347. සත්ත තුවං වස්සසතා ඉධාගතා ජිණ්ණා ච වුද්ධා ච තහිං භවිස්සසි, සබ්බෙව තෙ කාලකතා ච ඤාතකා කිං තත්ථ ගන්ත්වාන ඉතො කරිස්සසි.
348. සත්තෙව වස්සානි ඉධාගතාය මෙ දිබ්බඤ්ච සුඛඤ්ච සමප්පිතාය, සාහං ගන්ත්වා පුනරෙව මානුසං කාහාමි පුඤ්ඤානි නයය්යපුත්ත මන්ති.
349. සො තං ගහෙත්වාන පසය්හ බාහායං පච්චානයිත්වාන ථෙරිං සුදුබ්බලං, වදෙසි අඤ්ඤම්පි ජනං ඉධාගතං කරොථ පුඤ්ඤානි සුඛූපලබ්භති.
350. දිට්ඨා මහා අකතෙන සාධුනා පෙතා විහඤ්ඤන්ති තථෙව මානුසා, කම්මඤ්ච කත්වා සුඛවෙදනීයං දෙවා මනුස්සා ච{2} සුඛෙ ඨිතා{3} පජාති.
සුත්තපෙතවත්ථු එකාදසමං.
2. 12.
351. සොවණ්ණ සොපානඵලකා සොවණ්ණ{4} වාලුකසන්ථතා තත්ථ සොගන්ධියා වග්ගූ සුචිගන්ධා මනොරමා.
352. නානා රුක්ඛෙහි සඤ්ඡන්නා නානාගන්ධසමෙරිතා, නානාපදුමසඤ්ඡන්නා පුණ්ඩරීකසමොතතා.{5}
353. සුරභී සම්පවායන්තී මනුඤ්ඤා මාලුතෙරිතා, හංසා කොඤ්චාභිරුදා චක්කවාකාභිකූජිතා.
354. නානා දිජගණාකිණ්ණා නානාඝරගණායුතා, නානාඵලධරා රුක්ඛා නානාපුප්ඵධරා වනා
355. න මනුස්සෙසු ඊදිසං නගරං යාදිසං ඉදං පාසාදා බහුකා තුය්හං සොවණ්ණරූපියාමයා
356. දද්දල්ලමානා ආභන්ති{1} සමන්තා චතුරො දිසා, පඤ්චදාසිසතා තුය්හං යා තෙමා{2} පරිචාරිකා.
357. තා කම්බුකෙයූරධරා{3} කඤ්චනාවෙළ{4} භූසිතා, පල්ලඞ්කා බහුකා තුය්හං සොවණ්ණරූපියාමයා.
358. කාදලිමිගසඤ්ඡන්නා සජ්ජා ගොනකසන්ථතා, යත්ථ ත්වං වාසූපගතා සබ්බකාමසමිද්ධිනී
359. සම්පත්තායඩ්ඪරත්තාය තතො උට්ඨාය ගච්ඡසි, උය්යානභූමිං ගන්ත්වාන පොක්ඛරඤ්ඤා සමන්තතො.
360. තස්සා තීරෙ තුවං ඨාසි හරිතෙ සද්දලෙ සුභෙ, තතො තෙ කණ්ණමුණ්ඩො සුනඛො අඞ්ගමඞ්ගානි ඛාදති.
361. යදා ච ඛායිතා ආසි අට්ඨිසඞ්ඛලිකා කතා, ඔගාහසි පොක්ඛරණිං හොති කායො යථා පුරෙ.
362. තතො ත්වං අඞ්ගපච්චඞ්ගී සුචාරුපියදස්සනා, වත්ථෙන පාරුපිත්වාන ආයාසි මම සන්තිකං.
363. කින්නු කායෙන වාචාය මනසා දුක්කටං කතං, කිස්ස කම්මවිපාකෙන කණ්ණමුණ්ඩො ච සුනඛො. අඞ්ගමඞ්ගානි ඛාදති.
364. කිම්බිලායං ගහපති සද්ධො ආසි උපාසකො, තස්සාහං භරියා ආසිං දුස්සීලා අතිචාරිනී.
365. සො මං අතිචරමානාය සාමිකො එතදබ්රවී, නෙතං ඡන්නං නප්පතිරූපං යං ත්වං අතිචරාසි මං.
366. සාහං ඝොරඤ්ච සපථං මුසාවාදමභාසිසං, නාහන්තං අතිචරාමි කායෙන උද චෙතසා.
367. ස්වාහං තං අතිචරාමි කායෙන උද චෙතසා, අයං කණ්ණමුණ්ඩො{5} සුනඛො අඞ්ගමඞ්ගානි ඛාදතු.
368. තස්ස කම්මස්ස විපාකං මුසාවාදස්ස චූභයං, සත්තවස්සසතානි ච{1} අනුභූතං යතො හි මෙ, කණ්ණමුණ්ඩො ච සුනඛො අඞ්ගමඞ්ගානි ඛාදති.
369. ත්වඤ්ච දෙව බහුකාරො අත්ථාය මෙ ඉධාගතො, සුමුත්තාහං කණ්ඩමුණ්ඩස්ස අසොකා අකුතොභයා.
370. තාහං දෙව නමස්සාමි යාචාමි පඤ්ජලීකතා, භුඤ්ජ අමානුසෙ කාමෙ රම දෙව මයා සහ.
371. භුත්වා අමානුසෙ කාමෙ{2} රමිතොම්හි තයා සහ, තාහං සුභගෙ යාචාමි ඛිප්පං පටිනයාහි ම’න්ති.
කණ්ණමුණ්ඩපෙතවත්ථු ද්වාදසමං.
2. 13.
372. අහු රාජා බ්රහ්මදත්තො පඤ්චාලානං රථෙසභො, අහොරත්තානමච්චයා රාජා කාලඞ්කරී තදා.{3}
373. තස්ස ආළාහනං ගන්ත්වා භරියා{4} කන්දති උබ්බරී, බ්රහ්මදත්තං අපස්සන්තී බ්රහ්මදත්තාති කන්දති.
374. ඉසී{5}ච තත්ථ ආගඤ්ඡි සම්පන්නචරණො මුනි: සො ච තත්ථ අපුච්ඡිත්ථ යෙ තත්ථ සුසමාගතා.
375. කස්ස චිදං ආළාහනං නානාගන්ධසමෙරිතං, කස්සායං කන්දති භරියා ඉතො දූරගතං පතිං.
376. බ්රහ්මදත්තං අපස්සන්තී බ්රහ්මදත්තාති කන්දති, තෙ ච තත්ථ වියාකංසු යෙ තත්ථ සුසමාගතා.
377. බ්රහ්මදත්තස්ස භද්දන්තෙ බ්රහ්මදත්තස්ස මාරිස, තස්ස ඉදං ආළාහනං නානාගන්ධසමෙරිතං.
378. තස්සායං කන්දති භරියා ඉතො දූරගතං පතිං, බ්රහ්මදත්තං අපස්සන්තී බ්රහ්මදත්තාති කන්දති.
379. ඡළාසීති සහස්සානි බ්රහ්මදත්තසනාමකා,{6} ඉමස්මිං ආළාහනෙ දඩ්ඪා තෙසං කං අනුසොචසි.
380. යො රාජා චූළනීපුත්තො පඤ්චාලානං රථෙසභො, තං භන්තෙ අනුසොචාමි භත්තාරං සබ්බකාමදං.
381. සබ්බෙවහෙසුං රාජානො බ්රහ්මදත්තසනාමකා, සබ්බෙව චූළනීපුත්තා පඤ්චාලානං රථෙසභා.
382. සබ්බෙසං අනුපුබ්බෙන මහෙසිත්තමකාරයි, කස්මා පුරිමකෙ හිත්වා පච්ඡිමං අනුසොචසි.
383. ආතුමෙ ඉත්ථිභූතාය දීඝරත්තාය මාරිස, යස්සා මෙ ඉත්ථිභූතාය සංසාරෙ බහූ භාසසි.
384. අහූ ඉත්ථි අහූ පුරිසො පසුයොනිම්පි ආගමා, එවමෙතං අතීතානං පරියන්තො න දිස්සති.
385. ආදිත්තං වත මං සන්තං ඝතසිත්තංව පාවකං, වාරිනා විය ඔසිඤ්චං සබ්බං නිබ්බාපයෙ දරං.
386. අබ්බූළ්හං වත මෙ සල්ලං සොකං හදයනිස්සිතං, යො මෙ සොකපරෙතාය පතිසොකං අපානුදි.
387. සාහං අබ්බූළ්හසල්ලොස්මි සීතිභූතොස්මි නිබ්බුතා, න සොචාමි න රොදාමි තව සුත්වා මහාමුනි.
388. තස්ස තං වචනං සුත්වා සමණස්ස සුභාසිතං, පත්තචීවරමාදාය පබ්බජි අනගාරියං.
389. සා ච පබ්බජිතා සන්තා අගාරස්මානගාරියං, මෙත්තං චිත්තං අභාවෙසි බ්රහ්මලොකූපපත්තියා.
390. ගාමා ගාමං විචරන්ති නිගමෙ රාජධානියො, උරුවෙලා නාම සො ගාමො යත්ථ කාලමකුබ්බථ.
391. මෙත්තචිත්තං ආභාවෙත්වා බ්රහ්මලොකූපපත්තියා, ඉත්ථිචිත්තං විරාජෙත්වා බ්රහ්මලොකූපගා අහූ’ති.
උබ්බරීපෙතවත්ථු තෙරසමං.
උබ්බරීවග්ගො දුතියො.
තස්සුද්දානං:
පණ්ඩුමාතා ච පිතා ච නන්දා කුණ්ඩලීනෙඝටො. ද්වෙ සෙට්ඨි තුණ්ණවායො ච: විහාරසුත්ත සොපාණ උබ්බරී’ති.
3. චූළවග්ගො
3. 1.
392. අභිජ්ජමානෙ වාරිම්හි ගඞ්ගාය ඉධ ගච්ඡසි, නග්ගො පුබ්බද්ධපෙතොව මාලාධාරී{1} අලඞ්කතො. කුහිං ගමිස්සසි පෙත කත්ථ වාසො භවිස්සතී’ති.
393. චුන්දත්ථිකං{2} ගමිස්සාමි පෙතො සො ඉති භාසති අන්තරෙ වාසභගාමං බාරාණසියා{3} ච සන්තිකෙ.
394. තඤ්ච දිස්වා මහාමත්තො කොලියො ඉති විස්සුතො, සත්තුං භත්තඤ්ච පෙතස්ස පීතකඤ්ච යුගං අදා.
395. නාවාය තිට්ඨමානාය කප්පකස්ස අදාපයී, කප්පකස්ස පදින්නම්හි ඨානෙ පෙතස්සුදිස්සථ.{4}
396. තතො සුවත්ථවසනො මාලාධාරී අලඞ්කතො, ඨානෙ ඨිතස්ස පෙතස්ස දක්ඛිණා උපකප්පථ, තස්මා දජ්ජෙථ පෙතානං අනුකම්පාය පුනප්පුනං.
397. සාතුන්න වසනා එකෙ අඤ්ඤෙ කෙසනිවාසනා. පෙතා භත්තාය ගච්ඡන්ති පක්කමන්ති දිසොදිසං.
398. දූරෙ එකෙ පධාවිත්වා අලද්ධා විනිවත්තරෙ, ඡාතා පමුච්ඡිතා භන්තා භූමියං පටිසුම්භිතා.
399. කෙචි තත්ථ පපතිත්වා භූමියං පටිසුම්භිතා, පුබ්බෙ අකතකල්යාණා අග්ගිදඩ්ඪාව ආතපෙ.
400. මයං පුබ්බෙ පාපධම්මා ඝරණී කුලමාතරො, සන්තෙසු දෙය්යධම්මෙසු දීපං නාකම්හ අත්තනො.
401. පහූතං අන්තපානම්පි අපිස්සු අවකිරීයති, සම්මග්ගතෙ පබ්බජිතෙ න ච කිඤ්චි අදම්හසෙ
402. අකම්මකාමා අලසා සාදුකාමා මහග්ඝසා, ආලොපපිණ්ඩදාතාරො පටිග්ගහෙ පරිභාසිම්හසෙ.
403. තෙ ඝරා තා ච දාසියො තානෙවාභරණානි නො, තෙ අඤ්ඤෙ පරිචාරෙන්ති මයං දුක්ඛස්ස භාගිනො.
404. වෙණී වා අවඤ්ඤා හොන්ති රථකාරී ච දුබ්භිකා, චණ්ඩාලී කපණා හොන්ති නහාපිකා{1} ච පුනප්පුනං.
405. යානි යානි නිහීනානි කුලානි කපණානි ච, තෙසු තෙසෙව ව ජායන්ති එසා මච්ඡරිනො ගති.
406. පුබ්බෙව{2} කතකල්යාණා දායකා වීතමච්ඡරා, සග්ගං තෙ පරිපූරෙන්ති ඔභාසෙන්ති ච නන්දනං.
407. වෙජයන්තෙ ච පාසාදෙ රමිත්වා කාමකාමිනො. උච්චාකුලෙසු ජායන්ති සභොගෙසු තතො චුතා.
408. කූටාගාරෙ ච පාසාදෙ පල්ලඞ්කෙ ගොණකත්ථතෙ, වීජිතඞ්ගා{3} මොරහත්ථෙහි කුලෙ ජාතා යසස්සිනො.
409. අඞ්කතො අඞ්කං ගච්ඡන්ති මාලාධාරී අලඞ්කතා, ධාතියො උපතිට්ඨන්ති සායං පාතං සුඛෙසිනො.
410. නයිදං අකතපුඤ්ඤානං කතපුඤ්ඤානමෙවිදං, අසොකං නන්දනං රම්මං තිදසානං මහාවනං.
411. සුඛං අකතපුඤ්ඤානං ඉධ නත්ථි පරත්ථ ච, සුඛඤ්ච කතපුඤ්ඤානං ඉධ චෙව පරත්ථ ච,
412. තෙසං සහව්යකාමානං කත්තබ්බං කුසලං බහුං, කතපුඤ්ඤා හි මොදන්ති සග්ගෙ භොගසමඞ්ගිනො’ති.
අභිජ්ජමානපෙතවත්ථු පඨමං.
3. 2.
413. කුණ්ඩිනගරියො{4} ථෙරො සානුවාසී නිවාසිනො, පොට්ඨපාදොති නාමෙන සමණො භාවිතින්ද්රියො.
414. තස්ස මාතා පිතා භාතා දුග්ගතා යමලොකිකා, පාපකම්මං කරිත්වාන පෙතලොකං ඉතො ගතා.
415. තෙ දුග්ගතා සූචිකට්ටා කිලන්තා නග්ගිනො කිසා, උත්තසන්තා මහාතාසා න දස්සෙන්ති කුරූරිනො.
416. තස්ස භාතා විතරිත්වා නග්ගො එකපථෙකකො, චතුකුණ්ඩිකො භවිත්වාන ථෙරස්ස දස්සයී තුමං.
417. ථෙරො චාමනසී කත්වා තුණ්හීභූතො අපක්කමි, සො ච විඤ්ඤාපයී ථෙරං භාතා පෙතගතො අහං.
418. මාතා පිතා ච තෙ භන්තෙ දුග්ගතා යමලොකිකා, පාපකම්මං කරිත්වාන පෙතලොකං ඉතො ගතා.
419. තෙ දුග්ගතා සූචිකට්ටා කිලන්තා නග්ගිනො කිසා, උත්තසන්තා{1} මහාතාසා{2} න දස්සෙන්ති කුරූරිනො.
420. අනුකම්පස්සු කාරුණිකො දත්වා අන්වාදිසාහි නො, තව දින්නෙන දානෙන යාපෙස්සන්ති කුරූරිනො.
421. ථෙරො චරිත්වා පිණ්ඩාය භික්ඛු අඤ්ඤෙ ව ද්වාදස, එකජ්ඣං සන්නිපතිංසු භත්තවිස්සග්ගකාරණා.
422. ථෙරො සබ්බෙව තෙ ආහ යථා ලද්ධං දදාථ මෙ, සඞ්ඝභත්තං කරිස්සාමි අනුකම්පාය ඤාතිනං.
423. නිය්යාතයිංසු ථෙරස්ස ථෙරො සඞ්ඝං නිමන්තයී, දත්වා අන්වාදිසි ථෙරො මාතු පිතු ච භාතුනො.
424. ඉදං මෙ ඤාතීනං හොතු සුඛිතා හොන්තු ඤාතයො, සමනන්තරානුද්දිට්ඨෙ භොජනං උදපජ්ජථ.
425. සුචිං පණීතං සම්පන්නං අනෙකරසබ්යඤ්ජනං, තතො උද්දිසයී භාතා වණ්ණවා බලවා සුඛී.
426. පහූතං භොජනං භන්තෙ පස්ස නග්ගාම්භසෙ මයං, තථා භන්තෙ පරක්කම යථා වත්ථං ලභාමසෙ.
427. ථෙරො සඞ්කාරකූටම්හා උච්චිනිත්වානනන්තකෙ, පිලොතිකං පටං කත්වා සඞ්ඝෙ චාතුද්දිසෙ අදා.
428. දත්වා අන්වාදිසි ථෙරො මාතු පිතු ච භාතුනො, ඉදං මෙ ඤාතීනං හොතු සුඛිතා හොන්තු ඤාතයො.
429. සමන්තරානුද්දිට්ඨෙ වත්ථානි උදපජ්ජිංසු{1}, තතො සුවත්ථවසනො ථෙරස්ස දස්සයීතු මං.
430. යාවතා නන්දරාජස්ස විජිතස්මිං පටිච්ඡදා, තතො බහුතරා භන්තෙ වත්ථානච්ඡාදනානි නො.
431. කොසෙය්යකම්බලීයානි ඛොමකප්පාසිකානි ච, විපුලා ච මහග්ඝා ච තෙපාකාසෙව ලම්බරෙ.
432. තෙ මයං පරිදහාම යං යං හි මනසො පියං, තථා භන්තෙ පරක්කම යථා ගෙහං{2} ලභාමසෙ.
433. ථෙරො පණ්ණකුටිං කත්වා සඞ්ඝෙ චාතුද්දිසෙ අදා, දත්වා අන්වාදිසි ථෙරො මාතු පිතු ච භාතුනො.
434. ඉදං මෙ ඤාතීනං හොතු සුඛිතා හොන්තු ඤාතයො, සමනන්තරානුද්දිට්ඨෙ ඝරානි උදපජ්ජිසුං.