254. බුද්ධඤ්ච සඞ්ඝං පරිවිසියාන රාජ අන්නෙන පානෙනපි චීවරෙන. තං දක්ඛිණං ආදිස මෙ හිතාය එවං අහං චිරතරං පීණිතො සියා.
255. තතො ච රාජා නිපතිත්වා තාවදෙ දානං සහත්ථා අතුලං දදිත්වා සඞ්ඝෙ, ආරොචයී පකතිං තථාගතස්ස තස්ස ච පෙතස්ස දක්ඛිණං ආදිසිත්ථ.
256. සො පූජිතො අතිවිය සොභමානො පාතුරහොසි පුරතො ජනාධිපස්ස, යක්ඛොහමස්මි පරිමිද්ධිප්පත්තො න මය්හමිද්ධිසමසදිසා මනුස්සා.{1}
257. පස්සානුභාවං අපරිමිතං මමෙදං තයානුද්දිට්ඨං අතුලං දදිත්වා සඞ්ඝෙ,{2} සන්තප්පිතො සතතං සදා බහූහි යාම්යහං සුඛිතො මනුස්සදෙවා’ති.
චුල්ලසෙට්ඨිපෙතවත්ථු අට්ඨමං.
භාණවාරං පඨමං.
2. 9.
258. යස්ස අත්ථාය ගච්ඡාම කම්බොජං ධනහාරාකා, අයං කාමදදො යක්ඛො ඉමං යක්ඛං නයාමසෙ.
259. ඉමං යක්ඛං ගහෙත්වාන සාධුකෙන පසය්හ වා, යානං ආරොපයිත්වාන ඛිප්පං ගච්ඡාම ද්වාරකන්ති.
260. යස්ස රුක්ඛස්ස ඡායාය නිසීදෙය්ය සයෙය්ය වා, න තස්ස සාඛං භඤ්ජෙය්ය මිත්තදුබ්භො හි පාපකො.
261. යස්ස රුක්ඛස්ස ඡායාය නිසීදෙය්ය සයෙය්ය වා, ඛන්ධම්පි තස්ස ඡින්දෙය්ය අත්ථො චෙ තාදිසො සියා’ති.
262. යස්ස රුක්ඛස්ස ඡායාය නිසීදෙය්ය සයෙය්යවා, න තස්ස පත්තං භින්දෙය්ය මිත්තදුබ්භො හි පාපකො’ති.
263. යස්ස රුක්ඛස්ස ඡායාය නිසීදෙය්ය සයෙය්ය වා, සමූලම්පි තං අබ්බූහෙය්ය අත්ථො චෙ තාදිසො සියා’ති.
264. යස්සෙකරත්තිම්පි ඝරෙ වසෙය්ය යත්ථන්නපානං පුරිසො ලභෙථ, න තස්ස පාපං මනසාපි චින්තයෙ කතඤ්ඤුතා සප්පුරිසෙහි වණ්ණිතා.
265. යස්සෙකරත්තිම්පි ඝරෙ වසෙය්ය අන්නෙන පානෙන උපට්ඨිතො සියා, න තස්ස පාපං මනසාපි චින්තයෙ{1} අදූබ්භපාණී දහතෙ මිත්තදුබ්භිං.
266. යො පුබ්බෙ කතකල්යාණො පච්ඡා පාපෙන හිංසති, අල්ලපාණිහතො පොසො න සො භද්රානි පස්සතී’ති
267. යො අප්පදුට්ඨස්ස නරස්ස දුස්සති සුද්ධස්ස පොසස්ස අනඞ්ගණස්ස, තමෙව බාලං පච්චෙති පාපං සුඛුමො රජො පටිවාතංව ඛිත්තො’ති.
268. නාහං දෙවෙන වා මනුස්සෙන වා ඉස්සරියෙන වාහං න සුප්පසය්හො, යක්ඛොහමස්මි පරමිද්ධිපත්තො දූරඞ්ගමො වණ්ණබලූපපන්නො’ති.
269. පාණි තෙ සබ්බසොවණ්ණො පඤ්චධාරො මධුස්සවො, නානා රසා පග්ඝරන්ති මඤ්ඤෙහං තං පුරින්දදන්ති.
270. නම්හි දෙවො න ගන්ධබ්බො නපි සක්කො පුරින්දදො පෙතං මං අඞ්කුර ජානාහි භෙරුවම්හා ඉධාගතන්ති.
271. කිංසීලො කිංසමාචාරො භෙරුවස්මිං පුරෙ තුවං, කෙන තෙ බ්රහ්මචරියෙන පුඤ්ඤං පාණිම්හි ඉජ්ඣතී’ති
272. තුන්නවායො පුරෙ ආසිං භෙරුවස්මිං තදා අහං, සුකිච්ඡවුත්ති කපණො න මෙ විජ්ජති දාතවෙ.
273. ආවෙසනඤ්ච{1} මෙ ආසි අසය්හස්ස උපන්තිකෙ, සද්ධස්ස දානපතිනො කතපුඤ්ඤස්ස ලජ්ජිනො.
274. තත්ථ යාචනකා යන්ති නානාගොත්තා වණිබ්බකා, තෙ ච මං තත්ථ පුච්ඡන්ති අසය්හස්ස නිවෙසනං.
275. කත්ථ ගච්ඡාම භද්දං වො කත්ථ දානං පදීයතෙ, තෙසාහං පුට්ඨො වක්ඛාමි අසය්හස්ස නිවෙසනං.
276. පග්ගය්හ දක්ඛිණං බාහුං එත්ථ ගච්ඡථ භද්දං වො, එත්ථ දානං පදීයතෙ අසය්හස්ස නිවෙසනෙ.
277. තෙන පාණි කාමදදො තෙන පාණි මධුස්සවො, තෙන මෙ බ්රහ්මචරියෙන පුඤ්ඤං පාණිම්හි ඉජ්ඣති’ති.
278. න කිර ත්වං අදා දානං සකපාණිහි කස්සචි, පරස්ස දානං අනුමොදමානො පාණිං පග්ගය්හ පාවදි.
279. තෙන පාණි කාමදදො තෙන පාණි මධුස්සවො, තෙන තෙ බ්රහ්මචරියෙන පුඤ්ඤං පාණිම්හි ඉජ්ඣති.
280. යො සො දානමදා භන්තෙ පසන්නො සකපාණිහි, සො හිත්වා මානුසං දෙහං කින්නු සො දිසතං ගතො’ති
281. නාහං පජානාමි අසය්හසාහිනො අඞ්ගීරසස්ස ගතිං ආගතිං වා සුතඤ්ච මෙ වෙස්සවණස්ස සන්තිකෙ සක්කස්ස සහව්යතං ගතො අසය්හො’ති.
282. අලමෙව කාතුං කල්යාණං දානං දාතුං යථාරහං, පාණිං කාමදදං දිස්වා කො පුඤ්ඤං න කරිස්සති.
283. සො හි නූන ඉතො ගන්ත්වා අනුප්පත්වාන ද්වාරකං, දානං පට්ඨාපයිස්සාමි යං මමස්ස සුඛාවහං.
284. දස්සාමන්නඤ්ච පානඤ්ච වත්ථසෙනාසනානි ච, පපඤ්ච උදපානඤ්ච දුග්ගෙ සඞ්කමනානි ච.
285. කෙන තෙ අඞ්ගුලී කුණ්ඨා මුඛඤ්ච කුණ්ඩලීකතං, අක්ඛිනී ච පග්ඝරන්ති කිං පාපං පකතං තයා’ති.
286. අඞ්ගීරසස්ස ගහපතිනො සද්ධස්ස ඝරමෙසිනො, තස්සාහං දානවිස්සග්ගෙ දානෙ අධිකතො අහුං.
287. තත්ථ යාචනකෙ දිස්වා ආගතෙ භොජනත්ථිකෙ, එකමන්තං අපක්කම්ම අකාසිං කුණ්ඩලීමුඛං.
288. තෙන මෙ අඞ්ගුලී කුණ්ඨා මුඛඤ්ච කුණ්ඩලීකතං, අක්ඛිනී ච පග්ඝරන්ති තං පාපං පකතං මයා’ති.
289. ධම්මෙන තෙ කාපුරිස මුඛඤ්ච කුණ්ඩලීකතං, අක්ඛීනි ච පග්ඝරන්ති, යං ත්වං පරස්ස දානස්ස අකාසි කුණ්ඩලීමුඛන්ති.
290. කථං හි දානං දදමානො කරෙය්ය පරපත්තියං, අන්නං පානං ඛාදනීයං වත්ථසෙනාසනානි චා’ති.
291. සො හි නූන ඉතො ගන්ත්වා අනුප්පත්වාන ද්වාරකං, දානං පට්ඨාපයිස්සාමි යං මමස්ස සුඛාවහං.
292. දස්සාමනනඤ්ච පානඤ්ච වත්ථසෙනාසනානි ච, පපඤ්ච උදපානඤ්ච දුග්ගෙ සඞ්කමනානි චා’ති.
293. තතො හි සො නිවත්තිත්වා අනුප්පත්වාන ද්වාරකං, දානං පට්ඨාපයි අඞ්කුරො යං තුමස්ස සුඛාවහං.
294. අදා අන්නඤ්ච පානඤ්ච වත්ථසෙනාසනානි ච, පපඤ්ච උදපානඤ්ච විප්පසන්නෙන චෙතසා.
295. කො ඡාතො කො ච තසිතො කො වත්ථං පරිවස්සති, කස්ස සන්තානි යොග්ගානි ඉතො යොජෙන්තු වාහනං.
296. කො ඡත්තිච්ඡති ගන්ධඤ්ච කො මාලං කො උපාහනං, ඉතිස්සු තත්ථ ඝොසෙන්ති කප්පකා සූදමාගධා: සදා සායඤ්ච පාතො ච අඞ්කුරස්ස නිවෙසනෙ’ති.
297. සුඛං සුපති අඞ්කුරො ඉති ජානාති මං ජනො, දුක්ඛං සුපාමි සින්ධක යං න පස්සාමි යාචකෙ.
298. සුඛං සුපති අඞ්කුරො ඉති ජානාති මං ජනො, දුක්ඛං සුපාමි සින්ධක අප්පකෙසු වණිබ්බකෙ.
299. සක්කො චෙ තෙ වරං දජ්ජා තාවතිංසානමිස්සරො, කිස්ස සබ්බස්ස ලොකස්ස වරමානො වරං වරෙ’ති.
300. සක්කො චෙ මෙ වරං දජ්ජා තාවතිංසානමිස්සරො, කාලුට්ඨිතස්ස මෙ සතො සුරියස්සුග්ගමනං පති. දිබ්බා භක්ඛා පාතූභවෙය්යුං සීලවන්තො ච යාචකා,
301. දදතො මෙ න ඛීයෙථ දත්වා නානුතපෙය්යහං, දදං චිත්තං පසාදෙය්යං එවං සක්කං{1} වරං වරෙ’ති.
302. න සබ්බවිත්තානි පරෙ පවෙච්ඡෙ දදෙය්ය දානඤ්ච ධනඤ්ච රක්ඛෙ, තස්මා හි දානා ධනමෙව සෙය්යො අතිප්පදානෙන කුලා න හොන්ති.
303. අදානමතිදානඤ්ච නප්පසංසන්ති පණ්ඩිතා තස්මා හි දානා ධනමෙව සෙය්යො, සමෙන වත්තෙය්ය සධීරධම්මො’ති.
304. අහො වතාරෙ අහමෙව දජ්ජං සන්තො හි මං සප්පුරිසා භජෙය්යුං, මෙඝොව නින්නානභිපූරයන්තො{1} සන්තප්පයෙ සබ්බවණිබ්බකානං.
305. යස්ස යාචනකෙ දිස්වා මුඛවණ්ණො පසීදති, දත්වා අත්තමනො හොති තං ඝරං වසතො සුඛං.
306. යස්ස යාචනකෙ දිස්වා මුඛවණ්ණො පසීදති, දත්වා අත්තමනො හොති එසා යඤ්ඤස්ස{2} සම්පදා.
307. පුබ්බෙව දානා සුමනො දදං චිත්තං පසාදයෙ, දත්වා චත්තමනො හොති එසා යඤ්ඤස්ස සම්පදා’ති.
308. සට්ඨිවාහසහස්සානි අඞ්කුරස්ස නිවෙසනෙ, භොජනං දීයතෙ නිච්චං යඤ්ඤපෙක්ඛස්ස ජන්තුනො.
309. තිසහස්සානි සූදා හි ආමුත්තමණිකුණ්ඩලා, අඞ්කුරං උපජීවන්ති දානෙ යඤ්ඤස්ස ව්යාවටා.
310. සට්ඨිපුරිසසහස්සානි ආමුත්තමණිකුණ්ඩලා, අඞ්කුරස්ස මහාදානෙ කට්ඨං ඵාලෙන්ති මාණවා.
311. සොළසිත්ථිසහස්සානි සබ්බාලඞ්කාරභූසිතා, අඞ්කුරස්ස මහාදානෙ විධා පිණ්ඩෙන්ති නාරියො.
312. සොළසිත්ථිසහස්සානි සබ්බාලඞ්කාරභූසිතා, අඞ්කුරස්ස මහාදානෙ දබ්බිගාහා උපට්ඨිතා.
313. බහුං බහුන්නං පාදාසි චිරං පාදාසි ඛත්තියො, සක්කච්චඤ්ච සහත්ථා ච චිත්තීකත්වා පුනප්පුනං.
314. බහූ මාසෙ ච පක්ඛෙ ච උතුසංවච්ඡරානි ච, මහාදානං පවත්තෙසි අඞ්කුරො දීඝමන්තරං.
315. එවං දත්වා යජිත්වා ච අඞ්කුරො දීඝමන්තරං, සො හිත්වා මානුසං දෙහං තාවතිංසූපගො අහූ’ති.
316. කටච්ඡුභික්ඛං දත්වාන අනුරුද්ධස්ස ඉන්දකො, සො හිත්වා මානුසං දෙහං තාවතිංසූපගො අහූ.
317. දසහි ඨානෙහි අඞ්කුරං ඉන්දකො අතිරොචති, රූපෙ සද්දෙ රසෙ ගන්ධෙ ඵොට්ඨබ්බෙ ච මනොරමෙ.
318. ආයුනා යසසා චෙව වණ්ණෙන ච සුඛෙන ච, ආධිපච්චෙන අඞ්කුරං ඉන්දකො අතිරොචතී’ති.
319. මහාදානං තයා දින්නං අඞ්කුරො දීඝමන්තරං, අතිදූරෙ නිසින්නොසි ආගච්ඡ මම සන්තිකෙ’ති.
320. තාවතිංසෙ යදා බුද්ධො සිලායං පණ්ඩුකම්බලෙ, පාරිච්ඡත්තකමූලම්හී විහාසි පුරිසුත්තමො.
321. දසසු ලොකධාතූසු සන්නිපතිත්වාන දෙවතා, පයිරුපාසන්ති සම්බුද්ධං වසන්තං නගමුද්ධනි.
322. න කොචි දෙවො වණ්ණෙන සම්බුද්ධං අතිරොචති, සබ්බෙ දෙවෙ අධිගය්හ සම්බුද්ධොව විරොචති.
323. යොජනානි දස ද්වෙ ච අඞ්කුරොයං තදා අහු, අවිදූරෙව බුද්ධස්ස ඉන්දකො අතිරොචති.
324. ඔලොකෙත්වාන සම්බුද්ධො අඞ්කුරඤ්චාපි ඉන්දිකං, දක්ඛිණෙය්යං පභාවෙන්තො ඉදං වචනමබ්රුවී.
325. මහාදානං තයා දින්නං අඞ්කුරො දීඝමන්තරං, අතිදූරෙ නිසින්නොසි ආගච්ඡ මම සන්තිකෙ.
326. චොදිතො භාවිතත්තෙන අඞ්කුරො ඉදමබ්රුවි, කිං මය්හං තෙන දානෙන දක්ඛිණෙය්යෙන සුඤ්ඤතං.
327. අයං සො ඉන්දකො යක්ඛො දජ්ජා දානං පරිත්තකං, අතිරොචති අම්හෙහි චන්දො තාරාගණෙ යථා.
328. උජ්ජඞ්ගලෙ යථා ඛෙත්තෙ බීජං බහුකම්පි{1} රොපිතං, න විපුලං ඵලං හොති නපි තොසෙති කස්සකං.
329. තථෙව දානං බහුකං දුස්සීලෙසු පතිට්ඨිතං, න විපුලං ඵලං හොති නපි තොසෙති දායකං.
330. යථාපි භද්දකෙ ඛෙත්තෙ බීජං අප්පම්පි රොපිතං, සම්මා ධාරං පවෙච්ඡන්තෙ ඵලං තොසෙති කස්සකං.
331. තථෙව සීලවන්තෙසු ගුණවන්තෙසු තාදිසු, අප්පකම්පි කතං කාරං පුඤ්ඤං හොති මහප්ඵල’න්ති.
332. විචෙය්ය දානං දාතබ්බං යත්ථ දින්නං මහප්ඵලං, විචෙය්ය දානං දත්වාන සග්ගං ගච්ඡන්ති දායකා.
333. විචෙය්ය දානං සුගතප්පසත්ථං යෙ දක්ඛිණෙය්යා ඉධ ජීවලොකෙ, එතෙසු දින්නානි මහප්ඵලානි බීජානි වුත්තානි යථා සුඛෙත්තෙ’ති.
අඞ්කුරපෙතවත්ථු නවමං.
2. 10.
334. දිවාවිහාරගතං භික්ඛුං ගඞ්ගාතීරෙ නිසින්නකං, තං පෙතී උපසඞ්කම්ම දුබ්බණ්ණා භීරුදස්සනා.
335. කෙසා චස්සා අතිදීඝා යාව භූමාවලම්බරෙ, කෙසෙහි සා පටිච්ඡන්නා සමණං එතදබ්රවී.
336. පඤ්චපණ්ණාසවස්සානි යතො කාලකතා අහං, නාභිජානාමි භුත්තං වා පීතං වා පන පානීයං: දෙහි ත්වං පානීයං භන්තෙ තසිතා පානීයාය මෙ’ති.
337. අයං සීතොදිකා ගඞ්ගා හිමවන්නතො සන්දති, පිව එත්තො ගහෙත්වාන කිං මං යාචසි ජානීයං.
338. සචාහං භන්තෙ ගඞ්ගාය සයං ගණ්හාමි පානීයං, ලොහිතං මෙ පරිවත්තති තස්මා යාචාමි පානීයං.
339. කින්නු කායෙන වාචාය මනසා දුක්කටං කතං, කිස්ස කම්මවිපාකෙන ගඞ්ගා තෙ හොති ලොහිතන්ති.
340. පුත්තො මෙ උත්තරො නාම සද්ධො ආසි උපාසකො, සො මය්හං අකාමාය සමණානං පවෙච්ඡති.
341. චීවරං පිණ්ඩපාතඤ්ච පච්චයං සයනාසනං, තමහං පරිභාසාමි මච්ඡෙරෙන උපද්දුතා.
342. යං ත්වං මය්හං අකාමාය සමණානං පවෙච්ඡසි, චීවරං පිණ්ඩපාතඤ්ච පච්චයං සයනාසනං.
343. එතං තෙ පරලොකස්මිං ලොහිතං හොතු උත්තරං තස්ස කම්ම විපාකෙන ගඞ්ගා මෙ හොති ලොහිත’න්ති.
උත්තරමාතුපෙතවත්ථු දසමං.
2. 11.
344. අහං පුරෙ පබ්බජිතස්ස භික්ඛුනො සුත්තං අදාසිං උපගම්ම යාචිතා, තස්ස විපාකො විපුලඵලූපලබ්භති බහූ ච මෙ උපපජ්ජරෙ වත්ථකොටියො.
345. පුප්ඵාභිකිණ්ණං රමිතං විමානං අනෙකචිත්තං නරනාරිසෙවිතං, සාහං භුඤ්ජාමි ච පාරුපාමි ච පහූතචිත්තා{1} න ච තාව ඛීයති.
346. තස්සෙව කම්මස්ස විපාකමන්වයා සුඛඤ්ච සාතඤ්ච ඉධූපලබ්භති, සාහං ගන්ත්වා පුනරෙව මානුසං කාහාමි පුඤ්ඤානි නයය්යපුත්ත මං.