සුත්තන්තපිටකෙ
සංයුත්තනිකායො
පඨමො භාගො
සගාථවග්ගො
1. දෙවතාසංයුත්තං
1. නළවග්ගො
නමො තස්ස භගවතො අරහතො සම්මා සම්බුද්ධස්ස
1. 1. 1.
ඔඝතරණසුත්තං
1. එවම්මෙසුතං එකං සමයං භගවා සාවත්ථියං විහරති ජෙතවනෙ අනාථපිණ්ඩිකස්ස ආරාමෙ. අථ ඛො අඤ්ඤතරා දෙවතා අභික්කන්තාය රත්තියා අභික්කන්තවණ්ණා කෙවලකප්පං ජෙතවනං ඔභාසෙත්වා යෙන භගවා තෙනුපසඞ්කමි, උපසඞ්කමිත්වා භගවන්තං අභිවාදෙත්වා එකමන්තං අට්ඨාසි. එකමන්තං ඨිතා ඛො සා දෙවතා භගවන්තං එතදවොච:
කථන්නු ත්වං මාරිස, ඔඝමතරීති?
[භගවා:]
අප්පතිට්ඨං ඛ්වාහං ආවුසො අනායූහං ඔඝමතරින්ති.
යථා කථං පන ත්වං මාරිස අප්පතිට්ඨං අනායූහං ඔඝමතරීති?
[භගවා:]
යදා ස්වාහං ආවුසො සන්තිට්ඨාමි. තදාස්සු සංසීදාමි. යදා ස්වාහං ආවුසො ආයූහාමි තදාස්සු නිබ්බුය්හාමි{1}. එවං ඛ්වාහං ආවුසො අප්පතිට්ඨං අනායූහං ඔඝමතරින්ති.
[දෙවතා:]
චිරස්සං වත පස්සාමි{2} බ්රාහ්මණං පරිනිබ්බුතං, අප්පතිට්ඨං අනායූහං තිණ්ණං ලොකෙ විසත්තිකං.
ඉදමවොච සා දෙවතා. සමනුඤ්ඤො සත්ථා අහොසි.
අථ ඛො සා දෙවතා ‘සමනුඤ්ඤො මෙ සත්ථා’ති භගවන්තං අභිවාදෙත්වා පදක්ඛිණං කත්වා තත්ථෙවන්තරධායීති.
1. 1. 2.
නිමොක්ඛසුත්තං{1}
2. එවම්මෙ සුතං{2}. එකං සමයං භගවා සාවත්ථියං විහරති ජෙතවනෙ අනාථපිණ්ඩිකස්ස ආරාමෙ.
අථ ඛො අඤ්ඤතරා දෙවතා අභික්කන්තාය රත්තියා අභික්කන්තවණ්ණා කෙවලකප්පං ජෙතවනං ඔභාසෙත්වා යෙන භගවා තෙනුපසඞ්කමි. උපසඞ්කමිත්වා භගවන්තං අභිවාදෙත්වා එකමන්තං අට්ඨාසි. එකමන්තං ඨිතා ඛො සා දෙවතා භගවන්තං එතදවොච:
ජානාසි නො ත්වං මාරිස, සත්තානං නිමොක්ඛං පමොක්ඛං විවෙකන්ති?
[භගවා:]
ජානාමි{3} ඛ්වාහං ආවුසො සත්තානං නිමොක්ඛං පමොක්ඛං විවෙකන්ති.
[දෙවතා:]
යථා කථම්පන ත්වං මාරිස ජානාසි සත්තානං නිමොක්ඛං පමොක්ඛං විවෙකන්ති?
[භගවා:]
නන්දීභවපරික්ඛයා සඤ්ඤාවිඤ්ඤාණසඞ්ඛයා, වෙදනානං නිරොධා උපසමා එවං ඛ්වාහං ආවුසො ජානාමි, සත්තානං නිමොක්ඛං පමොක්ඛං විවෙකන්ති.
1. 1. 3.
උපනීයති{4}සුත්තං.
3. සාවත්ථියං–
අථ{5} ඛො සා දෙවතා භගවතො සන්තිකෙ ඉමං ගාථං අභාසි:
උපනීයති ජීවිතමප්පමායු ජරූපනීතස්ස න සන්ති තාණා එතං භයං මරණෙ පෙක්ඛමානො පුඤ්ඤානි කයිරාථ සුඛාවහානීති.
[භගවා:]
උපනීයති ජීවිතමප්පමායු ජරූපනීතස්ස න සන්ති තාණා එතං භයං මරණෙ පෙක්ඛමානො ලොකාමිසං පජහෙ සන්තිපෙක්ඛොති.
1. 1. 4.
අච්චෙන්තිසුත්තං
4. සාවත්ථියං–{1}
එකමන්තං ඨිතා ඛො සා දෙවතා භගවතො සන්තිකෙ ඉමං ගාථං අභාසි:
අච්චෙන්ති කාලා තරයන්ති රත්තියො වයොගුණා අනුපුබ්බං ජහන්ති. එතං භයං මරණෙ පෙක්ඛමානො පුඤ්ඤානි කයිරාථ සුඛාවහානීති.
[භගවා:]
අච්චෙන්ති කාලා තරයන්ති රත්තියො වයොගුණා අනුපුබ්බං ජහන්ති, එතං භයං මරණෙ පෙක්ඛමානො ලොකාමිසං පජහෙ සන්තිපෙක්ඛොති.
1. 1. 5.
කතිඡින්ද{2}සුත්තං
5. සාවත්ථියං–
එකමන්තං ඨිතා ඛො සා දෙවතා භගවතො භගවන්තං ගාථාය අජ්ඣභාසි:{3}
කති ඡින්දෙ කති ජහෙ කති චුත්තරි භාවයෙ, කති සඞ්ගාතිගො ‘භික්ඛු ඔඝතිණ්ණො’ති වුච්චතීති.
[භගවා:]
පඤ්ච ඡින්දෙ පඤ්ච ජහෙ පඤ්ච චුත්තරි භාවයෙ, පඤ්ච සඞ්ගාතිගො ‘භික්ඛු ඔඝතිණ්ණො’ති වුච්චතීති.
1. 1. 6.
ජාගරසුත්තං
6. සාවත්ථියං–
එකමන්තං ඨිතා ඛො සා දෙවතා භගවතො සන්තිකෙ ඉමං ගාථං අභාසි:
කති ජාගරතං සුත්තා කති සුත්තෙසු ජාගරා, කතීහි රජමාදෙති කතීහි පරිසුජ්ඣතීති.
[භගවා:]
පඤ්ච ජාගරතං සුත්තා පඤ්ච සුත්තෙසු ජාගරා, පඤ්චහි රජමාදෙති පඤ්චහි පරිසුජ්ඣතීති.
1. 1. 7.
අප්පටිවිදිතසුත්තං
7. සාවත්ථියං–
එකමන්තං ඨිතා ඛො සා දෙවතා භගවතො සන්තිකෙ ඉමං ගාථං අභාසි:
යෙසං ධම්මා අප්පටිවිදිතා පරවාදෙසු නීයරෙ, සුත්තා තෙ නප්පබුජ්ඣන්ති කාලො තෙසං පබුජ්ඣිතුන්ති.
[භගවා:]
යෙසං ධම්මා සුප්පටිවිදිතා{1} පරවාදෙසු න නීයරෙ, සම්බුද්ධා සම්මදඤ්ඤාය{2} චරන්ති විසමෙ සමන්ති.
1. 1. 8.
සුසම්මුට්ඨසුත්තං
8. සාවත්ථියං–
එකමන්තං ඨිතා ඛො සා දෙවතා භගවතො සන්තිකෙ ඉමං ගාථං අභාසි:
යෙසං ධම්මා සුසම්මුට්ඨා පරවාදෙසු නීයරෙ, සුත්තා තෙ නප්පබුජ්ඣන්ති කාලො තෙසං පබුජ්ඣිතුන්ති.
[භගවා:]
යෙසං ධම්මා අසම්මුට්ඨා පරවාදෙසු න නීයරෙ, සම්බුද්ධා සම්මදඤ්ඤාය{3} චරන්ති විසමෙ සමං.
1. 1. 9.
නමානකාමසුත්තං.
9. සාවත්ථියං–
එකමන්තං ඨිතා ඛො සා දෙවතා භගවතො සන්තිකෙ ඉමං ගාථං අභාසි:
න මානකාමස්ස දමො ඉධත්ථි න මොනමත්ථි අසමාහිතස්ස, එකො අරඤ්ඤෙ විහරං පමත්තො න මච්චුධෙය්යස්ස තරෙය්ය පාරන්ති.
[භගවා:]
මානං පහාය සුසමාහිතත්තො සුචෙතසො සබ්බධි විප්පමුත්තො, එකො අරඤ්ඤෙ විහරං අප්පමත්තො ස මච්චුධෙය්යස්ස තරෙය්ය පාරන්ති.
1. 1. 10.
අරඤ්ඤසුත්තං
10. සාවත්ථියං–
එකමන්තං ඨිතා ඛො සා දෙවතා භගවන්තං ගාථාය අජ්ඣභාසි:
අරඤ්ඤෙ විහරන්තානං සන්තානං බ්රහ්මචාරිනං, එකභත්තං භුඤ්ජමානානං කෙන වණ්ණො පසීදතීති.
[භගවා:]
අතීතං නානුසොචන්ති නප්පජප්පන්ති’නාගතං{1} පච්චුප්පන්නෙන යාපෙන්ති තෙන වණ්ණො පසීදති,
අනාගතප්පජප්පාය අතීතස්සානුසොචනා, එතෙන බාලා සුස්සන්ති නළොව හරිතො ලුතොති,
නළවග්ගො පඨමො.
තත්රුද්දානං:
ඔඝං නිමොක්ඛං උපනීයති අච්චෙන්ති කතිඡින්දි ච,{2} ජාගරං අප්පටිවිදිතා සුසම්මුට්ඨාමානකාමො{3} අරඤ්ඤෙ දසමො{4} වුත්තො වග්ගො තෙන පවුච්චති.
2. නන්දනවග්ගො
1. 2. 1.
නන්දනසුත්තං
11. එවම්මෙ සුතං එකං සමයං භගවා සාවත්ථියං විහරති ජෙතවනෙ අනාථපිණ්ඩිකස්ස ආරාමෙ. තත්ර ඛො භගවා භික්ඛූ ආමන්තෙසි භික්ඛවොති. භදන්තෙති තෙ භික්ඛූ භගවතො පච්චස්සොසුං. භගවා එතදවොච:
භූතපුබ්බං භික්ඛවෙ අඤ්ඤතරා තාවතිංසකායිකා දෙවතා නන්දනවනෙ{5} අච්ඡරාසඞ්ඝපරිවුතා දිබ්බෙහි පඤ්චහි කාමගුණෙහි සමප්පිතා සමඞ්ගීභූතා පරිචාරයමානා{6} තායං වෙලායං ඉමං ගාථං අභාසි:
න තෙ සුඛං පජානන්ති යෙ න පස්සන්ති නන්දනං, ආවාසං නරදෙවානං තිදසානං යසස්සිනන්ති.
එවං වුත්තෙ භික්ඛවෙ අඤ්ඤතරා දෙවතා තං දෙවතං ගාථාය පච්චභාසි:
න ත්වං බාලෙ විජානාසි{7} යථා අරහතං වචො, අනිච්චා සබ්බෙ සඞ්ඛාරා{8} උප්පාදවයධම්මිනො, උප්පජ්ජිත්වා නිරුජ්ඣන්ති තෙසං වූපසමො සුඛොති.
1. 2. 2.