164. පුච්ඡාමි තං දෙවි මහානුභාවෙ මනුස්සභූතා කිමකාසි පුඤ්ඤං, කෙනාසි එවං ජලිතානුභාවා වණ්ණො ච තෙ සබ්බදිසා පභාසතී?ති.
165. අහං මත්තා තුවං තිස්සා සපත්තී තෙ පුරෙ අහුං, පාපකම්මං කරිත්වාන පෙතලොකමිතො ගතා.
166. තව දානෙන දින්නෙන මොදාමි අකුතො භයා, චිරං ජීවාහි භගිනි සහ සබ්බෙහි ඤාතිභි.
167. අසොකං විරජං ඨානං ආවාසං වසවත්තිනං, ඉධ ධම්මං චරිත්වාන දානං දත්වාන සොභනෙ. විනෙය්ය මච්ඡෙරමලං සමූලං, අනින්දිතා සග්ගමුපෙහි ඨානන්ති.
මත්තාපෙතවත්ථු තතියං.
2. 4.
168 කාළී දුබ්බණ්ණරූපාසි ඵරුසා භීරුදස්සනා, පිඞ්ගලාසි කළාරාසි න තං මඤ්ඤාමි මානුසින්ති.
169. අහං නන්දා නන්දසෙන{1} භරියා තෙ පුරෙ අහුං, පාපකම්මං කරිත්වාන පෙතලොකමිතො ගතාති.
170. කින්නු කායෙන වාචාය මනසා දුක්කටං කතං, කිස්ස කම්මවිපාකෙන පෙතලොකමිතො ගතා.
171. චණ්ඩී ඵරුසවාචා ච තයි චාසිං අගාරවා,{2} තාහං දුරුත්තං වත්වාන පෙතලොකමිතො ගතා.
172. හන්දුත්තරියං දදාමි තෙ ඉමං දුස්සං නිවාසය, ඉමං දුස්සං නිවාසෙත්වා එහි නෙස්සාමි තං ඝරං.
173. වත්ථඤ්ච අන්නපානඤ්ච ලච්ඡසි ත්වං ඝරං ගතා, පුත්තෙ ච තෙ පස්සිස්සසි සුනිසායො ච දක්ඛසි.
174. හත්ථෙන හත්ථෙ තෙ දින්නං න මය්හං උපකප්පති, භික්ඛූ ච සීලසම්පන්නෙ වීතරාගෙ බහුස්සුතෙ.
175. තප්පෙහි අන්නපානෙන මම දක්ඛිණමාදිස, තදාහං සුඛිතා හෙස්සං සබ්බකාමසමිද්ධිනී.
176. සාධූති සො පටිස්සුත්වා දානං විපුලමාකිරි, අන්නං පානං ඛාදනීයං වත්ථසෙනාසනානි ච.
177. ඡත්තං ගන්ධඤ්ච මාලඤ්ච විවිධා ච උපාගතා, භික්ඛූ ච සීලසම්පන්නෙ වීතරාගෙ බහුස්සුතෙ: තප්පෙත්වා අන්නපානෙන තස්සා දක්ඛිණමාදිසි.
178. සමනන්තරානුද්දිට්ඨෙ විපාකො උදපජ්ජථ, භොජනච්ඡාදනපානීයං දක්ඛිණාය ඉදං ඵලං.
179. තතො සුද්ධා සුචිවසනා කාසිකුත්තමධාරිණී, විචිත්තවත්ථාභරණා සාමිකං උපසඞ්කමි.
180. අභික්කන්තෙන වණ්ණෙන යා ත්වං තිට්ඨසි දෙවතෙ, ඔභාසෙන්ති දිසා සබ්බා ඔසධී විය තාරකා.
181. කෙන තෙ තාදිසො වණ්ණො කෙන තෙ ඉධමිජ්ඣති, උප්පජ්ජන්ති ච තෙ භොගා යෙ කෙචි මනසො පියා.
182. පුච්ඡාමි තං දෙවි මහානුභාවෙ මනුස්සභූතා කිමකාසි පුඤ්ඤං, කෙනාසි එවං ජලිතානුභාවා වණ්ණො ච තෙ සබ්බදිසා පභාසතීති.
183. අහං නන්දා නන්දසෙන{1} භරියා තෙ පුරෙ අහුං, පාපකම්මං කරිත්වාන පෙතලොකමිතො ගතා.
184. තව දින්නෙන දානෙන මොදාමි අකුතො භයා, චිරං ජීවාහි{2} ගහපති සහ සබ්බෙහි ඤාතිභි.
185. අසොකං විරජං ඨානං ආවාසං වසවත්තිනං, ඉධ ධම්මං චරිත්වාන දානං දත්වාන ගහපති. විනෙය්ය මච්ඡෙරමලං සමූලං, අනින්දිතො සග්ගමුපෙහි ඨාන’න්ති
නන්දාපෙතවත්ථු චතුත්ථං.
2. 5.
186. අලඞ්කතො මට්ටකුණ්ඩලී මාලාධාරී{3} හරිචන්දනුස්සදො, බාහා පග්ගය්හ කන්දසි වනමජ්ඣෙ කිං දුක්ඛිතො තුවන්ති?
187. සොවණ්ණමයො පභස්සරො උප්පන්නො රථපඤ්ජරො මම, තස්ස චක්කයුගං න වින්දාමි තෙන දුක්ඛෙන ජහිස්සං{4} ජීවිතන්ති.
188. සොවණ්ණමයං මණිමයං ලොහිතඞ්කමයං අථ රූපියාමයං, ආචික්ඛ මෙ භද්දමාණව චක්කයුගං පටිලාභයාමි තෙති.
189. සො මාණවො තස්ස පාවදි චන්දසුරියා උභයෙත්ථ දිස්සරෙ, සොවණ්ණමයො රථො මම තෙන චක්කයුගෙන සොභතීති.
190. බාලො ඛො ත්වමසි මාණව යො ත්වං පත්ථයසෙ අපත්ථියං, මඤ්ඤාමි තුවං මරිස්සසි න හි ත්වං ලච්ඡසි චන්දසුරියෙති.
191. ගමනාගමනම්පි දිස්සති වණ්ණධාතු උභයෙත්ථ වීථියො, පෙතො පන කාලකතො න දිස්සති කොනිධ කන්දතං බාල්යතරොති.
192. සච්චං ඛො වදෙසි මාණව අහමෙව කන්දතං බාල්යතරො චන්දං විය දාරකො රුදං පෙතං කාලකතාභිපත්ථයං.
193. ආදිත්තං වත මං සන්තං ඝතසිත්තංව පාවකං, වාරිනා විය ඔසිඤ්චං සබ්බං නිබ්බාපයෙ දරං.
194. අබ්බහී වත මෙ සල්ලං සොකං හදයනිස්සිතං, යො මෙ සොකපරෙතස්ස පුත්තසොකං අපානුදි.
195. ස්වාහං අබ්බූළ්හසල්ලොස්මි සීතිභූතොස්මි නිබ්බුතො, න සොචාමි න රොදාමි තව සුත්වාන මාණව.
196. දෙවතානුසි ගන්ධබ්බො ආදු සක්කො පුරින්දදො, කො වා ත්වං කස්ස වා පුත්තො කථං ජානෙමු තං මයං
197. යඤ්ච කන්දසි යඤ්ච රොදසි පුත්තං ආළාහනෙ සයං දහිත්වා, ස්වාහං කුසලං කරිත්වා කම්මං තිදාසානං සහව්යතං පත්තො.
198. අප්පං වා බහුං වා නාද්දසාම{1} දානං දදන්තස්ස සකෙ අගාරෙ, උපොසථකම්මං වා තාදිසං කෙන කම්මෙන ගාතොසි දෙවලොකන්ති.
199. ආබාධිකොහං දුක්ඛිතො බාළ්හගිලානො{1} ආතුරරූපොම්හි සකෙ නිවෙසනෙ, බුද්ධං විගතරජං විතිණ්ණකඞ්ඛං අද්දක්ඛිං සුගතං අනොමපඤ්ඤං.
200. ස්වාහං මුදිතමනො පසන්නචිත්තො අඤ්ජලිං අකරිං තථාගතස්ස, තාහං කුසලං කරිත්වා කම්මං තිදසානං සහව්යතං පත්තො.
201. අච්ඡරියං වත අබ්භුතං අඤ්ජලිකම්මස්ස අයමීදිසො විපාකො, අහම්පි මුදිතමනො පසන්නචිත්තො අජ්ජෙව බුද්ධං සරණං වජාමි.
202. අජ්ජෙව බුද්ධං සරණං වජාහි ධම්මඤ්ච සඞ්ඝඤ්ච පසන්නචිත්තො, තථෙව සික්ඛාය පදානි පඤ්ච අඛණ්ඩඵුල්ලානි සමාදියස්සු.
203. පාණාතිපාතා විරමස්සු ඛිප්පං ලොකෙ අදින්නං පරිවජ්ජයස්සු, අමජ්ජපො මා ච මුසා භණාහි සකෙන දාරෙන ච හොහි තුට්ඨො.
204. අත්ථකාමොසි මෙ යක්ඛ හිතකාමොසි දෙවතෙ, කරොමි තුය්හං වචනං ත්වංසි ආචරියො මම.
205. උපෙමි සරණං බුද්ධං ධම්මඤ්චාපි අනුත්තරං, සඞ්ඝඤ්ච නරදෙවස්ස ගච්ඡාමි සරණං අහං.
206. පාණාතිපාතා විරමාමි ඛිප්පං ලොකෙ අදින්නං පරිවජ්ජයාමි අමජ්ජපො නො ච මුසා භණාමි සකෙන දාරෙන ච හොමි තුට්ඨොති.
මට්ටකුණ්ඩලීපෙතවත්ථු පඤ්චමං.
2. 6.
207. උට්ඨෙහි කණ්හ කිං සෙසි කො අත්ථො සුපනෙන තෙ, යො ච තුය්හං සකො භාතා හදයං චක්ඛුඤ්ච දක්ඛිණං, තස්ස වාතා බලීයන්ති සසං ජප්පති කෙසව,
208. තස්ස තං වචනං සුත්වා රොහිණෙය්යස්ස කෙසවො තරමානරූපො උට්ඨාසි භාතුසොකෙන අට්ටිතො.
209. කින්නු උම්මත්තරූපොව කෙවලං ද්වාරකං ඉමං, සසො සසොති ලපසි කීදිසං සසමිච්ඡසි.
210. සොවණ්ණමයං මණිමයං ලොහමයං අථ රූපියාමයං,{1} සඞ්ඛසිලාපවාළමයං කාරයිස්සාමි තෙ සසං.
211. සන්ති අඤ්ඤෙපි සසකා අරඤ්ඤෙ වනගොචරා,{2} තෙපි තෙ ආනයිස්සාම කීදිසං සසමිච්ඡසි.
212. නාහමෙතෙ සසෙ ඉච්ඡෙ යෙ සසා පඨවිනිස්සිතා{3} චන්දතො සසමිච්ඡාමි තං මෙ ආහර කෙසව.
213. සො නූන මධුරං ඤාති ජීවිතං විජහිස්සසි, අපත්ථියං පත්ථයසි චන්දතො සසමිච්ඡසි.
214. එවඤ්චෙ කණ්හ ජානාසි යථඤ්ඤමනුසාසසි, කස්මා පුරෙ මතං පුත්තං අජ්ජාපි අනුසොචසි.
215. යෙ න ලබ්භා මනුස්සෙන අමනුස්සෙන වා පන, ජාතො මෙ මා මරී පුත්තො කුතො ලබ්භා අලබ්භියං,
216. න මන්තා මූලභෙසජ්ජා ඔසධෙහි ධනෙන වා, සක්කා ආනයිතුං කණ්හ යං පෙතමනුසොචසි.
217. මහද්ධනා මහාභොගා රට්ඨවන්තොපි ඛත්තියා, පහූතධනධඤ්ඤා යෙ තෙපි නො අජරාමරා.
218. ඛත්තියා බ්රාහ්මණා වෙස්සා සුද්දා චණ්ඩාලපුක්කුසා, එතෙ චඤ්ඤෙ ච ජාතියා තෙපි නො අජරාමරා.
219. යෙ මන්තං පරිවත්තෙන්ති ඡළඞ්ගං බ්රහ්මචින්තිතං එතෙ චඤ්ඤෙ ච ජාතියා තෙපි නො අජරාමරා.
220. ඉසයො වාපි යෙ සන්තා සඤ්ඤතත්තා තපස්සිනො, සරීරං තෙපි කාලෙන විජහන්ති තපස්සිනො.
221. භාවිතත්තා අරහන්තො කතකිච්චා අනාසවා, නික්ඛිපන්ති ඉමං දෙහං පුඤ්ඤපාපපරික්ඛයා.
222. ආදිත්තං වත මං සන්තං ඝතසිත්තංව පාවකං, වාරිනා විය ඔසිඤ්චං සබ්බං නිබ්බාපයෙ දරං.
223. අබ්බූළ්හං වත මෙ සල්ලං සොකං හදයනිස්සිතං, යො මෙ සොකපරෙතස්ස පුත්තසොකං අපානුදි.
224. ස්වාහං අබ්බූළ්හසල්ලොස්මි සීතිභූතොස්මි නිබ්බුතො, න සොචාමි න රොදාමි තව සුත්වාන භාතික{1}.
225. එවං කරොන්ති සප්පඤ්ඤා යෙ හොන්ති අනුකම්පකා, විනිවත්තයන්ති සොකම්හා ඝතො ජෙට්ඨංව භාතරං,
226. යස්ස එතාදිසා හොන්ති අමච්චා පරිචාරකා, සුභාසිතෙන අන්වෙන්ති ඝතො ජෙට්ඨංව භාතරන්ති.
කණ්හපෙතවත්ථු ඡට්ඨං.
2. 7.
227. නග්ගො දුබ්බණ්ණරූපොසි කිසො ධමනි සන්ථතො, උප්ඵාසුලිකො කිසිකො කො නු ත්වමසි මාරිස.
228. අහං භදන්තෙ පෙතොම්හි දුග්ගතො යමලොකිකො, පාපකම්මං කරිත්වාන පෙතලොකමිතො ගතො
229. කින්නු කායෙන වාචාය මනසා දුක්කටං කතං කිස්ස කම්මවිපාකෙන පෙතලොකමිතො ගතො.
230. නගරං අත්ථි දසන්නානං එරකච්ඡන්තිවිස්සුතං, තත්ථ සෙට්ඨි පුරෙ ආසිං ධනපාලොති මං විදුං.
231. අසීති සකටවාහානං හිරඤ්ඤස්ස අහොසි මෙ, පහූතං මෙ ජාතරූපං මුත්තා වෙළුරියා බහූ.
232. තාව මහද්ධනස්සාපි න මෙ දාතුං පියං අහු, පිදහිත්වා ද්වාරං භුඤ්ජාමි මා මං යාචනකාද්දසුං.
233. අස්සද්ධො මච්ඡරී චාසිං කදරියො පරිභාසකො, දදන්තානං කරොන්තානං වාරයිස්සං බහුජ්ජනං.
234. විපාකො නත්ථි දානස්ස සඤ්ඤමස්ස කුතො ඵලං, පොක්ඛරඤ්ඤොදපානා ආරාමානි ච රොපිතෙ.
235. පපායො ච විනාසෙසිං දුග්ගෙ සඞ්කමනානි ච, ස්වාහං අකතකල්යාණො කතපාපො තතො චුතො.
236. උපපන්නො පෙත්තිවිසයං ඛුප්පිපාසාසමප්පිතො, පඤ්ච පණ්ණාසවස්සානි යතො කාලකතො අහං.
237. නාභිජානාමි භුත්තං වා පීතං වා පන පානීයං, යො සංයමො සො විනාසො යො විනාසො සො සංයමො.
238. පෙතා හි කිර ජානන්ති යො සංයමො සො විනාසො, අහං පුරෙ සංයමිස්සං නාදාසිං බහුකෙ ධනෙ.
239. සන්තෙසු දෙය්යධම්මෙසු දීපං නාකාසිමත්තනො, සොහං පච්ඡානුතප්පාමි අත්තකම්මඵලූපගො.
240. උද්ධං චතූහි මාසෙහි කාලකිරියා භවිස්සති. එකන්තං කටුකං ඝොරං නිරයං පපතිස්සහං.
241. චතුක්කණ්ණං චතුද්වාරං විභත්තං භාගසො මිතං, අයොපාකාරපරියන්තං අයසා පටිකුජ්ජිතං.
242. තස්ස අයොමයා භූමි ජලිතා තෙජසා යුතා. සමන්තා යොජනසතං ඵරිත්වා තිට්ඨති සබ්බදා.
243. තත්ථාහං දීඝමද්ධානං දුක්ඛං වෙදිස්සං වෙදනං, ඵලං පාපස්ස කම්මස්ස තස්මා සොචාමහං භුසං.
244. තං වො වදාමි භද්දං වො යාවන්තෙත්ථ සමාගතා, මාකත්ථ පාපකං කම්මං ආවි වා යදි වා රහො.
245. සචෙ තං පාපකං කම්මං කරිස්සථ කරොථ වා, න චො දුක්ඛා පමුත්ත්යත්ථි උප්පච්චාපි පලායතං.
246. මත්තෙය්යා හොථ පෙත්තෙය්යා කුලෙ ජෙට්ඨාපචායකා, සාමඤ්ඤා හොථ බ්රහ්මඤ්ඤා එවං සග්ගං ගමිස්සථා’ති.
ධනපාලපෙතවත්ථු සත්තමං.
2. 8.
247. නග්ගො කිසො පබ්බජිතොසි භන්තෙ, රත්තිං කුහිං ගච්ඡසි කිස්ස හෙතු{1}, ආචික්ඛ මෙ තං අපි සක්කුණෙමු සබ්බෙන චිත්තං පටිපාදයෙ තුවං.
248. බාරාණසීනගරං දූරඝුට්ඨං තත්ථාහං ගහපති අඩ්ඪකො දීනො, අදාතා ගෙධිතමනො ආමිසස්මිං දුස්සීල්යෙන යමවිසයම්හී පත්තො.
249. සො සූචිකාය කිලමිතො තෙහි තෙනෙව ඤාතීසු යාමි ආමිසහෙතුං, අදානසීලා න ච සද්දහන්ති දානඵලං හොති පරම්හි ලොකෙ.
250. ධීතා ච මය්හං ලපතෙ අභික්ඛණං දස්සාමි දානං පිතුනං පිතාමහානං, උපක්ඛටං පරිවිසයන්ති බ්රාහ්මණෙ යාම්යහං අන්ධකවින්දං භොත්තුන්ති.
251. තමවොච රාජා අනුභවියාන තම්පි එය්යාසි ඛිප්පං අහම්පි කරිස්සං පූජං, ආචික්ඛ මෙ තං යදි අත්ථි හෙතු සද්ධායිතං හෙතුවචො සුණොමි.
252. තථාති වත්වා අගමාසි තත්ථ භුංඤ්ජිසු භත්තං න ච පන දක්ඛිණාරහා, පච්චාගමි රාජගහං පුනාපරං පාතුරහොසි පුරතො ජනාධිපස්ස
253. දිස්වාන පෙතං පුනරෙව ආගතං රාජා අවොච අහම්පි කිං දදාමි, ආචික්ඛ මෙ තං යදි අත්ථි හෙතු යෙන තුවං චිරතරං පීණිතො සියාති.