භීතසුත්තං.
[දෙවතා:]
75. කිං සූ’ධ භීතා ජනතා අනෙකා මග්ගො ච නෙකායතනං පවුත්තො, පුච්ඡාමි තං ගොතම භූරිපඤ්ඤ කිස්මිං ඨිතො පරලොකං න භායෙති.
[භගවා:]
වාචං මනඤ්ච පණිධාය සම්මා කායෙන පාපානි අකුබ්බමානො, බව්හන්නපානං{1} ඝරමාවසන්තො සද්ධො මුදූ සංවිභාගී වදඤ්ඤූ, එතෙසු ධම්මෙසු ඨිතො චතූසු ධම්මෙ ඨිතො පරලොකං න භායෙති.
1. 8. 6.
නජීරතිසුත්තං
[දෙවතා:]
76. කිං සු ජීරති{2} කිං න ජීරති කිං සු උප්පථොති වුච්චති, කිං සු ධම්මානං පරිපන්ථො කිං සු රත්තින්දිවක්ඛයො, කිං මලං බ්රහ්මචරියස්ස කිං සිනානමනොදකං.
කති ලොකස්මිං ඡිද්දානි යත්ථ චිත්තං න තිට්ඨති, භගවන්තං පුට්ඨුමාගම්ම කථං ජානෙමු තං මයන්ති.
[භගවා:]
රූපං ජීරති මච්චානං නාමගොත්තං න ජීරති, රාගො උප්පථොති වුච්චති ලොභො ධම්මානං පරිපන්ථො වයො රත්තින්දිවක්ඛයො ඉත්ථිමලං බ්රහ්මචරියස්ස එත්ථායං සජ්ජතෙ පජා, තපො ච බ්රහ්මචරියඤ්ච තං සිනානමනොදකං.
ඡ ලොකස්මිං ඡිද්දානි යත්ථ විත්තං න තිට්ඨති, ආලස්සං{3} ච පමාදො ච අනුට්ඨානං අසංයමො, නිද්දා තන්දි ච{4} තෙ ඡිද්දෙ සබ්බසො තං විවජ්ජයෙති.
1. 8. 7.
ඉස්සරසුත්තං.
[දෙවතා:]
77. කිං සු ඉස්සරියං ලොකෙ කිං සු භණ්ඩානමුත්තමං, කිං සු සත්ථමලං ලොකෙ කිං සු ලොකස්මිං අබ්බුදං{5}.
කිං සු හරන්තං වාරෙන්ති හරන්තො පන කො පියො, කිං සු පුනප්පුනායන්තං අභිනන්දන්ති පණ්ඩිතාති.
[භගවා:]
වසො ඉස්සරියං ලොකෙ ඉත්ථි භණ්ඩානමුත්තමං, කොධො සත්ථමලං ලොකෙ චොරා ලොකස්මිං අබ්බුදං{1}
චොරං හරන්තං වාරෙන්ති හරන්තො සමණො පියො, සමණං පුනප්පුනායන්තං අභිනන්දන්ති පණ්ඩිතාති.
1. 8. 8.
කාමසුත්තං
[දෙවතා]
78. කිමත්ථකාමො න දදෙ කිං මච්චො න පරිච්චජෙ, කිං සු මුඤ්චෙය්ය{2} කල්යාණං පාපික{3}ඤ්ච න මොචයෙති{4}.
[භගවා:]
අත්තානං න දදෙ පොසො අත්තානං න පරිච්චජෙ, වාචං මුඤ්චෙය්ය{2} කල්යාණං පාපිකඤ්ච{3} න මොචයෙති{4}.
1. 8. 9.
පාථෙය්යසුත්තං
[දෙවතා:]
79. කිං සු බන්ධති පාථෙය්යං කිං සු භොගානමාසයො, කිං සු නරං පරිකස්සති කිං සු ලොකස්මිං දුජ්ජහං, කිස්මිං බද්ධා පුථු{5} සත්තා පාසෙන සකුණී යථාති.
[භගවා:]
සද්ධා බන්ධති පාථෙය්යං සිරී භොගානමාසයො, ඉච්ඡා නරං පරිකස්සති ඉච්ඡා ලොකස්මිං දුජ්ජහා, ඉච්ඡාබද්ධා පුථු{5}සත්තා පාසෙන සකුණී යථාති.
1. 8. 10.
පජ්ජොතසුත්තං
[දෙවතා:]
80. කිං සු ලොකස්මිං{6} පජ්ජොතො කිං සු ලොකස්මිං{6} ජාගරො, කිං සු කම්මෙ සජීවානං කිමස්ස ඉරියාපථො.
කිං සු අලසං අනලසඤ්ච මාතා පුත්තංව පොසති, කිං සු භූතූපජීවන්ති යෙ පාණා පඨවිංසිතාති.
[භගවා:]
පඤ්ඤා ලොකස්මිං{1} පජ්ජොතො සති ලොකස්මිං{1} ජාගරො, ගාවො කම්මෙ සජීවානං සීතස්ස ඉරියාපථො.
වුට්ඨි අලසං අනලසඤ්ච මාතා පුත්තංව පොසති, වුට්ඨිං භූතූපජීවන්ති යෙ පාණා පඨවිංසිතාති.
1. 8. 11.
අරණසුත්තං
[දෙවතා:]
81. කෙ සූධ අරණා ලොකෙ කෙසං වුසිතං න නස්සති, කෙධ ඉච්ඡං පරිජානන්ති කෙසං භොජිස්සියං{2} සදා.
කිං සු මාතා පිතා භාතා වන්දන්තී නං පතිට්ඨිතං, කිං සු ඉධ ජාතිහීනං අභිවාදෙන්ති ඛත්තියාති.
[භගවා:]
සමණීධ අරණා ලොකෙ සමණානං වුසිතං න නස්සති, සමණා ඉච්ඡං පරිජානන්ති සමණානං භොජිස්සියං{2} සදා.
සමණං මාතා පිතා භාතා වන්දන්ති නං පතිට්ඨිතං, සමණීධ ජාතිහීනං අභිවාදෙන්ති ඛත්තියාති.
ඣත්වාවග්ගො අට්ඨමො.
තත්රුද්දානං:
ඣත්වා රථඤ්ච චිත්තඤ්ච වුට්ඨි භීතා න ජීරති, ඉස්සරං කාමං පාථෙය්යං පජ්ජොතො අරණෙනචාති.
දෙවතාසංයුත්තං සමත්තං.
2. දෙවපුත්තසංයුත්තං
1. සුරියවග්ගො
2. 1. 1.
පඨමකස්සපසුත්තං
82. එවං මෙ සුතං: එකං සමයං භගවා සාවත්ථියං විහරති ජෙතවනෙ අනාථපිණ්ඩිකස්ස ආරාමෙ. අථ ඛො කස්සපො දෙවපුත්තො අභික්කන්තාය රත්තියා අභික්කන්තවණ්ණො කෙවලකප්පං ජෙතවනං ඔභාසෙත්වා යෙන භගවා තෙනුපසඞ්කමි. උපසඞ්කමිත්වා භගවන්තං අභිවාදෙත්වා එකමන්තං අට්ඨාසි.
එකමන්තං ඨිතො ඛො කස්සපො දෙවපුත්තො භගවන්තං එතදවොච: “භික්ඛුං භගවා පකාසෙසි. නො ච භික්ඛුනො අනුසාසනින්ති.”{1}
[භගවා:]
තෙන හි කස්සප තඤ්ඤෙවෙත්ථ පටිභාතූති.
[කස්සපදෙවපුත්තො:]
“සුභාසිතස්ස සික්ඛෙථ සමණූපාසනස්ස ච, එකාසනස්ස ච රහො චිත්තවූපසමස්ස චාති.”
ඉදමවොච කස්සපො දෙවපුත්තො සමනුඤ්ඤො සත්ථා අහොසි.
අථ ඛො කස්සපො දෙවපුත්තො සමනුඤ්ඤො මෙ සත්ථාති භගවන්තං අභිවාදෙත්වා පදක්ඛිණං කත්වා තත්ථෙවන්තරධායීති.
2. 1. 2.
දුතියකස්සපසුත්තං
83. සාවත්ථියං–
එකමන්තං ඨිතො ඛො කස්සපො දෙවපුත්තො භගවතො සන්තිකෙ ඉමං ගාථං අභාසි:
භික්ඛු සියා ඣායී විමුත්තචිත්තො ආකඞ්ඛෙ චෙ හදයස්සානුපත්තිං,ලොකස්ස ඤත්වා උදයබ්බයඤ්ච සුචෙතසො අනිස්සිතො තදානිසංසොති.
2. 1. 3.
මාඝසුත්තං
84. සාවත්ථියං–
අථ ඛො මාඝො දෙවපුත්තො අභික්කන්තාය රත්තියා අභික්කන්තවණ්ණො කෙවලකප්පං ජෙතවනං ඔභාසෙත්වා යෙන භගවා තෙනුපසඞ්කමි. උපසඞ්කමිත්වා භගවන්තං අභිවාදෙත්වා එකමන්තං අට්ඨාසි . එකමන්තං ඨිතො ඛො මාඝො දෙවපුත්තො භගවන්තං ගාථාය අජ්ඣභාසි:
කිං සු ඣත්වා සුඛං සෙති කිං සු ඣත්වා න සොචති, කිස්සස්ස එකධම්මස්ස වධං රොචෙසි ගොතමාති.
[භගවා:]
කොධං ඣත්වා සුඛං සෙති කොධං ඣත්වා න සොචති, කොධස්ස විසමූලස්ස මධුරග්ගස්ස වත්රභූ, වධං අරියා පසංසන්ති තං හි ඣත්වා න සොචතීති.
2. 1. 4.
මාගධසුත්තං
85. සාවත්ථියං–
එකමන්තං ඨිතො ඛො මාගධො දෙවපුත්තො භගවන්තං ගාථාය අජ්ඣභාසි:
කති ලොකස්මිං පජ්ජොතා යෙහි ලොකො පකාසති, භවන්තං පුට්ඨුමාගම්ම කථං ජානෙමු තං මයන්ති.
[භගවා:]
චත්තාරො ලොකෙ පජ්ජොතා පඤ්චමෙත්ථ න විජ්ජති, දිවා තපති ආදිච්චො රත්තිං ආභාති චන්දිමා.
අථ අග්ගි දිවාරත්තිං තත්ථ තත්ථ පකාසති, සම්බුද්ධො තපතං සෙට්ඨො එසා ආභා අනුත්තරාති.
2. 1. 5.
දාමලිසුත්තං
86. සාවත්ථියං–
අථ ඛො දාමලි දෙවපුත්තො අභික්කන්තාය රත්තියා අභික්කන්තවණ්ණො කෙවලකප්පං ජෙතවනං ඔභාසෙත්වා යෙන භගවා තෙනුපසඞ්කමි. උපසඞ්කමිත්වා භගවන්තං අභිවාදෙත්වා එකමන්තං අට්ඨාසි. එකමන්තං ඨිතො ඛො දාමලි දෙවපුත්තො භගවතො සන්තිකෙ ඉමං ගාථං අභාසි:
කරණීය මෙතං{1} බ්රාහ්මණෙන පධානමකිලාසුනා{2}, කාමානං විප්පහාණෙන න තෙනාසිංසතෙ{3} භවන්ති.
නත්ථි කිච්චං බ්රාහ්මණස්ස (දාමලීති භගවා) කතකිච්චො හි බ්රාහ්මණො, යාව න ගාධං ලභති නදීසු ආයූහති සබ්බගත්තෙභි ජන්තු ගාධඤ්ච ලද්ධාන ථලෙ ඨිතො සො නායූහති පාරගතො හි සොති.{4}
එසූපමා දාමලි බ්රාහ්මණස්ස ඛීණාසවස්ස නිපකස්ස ඣායිනො, පප්පුය්ය ජාතිමරණස්ස අන්තං නායූහති පාරගතො හි සොති.
2. 1. 6.
කාමදසුත්තං
87. සාවත්ථියං–
එකමන්තං ඨිතො ඛො කාමදො දෙවපුත්තො භගවන්තං එතදවොච: දුක්කරං භගවා සුදුක්කරං භගවාති.
දුක්කරං වාපි කරොන්ති (කාමදාති භගවා) සෙඛා{5} සීලසමාහිතා, ඨිතත්තා අනගාරියුපෙතස්ස තුට්ඨි හොති සුඛාවහාති.
දුල්ලභා භගවා. යදිදං තුට්ඨීති.
දුල්ලභං වාපි ලභන්ති (කාමදාති භගවා) චිත්තවූපසමෙ රතා, යෙසං දිවා ච රත්තො ච භාවනාය රතො මනොති.
දුස්සමාදහං භගවා යදිදං චිත්තන්ති.