පඤ්චසීලසුත්තං
305. පඤ්චහි භික්ඛවෙ, ධම්මෙහි සමන්නාගතො මාතුගාමො කායස්ස භෙදා පරම්මරණා සුගතිං සග්ගං ලොකං උපපජ්ජති. කතමෙහි පඤ්චහි: පාණාතිපාතා පටිවිරතො ච හොති, අදින්නාදානා පටිවිරතො ච හොති, කාමෙසු මිච්ඡාචාරා පටිවිරතො ච හොති, මුසාවාදා පටිවිරතො ච හොති, සුරාමෙරයමජ්ජපමාදට්ඨානා පටිවිරතො ච හොති. ඉමෙහි ඛො භික්ඛවෙ, පඤ්චහි ධම්මෙහි සමන්නාගතො මාතුගාමො කායස්ස භෙදා පරම්මරණා සුගතිං සග්ගං ලොකං උපපජ්ජතීති.
අනුරුද්ධවග්ගො දුතියො.
තත්රුද්දානං:
අනුරුද්ධො අක්කොධනො අනුපනාහී අනිස්සුකී අමච්ඡරී අනතිචාරී සීලවා ච බහුස්සුතො විරියං සති පඤ්චසීලො ච සුක්කපක්ඛෙ පකාසිතාති.
3. බලවග්ගො
3. 3. 1.
සුද්ධසුත්තං
306. පඤ්චිමානි භික්ඛවෙ, මාතුගාමස්ස බලානි. කතමානි පඤ්ච: රූපබලං, භොගබලං, ඤාතිබලං, පුත්තබලං, සීලබලං. ඉමානි ඛො භික්ඛවෙ පඤ්ච මාතුගාමස්ස බලානීති.
3. 3. 2.
විසාරදසුත්තං
307. පඤ්චිමානි භික්ඛවෙ, මාතුගාමස්ස බලානි. කතමානි පඤ්ච: රූපබලං, භොගබලං, ඤාතිබලං, පුත්තබලං, සීලබලං. ඉමානි ඛො භික්ඛවෙ, පඤ්ච මාතුගාමස්ස බලානි. ඉමෙහි ඛො භික්ඛවෙ, පඤ්චහි බලෙහි සමන්නාගතො මාතුගාමො විසාරදො අගාරං අජ්ඣාවසතීති.
3. 3. 3.
පසය්හසුත්තං
308. පඤ්චිමානි භික්ඛවෙ, මාතුගාමස්ස බලානි. කතමානි පඤ්ච: රූපබලං, භොගබලං, ඤාතිබලං, පුත්තබලං, සීලබලං. ඉමානි ඛො භික්ඛවෙ, පඤ්ච මාතුගාමස්ස බලානි. ඉමෙහි ඛො භික්ඛවෙ, පඤ්චහි බලෙහි සමන්නාගතො මාතුගාමො සාමිකං පසය්හ අගාරං අජ්ඣාවසතීති.
3. 3. 4.
අභිභුය්හසුත්තං
309. පඤ්චිමානි භික්ඛවෙ, මාතුගාමස්ස බලානි. කතමානි පඤ්ච: රූපබලං, භොගබලං, ඤාතිබලං, පුත්තබලං, සීලබලං. ඉමානි ඛො භික්ඛවෙ, පඤ්ච මාතුගාමස්ස බලානි. ඉමෙහි ඛො භික්ඛවෙ, පඤ්චහි බලෙහි සමන්නාගතො මාතුගාමො සාමිකං අභිභුය්ය වත්තති.
එකෙන ච ඛො භික්ඛවෙ බලෙන සමන්නාගතො පුරිසො මාතුගාමං අභිභුය්ය වත්තති. කතමෙන එකෙන: ඉස්සරියබලෙන, ඉස්සරියබලෙන අභිභූතං භික්ඛවෙ මාතුගාමං නෙව රූපබලං තායති, න භොගබලං{1} තායති. න ඤාතිබලං තායති. න පුත්තබලං තායති. න සීලබලං තායතීති.
3. 3. 5.
අඞ්ගසුත්තං
310. පඤ්චිමානි භික්ඛවෙ, මාතුගාමස්ස බලානි. කතමානි පඤ්ච: රූපබලං, භොගබලං, ඤාතිබලං, පුත්තබලං, සීලබලං. රූපබලෙන ච භික්ඛවෙ, මාතුගාමො සමන්නාගතො හොති, න ච භොගබලෙන, එවං සො තෙන අඞ්ගෙන අපරිපූරො හොති. යතො ච ඛො භික්ඛවෙ, මාතුගාමො රූපබලෙන ච සමන්නාගතො හොති භොගබලෙන ච, එවං සො තෙන අඞ්ගෙන පරිපූරො හොති. රූපබලෙන ච භික්ඛවෙ, මාතුගාමො සමන්නාගතො හොති භොගබලෙන ච, න ච ඤාතිබලෙන, එවං සො තෙන අඞ්ගෙන අපරිපූරො හොති. යතො ච ඛො භික්ඛවෙ, මාතුගාමො රූපබලෙන ච සමන්නාගතො හොති, භොගබලෙන ච ඤාතිබලෙන ච, එවං සො තෙන අඞ්ගෙන පරිපූරො හොති.
රූපබලෙන ච භික්ඛවෙ, මාතුගාමො සමන්නාගතො හොති, භොගබලෙන ච, ඤාතිබලෙන ච, න ච පුත්තබලෙන, එවං සො තෙන අඞ්ගෙන අපරිපූරො හොති. යතො ච ඛො භික්ඛවෙ, මාතුගාමො රූපබලෙන ච සමන්නාගතො හොති, භොගබලෙන ච, ඤාතිබලෙන ච, පුත්තබලෙන ච. එවං සො තෙන අඞ්ගෙන පරිපූරො හොති. රූපබලෙන ච භික්ඛවෙ, මාතුගාමො සමන්නාගතො හොති භොගබලෙන ච ඤාතිබලෙන ච පුත්තබලෙන ච, න ච සීලබලෙන. එවං සො තෙන අඞ්ගෙන අපරිපූරො හොති. යතො ච ඛො භික්ඛවෙ, මාතුගාමො රූපබලෙන ච සමන්නාගතො හොති භොගබලෙන ච ඤාතිබලෙන ච පුත්තබලෙන ච සීලබලෙන ච, එවං සො තෙන අඞ්ගෙන පරිපූරො හොති. ඉමානි ඛො භික්ඛවෙ, පඤ්ච මාතුගාමස්ස බලානීති.
3. 3. 6.
නාසිතබ්බසුත්තං
311. පඤ්චිමානි භික්ඛවෙ, මාතුගාමස්ස බලානි. කතමානි පඤ්ච: රූපබලං භොගබලං ඤාතිබලං පුත්තබලං සීලබලං. රූප බලෙන ච භික්ඛවෙ, මාතුගාමො සමන්නාගතො හොති, න ච සීලබලෙන, නාසෙන්තෙව නං කුලෙ න වාසෙන්ති. රූපබලෙන ච භික්ඛවෙ, මාතුගාමො සමන්නාගතො හොති භොගබලෙන ච, න ච සීලබලෙන, නාසෙන්තෙව නං කුලෙ න වාසෙන්ති. රූපබලෙන ච භික්ඛවෙ, මාතුගාමො සමන්නාගතො හොති භොගබලෙන ච ඤාතිබලෙන ච, න ච සීලබලෙන, නාසෙන්තෙව නං කුලෙ න වාසෙන්ති. රූපබලෙන ච භික්ඛවෙ, මාතුගාමො සමන්නාගතො හොති භොගබලෙන ච ඤාතිබලෙන ච පුත්තබලෙන ච, න ච සීලබලෙන, නාසෙන්තෙව නං කුලෙ න වාසෙන්ති.
යතො ච ඛො භික්ඛවෙ, මාතුගාමො රූපබලෙන සමන්නාගතො හොති, භොගබලෙන ච ඤාතිබලෙන ච පුත්තබලෙන ච සීල බලෙන ච. වාසෙන්තෙව නං කුලෙ න නාසෙන්ති. සීලබලෙන ච භික්ඛවෙ, මාතුගාමො සමන්නාගතො හොති න ච රූපබලෙන, වාසෙන්තෙව නං කුලෙ න නාසෙන්ති. සීලබලෙන ච භික්ඛවෙ මාතුගාමො සමන්නාගතො හොති න ච භොග බලෙන, වාසෙන්තෙව න කුලෙ න නාසෙන්ති. සීලබලෙන ච භික්ඛවෙ මාතුගාමො සමන්නාගතො හොති න ච ඤාතිබලෙන වාසෙන්තෙව නං කුලෙ න නාසෙන්ති.
සීලබලෙන ච භික්ඛවෙ මාතුගාමො සමන්නාගතො හොති න ච පුත්තබලෙන, වාසෙන්තෙව නං කුලෙ න නාසෙන්ති. ඉමානි ඛො භික්ඛවෙ පඤ්ච මාතුගාමස්ස බලානීති.
3. 3. 7.
හෙතුසුත්තං
312. පඤ්චිමානි භික්ඛවෙ, මාතුගාමස්ස බලානි. කතමානි පඤ්ච: රූපබලං, භොගබලං, ඤාතිබලං, පුත්තබලං, සීලබලං. න භික්ඛවෙ, මාතුගාමො රූපබලහෙතු වා භොගබලහෙතු වා ඤාතිබලහෙතු වා පුත්තබලහෙතු වා කායස්ස භෙදා පරම්මරණා සුගතිං සග්ගං ලොකං උපපජ්ජති. සීලබලහෙතු ඛො භික්ඛවෙ මාතුගාමො කායස්ස භෙදා පරම්මරණා සුගතිං සග්ගං ලොකං උපපජ්ජති. ඉමානි ඛො භික්ඛවෙ පඤ්ච මාතුගාමස්ස බලානීති.
3. 3. 8.
ඨානසුත්තං
313. පඤ්චිමානි භික්ඛවෙ ඨානානි දුල්ලභානි අකතපුඤ්ඤෙන මාතුගාමෙන. කතමානි පඤ්ච: පතිරූපෙකුලෙ ජායෙය්යන්ති ඉදං භික්ඛවෙ පඨමං ඨානං දුල්ලභං අකතපුඤ්ඤෙන මාතුගාමෙන. පතිරූපකුලෙ ජායිත්වා පතිරූපං කුලං ගච්ඡෙය්යන්ති ඉදං භික්ඛවෙ දුතියං ඨානං. දුල්ලභං අකතපුඤ්ඤෙන මාතුගාමෙන. පතිරූපකුලෙ ජායිත්වා පතිරූපං කුලං ගන්ත්වා අසපත්ති අගාරං අජ්ඣාවසෙය්යන්ති ඉදං භික්ඛවෙ තතියං ඨානං දුල්ලභං අකතපුඤ්ඤෙන මාතුගාමෙන. පතිරූපකුලෙ ජායිත්වා පතිරූපං කුලං ගන්ත්වා අසපත්ති අගාරං අජ්ඣාවසන්තී පුත්තවතී අස්සන්ති ඉදං භික්ඛවෙ චතුත්ථං ඨානං දුල්ලභං අකතපුඤ්ඤෙන මාතුගාමෙන. පතිරූපකුලෙ ජායිත්වා පතිරූපං කුලං ගන්ත්වා අසපත්ති අගාරං අජ්ඣාවසන්තී පුත්තවතී සමානා සාමිකං අභිභුය්ය වත්තෙය්යන්ති. ඉදං භික්ඛවෙ, පඤ්චමං ඨානං දුල්ලභං අකතපුඤ්ඤෙන මාතුගාමෙන. ඉමානි ඛො භික්ඛවෙ පඤ්ච ඨානානි දුල්ලභානි අකතපුඤ්ඤෙන මාතුගාමෙන.
පඤ්චිමානි භික්ඛවෙ ඨානානි සුලභානි කතපුඤ්ඤෙන මාතුගාමෙන. කතමානි පඤ්ච: පතිරූපකුලෙ ජායෙය්යන්ති ඉදං භික්ඛවෙ පඨමං ඨානං සුලභං කතපුඤ්ඤෙන මාතුගාමෙන. පතිරූපකුලෙ ජායිත්වා පතිරූපං කුලං ගච්ඡෙය්යන්ති. ඉදං භික්ඛවෙ දුතියං ඨානං සුලභං කතපුඤ්ඤෙන මාතුගාමෙන. පතිරූපකුලෙ ජායිත්වා පතිරූපං කුලං ගන්ත්වා අසපත්ති අගාරං අජ්ඣාවසෙය්යන්ති. ඉදං භික්ඛවෙ තතියං ඨානං සුලභං කතපුඤ්ඤෙන මාතුගාමෙන. පතිරූපකුලෙ ජායිත්වා පතිරූපං කුලං ගන්ත්වා අසපත්ති අගාරං අජ්ඣාවසන්තී පුත්තවතී අස්සන්ති. ඉදං භික්ඛවෙ චතුත්ථං ඨානං සුලභං කතපුඤ්ඤෙන මාතුගාමෙන. පතිරූපකුලෙ ජායිත්වා පතිරූපං කුලං ගන්ත්වා අසපත්ති අගාරං අජ්ඣාවසන්තී පුත්තවතී සමානා සාමිකං අභිභුය්ය වත්තෙය්යන්ති. ඉදං භික්ඛවෙ පඤ්චමං ඨානං සුලභං කතපුඤ්ඤෙන මාතුගාමෙන. ඉමානි ඛො භික්ඛවෙ පඤ්චඨානානි සුලභානි කතපුඤ්ඤෙන මාතුගාමෙනාති.
3. 3. 9.
විසාරදවාසසුත්තං
314. පඤ්චහි භික්ඛවෙ ධම්මෙහි සමන්නාගතො මාතුගාමො විසාරදො අගාරං අජ්ඣාවසති. කතමෙහි පඤ්චහි: පාණාතිපාතා පටිවිරතො ච හොති, අදින්නාදානා පටිවිරතො ච හොති, කාමෙසු මිච්ඡාචාරා පටිවිරතො ච හොති. මුසාවාදා පටිවිරතො ච හොති, සුරාමෙරයමජ්ජපමාදට්ඨානා පටිවිරතො ච හොති: ඉමෙහි ඛො භික්ඛවෙ පඤ්චහි ධම්මෙහි සමන්නාගතො මාතුගාමො විසාරදො අගාරං අජ්ඣාවසතීති.
3. 3. 10.
වඩ්ඪීසුත්තං
315. පඤ්චහි භික්ඛවෙ වඩ්ඪීහි වඩ්ඪමානා අරියසාවිකා අරියාය වඩ්ඪියා වඩ්ඪති. සාරාදායිනී ච හොති වරාදායිනී ච කායස්ස. කතමාහි{1} පඤ්චහි: සද්ධාය වඩ්ඪති, සීලෙන වඩ්ඪති, සුතෙන වඩ්ඪති, චාගෙන වඩ්ඪති, පඤ්ඤාය වඩ්ඪති. ඉමාහි{2} ඛො භික්ඛවෙ පඤ්චහි වඩ්ඪීහි වඩ්ඪමානා අරියසාවකා අරියාය වඩ්ඪියා වඩ්ඪති, සාරාදායිනී ච හොති, වරාදායිනී ච කායස්සාති.
සද්ධාය සීලෙන ච යාධ වඩ්ඪති පඤ්ඤාය චාගෙන සුතෙන චූභයං සා තාදිසී සීලවතී උපාසිකා ආදියති{3} සාරං ඉධෙව අත්තනොති.
බලවග්ගො තතියො.
තත්රුද්දානං:
සුද්ධා විසාරදා පසය්හා අභිභුය්ය අඞ්ගෙන පඤ්චමං නාසයිතබ්බං හෙතුට්ඨානං විසාරදා වඩ්ඪිනා දසාති.
මාතුගාමසංයුත්තං සමත්තං.
4. ජම්බුඛාදකසංයුත්තං
4. 1. 1.
නිබ්බානසුත්තං
316. එකං සමයං ආයස්මා සාරිපුත්තො මගධෙසු විහරති නාලගාමකෙ.{1} අථ ඛො ජම්බුඛාදකො පරිබ්බාජකො යෙනායස්මා සාරිපුත්තො තෙනුපසඞ්කමි. උපසඞ්කමිත්වා ආයස්මතා සාරිපුත්තෙන සද්ධිං සම්මොදි. සම්මොදනීයං කථං සාරාණීයං වීතිසාරෙත්වා එකමන්තං නිසීදි. එකමන්තං නිසින්නො ඛො ජම්බුඛාදකො පරිබ්බාජකො ආයස්මන්තං සාරිපුත්තං එතදවොච: නිබ්බානං නිබ්බානන්ති ආවුසො සාරිපුත්ත වුච්චති. කතමන්නු ඛො ආවුසො නිබ්බානන්ති.
යො ඛො ආවුසො රාගක්ඛයො දොසක්ඛයො මොහක්ඛයො ඉදං වුච්චති නිබ්බානන්ති. අත්ථි පනාවුසො මග්ගො අත්ථි පටිපදා එතස්ස නිබ්බානස්ස සච්ඡිකිරියායාති. අත්ථි ඛො ආවුසො මග්ගො අත්ථි පටිපදා එතස්ස නිබ්බානස්ස සච්ඡිකිරියායාති. කතමො පනාවුසො මග්ගො කතමා පටිපදා එතස්ස නිබ්බානස්ස සච්ඡිකිරියායාති. අයමෙව ඛො ආවුසො අරියො අට්ඨඞ්ගිකො මග්ගො එතස්ස නිබ්බානස්ස සච්ඡිකිරියාය, සෙය්යථිදං: සම්මාදිට්ඨි සම්මාසඞ්කප්පො සම්මාවාචා සම්මාකම්මන්තො සම්මාආජීවො සම්මාවායාමො සම්මාසති සම්මාසමාධි. අයං ඛො ආවුසො මග්ගො අයං පටිපදා එතස්ස නිබ්බානස්ස සච්ඡිකිරියායාති. භද්දකො ආවුසො මග්ගො භද්දිකා පටිපදා එතස්ස නිබ්බානස්ස සච්ඡිකිරියාය. අලඤ්ච පනාවුසො සාරිපුත්ත, අප්පමාදායාති.
4. 1. 2.
අරහත්තසුත්තං
317. අරහත්තං අරහත්තන්ති ආවුසො සාරිපුත්ත වුච්චති. කතමන්නු ඛො ආවුසො අරහත්තන්ති. යො ඛො ආවුසො රාගක්ඛයො දොසක්ඛයො මොහක්ඛයො. ඉදං වුච්චති අරහත්තන්ති. අත්ථි පනාවුසො මග්ගො අත්ථි පටිපදා එතස්ස අරහත්තස්ස සච්ඡිකිරියායාති. අත්ථි ඛො ආවුසො මග්ගො අත්ථි පටිපදා එතස්ස අරහත්තස්ස සච්ඡිකිරියායාති. කතමො පනාවුසො මග්ගො කතමා පටිපදා එතස්ස අරහත්තස්ස සච්ඡිකිරියායාති. අයමෙව ඛො ආවුසො අරියො අට්ඨඞ්ගිකො මග්ගො එතස්ස අරහත්තස්ස සච්ඡිකිරියාය. සෙය්යථිදං: සම්මාදිට්ඨි -පෙ- සම්මාසමාධි. අයං ඛො ආවුසො මග්ගො අයං පටිපදා එතස්ස අරහත්තස්ස සච්ඡිකිරියායාති. භද්දකො ආවුසො මග්ගො භද්දිකා පටිපදා එතස්ස අරහත්තස්ස සච්ඡිකිරියාය. අලඤ්ච පනාවුසො සාරිපුත්ත අප්පමාදායාති.
4. 1. 3.
ධම්මවාදීසුත්තං
318. කො නු ඛො ආවුසො සාරිපුත්ත ලොකෙ ධම්මවාදිනො, කෙ ලොකෙ සුප්පටිපන්නා, කෙ ලොකෙ සුගතාති. යෙ ඛො ආවුසො රාගස්ස පහානාය{1} ධම්මං දෙසෙන්ති, දොසස්ස පහානාය ධම්මං දෙසෙන්ති, මොහස්ස පහානාය ධම්මං දෙසෙන්ති, තෙ ලොකෙ ධම්මවාදිනො. යෙ ඛො ආවුසො රාගස්ස පහානාය පටිපන්නා, දොසස්ස පහානාය පටිපන්නා, මොහස්ස පහානාය පටිපන්නා, තෙ ලොකෙ සුප්පටිපන්නා. යෙසං ඛො ආවුසො රාගො පහීනො උච්ඡින්නමූලො තාලාවත්ථුකතො අනභාවකතො{2} ආයතිං අනුප්පාදධම්මො, දොසො පහීනො උච්ඡින්නමූලො තාලාවත්ථුකතො අනභාවකතො ආයතිං අනුප්පාදධම්මො, මොහො පහීනො උච්ඡින්නමූලො තාලාවත්ථුකතො අනභාවකතො ආයතිං අනුප්පාදධම්මො තෙ ලොකෙ සුගතාති.
අත්ථි පනාවුසො මග්ගො අත්ථි පටිපදා එතස්ස රාගස්ස දොසස්ස මොහස්ස පහානායාති. අත්ථි ඛො{3} ආවුසො මග්ගො අත්ථි පටිපදා එතස්ස රාගස්ස දොසස්ස මොහස්ස පහානායාති. කතමො පනාවුසො මග්ගො කතමා පටිපදා එතස්ස රාගස්ස දොසස්ස මොහස්ස පහානායාති. අයමෙව ඛො ආවුසො අරියො අට්ඨඞ්ගිකො මග්ගො එතස්ස රාගස්ස දොසස්ස මොහස්ස පහානාය. සෙය්යථිදං: සම්මාදිට්ඨි -පෙ- සම්මාසමාධි. අයං ඛො ආවුසො මග්ගො අයං පටිපදා එතස්ස රාගස්ස දොසස්ස මොහස්ස පහානායාති. භද්දකො ආවුසො මග්ගො භද්දිකා පටිපදා එතස්ස රාගස්ස දොසස්ස මොහස්ස පහානාය. අලඤ්ච පනාවුසො සාරිපුත්ත, අප්පමාදායාති.
4. 1. 4.
කිමත්ථියසුත්තං
319. කිමත්ථියං ආවුසො සාරිපුත්ත, සමණෙ ගොතමෙ බ්රහ්මචරියං වුස්සතීති. දුක්ඛස්ස ඛො ආවුසො, පරිඤ්ඤත්ථං භගවති බ්රහ්මචරියං වුස්සතීති. අත්ථි පනාවුසො මග්ගො අත්ථි පටිපදා එතස්ස දුක්ඛස්ස පරිඤ්ඤායාති. අත්ථි ඛො ආවුසො මග්ගො අත්ථි පටිපදා එතස්ස දුක්ඛස්ස පරිඤ්ඤායාති. කතමො පනාවුසො මග්ගො කතමා පටිපදා එතස්ස දුක්ඛස්ස පරිඤ්ඤායාති. අයමෙව ඛො ආවුසො අරියො අට්ඨඞ්ගිකො මග්ගො එතස්ස දුක්ඛස්ස පරිඤ්ඤාය, සෙය්යථිදං: සම්මාදිට්ඨි -පෙ- සම්මාසමාධි. අයං ඛො ආවුසො මග්ගො අයං පටිපදා එතස්ස දුක්ඛස්ස පරිඤ්ඤායාති. භද්දකො ආවුසො මග්ගො භද්දිකා පටිපදා එතස්ස දුක්ඛස්ස පරිඤ්ඤාය. අලඤ්ච පනාවුසො සාරිපුත්ත අප්පමාදායාති.
4. 1. 5.
අස්සාසසුත්තං
320. අස්සාසප්පත්තො අස්සාසප්පත්තොති ආවුසො සාරිපුත්ත වුච්චති. කිත්තාවතා නු ඛො ආවුසො සාරිපුත්ත අස්සාසප්පත්තො හොතීති. යතො ඛො ආවුසො භික්ඛු ඡන්නං ඵස්සායතනානං සමුදයඤ්ච අත්ථගමඤ්ච අස්සාදඤ්ච ආදීනවඤ්ච නිස්සරණඤ්ච යථාභූතං පජානාති, එත්තාවතා ඛො ආවුසො අස්සාසප්පත්තො හොතීති. අත්ථි පනාවුසො මග්ගො අත්ථි පටිපදා එතස්ස අස්සාසස්ස සච්ඡිකිරියායාති. අත්ථි ඛො ආවුසො මග්ගො අත්ථි පටිපදා එතස්ස අස්සාසස්ස සච්ඡිකිරියායාති.
කතමො පනාවුසො මග්ගො කතමා පටිපදා එතස්ස අස්සාසස්ස සච්ඡිකිරියායාති. අයමෙව ඛො ආවුසො අරියො අට්ඨඞ්ගිකො මග්ගො එතස්ස අස්සාසස්ස සච්ඡිකිරියාය. සෙය්යථිදං: සම්මාදිට්ඨි -පෙ- සම්මාසමාධි. අයං ඛො ආවුසො මග්ගො අයං පටිපදා එතස්ස අස්සාසස්ස සච්ඡිකිරියායාති. භද්දකො ආවුසො මග්ගො භද්දිකා පටිපදා එතස්ස අස්සාසස්ස සච්ඡිකිරියාය. අලඤ්ච පනාවුසො සාරිපුත්ත, අප්පමාදායාති.
4. 1. 6.
පරමස්සාසසුත්තං
321. පරමස්සාසප්පත්තො පරමස්සාසප්පත්තොති ආවුසො සාරිපුත්ත, වුච්චති. කිත්තාවතා නු ඛො ආවුසො සාරිපුත්ත, පරමස්සාසප්පත්තො හොතීති. යතො ඛො ආවුසො භික්ඛු ඡන්නං ඵස්සායතනානං සමුදයඤ්ච අත්ථගමඤ්ච අස්සාදඤ්ච ආදීනවඤ්ච නිස්සරණඤ්ච යථාභූතං විදිත්වා අනුපාදා විමුත්තො හොති, එත්තාවතා ඛො ආවුසො පරමස්සාසප්පත්තො හොතීති. අත්ථි පනාවුසො මග්ගො අත්ථි පටිපදා එතස්ස පරමස්සාසස්ස සච්ඡිකිරියායාති. අත්ථි ඛො ආවුසො මග්ගො අත්ථි පටිපදා එතස්ස පරමස්සාසස්ස සච්ඡිකිරියායාති.
කතමො පනාවුසො මග්ගො කතමා පටිපදා එතස්ස පරමස්සාසස්ස සච්ඡිකිරියායාති. අයමෙව ඛො ආවුසො අරියො අට්ඨඞ්ගිකො මග්ගො එතස්ස පරමස්සාසස්ස සච්ඡිකිරියාය. සෙය්යථිදං: සම්මාදිට්ඨි -පෙ- සම්මාසමාධි. අයං ඛො ආවුසො මග්ගො අයං පටිපදා එතස්ස පරමස්සාසස්ස සච්ඡිකිරියායාති. භද්දකො ආවුසො මග්ගො භද්දිකා පටිපදා එතස්ස පරමස්සාසස්ස සච්ඡිකිරියාය. අලඤ්ච පනාවුසො සාරිපුත්ත අප්පමාදායාති.
4. 1. 7.
වෙදනාසුත්තං
322. වෙදනා වෙදනාති ආවුසො සාරිපුත්ත වුච්චති. කතමා නු ඛො ආවුසො වෙදනාති. තිස්සො ඉමා ආවුසො වෙදනා. සුඛා වෙදනා දුක්ඛා වෙදනා අදුක්ඛමසුඛා වෙදනා. ඉමා ඛො ආවුසො තිස්සො වෙදනාති. අත්ථි පනාවුසො මග්ගො අත්ථි පටිපදා එතාසං{1} වෙදනානං පරිඤ්ඤායාති. අත්ථි ඛො ආවුසො මග්ගො අත්ථි පටිපදා එතාසං වෙදනානං පරිඤ්ඤායාති.
කතමො පනාවුසො මග්ගො කතමා පටිපදා එතාසං වෙදනානං පරිඤ්ඤායාති. අයමෙව ඛො ආවුසො අරියො අට්ඨඞ්ගිකො මග්ගො එතාසං වෙදනානං පරිඤ්ඤාය. සෙය්යථිදං: සම්මාදිට්ඨි -පෙ- සම්මාසමාධි. අයං ඛො ආවුසො මග්ගො අයං පටිපදා එතාසං වෙදනානං පරිඤ්ඤායාති. භද්දකො ආවුසො මග්ගො භද්දිකා පටිපදා එතාසං වෙදනානං පරිඤ්ඤාය. අලඤ්ච පනාවුසො සාරිපුත්ත අප්පමාදායාති.
4. 1. 8.
ආසවසුත්තං
323. ආසවො ආසවොති ආවුසො සාරිපුත්ත, වුච්චති. කතමො නු ඛො ආවුසො ආසවොති. තයො මෙ ආවුසො ආසවා. කාමාසවො භවාසවො අවිජ්ජාසවො. ඉමෙ ඛො ආවුසො තයො ආසවාති. අත්ථි පනාවුසො මග්ගො අත්ථි පටිපදා එතෙසං ආසවානං පහානායාති. අත්ථි ඛො ආවුසො මග්ගො අත්ථි පටිපදා එතෙසං ආසවානං පහානායාති. කතමො පනාවුසො මග්ගො කතමා පටිපදා එතෙසං ආසවානං පහානායාති. අයමෙව ඛො ආවුසො අරියො අට්ඨඞ්ගිකො මග්ගො එතෙසං ආසවානං පහානාය, සෙය්යථිදං: සම්මාදිට්ඨි -පෙ- සම්මාසමාධි. අයං ඛො ආවුසො මග්ගො අයං පටිපදා එතෙසං ආසවානං පහානායාති. භද්දකො ආවුසො මග්ගො භද්දිකා පටිපදා එතෙසං ආසවානං පහානාය. අලඤ්ච පනාවුසො සාරිපුත්ත අප්පමාදායාති.
4. 1. 9.
අවිජ්ජාසුත්තං
324. අවිජ්ජා අවිජ්ජාති ආවුසො සාරිපුත්ත වුච්චති. කතමා නු ඛො ආවුසො අවිජ්ජාති. යං ඛො ආවුසො දුක්ඛෙ අඤ්ඤාණං දුක්ඛසමුදයෙ අඤ්ඤාණං, දුක්ඛනිරොධෙ අඤ්ඤාණං දුක්ඛනිරොධගාමිනියා පටිපදාය අඤ්ඤාණං, අයං වුච්චතාවුසො අවිජ්ජාති. අත්ථි පනාවුසො මග්ගො අත්ථි පටිපදා, එතිස්සා අවිජ්ජාය පහානායාති. අත්ථි ඛො ආවුසො මග්ගො අත්ථි පටිපදා එතිස්සා අවිජ්ජාය පහානායාති. කතමො පනාවුසො මග්ගො කතමා පටිපදා එතිස්සා අවිජ්ජාය පහානායාති. අයමෙව ඛො ආවුසො අරියො අට්ඨඞ්ගිකො මග්ගො එතිස්සා අවිජ්ජාය පහානාය. සෙය්යථිදං: සම්මාදිට්ඨි -පෙ- සම්මාසමාධි. අයං ඛො ආවුසො මග්ගො අයං පටිපදා එතිස්සා අවිජ්ජාය පහානායාති. භද්දකො ආවුසො මග්ගො, භද්දිකා පටිපදා එතිස්සා අවිජ්ජාය පහානාය. අලඤ්ච පනාවුසො සාරිපුත්ත අප්පමාදායාති.
4. 1. 10.
තණ්හාසුත්තං
325. තණ්හා තණ්හාති ආවුසො සාරිපුත්ත වුච්චති. කතමා නු ඛො ආවුසො තණ්හාති. තිස්සො ඉමා ආවුසො තණ්හා: කාමතණ්හා භවතණ්හා විභවතණ්හා. ඉමා ඛො ආවුසො තිස්සො තණ්හාති. අත්ථි පනාවුසො මග්ගො අත්ථි පටිපදා එතාසං තණ්හානං පහානායාති. අත්ථි ඛො ආවුසො මග්ගො අත්ථි පටිපදා එතාසං තණ්හානං පහානායාති. කතමො පනාවුසො මග්ගො කතමා පටිපදා එතාසං තණ්හානං පහානායාති. අයමෙව ඛො ආවුසො අරියො අට්ඨඞ්ගිකො මග්ගො එතාසං තණ්හානං පහානාය. සෙය්යථිදං: සම්මාදිට්ඨි -පෙ- සම්මාසමාධි. අයං ඛො ආවුසො මග්ගො අයං පටිපදා එතාසං තණ්හානං පහානායාති. භද්දකො ආවුසො මග්ගො භද්දිකා පටිපදා එතාසං තණ්හානං පහානාය. අලඤ්ච පනාවුසො සාරිපුත්ත අප්පමාදායාති.
4. 1. 11.
ඔඝසුත්තං
326. ඔඝො ඔඝොති ආවුසො සාරිපුත්ත වුච්චති. කතමො නු ඛො ආවුසො ඔඝොති. චත්තාරොමෙ ආවුසො ඔඝා: කාමොඝො භවොඝො දිට්ඨොඝො අවිජ්ජොඝො. ඉමෙ ඛො ආවුසො චත්තාරො ඔඝාති. අත්ථි පනාවුසො මග්ගො අත්ථි පටිපදා එතෙසං ඔඝානං පහානායාති. අත්ථි ඛො ආවුසො මග්ගො අත්ථි පටිපදා එතෙසං ඔඝානං පහානායාති. කතමො පනාවුසො මග්ගො කතමා පටිපදා එතෙසං ඔඝානං පහානායාති. අයමෙව ඛො ආවුසො අරියො අට්ඨඞ්ගිකො මග්ගො එතෙසං ඔඝානං පහානාය. සෙය්යථිදං: සම්මාදිට්ඨි -පෙ- සම්මාසමාධි. අයං ඛො ආවුසො මග්ගො අයං පටිපදා එතෙසං ඔඝානං පහානායාති. භද්දකො ආවුසො මග්ගො භද්දිකා පටිපදා එතෙසං ඔඝානං පහානාය. අලඤ්ච පනාවුසො සාරිපුත්ත අප්පමාදායාති.
4. 1. 12.
උපාදානසුත්තං
327. උපාදානං උපාදානන්ති පනාවුසො සාරිපුත්ත වුච්චති. කතමන්නු ඛො ආවුසො උපාදානන්ති. චත්තාරිමානි ආවුසො උපාදානානි: කාමුපාදානං දිට්ඨුපාදානං සීලබ්බතූපාදානං අත්තවාදූපාදානං. ඉමානි ඛො ආවුසො චත්තාරි උපාදානානීති. අත්ථි පනාවුසො මග්ගො අත්ථි පටිපදා එතෙසං උපාදානානං පහානායාති. අත්ථි ඛො ආවුසො මග්ගො අත්ථි පටිපදා එතෙසං උපාදානානං පහානායාති. කතමො පනාවුසො මග්ගො කතමා පටිපදා එතෙසං උපාදානානං පහානායාති. අයමෙව ඛො අරියො අට්ඨඞ්ගිකො මග්ගො එතෙසං උපාදානානං පහානාය, සෙය්යථිදං: සම්මාදිට්ඨි -පෙ- සම්මාසමාධි. අයං ඛො ආවුසො මග්ගො අයං පටිපදා එතෙසං උපාදානානං පහානායාති. භද්දකො ආවුසො මග්ගො භද්දිකා පටිපදා එතෙසං උපාදානානං පහානාය. අලඤ්ච පනාවුසො සාරිපුත්ත අප්පමාදායාති.
4. 1. 13.
භවසුත්තං
328. භවො භවොති ආවුසො සාරිපුත්ත වුච්චති. කතමො නු ඛො ආවුසො භවොති, තයොමෙ ආවුසො භවා. කාමභවො රූපභවො අරූපභවො. ඉමෙ ඛො ආවුසො තයො භවාති. අත්ථි පනාවුසො මග්ගො අත්ථි පටිපදා එතෙසං භවානං පරිඤ්ඤායාති. අත්ථි ඛො ආවුසො මග්ගො අත්ථි පටිපදා එතෙසං භවානං පරිඤ්ඤායාති. කතමො පනාවුසො මග්ගො කතමා පටිපදා එතෙසං භවානං පරිඤ්ඤායාති. අයමෙව ඛො ආවුසො අරියො අට්ඨඞ්ගිකො මග්ගො එතෙසං භවානං පරිඤ්ඤාය. සෙය්යථිදං: සම්මාදිට්ඨි -පෙ- සම්මාසමාධි. අයං ඛො ආවුසො මග්ගො අයං පටිපදා එතෙසං භවානං පරිඤ්ඤායාති. භද්දකො පනාවුසො මග්ගො, භද්දිකා පටිපදා එතෙසං භවානං පරිඤ්ඤාය. අලඤ්ච පනාවුසො සාරිපුත්ත අප්පමාදායාති.
4. 1. 14.
දුක්ඛසුත්තං
329. දුක්ඛං දුක්ඛන්ති ආවුසො සාරිපුත්ත වුච්චති. කතමං නු ඛො ආවුසො දුක්ඛන්ති. තිස්සො ඉමා ආවුසො දුක්ඛතා. දුක්ඛදුක්ඛතා සඞ්ඛාරදුක්ඛතා විපරිණාමදුක්ඛතා. ඉමා ඛො ආවුසො තිස්සො දුක්ඛතාති. අත්ථි පනාවුසො මග්ගො අත්ථි පටිපදා එතාසං දුක්ඛතානං පරිඤ්ඤායාති. අත්ථි ඛො ආවුසො මග්ගො අත්ථි පටිපදා එතාසං දුක්ඛතානං පරිඤ්ඤායාති. කතමො පනාවුසො මග්ගො කතමා පටිපදා එතාසං දුක්ඛතානං පරිඤ්ඤායාති. අයමෙව ඛො ආවුසො අරියො අට්ඨඞ්ගිකො මග්ගො එතාසං දුක්ඛතානං පරිඤ්ඤාය, සෙය්යථිදං: සම්මාදිට්ඨි -පෙ- සම්මාසමාධි. අයං ඛො ආවුසො මග්ගො අයං පටිපදා එතාසං දුක්ඛතානං පරිඤ්ඤායාති. භද්දකො ආවුසො මග්ගො භද්දිකා පටිපදා එතාසං දුක්ඛතානං පරිඤ්ඤාය. අලඤ්ච පනාවුසො සාරිපුත්ත අප්පමාදායාති.
4. 1. 15.
සක්කායසුත්තං
330. සක්කායො සක්කායොති ආවුසො සාරිපුත්ත වුච්චති. කතමො නු ඛො ආවුසො සක්කායොති. පඤ්චිමෙ ආවුසො උපාදානක්ඛන්ධා සක්කායො වුත්තො භගවතා. සෙය්යථිදං: රූපුපාදානක්ඛන්ධො වෙදනුපාදානක්ඛන්ධො සඤ්ඤුපාදානක්ඛන්ධො සඞ්ඛාරූපාදානක්ඛන්ධො විඤ්ඤාණුපාදානක්ඛන්ධො. ඉමෙ ඛො ආවුසො පඤ්චුපාදානක්ඛන්ධා සක්කායො වුත්තො භගවතාති. අත්ථි පනාවුසො මග්ගො අත්ථි පටිපදා එතස්ස සක්කායස්ස පරිඤ්ඤායාති.
අත්ථි ඛො ආවුසො මග්ගො අත්ථි පටිපදා එතස්ස සක්කායස්ස පරිඤ්ඤායාති. කතමො පනාවුසො මග්ගො කතමා පටිපදා එතස්ස සක්කායස්ස පරිඤ්ඤායාති. අයමෙව ඛො ආවුසො අරියො අට්ඨඞ්ගිකො මග්ගො එතස්ස සක්කායස්ස පරිඤ්ඤාය, සෙය්යථිදං: සම්මාදිට්ඨි -පෙ- සම්මාසමාධි. අයං ඛො ආවුසො මග්ගො අයං පටිපදා එතස්ස සක්කායස්ස පරිඤ්ඤායාති. භද්දකො ආවුසො මග්ගො භද්දිකා පටිපදා එතස්ස සක්කායස්ස පරිඤ්ඤාය. අලඤ්ච පනාවුසො සාරිපුත්ත අප්පමාදායාති.
4. 1. 16.
දුක්කරසුත්තං