435. කූටාගාරනිවෙසනා විභත්තා භාගසො මිතා, න මනුස්සෙසු ඊදිසා යාදිසා නො ඝරා ඉධ.
436. අපි දිබ්බෙසු යාදිසා තාදිසා නො ඝරා ඉධ, දද්දල්ලමානා ආභන්ති සමන්තා චතුරො දිසා.
437. තථා භන්තෙ පරක්කම යථා පානං{2} ලභාමසෙ, ථෙරො කරකං පූරෙත්වා සඞ්ඝෙ චාතුද්දිසෙ අදා.
438. දත්වා අන්වාදිසි ථෙරො මාතු පිතු ච භාතුනො, ඉදං මෙ ඤාතීනං හොතු සුඛිතා හොන්තු ඤාතයො.
439. සමනන්තරානුද්දිට්ඨෙ පානීයං උදපජ්ජථ,{3} ගම්භීරා චතුරස්සා ච පොක්ඛරඤ්ඤො සුනිම්මිතා.
440. සීතොදිකා සූපතිත්ථා සීතා අප්පටිගන්ධියා, පදුමුප්පලසඤ්ඡන්නා වාරිකිඤ්ජක්ඛපූරිතා.
441. තත්ථ නහාත්වා පිවිත්වා ච ථෙරස්ස පටිදස්සයුං, පහූතං පානීයං භන්තෙ පාදා දුක්ඛං ඵලන්ති නො.
442. ආහිණ්ඩමානා ඛඤ්ජාම සක්ඛරෙ කුසකණ්ටකෙ, තථා භන්තෙ පරක්කම යථා යානං ලභාමසෙ.
443. ථොරො සිපාටිකං ලද්ධා සඞ්ඝෙ චාතුද්දිසෙ අදා, දත්වා අන්වාදිසි ථෙරො මාතු පිතු ච භාතුනො.
444. ඉදං මෙ ඤාතීනං හොතු සුඛිතා හොන්තු ඤාතයො, සමනන්තරානුද්දිට්ඨෙ පෙතා රථෙනමාගමුං.
445. අනුකම්පිතම්හ භද්දන්තෙ භත්තෙනච්ඡාදනෙන ච, ඝරෙන පානදානෙන යානදානෙන චූභයං: මුනිං කාරුණිකං ලොකෙ භන්තෙ වන්දිතුමාගතා’ති.
සානුවාසී පෙතවත්ථු දුතියං.
3. 3.
446. වෙළුරියත්ථම්භං රුචිරං පභස්සරං විමානමාරුය්හ අනෙකචිත්තං, තත්ථච්ඡසි දෙවි මහානුභාවෙ පථද්ධනී{1} පණ්ණරසෙව චන්දිමා{2}
447. වණ්ණොපි තෙ කනකස්ස සන්නිහො උත්තත්තරූපො භුසදස්සනීයො, පල්ලඞ්කසෙට්ඨෙ අතුලෙ නිසින්නා එකා තුවං නත්ථි ච තුය්හ සාමිකො.
448. ඉමා ච තෙ පොක්ඛරඤ්ඤො සමන්තා පහූතමාලා බහුපුණ්ඩරීකා, සුවණ්ණචුණ්ණෙහි සමන්තමොත්තා න තත්ථ පඞ්කො පණකො ච විජ්ජති.
449. හංසා චිමෙ දස්සනීයා මනොරමා උදකස්මිං අනුපරියන්ති සබ්බදා, සමය්ය වග්ගූපනදන්ති සබ්බෙ බින්දුස්සරා දුන්දුභිනංව ඝොසො.
450. දද්දල්ලමානා යසසා යසස්සිනී නාවාය ච ත්වං අවලම්බ තිට්ඨසි, ආළාරපම්හෙ හසිතෙ පියං වදෙ සබ්බඞ්ගකල්යාණි භුසං විරොචසි.
451. ඉදං විමානං විරජං සමෙ ඨිතං උය්යානවන්තං රතිනන්දිවඩ්ඪනං, ඉච්ඡාමහං නාරි අනොමදස්සනෙ තයා සහ නන්දනෙ ඉධ මොදිතුං.
452. කරොහි කම්මං ඉධ වෙදනීයං චිත්තඤ්ච තෙ ඉධ නිහිතං භවතු, කත්වාන කම්මං ඉධ වෙදනීයං එවං ලච්ඡසි කාමකාමිනිං,
453. සාධූති සො තස්සා පටිස්සුණිත්වා අකාසි කම්මං තහිං වෙදනියං, කත්වාන කම්මං තහිං වෙදනියං උප්පජ්ජි සො මාණවො තස්සා සහව්යත’න්ති.
රථකාරපෙතවත්ථු තතියං.
භාණවාරං දුතියං.
3. 4.
454. භුසානි එකො සාලිං පුනාපරො අයඤ්ච නාරී සකමංසලොහිතං, තුවඤ්ච ගූථං අසුචිං අකන්තිකං පරිභූඤ්ජසි කිස්ස අයං විපාකො
455. අයං පුරෙ මාතරං හිංසෙසි{1} අයං පන කූටවාණිජො, අයං මංසානි ඛාදිත්වා මුසාවාදෙන වඤ්චෙසි.{2}
456. අහං මනුස්සෙසු මනුස්සභූතා අගාරිනී සබ්බකුලස්ස ඉස්සරා, සන්තෙසු පරිගුය්හාමි මා ච කිඤ්චි ඉතො අදං.
457. මුසාවාදෙන ඡාදෙමි නත්ථි එතං මම ගෙහෙ සචෙ සන්තං නිගුය්හාමි ගූථො මෙ හොතු භොජනං.
458. තස්ස කම්මස්ස විපාකෙන මුසාවාදස්ස චූභයං, සුගන්ධසාලිනො භත්තං ගූථං මෙ පරිවත්තති.
459. අවඤ්ඣානි ච කම්මානි න හි කම්මං විනස්සති, දුග්ගන්ධං කිමිජං මීළහං භුඤ්ජාමි ච පිවාමි චා’ති.
භුසපෙතවත්ථු චතුත්ථං.
3. 5.
460. අච්ඡෙරරූපං සුගතස්ස ඤාණං සත්ථා යථා පුග්ගලං බ්යාකාසි. උස්සන්නපුඤ්ඤාපි භවන්ති හෙකෙ පරිත්තපුඤ්ඤාපි භවන්ති හෙකෙ.
461. අයං කුමාරො සීවථිකාය ඡඩ්ඩිතො අඞ්ගුට්ඨස්නෙහෙන යාපෙති රත්තිං, න යක්ඛභූතා න සිරිංසපා{1} වා විහෙඨයෙය්යුං කතපුඤ්ඤං කුමාරං.
462. සුනඛාපිමස්ස පලිහිංසු පාදෙ ධඞ්කා සිගාලා පරිවත්තයන්ති, ගබ්භාසයං පක්ඛිගණා හරන්ති කාකා පන අක්ඛිමලං හරන්ති.
463. න යිමස්ස රක්ඛං විදහිංසු කෙචි න ඔසධං සාසපධූපනංවා, නක්ඛත්තයොගම්පි න අග්ගහෙසුං න සබ්බධඤ්ඤානිපි ආකිරිංසු.
464. එතාදිසං උත්තමකිච්ඡපත්තං රත්තාභතං සීවථිකාය ඡඩ්ඩිතං, නොනීතපිණ්ඩං ව පවෙධමානං සසංසයං ජීවිතසාවසෙසං.
465. තමද්දසා දෙවමනුස්ස පූජිතො දිස්වා ච තං බ්යාකරි භූරිපඤ්ඤො, අයං කුමාරො නගරස්සිමස්ස අග්ගකුලීනො භවිස්සති භොගතො{2} ච.
466. කිස්ස වතං කිං පන බ්රහ්මචරියං කිස්ස සුචිණ්ණස්ස අයං විපාකො, එතාදිසං ව්යසනං පාපුණිත්වා තං තාදිසං පච්චනුභොස්සතිද්ධිං.
467. බුද්ධපමුඛස්ස භික්ඛුසඞ්ඝස්ස{3} පූජං අකාසි ජනතා උළාරං, තත්රස්ස චිත්තස්සහු{4} අඤ්ඤථත්තං වාචං අභාසි ඵරුසං අසබ්භං.
468. සො තං විතක්කං පටිවිනොදයිත්වා.{5} පීතිං පසාදං පටිලද්ධා පච්ඡා, තථාගතං තෙතවනෙ වසන්තං යාගුයා උපට්ඨාසි සත්තරත්තං.
469. තස්ස වතං තං පන බ්රහ්මචරියං තස්ස සුචිණ්ණස්ස අයං විපාකො, එතාදිසං බ්යසනං පාපුණිත්වා තං තාදිසං පච්චනුභොස්සතිද්ධිං.
470. ඨත්වාන සො වස්සසතං ඉධෙව සබ්බෙහි කාමෙහි සමඞ්ගිභූතො, කායස්ස භෙදා අභිසම්පරායං සහව්යතං ගච්ඡති වාසවස්සා’ති.
කුමාරපෙතවත්ථු පඤ්චමං.
3. 6.
471. නග්ගා දුබ්බණ්ණරූපාසි කිසා ධමනිසන්ථතා, උප්ඵාසුලිකෙ කිසිකෙ කානු ත්වං ඉධ තිට්ඨසි?
472. අහං භදන්තෙ පෙතීම්හි දුග්ගතා යමලොකිකා, පාපකම්මං කරිත්වාන පෙතලොකමිතො ගතා.
473. කින්නු කායෙන වාචාය මනසා දුක්කටං කතං, කිස්ස කම්මවිපාකෙන පෙතලොකං ඉතො ගතා.
474. අනාවටෙසු තිත්ථෙසු විචිනිං අද්ධමාසකං, සන්තෙසු දෙය්යධම්මෙසු දීපං නාකාසිමත්තනො.
475. නදිං උපෙමි තසිතා රිත්තකා පරිවත්තති, ඡායං උපෙමි උණ්හෙසු ආතපො පරිවත්තති.
476. අග්ගිවණ්ණො ච මෙ වාතො දහන්තො උපවායති: එතඤ්ච භන්තෙ අරහාමි අඤ්ඤඤ්ච පාපකං තතො.
477. ගන්ත්වාන හත්ථිනීපුරං වජ්ජෙසි මය්හ මාතරං, ධීතා ච තෙ මයා දිට්ඨා දුග්ගතා යමලොකිකා.
478. පාපකම්මං කරිත්වාන පෙතලොකං ඉතො ගතා, අත්ථි ච මෙ එත්ථ නික්ඛිත්තං අනක්ඛාතඤ්ච නං මයා.
479. චත්තාරි සතසහස්සානි පල්ලඞ්කස්ස ච හෙට්ඨතො, තතො මෙ දානං දදතු{1} තස්සා ච හොතු ජිවිකා.
480. දානං දත්වා ච මෙ මාතා දක්ඛිණං අනුදිස්සතු{2} තදාහං සුඛිතා හෙස්සං සබ්බකාමසමිද්ධිනී.
481. සාධූති සො පටිස්සුත්වා ගන්ත්වාන හත්ථිනිං පුරං අවොච තස්සා මාතරං, ධීතා ච තෙ මයා දිට්ඨා දුග්ගතා යමලොකිකා.
482. පාපකම්මං කරිත්වාන පෙතලොකං ඉතො ගතා, සා මං තත්ථ සමාදපෙසි වජ්ජෙසි මය්හ මාතරං.
483. ධීතා ච තෙ මයා දිට්ඨා දුග්ගතා යමලොකිකා, පාපකම්මං කරිත්වාන පෙතලොකං ඉතො ගතා.
484. අත්ථි ච මෙ එත්ථ නික්ඛිත්තං අනක්ඛාතඤ්ච තං මයා, චත්තාරි සතසහස්සානි පල්ලඞ්කස්ස ච හෙට්ඨතො: තතො මෙ දානං දදතු තස්සා ච හොතු ජීවිකා.
485. දානං දත්වාන මෙ මාතා දක්ඛිණං අනුදිස්සතු,{3} තදාහං සුඛිතා හෙස්සං සබ්බකාමසමිද්ධිනී.
486. තතො හි සා දානමදා දත්වා ච තස්සා දක්ඛිණනමාදිසි, පෙතී ච සුඛිතා ආසි සරීරං චාරුදස්සන’න්ති.
සෙරිණීපෙතවත්ථු ඡට්ඨං.
3. 7.
487. නරනාරිපුරක්ඛතො යුවා රජනීයෙහි කාමගුණෙහි සොභසි, දිවසං අනුභොසි කාරණං කිමකාසි පුරිමාය ජාතියා.
488. අහං රාජගහෙ රම්මෙ රමණීයෙ ගිරිබ්බජෙ, මිගලුද්දො පුරෙ ආසිං ලොහිතපාණී දාරුණො.
489. අවිරොධකරෙසු පාණීසු පුථුසත්තෙසු පදුට්ඨමානසො, විචරිං අතිදාරුණො තදා{4} පරහිංසාය රතො අසඤ්ඤතො.
490. තස්ස මෙ සහායො සුහදො{5} සද්ධො ආසි උපාසකො, සොපි මං අනුකම්පන්නො නිවාරෙසි පුනප්පුනං.
491. මාකාසි පාපකං කම්මං මා තාත දුග්ගතිං අගා, සචෙ ඉච්ඡසි පෙච්ච සුඛං විරම පාණවධා අසංයමා.
492. තස්සාහං වචනං සුත්වා සුඛකාමිස්ස හිතානුකම්පිනො, නාකාසිං සකලානුසාසනිං චිරපාපාභිරතො අබුද්ධිමා.
493. සො මං පුන භූරිසුමෙධසො අනුකම්පාය සංයමෙ නිවෙසයී, සචෙ දිවා හනසි පාණිනො අථ තෙ රත්තිං භවතු සඤ්ඤමො.
494. ස්වාහං දිවා හනිත්ව{1} පාණිනො විරතො රත්තිමහොසිං සඤ්ඤතො, රත්තාහං පරිවාරෙමි දිවා ඛජ්ජාමි දුග්ගතො.
495. තස්ස කම්මස්ස කුසලස්ස අනුභොමි රත්තිං අමානුසිං, දිවා පටිහතාව කුක්කුරා උපධාවන්ති සමන්තා ඛාදිතුං.
496. යෙ ච තෙ සත්තානුයොගිනො ධුවං පයුත්තා සුගතස්ස සාසනෙ, මඤ්ඤාමි තෙ අමතමෙව කෙවලං අධිගච්ඡන්ති පදං අසඞ්ඛත’න්ති.
මිගලුද්දකපෙතවත්ථු සත්තමං.
3. 8.
497. කූටාගාරෙ ච පාසාදෙ පල්ලඞ්කෙ ගොණකත්ථකෙ, පඤ්චඞ්ගිකෙන තුරියෙන රමසි සුප්පවාදිතෙ,
498. තතො රත්යා ව්යවසානෙ සුරියස්සුග්ගමනම්පති, අපවිද්ධො සුසානස්මිං බහුදුක්ඛං නිගච්ඡසි.
499. කින්නු කායෙන වාචාය මනසා දුක්කටං කතං, කිස්ස කම්මවිපාකෙන ඉදං දුක්ඛං නිගච්ඡසි.
500. අහං රාජගහෙ රම්මෙ රමණීයෙ ගිරිබ්බජෙ, මිගලුද්දො පුරෙ ආසිං ලුද්දො චාසිමසඤ්ඤතො.
501. තස්ස මෙ සහායො සුහදො සද්ධො ආසි උපාසකො, තස්ස කුලූපගො භික්ඛු ආසි ගොතමසාවකො.
502. සොපි මං අනුකම්පන්නො නිවාරෙසි පුනප්පුනං, මාකාසි පාපකං කම්මං මා තාත දුග්ගතිං අගා.
503. සචෙ ඉච්ඡසි පෙච්ච සුඛං විරම පාණවධා අසංයමා. තස්සාහං වචනං සුත්වා සුඛකාමස්ස හිතානුකම්පිනො.
504. නාකාසිං සකලානුසාසනිං චිරපාපාභිරතො අබුද්ධිමා, සො මං පුන භූරිසුමෙධසො අනුකම්පාය සංයමෙ නිවෙසයී.
505. සචෙ දිවා හනසි පාණිනො අථ තෙ රත්තිං භවතු සංයමො. ස්වාහං දිවා හනිත්ව පාණිනො විරතො රත්තිමහොසිං සංයතො.
506. රත්තාහං පරිචාරෙමි දිවා ඛජ්ජාමි දුග්ගතො, තස්ස කම්මස්ස කුසලස්ස අනුභොමි රත්තිං අමානුසිං: දිවා පටිහතාව කුක්කුරා උපධාවන්ති සමන්තා ඛාදිතුං.
507. යෙ ච තෙ සතතානුයොගිනො ධුවයුත්තා සුගතස්ස සාසනෙ, මඤ්ඤාමි තෙ අමතමෙව කෙවලං අධිගච්ඡන්ති පදං අසඞ්ඛත’න්ති.
දුතිය මිගලුද්දකපෙතවත්ථු අට්ඨමං.
3. 9.
508. මාලී කිරිටී කෙයූරි ගත්තා තෙ චන්දනුස්සදා, පසන්නමුඛවණ්ණොසි සුරියවණ්ණොව සොභසි.
509. අමානුසා පාරිසජ්ජා යෙ තෙමෙ පරිචාරකා, දසකඤ්ඤාසහස්සානි යා තෙමා පරිචාරකා.
510. තා කම්බුකෙයූර ධරා කඤ්චනාවෙලභූසිතා, මහානුභාවොසි තුවං ලොමහංසනරූපවා: පිට්ඨිමංසානි අත්තනො සාමං උක්කඩ්ඪ ඛාදසි.
511. කින්නු කායෙන වාචාය මනසා දුක්කටං කතං, කිස්ස කම්මවිපාකෙන පිට්ඨිමංසානි අත්තනො සාමං උක්කඩ්ඪ ඛාදසි.
512. අත්තනොහං අනත්ථාය ජීවලොකෙ අචාරිසං, පෙසුඤ්ඤාමුසාවාදෙන නිකතිවඤ්චනාය ච.
513. තත්ථාහං පරිසං ගන්ත්වා සච්චකාලෙ උපට්ඨිතෙ, අත්ථං ධම්මං නිරංකත්වා{1} අධම්මමනුවත්තිසං.
514. එවං සො ඛාදතත්තානං යො හොති පිට්ඨිමංසිකො, යථාහං අජ්ජ ඛාදාමි පිට්ඨිමංසානි අත්තනො,
515. තයිදං තයා නාරද සාමං දිට්ඨං අනුකම්පකා යෙ කුසලා වදෙය්යුං, මා පෙසුනං මා ච මුසා අභාණි මා ඛොසි පිට්ඨිමංසිකො තුව’න්ති.
කූටවිනිච්ඡයිකපෙතවත්ථු නවමං.
3. 10.
516. අන්තලික්ඛස්මිං තිට්ඨන්තො දුග්ගන්ධො පූති වායසි, මුඛඤ්ච තෙ කිමයො පුතිගන්ධංඛාදන්ති කිං කම්මමකාසි පුබ්බෙ
517. තතො සත්ථං ගහෙත්වාන ඔක්කනතන්ති පුනප්පුනං, ඛරෙන පරිප්ඵොසිත්වා ඔක්කනතන්ති පුනප්පුනං.