භාසිතාසු ඛො පන භික්ඛවෙ සක්කෙන දෙවානමින්දෙන ගාථාසු දෙවා අනුමොදිංසු. අසුරා තුණ්හී අහෙසුං.
අථ ඛො භික්ඛවෙ දෙවානඤ්ච අසුරානඤ්ච පාරිසජ්ජා එතදවොචුං: භාසිතා ඛො වෙපචිත්තිනා අසුරින්දෙන ගාථායො. තා ච ඛො සදණ්ඩාවචරා සසත්ථාවචරා{1} ඉති භණ්ඩනං ඉති විග්ගහො ඉති කලහො. භාසිතා ඛො පන{2} සක්කෙන දෙවානමින්දෙන ගාථායො. තා ච ඛො අදණ්ඩාවචරා අසත්ථාවචරා ඉති අභණ්ඩනං ඉති අවිග්ගහො ඉති අකලහො. සක්කස්ස දෙවානමින්දස්ස සුභාසිතෙන ජයොති.
ඉති ඛො භික්ඛවෙ සක්කස්ස දෙවානමින්දස්ස සුභාසිතෙන ජයො අහොසීති.
11. 1. 6.
කුලාවකසුත්තං.
252. සාවත්ථියං–
භූතපුබ්බං භික්ඛවෙ දෙවාසුරසඞ්ගාමො සමුපබ්බූළ්හො අහොසි. තස්මිං ඛො පන භික්ඛවෙ සඞ්ගාමෙ අසුරා ජිනිංසු. දෙවා පරාජිංසු.
පරාජිතා ච{1} ඛො භික්ඛවෙ දෙවා අපායංස්වෙව උත්තරෙන මුඛා, අභියංස්වෙව නෙ අසුරා. අථ ඛො භික්ඛවෙ සක්කො දෙවානමින්දො මාතලීසඞ්ගාහකං ගාථාය අජ්ඣභාසි:
කුලාවකා මාතලි සිම්බලිස්මිං ඊසාමුඛෙන පරිවජ්ජයස්සු, කාමං චජාම අසුරෙසු පාණං මායිමෙ දිජා විකුලාවකා{2} අහෙසුන්ති.
එවං භද්දන්තවාති ඛො භික්ඛවෙ මාතලි සඞ්ගාහකො සක්කස්ස දෙවානමින්දස්ස පටිස්සුත්වා සහස්සයුත්තං ආජඤ්ඤරථං පච්චුදාවත්තෙසි.
අථ ඛො භික්ඛවෙ අසුරානං එතදහොසි: පච්චුදාවත්තො ඛො දානි සක්කස්ස දෙවානමින්දස්ස සහස්සයුත්තො ආජඤ්ඤරථො. දුතියම්පි ඛො දෙවා අසුරෙහි සඞ්ගාමෙස්සන්තීති භීතා අසුරපුරමෙව පාවිසිංසු.
ඉති ඛො භික්ඛවෙ සක්කස්ස දෙවානමින්දස්ස ධම්මෙනෙව ජයො අහොසි.
11. 1. 7.
නදුබ්භියසුත්තං.
253. සාවත්ථියං–
භූතපුබ්බං භික්ඛවෙ සක්කස්ස දෙවානමින්දස්ස රහොගතස්ස පටිසල්ලීනස්ස එවං චෙතසො පරිවිතක්කො උදපාදි: යොපි මෙ අස්ස පච්චත්ථිකො{3} තස්ස පාහං න දුබ්භෙය්යන්ති.
අථ ඛො භික්ඛවෙ වෙපචිත්ති අසුරින්දො සක්කස්ස දෙවානමින්දස්ස චෙතසා චෙතොපරිවිතක්කමඤ්ඤාය යෙන සක්කො දෙවානමින්දො තෙනුපසඞ්කමි.
අද්දසා ඛො භික්ඛවෙ සක්කො දෙවානමින්දො වෙපචිත්තිං අසුරින්දං දූරතොව ආගච්ඡන්තං. දිස්වාන වෙපචිත්තිං අසුරින්දං එතදවොච: තිට්ඨ වෙපචිත්ති ගහිතොසීති.
යදෙව තෙ මාරිස පුබ්බෙ චිත්තං තදෙව ත්වං මාරිස පහාසීති{4}. සපස්සු ච මෙ වෙපචිත්ති අදුබ්භායාති.
යං මුසාභණතො පාපං යං පාපං{1} අරියූපවාදිනො, මිත්තද්දුනො ච යං පාපං යං පාපං අකතඤ්ඤුනො, තමෙව පාපං ඵුසති{2} යො තෙ දුබ්භෙ සුජම්පතීති.
11. 1. 8.
වෙරොචනඅසුරින්දසුත්තං
254. සාවත්ථියං–
තෙන ඛො පන සමයෙන භගවා දිවාවිහාරගතො හොති පටිසල්ලීනො. අථ ඛො සක්කො ච දෙවානමින්දො වෙරොචනො ච අසුරින්දො යෙන භගවා තෙනුපසඞ්කමිංසු. උපසඞ්කමිත්වා පච්චෙකං ද්වාරබාහං අට්ඨංසු. අථ ඛො වෙරොචනො අසුරින්දො භගවතො සන්තිකෙ ඉමං ගාථං අභාසි:
වායමෙථෙව පුරිසො යාව අත්ථස්ස නිප්ඵදා, නිප්ඵන්නසොභිනො අත්ථා{3} වෙරොචනවචො ඉදන්ති.
[සක්කො:]
වායමෙථෙව පුරිසො යාව අත්ථස්ස නිප්ඵදා, නිප්ඵන්නසොභිනො අත්ථා{3} ඛන්ත්යා භිය්යො න විජ්ජතීති.
[වෙරාචනො:]
සබ්බෙ සත්තා අත්ථජාතා තත්ථ තත්ථ යථාරහං, සංයොගපරමාත්වෙව සම්භොගා සබ්බපාණිනං, නිප්ඵන්නසොභිනො අත්ථා{3} වෙරොචනවචො ඉදන්ති.
[සක්කො:]
සබ්බෙ සත්තා අත්ථජාතා තත්ථ තත්ථ යථාරහං, සංයොගපරමාත්වෙව සම්භොගා සබ්බපාණිනං, නිප්ඵන්නසොභිනො අත්ථා ඛන්ත්යා භිය්යො න විජ්ජතීති.
11. 1. 9.
අරඤ්ඤායතනඉසිසුත්තං.
255. සාවත්ථියං–
භූතපුබ්බං භික්ඛවෙ සම්බහුලා ඉසයො සීලවන්තො කල්යාණධම්මා අරඤ්ඤායතනෙ පණ්ණකුටීසු සම්මන්ති. අථ ඛො භික්ඛවෙ සක්කො ච දෙවානමින්දො වෙපචිත්ති ච අසුරින්දො යෙන තෙ ඉසයො සීලවන්තො කල්යාණධම්මා තෙනුපසඞ්කමිංසු.
අථ ඛො භික්ඛවෙ වෙපචිත්ති අසුරින්දො අටලියො{4} උපාහනා ආරොහිත්වා ඛග්ගං ඔලග්ගෙත්වා ඡත්තෙන ධාරියමානෙන අග්ගද්වාරෙන අස්සමං පවිසිත්වා තෙ ඉසයො සීලවන්තෙ කල්යාණධම්මෙ අපබ්යාමතො කරිත්වා අතික්කමි.
අථ ඛො භික්ඛවෙ සක්කො දෙවානමින්දො අටලියො උපාහනා ඔරොහිත්වා ඛග්ගං අඤ්ඤෙසං දත්වා ඡත්තං අපනාමෙත්වා ද්වාරෙනෙව අස්සමං පවිසිත්වා තෙ ඉසයො සීලවන්තෙ කල්යාණධම්මෙ අනුවාතං පඤ්ජලිකො නමස්සමානො අට්ඨාසි. අථ ඛො භික්ඛවෙ තෙ ඉසයො සීලවන්තො කල්යාණධම්මා සක්කං දෙවානමින්දං ගාථාය අජ්ඣභාසිංසු:
ගන්ධො ඉසීනං චිරදික්ඛිතානං{1} කායා චුතො ගච්ඡති මාලුතෙන, ඉතො පටික්කම{2} සහස්සනෙත්ත ගන්ධො ඉසීනං අසුචි දෙවරාජාති.
ගන්ධො ඉසීනං චිරදික්ඛිතානං{1} කායා චුතො ගච්ඡතු{3} මාලුතෙන, සුචිත්රපුප්ඵං සිරස්මිං ව මාලං ගන්ධං එතං පටිකඞ්ඛාම භන්තෙ, න හෙත්ථ දෙවා පටිකූලසඤ්ඤිනොති.
11. 1. 10.
ඉසයොසමුද්දකසුත්තං.
256. සාවත්ථියං–
භූතපුබ්බං භික්ඛවෙ සම්බහුලා ඉසයො සීලවන්තො කල්යාණධම්මා සමුද්දතීරෙ පණ්ණකුටීසු සම්මන්ති.
තෙන ඛො පන සමයෙන භික්ඛවෙ දෙවාසුරසඞ්ගාමො සමුපබ්බූළ්හො අහොසි. අථ ඛො භික්ඛවෙ තෙසං ඉසීනං සීලවන්තානං කල්යාණධම්මානං එතදහොසි. ධම්මිකා ඛො දෙවා, අධම්මිකා අසුරා. සියා පි නො අසුරතො භයං. යන්නූන මයං සම්බරං අසුරින්දං උපසඞ්කමිත්වා අභයදක්ඛිණං යාචෙය්යාමාති.
අථ ඛො භික්ඛවෙ තෙ ඉසයො සීලවන්තො කල්යාණධම්මා සෙය්යථාපි නාම බලවා පුරිසො සම්මිඤ්ජිතං වා බාහං පසාරෙය්ය පසාරිතං වා බාහං සම්මිඤ්ජෙය්ය, එවමෙව සමුද්දතීරෙ පණ්ණකුටීසු අන්තරහිතා සම්බරස්ස අසුරින්දස්ස පමුඛෙ{4} පාතුරහෙසුං. අථ ඛො භික්ඛවෙ තෙ ඉසයො සීලවන්තො කල්යාණධම්මා සම්බරං අසුරින්දං ගාථාය අජ්ඣභාසිංසු:
ඉසයො සම්බරං පත්තා යාචන්ති අභයදක්ඛිණං, කාමං කරොහි{5} තෙ දාතුං භයස්ස අභයස්ස වාති.
ඉසීනං අභයං නත්ථි දුට්ඨානං සක්කසෙවිනං, අභයං යාචමානානං භයමෙව දදාමි වොති.
අභයං යාචමානානං භයමෙව දදාසි නො, පටිග්ගණ්හාම තෙ එතං අක්ඛයං{6} හොතු තෙ භයං.
යාදිසං වපතෙ බීජං තාදිසං හරතෙ ඵලං, කල්යාණකාරී කල්යාණං පාපකාරී ච පාපකං, පවුත්තං තාත තෙ බීජං ඵලං පච්චනුභොස්සසීති.
අථ ඛො භික්ඛවෙ තෙ ඉසයො සීලවන්තො කල්යාණධම්මා සම්බරං අසුරින්දං අභිසපිත්වා{1} සෙය්යථාපි නාම බලවා පුරිසො සම්මිඤ්ජිතං වා බාහං පසාරෙය්ය, පසාරිතං වා බාහං සම්මිඤ්ජෙය්ය. එවමෙව සම්බරස්ස අසුරින්දස්ස පමුඛෙ අන්තරහිතා සමුද්දතීරෙ පණ්ණකුටීසු පාතුරහෙසුං.
අථ ඛො භික්ඛවෙ සම්බරො අසුරින්දො තෙහි ඉසීහි සීලවන්තෙහි කල්යාණධම්මෙහි අභිසපිතො රත්තියා සුදං තික්ඛත්තුං උබ්බිජ්ජතීති.{2}
සුවීරවග්ගො පඨමො.
තත්රුද්දානං:
සුවීරං සුසීමඤ්චෙව ධජග්ගං වෙපචිත්තිනො, සුභාසිතං ජයඤ්චෙව කුලාවකං න දුබ්භියං, වෙරොචන අසුරින්දො ඉසයො අරඤ්ඤකඤ්චෙව ඉසයො ච සමුද්දකාති.
2. සත්තවතවග්ගො
11. 2. 1.
දෙවා[සත්තවතපද]සුත්තං.{3}
257. එකං සමයං භගවා සාවත්ථියං විහරති ජෙතවනෙ අනාථපිණ්ඩිකස්ස ආරාමෙ.
තත්ර ඛො -පෙ- භගවා එතදවොච: සක්කස්ස භික්ඛවෙ දෙවානමින්දස්ස පුබ්බෙ මනුස්සභූතස්ස සත්ත වතපදානි{4} සමත්තානි සමාදින්නානි අහෙසුං, යෙසං සමාදින්නත්තා සක්කො සක්කත්තං අජ්ඣගා.
කතමානි සත්ත වතපදානි? යාවජීවං මාතාපෙත්තිභරො අස්සං. යාවජීවං කුලෙජෙට්ඨාපචායී අස්සං. යාවජීවං සණ්හවාචො අස්සං. යාවජීවං අපිසුණවාචො අස්සං. යාවජීවං විගතමලමච්ඡෙරෙන චෙතසා අගාරං අජ්ඣාවසෙය්යං, මුත්තචාගො පයතපාණී වොස්සග්ගරතො යාචයොගො දානසංවිභාගරතො. යාවජීවං සච්චවාචො අස්සං. යාවජීවං අක්කොධනො අස්සං. සචෙපි මෙ කොධො උප්පජ්ජෙය්ය ඛිප්පමෙව නං පටිවිනෙය්යන්ති. සක්කස්ස භික්ඛවෙ දෙවානමින්දස්ස පුබ්බෙ මනුස්සභූතස්ස ඉමානි සත්ත වතපදානි සමත්තානි සමාදින්නානි අහෙසුං. යෙසං සමාදින්නත්තා සක්කො සක්කත්තං අජ්ඣගාති.
මාතාපෙත්තිභරං ජන්තුං කුලෙ ජෙට්ඨාපචායිනං, සණ්හං සඛිලසම්භාසං පෙසුණෙය්යප්පහායිනං. මච්ඡෙරවිනයෙ යුත්තං සච්චං කොධාභිභුං නරං, තං වෙ දෙවා තාවතිංසා ආහු සප්පුරිසො ඉතීති.
11. 2. 2.
[දුතිය] දෙවා[සත්තවතපද]සුත්තං.{1}
258. {2}එකං සමයං භගවා සාවත්ථියං විහරති ජෙතවනෙ අනාථපිණ්ඩිකස්ස ආරාමෙ. තත්ර ඛො භගවා භික්ඛූ -පෙ-{3} භගවා එතදවොච:
සක්කො භික්ඛවෙ දෙවානමින්දො පුබ්බෙ මනුස්සභූතො සමානො මඝො නාම මාණවො අහොසි. තස්මා මඝවාති වුච්චති. සක්කො භික්ඛවෙ දෙවානමින්දො පුබ්බෙ මනුස්සභූතො සමානො පුරෙ පුරෙ{4} දානං අදාසි. තස්මා පුරින්දදොති වුච්චති. සක්කො භික්ඛවෙ දෙවානමින්දො පුබ්බෙ මනුස්සභූතො සමානො සක්කච්චං දානං අදාසි. තස්මා සක්කොති වුච්චති. සක්කො භික්ඛවෙ දෙවානමින්දො පුබ්බෙ මනුස්සභූතො සමානො ආවසථං අදාසි. තස්මා වාසවොති වුච්චති. සක්කො භික්ඛවෙ දෙවානමින්දො සහස්සම්පි අත්ථානං මුහුත්තෙන චින්තෙති. තස්මා සහස්සක්ඛොති වුච්චති. සක්කස්ස භික්ඛවෙ දෙවානමින්දස්ස සුජා නාම අසුරකඤ්ඤා පජාපතී. තස්මා සුජම්පතීති වුච්චති. සක්කො භික්ඛවෙ දෙවානමින්දො දෙවානං තාවතිංසානං ඉස්සරියාධිපච්චං රජ්ජං කාරෙති.{5} තස්මා දෙවානමින්දොති වුච්චති.
සක්කස්ස භික්ඛවෙ දෙවානමින්දස්ස පුබ්බෙ මනුස්සභූතස්ස සත්තවතපදානි සමත්තානි සමාදින්නානි අහෙසුං. යෙසං සමාදින්නත්තා සක්කො සක්කත්තං අජ්ඣගා.
කතමානි සත්ත වතපදානි: යාවජීවං මාතාපෙත්තිභරො අස්සං. යාවජීවං කුලෙ ජෙට්ඨාපචායී අස්සං. යාවජීවං සණ්හවාචො අස්සං. යාවජීවං අපිසුණාවාචො අස්සං. යාවජීවං විගතමලමච්ඡෙරෙන චෙතසා අගාරං අජ්ඣාවසෙය්යං, මුත්තචාගො පයතපාණි වොස්සග්ගරතො යාචයොගො දානසංවිභාගරතො. යාවජීවං සච්චවාචො අස්සං. යාවජීවං අක්කොධනො අස්සං. සචෙපි මෙ කොධො උප්පජ්ජෙය්ය ඛිප්පමෙව නං පටිවිනෙය්යන්ති. සක්කස්ස භික්ඛවෙ දෙවානමින්දස්ස පුබ්බෙ මනුස්සභූතස්ස ඉමානි සත්ත වතපදානි සමත්තානි සමාදින්නානි අහෙසුං, යෙසං සමාදින්නත්තා සක්කො සක්කත්තං අජ්ඣගාති.
මාතාපෙත්තිභරං ජන්තුං කුලෙ ජෙට්ඨාපචායිනං සණ්හං සඛිලසම්භාසං පෙසුණෙය්යප්පහායිනං මච්ඡෙරවිනයෙ යුත්තං සච්චං කොධාභිභුං නරං තං වෙ දෙවා තාවතිංසා ආහු සප්පුරිසො ඉතීති.
11. 2. 3.
මහාලි[සත්තවතපද]සුත්තං{6}.
259. එවං මෙ සුතං: එකං සමයං භගවා වෙසාලියං විහරති මහාවනෙ කූටාගාරසාලායං. අථ ඛො මහාලි{7} ලිච්ඡවි{8} යෙන භගවා තෙනුපසඞ්කමි. උපසඞ්කමිත්වා භගවන්තං අභිවාදෙත්වා එකමන්තං නිසීදි.
එකමන්තං නිසින්නො ඛො මහාලි ලිච්ඡවී භගවන්තං එතදවොච: දිට්ඨො. වො{1} භන්තෙ සක්කො දෙවානමින්දොති. දිට්ඨො මෙ මහාලි සක්කො දෙවානමින්දොති.
සො හි නූන භන්තෙ සක්කපතිරූපකො භවිස්සති. දුද්දසො හි භන්තෙ සක්කො දෙවානමින්දොති.
සක්කඤ්චාහං මහාලි පජානාමි, සක්කකරණෙ ච ධම්මෙ. යෙසං ධම්මානං සමාදින්නත්තා සක්කො සක්කත්තං අජ්ඣගා, තඤ්ච පජානාමි.
සක්කො මහාලි දෙවානමින්දො පුබ්බෙ මනුස්සභූතො සමානො මඝො නාම මාණවො අහොසි. තස්මා “මඝවාති” වුච්චති. සක්කො මහාලි දෙවානමින්දො පුබ්බෙ මනුස්සභූතො සමානො පුරෙ පුරෙ දානං අදාසි. තස්මා පුරින්දදොති වුච්චති. සක්කො මහාලි දෙවානමින්දො පුබ්බෙ මනුස්සභූතො සමානො සක්කච්චං දානං අදාසි. තස්මා සක්කොති වුච්චති. සක්කො මහාලි දෙවානමින්දො පුබ්බෙ මනුස්සභූතො සමානො ආවසථං අදාසි, තස්මා වාසවොති වුච්චති. සක්කො මහාලි දෙවානමින්දො සහස්සම්පි අත්ථානං මුහුත්තෙන චින්තෙති. තස්මා සහස්සක්ඛොති වුච්චති. සක්කස්ස මහාලි දෙවානමින්දස්ස සුජා නාම අසුරකඤ්ඤා පජාපතී. තස්මා සුජම්පතීති වුච්චති. සක්කො මහාලි දෙවානමින්දො දෙවානං තාවතිංසානං ඉස්සරියාධිපච්චං රජ්ජං කාරෙති. තස්මා දෙවානමින්දොති වුච්චති.
සක්කස්ස මහාලි දෙවානමින්දස්ස පුබ්බෙ මනුස්සභූතස්ස සත්ත වතපදානි සමත්තානි සමාදින්නානි අහෙසුං, යෙසං සමාදින්නත්තා සක්කො සක්කත්තං අජ්ඣගා.
කතමානි සත්ත වතපදානි: යාවජීවං මාතාපෙත්තිභරො අස්සං. යාවජීවං කුලෙ ජෙට්ඨාපචායී අස්සං. යාවජීවං සණ්හවාචො අස්සං. යාවජීවං අපිසුණවාචො අස්සං. යාවජීවං විගතමලමච්ඡෙරෙන චෙතසා අගාරං අජ්ඣාවසෙය්යං, මුත්තචාගො පයතපාණී වොස්සග්ගරතො යාචයොගො දානසංවිභාගරතො. යාවජීවං සච්චවාචො අස්සං. යාවජීවං අක්කොධනො අස්සං. සචෙපි මෙ කොධො උප්පජෙය්ය, ඛිප්පමෙව නං පටිවිනෙය්යන්ති.
සක්කස්ස මහාලි දෙවානමින්දස්ස පුබ්බෙ මනුස්සභූතස්ස ඉමානි සත්ත වතපදානි සමත්තානි සමාදින්නානි අහෙසුං. යෙසං සමාදින්නත්තා සක්කො සක්කත්තං අජ්ඣගාති.
මාතාපෙත්තිභරං ජන්තුං කුලෙ ජෙට්ඨාපචායිනං සණ්හං සඛිලසම්භාසං පෙසුණෙය්යප්පහායිනං මච්ඡෙරවිනයෙ යුත්තං සච්චං කොධාභිභුං නරං තං වෙ දෙවා තාවතිංසා ආහු සප්පුරිසො ඉතීති.
11. 2. 4.
දළිද්දසුත්තං.
260. එකං සමයං භගවා රාජගහෙ විහරති වෙළුවනෙ කලන්දකනිවාපෙ. තත්ර ඛො භගවා භික්ඛූ ආමන්තෙසි භික්ඛවොති. භදන්තෙති තෙ භික්ඛූ භගවතො පච්චස්සොසුං. භගවා එතදවොච: භූතපුබ්බං භික්ඛවෙ අඤ්ඤතරො පුරිසො ඉමස්මිං යෙව රාජගහෙ මනුස්සදළිද්දො අහොසි, මනුස්සකපණො මනුස්සවරාකො. සො තථාගතප්පවෙදිතෙ ධම්මවිනයෙ සද්ධං සමාදියි. සීලං සමාදියි. සුතං සමාදියි. චාගං සමාදියි. පඤ්ඤං සමාදියි.
සො තථාගතප්පවෙදිතෙ ධම්මවිනයෙ සද්ධං සමාදියිත්වා සීලං සමාදියිත්වා සුතං සමාදියිත්වා චාගං සමාදියිත්වා පඤ්ඤං සමාදියිත්වා කායස්ස භෙදා පරම්මරණා සුගතිං සග්ගං ලොකං උපපජ්ජි දෙවානං තාවතිංසානං සහව්යතං. සො අඤ්ඤෙ දෙවෙ අතිරොචති වණ්ණෙන චෙව යසසා ච.
තත්ර සුදං භික්ඛවෙ දෙවා තාවතිංසා උජ්ඣායන්ති ඛිය්යන්ති විපාචෙන්ති: අච්ඡරියං වත භො අබ්භුතං වත භො අයං හි දෙවපුත්තො පුබ්බෙ මනුස්සභූතො සමානො මනුස්සදළිද්දො අහොසි, මනුස්සකපණො මනුස්සවරාකො. සො කායස්ස භෙදා පරම්මරණා සුගතිං සග්ගං ලොකං උපපන්නො දෙවානං තාවතිංසානං සහව්යතං. සො අඤ්ඤෙ දෙවෙ අතිරොචති වණ්ණෙන චෙව යසසා චාති.
අථ ඛො භික්ඛවෙ සක්කො දෙවානමින්දො දෙවෙ තාවතිංසෙ ආමන්තෙසි: මා ඛො තුම්හෙ මාරිසා එතස්ස දෙවපුත්තස්ස උජ්ඣායිත්ථ. එසො ඛො මාරිසා දෙවපුත්තො පුබ්බෙ මනුස්සභූතො සමානො තථාගතප්පවෙදිතෙ ධම්මවිනයෙ සද්ධං සමාදියි. සීලං සමාදියි. සුතං සමාදියි. චාගං සමාදියි. පඤ්ඤං සමාදියි. සො තථාගතප්පවෙදිතෙ ධම්මවිනයෙ සද්ධං සමාදියිත්වා සීලං සමාදියිත්වා සුතං සමාදියිත්වා චාගං සමාදියිත්වා පඤ්ඤං සමාදියිත්වා කායස්ස භෙදා පරම්මරණා සුගතිං සග්ගං ලොකං උපපන්නො දෙවානං තාවතිංසානං සහව්යතං. සො අඤ්ඤෙ දෙවෙ අතිරොචති වණ්ණෙන චෙව යසසා චාති.
අථ ඛො භික්ඛවෙ සක්කො දෙවානමින්දො දෙවෙ තාවතිංසෙ අනුනයමානො තායං වෙලායං ඉමා ගාථායො අභාසි:
යස්ස සද්ධා තථාගතෙ අචලා සුප්පතිට්ඨිතා{1} සීලඤ්ච යස්ස කල්යාණං අරියකන්තං පසංසිතං.
සඞ්ඝෙ පසාදො යස්ස උජුභූතඤ්ච දස්සනං, අදළිද්දොති තං ආහු අමොඝං තස්ස ජීවිතං.
තස්මා සද්ධඤ්ච සීලඤ්ච පසාදං ධම්මදස්සනං, අනුයුඤ්ජෙථ මෙධාවී සරං බුද්ධාන සාසනන්ති.
11. 2. 5.
රාමණෙය්යකසුත්තං.
261. සාවත්ථියං–
අථ ඛො සක්කො දෙවානමින්දො යෙන භගවා තෙනුපසඞ්කමි. උපසඞ්කමිත්වා භගවන්තං අභිවාදෙත්වා එකමන්තං අට්ඨාසි. එකමන්තං ඨිතො ඛො සක්කො දෙවානමින්දො භගවන්තං එතදවොච: කින්නුඛො භන්තෙ භූමිරාමණෙය්යකන්ති?
[භගවා:]
ආරාමචෙත්යා වනචෙත්යා පොක්ඛරඤ්ඤා{1} සුනිම්මිතා, මනුස්සරාමණෙය්යස්ස කලං නාග්ඝන්ති සොළසිං.
ගාමෙ වා යදි වා රඤ්ඤෙ නින්නෙ වා යදි වා ථලෙ, යත්ථ අරහන්තො විහරන්ති තං භූමිං{2} රාමණෙය්යකන්ති.
11. 2. 6.
යජමානසුත්තං
262. එකං සමයං භගවා රාජගහෙ විහරති ගිජ්ඣකූටෙ පබ්බතෙ. අථ ඛො සක්කො දෙවානමින්දො යෙන භගවා තෙනුපසඞ්කමි. උපසඞ්කමිත්වා භගවන්තං අභිවාදෙත්වා එකමන්තං අට්ඨාසි. එකමන්තං ඨිතො ඛො සක්කො දෙවානමින්දො භගවන්තං ගාථාය අජ්ඣභාසි:
යජමානානං මනුස්සානං පුඤ්ඤපෙක්ඛාන පාණීනං, කරොතං ඔපධිකං පුඤ්ඤං කත්ථ දින්නං මහප්ඵලන්ති.