23. න තං කම්මං කතං සාධු යං කත්වා අනුතප්පති, යස්ස අස්සුමුඛො රොදං විපාකං පටිසෙවතී”ති.
ඉදං සංකිලෙසභාගියං සුත්තං.
24. “දුක්කරං දුත්තිතික්ඛං ච අවියත්තෙන සාමඤ්ඤං, බහූහි තත්ථ සම්බාධා යත්ථ බාලො විසීදති.
25. යො හි අත්ථං ච ධම්මං ච භාසමානෙ තථාගතෙ, මනං පදොසියෙ බාලො මොඝං ඛො තස්ස ජීවිතං.
26. එතඤ්චා’හං අරහාමි දුක්ඛඤ්ච ඉතො ච පාපියතරං භන්තෙ, යො අප්පමෙය්යෙසු තථාගතෙසු චිත්තං පදොසෙමි අවීතරාගො”ති.
ඉදං සංකිලෙසභාගියං සුත්තං.
27. “අප්පමෙය්යං පමිණන්තො කො’ධ විද්වා විකප්පයෙ, අප්පමෙය්යං පමායන්තං නිවුතං මඤ්ඤෙ අකිස්සව”න්ති.
ඉදං සංකිලෙසභාගියං සුත්තං.
28. “පුරිසස්ස හි ජාතස්ස කුඨාරී ජායතෙ මුඛෙ, යාය ඡින්දති අත්තානං බාලො දුබ්භාසිතං භණං.
29. “න හි සත්ථං සුනිසිතං විසං හලාහලං ඉව, එවං විරුද්ධං පාතෙති වාචා දුබ්භාසිතා යථා”ති.
ඉදං සංකිලෙසභාගියං සුත්තං.
30. “යො නින්දියං පසංසති තං වා නින්දති යෙ පසංසියො, විචිනාති මුඛෙන සො කලිං කලිනා තෙන සුඛං න වින්දති.
31. අප්පමත්තො අයං කලි යො අක්ඛෙසු ධනපරාජයො. සබ්බස්සා’පි සහා’පි අත්තනා අයමෙව මහන්තතරො කලි යො සුගතෙසු මනං පදොසයෙ.
32. සතං සහස්සානං නිරබ්බුදානං, ඡත්තිංසති පඤ්ච ච අබ්බුදානි, යමරියගරහී නිරයං උපෙති, වාචං මනඤ්ච පණිධාය පාපක”න්ති.
ඉදං සංකිලෙසභාගියං සුත්තං.
33. “යො ලොභගූණෙ අනුයුත්තො සො වචසා පරිභාසති අඤ්ඤෙ අස්සද්ධො අකදරියො{1} අවදඤ්ඤූ මච්ඡරී පෙසුනියං අනුයුත්තො
34 මුඛදුග්ග, විභූත, අනරිය භූනහු පාපක දුක්කතකාරී පුරිසන්තකලි අවජාතකපුත්ත මා බහුභාණීධ නෙරයිකො’සි.
35. රජමාකිරසෙ අහිතාය සන්තෙ ගරහසි කිබ්බිසකාරි බහූනි දුච්චරිතානි චරිත්වා ගච්ඡසි පපතං චිරරත්ත”න්ති.
ඉදං සංකිලෙසභාගියං සුත්තං.
3. 4. 2.
(2) තත්ථ කතමං වාසනාභාගියං සුත්තං.
1. “මනො පුබ්බඞ්ගමා ධම්මා මනොසෙට්ඨා මනොමයා, මනසා චෙ පසන්නෙන භාසති වා කරොති වා; තතො නං සුඛමන්වෙති ඡායා’ව අනපායිනී”ති.
ඉදං වාසනාභාගියං සුත්තං.
මහානාමො සක්කො භගවන්තං එතදවොච: “ඉදං භන්තෙ කපිලවත්ථු ඉද්ධං චෙව ඵීතං ච බහුජනං{2} ආකිණ්ණමනුස්සං සම්බාධබ්යුහං. සො ඛො අහං භන්තෙ භගවන්තං පයිරුපාසිත්වා මනොභාවනීයෙ වා භික්ඛූ සායණ්හසමයං කපිලවත්ථුං පවිසන්තො භන්තෙන’පි හත්ථිනා සමාගච්ඡාමි, භන්තෙන’පි අස්සෙන සමාගච්ඡාමි, භන්තෙන’පි රථෙන සමාගච්ඡාමි, භන්තෙන’පි සකටෙන සමාගච්ඡාමි, භන්තෙන’පි පුරිසෙන සමාගච්ඡාමි. තස්ස මය්හං භන්තෙ තස්මිං සමයෙ මුස්සතෙ’ව භගවන්තං ආරබ්භ සති, මුස්සති ධම්මං ආරබ්භ සති, මුස්සති සඞ්ඝං ආරබ්භ සති. තස්ස මය්හං භන්තෙ එවං හොති: “ඉමම්හි චා’හං සමයෙ කාලං කරෙය්යං කා මමස්ස ගති,{3} කො අභිසම්පරායො’ති.
මා භායි මහානාම මා භායි මහානාම, අපාපකං තෙ මරණං භවිස්සති, අපාපිකා තෙ කාලකිරියා. චතුහි ඛො මහානාම ධම්මෙහි සමන්නාගතො අරියසාවකො නිබ්බානනින්නො හොති නිබ්බානපොණො නිබ්බානපබ්භාරො. කතමෙහි චතුහි: ඉධ මහානාම අරියසාවකො බුද්ධෙ අවෙච්චප්පාසාදෙන සමන්නාගතො හොති: “ඉතිපි සො භගවා අරහං -පෙ- සත්ථා දෙවමනුස්සානං බුද්ධො භගවා’ති. ධම්මෙ -පෙ- සඞ්ඝෙ -පෙ- අරියකන්තෙහි සීලෙහි සමන්නාගතො හොති අඛණ්ඩෙහි -පෙ- සමාධිසංවත්තනිකෙහි සෙය්යථාපි මහානාම රුක්ඛො පාචීනනින්නො පාචීනපොණො පාචීනපබ්භාරො, සො මූලෙහි ඡින්නො කතමෙන පපතෙය්යාති: යෙන භන්තෙ, නින්නො යෙන පොණො යෙන පබ්භාරො’ති. එවමෙව ඛො මහානාම ඉමෙහි චතුහි ධම්මෙහි සමන්නාගතො අරියසාවකො නිබ්බානනින්නො හොති නිබ්බානපොණො නිබ්බානපබ්භාරො. මා භායි මහානාම මා භායි මහානාම, අපාපකං තෙ මරණං භවිස්සති අපාපිකා තෙ කාලකිරියා”ති.
ඉදං වාසනාභාගියං සුත්තං.
2. සුඛකාමානි භූතානි යො දණ්ඩෙන න හිංසති. අත්තනො සුඛමෙසානො පෙච්ච සො ලභතෙ සුඛ”න්ති
ඉදං වාසනාභාගියං සුත්තං.
3. “ගුන්නං චෙ තරමානානං උජු ගච්ඡති පුඞ්ගවො සබ්බා ගාවී උජුං යන්ති නෙත්තෙ උජුගතෙ සති
4. එවමෙව මනුස්සෙසු යො හොතී සෙට්ඨසම්මතො, සො චෙව ධම්මං චරති පගෙව ඉතරා පජා, සබ්බං රට්ඨං සුඛං සෙති රාජා චෙ හොති ධම්මිකො”ති.
ඉදං වාසනාභාගියං සුත්තං.
“භගවා සාවත්ථියං විහරති ජෙතවනෙ අනාථපිණ්ඩිකස්ස ආරාමෙ, තෙන ඛො පන සමයෙන සම්බහුලා භික්ඛූ භගවතො චීවරකම්මං කරොන්ති: නිට්ඨිතචීවරො භගවා තෙමාසච්චයෙන චාරිකං පක්කමිස්සතී’ති. තෙන ඛො පන සමයෙන ඉසිදත්තපුරාණා ථපතයො{1} සාකෙතෙ{2} පටිවසන්ති කෙනචිදෙව කරණීයෙන. අස්සොසුං ඛො ඉසිදත්තපුරාණා ථපතයො සම්බහුලා කිර භික්ඛූ භගවතො චීවරකම්මං කරොන්ති නිට්ඨිතචීවරො භගවා තෙමාසච්චයෙන චාරිකං පක්කමිස්සතී’ති.
අථ ඛො ඉසිදත්තපුරාණා ථපතයො මග්ගෙ පුරිසං ඨපෙසුං: යදා ත්වා අම්භො පුරිස පස්සෙය්යාසි භගවන්තං ආගච්ඡන්තං අරහන්තං සම්මාසම්බුද්ධං. අථ අම්හාකං ආරොචෙය්යාසී’ති ද්වීහතීහං ඨිතො ඛො සො පුරිසො අද්දසා භගවන්තං දූරතො’ව ආගච්ඡන්තං, දිස්වාන යෙන ඉසිදත්තපුරාණා ථපතයො තෙනුපසඞ්කමි, උපසංකමිත්වා ඉසිදත්ත පුරාණෙ ථපතයො එතදවොච: අයං සො භන්තෙ භගවා ආගච්ඡති අරහං සම්මාසම්බුද්ධො, යස්සදානි කාලං මඤ්ඤථාති.
අථඛො ඉසිදත්තපුරාණා ඵපතයො යෙන භගවා තෙනුපසඞ්කමිංසු උපසංකමිත්වා භගවන්තං අභිවාදෙත්වා භගවන්තං පිට්ඨිතො පිට්ඨිතො අනුබන්ධිංසු, අථඛො භගවා මග්ගා ඔක්කම්ම යෙනඤ්ඤතරං රුක්ඛමූලං තෙනුපසංකමි, උපසංකමිත්වා පඤ්ඤත්තෙ ආසනෙ නිසීදි. ඉසිදත්තපුරාණා’පි ඛො ථපතයො භගවන්තං අභිවාදෙත්වා එකමන්තං නිසීදිංසු. එකමන්තං නිසින්නා ඛො ඉසිදත්තපුරාණා ථපතයො භගවන්තං එතදවොචුං.
යදා මයං භන්තෙ භගවන්තං සුණොම සාවත්ථියා කොසලෙසු චාරිකං පක්කමිස්සතී’ති, හොති නො තස්මිං සමයෙ අනත්තමනතා හොති දොමනස්සං දූරෙ නො භගවා භවිස්සතීති, යදා පන මයං භන්තෙ භගවන්තං සුණොම සාවත්ථියා කොසලෙසු චාරිකං පක්කන්තොති, හොති නො තස්මිං සමයෙ අනත්තමනතා හොති දොමනස්සං දූරෙ නො භගවා’ති.
යදා මයං භන්තෙ භගවන්තං සුණොම කාසිසු මගධෙසු චාරිකං පක්කමිස්සතී’ති හොති නො තස්මිං සමයෙ අනත්තමනතා හොති දොමනස්සං දූරෙ නො භගවා භවිස්සතී’ති. යදා පන මයං භන්තෙ භගවන්තං සුණොම කාසීසු මගධෙසු චාරිකං පක්කන්තොති, අනප්පකා නො තස්මිං සමයෙ අනත්තමනතා හොති අනප්පකාං දොමනස්සං දූරෙ නෙ භගවාති.
යදා මයං භන්තෙ භගවන්තං සුණොම මගධෙසු කාසීසු චාරිකං පක්කමිස්සතී’ති හොති නො තස්මිං සමයෙ අත්තමනතා හොති සොමනස්සං, ආසන්නෙ නො භගවා භවිස්සතීති. යදා පන මයං භන්තෙ භගවන්තං සුණොම මගධෙසු කාසිසු චාරිකං පක්කන්තොති, හොති නො තස්මිං සමයෙ අත්තමනතා හොති සොමනස්සං ආසන්නෙ නො භගවා’ති.
යදා මයං භන්තෙ භගවන්තං සුණොම කොසලෙසු සාවත්ථියං චාරිකං පක්කමිස්සතී’ති හොති නො තස්මිං සමයෙ අත්තමනතා හොති සොමනස්සං ආසන්නෙ නො භගවා භවිස්සතී’ති. යදා පන මයං භන්තෙ භගවන්තං සුණොම සාවත්ථියං විහරති ජෙතවනෙ අනාථපිණ්ඩිකස්ස ආරාමෙති, අනප්පකා නො තස්මිං සමයෙ අත්තමනතා හොති අනප්පකං සොමනස්සං ආසනෙන නො භගවා’ති.
තස්මාතිහ ථපතයො, සම්බාධො ඝරාවාසො රජාපථො, අබ්භොකාසො පබ්බජ්ජා, අලං ච පන වො ථපතයො අප්පමාදායා’ති, අත්ථි ඛො නො භන්තෙ එතම්හා සම්බාධා අඤ්ඤො සම්බාධො සම්බාධතරො චෙව සම්බාධසංඛාතතරො චා’ති, කතමො පන වො ථපතයො එතම්හා සම්බාධා අඤ්ඤො සම්බාධො සම්බාධතරො චෙව සම්බාධසංඛාතතරොචාති.
ඉධ මයං භන්තෙ යදා රාජා පසෙනදිකොසලො උය්යානභූමිං ගන්තුකාමො{1} හොති යෙ තෙ රඤ්ඤො පසෙනදිස්ස කොසලස්ස නාගා ඔපවය්හා, තෙ කප්පෙත්වා යා තා රඤ්ඤො පසෙනදිස්ස කොසලස්ස පජාපතියො පියා මනාපා තා{2} එකං පුරතො එකං පච්ඡතො නිසීදාපෙම. තාසං ඛො පන භන්තෙ භගිනීනං එවරූපො ගන්ධො හොති, සෙය්යථාපි නාම ගන්ධකරණ්ඩකස්ස තාවදෙව චිවරියමානස්ස යථා තං රාජාරහෙන ගන්ධෙන විභූසිතානං. තාසං ඛො පන භන්තෙ භගිනීනං එවරූපො කායසම්ඵස්සො හොති. සෙය්යථාපි නාම තූලපිචුනො වා කප්පාසපිචුනො වා යථා තං රාජකඤ්ඤානං සුඛෙධිතානං, තස්මිං ඛො පන භන්තෙ සමයෙ නාගො’පි රක්ඛිතබ්බො හොති, තා’පි භගිනියො රක්ඛිතබ්බා හොන්ති. අත්තාපි රක්ඛිතබ්බො හොති. න ඛො පන මයං භන්තෙ අභිජානාම තාසු භගිනීසු පාපකං චිත්තං උප්පාදෙන්තා. අයං ඛො නො භන්තෙ එතම්හා සම්බාධා අඤ්ඤො සම්බාධො සම්බාධතරො වෙව සම්බාධසඞ්ඛාතතරො චා’ති.
තස්මාතිහ ථපතයො සම්බාධො ඝරාවාසො රජාපථො, අබ්භොකාසො පබ්බජ්ජා, අලං ච පන වො ථපතයො අප්පමාදාය. චතුහි ඛො ථපතයො ධම්මෙහි සමන්නාගතො අරියසාවකො සොතාපන්නො හොති. අවිනිපාතධම්මො නියතො සම්බොධිපරායණො, කතමෙහි චතුහි: ඉධ ථපතයො සුතවා අරියසාවකො බුද්ධො අවෙච්චප්පසාදෙන සමන්නාගතො හොති. ඉතිපි සො භගවා -පෙ- සත්ථා දෙව මනුස්සානං බුද්ධො භගවා’ති, ධම්මෙ -පෙ- සඞ්ඝෙ -පෙ- චීගතමලමච්ඡෙරෙන චෙතසා අගාරං අජ්ඣාවසති මුත්තචාගො පයතපාණි වොස්සග්ගරතො යාචයොගො දානසංවිභාගරතො අප්පටිවිභත්තං සීලවන්තෙහි කල්යාණධම්මෙහි, ඉමෙහි ඛො ථපතයො චතුහි ධම්මෙහි සමන්නාගතො අරියසාවකො සොතාපන්නො හොති අවිනිපාතධම්මො නියතො සම්බොධිපරායණො. තුම්හෙ ඛො ථපතයො බුද්ධෙ අවෙච්චප්පසාදෙන සමන්නාගතා: ඉති’පි සො භගවා -පෙ- සත්ථා දෙව මනුස්සානං බුද්ධො භගවා’ති. ධම්මෙ -පෙ- සඞ්ඝෙ -පෙ- යං ඛො පන කිඤ්චි කුලෙ දෙය්යධම්මං, සබ්බං තං අප්පටිවිභත්තං සීලවන්තෙහි කල්යාණධම්මෙහි, තං කිම්මඤ්ඤථ ථපතයො කති විය තෙ කොසලෙසු මනුස්සා යෙ තුම්හාකං සමසමා යදිදං දානසංවිභාගෙගී’ති? ලාභා නො භන්තෙ සුලද්ධං නො භන්තෙ, යෙසං නො භගවා එවං ජානාතී”ති.
ඉදං වාසනාභාගියං සුත්තං.
5. “එකපුප්ඵං චජිත්වාන සහස්සං කප්පකොටියො,{4} දෙවෙ චෙව මනුස්සෙ ච සෙසෙන පරිනිබ්බුතො”
ඉදං වාසනාභාගියං සුත්තං.
6. “අස්සත්ථෙ හරිතො’භාසෙ සංවිරූළ්හම්හි පාදපෙ, එකං බුද්ධගතං සඤ්ඤං අලභිස්සං{5} පතිස්සතො.
7. අජ්ජ තිංසං තතො කප්පා නාභිජානාමි දුග්ගතිං, තිස්සො විජ්ජා සච්ඡිකතා තස්සා සඤ්ඤාය වාහසා”ති{*}
ඉදං වාසනාගාගියං සුත්තං.
8. “පිණ්ඩාය කොසලං පුරං පාවිසි අග්ගපුග්ගලො, අනුකම්පකො පුරෙභත්තං තණ්හානිග්ඝාතකො මුනි.
9. පුරිසස්ස වටංසකො හත්ථෙ සබ්බපුප්ඵෙහි{1} ලංකතො, සො අද්දසාසි සම්බුද්ධං භික්ඛුසඞ්ඝපුරක්ඛතං.
10. පවිසන්තං රාජමග්ගෙන දෙවමානුසපූජිතං, හට්ඨො චිත්තං පසාදෙත්වා සම්බුද්ධමුපසඞ්කමි.
11. සො තං වටංසකං සුරභිං වණ්ණවන්තං මනොරමං, සම්බුද්ධස්සු’පනාමෙසි පසන්නො සෙහි පාණිහි.
12. තතො අග්ගිසිඛාවණ්ණා බුද්ධස්ස ලපනන්තරා, සහස්සරංසි විජ්ජුරිව ඔක්කා නික්ඛමි ආනනා.
13. පදක්ඛිණං කරිත්වාන සීසෙ ආදිච්චබන්ධුනො, තික්ඛත්තුං පරිවත්තෙත්වා මුද්ධනන්තරධායථ.
14. ඉදං දිස්වාන අච්ඡිරියං අබ්භුතං ලොමහංසනං, එකංසං චීවරං කත්වා ආනන්දො එතදබ්රවි.
15. කො හෙතු සිතකම්මාය බ්යාකරොහි මහාමුනෙ, ධම්මාලොකො භවිස්සති කඞ්ඛා විතර නො මුනෙ.
16. යස්ස තං සබ්බධම්මෙසු සදා ඤාණං පවත්තති, කඞ්ඛා වෙමතිකං ථෙරං ආනන්දං එතදබ්රවි.
17. යො සො ආනන්ද පුරිසො මයි චිත්තං පසාදයි, චතුරාසීති කප්පානි දුග්ගතිං න ගමිස්සති.
18. දෙවෙසු දෙවසොභග්ගං දිබ්බං රජ්ජං පසාසිය, මනුජෙසු මනුජින්දො රාජා රට්ඨෙ භවිස්සති.
19. සො චරිමං පබ්බජිත්වාන සච්ඡිකත්වාන ධම්මතං. පච්චෙකබුද්ධො ධුතරාගො වටංසකො නාම භවිස්සති.
20. නත්ථි චිත්තෙ පසන්නම්හි අප්පිකා නාම දක්ඛිණා, තථාගතෙ වා සම්බුද්ධෙ අථ වා තස්ස සාවකෙ.
21 එවං අචින්තියා බුද්ධා බුද්ධධම්මා අචින්තියා. අචින්තියෙසු පසන්නානං විපාකො හොති අචින්තියො”
ඉදං වාසනාභාගියං සුත්තං.
“ඉදා’හං{1} භික්ඛවෙ එකච්චං පුග්ගලං පසන්නචිත්තං එවං චෙතසා චෙතො පරිච්ච පජානාමි: (යථා ඛො අයං පුග්ගලො ඉරීයති යඤ්ච පටිපදං පටිපන්නො යඤ්ච මග්ගං සමාරූළ්හො,) ඉමස්මිං චා’යං සමයෙ පුග්ගලො කාලං කරෙය්ය, යථා’භතං නික්ඛිත්තො එවං සග්ගෙ. තං කිස්ස හෙතු: චිත්තං භි’ස්ස භික්ඛවෙ පසන්නං{2} චිත්තප්පසාදහෙතු ඛො පන එවමිධෙකච්චො කායස්ස භෙදා පරම්මරණා සුගතිං සග්ගං ලොකං උපපජ්ජෙය්යා’ති. එතමත්ථං භගවා අවොච. තත්ථෙතං වුච්චති:
22. “පසන්නචිත්තං ඤත්වාන එකච්චමිධ පුග්ගලං, එතමත්ථං වියාකාසි බුද්ධො{3} භික්ඛූන සන්තිකෙ.
23. ඉමම්හි චා’යං සමයෙ කාලං කයිරාථ{4} පුග්ගලො, සුගතිං උපපජ්ජෙය්ය චිත්තං හි’ස්ස පසාදිතං, චෙතොපසාදහෙතු හි සත්තා ගච්ඡන්ති සුග්ගතිං.
24. යථාභතං නික්ඛිපෙය්ය එවමෙවං{5} තථාවිධො, කායස්ස භෙදා සප්පඤ්ඤො සග්ගං සො උපපජ්ජති.
අයම්පි අත්ථො වුත්තො භගවතා ඉති මෙ සුත”න්ති
ඉදං වාසනාභාගියං සුත්තං.
25. “සුවණ්ණඡදනං{6} නාවං නාරී ආරුය්හ තිට්ඨසි, ඔගාහසෙ{7} පොක්ඛරණිං පදුමං ඡින්දසි පාණිනා.
26. කෙන තෙ තාදිසො වණ්ණො අනුභාවො{8} ජුතී ච තෙ, උප්පජ්ජන්ති ච තෙ භොගා යෙ කෙචි මනසි’ච්ඡිතා, පුච්ඡිතා දෙවතෙ සංස කිස්ස කම්මස්සිදං ඵලං.
27. සා දෙවතා අත්තමනා දෙවරාජෙන පුච්ඡිතා, පඤ්හං පුට්ඨා වියාකාසි සක්කස්ස ඉති මෙ සුතං.
28. අද්ධානං පටිපන්නා’හං දිස්වා ථූපං මනොරමං, තත්ථ චිත්තං පසාදෙසිං කස්සපස්ස යසස්සිනො.
29. පදුමපුප්ඵෙහි පූජෙසිං පසන්නා සෙහි පාණිහි, තස්සෙව කම්මස්ස ඵලං විපාකො එතාදිසං කතපුඤ්ඤා ලභන්ති”
ඉදං වාසනාභාගියං සුත්තං.
දානකථා සීලකථා සග්ගකථා පුඤ්ඤකථා පුඤ්ඤවිපාකකථා
ඉදං වාසනාභාගියං සුත්තං.
30. අපිචාපි පංසුථූපෙසු උද්දිස්ස කතෙසු දසබලධරානං. තත්ථපි කාරං කත්වා සග්ගෙසු නරා පමොදන්ති”
ඉදං වාසනාභාගියං සුත්තං.
31 “දෙවපුත්තසරීරවණ්ණා සබ්බෙ සුභගසණ්ඨිතී, උදකෙන පංසුං තෙමෙත්වා ථූපං වඩ්ඪෙථ කස්සපං.
32 අයං සුගත්තෙ සුගතස්ස ථූපො මහෙසිනො දසබලධම්මධාරිනො, යස්මිං ඉමෙ දෙවමනුජා පසන්නා කාරං කරොන්තා ජරාමරණා පමුච්චරෙ”
ඉදං වාසනාභාගියං සුත්තං.
33. “උළාරං වත තං ආසි යාහං ථූපං මහෙසිනො, උප්පලානි ච චත්තාරි මාලං ච අභිරොපයිං.
34. අජ්ජ තිංසං තතො කප්පා නාභිජානාමි දුග්ගතිං, විනිපාතං න ගච්ඡාමි ථූපං පූජෙත්ව සත්ථුනො”
ඉදං වාසනාභාගියං සුත්තං.
35. “බත්තිංසලක්ඛණධරස්ස විජිතවිජයස්ස ලොකනාථස්ස, සතසහස්සං කප්පෙ මුදිතො ථූපං අපූජෙසි.
36. යං මයා පසුතං පුඤ්ඤං තෙන ච පුඤ්ඤෙන දෙවසොභග්ගං, රජ්ජානි ච කාරිතානි අනාගන්තූන විනිපාතං.
37. යං චක්ඛුං අදන්තදමකස්ස සාසනෙ පණිහිතං තථා, චිත්තං තං මෙ සබ්බං ලද්ධං විමුත්ත චිත්තම්හි විධුතලතොති”
ඉදං වාසනාභාගියං සුත්තං.
38. “සාමාකපත්ථොදනමත්තමෙව හි පච්චෙකබුද්ධස්මිං අදාසි දක්ඛිණං, විමුත්තචිත්තෙ අඛිලෙ අනාසවෙ අරණවිහාරිම්භි අසංගමානසෙ.
39. තස්මිඤ්ච ඔකප්පයි ධම්මමුත්තමං තස්මිඤ්ච ධම්මෙ පණිධෙසිං මානසං එවං විහාරීහි මෙ සංගමො සියා භවෙ කුදස්සු’පි ච මා අපෙක්ඛවා.
40. තස්සෙව කම්මස්ස විපාකතො අහං සහස්සක්ඛත්තුං කුරූසූපපජ්ජථ, දීඝායුකෙසු අමමෙසු පාණිසු වීසෙසගාමීසු අහීනගාමීසු.
41. තස්සෙ ව කම්මස්ස විපාකතො අහං සහස්සක්ඛත්තුං තිදසො’පපජ්ජථ, විචිත්ර මාලාභරණානුලෙපිසු විසිට්ඨකායූ’පගතො යසස්සිසු.
42 තස්සෙව කම්මස්ස විපාකතො අහං විමුත්තචිත්තො අඛිලො අනාසවො, ඉමෙහි මෙ අන්තිම දෙහධාරීහි සමාගමො ආසි හිතාහිතාසිහි.
43 පච්චක්ඛං ඛ්විමං අවච තථාගතො ජිනො සමිජ්ඣතෙ සීලවතො යදිච්ඡති, යථා යථා මෙ මනසා විචින්තිතං. තථා සමිද්ධං අයමන්තිමො භවො”
ඉදං වාසනාභාගියං සුත්තං.
44. “එකතිංසම්හි කප්පම්හි ජිනො අනෙජො, අනන්තදස්සී භගවා සිඛීති. තස්සා’පි රාජා භාතා සිඛණ්ඩී බුද්ධෙ ච ධම්මෙ ච අභිප්පසන්නො.
45. පරිනිබ්බුතො ලොකවිනායකම්හි ථූපං සකාසී විපුලං මහන්තං, සමන්තතො ගාවුතිකං මහෙසිනො දෙවා’තිදෙවස්ස නරුත්තමස්ස.
46. තස්මිං මනුසෙසා බලිමාභිහාරී පග්ගය්හ ජාතිසු මනං පහට්ඨො, වාතෙන පුප්ඵං පති තස්ස එකං තාහං ගහෙත්වාන තස්සෙව’දාසිං.
47. සො මං අවොචා’තිපසන්නචිත්තො තුය්හෙව චෙතං පුප්ඵං දදාමි, තා’හං ගහෙත්වා අභිරොපයෙසිං පුනප්පුනං බුද්ධමනුස්සරන්තො.
48. අජ්ජ තිංසං තතො කප්පා නාභිජානාමි දුග්ගතිං, විනිපාතං න ගච්ඡාමි ථූපපූජායිදං ඵලං”