793. කින්නු කායෙන වාචාය මනාසා දුක්කටං කතං, කිස්ස කම්මවිපාකෙන පෙතලොකමිතො ගතා.
794. ආනවටෙසු තිත්ථෙසු විචිනිම්භද්ධමාසකං, සන්තෙසු දෙය්යධම්මෙසු දීපං නාකම්හ අත්තනො.
795. නදිං උපෙම තසිතා රිත්තකා පරිවත්තති, ඡායං උපෙම උණ්හෙසු ආතපො පරිවත්තති.
796. අග්ගිවණ්ණො ච නො වාතො දහන්තො උපවායති, එතඤ්ච භන්තෙ{1} අරහාම අඤ්ඤඤ්ච පාපකං තතො.
797. අධි යොජනානි ගච්ඡාම ඡාතා ආහාරගෙධිනො, අලද්ධාව නිවත්තෙම අහො නො අප්පපුඤ්ඤතා.
798. ඡාතා පමුච්ඡිතා භන්තා භූමියං පටිසුම්භිතා, උත්තානා පතිකිරාම අවකුජ්ජා පතාමසෙ.
799. තෙ ච තත්ථෙව පතීතා{2} භූමියං පටිසුම්භිතා, උරං සීසඤ්ච ඝට්ටෙම අහො නො අප්පපුඤ්ඤතා.
800. එතඤ්ච භන්තෙ අරහාම අඤ්ඤං ච පාපකං තතො, සන්තෙසු දෙය්යධම්මෙසු දීපං නාකම්හ අත්තනො.
801. තෙ හි නූන ඉතො ගන්ත්වා යොනිං ලද්ධාන මානුසිං, වදඤ්ඤූ සීලසම්පන්නා කාහාම කුසලං බහු’න්ති.
ගණපෙතවත්ථු දසමං.
4. 11.
802. දිට්ඨා තයා නිරයා තිරච්ඡානයොනි පෙතා අසුරා අථවාපි මනුස්සා දෙවා{3} සයමද්දස{4} කම්මවිපාකමත්තනො නෙස්සාමි තං පාටලිපුත්තමක්ඛතං තත්ථ ගන්ත්වා කුසලං කරොහි ධම්මං.
803. අත්ථකාමොසි මෙ යක්ඛ හිතකාමොසි දෙවතෙ, කරොමි තුය්හං වචනං ත්වංසි ආචරියො මම.
804. දිට්ඨා මයා නිරයා තිරච්ඡානයොනි පෙතා අසුරා අථවාපි මනුස්සා දෙවා සයමද්දස කම්මවිපාකමත්තනො කාහාමි පුඤ්ඤානි අනප්පකානී’ති.
පාටලීපුත්තපෙතවත්ථු එකාදසමං.
4. 12.
805. අයඤ්ච තෙ පොක්ඛරණී සුරම්මා සමා සුප්පතිත්ථා මහොදිකා ච,{1} සුපුප්ඵිතා භමරගණානුකිණ්ණා කථං තයා ලද්ධා අයං මනුඤ්ඤා.
806. ඉදඤ්ච තෙ අම්බවනං සුරම්මං සබ්බොතුකං ධාරයතෙ ඵලානි, සුපුප්ඵිතං භමරගණානුකිණ්ණං කථං තයා ලද්ධමිදං විමානං.
807. අම්බපක්කොදකං යාගු සීතච්ඡායා මනොරමා, ධීතරා දින්නදානෙන තෙන මෙ ඉධ ලබ්භති.
808. සන්දිට්ඨිකං කම්මං එවං පස්සථ දානස්ස දමස්ස සංයමස්ස විපාකං, දාසී අහං අය්යකුලෙසු හුත්වා සුණිසා හොමි අගාරස්ස ච ඉස්සරා’ති.
පොක්ඛරණීපෙතවත්ථු ද්වාදසමං.
4. 13.
809. යං දදාති න තං හොති දෙථෙව දානං දත්වා උභයං තරති, උභයං තෙන දානෙන ගච්ඡති ජාගරථ මා පමජ්ජථා’ති.
අම්බරුක්ඛපෙතවත්ථු තෙරසමං.
4. 14.
810. මයං භොගෙ සම්භරිම්හා සමෙන විසමෙන ච, තෙ අඤ්ඤෙ පරිභුඤ්ජන්ති මයං දුක්ඛස්ස භාගිනී’ති.
භොගසංහරණපෙතවත්ථු චුද්දසමං.
4. 15.
811. සට්ඨිවස්සසහස්සානි පරිපුණ්ණානි සබ්බසො, නිරයෙ පච්චමානානං කදා අන්තො භවිස්සති.
812. නත්ථි අන්තො කුතො අන්තො න අන්තො පතිදිස්සති, තථා හි පකතං පාපං මම තුය්හං{2} ච මාරිස.
813. දුජ්ජීවිතං අජීවිම්හ යෙ සන්තෙ න දදම්හසෙ, සන්තෙසු දෙය්යධම්මෙසු දීපං නාකම්හ අත්තනො.
814. සො හි{1} නූන ඉතො ගන්ත්වා යොනිං ලද්ධාන මානුසිං, වදඤ්ඤූ සීලසම්පන්නො කාහාමි කුසලං බහු’න්ති.
සෙට්ඨිපුත්තපෙතවත්ථු පණ්ණරසමං.
4. 16.
815. කින්නු උම්මත්තරූපො ච මිගො භන්තො ව ධාවසි, නිස්සංසයං පාපකම්මන්තො කින්නු සද්දායසෙ තුවං.
816. අහං භද්දන්ත පෙතොම්හි දුග්ගතො යමලොකිකො, පාපකම්මං කරිත්වාන පෙතලොකං ඉතො ගතො.
817. සට්ඨිකූටසහස්සානි පරිපුණ්ණානි සබ්බසො, සීසෙ මය්හං නිපතන්ති තෙ භින්දන්ති ච{2} මත්ථකං.
818. කින්නු කායෙන වාචාය මනසා දුක්කටං කතං, කිස්ස කම්මවිපාකෙන ඉදං දුක්ඛං නිගච්ඡසි.
819. සට්ඨිකූටසහස්සානි පරිපුණ්ණානි සබ්බසො, සීසෙ තුය්හං නිපතන්ති තෙ භින්දන්ති ච මත්ථකං.
820. අථද්දසාසිං සම්බුද්ධං සුනෙත්තං භාවිතින්ද්රියං, නිසින්නං රුක්ඛමූලස්මිං ඣායන්තමකුතොභයං.
821. සාලිත්තකප්පහාරෙන භින්දිස්සං තස්ස මත්ථකං, තස්ස කම්මවිපාකෙන ඉදං දුක්ඛං නිගච්ඡිසං.
822. සට්ඨිකූටසහස්සානි පරිපුණ්ණානි සබ්බසො, සීසෙ මය්හං නිපතන්ති තෙ භින්දන්ති ච මත්ථකං.
823. ධම්මෙන තෙ කාපුරිසා- සට්ඨිකූටසහස්සානි පරිපුණ්ණානි සබ්බසො, සීසෙ තුය්හං නිපතන්ති තෙ භින්දන්ති ච මත්ථක’න්ති.
සට්ඨිකූටසහස්සපෙතවත්ථු සොළසමං.
මහාවග්ගො චතුත්ථො.
තස්සුද්දානං:
අම්බසක්ඛරො සෙරිස්සකො පිඞ්ගලො රෙවතී උච්ඡුඛාදකා ද්වෙ කුමාරා ද්වෙ ගූථඛාදකා ගණපාටලි පොක්ඛරඤ්ච අම්බරුක්ඛ- භොගසංහාරා සෙට්ඨිපුත්ත සට්ඨිකූටා ඉති සොළසවත්ථූනි තෙන පවුච්චතී’ති.
පෙතවත්ථු පාළි සමත්තා.