සාධු සාධු මහාරාජ, සාධු ඛො තෙ එතං මහාරාජ, එවං හොති. සාධු ච පන තෙ එතං අරහතං සුතං. තං කිං මඤ්ඤසි මහාරාජ, ඉධාස්ස බ්රාහ්මණො -පෙ- ඉධාස්ස වෙස්සො -පෙ- ඉධාස්ස සුද්දො පාණාතිපාතා පටිවිරතො අදින්නාදානා පටිවිරතො -පෙ- සම්මාදිට්ඨි, කායස්ස භෙදා පරම්මරණා සුගතිං සග්ගං ලොකං උපපජ්ජෙය්ය, නො වා, කථං වා තෙ එත්ථ හොතීති?
සුද්දොපි හි භො කච්චාන, පාණාතිපාතා පටිවිරතො අදින්නාදානා පටිවිරතො -පෙ- සම්මාදිට්ඨි කායස්ස භෙදා පරම්මරණා සුගතිං සග්ගං ලොකං උපපජ්ජෙය්ය, එවං මෙ එත්ථ හොති, එවඤ්ච පන මෙ එතං අරහතං සුතන්ති.
සාධු සාධු මහාරාජ, සාධු ඛො තෙ එතං මහාරාජ, එවං හොති. සාධු ච පන තෙ එතං අරහතං සුතං. තං කිං මඤ්ඤසි මහාරාජ, යදි එවං සන්තෙ ඉමෙ චත්තාරො වණ්ණා සමසමා හොන්ති, නො වා, කථං වා තෙ එත්ථ හොතීති?
අද්ධා ඛො භො කච්චාන, එවං සන්තෙ ඉමෙ චත්තාරො වණ්ණා සමසමා හොන්ති. නෙසං{3} එත්ථ කිඤ්චි නානාකරණං සමනුපස්සාමීති.
ඉමිනාපි ඛො එතං මහාරාජ, පරියායෙන වෙදිතබ්බං: යථා ඝොසො යෙවෙසො ලොකස්මිං, බ්රාහ්මණාව සෙට්ඨො වණ්ණො, හීනො අඤ්ඤො වණ්ණො -පෙ- බ්රහ්මදායාදාති.
තං කිං මඤ්ඤසි මහාරාජ, ඉධ ඛත්තියො සන්ධිං වා ඡින්දෙය්ය, නිල්ලොපං වා හරෙය්ය, එකාගාරිකං වා කරෙය්ය, පරිපන්ථෙ වා තිට්ඨෙය්ය, පරදාරං වා ගච්ඡෙය්ය. තං චෙතෙ පුරිසා ගහෙත්වා දස්සෙය්යුං: ‘අයං තෙ දෙව, චොරො ආගුචාරී,{1} ඉමස්ස යං ඉච්ඡසි, තං දණ්ඩං පණෙහී’ති කින්ති නං කරෙය්යාසීති?
ඝාතෙය්යාම වා, භො කච්චාන, ජාපෙය්යාම{2} වා, පබ්බාජෙය්යාම වා, යථාපච්චයං වා කරෙය්යාම. තං කිස්ස හෙතු? යා හිස්ස භො කච්චාන, පුබ්බෙ ඛත්තියොති සමඤ්ඤා, සාස්ස අන්තරහිතා, චොරොත්වෙව සඞ්ඛං{3} ගච්ඡතී’ති.
තං කිං මඤ්ඤසි මහාරාජ, ඉධ බ්රාහ්මණො -පෙ- ඉධ වෙස්සො -පෙ- ඉධ සුද්දො සන්ධිං වා ඡින්දෙය්ය, නිල්ලොපං වා හරෙය්ය, එකාගාරිකං වා කරෙය්ය, පරිපන්ථෙ වා තිට්ඨෙය්ය, පරදාරං වා ගච්ඡෙය්ය. තං චෙතෙ පුරිසා ගහෙත්වා දස්සෙය්යුං: ‘අයං තෙ දෙව, චොරො ආගුචාරී,{1} ඉමස්ස යං ඉච්ඡසි තං දණ්ඩං පණෙහී’ති. කින්ති නං කරෙය්යාසීති?
ඝාතෙය්යාම වා භො කච්චාන, ජාපෙය්යාම වා පබ්බාජෙය්යාම වා යථාපච්චයං වා කරෙය්යාම. තං කිස්ස හෙතු? යා හිස්ස භො කච්චාන, පුබ්බෙ සුද්දොති සමඤ්ඤා සාස්ස අන්තරහිතා, චොරොත්වෙව සඞ්ඛං{3} ගච්ඡතීති.
තං කිං මඤ්ඤසි මහාරාජ, යදි එවං සන්තෙ, ඉමෙ චත්තාරො වණ්ණා සමසමා හොන්ති, නො වා, කථං වා තෙ එත්ථ හොතීති?
අද්ධා ඛො භො කච්චාන, එවං සන්තෙ ඉමෙ චත්තාරො වණ්ණා සමසමා හොන්ති. නෙසං එත්ථ කිඤ්චි නානාකරණං සමනුපස්සාමීති.
ඉමිනාපි ඛො එතං මහාරාජ, පරියායෙන වෙදිතබ්බං: යථා ඝොසො යෙවෙසො ලොකස්මිං, බ්රාහ්මණාව සෙට්ඨො වණ්ණො, හීනො අඤ්ඤො වණ්ණො -පෙ- බ්රහ්මදායාදාති.
තං කිං මඤ්ඤසි මහාරාජ, ඉධ ඛත්තියො කෙසමස්සුං ඔහාරෙත්වා කාසායානි වත්ථානි අච්ඡාදෙත්වා අගාරස්මා අනගාරියං පබ්බජිතො අස්ස, විරතො පාණාතිපාතා විරතො අදින්නාදානා විරතො මුසාවාදා එකභත්තිකො බ්රහ්මචාරී සීලවා කල්යාණධම්මො, කින්ති නං කරෙය්යාසීති?
අභිවාදෙය්යාම වා භො කච්චාන, පච්චුට්ඨෙය්යාම වා ආසනෙන වා නිමන්තෙය්යාම අභිනිමන්තෙය්යාම වා නං චීවරපිණ්ඩපාතසෙනාසනගිලානපච්චයභෙසජ්ජපරික්ඛාරෙහි, ධම්මිකං වා අස්ස රක්ඛාවරණගුත්තිං සංවිදහෙය්යාම. තං කිස්ස හෙතු? යා හිස්ස භො කච්චාන, පුබ්බෙ ඛත්තියොති සමඤ්ඤා, සාස්ස අන්තරහිතා, සමණොත්වෙව සඞ්ඛං{3} ගච්ඡතීති.
තං කිං මඤ්ඤසි මහාරාජ, ඉධ බ්රාහ්මණො -පෙ- ඉධ වෙස්සො -පෙ- ඉධ සුද්දො කෙසමස්සුං ඔහාරෙත්වා කාසායානි වත්ථානි අච්ඡාදෙත්වා අගාරස්මා අනගාරියං පබ්බජිතො අස්ස, විරතො පාණාතිපාතා විරතො අදින්නාදානා විරතො මුසාවාදා එකභත්තිකො බ්රහ්මචාරී සීලවා කල්යාණධම්මො, කින්ති නං කරෙය්යාසීති?
අභිවාදෙය්යාම වා භො කච්චාන, පච්චුට්ඨෙය්යාම වා ආසනෙන වා නිමන්තෙය්යාම අභිනිමන්තෙය්යාම වා නං චීවරපිණ්ඩපාතසෙනාසනගිලානපච්චයභෙසජ්ජපරික්ඛාරෙහි, ධම්මිකං වා අස්ස රක්ඛාවරණගුත්තිං සංවිදහෙය්යාම. තං කිස්ස හෙතු? යා හිස්ස භො කච්චාන, පුබ්බෙ සුද්දොති සමඤ්ඤා සාස්ස අන්තරහිතා, සමණොත්වෙව සඞ්ඛං ගච්ඡතීති.
තං කිං මඤ්ඤසි මහාරාජ, යදි එවං සන්තෙ ඉමෙ චත්තාරො වණ්ණා සමසමා හොන්ති, නො වා, කථං වා තෙ එත්ථ හොතීති?
අද්ධා ඛො භො කච්චාන, එවං සන්තෙ ඉමෙ චත්තාරො වණ්ණා සමසමා හොන්ති, නෙසං එත්ථ කිඤ්චි නානාකරණං සමනුපස්සාමීති.
ඉමිනාපි ඛො එතං මහාරාජ, පරියායෙන වෙදිතබ්බං: යථා ඝොසො යෙවෙසො ලොකස්මිං බ්රාහ්මණාව සෙට්ඨො වණ්ණො, හීනො අඤ්ඤො වණ්ණො. බ්රාහ්මණාව සුක්කො වණ්ණො, කණ්හො අඤ්ඤො වණ්ණො. බ්රාහ්මණාව සුජ්ඣන්ති, නො අබ්රාහ්මණා. බ්රාහ්මණාව බ්රහ්මුනො පුත්තා ඔරසා මුඛතො ජාතා බ්රහ්මජා බ්රහ්මනිම්මිතා බ්රහ්මදායාදාති.
එවං වුත්තෙ රාජා මාධුරො අවන්තිපුත්තො ආයස්මන්තං මහාකච්චානං එතදවොච: අභික්කන්තං භො කච්චාන, අභික්කන්තං භො කච්චාන, සෙය්යථාපි භො කච්චාන, නික්කුජ්ජිතං වා උක්කුජ්ජෙය්ය, පටිච්ඡන්නං වා විවරෙය්ය, මූළ්හස්ස වා මග්ගං ආචික්ඛෙය්ය, අන්ධකාරෙ වා තෙලපජ්ජොතං ධාරෙය්ය චක්ඛුමන්තො රූපානි දක්ඛින්තීති. එවමෙවං භොතා කච්චානෙන අනෙකපරියායෙන ධම්මො පකාසිතො, එසාහං භවන්තං කච්චානං සරණං ගච්ඡාමි ධම්මඤ්ච භික්ඛුසඞ්ඝඤ්ච, උපාසකං මං භවං කච්චානො ධාරෙතු අජ්ජතග්ගෙ පාණුපෙතං සරණං ගතන්ති.
මා ඛො මං ත්වං මහාරාජ, සරණං අගමාසි, තමෙව ත්වං භගවන්තං සරණං ගච්ඡ යමහං සරණං ගතොති.
කහං පන භො කච්චාන, එතරහි සො භගවා විහරති අරහං සම්මාසම්බුද්ධොති?
පරිනිබ්බුතො ඛො මහාරාජ, එතරහි සො භගවා අරහං සම්මාසම්බුද්ධොති.
සචෙ හි මයං භො කච්චාන, සුණෙය්යාම තං භගවන්තං දසසු යොජනෙසු, දසපි මයං යොජනානි ගච්ඡෙය්යාම තං භගවන්තං දස්සනාය අරහන්තං සම්මාසම්බුද්ධං. සචෙ හි මයං භො කච්චාන, සුණෙය්යාම තං භගවන්තං වීසතියා යොජනෙසු, තිංසතියා යොජනෙසු, චත්තාළීසාය යොජනෙසු, පඤ්ඤාසාය යොජනෙසු, පඤ්ඤාසම්පි මයං යොජනානි ගච්ඡෙය්යාම තං භගවන්තං දස්සනාය අරහන්තං සම්මාසම්බුද්ධං. යොජනසතෙ චෙපි මයං භො කච්චාන, සුණෙය්යාම තං භගවන්තං, යොජනසතම්පි මයං ගච්ඡෙය්යාම තං භගවන්තං දස්සනාය අරහන්තං සම්මාසම්බුද්ධං. යතො ච ඛො භො කච්චාන, පරිනිබ්බුතො සො භගවා, පරිනිබ්බුතම්පි මයං තං භගවන්තං සරණං ගච්ඡාම ධම්මඤ්ච භික්ඛුසඞ්ඝඤ්ච. උපාසකං මං භවං කච්චානො ධාරෙතු අජ්ජතග්ගෙ පාණුපෙතං සරණං ගතන්ති.
මධුරසුත්තං චතුත්ථං
2. 4. 5.
බොධිරාජකුමාරසුත්තං
එවං මෙ සුතං: එකං සමයං භගවා භග්ගෙසු විහරති සුංසුමාරගිරෙ භෙසකලාවනෙ මිගදායෙ. තෙන ඛො පන සමයෙන බොධිස්ස රාජකුමාරස්ස කොකනදො{1} නාම පාසාදො අචිරකාරිතො හොති අනජ්ඣාවුත්ථො{2} සමණෙන වා බ්රාහ්මණෙන වා කෙනචි වා මනුස්සභූතෙන. අථ ඛො බොධි රාජකුමාරො සඤ්ජිකාපුත්තං මාණවං ආමන්තෙසි: එහි ත්වං සම්ම සඤ්ජිකාපුත්ත, යෙන භගවා තෙනුපසඞ්කම, උපසඞ්කමිත්වා මම වචනෙන භගවතො පාදෙ සිරසා වන්ද{3}, අප්පාබාධං අප්පාතඞ්කං ලහුට්ඨානං බලං ඵාසුවිහාරං පුච්ඡ, බොධි භන්තෙ, රාජකුමාරො භගවතො පාදෙ සිරසා වන්දති, අප්පාබාධං අප්පාතඞ්කං ලහුට්ඨානං බලං ඵාසුවිහාරං පුච්ඡතී’ති. එවඤ්ච වදෙහි: ‘අධිවාසෙතු කිර භන්තෙ, භගවා බොධිස්ස රාජකුමාරස්ස ස්වාතනාය භත්තං සද්ධිං භික්ඛුසඞ්ඝෙනා’ති. එවං භොති ඛො සඤ්ජිකාපුත්තො මාණවො බොධිස්ස රාජකුමාරස්ස පටිස්සුත්වා යෙන භගවා තෙනුපසඞ්කමි, උපසඞ්කමිත්වා භගවතා සද්ධිං සම්මොදි. සම්මොදනීයං කථං සාරාණීයං වීතිසාරෙත්වා එකමන්තං නිසීදි. එකමන්තං නිසින්නො ඛො සඤ්ජිකාපුත්තො මාණවො භගවන්තං එතදවොච: බොධි භො ගොතම, රාජකුමාරො{4} භොතො ගොතමස්ස පාදෙ සිරසා වන්දති, අප්පාබාධං අප්පාතඞ්කං ලහුට්ඨානං බලං ඵාසුවිහාරං පුච්ඡති. එවඤ්ච වදෙති: අධිවාසෙතු කිර භවං ගොතමො බොධිස්ස රාජකුමාරස්ස ස්වාතනාය භත්තං සද්ධිං භික්ඛුසඞ්ඝෙනාති. අධිවාසෙසි භගවා තුණ්හීභාවෙන.
අථ ඛො සඤ්ජිකාපුත්තො මාණවො භගවතො අධිවාසනං විදිත්වා උට්ඨායාසනා යෙන බොධි රාජකුමාරො තෙනුපසඞ්කමි, උපසඞ්කමිත්වා බොධිං රාජකුමාරං එතදවොච: “අවොචුම්හා ඛො මයං භොතො වචනෙන තං භවන්තං ගොතමං: බොධි භො ගොතම, රාජකුමාරො භොතො ගොතමස්ස පාදෙ සිරසා වන්දති, අප්පාබාධං අප්පාතඞ්කං ලහුට්ඨානං බලං ඵාසුවිහාරං පුච්ඡති. එවඤ්ච වදෙති: ‘අධිවාසෙතු කිර භවං ගොතමො බොධිස්ස රාජකුමාරස්ස ස්වාතනාය භත්තං සද්ධිං භික්ඛුසඞ්ඝෙනා’ති. අධිවුත්ථඤ්ච පන සමණෙන ගොතමෙනාති.
අථ ඛො බොධි රාජකුමාරො තස්සා රත්තියා අච්චයෙන සකෙ නිවෙසනෙ පණීතං ඛාදනීයං භොජනීයං පටියාදාපෙත්වා, කොකනදඤ්ච පාසාදං ඔදාතෙහි දුස්සෙහි සන්ථරාපෙත්වා යාව පච්ඡිමා සොපාණකළෙපරා{1} සඤ්ජිකාපුත්තං මාණවං ආමන්තෙසි: ‘එහි ත්වං සම්ම සඤ්ජිකාපුත්ත, යෙන භගවා තෙනුපසඞ්කම, උපසඞ්කමිත්වා භගවතො කාලං ආරොචෙහි: ‘කාලො භන්තෙ, නිට්ඨිතං භත්ත’න්ති. එවං භොති ඛො සඤ්ජිකාපුත්තො මාණවො බොධිස්ස රාජකුමාරස්ස පටිස්සුත්වා යෙන භගවා තෙනුපසඞ්කමි, උපසඞ්කමිත්වා භගවතො කාලං ආරොචෙසි: ‘කාලො භො ගොතම{2}, නිට්ඨිතං භත්තන්ති.
අථ ඛො භගවා පුබ්බණ්හසමයං නිවාසෙත්වා පත්තචීවරං ආදාය යෙන බොධිස්ස රාජකුමාරස්ස නිවෙසනං තෙනුපසඞ්කමි. තෙන ඛො පන සමයෙන බොධි රාජකුමාරො බහිද්වාරකොට්ඨකෙ ඨිතො හොති භගවන්තං ආගමයමානො. අද්දසා ඛො බොධි රාජකුමාරො භගවන්තං දූරතොව ආගච්ඡන්තං. දිස්වාන පච්චුග්ගන්ත්වා භගවන්තං අභිවාදෙත්වා පුරක්ඛත්වා{3} යෙන කොකනදො පාසාදො තෙනුපසඞ්කමි.
අථ ඛො භගවා පච්ඡිමං සොපාණකළෙපරං නිස්සාය අට්ඨාසි. අථ ඛො බොධි රාජකුමාරො භගවන්තං එතදවොච: ‘අභිරූහතු භන්තෙ, භගවා දුස්සානි, අභිරූහතු සුගතො දුස්සානි, යං මමං අස්ස දීඝරත්තං හිතාය සුඛායා’ති. එවං වුත්තෙ භගවා තුණ්හී අහොසි. දුතියම්පි ඛො බොධි රාජකුමාරො භගවන්තං එතදවොච: ‘අභිරූහතු භන්තෙ, භගවා දුස්සානි, අභිරූහතු සුගතො දුස්සානි, යං මමං අස්ස දීඝරත්තං හිතාය සුඛායා’ති. දුතියම්පි ඛො භගවා තුණ්හී අහොසි. තතියම්පි ඛො බොධි රාජකුමාරො භගවන්තං එතදවොච: ‘අභිරූහතු භන්තෙ, භගවා දුස්සානි, අභිරූහතු සුගතො දුස්සානි, යං මමං අස්ස දීඝරත්තං හිතාය සුඛායා’ති.
අථ ඛො භගවා ආයස්මන්තං ආනන්දං අපලොකෙසි. අථ ඛො ආයස්මා ආනන්දො බොධිං රාජකුමාරං එතදවොච: ‘සංහරතු{4} රාජකුමාර, දුස්සානි. න ඛො භගවා චෙලපත්තිකං{5} අක්කමිස්සති. පච්ඡිමං ජනතං තථාගතො අපලොකෙතී’ති{6} අථ ඛො බොධි රාජකුමාරො දුස්සානි සංහරාපෙත්වා උපරි කොකනෙද පාසාදෙ{7} ආසනානි පඤ්ඤාපෙසි. අථ ඛො භගවා කොකනදං පාසාදං අභිරූහිත්වා පඤ්ඤත්තෙ ආසනෙ නිසීදි සද්ධිං භික්ඛුසඞ්ඝෙන. අථ ඛො බොධි රාජකුමාරො බුද්ධපමුඛං භික්ඛුසඞ්ඝං පණීතෙන ඛාදනීයෙන භොජනීයෙන සහත්ථා සන්තප්පෙසි, සම්පවාරෙසි. අථ ඛො බොධි රාජකුමාරො භගවන්තං භුත්තාවිං ඔනීතපත්තපාණිං අඤ්ඤතරං නීචං ආසනං ගහෙත්වා එකමන්තං නිසීදි. එකමන්තං නිසින්නො ඛො බොධි රාජකුමාරො භගවන්තං එතදවොච: ‘මය්හං ඛො භන්තෙ, එවං හොති, ‘න ඛො සුඛෙන සුඛං අධිගන්තබ්බං, දුක්ඛෙන ඛො සුඛං අධිගන්තබ්බ’න්ති.
මය්හම්පි ඛො රාජකුමාර, පුබ්බෙව සම්බොධා අනභිසම්බුද්ධස්ස බොධිසත්තස්සෙව සතො එතදහොසි: “න ඛො සුඛෙන සුඛං අධිගන්තබ්බං, දුක්ඛෙන ඛො සුඛං අධිගන්තබ්බ”න්ති. සො ඛො අහං රාජකුමාර, අපරෙන සමයෙන දහරො’ව සමානො සුසු කාළකෙසො භද්රෙන යොබ්බනෙන සමන්නාගතො පඨමෙන වයසා අකාමකානං මාතාපිතුන්නං{1} අස්සුමුඛානං රුදන්තානං කෙසමස්සුං ඔහාරෙත්වා කාසායානි වත්ථානි අච්ඡාදෙත්වා අගාරස්මා අනගාරියං පබ්බජිං. සො එවං පබ්බජිතො සමානො කිංකුසලගවෙසී අනුත්තරං සන්තිවරපදං පරියෙසමානො යෙන ආළාරො කාලාමො තෙනුපසංමිං, උපසංමිත්වා ආළාරං කාලාමං එතදවොචං: ‘ඉච්ඡාමහං ආවුසො කාලාම, ඉමස්මිං ධම්මවිනයෙ බ්රහ්මචරියං චරිතු’න්ති. එවං වුත්තෙ රාජකුමාර, ආළාරො කාලාමො මං එතදවොච: ‘විහරතායස්මා, තාදිසො අයං ධම්මො, යත්ථ විඤ්ඤූ පුරිසො න චිරස්සෙ’ව සකං ආචරියකං සයං අභිඤ්ඤා සච්ඡිකත්වා උපසම්පජ්ජ විහරෙය්යා”ති. සො ඛො අහං රාජකුමාර, න චිරස්සෙ’ව ඛිප්පමෙව තං ධම්මං පරියාපුණිං. සො ඛො අහං රාජකුමාර, තාවතකෙනෙව ඔට්ඨප්පහතමත්තෙන ලපිතලාපනමත්තෙන ඤාණවාදඤ්ච වදාමි. ථෙරවාදඤ්ච, ‘ජානාමි, පස්සාමී’ති ච පටිජානාමි, අහඤ්චෙ ව අඤ්ඤෙ ච. තස්ස මය්හං රාජකුමාර එතදහොසි: “න ඛො ආළාරො කාලාමො ඉමං ධම්මං කෙවලං සද්ධාමත්තකෙන සයං අභිඤ්ඤා සච්ඡිකත්වා උපසම්පජ්ජ විහරාමී’ති පවෙදෙති. අද්ධා ආළාරො කාලාමො ඉමං ධම්මං ජානං පස්සං විහරතී”ති
අථ ඛ්වාහං රාජකුමාර, යෙන ආළාරො කාලාමො තෙනුපසංකමිං. උපසංකමිත්වා ආළාරං කාලාමං එතදවොචං: “කිත්තාවතා නො ආවුසො කාලාම, ඉමං ධම්මං සයං අභිඤ්ඤා සච්ඡිකත්වා උපසම්පජ්ජ විහරාමී’ති පවෙදෙසී”ති. එවං වුත්තෙ රාජකුමාර, ආළාරො කාලාමො ආකිඤ්චඤ්ඤායතනං පවෙදෙසි. තස්ස මය්හං රාජකුමාර, එතදහොසි: “න ඛො ආළාරස්සෙව කාලාමස්ස අත්ථි සද්ධා, මය්හම්පත්ථි සද්ධා. න ඛො ආළාරස්සෙ’ව කාලාමස්ස අත්ථි විරියං, මය්හම්පත්ථි විරියං, න ඛො ආළාරස්සෙ’ව කාලාමස්ස අත්ථි සති. මය්හම්පත්ථි සති. න ෙඛා ආළාරස්සෙව කාලාමස්ස අත්ථි සමාධි, මය්හම්පත්ථි සමාධි. න ඛො ආළාරස්සෙ’ව කාලාමස්ස අත්ථි පඤ්ඤා, මය්හම්පත්ථි පඤ්ඤා. යන්නූනාහං යං ධම්මං ආළාරො කාලාමො සයං අභිඤ්ඤා සච්ඡිකත්වා උපසම්පජ්ජ විහරාමී’ති පවෙදෙති, තස්ස ධම්මස්ස සච්ඡිකිරියාය පදහෙය්ය”න්ති. සො ඛො අහං රාජකුමාර, න චිරස්සෙ’ව ඛිප්පමෙව තං ධම්මං සයං අභිඤ්ඤා සච්ඡිකත්වා උපසම්පජ්ජ විහාසිං.
අථ ඛ්වාහං රාජකුමාර, යෙන ආළාරො කාලාමො තෙනුපසංකමිං. උපසංකමිත්වා ආළාරං කාලාමං එතදවොචං: “එත්තාවතා නො, ආවුසො කාලාම, ඉමං ධම්මං සයං අභිඤ්ඤා සච්ඡිකත්වා උපසම්පජ්ජ විහරාමී’ති පවෙදෙසී”ති. එත්තාවතා ඛො අහං ආවුසො ඉමං ධම්මං සයං අභිඤ්ඤා සච්ඡිකත්වා උපසම්පජ්ජ පවෙදෙමී’ති. අහම්පි ඛො ආවුසො එත්තාවතා ඉමං ධම්මං සයං අභිඤ්ඤා සච්ඡිකත්වා උපසම්පජ්ජ විහරාමී’ති.
ලාභා නො ආවුසො, සුලද්ධං නො ආවුසො, යෙ මයං ආයස්මන්තං තාදිසං සබ්රහ්මචාරිං පස්සාම. ඉති යාහං ධම්මං සයං අභිඤ්ඤා සච්ඡිකත්වා උපසම්පජ්ජ පවෙදෙමි, තං ත්වං ධම්මං සයං අභිඤ්ඤා සච්ඡිකත්වා උපසම්පජ්ජ විහරසි. යං ත්වං ධම්මං සයං අභිඤ්ඤා සච්ඡිකත්වා උපසම්පජ්ජ විහරසි. තමහං ධම්මං සයං අභිඤ්ඤා සච්ඡිකත්වා උපසම්පජ්ජ පවෙදෙමි. ඉති යාහං ධම්මං ජානාමි. තං ත්වං ධම්මං ජානාසි. යං ත්වං ධම්මං ජානාසි. තමහං ධම්මං ජානාමි. ඉති යාදිසො අහං, තාදිසො ත්වං, යාදිසො ත්වං, තාදිසො අහං. එහිදානි ආවුසො උභො’ව සන්තා ඉමං ගණං පරිහරාමා’ති. ඉති ඛො රාජකුමාර ආළාරො කාලාමො ආචරියො මෙ සමානො අන්තෙවාසිං මං සමානං අත්තෙනා.{1} සමසමං ඨපෙසි, උළාරාය ච මං පූජාය පූජෙසි. තස්ස මය්හං රාජකුමාර, එතදහොසි: “නායං ධම්මො නිබ්බිදාය න විරාගාය න නිරොධාය න උපසමාය න අභිඤ්ඤාය න සම්බොධාය න නිබ්බානාය සංවත්තති. යාවදෙව ආකිඤ්චඤ්ඤායතනූපපත්තියා”ති. සො ඛො අහං රාජකුමාර, තං ධම්මං අනලං කරිත්වා තස්මා ධම්මා නිබ්බිජ්ජ අපක්කමිං.
සො ඛො අහං රාජකුමාර, කිංකුසලගවෙසී අනුත්තරං සන්තිවරපදං පරියෙසමානො යෙන උද්දකො{2} රාමපුත්තො තෙනුපසංකමිං, උපසංකමිත්වා උද්දකං රාමපුත්තං එතදවොචං: “ඉච්ඡාමහං ආවුසො රාම{3} ඉමස්මිං ධම්මවිනයෙ බ්රහ්මචරියං චරිතු”න්ති. එවං වුත්තෙ රාජකුමාර, උද්දකො රාමපුත්තො මං එතදවොච: “විහරතායස්මා, තාදිසො අයං ධම්මො, යත්ථ විඤ්ඤූ පුරිසො න චිරස්සෙ’ව සකං ආචරියකං සයං අභිඤ්ඤා සච්ඡිකත්වා උපසම්පජ්ජ විහරෙය්යා”ති. සො ඛො අහං රාජකුමාර, න චිරස්සෙ’ව ඛිප්පමෙව තං ධම්මං පරියාපුණිං. සො ඛො අහං රාජකුමාර, තාවතකෙනෙව ඔට්ඨප්පහතමත්තෙන ලපිතලාපනමත්තෙන ඤාණවාදඤ්ච වදාමි. ථෙරවාදඤ්ච, ‘ජානාමි පස්සාමී’ති ච පටිජානාමි අහඤ්චෙ ව අඤ්ඤෙ ච. තස්ස මය්හං රාජකුමාර, එතදහොසි: “න ඛො රාමො ඉමං ධම්මං කෙවලං සද්ධාමත්තකෙන ‘සයං අභිඤ්ඤා සච්ඡිකත්වා උපසම්පජ්ජ විහරාමී’ති පවෙදෙසි. අද්ධා රාමො ඉමං ධම්මං ජානං පස්සං විහාසී”ති.
අථ ඛ්වාහං රාජකුමාර, යෙන උද්දකො රාමපුත්තො තෙනුපසංකමිං, උපසංකමිත්වා උද්දකං රාමපුත්තං එතදවොචං: “කිත්තාවතා නො, ආවුසො රාම{4} ඉමං ධම්මං සයං අභිඤ්ඤා සච්ඡිකත්වා උපසම්පජ්ජ විහරාමී’ති පවෙදෙසී”ති. එවං වුත්තෙ රාජකුමාර, උද්දකො රාමපුත්තො නෙවසඤ්ඤානාසඤ්ඤායතනං පවෙදෙසි. තස්ස මය්හං රාජකුමාර එතදහොසි: “න ඛො රාමස්සෙ’ව අහොසි සද්ධා, මය්හංපත්ථි සද්ධා. න ඛො රාමස්සෙ’ව අහොසි විරියං. මය්හම්පත්ථි විරියං. න ඛො රාමස්සෙව අහොසි සති, මය්හම්පත්ථි සති. න ඛො රාමස්සෙ’ව අහොසි සමාධි. මය්හම්පත්ථි සමාධි. න ඛො රාමස්සෙ’ව අහොසි පඤ්ඤා. මය්හම්පත්ථි පඤ්ඤා. යන්නූනාහං යං ධම්මං රාමො ‘සයං අභිඤ්ඤා සච්ඡිකත්වා උපසම්පජ්ජ විහරාමී’ති පවෙදෙසි. තස්ස ධම්මස්ස සච්ඡිකිරියාය පදහෙය්ය”න්ති. සො ඛො අහං රාජකුමාර, න චිරස්සෙ’ව ඛිප්පමෙව තං ධම්මං සයං අභිඤ්ඤා සච්ඡිකත්වා විහාසිං.
අථ ඛ්වාහං රාජකුමාර, යෙන උද්දකො රාමපුත්තො තෙනුපසංකමි, උපසංකමිත්වා උද්දකං රාමපුත්තං එතදවොචං: “එත්තාවතා නො ආවුසො රාම{1} ඉමං ධම්මං සයං අභිඤ්ඤා සච්ඡිකත්වා උපසම්පජ්ජ පවෙදෙසී’ති. එත්තාවතා ඛො අහං ආවුසො ඉමං ධම්මං සයං අභිඤ්ඤා සච්ඡිකත්වා උපසම්පජ්ජ පවෙදෙමී’ති.{2} ‘අහම්පි ඛො ආවුසො එත්තාවතා ඉමං ධම්මං සයං අභිඤ්ඤා සච්ඡිකත්වා උපසම්පජ්ජ විහරාමී’ති. ලාභා නො ආවුසො, සුලද්ධං නො ආවුසො, යෙ මයං ආයස්මන්තං තාදිසං සබ්රහ්මචාරිං පස්සාම. ඉති යං ධම්මං රාමො සයං අභිඤ්ඤා සච්ඡිකත්වා උපසම්පජ්ජ පවෙදෙසි, තං ත්වං ධම්මං සයං අභිඤ්ඤා සච්ඡිකත්වා උපසම්පජ්ජ විහරසි. යං ත්වං ධම්මං සයං අභිඤ්ඤා සච්ඡිකත්වා උපසම්පජ්ජ විහරසි, තං ධම්මං රාමො සයං අභිඤ්ඤා සච්ඡිකත්වා උපසම්පජ්ජ පවෙදෙසි. ඉති යං ධම්මං රාමො අභිඤ්ඤාසි, තං ත්වං ධම්මං ජානාසි. යං ත්වං ධම්මං ජානාසි, තං ධම්මං රාමො අඤ්ඤාසි. ඉති යාදිසො රාමො අහොසි, තාදිසො ත්වං, යාදිසො ත්වං තාදිසො රාමො අහොසි. එහිදානි ආවුසො ත්වං ඉමං ගණං පරිහරා’ති. ඉති ඛො රාජකුමාර, උද්දකො රාමපුත්තො සබ්රහ්මචාරී මෙ සමානො ආචරියට්ඨානෙ ච{3} මං ඨපෙසි. උළාරාය ච මං පූජාය පූජෙසි. තස්ස මය්හං රාජකුමාර, එතදහොසි: “නායං ධම්මො නිබ්බිදාය න විරාගාය න නිරොධාය න උපසමාය න අභිඤ්ඤාය න සම්බොධාය න නිබ්බානාය සංවත්තති, යාවදෙව නෙවසඤ්ඤානාසඤ්ඤායතනූපපත්තියා’ති. සො ඛො අහං රාජකුමාර, තං ධම්මං අනලං කරිත්වා තස්මා ධම්මා නිබ්බිජ්ජ අපක්කමිං.
සො ඛො අහං රාජකුමාර, කිං කුසලගවෙසී අනුත්තරං සන්තිවරපදං පරියෙසමානො මගධෙසු අනුපුබ්බෙන චාරිකං චරමානො යෙන උරුවෙලා සෙනානිගමො තදවසරිං. තත්ථද්දසං රමණීයං භූමිභාගං පාසාදිකඤ්ච වනසණ්ඩං නදිඤ්ච සන්දන්තිං, සෙතකං සුපතිත්ථං රමණීයං, සමන්තා ච ගොචරගාමං. තස්ස මය්හං රාජකුමාර, එතදහොසි: “රමණීයො වත භූමිභාගො, පාසාදිකො ච වනසණ්ඩො නදී ච සන්දති. සෙතකා සුපතිත්ථා රමණීයා සමන්තා ච ගොචරගාමො. අලං වතිදං කුලපුත්තස්ස පධානත්ථිකස්ස පධානායා”ති. සො ඛො අහං රාජකුමාර, තත්ථෙ’ව නිසීදිං අලමිදං පධානායා’ති.
අපිස්සු මං රාජකුමාර, තිස්සො උපමා පටිභංසු. අනච්ඡරියා පුබ්බෙ අස්සුතපුබ්බා: “සෙය්යථාපි රාජකුමාර, අල්ලං කට්ඨං සස්නෙහං{4} උදකෙ නික්ඛිත්තං, අථ පුරිසො ආගච්ඡෙය්ය උත්තරාරණිං ආදාය ‘අග්ගිං අභිනිබ්බත්තෙස්සාමි, තෙජො පාතුකරිස්සාමී’ති. තං කිං මඤ්ඤසි රාජකුමාර, අපිනු සො පුරිසො අමුං අල්ලං කට්ඨං සස්නෙහං{4} උදකෙ නික්ඛිත්තං, උත්තරාරණිං ආදාය අභිමන්ථෙන්තො{5} අග්ගිං අභිනිබ්බත්තෙය්ය, තෙජො පාතුකරෙය්යා’ති. නො හිදං{6} භන්තෙ. තං කිස්ස හෙතු? අදුං හි භන්තෙ{7} අල්ලං කට්ඨං සස්නෙහං{4} තඤ්ච පන උදකෙ නික්ඛිත්තං, යාවදෙව ච පන සො පුරිසො කිලමථස්ස විඝාතස්ස භාගී අස්සා’ති. එවමෙව ඛො රාජකුමාර යෙහි කෙචි{8} සමණා වා බ්රාහ්මණා වා කායෙන චෙව චිත්තෙන ච කාමෙහි{9} අවූපකට්ඨා විහරන්ති. යො ච නෙසං කාමෙසු කාමච්ඡන්දො කාමසිනෙහො{10} කාමමුච්ඡා කාමපිපාසා කාමපරිළාහො, සො ච අජ්ඣත්තං න සුප්පහීනො හොති.
න සුප්පටිප්පස්සද්ධො. ඔපක්කමිකා චෙපි තෙ භොන්තො සමණබ්රාහ්මණා දුක්ඛා තිප්පා{1} කටුකා වෙදනා වෙදියන්ති. අභබ්බා ව තෙ ඤාණාය දස්සනාය අනුත්තරාය සම්බොධාය. නො චෙපි තෙ භොන්තො සමණබ්රාහ්මණා ඔපක්කමිකා දුක්ඛා තිප්පා කටුකා වෙදනා වෙදියන්ති. අභබ්බා’ව තෙ ඤාණාය දස්සනාය අනුත්තරාය සම්බොධාය. අයං ඛො මං රාජකුමාර, පඨමා උපමා පටිභාසි අනච්ඡරියා පුබ්බෙ අස්සුතපුබ්බා.
අපරා’පි ඛො මං රාජකුමාර, දුතියා උපමා පටිභාසි අනච්ඡරියා පුබ්බෙ අස්සුතපුබ්බා. සෙය්යථා’පි රාජකුමාර, අල්ලං කට්ඨං සස්නෙහං ආරකා උදකා ථලෙ නික්ඛිත්තං. අථ පුරිසො ආගච්ඡෙය්ය උත්තරාරණිං ආදාය අග්ගිං අභිනිබ්බත්තෙස්සාමි{2} තෙජො පාතුකරිස්සාමී’ති. තං කිං මඤ්ඤසි රාජකුමාර, අපිනු සො පුරිසො අමුං අල්ලං කට්ඨං සස්නෙහං ආරකා උදකා ථලෙ නික්ඛිත්තං උත්තරාරණිං ආදාය අභිමන්ථෙන්තො අග්ගිං අභිනිබ්බත්තෙය්ය, තෙජො පාතුකරෙය්යා’ති? නො හිදං භන්තෙ, තං කිස්ස හෙතු? අදුං හි භන්තෙ අල්ලං කට්ඨං සස්නෙහං කිඤ්චා’පි ආරකා උදකා ථලෙ නික්ඛිත්තං යාවදෙව ච පන සො පුරිසො කිලමථස්ස විඝාතස්ස භාගී අස්සා’ති. එවමෙව ඛො රාජකුමාර, යෙ හි කෙචි සමණා වා බ්රාහ්මණා වා කායෙන ඛො කාමෙහි වූපකට්ඨා විහරන්ති, යො ච තෙසං කාමෙසු කාමච්ඡන්දො කාමස්නෙහො කාමමුච්ඡා කාමපිපාසා කාමපරිළාහො සො ච අජ්ඣත්තං න සුප්පහීනො{3} හොති න සුප්පටිප්පස්සද්ධො{4} ඔපක්කමිකා චෙ’පි තෙ භොන්තො සමණබ්රාහ්මණා දුක්ඛා තිප්පා{1} ඛරා කටුකා වෙදනා වෙදියන්ති{5} අභබ්බා’ව තෙ ඤාණාය දස්සනාය අනුත්තරාය සම්බොධාය. නො චෙ’පි තෙ භොන්තො සමණබ්රාහ්මණා ඔපක්කමිකා දුක්ඛා තිප්පා ඛරා කටුකා වෙදනා වෙදියන්ති. අභබ්බා’ව තෙ ඤාණාය දස්සනාය අනුත්තරාය සම්බොධාය. අයං ඛො මං රාජකුමාර, දුතියා උපමා පටිභාසි අනච්ඡරියා පුබ්බෙ අස්සුතපුබ්බා.
අපරා පි ඛො මං රාජකුමාර, තතියා උපමා පටිභාසි. අනච්ඡරියා පුබ්බෙ අස්සුතපුබ්බා. සෙය්යථා’පි රාජකුමාර, සුක්ඛං කට්ඨං කොලාපං ආරකා උදකා ථලෙ නික්ඛිත්තං. අථ පුරිසො ආගච්ඡෙය්ය උත්තරාරණිං ආදාය “අග්ගිං අභිනිබ්බත්තෙස්සාමි තෙජො පාතුකරිස්සාමී”ති. තං කිං මඤ්ඤසි රාජකුමාර, අපි නු සො පුරිසො අමුං සුක්ඛං කට්ඨං කොලාපං ආරකා උදකා ථලෙ නික්ඛිත්තං උත්තරාරණිං ආදාය අභිමන්ථෙන්තො අග්ගිං අභිනිබ්බත්තෙය්ය, තෙජො පාතුකරෙය්යාති. එවම්භන්තෙ, තං කිස්ස හෙතු, අදුං හි භන්තෙ සුක්ඛං කට්ඨං කොලාපං, තඤ්ච පන ආරකා උදකා ථලෙ නික්ඛිත්තන්ති. එවමෙව ඛො රාජකුමාර, යෙ හි කෙචි සමණා වා බ්රාහ්මණා වා කායෙන චෙව චිත්තෙන ච{6} කාමෙහි වූපකට්ඨා විහරන්ති. යො ච නෙසං කාමෙසු කාමච්ඡන්දො කාමස්නෙහො කාමමුච්ඡා කාමපිපාසා කාමපරිළාහො, සො ච අජ්ඣත්තං සුප්පහීනො හොති සුප්පටිප්පස්සද්ධො ඔපක්කමිකා චෙ’පි තෙ භොන්තො සමණබ්රාහ්මණා දුක්ඛා තිප්පා ඛරා කටුකා වෙදනා වෙදියන්ති, භබ්බා’ව තෙ ඤාණාය දස්සනාය අනුත්තරාය සම්බොධාය. නො චෙපි තෙ භොන්තො සමණබ්රාහ්මණා ඔපක්කමිකා දුක්ඛා තිප්පා ඛරා කටුකා වෙදනා වෙදියන්ති, භබ්බාව තෙ ඤාණාය දස්සනාය අනුත්තරාය සම්බොධාය. අයං ඛො මං රාජකුමාර, තතියා උපමා පටිභාසි අනච්ඡරියා පුබ්බෙ අස්සුතපුබ්බා. ඉමා ඛො මං රාජකුමාර, තිස්සො උපමා පටිභංසු අනච්ඡරියා පුබ්බෙ අස්සුතපුබ්බා.
තස්ස මය්හං රාජකුමාර, එතදහොසි: “යන්නූනාහං දන්තෙභි දන්තමාධාය ජිව්හාය තාලුං ආහච්ච චෙතසා චිත්තං අභිනිග්ගණ්හෙය්යං අභිනිප්පීළෙය්යං අභිසන්තාපෙය්ය”න්ති. සො ඛො අහං රාජකුමාර, දන්තෙභිදන්තමාධාය ජිව්හාය තාලුං ආහච්ච චෙතසා චිත්තං අභිනිග්ගණ්හාමි අභිනිප්පීළෙමි අභිසන්තාපෙමි. තස්ස මය්හං රාජකුමාර, දන්තෙභිදන්තමාධාය ජිව්හාය තාලුං ආහච්ච චෙතසා චිත්තං අභිනිග්ගණ්හයතො අභිනිප්පීළයතො අභිසන්තාපයතො කච්ඡෙහි සෙදා මුච්චන්ති. සෙය්යථා’පි රාජකුමාර, බලවා පුරිසො දුබ්බලතරං පුරිසං සීසෙ වා ගහෙත්වා ඛන්ධෙ වා ගහෙත්වා අභිනිග්ගණ්හෙය්ය අභිනිප්පීළෙය්ය අභිසන්තාපෙය්ය, එවමෙව ඛො මෙ රාජකුමාර, දන්තෙභිදන්තමාධාය ජිව්හාය තාලුං ආහච්ච චෙතසා චිත්තං අභිනිග්ගණ්හයතො අභිනිප්පීළයතො අභිසන්තාපයතො කච්ඡෙහි සෙදා මුච්චන්ති. ආරද්ධං ඛො පන මෙ රාජකුමාර, විරියං හොති අසල්ලීනං, උපට්ඨිතා සති අපම්මුට්ඨා{1}, සාරද්ධො ච පන මෙ කායො හොති අප්පටිප්පස්සද්ධො තෙනෙව දුක්ඛප්පධානෙන පධානාභිතුන්නස්ස සතො.
තස්ස මය්හං රාජකුමාර, එතදහොසි: “යන්නූනාහං අප්පාණකං ඣානං{2} ඣායෙය්ය”න්ති. යො ඛො අහං රාජකුමාර, මුඛතො ච නාසතො ච අස්සාසපස්සාසෙ උපරුන්ධිං, තස්ස මය්හං රාජකුමාර, මුඛතො ච නාසතො ච අස්සාසපස්සාසෙසු උපරුද්ධෙසු කණ්ණසොතෙහි වාතානං නික්ඛමන්තානං අධිමත්තො සද්දො හොති. සෙය්යථා’පි නාම කම්මාරගග්ගරියා ධමමානාය අධිමත්තො සද්දො හොති එවමෙව ඛො රාජකුමාර, මුඛතො ච නාසතො ච අස්සාසපස්සාසෙසු උපරුද්ධෙසු කණ්ණසොතෙහි වාතානං නික්ඛමන්තානං අධිමත්තො සද්දො හොති. ආරද්ධං ඛො පන මෙ රාජකුමාර, විරියං හොති අසල්ලීනං උපට්ඨිතා සති අපම්මුට්ඨා සාරද්ධො ච පන මෙ කායො හොති අප්පටිප්පස්සද්ධො තෙනෙව දුක්ඛප්පධානෙන පධානාභිතුන්නස්ස සතො.
තස්ස මය්හං රාජකුමාර, එතදහොසි: “යන්නූනාහං අප්පාණකංයෙව ඣානං ඣායෙය්ය”න්ති. සො ඛො අහං රාජකුමාර, මුඛතො ච නාසතො ච කණ්ණතො ච අස්සාසපස්සාසෙ උපරුන්ධිං. තස්ස මය්හං රාජකුමාර, මුඛතො ච නාසතො ච කණ්ණතො ච අස්සාසපස්සාසෙසු උපරුද්ධෙසු අධිමත්තා වාතා මුද්ධානං{3} ඌහනන්ති{4} සෙය්යථා’පි රාජකුමාර, බලවා පුරිසො තිණ්හෙන සිඛරෙන මුද්ධානං{3} අභිමන්ථෙය්ය, එවමෙව ඛො මෙ රාජකුමාර, මුඛතො ච නාසතො ච කණ්ණතො ච අස්සාසපස්සාසෙසු උපරුද්ධෙසු අධිමත්තා වාතා මුද්ධානං ඌහනන්ති. ආරද්ධං ඛො පන මෙ රාජකුමාර, විරියං හොති අසල්ලීනං උපට්ඨිතා සති අපම්මුට්ඨා, සාරද්ධො ච පන මෙ කායො හොති අප්පටිප්පස්සද්ධො තෙනෙ’ව දුක්ඛප්පධානෙන පධානාභිතුන්නස්ස සතො.
තස්ස මය්හං රාජකුමාර, එතදහොසි: “යන්නූනාහං අප්පාණකංයෙව ඣානං ඣායෙය්ය”න්ති. සො ඛො අහං රාජකුමාර, මුඛතො ච නාසතො ච කණ්ණතො ච අස්සාසපස්සාසෙ උපරුන්ධිං. තස්ස මය්හං රාජකුමාර, මුඛතො ච නාසතො ච කණ්ණතො ච අස්සාසපස්සාසෙසු උපරුද්ධෙසු අධිමත්තා සීසෙ සීසවෙදනා හොන්ති. සෙය්යථා’පි රාජකුමාර, බලවා පුරිසො දළ්හෙන වරත්තකබන්ධෙන{1} සීසෙ සීසවෙඨං දදෙය්ය, එවමෙව ඛො රාජකුමාර, මුඛතො ච නාසතො ච කණ්ණතො ච අස්සාසපස්සාසෙසු උපරුද්ධෙසු අධිමත්තා සීසෙ සීසවෙදනා හොන්ති. ආරද්ධං ඛො පන මෙ රාජකුමාර, විරියං හොති අසල්ලීනං, උපට්ඨිතා සති අපම්මුට්ඨා, සාරද්ධො ච පන මෙ කායො හොති අප්පටිප්පස්සද්ධො තෙනෙ’ව දුක්ඛප්පධානෙන පධානාභිතුන්නස්ස සතො.
තස්ස මය්හං රාජකුමාර, එතදහොසි: යන්නූනාහං අප්පාණකංයෙව ඣානං ඣායෙය්ය”න්ති. සො ඛො අහං රාජකුමාර, මුඛතො ච නාසතො ච කණ්ණතො ච අස්සාසපස්සාසෙ උපරුන්ධිං. තස්ස මය්හං රාජකුමාර, මුඛතො ච නාසතො ච කණ්ණතො ච අස්සාසපස්සාසෙසු උපරුද්ධෙසු අධිමත්තා වාතා කුච්ඡිං පරිකන්තන්ති. සෙය්යථා’පි රාජකුමාර, දක්ඛො ගොඝාතකො වා ගොඝාතකන්තෙවාසී වා තිණ්හෙන ගොවිකන්තනෙන කුච්ඡිං පරිකන්තෙය්ය, එවමෙව ඛො රාජකුමාර, මුඛතො ච නාසතො ච කණ්ණතො ච අස්සාසපස්සාසෙසු උපරුද්ධෙසු අධිමත්තා වාතා කුච්ඡිං පරිකන්තන්ති. ආරද්ධං ඛො පන මෙ රාජකුමාර, විරියං හොති අසල්ලීනං, උපට්ඨිතා සති අපම්මුට්ඨා, සාරද්ධො ච පන මෙ කායො හොති අප්පටිප්පස්සද්ධො, තෙනෙව දුක්ඛප්පධානෙන පධානාභිතුන්නස්ස සතො.
තස්ස මය්හං රාජකුමාර, එතදහොසි: “යන්නූනාහං අප්පාණකංයෙව ඣානං ඣායෙය්ය”න්ති. සො ඛො අහං රාජකුමාර, මුඛතො ච නාසතො ච කණ්ණතො ච අස්සාසපස්සාසෙ උපරුන්ධිං. තස්ස මය්හං රාජකුමාර, මුඛතො ච නාසතො ච කණ්ණතො ච අස්සාසපස්සාසෙසු උපරුද්ධෙසු අධිමත්තො කායස්මිං ඩාහො හොති. සෙය්යථා’පි රාජකුමාර, ද්වෙ බලවන්තො පුරිසා දුබ්බලතරං පුරිසං නානා බාහාසු ගහෙත්වා අඞ්ගාරකාසුයා සන්තාපෙය්යුං, සම්පරිතාපෙය්යුං. එවමෙව ඛො මෙ රාජකුමාර, මුඛතො ච නාසතො ච කණ්ණතො ච අස්සාසපස්සාසෙසු උපරුද්ධෙසු අධිමත්තො කායස්මිං ඩාහො හොති. ආරද්ධං ඛො පන මෙ රාජකුමාර, විරියං හොති අසල්ලීනං, උපට්ඨිතා සති අපම්මුට්ඨා, සාරද්ධො ච පන මෙ කායො හොති අප්පටිප්පස්සද්ධො තෙනෙ’ව දුක්ඛප්පධානෙන පධානාභිතුන්නස්ස සතො.
අපිස්සු මං රාජකුමාර, දෙවතා දිස්වා එවමාහංසු: “කාලකතො{2} සමණො ගොතමො”ති. එකච්චා දෙවතා එවමාහංසු: “න කාලකතො{2} සමණො ගොතමො, අපි ච කාලංකරොතී”ති. එකච්චා දෙවතා එවමාහංසු: “න කාලකතො{2} සමණො ගොතමො න’පි කාලං කරොති . අරහං සමණො ගොතමො. විහාරො’ත්වෙවෙසො{3} අරහතො එවරූපො හොතී’ති.
තස්ස මය්හං රාජකුමාර, එතදහොසි: “යන්නූනාහං සබ්බසො ආහාරූපච්ඡෙදාය පටිපජ්ජෙය්ය”න්ති. අථ ඛො මං රාජකුමාර, දෙවතා උපසඞ්කමිත්වා එතදවොචුං: “මා ඛො ත්වං මාරිස සබ්බසො ආහාරූපච්ඡෙදාය පටිපජ්ජි. සචෙ ඛො ත්වං මාරිස සබ්බසො ආහාරූපච්ඡෙදාය පටිපජ්ජිස්සසි, තස්ස තෙ මයං දිබ්බං ඔජං ලොමකූපෙහි අජ්ඣොහරිස්සාම{1} තාය ත්වං යාපෙස්සසී”ති තස්ස මය්හං රාජකුමාර, එතදහොසි: “අහඤ්චෙව ඛො පන සබ්බසො අජද්ධුකං{2} පටිජානෙය්යං. ඉමා ච මෙ දෙවතා දිබ්බං ඔජං ලොමකූපෙහි අජ්ඣොහාරෙය්යුං{3} තාය චාහං යාපෙය්යං, තං මමාස්ස මුසා”ති. සො ඛො අහං රාජකුමාර, තා දෙවතා පච්චාචික්ඛාමි. හලන්ති වදාමි.
තස්ස මය්හං රාජකුමාර, එතදහොසි: “යන්නූනාහං ථොකං ථොකං ආහාරං ආහාරෙය්යං පසතං පසතං, යදි වා මුග්ගයූසං යදි වා කුලත්ථයූසං, යදි වා කලායයූසං යදි වා හරෙණුකයූසන්ති. සො ඛො අහං රාජකුමාර, ථොකං ථොකං ආහාරං ආහාරෙසිං පසතං පසතං, යදි වා මුග්ගයූසං යදි වා කුලත්ථයූසං යදි වා කලායයූසං යදි වා හරෙණුකයූසං. තස්ස මය්හං රාජකුමාර, ථොකං ථොකං ආහාරං ආහාරයතො පසතං පසතං, යදි වා මුග්ගයූසං යදි වා කුලත්ථයූසං යදි වා කලායයූසං යදි වා හරෙණුකයූසං, අධිමත්තකසිමානං පත්තො කායො හොති. සෙය්යථා’පි නාම ආසීතිකපබ්බානි වා කාකපබ්බානි වා. එවමෙවස්සු මෙ අඞ්ගපච්චඞ්ගානි භවන්ති තායෙවප්පාහාරතාය. සෙය්යථා’පි නාම ඔට්ඨපදං එවමෙවස්සු මෙ ආනිසදං හොති තායෙවප්පාහාරතාය. සෙය්යථා’පි නාම වට්ටනාවලී එවමෙවස්සු මෙ පිට්ඨිකණ්ටකො උන්නතාවනතො හොති තායෙවප්පාහාරතාය. සෙය්යථා’පි නාම ජරසාලාය ගොපානසියො ඔලුග්ගවිලුග්ගා භවන්ති එවමෙවස්සු මෙ ඵාසුලියො ඔලුග්ගවිලුග්ගා භවන්ති තායෙවප්පාහාරතාය. සෙය්යථා’පි නාම ගම්භීරෙ උදපානෙ උදකතාරකා ගම්භීරගතා ඔක්ඛායිකා දිස්සන්ති, එවමෙවස්සු මෙ අක්ඛිකූපෙසු අක්ඛිතාරකා ගම්භීරගතා ඔක්ඛායිකා දිස්සන්ති තායෙවප්පාහාරතාය. සෙය්යථා’පි නාම තිත්තකාලාබු ආමකච්ඡින්නො වාතාතපෙන සම්ඵුටිතො හොති සම්මිලාතො එවමෙවස්සු මෙ සීසච්ඡවි සම්ඵුටිතා හොති සම්මිලාතා තායෙවප්පාහාරතාය. සො ඛො අහං රාජකුමාර, ‘උදරච්ඡවිං පරිමසිස්සා’මීති පිට්ඨිකණ්ටකංයෙව පරිගණ්හාමි. පිට්ඨිකණ්ටකං පරාමසිස්සාමී’ති උදරච්ඡවිංයෙව පරිගණ්හාමි. යාවස්සු මෙ රාජකුමාර, උදරච්ඡවි පිට්ඨිකණ්ටකං අල්ලීනා හොති තායෙවප්පාහාරතාය. සො ඛො අහං රාජකුමාර, ‘වච්චං වා මුත්තං වා කරිස්සාමී’ති, තත්ථෙ’ව අවකුජ්ජො පපතාමි තායෙවප්පාහාරතාය. සො ඛො අහං රාජකුමාර, ඉමමෙව කායං අස්සාසෙන්තො පාණිනා ගත්තානි අනුමජ්ජාමි. තස්ස මය්හං රාජකුමාර, පාණිනා ගත්තානි අනුමජ්ජතො පූතිමූලානි ලොමානි කායස්මා පපතන්ති තායෙවප්පාහාරතාය. අපිස්සු මං රාජකුමාර, මනුස්සා දිස්වා එවමාහංසු: ‘කාළො සමණො ගොතමො’ති, එකච්චෙ මනුස්සා එවමාහංසු: ‘න කාළො සමණො ගොතමො සාමො සමණො ගොතමො’ති. එකච්චෙ මනුස්සා එවමාහංසු: “න කාළො සමණො ගොතමො න’පි සාමො, මඞ්ගුරච්ඡවි සමණො ගොතමො’ති. යාවස්සු මෙ රාජකුමාර, තාව පරිසුද්ධො ඡවිවණ්ණො පරියොදාතො, උපහතො හොති තායෙවප්පාහාරතාය.
තස්ස මය්හං රාජකුමාර, එතදහොසි: “යෙ ඛො කෙචි අතීතමද්ධානං සමණා වා බ්රාහ්මණා වා ඔපක්කමිකා දුක්ඛා තිප්පා{1} කටුකා වෙදනා වෙදියිංසු, එතාවපරමං නයිතො භිය්යො. යෙ’පි හි කෙචි අනාගතමද්ධානං සමණා වා බ්රාහ්මණා වා ඔපක්කමිකා දුක්ඛා තිප්පා කටුකා වෙදනා වෙදියිස්සන්ති, එතාවපරමං නයිතො භිය්යො. යෙ’පි හි කෙචි එතරහි සමණා වා බ්රාහ්මණා වා ඔපක්කමිකා දුක්ඛා තිප්පා කටුකා වෙදනා වෙදියන්ති, එතාව පරමං නයිතො භිය්යො. න ඛො පනා’හං ඉමාය කටුකාය දුක්කරකාරිකාය අධිගච්ඡාමි උත්තරිමනුස්සධම්මා අලමරියඤාණදස්සනවිසෙසං. සියා නුඛො අඤ්ඤො මග්ගො බොධායා’ති?
තස්ස මය්හං රාජකුමාර, එතදහොසි: “අභිජානාමි, ඛො පනා’හං පිතු සක්කස්ස කම්මන්තෙ සීතාය ජම්බුච්ඡායාය නිසින්නො විවිච්චෙව කාමෙහි විවිච්ච අකුසලෙහි ධම්මෙහි සවිතක්කං සවිචාරං විවෙකජං පීතිසුඛං පඨමං ඣානං උපසම්පජ්ජ විහරිතා. සියා නු ඛො එසො මග්ගො බොධායා’ති? තස්ස මය්හං රාජකුමාර, සතානුසාරී විඤ්ඤාණං අහොසි: “එසො’ව මග්ගො බොධායා”ති. තස්ස මය්හං රාජකුමාර, එතදහොසි: “කින්නු ඛො අහං තස්ස සුඛස්ස භායාමි, යං තං සුඛං අඤ්ඤත්රෙ’ව කාමෙහි අඤ්ඤත්ර අකුසලෙහි ධම්මෙහී”ති. තස්ස මය්හං රාජකුමාර, එතදහොසි: “න ඛො අහං තස්ස සුඛස්ස භායාමි, යං තං සුඛං අඤ්ඤත්රෙ’ව කාමෙහි අඤ්ඤත්ර අකුසලෙහි ධම්මෙහී”ති.
තස්ස මය්හං රාජකුමාර, එතදහොසි: “න ඛො තං සුකරං සුඛං අධිගන්තුං එවං අධිමත්තකසිමානං පත්තකායෙන. යන්නූනාහං ඔළාරිකං ආහාරං ආහාරෙය්යං ඔදනකුම්මාසන්ති. යො ඛො අහං රාජකුමාර, ඔළාරිකං ආහාරං ආහාරෙසිං ඔදනකුම්මාසං. තෙන ඛො පන මං රාජකුමාර, සමයෙන පඤ්චවග්ගියා භික්ඛූ පච්චුපට්ඨිතා හොන්ති: “යං ඛො සමණො ගොතමො ධම්මං අධිගමිස්සති තං නො ආරොචෙස්සතී”ති. යතො ඛො අහං රාජකුමාර, ඔළාරිකං ආහාරං ආහාරෙසිං ඔදනකුම්මාසං. අථ මෙ තෙ පඤ්චවග්ගියා භික්ඛූ නිබ්බිජ්ජ පක්කමිංසු “බාහුලිකො{2} සමණො ගොතමො පධානවිබ්භන්තො ආවත්තො බාහුල්ලායා”ති.
සො ඛො අහං රාජකුමාර, ඔළාරිකං ආහාරං ආහාරෙත්වා බලං ගහෙත්වා විවිච්චෙව කාමෙහි -පෙ- පඨමං ඣානං උපසම්පජ්ජ විහාසිං. විතක්කවිචාරානං වූපසමා -පෙ- දුතියං ඣානං -පෙ- තතියං ඣානං -පෙ- චතුත්ථං ඣානං උපසම්පජ්ජ විහාසිං. සො එවං සමාහිතෙ චිත්තෙ පරිසුද්ධෙ පරියොදාතෙ අනඞ්ගණෙ විගතූපක්කිලෙසෙ මුදුභූතෙ කම්මනියෙ ඨිතෙ ආනෙඤ්ජප්පත්තෙ පුබ්බෙනිවාසානුස්සතිඤාණාය චිත්තං අභිනින්නාමෙසිං. සො අනෙකවිහිතං පුබ්බෙනිවාසං අනුස්සරාමි, සෙය්යථීදං{3} එකම්පි ජාතිං, ද්වෙ’පි ජාතියො -පෙ- ඉති සාකාරං සඋද්දෙසං අනෙකවිහිතං පුබ්බෙනිවාසං අනුස්සරාමි. අයං ඛො මෙ රාජකුමාර, රත්තියා පඨමෙ යාමෙ පඨමා විජ්ජා අධිගතා අවිජ්ජා විහතා, විජ්ජා උප්පන්නා, තමො විහතො, ආලොකො උප්පන්නො, යථා තං අප්පමත්තස්ස ආතාපිනො පහිතත්තස්ස විහරතො.
සො එවං සමාහිතෙ චිත්තෙ පරිසුද්ධෙ පරියොදාතෙ අනඞ්ගණෙ විගතූපක්කිලෙසෙ මුදුභූතෙ කම්මනියෙ ඨිතෙ ආනෙඤ්ජප්පත්තෙ සත්තානං චුතූපපාතඤාණාය චිත්තං අභිනින්නාමෙසිං. සො දිබ්බෙන චක්ඛුනා විසුද්ධෙන අතික්කන්තමානුසකෙන සත්තෙ පස්සාමි, චවමානෙ උපපජ්ජමානෙ හීනෙ පණීතෙ සුවණ්ණෙ දුබ්බණ්ණෙ සුගතෙ දුග්ගතෙ යථාකම්මූපගෙ සත්තෙ පජානාමි -පෙ- අයං ඛො මෙ රාජකුමාර, රත්තියා මජ්ඣිමෙ යාමෙ දුතියා විජ්ජා අධිගතා, අවිජ්ජා විහතා, විජ්ජා උප්පන්නා, තමො විහතො, ආලොකො උප්පන්නො, යථා තං අප්පමත්තස්ස ආතාපිනො පහිතත්තස්ස විහරතො.
සො එවං සමාහිතෙ චිත්තෙ පරිසුද්ධෙ පරියොදාතෙ අනඞ්ගණෙ විගතූපක්කිලෙසෙ මුදුභූතෙ කම්මනියෙ ඨිතෙ ආනෙඤ්ජප්පත්තෙ ආසවානං ඛයඤාණාය චිත්තං අභිනින්නාමෙසිං. සො ‘ඉදං දුක්ඛ’න්ති යථාභූතං අබ්භඤ්ඤාසිං -පෙ- ‘අයං දුක්ඛනිරොධගාමිනී පටිපදා’ති යථාභූතං අබ්භඤ්ඤාසිං. ‘ඉමෙ ආසවා’ති යථාභූතං අබ්භඤ්ඤාසිං -පෙ- ‘අයං ආසවනිරොධගාමිනී පටිපදා’ති යථාභූතං අබ්භඤ්ඤාසිං. තස්ස මෙ එවං ජානතො එවං පස්සතො කාමාසවා’පි චිත්තං විමුච්චිත්ථ, භවාසවා’පි චිත්තං විමුච්චිත්ථ, අවිජ්ජාසවා’පි චිත්තං විමුච්චිත්ථ. විමුත්තස්මිං විමුත්තමිති ඤාණං අහොසි. ඛීණා ජාති වුසිතං බ්රහ්මචරියං, කතං කරණීයං, නාපරං ඉත්ථත්තායා’ති අබ්භඤ්ඤාසිං. අයං ඛො මෙ රාජකුමාර, රත්තියා පච්ඡිමෙ යාමෙ තතියා විජ්ජා අධිගතා, අවිජ්ජා විහතා, විජ්ජා උප්පන්නා, තමො විහතො, ආලොකො උප්පන්නො, යථා තං අප්පමත්තස්ස ආතාපිනො පහිතත්තස්ස විහරතො.
තස්ස මය්හං රාජකුමාර, එතදහොසි: “අධිගතො ඛො ම්යායං ධම්මො ගම්භීරො දුද්දසො දුරනුබොධො සන්තො පණීතො අතක්කාවචරො නිපුණො පණ්ඩිතවෙදනීයො. ආලයරාමා ඛො පනා’යං පජා ආලයරතා ආලයසම්මුදිතා. ආලයරාමාය ඛො පන පජාය ආලයරතාය ආලයසම්මුදිතාය දුද්දසං ඉදං ඨානං යදිදං ඉදප්පච්චයතා පටිච්චසමුප්පාදො. ඉදම්පි ඛො ඨානං දුද්දසං යදිදං සබ්බසඞ්ඛාරසමථො සබ්බූපධිපටිනිස්සග්ගො තණ්හක්ඛයො විරාගො නිරොධො නිබ්බානං. අහඤ්චෙ’ව ඛො පන ධම්මං දෙසෙය්යං පරෙ ච මෙ න ආජානෙය්යුං, සො මමස්ස කිලමථො, සා මමස්ස විහෙසා”ති. අපිස්සු මං රාජකුමාර, ඉමා අනච්ඡරියා ගාථා{1} පටිභංසු පුබ්බෙ අස්සුතපුබ්බා.
“කිච්ඡෙන මෙ අධිගතං හලං දානි පකාසිතුං රාගදොසපරෙතෙහි නා’යං ධම්මො සුසම්බුධො පටිසොතගාමිං නිපුණං ගම්භීරං දුද්දසං අණුං රාගරත්තා න දක්ඛින්ති{2} තමොඛන්ධෙන ආවටා{3}” ති.
ඉතිහ මෙ රාජකුමාර, පටිසංචික්ඛතො අප්පොස්සුක්කතාය චිත්තං නමති නො ධම්මදෙසනාය.
අථ ඛො රාජකුමාර, බ්රහ්මුනො සහම්පතිස්ස මම චෙතසා චෙතොපරිවිතක්කමඤ්ඤාය එතදහොසි: “නස්සති වත භො ලොකො, විනස්සති වත භො ලොකො. යත්ර හි නාම තථාගතස්ස අරහතො සම්මාසම්බුද්ධස්ස අප්පොස්සුක්කතාය චිත්තං නමති නො ධම්මදෙසනායා”ති. අථ ඛො රාජකුමාර, බ්රහ්මා සහම්පති සෙය්යථා’පි නාම බලවා පුරිසො සම්මිඤ්ජිතං{1} වා බාහං පසාරෙය්ය, පසාරිතං වා බාහං සම්මිඤ්ජෙය්ය{2}, එවමෙව බ්රහ්මලොකෙ අන්තරහිතො මම පුරතො පාතුරහොසි. අථ ඛො රාජකුමාර, බ්රහ්මා සහම්පති එකංසං උත්තරාසඞ්ගං කරිත්වා යෙනා’හං තෙනඤ්ජලිං පණාමෙත්වා මං එතදවොච: දෙසෙතු භන්තෙ භගවා ධම්මං, දෙසෙතු සුගතො ධම්මං. සන්ති සත්තා අප්පරජක්ඛජාතිකා අස්සවණතා ධම්මස්ස පරිහායන්ති. භවිස්සන්ති ධම්මස්ස අඤ්ඤාතාරො”ති . ඉදමවොච රාජකුමාර, බ්රහ්මා සහම්පති. ඉදං වත්වා අථාපරං එතදවොච:
“පාතුරහොසි මගධෙසු පුබ්බෙ ධම්මො අසුද්ධො සමලෙහි චින්තිතොඅවාපුරෙතං{3} අමතස්ස ද්වාරං සුණන්තු ධම්මං විමලෙනානුබුද්ධං.
සෙලෙ යථා පබ්බතමුද්ධනිට්ඨිතො යථා’පි පස්සෙ ජනතං සමන්තතො තථූපමං ධම්මමයං සුමෙධපාසාද මාරුය්හ සමන්තචක්ඛු සොකාවතිණ්ණං{4} ජනතමපෙතසොකො අවෙක්ඛස්සු ජාතිජරාභිභූතං
උට්ඨෙහි වීර විජිතසඞ්ගාම සත්ථවාහ අනණ{5} විචර ලොකෙ දෙසස්සු{6} භගවා ධම්මං අඤ්ඤාතාරො භවිස්සන්තී”ති.
අථ ඛ්වාහං රාජකුමාර, බ්රහ්මුනො ච අජ්ඣෙසනං විදිත්වා සත්තෙසු ච කාරුඤ්ඤතං පටිච්ච බුද්ධචක්ඛුනා ලොකං ඔලොකෙසිං. අද්දසං ඛො අහං රාජකුමාර, බුද්ධචක්ඛුනා ලොකං වොලොකෙන්තො සත්තෙ අප්පරජක්ඛෙ මහාරජක්ඛෙ තික්ඛින්ද්රියෙ මුදින්ද්රියෙ ස්වාකාරෙ සුවිඤ්ඤාපයෙ{7} අප්පෙකච්චෙ පරලොකවජ්ජභයදස්සාවිනො{8} විහරන්තෙ. සෙය්යථා’පි නාම උප්පලිනියං වා පදුමිනියං වා පුණ්ඩරීකිනියං වා අප්පෙකච්චානි උප්පලානි වා පදුමානි වා පුණ්ඩරීකානි වා උදකෙ ජාතානි උදකෙ සංවද්ධානි උදකානුග්ගතානි අන්තො නිමුග්ගපොසීනී{9} අප්පෙකච්චානි උප්පලානි වා පදුමානි වා පුණ්ඩරීකානි වා උදකෙ ජාතානි උදකෙ සංවද්ධානි සමොදකං ඨිතානි. අප්පෙකච්චානි උප්පලානි වා පදුමානි වා පුණ්ඩරීකානි වා උදකෙ ජාතානි උදකෙ සංවද්ධානි උදකා අච්චුග්ගම්ම තිට්ඨන්ති අනුපලිත්තානි උදකෙන, එවමෙව ඛො අහං
රාජකුමාර, බුද්ධචක්ඛුනා ලොකං වොලොකෙන්තො අද්දසං සත්තෙ අප්පරජක්ඛෙ මහාරජක්ඛෙ තික්ඛින්ද්රියෙ මුදින්ද්රියෙ ස්වාකාරෙ සුවිඤ්ඤාපයෙ අප්පෙකච්චෙ පරලොකවජ්ජභයදස්සාවිනො විහරන්තෙ, අථ ඛ්වාහං රාජකුමාර, බ්රහ්මානං සහම්පතිං ගාථාය පච්චභාසිං:
“අපාරුතා තෙසං අමතස්ස ද්වාරා යෙ සොතවන්තො පමුඤ්චන්තු සද්ධං විහිංසසඤ්ඤී පගුණං න භාසිංධ ම්මං පනෙතං මනුජෙසු බ්රහ්මෙ”ති.
අථ ඛො රාජකුමාර, බ්රහ්මා සහම්පති “කතාවකාසො ඛොම්හි භගවතා ධම්මදෙසනායා”ති මං අභිවාදෙත්වා පදක්ඛිණං කත්වා තත්ථෙවන්තරධායි.
තස්ස මය්හං රාජකුමාර, එතදහොසි: “කස්ස නු ඛො අහං පඨමං ධම්මං දෙසෙය්යං, කො ඉමං ධම්මං ඛිප්පමෙව ආජානිස්සතී’ති. තස්ස මය්හං රාජකුමාර, එතදහොසි: “අයං ඛො ආළාරො කාලාමො පණ්ඩිතො බ්යත්තො මෙධාවී දීඝරත්තං අප්පරජක්ඛජාතිකො. යන්නූනා”හං ආළාරස්ස කාලාමස්ස පඨමං ධම්මං දෙසෙය්යං, සො ඉමං ධම්මං ඛිප්පමෙව ආජානිස්සතී”ති. අථ ඛො මං රාජකුමාර, දෙවතා උපසඞ්කමිත්වා එතදවොච: “සත්තාහකාලකතො{1} භන්තෙ, ආළාරො කාලාමො”ති. ඤාණඤ්ච පන මෙ දස්සනං උදපාදි: “සත්තාහකාලකතො ආළාරො කාලාමො”ති. තස්ස මය්හං රාජකුමාර, එතදහොසි: “මහාජානියො ඛො ආළාරො කාලාමො. සචෙ හි සො ඉමං ධම්මං සුණෙය්ය, ඛිප්පමෙව ආජානෙය්යා”ති.
තස්ස මය්හං රාජකුමාර, එතදහොසි: “කස්ස නු ඛො අහං පඨමං ධම්මං දෙසෙය්යං, කො ඉමං ධම්මං ඛිප්පමෙව ආජානිස්සතී’ති. තස්ස මය්හං, රාජකුමාර, එතදහොසි: “අයං ඛො උද්දකො{2} රාමපුත්තො පණ්ඩිතො බ්යත්තො මෙධාවී දීඝරත්තං අප්පරජක්ඛජාතිකො. යන්නූනාහං උද්දකස්ස රාමපුත්තස්ස පඨමං ධම්මං දෙසෙය්යං. සො ඉමං ධම්මං ඛිප්පමෙව ආජානිස්සතී”ති. අථ ඛො මං රාජකුමාර දෙවතා උපසඞ්කමිත්වා එතදවොච: “අභිදොසකාලකතො{1} භන්තෙ උද්දකො රාමපුත්තො”ති. ඤාණඤ්ච පන මෙ දස්සනං උදපාදී: “අභිදොසකාලකතො උද්දකො රාමපුත්තො”ති. තස්ස මය්හං රාජකුමාර එතදහොසි: “මහාජානියො ඛො උද්දකො රාමපුත්තො. සචෙ හි සො ඉමං ධම්මං සුණෙය්ය, ඛිප්පමෙව ආජානෙය්යා”ති.
තස්ස මය්හං රාජකුමාර, එතදහොසි: “කස්ස නු ඛො අහං පඨමං ධම්මං දෙසෙය්යං, කො ඉමං ධම්මං ඛිප්පමෙව ආජානිස්සතී’ති තස්ස මය්හං රාජකුමාර, එතදහොසි: “බහුකාරා ඛො මෙ පඤ්චවග්ගියා භික්ඛූ යෙ මං පධානපහිතත්තං උපට්ඨහිංසු. යන්නූනාහං පඤ්චවග්ගියානං භික්ඛූනං පඨමං ධම්මං දෙසෙය්ය”න්ති. තස්ස මය්හං රාජකුමාර, එතදහොසි: “කහන්නු ඛො එතරහි පඤ්චවග්ගියා භික්ඛූ විහරන්තී”ති. අද්දසං ඛො අහං රාජකුමාර, දිබ්බෙන චක්ඛුනා විසුද්ධෙන අතික්කන්තමානුසකෙන පඤ්චවග්ගියෙ භික්ඛූ බාරාණසියං විහරන්තෙ ඉසිපතනෙ මිගදායෙ. අථ ඛ්වාහං රාජකුමාර, උරුවෙලායං යථාභිරන්තං විහරිත්වා යෙන බාරාණසී තෙන චාරිකං පක්කාමිං. අද්දසා ඛො මං රාජකුමාර,
උපකො ආජීවකො අන්තරා ච ගයං අන්තරා ච බොධිං අද්ධානමග්ගපටිපන්නං. දිස්වාන මං එතදවොච: “විප්පසන්නානි ඛො තෙ ආවුසො ඉන්ද්රියානි, පරිසුද්ධො ඡවිවණ්ණො පරියොදාතො. කංසි ත්වං ආවුසො උද්දිස්ස පබ්බජිතො, කො වා තෙ සත්ථා, කස්ස වා ත්වං ධම්මං රොචෙසී”ති. එවං වුත්තෙ අහං රාජකුමාර, උපකං ආජීවකං ගාථාහි අජ්ඣභාසිං:
“සබ්බාභිභූ සබ්බවිදූහමස්මි සබ්බෙසු ධම්මෙසු අනූපලිත්තො සබ්බඤ්ජහො තණ්හක්ඛයෙ විමුත්තො සයං අභිඤ්ඤාය කමුද්දිසෙය්යං
න මෙ ආචරියො අත්ථි සදිසො මෙ න විජ්ජති සදෙවකස්මිං ලොකස්මිං නත්ථි මෙ පටිපුග්ගලො
අහං හි අරහා ලොකෙ අහං සත්ථා අනුත්තරො එකොම්හි සම්මාසම්බුද්ධො සීතිභූතොස්මි නිබ්බුතො.
ධම්මචක්කං පවත්තෙතුං ගච්ඡාමි කාසිනං පුරංඅන්ධභූතස්මිං{1} ලොකස්මිං ආහඤ්ඡං{2} අමතදුන්දුභිං”ති.
යථා ඛො ත්වං ආවුසො පටිජානාසි අරහසි අනන්තජිනො”ති.
“මාදිසා වෙ ජිනා හොන්ති යෙ පත්තා ආසවක්ඛයං ජිතා මෙ පාපකා ධම්මා තස්මාහං උපකා ජිනො”ති.
එවං වුත්තෙ රාජකුමාර, උපකො ආජීවකො “හූවෙය්ය පාවුසො”ති වත්වා සීසං ඔකම්පෙත්වා උම්මග්ගං ගහෙත්වා පක්කාමි.
අථ ඛ්වාහං රාජකුමාර, අනුපුබ්බෙන චාරිකං චරමානො යෙන බාරාණසී ඉසිපතනං මිගදායො යෙන පඤ්චවග්ගියා භික්ඛූ තෙනුපසංකමිං. අද්දසංසු ඛො මං රාජකුමාර, පඤ්චවග්ගියා භික්ඛූ දූරතො’ව ආගච්ඡන්තං. දිස්වාන අඤ්ඤමඤ්ඤං සණ්ඨපෙසුං: “අයං ඛො ආවුසො සමණො ගොතමො ආගච්ඡති බාහුලිකො පධානවිබ්භන්තො ආවත්තො බාහුල්ලාය. සො නෙව අභිවාදෙතබ්බො, න පච්චුට්ඨාතබ්බො, නාස්ස පත්තචීවරං පටිග්ගහෙතබ්බං, අපි ච ඛො ආසනං ඨපෙතබ්බං සචෙ ආකංඛිස්සති නිසීදිස්සතී”ති. යථා යථා ඛො අහං රාජකුමාර, උපසඞ්කමාමි, තථා තථා පඤ්චවග්ගියා භික්ඛූ නාසක්ඛිංසු සකාය කතිකාය සණ්ඨාතුං. අප්පෙකච්චෙ මං පච්චුග්ගන්ත්වා පත්තචීවරං පටිග්ගහෙසුං. අප්පෙකච්චෙ ආසනං පඤ්ඤාපෙසුං. අප්පෙකච්චෙ පාදොදකං උපට්ඨපෙසුං. අපි ච ඛො මං නාමෙන ච ආවුසොවාදෙන ච සමුදාචරන්ති. එවං වුත්තෙ අහං රාජකුමාර, පඤ්චවග්ගියෙ භික්ඛූ එතදවොචං: ‘මා භික්ඛවෙ තථාගතං නාමෙන ච ආවුසොවාදෙන ච සමුදාචරිත්ථ{3} අරහං භික්ඛවෙ තථාගතො සම්මාසම්බුද්ධො ඔදහථ භික්ඛවෙ සොතං, අමතමධිගතං, අහමනුසාසාමි, අහං ධම්මං දෙසෙමි, යථානුසිට්ඨං තථා පටිපජ්ජමානා න චිරස්සෙව යස්සත්ථාය කුලපුත්තා සම්මදෙව අගාරස්මා අනගාරියං පබ්බජන්ති. තදනුත්තරං බ්රහ්මචරියපරියොසානං දිට්ඨෙව ධම්මෙ සයං අභිඤ්ඤා සච්ඡිකත්වා උපසම්පජ්ජ විහරිස්සථා”ති.
එවං වුත්තෙ රාජකුමාර, පඤ්චවග්ගියා භික්ඛූ මං එතදවොචුං: “තාය’පි ඛො ත්වං ආවුසො ගොතම, ඉරියාය තාය පටිපදාය තාය දුක්කරකාරිකාය නාජ්ඣගමා උත්තරිමනුස්සධම්මා අලමරියඤාණදස්සනවිසෙසං, කිම්පන ත්වං එතරහි බාහුලිකො පධානවිබ්භන්තො ආවට්ටො බාහුල්ලාය අධිගමිස්සසි උත්තරිමනුස්සධම්මා අලමරියඤාණදස්සනවිසෙස”න්ති. එවං වුත්තෙ අහං රාජකුමාර, පඤ්චවග්ගියෙ භික්ඛූ එතදවොචං: “න භික්ඛවෙ තථාගතො බාහුලිකො න පධානවිබ්භන්තො න ආවත්තො බාහුල්ලාය අරහං භික්ඛවෙ තථාගතො සම්මාසම්බුද්ධො. ඔදහථ භික්ඛවෙ සොතං. අමතමධිගතං අහමනුසාසාමි. අහං ධම්මං දෙසෙමි. යථානුසිට්ඨං තථා පටිපජ්ජමානා න චිරස්සෙ’ව යස්සත්ථාය කුලපුත්තා සම්මදෙව අගාරස්මා අනගාරියං පබ්බජන්ති. තදනුත්තරං බ්රහ්මචරියපරියොසානං දිට්ඨෙව ධම්මෙ සයං අභිඤ්ඤා සච්ඡිකත්වා උපසම්පජ්ජ විහරිස්සථා”ති. දුතියම්පි ඛො රාජකුමාර, පඤ්චවග්ගියා භික්ඛූ මං එතදවොචුං: “තායපි ඛො ත්වං ආවුසො ඉරියාය තාය පටිපදාය තාය දුක්කරකාරිකාය නාජ්ඣගමා උත්තරිමනුස්සධම්මා අලමරියඤාණදස්සන විසෙසං. කිම්පන ත්වං එතරහි බාහුලිකො පධානවිබ්භන්තො ආවත්තො බාහුල්ලාය අධිගමිස්සසි උත්තරිමනුස්සධම්මා අලමරියඤාණදස්සනවිසෙස”න්ති. දුතියම්පි ඛො අහං රාජකුමාර, පඤ්චවග්ගියෙ භික්ඛූ එතදවොචං: “න භික්ඛවෙ තථාගතො බාහුලිකො න පධානවිබ්භන්තො න ආවත්තො බාහුල්ලාය. අරහං භික්ඛවෙ, තථාගතො සම්මාසම්බුද්ධො. ඔදහථ භික්ඛවෙ සොතං අමතමධිගතං, අහමනුසාසාමි, අහං ධම්මං දෙසෙමි. යථානුසිට්ඨං තථා පටිපජ්ජමානා න චිරස්සෙ’ව යස්සත්ථාය කුලපුත්තා සම්මදෙව අගාරස්මා අනගාරියං පබ්බජන්ති තදනුත්තරං බ්රහ්මචරියපරියොසානං දිට්ඨෙව ධම්මෙ සයං අභිඤ්ඤා සච්ඡිකත්වා උපසම්පජ්ජ විහරිස්සථා”ති . තතියම්පි ඛො රාජකුමාර, පඤ්චවග්ගියා භික්ඛූ මං එතදවොචුං: “තාය’පි ඛො ත්වං ආවුසො ඉරියාය තාය පටිපදාය තාය දුක්කරකාරිකාය නාජ්ඣගමා උත්තරිමනුස්සධම්මා අලමරියඤාණදස්සනවිසෙසං. කිම්පන ත්වං එතරහි බාහුලිකො පධානවිබ්භන්තො ආවත්තො බාහුල්ලාය අධිගමිස්සසි උත්තරිමනුස්සධම්මා අලමරියඤාණදස්සනවිසෙස”න්ති. එවං වුත්තෙ අහං රාජකුමාර, පඤ්චවග්ගියෙ භික්ඛූ එතදවොචං: අභිජානාථ මෙ නො තුම්හෙ භික්ඛවෙ ඉතො පුබ්බෙ එවරූපං වබ්භාවිතමෙත’න්ති{1} නො හෙතං භන්තෙ න භික්ඛවෙ තථාගතො බාහුලිකො, න පධානවිබ්භන්තො න ආවත්තො බාහුල්ලාය අරහං භික්ඛවෙ තථාගතො සම්මාසම්බුද්ධො. ඔදහථ භික්ඛවෙ සොතං. අමතමධිගතං. අහමනුසාසාමි, අහං ධම්මං දෙසෙමි. යථානුසිට්ඨං තථා පටිපජ්ජමානා න චිරස්සෙ’ව යස්සත්ථාය කුලපුත්තා සම්මදෙව අගාරස්මා අනගාරියං පබ්බජන්ති, තදනුත්තරං බ්රහ්මචරියපරියොසානං දිට්ඨෙව ධම්මෙ සයං අභිඤ්ඤා සච්ඡිකත්වා උපසම්පජ්ජ විහරිස්සථා”ති.
අසක්ඛිං ඛො අහං රාජකුමාර, පඤ්චවග්ගියෙ භික්ඛූ සඤ්ඤාපෙතුං. ද්වෙ’පි සුදං රාජකුමාර, භික්ඛූ ඔවදාමි. තයො භික්ඛූ පිණ්ඩාය චරන්ති. යං තයො භික්ඛූ පිණ්ඩාය චරිත්වා ආහරන්ති, තෙන ඡබ්බග්ගියා යාපෙම. තයො’පි සුදං රාජකුමාර, භික්ඛූ ඔවදාමි, ද්වෙ භික්ඛූ පිණ්ඩාය චරන්ති. යං ද්වෙ භික්ඛූ පිණ්ඩාය චරිත්වා ආහරන්ති. තෙන ඡබ්බග්ගියා යාපෙම. අථ ඛො රාජකුමාර පඤ්චවග්ගියා භික්ඛූ මයා එවං ඔවදියමානා එවං අනුසාසියමානා න චිරස්සෙ’ව යස්සත්ථාය කුලපුත්තා සම්මදෙව අගාරස්මා අනගාරියං පබ්බජන්ති තදනුත්තරං බ්රහ්මචරියපරියොසානං දිට්ඨෙව ධම්මෙ සයං අභිඤ්ඤා සච්ඡිකත්වා උපසම්පජ්ජ විහරිංසූ’ති.
එවං වුත්තෙ බොධි රාජකුමාරො භගවන්තං එතදවොච: ‘කීවචිරෙන නු ඛො භන්තෙ, භික්ඛු තථාගතං විනායකං ලභමානො යස්සත්ථාය කුලපුත්තා සම්මදෙව අගාරස්මා අනගාරියං පබ්බජන්ති, තදනුත්තරං බ්රහ්මචරියපරියොසානං දිට්ඨෙව ධම්මෙ සයං අභිඤ්ඤා සච්ඡිකත්වා උපසම්පජ්ජ විහරෙය්යාති.
තෙන හි රාජකුමාර, තඤ්ඤෙවෙත්ථ පටිපුච්ඡිස්සාමි. යථා තෙ ඛමෙය්ය, තථා නං බ්යාකරෙය්යාසි. තං කිම්මඤ්ඤසි රාජකුමාර, කුසලො ත්වං හත්ථාරුය්හෙ{1} අඞ්කුසගය්හෙ{2} සිප්පෙති? එවං භන්තෙ, කුසලො අහං හත්ථාරුය්හෙ{1} අඞ්කුසගය්හෙ{2} සිප්පෙති. තං කිම්මඤ්ඤසි රාජකුමාර, ඉධ පුරිසො ආගච්ඡෙය්ය ‘බොධිරාජකුමාරො හත්ථාරුයහං{3} අඞ්කුසගය්හං{4} සිප්පං ජානාති. තස්සාහං සන්තිකෙ හත්ථාරුය්හං අඞ්කුසගය්හං සිප්පං සික්ඛිස්සාමීති. සො චස්ස අස්සද්ධො. යාවතකං සද්ධෙන පත්තබ්බං, තං සම්පාපුණෙය්ය. සො චස්ස බව්හාබාධො, යාවතකං අප්පාබාධෙන පත්තබ්බං, තං න සම්පාපුණෙය්ය. සො චස්ස සඨො මායාවී, යාවතකං අසඨෙන අමායාවිනා පත්තබ්බං, තං න සම්පාපුණෙය්ය. සො චස්ස කුසීතො, යාවතකං ආරද්ධවිරියෙන පත්තබ්බං, තං න සම්පාපුණෙය්ය. සො චස්ස දුප්පඤ්ඤො, යාවතකං පඤ්ඤවතා පත්තබ්බං, තං න සම්පාපුණෙය්ය. තං කිම්මඤ්ඤසි රාජකුමාර, අපි නු සො පුරිසො තව සන්තිකෙ හත්ථාරුය්හං අඞ්කුසගය්හං සිප්පං සික්ඛෙය්යාති? එකමෙකෙනපි භන්තෙ, අඞ්ගෙන සමන්නාගතො සො පුරිසො න මම සන්තිකෙ හත්ථාරුය්හං අඞ්කුසගය්හං සිප්පං සික්ඛෙය්ය. කො පන වාදො පඤ්චහඞ්ගෙහීති.
තං කිම්මඤ්ඤසි රාජකුමාර, ඉධ පුරිසො ආගච්ඡෙය්ය ‘බොධි රාජකුමාරො හත්ථාරුය්හං{3} අඞ්කුසගය්හං{4} සිප්පං ජානාති. තස්සාහං සන්තිකෙ හත්ථාරුයහං අඞ්කුසගය්හං සිප්පං සික්ඛිස්සාමීති. සො චස්ස සද්ධො යාවතකං සද්ධෙන පත්තබ්බං, තං සම්පාපුණෙය්ය. සො චස්ස අප්පාබාධො, යාවතකං අප්පාබාධෙන පත්තබ්බං, තං සම්පාපුණෙය්ය. සො චස්ස අසඨො අමායාවී, යාවතකං අසඨෙන අමායාවිනා පත්තබ්බං, තං සම්පාපුණෙය්ය. සො චස්ස ආරද්ධවිරියො, යාවතකං ආරද්ධවිරියෙන පත්තබ්බං තං සම්පාපුණෙය්ය. සො චස්ස පඤ්ඤවා යාවතකං පඤ්ඤවතා පත්තබ්බං, තං සම්පාපුණෙය්ය. තං කිම්මඤ්ඤසි රාජකුමාර, අපි නු සො පුරිසො තව සන්තිකෙ හත්ථාරුයහං අඞ්කුසගය්හං සිප්පං සික්ඛෙය්යාති? එකමෙකෙනපි භන්තෙ, අඞ්ගෙන සමන්නාගතො සො පුරිසො මම සන්තිකෙ හත්ථාරුයහං අඞ්කුසගය්හං සිප්පං සික්ඛෙය්ය, කො පන වාදො පඤ්චහඞ්ගෙහීති.
එව මෙව ඛො රාජකුමාර, පඤ්චිමානි පධානියඞ්ගානි. කතමානි පඤ්ච? ඉධ රාජකුමාර, භික්ඛු සද්ධො හොති, සද්දහති තථාගතස්ස බොධිං ‘ඉතිපි සො භගවා අරහං සම්මාසම්බුද්ධො විජ්ජාචරණසම්පන්නො සුගතො ලොකවිදූ අනුත්තරො පුරිසදම්මසාරථි සත්ථා දෙවමනුස්සානං බුද්ධො භගවා”ති. අප්පාබාධො හොති අප්පාතඞ්කො සමවෙපාකිනියා ගහණියා සමන්නාගතො නාතිසීතාය නාච්චුණ්හාය මජ්ඣිමාය පධානක්ඛමාය. අසඨො හොති අමායාවී යථාභූතං අත්තානං ආවීකත්තා{1} සත්ථරි වා විඤ්ඤූසු වා සබ්රහ්මචාරීසු ; ආරද්ධවිරියො විහරති අකුසලානං ධම්මානං පහානාය කුසලානං ධම්මානං උප්පාදාය{2} ථාමවා දළ්හපරක්කමො අනික්ඛිත්තධුරො කුසලෙසු ධම්මෙසු. පඤ්ඤවා හොති උදයත්ථගාමිනියා පඤ්ඤාය සමන්නාගතො අරියාය නිබ්බෙධිකාය සම්මාදුක්ඛක්ඛයගාමිනියා ඉමානි ඛො රාජකුමාර, පඤ්ච පධානියඞ්ගානි. ඉමෙහි ඛො රාජකුමාර, පඤ්චහි පධානියඞ්ගෙහි සමන්නාගතො භික්ඛු තථාගතං විනායකං ලභමානො යස්සත්ථාය කුලපුත්තා සම්මදෙව අගාරස්මා අනගාරියං පබ්බජන්ති තදනුත්තරං බ්රහ්මචරියපරියොසානං දිට්ඨෙවධම්මෙ සයං අභිඤ්ඤා සච්ඡිකත්වා උපසම්පජ්ජ විහරෙය්ය සත්තවස්සානි.
තිට්ඨන්තු{3} රාජකුමාර, සත්ත වස්සානි. ඉමෙහි පඤ්චහි පධානියඞ්ගෙහි සමන්නාගතො භික්ඛු -පෙ- විහරෙය්ය ඡ වස්සානි -පෙ- පඤ්ච වස්සානි -පෙ- චත්තාරි වස්සානි -පෙ- තීණි වස්සානි -පෙ- ද්වෙ වස්සානි -පෙ- එකං වස්සං. තිට්ඨතු, රාජකුමාර, එකං වස්සං. ඉමෙහි පඤ්චහි පධානියඞ්ගෙහි සමන්නාගතො භික්ඛු -පෙ- විහරෙය්ය සත්තමාසානි. තිට්ඨන්තු රාජකුමාර, සත්ත මාසානි. ඉමෙහි පඤ්චහි පධානියඞ්ගෙහි සමන්නාගතො භික්ඛු -පෙ- විහරෙය්ය ඡ මාසානි -පෙ- පඤ්ච මාසානි -පෙ- චත්තාරි මාසානි -පෙ- තීණි මාසානි -පෙ- ද්වෙ මාසානි -පෙ- එකං මාසං -පෙ- අද්ධමාසං.
තිට්ඨතු රාජකුමාර, අද්ධමාසො. ඉමෙහි පඤ්චහි පධානියඞ්ගෙහි සමන්නාගතො භික්ඛු තථාගතං විනායකං ලභමානො යස්සත්ථාය කුලපුත්තා සම්මදෙව අගාරස්මා අනගාරියං පබ්බජන්ති. තදනුත්තරං බ්රහ්මචරියපරියොසානං දිට්ඨෙවධම්මෙ සයං අභිඤ්ඤා සච්ඡිකත්වා උපසම්පජ්ජ විහරෙය්ය සත්ත රත්තින්දිවානි.
තිට්ඨන්තු රාජකුමාර, සත්ත රත්තින්දිවානි. ඉමෙහි පඤ්චහි පධානියඞ්ගෙහි සමන්නාගතො භික්ඛු තථාගතං විනායකං ලභමානො යස්සත්ථාය කුලපුත්තා සම්මදෙව අගාරස්මා අනගාරියං පබ්බජන්ති. තදනුත්තරං බ්රහ්මචරියපරියොසානං දිට්ඨෙව ධම්මෙ සයං අභිඤ්ඤා සච්ඡිකත්වා උපසම්පජ්ජ විහරෙය්ය ඡ රත්තින්දිවානි: -පෙ- පඤ්ච රත්තින්දිවානි -පෙ- චත්තාරි රත්තින්දිවානි -පෙ- තීණි රත්තින්දිවානි -පෙ- ද්වෙ රත්තින්දිවානි -පෙ- එකං රත්තින්දිවං.
තිට්ඨතු රාජකුමාර, එකං රත්තින්දිවං,{1} ඉමෙහි පඤ්චහි පධානියඞ්ගෙහි සමන්නාගතො භික්ඛු තථාගතං විනායකං ලභමානො සායමනුසිට්ඨො පාතො විසෙසං අධිගමිස්සති. පාතමනුසිට්ඨො සායං විසෙසං අධිගමිස්සති.
එවං වුත්තෙ බොධි රාජකුමාරො භගවන්තං එතදවොච: අහො බුද්ධො, අහො ධම්මො, අහො ධම්මස්ස ස්වාක්ඛාතතා, යත්ර හි නාම සායමනුසිට්ඨො පාතො විසෙසං අධිගමිස්සති, පාතමනුසිට්ඨො සායං විසෙසං අධිගමිස්සතීති.
එවං වුත්තෙ සඤ්ජිකාපුත්තො මාණවො බොධිරාජකුමාරං එතදවොච: එවමෙව පනායං භවං බොධි අහො බුද්ධො, අහො ධම්මො, අහො ධම්මස්ස ස්වාක්ඛාතතාති ච වදෙති{2} අථ ච පන භවං{3} න තං භවන්තං ගොතමං සරණං ගච්ඡති{4} ධම්මඤ්ච භික්ඛුසඞ්ඝඤ්චාති.
මා හෙවං සම්ම සඤ්ජිකාපුත්ත අවච, මා හෙවං සම්ම සඤ්ජිකාපුත්ත අවච. සම්මුඛාමෙතං සම්ම සඤ්ජිකාපුත්ත, අය්යාය සුතං, සම්මුඛා පටිග්ගහීතං එකමිදං සම්ම සඤ්ජිකාපුත්ත, සමයං භගවා කොසම්බියං විහරති ඝොසිතාරාමෙ. අථ ඛො මෙ අය්යා කුච්ඡිමතී{5} යෙන භගවා තෙනුපසඞ්කමි, උපසඞ්කමිත්වා භගවන්තං අභිවාදෙත්වා එකමන්තං නිසීදි. එකමන්තං නිසින්නා ඛො මෙ අය්යා භගවන්තං එතදවොච: යො මෙ අයං භන්තෙ, කුච්ඡිගතො කුමාරකො වා කුමාරිකා වා, සො භගවන්තං සරණං ගච්ඡති ධම්මඤ්ච භික්ඛුසඞ්ඝඤ්ච. උපාසකං තං භගවා ධාරෙතු අජ්ජතග්ගෙ පාණුපෙතං සරණං ගතන්ති.
එකමිදං සම්ම සඤ්ජිකාපුත්ත, සමයං භගවා ඉධෙව භග්ගෙසු විහරති සුංසුමාරගිරෙ භෙසකලාවනෙ මිගදායෙ. අථ ඛො මමං ධාතී අඞ්කෙන වාහිත්වා{6} යෙන භගවා තෙනුපසඞ්කමි, උපසඞ්කමිත්වා භගවන්තං අභිවාදෙත්වා එකමන්තං අට්ඨාසි. එකමන්තං ඨිතා ඛො මමං{7} ධාතී භගවන්තං එතදවොච: අයං භන්තෙ, බොධිරාජකුමාරො භගවන්තං සරණං ගච්ඡති ධම්මඤ්ච භික්ඛුසඞ්ඝඤ්ච. උපාසකං තං භගවා ධාරෙතු අජ්ජතග්ගෙ පාණුපෙතං සරණං ගතන්ති.
එසා’හං සම්ම සඤ්ජිකාපුත්ත, තතියම්පි භගවන්තං සරණං ගච්ඡාමි ධම්මඤ්ච භික්ඛුසඞ්ඝඤ්ච. උපාසකං මං භගවා ධාරෙතු අජ්ජතග්ගෙ පාණුපෙතං සරණං ගතන්ති.
බොධිරාජකුමාරසුත්තං පඤ්චමං.
2. 4. 6.