[භගවා:]
පහාසි සඞ්ඛං{5} න විමාන{6} මජ්ඣගා අච්ඡෙච්ඡි{7} තණ්හං ඉධ නාම රූපෙ, තං ඡින්නගන්ථං අනීඝං නිරාසං පරියෙසමානා නාජ්ඣගමුං දෙවා මනුස්සා ඉධ වා හුරං වා සග්ගෙසු වා සබ්බනිවෙසනෙසු; සචෙ විජානාසි වදෙහි යක්ඛාති.
[දෙවතා:]
ඉමස්සපි ඛ්වාහං භන්තෙ භගවතා සඞ්ඛිත්තෙන භාසිතස්ස එවං විත්ථාරෙන අත්ථං ආජානාමි.
[භගවා:]
පාපං න කයිරා වචසා මනසා කායෙන වා කිඤ්චන සබ්බලොකෙ, කාමෙ පහාය සතිමා සම්පජානො දුක්ඛං න සෙවෙථ අනත්ථසංහිතන්ති.
නන්දනවග්ගො දුතියො.
තත්රුද්දානං:
නන්දනා නන්දති චෙව නත්ථිපුත්තසමෙන ච, ඛත්තියො සනමානො ච නිද්දා තන්දී ච දුක්කරං, හිරි කුටිකා නවමො දසමො වුත්තො සමිද්ධිනා’ති.
3. සත්තිවග්ගො.
1. 3. 1.
සත්තිසුත්තං.
21. සාවත්ථියං --
එකමන්තං ඨිතා ඛො සා දෙවතා භගවතො සන්තිකෙ ඉමං ගාථං අභාසි:{1}
සත්තියා විය ඔමට්ඨො ඩය්හමානොව{2} මත්ථකෙ, කාමරාගප්පහාණාය සතො භික්ඛු පරිබ්බජෙ’ති.
[භගවා:]
සත්තියා විය ඔමට්ඨො ඩය්හමානොව{2} මත්ථකෙ, සක්කායදිට්ඨිප්පහානාය සතො භික්ඛු පරිබ්බජෙ’ති.
1. 3. 2.
ඵුසතිසුත්තං
22. සාවත්ථියං–
එකමන්තං ඨිතා ඛො සා දෙවතා භගවතො සන්තිකෙ ඉමං ගාථං අභාසි:
නාඵුසන්තං ඵුසති ච ඵුසන්තං ච තතො ඵුසෙ, තස්මා ඵුසන්තං ඵුසති අප්පදුට්ඨප්පදොසිනන්ති.
[භගවා:]
යො අප්පදුට්ඨස්ස නරස්ස දුස්සති, සුද්ධස්ස පොසස්ස අනඞ්ගණස්ස, තමෙව බාලං පච්චෙති පාපං, සුඛුමො රජො පටිවාතංව ඛිත්තො’ති.
1. 3. 3.
ජටාසුත්තං
23. සාවත්ථියං–
එකමන්තං ඨිතා ඛො සා දෙවතා භගවන්තං ගාථාය අජ්ඣභාසි:
අන්තො ජටා බහි ජටා ජටාය ජටිතා පජා, තං තං ගොතම පුච්ඡාමි කො ඉමං විජටයෙ ජටන්ති.
[භගවා:]
සීලෙ පතිට්ඨාය නරො සපඤ්ඤො චිත්තං පඤ්ඤඤ්ච භාවයං, ආතාපි නිපකො භික්ඛු සො ඉමං විජටයෙ ජටන්ති.
යෙසං රාගො ච දොසො ච අවිජ්ජා ච විරාජිතා, ඛීණාසවා අරහන්තො තෙසං විජටිතා ජටා.
යත්ථ නාමඤ්ච රූපඤ්ච අසෙසං උපරුජ්ඣති, පටිඝං රූපසඤ්ඤා ච එත්ථෙසා{1} ඡිජ්ජතෙ ජටාති.
1. 3. 4.
මනොනිවාරණසුත්තං
24. සාවත්ථියං–
එකමන්තං ඨිතා ඛො සා දෙවතා භගවතො සන්තිකෙ ඉමං ගාථං අභාසි:
යතො යතො මනො නිවාරයෙ න දුක්ඛමෙති නං තතො තතො, ස සබ්බතො මනො නිවාරයෙ ස සබ්බතො දුක්ඛා පමුච්චතීති{2}.
[භගවා:]
න සබ්බතො මනො නිවාරයෙ මනො යතත්තමාගතං,{3} යතො යතො ච පාපකං තතො තතො මනො නිවාරයෙ’ති.
1. 3. 5.
අරහන්තසුත්තං
25. සාවත්ථියං–
එකමන්තං ඨිතා ඛො සා දෙවතා භගවතො සන්තිකෙ ඉමං ගාථං අභාසි:
යො හොති භික්ඛු අරහං කතාවී ඛීණාසවො අන්තිමදෙහධාරී, අහං වදාමීතිපි සො වදෙය්ය මමං වදන්තීතිපි සො වදෙය්යාති
[භගවා:]
යො හොති භික්ඛු අරහං කතාවී ඛීණාසවො අන්තිමදෙහධාරී, අහං වදාමීතිපි සො වදෙය්ය මමං වදන්තීතිපි සො වදෙය්ය ලොකෙ සමඤ්ඤං කුසලො විදිත්වා, වොහාරමත්තෙන සො වොහරෙය්යාති.
[දෙවතා:]
යො හොති භික්ඛු අරහං කතාවී ඛීණාසවො අන්තිමදෙහධාරී, මානං නු ඛො සො උපගම්ම භික්ඛු, අහං වදාමීතිපි සො වදෙය්ය මමං වදන්තීතිපි සො වදෙය්යාති.
[භගවා:]
පහීණමානස්ස න සන්ති ගන්ථා, විධූපිතා මානගන්ථස්ස සබ්බෙ, සො වීතිවත්තො මඤ්ඤනං{1} සුමෙධො අහං වදාමීතිපි සො වදෙය්ය. මමං වදන්තීතිපි සො වදෙය්ය, ලොකෙ සමඤ්ඤං කුසලො විදිත්වා වොහාරමත්තෙන සො වොහරෙය්යා’ති.
1. 3. 6.
පජ්ජොතසුත්තං
26. සාවත්ථියං–
එකමන්තං ඨිතා ඛො සා දෙවතා භගවතො සන්තිකෙ ඉමං ගාථං අභාසි:
කති ලොකස්මිං පජ්ජොතා යෙහි ලොකො පකාසති{2}, භගවන්තං{3} පුට්ඨුමාගම්ම කථං ජානෙමු තං මයං.
[භගවා:]
චත්තාරො ලොකෙ පජ්ජොතා පඤ්චමෙත්ථ න විජ්ජති, දිවා තපති ආදිච්චො රත්තිං ආභාති{4} චන්දිමා, අථ අග්ගි දිවාරත්තිං තත්ථ තත්ථ පකාසති{2}, සම්බුද්ධො තපතං සෙට්ඨො එසා ආභා අනුත්තරා’ති.
1. 3. 7.
සරසුත්තං
27. සාවත්ථියං–
එකමන්තං ඨිතා ඛො සා දෙවතා භගවන්තං ගාථාය අජ්ඣභාසි:
කුතො සරා නිවත්තන්ති. කත්ථ වට්ටං න වත්තති,{1} කත්ථ නාමඤ්ච රූපඤ්ච අසෙසං උපරුජ්ඣතීති.
[භගවා:]
යත්ථ ආපො ච පඨවී තෙජො වායො න ගාධති, අතො සරා නිවත්තන්ති එත්ථ වට්ටං න වත්තති,{1} එත්ථ නාමඤ්ච රූපඤ්ච අසෙසං උපරුජ්ඣතී’ති.
1. 3. 8.
මහද්ධනසුත්තං
28. සාවත්ථියං–
එකමන්තං ඨිතා ඛො සා දෙවතා භගවන්තං ගාථාය අජ්ඣභාසි:
මහද්ධනා මහාභොගා රට්ඨවන්තො’පි ඛත්තියා, අඤ්ඤමඤ්ඤාභිගිජ්ඣන්ති කාමෙසු අනලඞ්කතා තෙසු උස්සුක්කජාතෙසු{2} භවසොතානුසාරිසු, කෙධ{3} තණ්හං පජහිංසු කෙ ලොකස්මිං අනුස්සුකාති.
[භගවා:]
හිත්වා අගාරං පබ්බජිතා{4} හිත්වා පුත්තං පසුං පියං, හිත්වා රාගඤ්ච දොසඤ්ච අවිජ්ජඤ්ච විරාජිය ඛීණාසවා අරහන්තො තෙ ලොකස්මිං අනුස්සුකා’ති.
1. 3. 9.
චතුචක්කසුත්තං
29. සාවත්ථියං–
[දෙවතා:]
චතුචක්කං නවද්වාරං පුණ්ණං ලොභෙන සංයුතං, පඞ්කජාතං මහාවීර කථං යාත්රා භවිස්සති.
[භගවා:]
ඡෙත්වා නද්ධිං{5} වරත්තඤ්ච ඉච්ඡාලොභඤ්ච පාපකං, සමූලං තණ්හං අබ්බුය්හ එවං යාත්රා භවිස්සතී’ති.
1. 3. 10.
එණිජඞ්ගසුත්තං.
30. සාවත්ථියං–
[දෙවතා:]
එණිජඞ්ඝං කිසං වීරං අප්පාහාරං අලොලුපං, සීහං වෙකචරං නාගං කාමෙසු අනපෙක්ඛිනං, උපසඞ්කම්ම පුච්ඡාම කථං දුක්ඛා පමුච්චතීති.
[භගවා:]
පඤ්ච කාම ගුණාලොකෙ මනොඡට්ඨා පවෙදිතා, එත්ථ ඡන්දං විරාජෙත්වා එවං දුක්ඛා පමුච්චතීති.
සත්තිවග්ගො තතියො.
තත්රුද්දානං:
සත්තියා ඵුසති චෙව ජටා මනො නිවාරණා, අරහන්තෙන පජ්ජොතො සරා මහද්ධනෙන ච, චතුචක්කෙන නවමං එණිජඞ්ඝෙන තෙ දසාති.
4. සතුල්ලපකායිකවග්ගො
1. 4. 1.
සබ්හිසුත්තං
31. එවං මෙ සුතං එකං සමයං භගවා සාවත්ථියං විහරති ජෙතවනෙ අනාථපිණ්ඩිකස්ස ආරාමෙ.
අථ ඛො සම්බහුලා සතුල්ලපකායිකා දෙවතායො අභික්කන්තාය රත්තියා අභික්කන්තවණ්ණා කෙවලකප්පං ජෙතවනං ඔභාසෙත්වා යෙන භගවා තෙනුපසඞ්කමිංසු. උපසඞ්කමිත්වා භගවන්තං අභිවාදෙත්වා එකමන්තං අට්ඨංසු.
එකමන්තං ඨිතා ඛො එකා දෙවතා භගවතො සන්තිකෙ ඉමං ගාථං අභාසි:
සබ්භිරෙව සමාසෙථ සබ්භි කුබ්බෙථ සන්ථවං, සතං සද්ධම්මමඤ්ඤාය සෙය්යො හොති න පාපියොති.
අථ ඛො අපරා දෙවතා භගවතො සන්තිකෙ ඉමං ගාථං අභාසි:
සබ්භිරෙව සමාසෙථ සබ්භි කුබ්බෙථ සන්ථවං, සතං සද්ධම්මමඤ්ඤාය පඤ්ඤා ලබ්භති{1} නාඤ්ඤතොති.
අථ ඛො අපරා දෙවතා භගවතො සන්තිකෙ ඉමං ගාථං අභාසි:
සබ්භිරෙව සමාසෙථ සබ්භි කුබ්බෙථ සන්ථවං, සතං සද්ධම්මමඤ්ඤාය සොකමජ්ඣෙ න සොචතීති.