දුස්සමාදහං වාපි සමාදහන්ති (කාමදාති භගවා) ඉන්ද්රියූපසමෙ රතා, තෙ ඡෙත්වා මච්චුනො ජාලං අරියා ගච්ඡන්ති කාමදාති.
දුග්ගමො භගවා විසමො මග්ගොති.
[භගවා:]
දුග්ගමෙ විසමෙ වාපි අරියා ගච්ඡන්ති කාමද, අනරියා විසමෙ මග්ගෙ පපතන්ති අවංසිරා, අරියානං සමො මග්ගො අරියා හි විසමෙ සමාති.
2. 1. 7.
පඤ්චාලචණ්ඩසුත්තං
88. සාවත්ථියං–
එකමන්තං ඨිතො ඛො පඤ්චාලචණ්ඩො දෙවපුත්තො භගවතො සන්තිකෙ ඉමං ගාථං අභාසි:
සම්බාධෙ වත ඔකාසං අවින්දි භූරිමෙධසො, යො ඣානමබුධා{1} බුද්ධො පතිලීනනිසභො මුනීති.
සම්බාධෙ වාපි වින්දන්ති{2} (පඤ්චාලචණ්ඩාති භගවා) ධම්මං නිබ්බාණපත්තියා, යෙ සතිං පච්චලත්ථුං සු{3} සම්මා තෙ සුසමාහිතාති.
2. 1. 8.
තායනසුත්තං
89. සාවත්ථියං–
අථ ඛො තායනො දෙවපුත්තො පුරාණතිත්ථකරො අභික්කන්තාය රත්තියා අභික්කන්තවණ්ණො කෙවලකප්පං ජෙතවනං ඔභාසෙත්වා යෙන භගවා තෙනුපසඞ්කමි. උපසඞ්කමිත්වා භගවන්තං අභිවාදෙත්වා එකමන්තං අට්ඨාසි. එකමන්තං ඨිතො ඛො තායනො දෙවපුත්තො භගවතො සන්තිකෙ ඉමා ගාථායො අභාසි:
ඡින්ද සොතං පරක්කම්ම කාමෙ පනුද{4} බ්රාහ්මණ, නප්පහාය මුනී කාමෙ නෙකත්තමුපපජ්ජති.
කයිරා චෙ කයිරාථෙනං දළ්හමෙනං පරක්කමෙ, සිථිලො හි පරිබ්බාජො භිය්යො ආකිරතෙ රජං.
අකතං දුක්කතං{5} සෙය්යො පච්ඡා තපති{6} දුක්කතං, කතඤ්ච සුකතං සෙය්යො යං කත්වා නානුතප්පති.
කුසො යථා දුග්ගහිතො හත්ථමෙවානුකන්තති, සාමඤ්ඤං දුප්පරාමට්ඨං නිරයායූපකඩ්ඪති.
යං කිඤ්චි සිථිලං කම්මං සංකිලිට්ඨඤ්ච යං වතං සංකස්සරං බ්රහ්මචරියං න තං හොති මහප්ඵලන්ති.
ඉදමවොච තායනො දෙවපුත්තො. ඉදං වත්වා භගවන්තං අභිවාදෙත්වා පදක්ඛිණං කත්වා තත්ථෙවන්තරධායීති.
අථ ඛො භගවා තස්සා රත්තියා අච්චයෙන භික්ඛූ ආමන්තෙසි: ඉමං භික්ඛවෙ රත්තිං තායනො නාම දෙවපුත්තො පුරාණතිත්ථකරො අභික්කන්තාය රත්තියා අභික්කන්තවණ්ණො කෙවලකප්පං ජෙතවනං ඔභාසෙත්වා යෙනාහං තෙනුපසඞ්කමි. උපසඞ්කමිත්වා මං අභිවාදෙත්වා එකමන්තං අට්ඨාසි. එකමන්තං ඨිතො භික්ඛවෙ තායනො{1} දෙවපුත්තො මම සන්තිකෙ ඉමා ගාථායො අභාසි:
“ඡින්ද සොතං පරක්කම්ම කාමෙ පනුද බ්රාහ්මණ, නප්පහාය මුනී කාමෙ නෙකත්ත මුපපජ්ජති.
කයිරා චෙ කයිරාථෙනං දළ්හමෙනං පරක්කමෙ, සිථිලො හි පරිබ්බාජො භිය්යො ආකිරතෙ රජන්ති.
අකතං දුක්කතං සෙය්යො පච්ඡා තපති දුක්කතං, කතඤ්ච සුකතං සෙය්යො යං කත්වා නානුතප්පති.
කුසො යථා දුග්ගහිතො හත්ථමෙවානුකන්තති, සාමඤ්ඤං දුප්පරාමට්ඨං නිරයායූපකඩ්ඪති.
යං කිඤ්චි සිථිලං කම්මං සංකිලිට්ඨඤ්ච යං වතං, සඞ්කස්සරං බ්රහ්මචරියං න තං හොති මහප්ඵලන්ති.”
ඉදමවොච තායනො දෙවපුත්තො, ඉදං වත්වා මං අභිවාදෙත්වා පදක්ඛිණං කත්වා තත්ථෙවන්තරධායි.
උග්ගණ්හාථ භික්ඛවෙ, තායනගාථා. පරියාපුණාථ භික්ඛවෙ, තායනගාථා. ධාරෙථ භික්ඛවෙ, තායනගාථා. අත්ථසංහිතා භික්ඛවෙ, තායනගාථා. ආදිබ්රහ්මචරියිකාති.{2}
2. 1. 9.
චන්දිමසුත්තං.
90. සාවත්ථියං–
තෙන ඛො පන සමයෙන චන්දිමා දෙවපුත්තො රාහුනා අසුරින්දෙන ගහිතො හොති. අථ ඛො චන්දිමා දෙවපුත්තො භගවන්තං අනුස්සරමානො තායං වෙලායං ඉමං ගාථං අභාසි:
නමො තෙ බුද්ධ වීරත්ථු විප්පමුත්තොසි සබ්බධි, සම්බාධපටිපන්නොස්මි තස්ස මෙ සරණං භවාති.”
අථ ඛො භගවා චන්දිමං දෙවපුත්තං ආරබ්භ රාහුං අසුරින්දං ගාථාය අජ්ඣභාසි:
“තථාගතං අරහන්තං චන්දිමා සරණං ගතො, රාහු චන්දං පමුඤ්චස්සු බුද්ධා ලොකානුකම්පකාති.”
අථ ඛො රාහු අසුරින්දො චන්දිමං දෙවපුත්තං මුඤ්චිත්වා තරමානරූපො යෙන වෙපචිත්ති අසුරින්දො තෙනුපසඞ්කමි. උපසඞ්කමිත්වා සංවිග්ගො ලොමහට්ඨජාතො එකමන්තං අට්ඨාසි. එකමන්තං ඨිතං ඛො රාහුං අසුරින්දං වෙපචිත්ති අසුරින්දො ගාථාය අජ්ඣභාසි:
කින්නු සන්තරමානොව රාහු චන්දං පමුඤ්චසි, සංවිග්ගරූපො ආගම්ම කින්නු භීතො ව තිට්ඨසීති.
සත්තධා මෙ ඵලෙ මුද්ධා ජීවන්තො න සුඛං ලභෙ, බුද්ධගාථාභිගීතොම්හි නො චෙ මුඤ්චෙය්ය චන්දිමන්ති.
2. 1. 10.
සූරිය{1}සුත්තං
91. සාවත්ථියං–
තෙන ඛො පන සමයෙන සුරියො{1} දෙවපුත්තො රාහුනා අසුරින්දෙන ගහිතො හොති. අථ ඛො සුරියො{1} දෙවපුත්තො භගවන්තං අනුස්සරමානො තායං වෙලායං ඉමං ගාථං අභාසි:
“නමො තෙ බුද්ධවීරත්ථු විප්පමුත්තොසි සබ්බධි, සම්බාධපටිපන්නොස්මි තස්ස මෙ සරණං භවාති.”
අථ ඛො භගවා සුරියං{1} දෙවපුත්තං ආරබ්භ රාහුං අසුරින්දං ගාථාහි{2} අජ්ඣභාසි:
“තථාගතං අරහන්තං සුරියො{1} සරණං ගතො, රාහු සුරියං{1} පමුඤ්චස්සු බුද්ධා ලොකානුකම්පකාති.
යො අන්ධකාරෙ තමසී{3} පභඞ්කරො වෙරොචනො මණ්ඩලී උග්ගතෙජො, මා රාහු ගිලී චරං අන්තලික්ඛෙ{4} පජං මම රාහු පමුඤ්ච සූරියන්ති.”
අථ ඛො රාහු අසුරින්දො සුරියං{1} දෙවපුත්තං මුඤ්චිත්වා තරමානරූපො යෙන වෙපචිත්ති අසුරින්දො තෙනුපසඞ්කමි. උපසඞ්කමිත්වා සංවිග්ගො ලොමහට්ඨජාතො එකමන්තං අට්ඨාසි. එකමන්තං ඨිතං ඛො රාහුං අසුරින්දං වෙපචිත්ති අසුරින්දො ගාථාය අජ්ඣභාසි:
“කින්නු සන්තරමානොව රාහු සුරියං පමුඤ්චසි, සංවිග්ගරූපො ආගම්ම කින්නු භීතොව තිට්ඨසීති.”
“සත්තධා මෙ ඵලෙ මුද්ධා ජීවන්තො න සුඛං ලභෙ, බුද්ධගාථාභිගීතොම්හි නො චෙ මුඤ්චෙය්ය සූරියන්ති.”
සුරියවග්ගො පඨමො
තත්රුද්දානං:
ද්වෙ කස්සපා ච මාඝො ච මාගධො දාමලි කාමදො, පඤ්චාලචණ්ඩො තායනො චන්දිමසුරියෙන තෙ දසාති.
2. අනාථපිණ්ඩිකවග්ගො
2. 2. 1.
චන්දිමසසුත්තං.
92. සාවත්ථියං–
අථ ඛො චන්දිමසො දෙවපුත්තො අභික්කන්තාය රත්තියා අභික්කන්තවණ්ණො කෙවලකප්පං ජෙතවනං ඔභාසෙත්වා යෙන භගවා තෙනුපසඞ්කමි. උපසඞ්කමිත්වා භගවන්තං අභිවාදෙත්වා එකමන්තං අට්ඨාසි. එකමන්තං ඨිතො ඛො චන්දිමසො දෙවපුත්තො භගවතො සන්තිකෙ ඉමං ගාථං අභාසි:
තෙ හි සොත්ථිං ගමිස්සන්ති කච්ඡෙවාමකසෙ මගා, ඣානානි උපසම්පජ්ජ එකොදි නිපකා සතාති.
[භගවා:]
තෙ හි පාරං ගමිස්සන්ති ඡෙත්වා ජාලං ව අම්බුජො, ඣානානි උපසම්පජ්ජ අප්පමත්තා රණඤ්ජහාති.
2. 2. 2.
වෙණ්හු{1}සුත්තං
93. සාවත්ථියං–
එකමන්තං ඨිතො ඛො වෙණ්හු{1} දෙවපුත්තො භගවතො සන්තිකෙ ඉමං ගාථං අභාසි:
සුඛිතා වත{2} තෙ මනුජා සුගතං පයිරුපාසිය, යුඤ්ජං{3} ගොතම සාසනෙ අප්පමත්තානුසික්ඛරෙති.
යෙ මෙ පවුත්තෙ{4} සත්ථිපදෙ{5} (වෙණ්හොති භගවා) අනුසික්ඛන්ති ඣායිනො, කාලෙ තෙ අප්පමජ්ජන්තා න මච්චුවසගා{6} සියුන්ති.
2. 2. 3.
දීඝලට්ඨිසුත්තං.
94. සාවත්ථියං–
එවං මෙ සුතං එකං සමයං භගවා රාජගහෙ විහරති වෙළුවනෙ කලන්දකනිවාපෙ.
අථ ඛො දීඝලට්ඨි දෙවපුත්තො අභික්කන්තාය රත්තියා අභික්කන්තවණ්ණො කෙවලකප්පං වෙළුවනං ඔභාසෙත්වා යෙන භගවා තෙනුපසඞ්කමි. උපසඞ්කමිත්වා භගවන්තං අභිවාදෙත්වා එකමන්තං අට්ඨාසි. එකමන්තං ඨිතො ඛො දීඝලට්ඨි දෙවපුත්තො භගවන්තං ගාථාය අජ්ඣභාසි{7}:
භික්ඛු සියා ඣායී විමුත්තචිත්තො ආකඞ්ඛෙ චෙ හදයස්සානුපත්තිං, ලොකස්ස ඤත්වා උදයබ්බයඤ්ච සුචෙතසො අනිස්සිතො තදානිසංසොති.
2. 2. 4.
නන්දනසුත්තං.
95. සාවත්ථියං–
එකමන්තං ඨිතො ඛො නන්දනො දෙවපුත්තො භගවන්තං ගාථාය අජ්ඣභාසි:
පුච්ඡාමි තං ගොතම භූරිපඤ්ඤ අනාවටං භගවතො ඤාණදස්සනං කථංවිධං සීලවන්තං වදන්ති, කථංවිධං පඤ්ඤවන්තං{1} වදන්ති කථංවිධො දුක්ඛමතිච්ච ඉරීයති.{2} කථංවිධං දෙවතා පූජයන්තීති.
[භගවා:]
යො සීලවා පඤ්ඤවා භාවිතත්තො සමාහිතො ඣානරතො සතීමා, සබ්බස්ස සොකා විගතා පහීණා ඛීණාසවො අන්තිමදෙහධාරී.
තථාවිධං සීලවන්තං වදන්ති තථාවිධං පඤ්ඤවන්තං{3} වදන්ති, තථාවිධො දුක්ඛමතිච්ච ඉරීයති තථාවිධං දෙවතා පූජයන්තීති.
2. 2. 5.
චන්දනසුත්තං.
96. සාවත්ථියං–
එකමන්තං ඨිතො ඛො චන්දනො දෙවපුත්තො භගවන්තං ගාථාය අජ්ඣභාසි:–
කො සූ{4} ධ තරති ඔඝං රත්තින්දිවමතන්දිතො, අප්පතිට්ඨෙ අනාලම්බෙ කො ගම්භීරෙ න සීදතීති.
[භගවා:]
සබ්බදා සීලසම්පන්නො පඤ්ඤවා සුසමාහිතො, ආරද්ධවිරියො පහිතත්තො ඔඝං තරති දුත්තරං.
විරතො කාමසඤ්ඤාය රූපසඤ්ඤොජනාතිගො, නන්දිරාගපරික්ඛීණො{5} සො ගම්භීරෙ න සීදතීති.
2. 2. 6.
වසුදත්තසුත්තං.{6}
97. සාවත්ථියං–
එකමන්තං ඨිතො ඛො වසුදත්තො{6} දෙවපුත්තො භගවතො සන්තිකෙ ඉමං ගාථං අභාසි:–
සත්තියා විය ඔමට්ඨො ඩය්හමානොව{1} මත්ථකෙ, කාමරාගප්පහාණාය සතො භික්ඛු පරිබ්බජෙති.
[භගවා:]
සත්තියා විය ඔමට්ඨො ඩය්හමානොව මත්ථකෙ, සක්කායදිට්ඨිප්පහාණාය සතො භික්ඛු පරිබ්බජෙති.
2. 2. 7.
සුබ්රහ්මසුත්තං.
98. සාවත්ථියං–
එකමන්තං ඨිතො ඛො සුබ්රහ්මා දෙවපුත්තො භගවන්තං ගාථාය අජ්ඣභාසි:–
නිච්චං උත්රස්තමිදං චිත්තං නිච්චං උබ්බිග්ගමිදං මනො අනුප්පන්නෙසු කිච්ඡෙසු{2} අථො උප්පතිතෙසු ච සචෙ අත්ථි අනුත්රස්තං තංමෙ අක්ඛාහි පුච්ඡිතො ති.