන්ද සාරිපුත්තො. පවිවිත්තො ආනන්ද සාරිපුත්තො. අසංසට්ඨො ආනන්ද සාරිපුත්තො. ආරද්ධවිරියො ආනන්ද සාරිපුත්තො. වත්තා ආනන්ද සාරිපුත්තො. වචනක්ඛමො ආනන්ද සාරිපුත්තො. චොදකො ආනන්ද සාරිපුත්තො. පාපගරහී ආනන්ද සාරිපුත්තො. කස්ස හි නාම ආනන්ද අබාලස්ස අදුට්ඨස්ස අමූළ්හස්ස අවිපල්ලත්ථචිත්තස්ස සාරිපුත්තො න රුච්චෙය්යාති.
අථ ඛො සුසීමො දෙවපුත්තො ආයස්මතො සාරිපුත්තස්ස වණ්ණෙ භඤ්ඤමානෙ මහතියා දෙවපුත්තපරිසාය පරිවුතො යෙන භගවා තෙනුපසඞ්කමි. උපසඞ්කමිත්වා භගවන්තං අභිවාදෙත්වා එකමන්තං අට්ඨාසි. එකමන්තං ඨිතො ඛො සුසීමො{1} දෙවපුත්තො භගවන්තං එතදවොච: එවමෙතං භගවා. එවමෙතං සුගත. කස්ස හි නාම භන්තෙ, අබාලස්ස අදුට්ඨස්ස අමූළ්හස්ස අවිපල්ලත්ථචිත්තස්ස ආයස්මා සාරිපුත්තො න රුච්චෙය්ය? පණ්ඩිතො භන්තෙ, ආයස්මා සාරිපුත්තො -පෙ- පාපගරහී භන්තෙ, ආයස්මා සාරිපුත්තො. කස්ස හි නාම භන්තෙ, අබාලස්ස අදුට්ඨස්ස අමූළ්හස්ස අවිපල්ලත්ථචිත්තස්ස ආයස්මා සාරිපුත්තො න රුච්චෙය්යාති.
අහම්පි හි භන්තෙ, යඤ්ඤදෙව දෙවපුත්තපරිසං උපසඞ්කමිං. එතදෙව බහුලං සද්දං සුණාමි: පණ්ඩිතො ආයස්මා සාරිපුත්තො. -පෙ- පාපගරහී ආයස්මා සාරිපුත්තො. කස්ස හි නාම අබාලස්ස අදුට්ඨස්ස අමූළ්හස්ස අවිපල්ලත්ථචිත්තස්ස ආයස්මා සාරිපුත්තො න රුච්චෙය්යාති.
අථ ඛො සුසීමස්ස දෙවපුත්තස්ස දෙවපුත්තපරිසා ආයස්මතො සාරිපුත්තස්ස වණ්ණෙ භඤ්ඤමානෙ අත්තමනා පමුදිතා පීතිසොමනස්සජාතා උච්චාවචා වණ්ණනිභා උපදංසෙති.
සෙය්යථාපි නාම මණිවෙළුරියො සුභො ජාතිමා{2} අට්ඨංසො සුපරිකම්මකතො පණ්ඩුකම්බලෙ නික්ඛිත්තො භාසතෙ ච තපතෙ ච විරොචති ච. එවමෙවං සුසීමස්ස දෙවපුත්තස්ස දෙවපුත්තපරිසා ආයස්මතො සාරිපුත්තස්ස වණ්ණෙ භඤ්ඤමානෙ අත්තමනා පමුදිතා පීතිසොමනස්සජාතා උච්චාවචා වණ්ණනිභා උපදංසෙති.
සෙය්යථාපි නාම නෙක්ඛං{3} ජම්බොනදං දක්ඛකම්මාරපුත්තෙන උක්කාමුඛෙ සුකුසලසම්පහට්ඨං{4} පණ්ඩුකම්බලෙ නික්ඛිත්තං භාසතෙ ච තපතෙ ච විරොචති ච. එවමෙවං සුසීමස්ස දෙවපුත්තස්ස දෙවපුත්තපරිසා -පෙ- උච්චාවචා වණ්ණනිභා උපදංසෙති.
සෙය්යථාපි නාම [සරදසමයෙ විද්ධෙ විගතවලාහකෙ දෙවෙ]{4} රත්තියා පච්චූසසමයං ඔසධිතාරකා භාසතෙ ච තපතෙ ච විරොචති ච. එවමෙවං සුසීමස්ස දෙවපුත්තස්ස දෙවපුත්තපරිසා -පෙ- උච්චාවචා වණ්ණනිභා උපදංසෙති.
සෙය්යථාපි නාම සරදසමයෙ විද්ධෙ විගතවලාහකෙ දෙවෙ ආදිච්චො නභං අබ්භුස්සුක්කමානො{5} සබ්බං ආකාසගතං තමං{6} අභිවිහච්ච භාසතෙ ච තපතෙ ච විරොචති ච. එවමෙවං සුසීමස්ස දෙවපුත්තස්ස දෙවපුත්තපරිසා -පෙ- උච්චාවචා වණ්ණනිභා උපදංසෙති.
අථ ඛො සුසීමො දෙවපුත්තො ආයස්මන්තං සාරිපුත්තං ආරබ්භ භගවතො සන්තිකෙ ඉමං ගාථං අභාසි:
පණ්ඩිතොති සමඤ්ඤාතො සාරිපුත්තො අකොධනො, අප්පිච්ඡො සොරතො දන්තො සත්ථුවණ්ණාභතො{1} ඉසීති.
අථ ඛො භගවා ආයස්මන්තං සාරිපුත්තං ආරබ්භ සුසීමං දෙවපුත්තං ගාථාය අජ්ඣභාසි:{2}
පණ්ඩිතොති සමඤ්ඤාතො සාරිපුත්තො අකොධනො, අප්පිච්ඡො සොරතො දන්තො කාලං කඞ්ඛති සුදන්තොති{3}.
2. 3. 10.
නානාතිත්ථියසාවකසුත්තං
111. එවං මෙ සුතං එකං සමයං භගවා රාජගහෙ විහරති වෙළුවනෙ කලන්දකනිවාපෙ.
අථ ඛො සම්බහුලා නානාතිත්ථියසාවකා දෙවපුත්තා අසමො ච සහලී{4} ච නිඞ්කො{5}ච ආකොටකො ච වෙටම්බරී ච{6} මාණවගාමියො ච අභික්කන්තාය රත්තියා අභික්කන්තවණ්ණා කෙවලකප්පං වෙළුවනං ඔභාසෙත්වා යෙන භගවා තෙනුපසඞ්කමිංසු. උපසඞ්කමිත්වා භගවන්තං අභිවාදෙත්වා එකමන්තං අට්ඨංසු. එකමන්තං ඨිතො ඛො අසමො දෙවපුත්තො පූරණං කස්සපං ආරබ්භ භගවතො සන්තිකෙ ඉමං ගාථං අභාසි:
ඉධ ඡින්දිතමාරිතෙ හතජානීසු කස්සපො, පාපං{7} න සමනුපස්සති පුඤ්ඤං වා පන අත්තනො, ස වෙ විස්සාසමාචික්ඛි සත්ථා අරහති මානනන්ති.
අථ ඛො සහලී දෙවපුත්තො මක්ඛලිං ගොසාලං ආරබ්භ භගවතො සන්තිකෙ ඉමං ගාථං අභාසි:
තපොජිගුච්ඡාය සුසංවුතත්තො වාචං පහාය කලහං ජනෙන, ස මොසවජ්ජා විරතො සච්චවාදී නහනූන තාදී පකරොති පාපන්ති.{8}
අථ ඛො නිඞ්කො දෙවපුත්තො නිගණ්ඨං නාතපුත්තං ආරබ්භ භගවතො සන්තිකෙ ඉමං ගාථං අභාසි:
ජෙගුච්ඡී නිපකො භික්ඛු චාතුයාමසුසංවුතො, දිට්ඨං සුතඤ්ච ආචික්ඛං නහනූන කිබ්බිසී සියාති.
අථ ඛො ආකොටකො දෙවපුත්තො නානාතිත්ථියෙ ආරබ්භ භගවතො සන්තිකෙ ඉමං ගාථං අභාසි:
පකුධකො කාතියානො නිගණ්ඨා යෙ චාපිමෙ මක්ඛලිපූරණාසෙ, ගණස්ස සත්ථාරො සාමඤ්ඤප්පත්තා නහනූන{9} තෙ සප්පුරිසෙහි දූරෙති.
අථ ඛො වෙටම්බරී දෙවපුත්තො ආකොටකං දෙවපුත්තං ගාථාය පච්චභාසි:
සහාචරිතෙන ඡවො සිගාලො න කොත්ථුකො සීහසමො කදාචි, නග්ගො මුසාවාදී ගණස්ස සත්ථා සඞ්කස්සරාචාරො න සතං සරික්ඛොති.
අථ ඛො මාරො පාපිමා වෙටම්බරිං දෙවපුත්තං අන්වාවිසිත්වා භගවතො සන්තිකෙ ඉමං ගාථං අභාසි:
තපො ජිගුච්ඡාය ආයුත්තා පාලයං පවිවෙකියං, රූපෙ ච යෙ නිවිට්ඨාසෙ දෙවලොකාභිනන්දිනො, තෙ වෙ සම්මානුසාසන්ති පරලොකාය මාතියාති.
අථ ඛො භගවා මාරො අයං පාපිමා ඉති විදිත්වා මාරං පාපිමන්තං ගාථාය පච්චභාසි:
යෙ කෙචි රූපා ඉධ වා හුරං වා යෙ අන්තලික්ඛස්මිං පභාසවණ්ණා, සබ්බෙව තෙ තෙ නමුචිප්පසත්ථා ආමිසංව මච්ඡානං වධාය ඛිත්තාති.
අථ ඛො මාණවගාමියො{1} දෙවපුත්තො භගවන්තං ආරබ්භ භගවතො සන්තිකෙ ඉමා ගාථායො අභාසි:
විපුලො රාජගහීයානං{2} ගිරි සෙට්ඨො පවුච්චති, සෙතො හිමවතං සෙට්ඨො ආදිච්චො අඝගාමිනං.
සමුද්දො උදධිනං සෙට්ඨො නක්ඛත්තානඤ්ච{3} චන්දිමා, සදෙවකස්ස ලොකස්ස බුද්ධො අග්ගො පවුච්චතීති.
නානාතිත්ථියවග්ගො තතියො.
තත්රුද්දානං:
සිවො ඛෙමො ච සෙරී ච ඝටී ජන්තු ච රොහිතො, නන්දො නන්දිවිසාලො ච සුසීමො නානාතිත්ථියෙන තෙ දසාති.
දෙවපුත්තසංයුත්තං සමත්තං.
3. කොසලසංයුත්තං
1. බන්ධනවග්ගො
3. 1. 1.
දහරසුත්තං.
112. එවං මෙ සුතං එකං සමයං භගවා සාවත්ථියං විහරති ජෙතවනෙ අනාථපිණ්ඩිකස්ස ආරාමෙ. අථ ඛො රාජා පසෙනදි කොසලො යෙන භගවා තෙනුපසඞ්කමි. උපසඞ්කමිත්වා භගවතා සද්ධිං සම්මොදි. සම්මොදනීයං කථං සාරාණීයං{1} වීතිසාරෙත්වා එකමන්තං නිසීදි. එකමන්තං නිසින්නො ඛො රාජා පසෙනදි කොසලො භගවන්තං එතදවොච: භවම්පි නො ගොතමො අනුත්තරං සම්මාසම්බොධිං අභිසම්බුද්ධොති පටිජානාතී?ති.
යං හි තං මහාරාජ සම්මා වදමානො වදෙය්ය, අනුත්තරං සම්මාසම්බොධිං අභිසම්බුද්ධොති, මමං{2} තං සම්මා වදමානො වදෙය්ය. අහං හි මහාරාජ අනුත්තරං සම්මාසම්බොධිං අභිසම්බුද්ධොති.
යෙ’පි තෙ භො ගොතම සමණබ්රාහ්මණා සඞ්ඝිනො ගණිනො ගණාචරියා ඤාතා යසස්සිනො තිත්ථකරා සාධුසම්මතා බහුජනස්ස. සෙය්යථීදං:{3} පූරණො කස්සපො, මක්ඛලි ගොසාලො, නිගණ්ඨො නාතපුත්තො, සඤ්චයො බෙලට්ඨපුත්තො,{4} පකුධො{5} කච්චායනො, අජිතො කෙසකම්බලො. තෙ’පි “මයා අනුත්තරං සම්මාසම්බොධිං අභිසම්බුද්ධාති{*} පටිජානාථා”ති පුට්ඨා සමානා අනුත්තරං සම්මාසම්බොධිං අභිසම්බුද්ධාති{*} න පටිජානන්ති. කිං පන භවං ගොතමො දහරො චෙව ජාතියා නවො ච පබ්බජ්ජායාති.