60. කිංසු නිදානං ගාථානං කිංසු තාසං වියඤ්ජනං, කිංසු සන්නිස්සිතා ගාථා කිංසු ගාථානමාසයො.
[භගවා:]
ඡන්දො නිදානං ගාථානං අක්ඛරා තාසං වියඤ්ජනං, නාමසන්නිස්සිතා ගාථා කවි ගාථානමාසයො.
ජරාවග්ගො ඡට්ඨො.
තත්රුද්දානං:
ජරා අජරසා මිත්තං වත්ථු තීණි ජනෙති ච, උප්පථො ච දුතියො ච කවිනා පූරිතො වග්ගොති.
7. අන්වවග්ගො
1. 7. 1.
නාම[අන්වභවි]සුත්තං
61. සාවත්ථියං–
[දෙවතා:]
කිංසු සබ්බං අන්වභවි{1} කිස්මා භිය්යො{2} න විජ්ජති, කිස්සස්ස{3} එකධම්මස්ස සබ්බෙව වසමන්වගූති.
[භගවා:]
නාමං සබ්බං අන්වභවි{1} නාමා භිය්යො න විජ්ජති, නාමස්ස එකධම්මස්ස සබ්බෙව වසමන්වගූති.
1. 7. 2.
චිත්තසුත්තං
[දෙවතා:]
62. කෙනස්සු නීයති ලොකො කෙනස්සු පරිකස්සති,{4} කිස්සස්ස{3} එකධම්මස්ස සබ්බෙව වසමන්වගූති.
[භගවා:]
චිත්තෙන නීයති ලොකො චිත්තෙන පරිකස්සති,{4} චිත්තස්ස එකධම්මස්ස සබ්බෙව වසමන්වගූති.
1. 7. 3.
තණ්හාසුත්තං
[දෙවතා:]
63. කෙනස්සු නීයති ලොකො කෙනස්සු පරිකස්සති,{4} කිස්සස්ස{3} එකධම්මස්ස සබ්බෙව වසමන්වගූති.
[භගවා:]
තණ්හාය නීයති ලොකො තණ්හාය පරිකස්සති,{4} තණ්හාය එකධම්මස්ස සබ්බෙව වසමන්වගූති.
1. 7. 4.
සංයොජනසුත්තං
[දෙවතා:]
64. කිංසු සංයොජනො ලොකො කිංසු තස්ස විචාරණං, කිස්සස්ස{3} විප්පහාණෙන නිබ්බණෙමිති වුච්චතීති.
[භගවා:]
නන්දි{1} සංයොජනො ලොකො විතක්කස්ස විචාරණං, තණ්හාය විප්පහාණෙන නිබ්බාණමිති වුච්චතීති.
1. 7. 5.
බන්ධනසුත්තං
[දෙවතා:]
65. කිංසු සම්බන්ධනො ලොකො කිංසු තස්ස විචාරණං, කිස්සස්ස විප්පහානෙන සබ්බං ඡින්දති බන්ධනන්ති.
[භගවා:]
නන්දි{1} සම්බන්ධනො ලොකො විතක්කස්ස විචාරණං, තණ්හාය විප්පහානෙන සබ්බං ඡින්දති බන්ධනන්ති.
1. 7. 6.
අබ්භාහතසුත්තං
[දෙවතා:]
66. කෙනස්සුබ්භාහතො ලොකො කෙනස්සු පරිවාරිතො, කෙන සල්ලෙන ඔතිණ්ණො කිස්ස ධූමායිතො{2} සදාති.
[භගවා:]
මච්චුනා’බ්භාහතො ලොකො ජරාය පරිවාරිතො, තණ්හාසල්ලෙන ඔතිණ්ණො ඉච්ඡාධූමායිතො{2} සදාති.
1. 7. 7.
උඩ්ඩිතසුත්තං
[දෙවතා:]
67. කෙනස්සු උඩ්ඩිතො ලොකො කෙනස්සු පරිවාරිතො, කෙනස්සු පිහිතො ලොකො කිස්මිං ලොකො පතිට්ඨිතොති.
[භගවා:]
තණ්හාය උඩ්ඩිතො ලොකො ජරාය පරිවාරිතො, මච්චුනා පිහිතො ලොකො දුක්ඛෙ ලොකො පතිට්ඨිතොති.
1. 7. 8.
පිහිතසුත්තං
[දෙවතා:]
68. කෙනස්සු පිහිතො ලොකො කිස්මිං ලොකො පතිට්ඨිතො, කෙනස්සු උඩ්ඩිතො ලොකො කෙනස්සු පරිවාරිතොති.
[භගවා:]
මච්චුනා පිහිතො ලොකො දුක්ඛෙ ලොකො පතිට්ඨිතො, තණ්හාය උඩ්ඩිතො ලොකො ජරාය පරිවාරිතො.
1. 7. 9.
ඉච්ඡාසුත්තං
[දෙවතා:]
69. කෙනස්සු බජ්ඣති ලොකො කිස්ස විනයාය මුච්චති, කිස්සස්ස විප්පහානෙන සබ්බං ඡින්දති බන්ධනන්ති.
[භගවා:]
ඉච්ඡාය බජ්ඣති ලොකො ඉච්ඡාවිනයාය මුච්චති, ඉච්ඡාය විප්පහානෙන සබ්බං ඡින්දති බන්ධනන්ති.
1. 7. 10.
ලොකසුත්තං
[දෙවතා:]
70. කිස්මිං ලොකො සමුප්පන්නො කිස්මිං කුබ්බති සන්ථවං, කිස්ස ලොකො උපාදාය කිස්මිං ලොකො විහඤ්ඤතීති.
[භගවා:]
ඡස්සු{1} ලොකො සමුප්පන්නො ඡස්සු{1} කුබ්බති සන්ථවං, ඡන්නමෙව උපාදාය ඡස්සු{1} ලොකො විහඤ්ඤතීති.
අන්වවග්ගො සත්තමො.
තත්රුද්දානං:
නාමං චිත්තඤ්ච තණ්හා ච සංයොජනඤ්ච බන්ධනා, අබ්භාහතුඩ්ඩිතො පිහිතො ඉච්ඡා ලොකෙන තෙ දසාති.
8. ඣත්වා{2}වග්ගො
1. 8. 1.
ඣත්වාසුත්තං
71. සාවත්ථියං–
එකමන්තං ඨිතා ඛො සා දෙවතා භගවන්තං ගාථාය අජ්ඣභාසි.
කිං සු ඣත්වා{2} සුඛං සෙති කිංසු ඣත්වා{2} න සොචති, කිස්සස්ස එකධම්මස්ස වධං රොචෙසි ගොතමාති.
[භගවා:]
කොධං ඣත්වා{1} සුඛං සෙති කොධං ඣත්වා{1} න සොචති, කොධස්ස විසමූලස්ස මධුරග්ගස්ස දෙවතෙ, වධං අරියා පසංසන්ති තං හි ඣත්වා{1} න සොචතීති.
1. 8. 2.
රථසුත්තං
[දෙවතා:]
72. කිං සු රථස්ස පඤ්ඤාණං කිං සු පඤ්ඤාණමග්ගිනො, කිං සු රට්ඨස්ස පඤ්ඤාණං කිං සු පඤ්ඤාණමිත්ථියාති.
[භගවා:]
ධජො රථස්ස පඤ්ඤාණං ධූමො පඤ්ඤාණමග්ගිනො, රාජා රට්ඨස්ස පඤ්ඤාණං භත්තා පඤ්ඤාණමිත්ථියාති.
1. 8. 3.
විත්තසුත්තං.
[දෙවතා:]
73. කිං සූධ විත්තං පුරිසස්ස සෙට්ඨං කිං සු සුචිණ්ණො සුඛමාවහාති, කිං සු හවෙ සාදුතරං{2} රසානං කථංජීවිං ජීවිතමාහු{3} සෙට්ඨන්ති.
[භගවා:]
සද්ධීධ විත්තං පුරිසස්ස සෙට්ඨං ධම්මො සුචිණ්ණො සුඛමාවහාති, සච්චං හවෙ සාදුතරං රසානං පඤ්ඤාජීවිං ජීවිතමාහු{3} සෙට්ඨන්ති.
1. 8. 4.
වුට්ඨිසුත්තං.
[දෙවතා:]
74. කිං සු උප්පතතං සෙට්ඨං කිං සු නිපතතං වරං, කිං සු පවජමානානං කිං සු පවදතං වරන්ති.
[අපරා දෙවතා:]
බීජං උප්පතතං සෙට්ඨං වුට්ඨි නිපතතං වරා, ගාවො පවජමානානං පුත්තො පවදතං වරොති.
[භගවා:]
විජ්ජා උප්පතතං සෙට්ඨා අවිජ්ජා නිපතතං වරා, සඞ්ඝො පවජමානානං බුද්ධො පවදතං වරොති.
1. 8. 5.