518. කින්නු කායෙන වාචාය මනසා දුක්කටං කතං, කිස්ස කම්මවිපාකෙන ඉදං දුක්ඛං නිගච්ඡසීති.
519. අහං රාජගහෙ රම්මෙ රමණීයෙ ගිරිබ්බජෙ, ඉස්සරො ධනධඤ්ඤස්ස සුපහූතස්ස මාරිස.
520. තස්සායං මෙ භරියා ච ධීතා ච සුණිසා ච මෙ, තා මාලං උප්පලඤ්චාපි පච්චග්ඝඤ්ච විලෙපනං ථූපං හරන්තියො වාරෙසිං තං පාපං පකතං මයා.
521. ඡළාසීතිසහස්සානි මයං පච්චත්තවෙදනං, ථූපපූජං විවණ්ණෙත්වා පච්චාම නිරයෙ භුසං.
522. යෙ ච ඛො ථූපපූජාය වත්තන්තෙ අරහතො මහෙ. ආදීනවං පකාසෙන්ති විවෙචයථ{1} නෙ තතො.
523. ඉමා ච පස්ස ආයන්තියො මාලාධාරී අලඞ්කතා, මාලාවිපාකං අනුභොන්ති{2} සමිද්ධා තා යසස්සිනියො.
524. තඤ්ච දිස්වාන අච්ඡෙරං අබ්භුතං ලොමහංසනං, නමො කරොන්ති සප්පඤ්ඤා වන්දන්ති තං මහාමුනිං.
525. සො හි නූන ඉතො ගන්ත්වා යොනිං ලද්ධාන මානුසිං, ථූපපූජං කරිස්සාමි අප්පමත්තො පුනප්පුනන්ති’.
ධාතුවිවිණ්ණිකපෙතවත්ථු දසමං.
චූළවග්ගො තතියො.
තස්සුද්දානං:-
අභිජ්ජමානො කොණ්ඩඤ්ඤො රථකාරී භුසෙන ච, කුමාරො ගණිකා චෙව ද්වෙ ලුද්දා පිට්ඨපූජයො: වග්ගො තෙන පවුච්චතී’ති.
4. මහාවග්ගො
4. 1.
526. වෙසාලී නාම නගරත්ථි වජ්ජීනං තත්ථ අහු ලිච්ඡවි අම්බසක්ඛරො, දිස්වාන පෙතං නගරස්ස බාහිරං තත්ථෙව පුච්ඡිත්ථ තං කාරණත්ථිකො.
527. සෙය්යා නිසජ්ජා නයිමස්ස අත්ථි අභික්කමො නත්ථි පටික්කමො වා{1}, අසිතපීතඛායිතවත්ථභොගා පරිචාරිකා සාපි{2} ඉමස්ස නත්ථි
528. යෙ ඤාතකා දිට්ඨසුතා සුහජ්ජා අනුකම්පකා යස්ස පුබ්බෙ අහෙසුං{3}, දට්ඨුම්පි තෙ දානි න තං ලභන්ති විරාධිතත්තො{4} හි ජනෙන තෙන.
529. න ඔග්ගතන්තස්ස භවන්ති මිත්තා ජහන්ති මිත්තා විකලං විදිත්වා, අත්ථඤ්ච දිස්වා පරිවාරයන්ති බහූ ච මිත්තා උග්ගතත්තස්ස හොන්ති.
530. නිහීනත්තො සබ්බභොගෙහි කිච්ඡො සම්මක්ඛිතො සම්පරිභින්න ගත්තො, උස්සාවබින්දූව පලිප්පමානො{5} අජ්ජ සුවෙ ජීවිතස්සූපරොධො.
531. එතාදිසං උත්තමකිච්ඡපත්තං උත්තාසිතං පුචිමන්දස්ස සූලෙ, අත්ථ ත්වං කෙන වණ්ණෙන වදෙසි යක්ඛ ජීව භො ජීවිතමෙව සෙය්යොති.
532. සාලොහිතො එස අහොසි මය්හං අහං සරාමි පුරිමාය ජාතියා, දිස්වා ච මෙ කාරුඤ්ඤමහොසි රාජ මා පාපධම්මො නිරයං පතායං.
533. ඉතො චුතො ලිච්ඡවි එස පොසො සත්තුස්සදං නිරයං ඝොරරූපං, උපපජ්ජති දුක්කතකම්මකාරී මහාභිතාපං කටුකං භයානකං
534. අනෙකභාගෙන ගුණෙන සෙය්යො අයමෙව සූලො නිරයෙන තෙන, එකන්තදුක්ඛං කටුකං භයානකං එකන්තතිප්පං නිරයං පතායං.
535. ඉදඤ්ච සුත්වා වචනං මමෙසො දුක්ඛූපනීතො විජහෙය්ය පාණං, තස්මා අහං සන්තිකෙ න භණාමි මා මෙ කතො ජීවිතස්සූපරොධො.
536. අඤ්ඤතො එසො පුරිසස්ස අත්ථො අඤ්ඤම්පි ඉච්ඡාමසෙ පුච්ඡිතුං තුවං, ඔකාසකම්මං සචෙ නො කරොසි පුච්ඡාමි තං න ච නො කුජ්ඣිතබ්බං.
537. අද්ධා පටිඤ්ඤා මෙ තදා අහු නාචික්ඛනා අප්පසන්නස්ස හොති, අකාමා සද්ධෙය්යවචොති කත්වා පුච්ඡස්සු මං කාමං යථා විසය්හං
538. යං කිඤ්චාහං චක්ඛුනා පස්සිස්සාමි සබ්බම්පි තාහං අභිසද්දහෙය්යං, දිස්වාන තං නොපි චෙ සද්දහෙය්යං කරෙය්යාසි මෙ යක්ඛ නියස්සකම්මං.
539. සච්චප්පටිඤ්ඤා තව මෙසා හොතු සුත්වාන ධම්මං ලභස්සුප්පසාදං, අඤ්ඤත්ථිකො නො ච පදුට්ඨචිත්තො යං තෙ සුතං අසුතං චාපි ධම්මං සබ්බං ආචික්ඛිස්සං යථා පජානං
540. සෙතෙන අස්සෙන අලඞ්කතෙන උපයාසි සූලාවුතකස්ස සන්තිකෙ, යානං ඉදං අබ්භුතං දස්සනෙය්යං කිස්සෙතං කම්මස්ස අයං විපාකො.
541. වෙසාලියා තස්ස නගරස්ස මජ්ඣෙ චික්ඛල්ලමග්ගෙ නරකං අහොසි, ගොසීසමෙකාහං පසන්නචිත්තො සෙතං ගහෙත්වා නරකස්මිං නික්ඛිපිං.
542. එතස්මිං පාදානි පතිට්ඨපෙත්වා මයඤ්ච අඤ්ඤෙ ච අතික්කමිම්හ, යානං ඉදං අබ්භුතං දස්සනෙය්යං තස්සෙව කම්මස්ස අයං විපාකො.
543. වණ්ණො ච තෙ සබ්බදිසා පභාසති ගන්ධො ච තෙ සබ්බදිසා පවායති, යක්ඛිද්ධිපත්තොසි මහානුභාවො නග්ගො චාසි කිස්ස අයං විපාකො.
544. අක්කොධනො නිච්චපසන්නචිත්තො සණ්හාහි වාචාහි ජනං ලපෙමි,{1} තස්සෙව කම්මස්ස අයං විපාකො දිබ්බො මෙ වණ්ණො සතතං පභාසති.
545. යසඤ්ච කිත්තිඤ්ච ධම්මෙ ඨිතානං දිස්වාන මන්තෙමි පසන්නචිත්තො, තස්සෙව කම්මස්ස අයං විපාකො දිබ්බො මෙ ගන්ධො සතතං පවායති.
546. සහායානං තිත්ථස්මිං නහායන්තානං{2} ථලෙ ගහෙත්වා නිදහිස්ස දුස්සං, ඛිඩ්ඩත්ථිකො නො ච පදුට්ඨචිත්තො තෙනම්හි නග්ගො කසිරා ච වුත්ති
547. යො කීළමානො පකරොති පාපං තස්සීදිසං{3} කම්මවිපාකමාහු අකීළමානො පන යො කරොති කිං තස්ස කම්මස්ස විපාකමාහු.
548. යෙ දුට්ඨසඞ්කප්පමානා මනුස්සා කායෙන වාචාය ච සඞ්කිලිට්ඨා, කායස්ස භෙදා අභිසම්පරායං අසංසයං තෙ නිරයං උපෙන්ති.
549. අපරෙ පන සුගතිං ආසමානා දානෙ රතා සංගහිතත්තභාවා, කායස්ස භෙදා අභිසම්පරායං අසංසයං තෙ සුගතිං උපෙන්ති.
550. තං කින්ති ජානෙය්යං අහං අවෙච්ච කල්යාණපාපස්ස අයං විපාකො, කිං වාහං දිස්වා අභිසද්දභෙය්යං කො වාපි මං සද්දහාපෙය්ය එතං
551. දිස්වා ච සුත්වා වා{1} අභිසද්දහස්සු කල්යාණපාපෙ උභයෙ අසන්තෙ කල්යාණපාපස්ස අයං විපාකො, සියා නු සත්තා සුගතා දුග්ගතා වා.
552. නො චෙත්ථ කම්මානි කරෙය්යුං මච්චා කල්යාණපාපානි මනුස්සලොකෙ, නාහෙසුං සත්තා සුගතා දුග්ගතා වා හීනප්පණීතා ච මනුස්සලොකෙ.
553. යස්මා ච කම්මානි කරොන්ති මච්චා කල්යාණපාපානි මනුස්සලොකෙ, තස්මා හි සත්තා සුගතා දුග්ගතාවා හීනප්පණීතා ච මනුස්සලොකෙ
554. ද්වයජ්ජ කම්මානං විපාකමාහු සුඛස්ස දුක්ඛස්ස ච වෙදනීයං, තා දෙවතායො පරිචාරයන්ති පච්චෙන්ති{2} බාලා ද්වයතං අපස්සිනො.
555. නමත්ථි කම්මානි සයං කතානි දත්වාපි මෙ නත්ථි සො ආදිසෙය්ය, අච්ඡාදනං සයනමථන්නපානං තෙනම්හි නග්ගො කසිරා ච වුත්ති.
556. සියා නු ඛො කාරණං කිඤ්ච යක්ඛ අච්ඡාදනං යෙන තුවං ලභෙථ, ආචික්ඛ මෙතං යදත්ථි හෙතු සද්ධායිතං හෙතු වචො සුණොම.
557. කප්පිනකො{3} නාම ඉධත්ථි භික්ඛු ඣායී සුසීලො අරහා විමුත්තො. ගුත්තින්ද්රියො සංවුතපාතිමොක්ඛො සීතීභූතො උත්තමදිට්ඨිපත්තො.
558. සඛිලො වදඤ්ඤූ සුවචො සුමුඛො ස්වාගමො සුප්පටිමුත්තකො ච, පුඤ්ඤස්ස ඛෙත්තං අරණවිහාරී දෙවමනුස්සානඤ්ච දක්ඛිණෙය්යො.
559. සන්තො විධූමො අනීඝො නිරාසො මුත්තො විසල්ලො අමමො අවඞ්කො, නිරූපධි සබ්බපපඤ්ච ඛීණො තිස්සො විජ්ජා අනුප්පත්තො ජූතීමා.
560. අප්පඤ්ඤාතො දිස්වාපි න සුජානො මුනීති නං වජ්ජිසු වොහරන්ති, ජානන්ති තං යක්ඛභූතා අනෙජං කල්යාණධම්මං විචරන්ති{1} ලොකෙ.
561. තස්ස තුවං එකං යුගං දුවෙ වා මමුද්දිසිත්වාන සචෙ දදෙථ, පටිග්ගහීතානි ච තානි අස්සු මමඤ්ච පස්සෙථ සන්නද්ධදුස්සං.
562. කස්මිං පදෙසෙ සමණං වසන්තං ගන්ත්වාන පස්සෙමු මයං ඉදානි, සමජ්ජ{2} කඞ්ඛං විචිකිච්ඡිතඤ්ච දිට්ඨිවිසූකානි ච කො විනොදයෙ.{3}
563. එසො නිසින්නො කපිනච්චනායං පරිවාරිතො දෙවතාහි බහූහි. ධම්මිං යථං භාසති සච්චනාමො සකස්මිමාචෙරකෙ අප්පමත්තො.
564. තථාහං කස්සාමි ගන්ත්වා ඉදානි අච්ඡාදයිස්සං සමණං යුගෙන, පටිග්ගහීතානි ච තානි අස්සු තුවඤ්ච පස්සෙමු සන්නද්ධ දුස්සං.
565. මා අක්ඛණෙ පබ්බජිතං උපාගමි සාධු වො ලිච්ඡවි නෙස ධම්මො, තතො ච කාලෙ උපසඞ්කමිත්වා තත්ථෙව පස්සාහි රහො නිසින්නං.
566. තථාති වත්වා අගමාසි තත්ථ පරිවාරිතො දාසගණෙන ලිච්ඡවි, සො තං නගරං උපසඞ්කමිත්වා වාසූපගච්ඡිත්ථ සකෙ නිවෙසනෙ.
567. තතො ච කාලෙ ගිහිකිච්චානි කත්වා නහාත්වා පිවිත්වා ච ඛණං ලභිත්වා, විචෙය්ය පෙළාතො යුගානි අට්ඨ ගාහාපයී දාසගණෙන ලිච්ඡවි.
568. සො තං පදෙසං උපසඞ්කමිත්වා තමද්දසා සමණං සන්තචිත්තං, පටික්කමන්තං ගොචරතො නිවත්තං සීතීභූතං රුක්ඛමූලෙ නිසින්නං.
569. තමෙනං අවොච උපසඞ්කමිත්වා අප්පාබාධං ඵාසුවිහාරඤ්ච පුච්ඡි. වෙසාලියං ලිච්ඡවිහං භදන්තෙ ජානන්ති මං ලිච්ඡවි අම්බසක්ඛරො.
570. ඉමානි මෙ අට්ඨයුගා සුභානි පතිගණ්හ භන්තෙ පදදාමි තුය්හං. තෙනෙව අත්ථෙන ඉධාගතොස්මි යථා අහං අත්තමනො භවෙය්යං.
571. දූරතොව සමණා බ්රාහ්මණා ච නිවෙසනං තෙ පරිවජ්ජයන්ති, පත්තානි භිජ්ජන්ති ච තෙ නිවෙසනෙ සඞ්ඝාටියො චාපි විපාටයන්ති.{1}
572. අථාපරෙ පාදකුඨාරිකාභි අවංසිරා සමණා පාතයන්ති, එතාදිසං පබ්බජිතා විහෙසං තයා කතං සමණා පාපුණන්ති.
573. තිණෙන තෙලම්පි නත්වං අදාසි මූළ්හස්ස මග්ගම්පි න පාවදාසි, අන්ධස්ස දණ්ඩං සයමාදියාසි එතාදිසො කදරියො අසංවුතො{2} අථ ත්වං කෙන වණ්ණෙන කිමෙව දිස්වා අම්හෙහි සහ සංවිභාගං කරොසි,
574. පච්චෙමි භන්තෙ යං ත්වං වදෙසි විහෙසයිං සමණෙ බ්රාහ්මණෙ ච, ඛිඩ්ඪත්ථිකො නො ච පදුට්ඨචිත්තො එතම්පි මෙ දුක්කටමෙව භන්තෙ.
575. ඛිඩ්ඩාය යක්ඛො පසවිත්ව පාපං වෙදෙති දුක්ඛං අසමත්තභොගී, දහරො යුවා නග්ගනියස්ස භාගී කිංසු තතො දුක්ඛතරස්ස හොති.
576. තං දිස්වා සංවෙගමලත්ථං භන්තෙ තප්පච්චයා තාහං දදාමි දානං, පටිගණ්හ භන්තෙ වත්ථයුගානි අට්ඨ යක්ඛස්සිමා ගච්ඡන්තු දක්ඛිණායො.
577. අද්ධා හි දානං බහුධා පසත්ථං දදතො ච තෙ අක්ඛයධම්මමත්ථු, පටිගණ්හාමි තෙ වත්ථයුගානි අට්ඨ යක්ඛස්සිමා ගච්ඡන්තු දක්ඛිණායො.
578. තතො ච සො ආචමයිත්ව ලිච්ඡවි ථෙරස්ස දත්වාන යුගානි අට්ඨ, පටිග්ගහීතානි ච තානි චස්සු යක්ඛඤ්ච පස්සෙථ සන්නද්ධදුස්සං.
579. තමද්දසා චන්දනසාරලිත්තං ආජඤ්ඤමාරූළ්හමුළාරවණ්ණං, අලඞ්කතං සාධු නිවත්ථදුස්සං පරිවාරිතං යක්ඛමහිද්ධිපත්තං
580. සො තං දිස්වා අත්තමනො උදග්ගො පහට්ඨචිත්තො ච සුභග්ගරූපො, කම්මඤ්ච දිස්වාන මහාවිපාකං සන්දිට්ඨිකං චක්ඛුනා සච්ඡිකත්වා.
581. තමෙනං අවොච උපසඞ්කමිත්වා දස්සාමි දානං සමණබ්රාහ්මණානං, න චාපි මෙ කිඤ්චි අදෙය්යමත්ථි තුවං ච මෙ යක්ඛ බහූපකාරොති.
582. තුවං ච මෙ ලිච්ඡවී එකදෙසං අදාසි දානානි අමොඝමෙතං, ස්වාහං කරිස්සාමි තයා ච{1} සක්ඛිං අමානුසො මානුසකෙන සද්ධින්ති.
583. ගතී ච බන්ධූ ච පරායණඤ්ච මිත්තො මමාසි අථ දෙවතාසි, යාචාමහං{1} පඤ්ජලිකො භවිත්වා ඉච්ඡාමි තං යක්ඛ පුනාපි දට්ඨුන්ති.
584. සචෙ තුවං අස්සද්ධො භවිස්සසි කදරියරූපො විප්පටිපන්නචිත්තො, තෙනෙව මං න ලිච්ඡසි දස්සනාය දිස්වා ච තං නොපි ච ආලපිස්සං.
585. සචෙ{2} තුවං භවිස්සසි ධම්මගාරවො දානෙ රතො සඞ්ගහිතත්තභාවො, ඔපානභූතො සමණබ්රාහ්මණානං එවං මමං ලච්ඡසි දස්සනාය.
586. දිස්වා ච තං ආලපිස්සං භදන්තෙ ඉමඤ්ච සූලතො ලහුං පමුඤ්ච, යතො නිදානං අකරිම්භ සක්ඛිං මඤ්ඤාම සූලාවුතකස්ස කාරණා.
587. තෙ අඤ්ඤමඤ්ඤං අකරිම්හ සක්ඛිං අයඤ්ච සූලාවුතො{3} ලහුං පමුත්තො, සක්කච්ච ධම්මානි සමාචරන්තො මුච්චෙය්ය සො නිරයා ච තම්හා.
588. කම්මං සියා අඤ්ඤත්ර වෙදනීයං කප්පිනකඤ්ච උපසඞ්කමිත්වා, තෙනෙව සහ සංවිභජිත්ව කාලෙ සයම්මුඛෙනුපනිසජ්ජ පුච්ඡ.
589. සො තෙ අක්ඛීස්සති එතමත්ථං තමෙව භික්ඛුං උපසඞ්කමිත්වා, පුච්ඡස්සු අඤ්ඤත්ථිකො නො ච පදුට්ඨචිත්තො සො තෙ සුතං අසුතං චාපි ධම්මං, සබ්බම්පි අක්ඛිස්සති යථා පජානං.
590. සො තත්ථ රහස්සං සමුල්ලපිත්වා සක්ඛිං කරිත්වාන අමානුසෙන, පක්කාමි සො ලිච්ඡවීනං සකාසං අථ බ්රූවි පරිසං සන්නිසින්නං.
591. සුණන්තු භොන්තො මම එකවාක්යං වරං වරිස්සං ලභිස්සාමි අත්ථං, සූලාවුතො පුරිසො ලුද්දකම්මො පණිහිතදණ්ඩො අනුසත්තරූපො
592. එත්තාවතා වීසති රත්තිමත්තා යතො ආවුතො නෙව ජීවති න මතො, තාහං මොචයිස්සාමි දානි යථාමති අනුජානාතු සඞ්ඝොති.
593. එතඤ්ච අඤ්ඤං ච ලහුං පමුඤ්ච කො තං වදෙථ තථා කරොන්තං, යථා පජානාසි තථා කරොහි යථාමති අනුජානාති සඞ්ඝොති.
594. සො තං පදෙසං උපසඞ්කමිත්වා සූලාවුතං මොචයි ඛිප්පමෙව, මා භායි සම්මාති ච තං අවොච තිකිච්ඡකානඤ්ච උපට්ඨපෙසි.
595. කප්පිනකඤ්ච උපසඞ්කමිත්වා තෙන සමං සංවිභජිත්වා කාලෙ, සයම්මුඛෙනුපනිසජ්ජ ලිච්ඡවි තථෙව පුච්ඡිත්ථ නං කාරණත්ථිකො.
596. සූලාවුතො පුරිසො ලුද්දකම්මො පණිහිතදණ්ඩො අනුසත්තරුපො, එත්තාවතා වීසතිරත්තිමත්තා යතො ආවුතො නෙව ජීවති න මතො.
597. සො මොචිතො ගන්ත්වා මයා ඉදානි එතස්ස යක්ඛස්ස වචො හි භන්තෙ, සියා නු ඛො කාරණං කිඤ්චිදෙව යෙන සො නිරයං නො වජෙය්ය
598. ආචික්ඛ භන්තෙ යදි අත්ථි හෙතු සද්ධායිතං හෙතු වචො සුණොම, න තෙසං කම්මානං විනාසමත්ථි අවෙදයිත්වා ඉධ බ්යන්තිභාවො.
599. සචෙ ස ධම්මානි{1} සමාචරෙය්ය සක්කච්ච රත්තින්දිවමප්පමත්තො මුච්චෙය්ය සො නිරයා ච තම්හා කම්මං සියා අඤ්ඤත්ර වෙදනීයන්ති.
600. අඤ්ඤතො එසො පුරිසස්ස අත්ථො මමම්පිදානි අනුකම්ප භන්තෙ, අනුසාස මං ඔවද භූරිපඤ්ඤ යථා අහං නො නිරයං වජෙය්යන්ති.
601. අජ්ජෙව බුද්ධං සරණං උපෙහි ධම්මඤ්ච සඞ්ඝඤ්ච පසන්නචිත්තො, තථෙව සික්ඛාය පදානි පඤ්ච අඛණ්ඩ ඵුල්ලානි සමාදියස්සු.
602. පාණාතිපාතා විරමස්සු ඛිප්පං ලොකෙ අදින්නං පරිවජ්ජයස්සු අමජ්ජපො මා ච මුසා අභාණී සකෙන දාරෙන ච හොහි තුට්ඨො, ඉමඤ්ච අරියං අට්ඨඞ්ගවරෙනුපෙතා සමාදියාහි කුසලං සුඛුද්රයං
603. චීවරං පිණ්ඩපාතඤ්ච පච්චයං සයනාසනං අන්තං පානං ඛාදනීයං වත්ථසෙනාසනානි ච, දදාහි උජුභූතෙසු විප්පසන්නෙන චෙතසා.
604. භික්ඛූ පි සීලසම්පන්නෙ වීතරාගෙ බහුස්සුතෙ තප්පෙහි අන්නපානෙන සදා පුඤ්ඤං පවඩ්ඪති.
605. එවඤ්ච ධම්මානි සමාචරන්තො සක්කච්ච රත්තින්දිවමප්පමත්තො, මුච්චෙය්ය සො ත්වං නිරයා ච තම්හා කම්මං සියා අඤ්ඤත්ර වෙදනීයන්ති.
606. අජ්ජෙ ව බුද්ධං සරණං උපෙමි ධම්මඤ්ච සඞ්ඝඤ්ච පසන්නචිත්තො, තථෙව සික්ඛාය පදානි පඤ්ච අඛණ්ඩඵුල්ලානි සමාදියාමි.
607. පාණාතිපාතා විරමාමි ඛිප්පං ලොකෙ අදින්නං පරිවජ්ජයාමි, අමජ්ජපො නො ච මුසා භණාමි සකෙන දාරෙන ව හොමි තුට්ඨො, ඉමඤ්ච අරියං අට්ඨඞ්ග වරෙනුපෙතං, සමාදියාමි කුසලං සුඛුද්රයං
608. චීවරං පිණ්ඩපාතඤ්ච පච්චයං සයනාසනං, අන්නං පානං ඛාදනීයං වත්ථසෙනාසනානි ච.
609. භික්ඛූ පි සීලසම්පන්නෙ වීතරාගෙ බහුස්සුතෙ, දදාමි න විකම්පාමි බුද්ධානං සාසනෙ රතො.
610. එතාදිසො ලිච්ඡවි අම්බසක්ඛරො වෙසාලියං අඤ්ඤතරො උපාසකො, සද්ධො මුදුකාරකරො ච භික්ඛු සඞ්ඝඤ්ච සක්කච්ච තදා උපට්ඨහි.
611. සූලාවුතො ච අරොගො හුත්වා සෙරී සුඛී පබ්බජ්ජං උපාගමි, භික්ඛුඤ්ච ආගම්ම කප්පිනකුත්තමං උභොපි සාමඤ්ඤඵලානි අජ්ඣගුං.