1. 5. 9.
මච්ඡරිසුත්තං
[දෙවතා:]
49. යෙ’ධ මච්ඡරිනො ලොකෙ කදරියා පරිභාසකා, අඤ්ඤෙසං දදමානානං අන්තරායකරා නරා.
කීදිසො තෙසං විපාකො සම්පරායො ච කීදිසො, භගවන්තං පුට්ඨුමාගම්ම කථං ජානෙමු තං මයන්ති.
[භගවා:]
යෙ’ධ මච්ඡරිනො ලොකෙ කදරියා පරිභාසකා, අඤ්ඤෙසං දදමානානං අන්තරායකරා නරා.
නිරයං තිරච්ඡානයොනිං යමලොකඤ්චුපපජ්ජරෙ,{1} සචෙ එන්ති මනුස්සත්තං දළිද්දෙ ජායරෙ කුලෙ, චොළං පිණ්ඩො රතී ඛිඩ්ඩා යත්ථ කිච්ඡෙන ලබ්භති.
පරතො ආසිංසරෙ{2} බාලා තම්පි තෙසං නලබ්භති, දිට්ඨෙ{3} ධම්මෙ සවිපාකො සම්පරායෙ{4} ච දුග්ගතීති.
[දෙවතා:]
ඉතිහෙතං විජානාම අඤ්ඤං පුච්ඡාම ගොතම, යෙ’ධ ලද්ධා මනුස්සත්තං වදඤ්ඤූ වීතමච්ඡරා. බුද්ධෙ පසන්නා ධම්මෙ ච සඞ්ඝෙ ච තිබ්බගාරවා.
කීදිසො තෙසං විපාකො සම්පරායො ච කීදිසො, භගවන්තං පුට්ඨුමාගම්ම කථං ජානෙමු තං මයන්ති.
[භගවා:]
යෙ’ධ ලද්ධා මනුස්සත්තං වදඤ්ඤූ වීතමච්ඡරා, බුද්ධෙ පසන්නා ධම්මෙ ච සඞ්ඝෙ ච තිබ්බගාරවා, එතෙ සග්ගෙ පකාසෙන්ති{5} යත්ථ තෙ උපපජ්ජරෙ.
සචෙ එන්ති මනුස්සත්තං අඩ්ඪෙ ආජායරෙ කුලෙ, චොළං පිණ්ඩො රතී ඛිඩ්ඩා යත්ථාකිච්ඡෙන ලබ්භති.
පරසම්භතෙසු භොගෙසු වසවත්තීව මොදරෙ, දිට්ඨෙ{6} ධම්මෙ සවිපාකො සම්පරායෙ ච සුග්ගතීති.
1. 5. 10.
ඝටීකාරසුත්තං
[ඝටීකාර දෙවතා:]
50. අවිහං උපපන්නා සෙ විමුත්තා සත්ත භික්ඛවො, රාගදොසපරික්ඛීණා තිණ්ණා ලොකෙ විසත්තිකන්ති.
කෙ ච තෙ අතරුං සඞ්ගං{7} මච්චුධෙය්යං සුදුත්තරං, කෙ හිත්වා මානුසං දෙහං දිබ්බං යොගං{8} උපච්චගුං.
උපකො පලගණ්ඩො ච පුක්කුසාති ච තෙ තයො, භද්දියො භද්දදෙවො ච බාහුදන්තී ච පිඞ්ගියො.{9} තෙ හිත්වා මානුසං දෙහං දිබ්බං යොගං{8} උපච්චගුන්ති.
[භගවා:]
කුසලී භාසසි තෙසං මාරපාසප්පහායිනං, කස්ස තෙ ධම්මමඤ්ඤාය අච්ඡිදුං භවබන්ධනං.
[ඝටීකාර:]
න අඤ්ඤත්ර භගවතා නාඤ්ඤත්ර තව සාසනා, යස්ස තෙ ධම්මමඤ්ඤාය අච්ඡිදුං භවබන්ධනං.
යත්ථ නාමඤ්ච රූපඤ්ච අසෙසං උපරුජ්ඣති, තං තෙ ධම්මං ඉධඤ්ඤාය අච්ඡිදුං භවබන්ධනන්ති.
[භගවා:]
ගම්භීරං භාසසි වාචං දුබ්බිජානං සුදුබ්බුධං, කස්ස ත්වං ධම්මමඤ්ඤාය වාචං භාසසි ඊදිසන්ති.
[ඝටීකාර:]
කුම්භකාරො පුරෙ ආසිං වෙහලිඞ්ගෙ{1} ඝටීකරො, මාතාපෙත්තිභරො ආසිං කස්සපස්ස උපාසකො.
විරතො මෙථුනා ධම්මා බ්රහ්මචාරී නිරාමිසො, අහුවා තෙ සගාමෙය්යො අහුවා තෙ පුරෙ සඛා.
සො’හං එතෙ{2} පජානාමි විමුත්තෙ සත්ත භික්ඛවො, රාගදොසපරික්ඛීණෙ තිණ්ණෙ ලොකෙ විසත්තිකන්ති.
[භගවා:]
එවමෙතං තදා ආසි යථා භාසසි භග්ගව, කුම්භකාරො පුරෙ ආසි වෙහලිඞ්ගෙ ඝටීකරො, මාතාපෙත්තිභරො ආසි කස්සපස්ස උපාසකො.
විරතො මෙථුනා ධම්මා බ්රහ්මචාරී නිරාමිසො, අහුවා මෙ සගාමෙය්යො අහුවා මෙ පුරෙ සඛාති.
[ථෙරා:]
එවමෙතං පුරාණානං සහායානං අහු{3} සඞ්ගමො, උභින්නං භාවිතත්තානං සරීරන්තිමධාරිනන්ති.
ආදිත්තවග්ගො පඤ්චමො.
තත්රුද්දානං:
ආදිත්තං කිංදදං අන්නං එකමූලඅනොමියං, අච්ඡරාවනජෙතෙන මච්ඡරෙන ඝටීකරො’ති.
6. ජරාවග්ගො
1. 6. 1.
ජරාසුත්තං.
51. සාවත්ථියං–
[දෙවතා:]
කිංසු යාව ජරා සාධු කිංසු සාධු පතිට්ඨිතං, කිංසු නරානං රතනං කිංසු චොරෙහි දූහරන්ති.
[භගවා:]
සීලං යාව ජරා සාධු සද්ධා සාධු පතිට්ඨිතා, පඤ්ඤා නරානං රතනං පුඤ්ඤං චොරෙහි දූහරන්ති.
1. 6. 2.
අජරසාසුත්තං
[දෙවතා:]
52. කිංසු අජරසා සාධු කිංසු සාධු අධිට්ඨිතං, කිංසු නරානං රතනං කිංසු චොරෙහි’හාරියන්ති.{1}
[භගවා:]
සීලං අජරසා සාධු සද්ධා සාධු අධිට්ඨිතා, පඤ්ඤා නරානං රතනං පුඤ්ඤං චොරෙහි’හාරියන්ති.
1. 6. 3.
මිත්තසුත්තං.
[දෙවතා:]
53. කිංසු පවසතො{2} මිත්තං කිංසු මිත්තං සකෙ ඝරෙ, කිං මිත්තං අත්ථජාතස්ස කිං මිත්තං සම්පරායිකන්ති.
[භගවා:]
සත්ථො පවසතො{2} මිත්තං මාතා මිත්තං සකෙ ඝරෙ, සහායො අත්ථජාතස්ස හොති මිත්තං පුනප්පුනං, සයං කතානි පුඤ්ඤානි තං මිත්තං සම්පරායිකන්ති.
1. 6. 4.
වත්ථුසුත්තං.
[දෙවතා:]
54. කිංසු වත්ථු මනුස්සානං කිං සූධ පරමො{3} සඛා, කිංසු භූතූපජීවන්ති{4} යෙ පාණා පඨවිංසිතාති.
[භගවා:]
54. පුත්තා වත්ථු මනුස්සානං භරියාව{1} පරමො{2} සඛා, වුට්ඨිං භූතූපජීවන්ති{3} යෙ පාණා පඨවිංසිතාති.{4}
1. 6. 5.
පඨමජනෙතිසුත්තං
[දෙවතා:]
55. කිංසු ජනෙති පුරිසං කිංසු තස්ස විධාවති, කිංසු සංසාරමාපාදි කිංසු තස්ස මහබ්භයන්ති.
[භගවා:]
තණ්හා ජනෙති පුරිසං චිත්තමස්ස විධාවති, සත්තො සංසාරමාපාදි දුක්ඛමස්ස මහබ්භයන්ති.
1. 6. 6.
දුතියජනෙතිසුත්තං
[දෙවතා:]
56. කිංසු ජනෙති පුරිසං කිංසු තස්ස විධාවති, කිංසු සංසාරමාපාදි කිස්මා න පරිමුච්චතීති.
[භගවා:]
තණ්හා ජනෙති පුරිසං චිත්තමස්ස විධාවති, සත්තො සංසාරමාපාදි දුක්ඛා න පරිමුච්චතීති.
1. 6. 7.
තතියජනෙතිසුත්තං
[දෙවතා:]
57. කිංසු ජනෙති පුරිසං කිංසු තස්ස විධාවති, කිංසු සංසාරමාපාදි කිංසු තස්ස පරායණන්ති.
[භගවා:]
තණ්හා ජනෙති පුරිසං චිත්තමස්ස විධාවති, සත්තො සංසාරමාපාදි කම්මං තස්ස පරායණන්ති.
1. 6. 8.
උප්පථසුත්තං
[දෙවතා:]
58. කිංසු උප්පථො අක්ඛාතො කිංසු රත්තින්දිවක්ඛයො, කිං මලං බ්රහ්මචරියස්ස කිං සිනානමනොදකන්ති.
[භගවා:]
රාගො උප්පථො අක්ඛාතො{1} වයො රත්තින්දිවක්ඛයො, ඉත්ථි මලං බ්රහ්මචරියස්ස එත්ථායං සජ්ජතෙ පජා, තපො ච බ්රහ්මචරියඤ්ච තං සිනානමනොදකන්ති.
1. 6. 9.
දුතියාසුත්තං{*}
[දෙවතා:]
59. කිංසු දුතියා{2} පුරිසස්ස හොති කිංසු චෙනං පසංසති, කිස්ස චාභිරතො මච්චො සබ්බදුක්ඛා පමුච්චතීති.
[භගවා:]
සද්ධා දුතියා පුරිසස්ස හොති පඤ්ඤා චෙනං පසංසති, නිබ්බාණාභිරතො මච්චො සබ්බදුක්ඛා පමුච්චතීති.
1. 6. 10.
කවිසුත්තං
[දෙවතා:]