සුත්තන්තපිටකෙ
ඛුද්දකනිකායො
පටිසම්භිදාමග්ගො
1. පඨමො පණ්ණාසකො
1. මහාවග්ගො
නමො තස්ස භගවතො අරහතො සම්මාසම්බුද්ධස්ස.
1.
ඤාණකථා.
මාතිකා
1. සොතාවධානෙ පඤ්ඤා සුතමයෙ ඤාණං.
2. සුත්වාන සංවරෙ පඤ්ඤා සීලමයෙ ඤාණං.
3. සංවරිත්වා සමාදහනෙ පඤ්ඤා සමාධිභාවනාමයෙ ඤාණං.
4. පච්චයපරිග්ගහෙ පඤ්ඤා ධම්මට්ඨිති ඤාණං.
5. අතීතානාගතපච්චුප්පන්නානං ධම්මානං සඞ්ඛිපිත්වා වවත්ථානෙ පඤ්ඤා සම්මසනෙ ඤාණං.
6. පච්චුප්පන්නානං ධම්මානං විපරිනාමානුපස්සනෙ පඤ්ඤා උදයබ්බයානුපස්සනෙ ඤාණං.
7. ආරම්මණං පටිසඞ්ඛා භඞ්ගානුපස්සනෙ පඤ්ඤා විපස්සනෙ ඤාණං.
8. භයතුපට්ඨානෙ පඤ්ඤා ආදීනවෙ ඤාණං.
9. මුඤ්චිතුකම්යතාපටිසඞ්ඛාසන්තිට්ඨනා පඤ්ඤා සඞ්ඛාරුපෙක්ඛාසු ඤාණං.
10. බහිද්ධා වුට්ඨානවිවට්ටනෙ පඤ්ඤා ගොත්රභූ ඤාණං.
11. දුභතො වුට්ඨානවිවට්ටනෙ පඤ්ඤා මග්ගෙ ඤාණං.
12. පයොගපටිප්පස්සද්ධි පඤ්ඤා ඵලෙ ඤාණං.
13. ඡින්නවට්ටමනුපස්සනෙ{1} පඤ්ඤා විමුත්ති ඤාණං.
14. තදා සමුදාගතෙ{1} ධම්මෙ පස්සනෙ{2} පඤ්ඤා පච්චවෙක්ඛනෙ ඤාණං.
15. අජ්ඣත්තවවත්ථානෙ පඤ්ඤා වත්ථුනානත්තෙ ඤාණං.
16. බහිද්ධාවවත්ථානෙ පඤ්ඤා ගොචරනානත්තෙ ඤාණං.
17. චරියාවවත්ථානෙ{3} පඤ්ඤා චරියානානත්තෙ ඤාණං.
18. චතුධම්මවවත්ථානෙ පඤ්ඤා භූමිනානත්තෙ ඤාණං.
19. නවධම්මවවත්ථානෙ පඤ්ඤා ධම්මනානත්තෙ ඤාණං.
20. අභිඤ්ඤාපඤ්ඤා ඤාතට්ඨෙ ඤාණං.
21. පරිඤ්ඤාපඤ්ඤා තීරණට්ඨෙ ඤාණං.
22. පහානෙ පඤ්ඤා පරිච්චාගට්ඨෙ ඤාණං.
23. භාවනාපඤ්ඤා එකරසට්ඨෙ ඤාණං.
24. සච්ඡිකිරියාපඤ්ඤා ඵුසනට්ඨෙ{4} ඤාණං.
25. අත්ථනානත්තෙ පඤ්ඤා අත්ථපටිසම්භිදෙ ඤාණං.
26. ධම්මනානත්තෙ පඤ්ඤා ධම්මපටිසම්භිදෙ ඤාණං.
27. නිරුත්තිනානත්තෙ පඤ්ඤා නිරුත්තිපටිසම්භිදෙ ඤාණං.
28. පටිභාන{5} නානත්තෙ පඤ්ඤා පටිභානපටිසම්භිදෙ ඤාණං.
29. විහාරනානත්තෙ පඤ්ඤා විහාරට්ඨෙ ඤාණං.
30. සමාපත්තිනානත්තෙ පඤ්ඤා සමාපත්තට්ඨෙ ඤාණං.
31. විහාරසමාත්තිනානත්තෙ පඤ්ඤා විහාරසමාපත්තට්ඨෙ ඤාණං.
32. අවික්ඛෙපපරිසුද්ධත්තා ආසවසමුච්ඡෙදෙ පඤ්ඤා ආනන්තරිකසමාධිස්මිං{6} ඤාණං.
33. දස්සනාධිපතෙය්යං සන්තො ච විහාරාධිගමො පණීතාධිමුත්තතා පඤ්ඤා අරණවිහාරෙ ඤාණං.
34. ද්වීහි බලෙහි සමන්නාගතත්තා තයො ච සඞ්ඛාරානං පටිප්පස්සද්ධියා සොළසහි ඤාණචරියාහි නවහි සමාධිචරියාහි වසිභාවතා{7} පඤ්ඤා නිරොධසමාපත්තියා ඤාණං.
35. සම්පජානස්ස පවත්තපරියාදානෙ පඤ්ඤා පරිනිබ්බානෙ ඤාණං.
36. සබ්බධම්මානං සම්මා සමුච්ඡෙදෙ නිරොධෙ ච අනුපට්ඨානතා පඤ්ඤා සමසීසට්ඨෙ ඤාණං.
37. පුථුනානත්තතෙජපරියොදානෙ{8} පඤ්ඤා සල්ලෙඛට්ඨෙ ඤාණං.
38. අසල්ලීනත්ත පහිතත්ත-පග්ගහට්ඨෙ පඤ්ඤා විරියාරම්භෙ ඤාණං.
39. නානාධම්මපකාසන්තා{1} පඤ්ඤා අත්ථසන්දස්සනෙ ඤාණං.
40. සබ්බධම්මානං එකසඞ්ගහතානානත්තෙකත්තපටිවෙධෙ පඤ්ඤා දස්සනවිසුද්ධිඤාණං.
41. විදිතත්තා පඤ්ඤා ඛන්ති ඤාණං.
42. ඵුට්ඨත්තා පඤ්ඤා පරියොගාහනෙ{2} ඤාණං.
43. සමොදහනෙ{3} පඤ්ඤා පදෙසවිහාරෙ ඤාණං.
44. අධිපතත්තා පඤ්ඤා සඤ්ඤාවිවට්ටෙ ඤාණං.
45. නානත්තෙ පඤ්ඤා චෙතොවිවට්ටෙ ඤාණං.
46. අධිට්ඨානෙ පඤ්ඤා චිත්තවිවට්ටෙ ඤාණං.
47. සුඤ්ඤතෙ පඤ්ඤා ඤාණවිවට්ටෙ ඤාණං.
48. වොස්සග්ගෙ පඤ්ඤා විමොක්ඛවිවට්ටෙ ඤාණං.
49. තථට්ඨෙ පඤ්ඤා සච්චවිවට්ටෙ ඤාණං.
50. කායම්පි චිත්තම්පි එකවවත්ථානතා සුඛසඤ්ඤඤ්ච ලහුසඤ්ඤඤ්ච අධිට්ඨානවසෙන ඉජ්ඣනට්ඨෙ පඤ්ඤා ඉද්ධිවිධෙ ඤාණං.
51. විතක්කවිප්ඵාරවසෙන නානත්තෙකත්ත සද්දනිමිත්තානං පරියොගාහනෙ{2} පඤ්ඤා සොතධාතුවිසුද්ධිඤාණං.
52. තිණ්ණං{4} චිත්තානං විප්ඵාරත්තා ඉන්ද්රියානං පසාදවසෙන නානත්තෙකත්තවිඤ්ඤාණචරියාපරියොගාහනෙ පඤ්ඤා චෙතොපරියඤාණං.
53. පච්චයප්පවත්තානං ධම්මානං නානත්තෙකත්තකම්මවිප්ඵාරවසෙන පරියොගාහනෙ{2} පඤ්ඤා පුබ්බෙනිවාසානුස්සති ඤාණං.
54. ඔභාසවසෙන නානත්තෙකත්තරූපනිමිත්තානං දස්සනට්ඨෙ පඤ්ඤා දිබ්බචක්ඛුඤාණං.
55. චතුසට්ඨියා ආකාරෙහි තිණ්ණං ඉන්ද්රියානං වසිභාවතා පඤ්ඤා ආසවානං ඛයෙ ඤාණං.
56. පරිඤ්ඤට්ඨෙ පඤ්ඤා දුක්ඛෙ ඤාණං.
57. පහානට්ඨෙ පඤ්ඤා සමුදයෙ ඤාණං.
58. සච්ඡිකිරියට්ඨෙ පඤ්ඤා නිරොධෙ ඤාණං.
59. භාවනට්ඨෙ පඤ්ඤා මග්ගෙ ඤාණං.
60. දුක්ඛෙ ඤාණං.
61. දුක්ඛසමුදයෙ ඤාණං.
62. දුක්ඛනිරොධෙ ඤාණං.
63. දුක්ඛනිරොධගාමිනියා පටිපදාය ඤාණං.
64. අත්ථපටිසම්භිදෙ ඤාණං.
65. ධම්මපටිසම්භිදෙ ඤාණං.
66. නිරුත්තිපටිසම්භිදෙ ඤාණං,
67. පටිභානපටිසම්භිදෙ ඤාණං.
68. ඉන්ද්රියපරොපරියත්තඤාණං.{1}
69. සත්තානං ආසයානුසයෙ ඤාණං.
70. යමකපාටිහීරෙ ඤාණං.
71. මහාකරුණාසමාපත්තියා ඤාණං.
72. සබ්බඤ්ඤුතඤාණං.
73. අනාවරණඤාණං.
ඉමානි තෙසත්තති ඤාණානි. ඉමෙසං තෙසත්තතියා{2} ඤාණානං සත්තසට්ඨි ඤාණානි සාවකසාධාරණානි. ඡ ඤාණානි අසාධාරණානි සාවෙකෙහි.{3}
මාතිකා නිට්ඨිතා.
1. සුතමයඤාණං.
1. කථං සොතාවධානෙ පඤ්ඤා සුතමයෙ ඤාණං:
‘ඉමෙ ධම්මා අභිඤ්ඤෙය්යා’ති සොතාවධානං, තංපජානනා පඤ්ඤා සුතමයෙ ඤාණං.
‘ඉමෙ ධම්මා පරිඤ්ඤෙය්යා’ති සොතාවධානං, තංපජානනා පඤ්ඤා සුතමයෙ ඤාණං.
‘ඉමෙ ධම්මා පහාතබ්බා’ති සොතාවධානං, තංපජානනා පඤ්ඤා සුතමයෙ ඤාණං.
‘ඉමෙ ධම්මා භාවෙතබ්බා’ති සොතාවධානං, තංපජානනා පඤ්ඤා සුතමයෙ ඤාණං.
‘ඉමෙ ධම්මා සච්ඡිකාතබ්බා’ති සොතාවධානං, තංපජානනා පඤ්ඤා සුතමයෙ ඤාණං.
‘ඉමෙ ධම්මා හානභාගියා’ති සොතාවධානං, තංපජානනා පඤ්ඤා සුතමයෙ ඤාණං.
‘ඉමෙ ධම්මා ඨිතිභාගියා’ති සොතාවධානං, තංපජානනා පඤ්ඤා සුතමයෙ ඤාණං.
‘ඉමෙ ධම්මා විසෙසභාගියා’ති සොතාවධානං, තංපජානනා පඤ්ඤා සුතමයෙ ඤාණං.
‘ඉමෙ ධම්මා නිබ්බෙධභාගියා’ති සොතාවධානං, තංපජානනා පඤ්ඤා සුතමයෙ ඤාණං.
‘සබ්බෙ සඞ්ඛාරා අනිච්චා’ති සොතාවධානං, තංපජානනා පඤ්ඤා සුතමයෙ ඤාණං.
‘සබ්බෙ සඞ්ඛාරා දුක්ඛා’ති සොතාවධානං, තංපජානනා පඤ්ඤා සුතමයෙ ඤාණං.
‘සබ්බෙ සඞ්ඛාරා අනත්තා’ති සොතාවධානං, තංපජානනා පඤ්ඤා සුතමයෙ ඤාණං.
‘ඉදං දුක්ඛං අරියච්ච’න්ති සොතාවධානං, තංපජානනා පඤ්ඤා සුතමයෙ ඤාණං.
‘ඉදං දුක්ඛසමුදයො{1} අරියසච්ච’න්ති සොතාවධානං, තංපජානනා පඤ්ඤා සුතමයෙ ඤාණං.