76. යො සො මජ්ඣෙ අස්සතරී රථෙන චතුබ්භි යුත්තෙන සුවග්ගිතෙන, අම්හාක පුත්තො අහු මජ්ඣිමො සො අමච්ඡරී දානපතී විරොචති.
77. යා සා ච පච්ඡා සිවිකා යනිය්යති නාරී සපඤ්ඤා මිගමන්දලොචනා, අම්හාක ධීතා අහු සා කනිට්ඨා භාගඩ්ඪභාගෙන සුඛී පමොදති.
78. එතෙ ච දානානි අදංසු පුබ්බෙ පසන්නචිත්තා සමණබ්රාහ්මණානං, මයම්පන මච්ඡරිනො අහුම්හා පරිභාසකා සමණබ්රාහ්මණානං. එතෙ පදත්වා පරිචාරයන්ති මයඤ්ච සුස්සාම නළොව ඛිත්තො’ති.
79. කිං තුම්හාකං භොජනං කිං සයනං කථංසු{1} යාපෙථ සුපාපධම්මිනො, පහූතභොගෙසු අනප්පකෙසු සුඛං විරාධාය{2} දුඛජ්ජ පත්තා’ති.
80. අඤ්ඤමඤ්ඤං වධිත්වාන පිවාම පුබ්බලොහිතං බහුං පීත්වා න ධාතා හොම නච්ඡාදිම්භසෙ මයං.
81. ඉච්චෙව වච්චා පරිදෙවයන්ති අදායකා පෙච්ච යමස්ස ඨායිනො, යෙ තෙ විදිත්වා{3} අධිගම්ම භොගෙ න භුඤ්ජරෙ නාපි කරොන්ති පුඤ්ඤං.
82. තෙ ඛුප්පිපාසූපගතා පරත්ථ පෙතා චිරං ඣායරෙ ඩය්හමානා, කම්මානි කත්වාන දුඛුද්රයානි අනුභොන්ති දුක්ඛං කටුකප්ඵලානි.
83. ඉත්තරං හි ධනං ධඤ්ඤං ඉත්තරං ඉධ ජීවිතං, ඉත්තරං ඉත්තරතො ඤත්වා දීපං කයිරාථ පණ්ඩිතො.
84. යෙ තෙ එවං පජානන්ති නරා ධම්මස්ස කොවිදා තෙ දානෙ නප්පමජ්ජන්ති සුත්වා අරහතං වචො’ති.
නාගපෙතවත්ථු එකාදසමං.
1. 12.
85. උරගොව තචං ජිණ්ණං හිත්වා ගච්ඡති සංතනුං, එවං සරීරෙ නිබ්භොගෙ පෙතෙ කාලකතෙ සති.
86. ඩය්හමානො න ජානාති ඤාතීනං පරිදෙවිතං තස්මා එතං න රොදාමි{4} ගතො සො තස්ස යා ගතී’ති.
87. අනවහිතො{5} තතො ආග නානුඤ්ඤතො ඉතො ගතො, යථාගතො තථාගතො කා තත්ථ පරිදෙවනා.
88. ඩය්හමානො න ජානාති ඤාතීනං පරිදෙවිතං, තස්මා එතං න රොදාමි ගතො සො තස්ස යා ගතී’ති.
89. සචෙ රොදෙ කිසා අස්සං තත්ථ මෙ කිං ඵලං සියා, ඤාතිමිත්තසුහජ්ජානං භිය්යො නො අරතී සියා.
90. ඩය්හමානො න ජානාති ඤාතීනං පරිදෙවිතං තස්මා එතං න රොදාමි ගතො සො තස්ස යා ගතී’ති.
91. යථාපි දාරකො චන්දං ගච්ඡන්තමනුරොදති, එවං සම්පදමෙවෙතං යො පෙතමනුසොචති.
92. ඩය්හමානො න ජානාති ඤාතීනං පරිදෙවිතං, තස්මා එතං න රොදාමි ගතො සො තස්ස යා ගතී’ති.
93. යථාපි බ්රහ්මෙ උදකුම්භො භින්නො අප්පටිසන්ධියො, එවං සම්පදමෙවෙතං යො පෙතමනුසොචති.
94. ඩය්හමානො න ජානාති ඤාතිනං පරිදෙවිතං, තස්මා එතං න රොදාමි ගතො සො තස්ස යා ගතී’ති.
උරගපෙතවත්ථු ද්වාදසමං.
උරගවග්ගො පඨමො නිට්ඨිතො.
තස්සුද්දානං:
ඛෙත්තඤ්ච සූකරං පූති පිට්ඨඤ්චාපි තිරොකුඩ්ඩං, පඤ්චාපි සත්තපුත්තඤ්ච ගොණඤ්ච පෙසකාරකං, තථා ඛල්ලාටියං නාගං උරගඤ්චෙව ද්වාදසාති.
2. උබ්බරීවග්ගො
2. 1.
95. නග්ගා දුබ්බණ්ණරූපාසි කිසා ධමනිසන්ථතා, උප්ඵාසුලිකෙ කිසිකෙ කා නු ත්වං ඉධ තිට්ඨසී’?ති.
96. අහං භදන්තෙ පෙතීම්හි දුග්ගතා යමලොකිකා, පාපකම්මං කරිත්වාන පෙතලොකමිතො ගතා’ති.
97. කින්නු කායෙන වාචාය මනසා දුක්කටං කතං, කිස්ස කම්මවිපාකෙන පෙතලොකමිතො ගතා?’ති.
98. අනුකම්පකා මය්හං නාහෙසුං භන්තෙ පිතා ච මාතා අථවාපි ඤාතකා, යෙ මං නියොජෙය්යුං දදාහි දානං පසන්නචිත්තා සමණබ්රාහ්මණානං.
99. ඉතො අහං වස්ස සතානි පඤ්ච යං එවරූපා විචරාමි නග්ගා, ඛුදාය තණ්හාය ච ඛජ්ජමානා පාපස්ස කම්මස්ස ඵලං මමෙදං.
100. වන්දාමි තං අය්ය පසන්නචිත්තා අනුකම්ප මං ධීර{1} මහානුභාව, දත්වා ච මෙ ආදිස්ස යං හි කිඤ්චි මොචෙහි මං දුග්ගතියා භදන්තෙති.
101. සාධූති සො පටිස්සුත්වා සාරිපුත්තොනුකම්පකො, භික්ඛූනං ආලොපං දත්වා පාණිමත්තඤ්ච චෙලකං: ථාලකස්ස ච පානීයං තස්සා දක්ඛිණමාදිසි.
102. සමනන්තරානුද්දිට්ඨෙ විපාකො උදපජ්ජථ,{2} භොජනච්ඡාදනපානීයං දක්ඛිණාය ඉදං ඵලං.
103. තතො සුද්ධා සුචිවසනා කාසිකුත්තමධාරිණී, විචිත්තවත්ථාභරණා සාරිපුත්තමුපසඞ්කමී’ති.
104. අභික්කන්තෙන වණ්ණෙන යා ත්වං තිට්ඨසි දෙවතෙ, ඔභාසෙන්තී දිසා සබ්බා ඔසධී විය තාරකා.
105. කෙන තෙ තාදිසො වණ්ණො කෙන තෙ ඉධමිජ්ඣති, උප්පජ්ජන්ති ච තෙ භොගා යෙ කෙචි මනසො පියා?.
106. පුච්ඡාමි තං දෙවි මහානුභාවෙ මනුස්සභූතා කිමකාසි පුඤ්ඤං, කෙනාසි එවං ජලිතානුභාවා වණ්ණො ච තෙ සබ්බදිසා පභාසතී’?ති
107. උප්පණ්ඩුකිං කිසං ඡාතං නග්ගං ආපතිතච්ඡවිං{1} මුනි කාරුණිකො ලොකෙ තං මමද්දක්ඛි දුක්ඛිතං.
108. භික්ඛූනං ආලොපං දත්වා පාණිමත්තඤ්ච චොළකං, ථාලකස්සච පානීයං මම දක්ඛිණමාදිසි.
109. ආලොපස්ස ඵලං පස්ස භත්තං වස්සසතං දස, භුඤ්ජාමි කාමකාමිනී අනෙකරසබ්යඤ්ජනං
110. පාණිමත්තස්ස චොලස්ස විපාකං පස්ස යාදිසං, යාවතා නන්දරාජස්ස විජිතස්මිං පටීච්ඡදා.
111. තතො බහුතරා භන්තෙ වත්ථානච්ඡාදනානි මෙ, කොසෙය්යකම්බලීයානි ඛොමකප්පාසිකානි ච,
112. විපුලා ච මහග්ඝා ච තෙපාකාසෙව ලම්බරෙ, සාහං තං පරිදහාමි යං යං හි මනසො පියං,
113. ථාලකස්ස ච පානීයං විපාකං පස්ස යාදිසං, ගම්භීරා චතුරස්සා ච පොක්ඛරඤ්ඤො සුනිම්මිතා.
114. සාතොදකා{2} සුප්පතිත්ථා සීතා අප්පටිගන්ධියා, පදුමුප්පලසඤ්ඡන්නා වාරිකිඤ්ජක්ඛපූරිතා.
115. සාහං රමාමි කීළාමි මොදාමි අකුතොභයා, මුනිං කාරුණිකං ලොකෙ භන්තෙ වන්දිතුමාගතා’ති.
සංසාරමොචකපෙතවත්ථු පඨමං.
2. 2.
116. නග්ගා දුබ්බණ්ණරූපාසි කිසා ධමනිසන්ථතා, උප්ඵාසුලිකෙ කිසිකෙ කා නු ත්වං ඉධ තිට්ඨසී’ති.
117. අහං තෙ සකියා මාතා පුබ්බෙ අඤ්ඤාසු ජාතිසු, උප්පන්නා පෙත්තිවිසයං ඛුප්පිපාසසම්පපිතා.
118. ඡඩ්ඩිතං ඛිපිතං ඛෙළං සිඞ්ඝාණිකං සිලෙසුමං, වසඤ්ච ඩය්හමානානං විජාතානඤ්ච ලොහිතං.
119. වණිතානඤ්ච යං ඝානසීසච්ඡින්නාන ලොහිතං ඛුදාපරෙතා භුඤ්ජාමි ඉත්ථිපුරිසනිස්සිතං.
120. පුබ්බලොහිතභක්ඛාස්මි{1} පසූනං මානුසාන ච, අලෙනා අනගාරා ච නීලමඤ්ච පරායනා.
121. දෙහි පුත්තක මෙ දානං දත්වාන උද්දිසාහි{2} මෙ, අප්පෙව නාම මුඤ්චෙය්යං පුබ්බලොහිතභොජනා.
122. මාතුයා වචනං සුත්වා උපතිස්සොනුකම්පකො, ආමන්තයී මොග්ගල්ලානං අනුරුද්ධඤ්ච කප්පිනං.
123. චතස්සො කුටියො කත්වා සඞ්ඝෙ චාතුද්දිසෙ අදා, කුටියො අන්නපානඤ්ච මාතු දක්ඛිණමාදිසි.
124. සමනන්තරානුද්දිට්ඨෙ විපාකො උදපජ්ජථ, භොජනං පානීයං වත්ථං දක්ඛිණාය ඉදං ඵලං.
125. තතො සුද්ධා සුචිවසනා කාසිකුත්තමධාරිණී, විචිත්තවත්ථාභරණා කොලිතං උපසඞ්කමි.
126. අභික්කන්තෙන වණ්ණෙන යා ත්වං තිට්ඨසි දෙවතෙ, ඔභාසෙන්ති දිසා සබ්බා ඔසධී විය තාරකා.
127. කෙන තෙ තාදිසො වණ්ණො කෙන තෙ ඉධමිජ්ඣති, උප්පජ්ජන්ති ච තෙ භොගා යෙ කෙචි මනසො පියා.
128. පුච්ඡාමි තං දෙවි මහානුභාවෙ මනුස්සභූතා කිමකාසි පුඤ්ඤං: කෙනාසි එවං ජලිතානුභාවා වණ්ණො ච තෙ සබ්බදිසා පභාසති.
129. සාරිපුත්තස්සහං මාතා පුබ්බෙ අඤ්ඤාසු ජාතිසු, උප්පන්නා පෙත්තිවිසයං ඛුප්පිපාසසමප්පිතා.
130. ඡඩ්ඩිතං ඛිපිතං ඛෙළං සිඞ්ඝාණිකං සිලෙසුමං, වසඤ්ච ඩය්හමානානං විජාතානඤ්ච ලොහිතං.
131. වණිතානඤ්ච යං ඝානසීසච්ඡින්නාන ලොහිතං, ඛුදාපරෙතා භුඤ්ජාමි ඉත්ථිපුරිසනිස්සිතං.
132. පුබ්බලොහිතභක්ඛාස්මි පසූනං මානුසාන ච, අලෙනා අනගාරා ච නීලමඤ්ච පරායනා.
133. සාරිපුත්තස්ස දානෙන මොදාමි අකුතොභයා, මුනිං කාරුණිකං ලොකෙ භන්තෙ වන්දිතුමාගතා’ති.
සාරිපුත්තත්ථෙරස්ස මාතුපෙතවත්ථු දුතියං.
2. 3.
134. නග්ගා දුබ්බණ්ණරූපාසි කිසා ධමනි සන්ථතා, උප්ඵාසුලිකෙ කිසිකෙ කා නු ත්වං ඉධ තිට්ඨසි?.
135. අහං මත්තා තුවං තිස්සා සපත්ති තෙ පුරෙ අහුං, පාපකම්මං කරිත්වාන පෙතලොකමිතො ගතාති.
136. කින්නු කායෙන වාචාය මනසා දුක්කටං කතං, කිස්ස කම්මවිපාකෙන පෙතලොකමිතො ගතා?.
137. චණ්ඩී ච ඵරුසා චාසිං ඉස්සුකී මච්ඡරී සඨා,{1} තාහං දුරුත්තං වත්වාන පෙතලොකමිතො ගතා.
138. සබ්බං{1} අහම්පි ජානාමි යථා ත්වං චණ්ඩිකා අහු, අඤ්ඤඤ්ච ඛො තං පුච්ඡාමි කෙනාසි පංසුකුණ්ඨිතා{2}.
139. සීසං නහාතා ත්වං ආසි සුචිවත්ථා අලඞ්කතා, අහඤ්ච ඛො තං අධිමත්තං සමලඞ්කතතරා තයා.
140. තස්සා මෙ පෙක්ඛමානාය සාමිකෙන සමන්තයි, තතො මෙ ඉස්සා විපුලා කොධො මෙ සමජායථ.
141. තතො පංසුං ගහෙත්වාන පංසුනා තං හි ඔකිරිං, තස්ස කම්මවිපාකෙන තෙනම්හි පංසුකුණ්ඨිතා.
142. සබ්බං අහම්පි ජානාමි පංසුනා මං ත්වමොකිරි, අඤ්ඤඤ්ච ඛො තං පුච්ඡාමි කෙන ඛජ්ජසි කච්ඡුයා.
143. භෙසජ්ජහාරි උභයො වනන්තං අගමිම්හසෙ, ත්වඤ්ච භෙසජ්ජමාහරි අහඤ්ච කපිකච්ඡුනො.
144. තස්සා ත්යාජානමානාය සෙය්යං ත්යාහං සමොකිරිං, තස්ස කම්මවිපාකෙන තෙන ඛජ්ජාමි කච්ඡුයා.
145. සබ්බං අහම්පි ජානාමි සෙය්යං මෙ ත්වං සමොකිරි, අඤ්ඤඤ්ච ඛො තං පුච්ඡාමි කෙනාසි නග්ගියා තුවං.
146. සහායානං සමයො ආසි ඤාතිනං සමිතී අහු, ත්වඤ්ච ආමන්තිතා ආසි සසාමිනී නො ච ඛො අහං.
147. තස්සා ත්යාජානමානාය දුස්සන්ත්යාහං අපානුදිං, තස්ස කම්මවිපාකෙන තෙනම්හි නග්ගියා අහං.
148. සබ්බං{1} අහම්පි ජානාමි දුස්සං මෙ ත්වං අපානුදි, අඤ්ඤඤ්ච ඛො තං පුච්ඡාමි කෙනාසි ගූථගන්ධිනී.
149. තව ගන්ධඤ්ච මාලඤ්ච පච්චග්ඝඤ්ච විලෙපනං. ගූථකූපෙ අතාරෙසිං තං පාපං පකතං මයා: තස්ස කම්මවිපාකෙන තෙනම්හි ගූථගන්ධිනි.
150. සබ්බං අහම්පි ජානාමි නං පාපං පකතං තයා, අඤ්ඤඤ්ච ඛො තං පුච්ඡාමි කෙනාසි දුග්ගතා තුවං.
151. උභින්නං සමකං ආසි යං ගෙහෙ විජ්ජතෙ ධනං, සන්තෙසු දෙය්යධම්මෙසු දීපං නාකාසිමත්තනො, තස්ස කම්මවිපාකෙන තෙනම්හි දුග්ගතා අහං.
152. තදෙව මං ත්වං අවච පාපකම්මං නිසෙවසි න හි පාපෙහි කම්මෙහි සුලභා හොති සුග්ගති.
153. වාමතො ත්වං මං පච්චෙසි අථොපි මං උසුය්යසි පස්ස පාපානං කම්මානං විපාකො හොති යාදිසො.
154. තෙ ඝරදාසියො ආසුං තානෙවාහරණානි මෙ, තෙ චඤ්ඤෙ පරිවාරෙන්තී න භොගා හොන්ති සස්සතා.
155. ඉදානි භූතස්ස පිතා ආපණා ගෙහමෙහීති, අප්පෙව තෙ දදෙ කිඤ්චි මා සු තාව ඉතො අගා.
156. නග්ගා දුබ්බණ්ණරූපාම්හි කිසා ධමනිසන්ථතා, කොපීනමෙතං ඉත්ථීනං මා මං භූතපිතාද්දස,
157. හන්ද කිං තාහං දම්මි කිං වා ච තෙ කරොම්යහං, යෙන ත්වං සුඛිතා අස්ස සබ්බකාමසමිද්ධිනී.
158. චත්තාරො භික්ඛු සඞ්ඝතො චත්තාරො පුන පුග්ගලා. අට්ඨ භික්ඛූ භොජයිත්වා මම දක්ඛිණමාදිස, තදාහං සුඛිතා හෙස්සං සබ්බකාමස්මිද්ධිනී.
159. සාධූති සා පටිස්සුත්වා භොජයිත්වාට්ඨ භික්ඛවො, වත්ථෙහච්ඡාදයිත්වාන තස්සා දක්ඛිණමාදිසි.
160. සමනන්තරානුද්දිට්ඨෙ විපාකො උදපජ්ජථ, භොජනච්ඡාදනපානීයං දක්ඛිණායා ඉදං ඵලං
161. තතො සුද්ධා සුචිවසනා කාසිකුත්තමධාරිණී, විචිත්තවත්ථාභරණා සපත්තිං උපසඞ්කමි.
162. අභික්කන්තෙන වණ්ණෙන යා ත්වං තිට්ඨසි දෙවතෙ, ඔභාසෙන්තී දිසා සබ්බා ඔසධී විය තාරකා.
163. කෙන තෙ තාදිසො වණ්ණො කෙන තෙ ඉධමිජ්ඣති උප්පජ්ජන්ති ච තෙ භොගා යෙ කෙචි මනසො පියා.