707. තං සුණොහි මහාරාජ අරින්දම රට්ඨවඩ්ඪන, ධීතා මය්හං මහාරාජ උත්තරා භද්දමත්ථු තෙ.
708. කරොති භද්දකං කම්මං සීලෙසූපොසථෙ{3} රථා සඤ්ඤතා සංවිභාගී ච වදඤ්ඤූ වීතමච්ඡරා.
709. අඛණ්ඩකාරී සික්ඛාය සණ්හා පරකුලෙසු ච, උපාසිකා සක්යමුනිනො සම්බුද්ධස්ස සිරීමතො,
710. භික්ඛූ ච සීලසම්පන්නො ගාමං පිණ්ඩාය පාවිසි. ඔක්ඛිත්තචක්ඛූ සතිමා ගුත්තද්වාරො සුසංවුතො.
711. සපදානං චරමානො අගමා තං නිවෙසනං, තමද්දස මහාරාජ උත්තරා භද්දමත්ථු තෙ.
712. පූරං පානීයස්ස කරකං පූවෙ චිත්තෙ ච සා අදා, පිතා මෙ කාලකතො භන්තෙ තස්සෙතං උපකප්පතු,
713. සමනන්තරානුද්දිට්ඨෙ විපාකො උපපජ්ජථ, භුඤ්ජාමි කාමකාමීහං රාජා වෙස්සවණො යථා.
714. තං සුණොහි මහාරාජ අරින්දම රට්ඨවඩ්ඪන, සදෙවකස්ස ලොකස්ස බුද්ධො අග්ගො පවුච්චති, තං බුද්ධං සරණං ගච්ඡ සපුත්තදාරො අරින්දම.
715. අට්ඨඞ්ගිකෙන මග්ගෙන ඵුසන්ති අමතං පදං, තං ධම්මං සරණං ගච්ඡ සපුත්තදාරො අරින්දම.
716. චත්තාරො මග්ගපටිපන්නා{4} චත්තාරො ච ඵලෙ ඨිතා. එස සඞ්ඝො උජුභූතො පඤ්ඤාසීලසමාහිතො, තං සඞ්ඝං සරණං ගච්ඡ සපුත්තදාරො අරින්දම.
717. පාණාතිපාතා විරමස්සු ඛිප්පං ලොකෙ අදින්නං පරිවජ්ජයස්සු, අමජ්ජපො මා ච මුසා අභාණි සකෙන දාරෙන ච හොහි තුට්ඨො.
718. අත්ථකාමොසි මෙ යක්ඛ හිතකාමොසි දෙවතෙ, කරොමි තුය්හං වචනං ත්වංසි ආචරියො මම.
719. උපෙමි බුද්ධං සරණං ධම්මඤ්චාපි අනුත්තරං, සඞ්ඝඤ්ච නරදෙවස්ස ගච්ඡාමි සරණං අහං.
720. පාණාතිපාතා විරමාමි ඛිප්පං ලොකෙ අදින්නං පරිවජ්ජයාමි, අමජ්ජපො නො ච මුසා භණාමි සකෙන දාරෙන ච හොමි තුට්ඨො.
721. ඔපුණාමි මහාවාතෙ නදියා වා සීඝගාමියා, වමාමි පාපිකං දිට්ඨිං බුද්ධානං සාසනෙ රතො.
722. ඉදං වත්වාන සොරට්ඨො විරමිත්වා පාපදස්සනා, නමො භගවතො කත්වා පාමොක්ඛා{1} රථමාරුහී’ති.
නන්දක පෙතවත්ථු තතියං.
4. 4.
723. උට්ඨෙහි රෙවතෙ සුපාපධම්මෙ අපාරුතං ද්වාරං{2} අදානසීලෙ, නෙස්සාම තං යත්ථ ථුනන්ති දුග්ගතා. සමප්පිතා නෙරයිකා දුඛෙන.
724. ඉච්චෙව වත්වාන යමස්ස දූතා{3} තෙ ද්වෙ යක්ඛා ලොහිතක්ඛා බ්රහන්තා, පච්චෙකබාහාසු ගහෙත්වාන රෙවතිං පක්කාමයුං දෙවගණස්ස සන්තිකෙ.
725. ආදිච්චවණ්ණං රුචිරං පභස්සරං ඛ්යම්හං සුභං කඤ්චනජාලඡන්නං, කස්සෙතමාකිණ්ණජනං විමානං සුරියස්ස රංසීරිව ජොතමානං.
726. නාරීගණා චන්දනසාරලිත්තා උභතො විමානං උපසොභයන්ති, තං දිස්සති සුරියසමානවණ්ණං කො මොදති සග්ගප්පත්තො විමානෙ.
727. බාරාණසියං නන්දියො නාමුපාසකො{1} අමච්ඡරී දානපතී වදඤ්ඤූ, තස්සෙතමාකිණ්ණජනං විමානං සුරියස්ස රංසීරිව ජොතමානං.
728. නාරීගණා චන්දනසාරලිත්තා උභතො විමානං උපසොභයන්ති, තං දිස්සති සුරියසමානවණ්ණං සො මොදති සග්ගප්පත්තො විමානෙ.
729. නන්දියස්සාහං භරියා අගාරිනී සබ්බකුලස්ස ඉස්සරා, භත්තුවිධානෙ රමිස්සාමි දානහං{2} න පත්ථයෙ නිරයං දස්සනාය.
730. එසො{3} තෙ නිරයො සුපාපධම්මෙ පුඤ්ඤං තයා අකතං ජීවලොකෙ, න හි මච්ඡරී රොසකො පාපධම්මො සග්ගූපගානං{4} ලභතී සහව්යතං.
731. කින්නු ගූථඤ්ච මුත්තඤ්ච අසුචි පතිදිස්සති, දුග්ගන්ධං කිමිදං මීළහං කිමෙතං උපවායති,
732. එස සංසවකො නාම ගම්භීරො සතපොරිසො, යත්ථ වස්සසහස්සානි තුවං පච්චසි රෙවතෙ.
733. කින්නු කායෙන වාචාය මනසා දුක්කටං කතං, කෙන සංසවකො ලද්ධො ගම්භීරො සතපොරිසො.
734. සමණෙ බ්රාහ්මණෙ චාපි අඤ්ඤෙ චාපි වණිබ්බකෙ, මුසාවාදෙන වඤ්චෙසි තං පාපං පකතං තයා.
735. තෙන සංසවකො ලද්ධො ගම්භීරො සතපොරිසො, තත්ථ වස්සසහස්සානි තුවං පච්චසි රෙවතෙ.
736. හත්ථෙපි ඡින්දන්ති අථොපි පාදෙ කණ්ණෙපි ඡින්දන්ති අථොපි තාසං, අථොපි කාකොළගණා සමෙච්ච සංගම්ම ඛාදන්ති විඵන්දමානං.
737. සාධු ඛො මං පටිනෙථ කාහාමි කුසලං බහුං, දානෙන සමචරියාය සඤ්ඤමෙන දමෙන ච, යං කත්වා සුඛිතා හොන්ති න ච පච්ඡානුතප්පරෙ.
738. පුරෙ තුවං පමජ්ජිත්වා ඉදානි පරිදෙවසි, සයං කතානං කම්මානං විපාකං අනුභොස්සසි.
739. කො දෙවලොකතො මනුස්සලොකං ගන්ත්වාන පුට්ඨො මෙ එවං වදෙය්ය, නික්ඛිත්තදණ්ඩෙසු දදාථ දානං අච්ඡාදනං සයන{1} මථන්නපානං න හි මච්ඡරී රොසකො පාපධම්මො සග්ගූපගානං ලභති සහව්යතං.
740. සාහං නූන ඉතො ගන්ත්වා යොනිං ලද්ධාන මානුසිං, වදඤ්ඤූ සීලසම්පන්නා කාහාමි කුසලං බහුං: දානෙන සමචරියාය සඤ්ඤමෙන දමෙන ච.
741. ආරාමානි ච රොපිස්සං දුග්ගෙ සඞ්කමනානි ච, පපඤ්ච උදපානඤ්ච විප්පසන්නෙන චෙතසා
742. චාතුද්දසිං පඤ්චදසිං යා ච පක්ඛස්ස අට්ඨමිං, පාටිහාරියපක්ඛඤ්ච අට්ඨඞ්ගසුසමාගතං.
743. උපොසථං උපවසිස්සං සදා සීලෙසු සංවුතා, න ච දානෙ පමජ්ජිස්සං සාමං දිට්ඨමිදං මයං.
744. ඉච්චෙවං විප්පලපන්තිං ඵන්දමානං තතො තතො, ඛිපිංසු නිරයෙ ඝොරෙ උද්ධපාදං අවංසිරං.
745. අහං පුරෙ මච්ඡරිනී අහොසිං පරිභාසිකා සමණබ්රාහ්මණානං, විතථෙන ච සාමිකං වඤ්චයිත්වා පච්චාමහං නිරයෙ ඝොරරූපෙ’ති.
රෙවතීපෙතීවත්ථු චතුත්ථං.
4. 5.
746. ඉදං මමං උච්ඡුවනං මහන්තං නිබ්බත්තති පුඤ්ඤඵලං අනප්පකං, තං දානි වෙ පරිභොගං න උපෙති{3} ආචික්ඛ භන්තෙ කිස්ස අයං විපාකො.
747. හඤ්ඤාමි ඛජ්ජාමි ච වායමාමි පරිසක්කාමි පරිභුඤ්ජිතුං කිඤ්චි. ස්වාහං ඡින්නථාමො කපණො ලාලපාමි කිස්ස කම්මස්ස අයං විපාකො.
748. විඝාතො චාහං පරිපතාමි ඡමායං පරිවත්තාමි වාරිචරොව ඝම්මෙ, රුදතො ච මෙ අස්සුකා නිග්ගලන්ති ආචික්ඛ භන්තෙ කිස්ස අයං විපාකො.
749. ඡාතො කිලන්තො ච පිපාසිතො ච සන්තසිතො සාතසුඛං න වින්දෙ, පුච්ඡාමි තං එතමත්ථං භදන්ත කථන්නු උච්ඡුපරිභොගං ලභෙය්යං.
750. පුරෙ තුවං කම්මමකාසි අත්තනා මනුස්සභූතො පුරිමාය ජාතියා, අහං ච තං එතමත්ථං වදාමි සුත්වාන ත්වං එතමත්ථං විජාන.
751. උච්ඡුං තුවං ඛාදමානො පයාතො පුරිසො ච තෙ පිට්ඨිතො අන්වගච්ඡි,{1} සො ච තං පච්චාසංසන්තො කථෙසි තස්ස තුවං න කිඤ්චි ආලපිත්ථ.
752. සො ච තං අභණන්තං අයාචි දෙහය්ය උච්ඡුන්ති ච තං අවොච, තස්ස තුවං පිට්ඨිතො උච්ඡුං අදාසි තස්සෙතං කම්මස්ස අයං විපාකො.
753. ඉඞ්ඝ තුවං පිට්ඨිතො ගණ්හ උච්ඡුං ගහෙත්වාන ඛාදස්සු යාවදත්ථං, තෙනෙව ත්වං අත්තමනො භවිස්සසි හට්ඨො චුදග්ගො ච පමොදිතො ච.
754. ගන්ත්වාන සො පිට්ඨිතො අග්ගහෙසි ගහෙත්වාන තං ඛාදි යාවදත්ථං, තෙනෙව සො අත්තමනො අහොසී හට්ඨො චුදග්ගො ච පමොදිතො චා’ති.
උච්ඡුපෙතවත්ථු පඤ්චමං.
4. 6.
755. සාවත්ථි නාම නගරං හිමවන්තස්ස පස්සතො, තත්ථ ආසුං ද්වෙ කුමාරා රාජපුත්තාති මෙ සුතං.
756. පමත්තා{2} රජනීයෙසු කාමස්සාදාභිනන්දිනො, පච්චුප්පන්නෙ සුඛෙ ගිද්ධා න තෙ පස්සිංසු නාගතං.
757. තෙ චුතා ච මනුස්සත්තා පරලොකං ඉතො ගතා. තෙධ ඝොසෙන්ත්යදිස්සන්තා පුබ්බෙ දුක්කටමත්තනො.
758. බහූසු වත සන්තෙසු දෙය්යධම්මෙ උපට්ඨිතෙ, නාසක්ඛිම්හා ච අත්තානං පරිත්තං කාතුං සුඛාවහං.
759. කිං තතො පාපකං අස්ස යං නො රාජකුලා චුතා. උප්පන්නා{1} පෙත්තිවිසයං ඛුප්පිපාසාසමප්පිතා.
760. සාමිනො ඉධ හුත්වාන හොන්ති අස්සාමිනො තහිං, චරන්ති{2} ඛුප්පිපාසාය මනුස්සා උන්නතොනතා.
761. එතමාදීනවං ඤත්වා ඉස්සරමදසම්භවං පහාය ඉස්සරමදං භවෙ සග්ගගතො නරො: කායස්ස භෙදා සප්පඤ්ඤො සග්ගං සො උපපජ්ජති’ති.
කුමාරපෙතවත්ථු ඡට්ඨං.
4. 7.
762. පුබ්බෙ කතානං කම්මානං විපාකො මථයෙ මනං, රූපෙ සද්දෙ රසෙ ගන්ධෙ ඵොට්ඨබ්බෙ ච මනොරමෙ.
763. නච්චං ගීතං රතිං ඛිඩ්ඩං අනුභුත්වා අනප්පකං, උය්යානෙ පරිචරිත්වාන{3} පවිසන්තො ගිරිබ්බජං.
764. ඉසිං සුනෙත්ත{4} මද්දක්ඛි අත්තදන්තං සමාහිතං අප්පිච්ඡං හිරිසම්පන්නං උඤ්ඡෙ පත්තගතෙ රතං.
765. හත්ථික්ඛන්ධතො ඔරුය්හ ලද්ධා{5} භන්තෙති ච බ්රුවි, තස්ස පත්තං ගහෙත්වාන උච්චං පග්ගය්හ ඛත්තියො.
766. ථණ්ඩිලෙ පත්තං භින්දිත්වා හසමානො අපක්කමි, රඤ්ඤො කිතවස්සහං පුත්තො කිං මං භික්ඛු කරිස්සසි.
767. තස්ස කම්මස්ස ඵරුසස්ස විපාකො කටුකො අහු, යං රාජපුත්තො වෙදෙසි නිරයම්හි සමප්පිතො.
768. ඡළෙව චතුරාසීති වස්සානි නහුතානි ච, භුසං දුක්ඛං නිගච්ඡිත්ථො නිරයෙ කතකිබ්බිසො.
769. උත්තානොපි ච පච්චිත්ථ නිකුජ්ජො වාමදක්ඛිණො, උද්ධංපාදො ඨිතො චෙව චිරං බාලො අපච්චථ
770. බහූනි වස්සසහස්සානි පූගානි නහුතානි ච, භුසං දුක්ඛං නිගච්ඡිත්ථො නිරයෙ කතකිබ්බිසො.
771. එතාදිසං ඛො කටුකං අප්පදුට්ඨප්පදොසිනං. පච්චන්ති පාපකම්මන්තා ඉසිමාසජ්ජ සුබ්බතං.
772. සො තත්ථ බහුවස්සානි වෙදයිත්වා බහුං දුඛං, ඛුප්පිපාසාහතො නාම පෙතො ආසි තතො චුතො.
773. එතමාදීනවං දිස්වා{1} ඉස්සරමදසම්භවං, පහාය ඉස්සරමදං නිවාතමනුවත්තයෙ.
774. දිට්ඨෙව ධම්මෙ පාසංසො යො බුද්ධෙසු සගාරවො, කායස්ස භෙදා සප්පඤ්ඤො සග්ගං සො උපපජ්ජති’ති.
රාජපුත්තපෙතවත්ථු සත්තමං.
4. 8.
775. ගූථකූපතො උග්ගන්ත්වා කො නු දීනො හි තිට්ඨසි,{2} නිස්සංසයං පාපකම්මන්තො කින්නු සද්දහසෙ තුවං,
776. අහං භද්දන්ත පෙතොම්හි දුග්ගතො යමලොකිකො, පාපකම්මං කරිත්වාන පෙතලොකමිතො ගතො.
777. කින්නු කායෙන වාචාය මනසා දුක්කටං කතං, කිස්ස කම්මවිපාකෙන ඉදං දුක්ඛං නිගච්ඡසි.
778. අහු ආවාසිකො මය්හං ඉස්සුකී කුලමච්ඡරී, අජ්ඣාසිතො{3} මය්හං ඝරෙ කදරියො පරිභාසකො.
779. තස්සාහං වචනං සුත්වා භික්ඛවො පරිභාසිසං, තස්ස කම්මවිපාකෙන පෙතලොකමිතො ගතො.
780. අමිත්තො මිත්තවණ්ණෙන යො තෙ ආසි කුලූපකො, කායස්ස භෙදා දුප්පඤ්ඤො කින්නු පෙච්ච ගතිං ගතො.
781. තස්සෙවාහං පාපකම්මස්ස සීසෙ තිට්ඨාමි මත්ථකෙ, සො ච පරවිසයං පත්තො මමෙව පරිචාරකො.
782. යං භද්දන්ත{4} හදන්තඤ්ඤෙ එතං මෙ හොති භොජනං, අහං ච ඛො යං හදාමි එතං සො උපජීවතී’ති.
ගූථඛාදකපෙතවත්ථු අට්ඨමං.
4. 9.
783. ගූථකූපතො උග්ගන්ත්වා කා නු දීනා හි තිට්ඨසි, නිස්සංසයං පාපකම්මන්තා{1} කින්නු සද්දහසෙ තුවං.
784. අහං භද්දන්ත පෙතීම්හි දුග්ගතා යමලොකිකා, පාපකම්මං කරිත්වාන පෙතලොකමිතො ගතා.
785. කින්නු කායෙන වාචාය මනසා දුක්කටං කතං, කිස්ස කම්මවිපාකෙන ඉදං දුක්ඛං නිගච්ඡසි.
786. අහු ආවාසිකො මය්හං ඉස්සුකී කුලමච්ඡරී, අජ්ඣාසිතො මය්හං ඝරෙ කදරියො පරිභාසකො.
787. තස්සාහං වචනං සුත්වා භික්ඛවො පරිභාසිසං, තස්ස කම්මවිපාකෙන පෙතලොකමිතො ගතා.
788. අමිත්තො මිත්තවණ්ණෙන යො තෙ ආසි කුලූපකො, කායස්ස භෙදා දුප්පඤ්ඤො කින්නු පෙච්ච ගතිං ගතො.
789. තස්සෙවාහං පාපකම්මස්ස සීසෙ තිට්ඨාමි මත්ථකෙ, සො ච පරවිසයං පත්තො මමෙව පරිචාරකො.
790. යං භද්දන්ත හදන්තඤ්ඤෙ එතං මෙ හොති භොජනං, අහං ච ඛො යං හදාමි එතං සො උපජීවතී’ති.
ගූථඛාදකපෙතිවත්ථු නවමං.
4. 10.
791. නග්ගා දුබ්බණ්ණරූපාත්ථ කිසා ධමනිසන්ථතා{2}, උප්ඵාසුලිකා කිසිකා කෙ නු තුම්භෙත්ථ මාරිසා.
792. මයං භද්දන්ත{3} පෙතාම්හා දුග්ගතා යමලොකිකා, පාපකම්මං කරිත්වාන පෙතලොකමිතො ගතා.