නාහං භික්ඛවෙ, ආදිකෙනෙව අඤ්ඤාරාධනං වදාමි. අපි ච භික්ඛවෙ, අනුපුබ්බසික්ඛා අනුපුබ්බකිරියා අනුපුබ්බපටිපදා අඤ්ඤාරාධනා හොති.
කථඤ්ච භික්ඛවෙ, අනුපුබ්බසික්ඛා අනුපුබ්බකිරියා අනුපුබ්බපටිපදා අඤ්ඤාරාධනා හොති: ඉධ භික්ඛවෙ, සද්ධාජාතො උපසඞ්කමති, උපසඞ්කමන්තො පයිරුපාසති, පයිරුපාසන්තො සොතං ඔදහති, ඔහිතසොතො{1} ධම්මං සුණාති, සුත්වා ධම්මං ධාරෙති, ධතානං ධම්මානං අත්ථං උපපරික්ඛති, අත්ථං උපපරික්ඛතො ධම්මා නිජ්ඣානං ඛමන්ති, ධම්මනිජ්ඣානක්ඛන්තියා සති ඡන්දො ජායති, ඡන්දජාතො උස්සහති, උස්සහිත්වා{2} තුලෙති, තුලයිත්වා පදහති, පහිතත්තො{3} සමානො කායෙන චෙව පරමං සච්චං සච්ඡිකරොති; පඤ්ඤාය ච නං පටිවිජ්ඣ{4} පස්සති.
සාපි නාම භික්ඛවෙ, සද්ධා නාහොසි. තම්පි නාම භික්ඛවෙ, උපසඞ්කමනං නාහොසි. සාපි නාම භික්ඛවෙ, පයිරුපාසනා නාහොසි. තම්පි නාම භික්ඛවෙ, සොතාවධානං නාහොසි. තම්පි නාම භික්ඛවෙ, ධම්මසවනං නාහොසි. සාපි නාම{5} භික්ඛවෙ, ධම්මධාරණා නාහොසි. සාපි නාම භික්ඛවෙ, අත්ථූපපරික්ඛා නාහොසි. සාපි නාම භික්ඛවෙ, ධම්මනිජ්ඣානක්ඛන්ති නාහොසි. සොපි නාම භික්ඛවෙ, ඡන්දො නාහොසි. සොපි නාම භික්ඛවෙ, උස්සාහො නාහොසි. සාපි නාම භික්ඛවෙ, තුලනා නාහොසි. තම්පි නාම භික්ඛවෙ, පධානං නාහොසි. විප්පටිපන්නා’ත්ථ භික්ඛවෙ, මිච්ඡාපටිපන්නා’ත්ථ භික්ඛවෙ. කීවදූරෙවිමෙ භික්ඛවෙ, මොඝපුරිසා අපක්කන්තා ඉමස්මා ධම්මවිනයා.
අත්ථි භික්ඛවෙ, චතුප්පදං වෙය්යාකරණං යස්සුද්දිට්ඨස්ස විඤ්ඤූ පුරිසො න චිරස්සෙව පඤ්ඤාය’ත්ථං ආජානෙය්ය. උද්දිසිස්සාමි වො භික්ඛවෙ, ආජානිස්සථ මෙතන්ති. කෙ ච මයං භන්තෙ, කෙ ච ධම්මස්ස අඤ්ඤාතාරොති. යොපි සො භික්ඛවෙ, සත්ථා ආමිසගරු ආමිසදායාදො ආමිසෙහි සංසට්ඨො විහරති, තස්සපයං එවරූපී පණොපණවියා න උපෙති. එවඤ්ච නො අස්ස, අථ නං කරෙය්යාම, න ච නො එවමස්ස, න නං කරෙය්යාමාති. කිම්පන භික්ඛවෙ යං තථාගතො සබ්බසො ආමිසෙහි විසංසට්ඨො විහරති. සද්ධස්ස භික්ඛවෙ, සාවකස්ස සත්ථුසාසනෙ පරියොගාය{6} වත්තතො අයමනුධම්මො හොති: සත්ථා භගවා, සාවකොහමස්මි. ජානාති භගවා, නාහං ජානාමීති. සද්ධස්ස භික්ඛවෙ, සාවකස්ස සත්ථුසාසනෙ පරියොගාය වත්තතො රුම්හනියං{7} සත්ථුසාසනං හොති ඔජවන්තං. සද්ධස්ස භික්ඛවෙ, සාවකස්ස සත්ථුසාසනෙ පරියොගාය{6} වත්තතො අයමනුධම්මො හොති: ‘කාමං තචො ච නහාරු ච අට්ඨි ච අවසිස්සතු උපසුස්සතු සරීරෙ මංසලොහිතං. යං තං පුරිසත්ථාමෙන පුරිසවිරියෙන පුරිසපරක්කමෙන පත්තබ්බං, න තං අපාපුණිත්වා විරියස්ස සන්ථානං භවිස්සතී’ති. සද්ධස්ස භික්ඛවෙ, සාවකස්ස සත්ථුසාසනෙ පරියොගාය වත්තතො ද්වින්නං ඵලානං අඤ්ඤතරං ඵලං පාටිකඞ්ඛං: දිට්ඨෙව ධම්මෙ අඤ්ඤා, සති වා උපාදිසෙසෙ අනාගාමිතාති.
ඉදමවොච භගවා. අත්තමනා තෙ භික්ඛූ භගවතො භාසිතං අභිනන්දුන්ති.
කීටාගිරිසුත්තං දසමං.
භික්ඛුවග්ගො දුතියො.
තස්ස වග්ගස්ස උද්දානං:
කුඤ්ජර රාහුල සස්සත ලොකා මාලුඞ්ක්යපුත්තො ච භද්දාලි නාමො. ඛුදද්දිජාථ සහම්පති යාචං නාලක රඤ්ඤී කිටාගිරිනාමො.
3. පරිබ්බාජකවග්ගො
2. 3. 1.
තෙවිජ්ජවච්ඡගොත්ත සුත්තං
එවං මෙ සුතං එකං සමයං භගවා වෙසාලියං විහරති මහාවනෙ කූටාගාරසාලායං. තෙන ඛො පන සමයෙන වච්ඡගොත්තො පරිබ්බාජකො එකපුණ්ඩරීකෙ පරිබ්බාජකාරාමෙ පටිවසති. අථ ඛො භගවා පුබ්බණ්හසමයං නිවාසෙත්වා පත්තචීවරං ආදාය වෙසාලියං පිණ්ඩාය පාවිසි. අථ ඛො භගවතො එතදහොසි. අතිප්පගො ඛො තාව වෙසාලියං පිණ්ඩාය චරිතුං. යන්නූනාහං යෙන එකපුණ්ඩරීකො පරිබ්බාජකාරාමො, යෙන වච්ඡගොත්තො පරිබ්බාජකො, තෙනුපසඞ්කමෙය්යන්ති. අථ ඛො භගවා යෙන එකපුණ්ඩරීකො පරිබ්බාජකාරාමො යෙන වච්ඡගොත්තො පරිබ්බාජකො තෙනුපසඞ්කමි.
අද්දසා ඛො වච්ඡගොත්තො පරිබ්බාජකො භගවන්තං දූරතොව ආගච්ඡන්තං දිස්වාන, භගවන්තං එතදවොච: එතු ඛො භන්තෙ භගවා, ස්වාගතං භන්තෙ භගවතො, චිරස්සං ඛො භන්තෙ භගවා ඉමං පරියායමකාසි යදිදං ඉධාගමනාය. නිසීදතු භන්තෙ භගවා ඉදමාසනං පඤ්ඤත්තන්ති. නිසීදි භගවා පඤ්ඤත්තෙ ආසනෙ. වච්ඡගොත්තාපි ඛො පරිබ්බාජකො අඤ්ඤතරං නීචං ආසනං ගහෙත්වා එකමන්තං නිසීදි. එකමන්තං නිසින්නො ඛො වච්ඡගොත්තො පරිබ්බාජකො භගවන්තං එතදවොච: සුතං මෙතං භන්තෙ, සමණො ගොතමො සබ්බඤ්ඤූ සබ්බදස්සාවී අපරිසෙසං ඤාණදස්සනං පටිජානාති: චරතො ච මෙ තිට්ඨතො ච සුත්තස්ස ච ජාගරස්ස ච සතතං සමිතං ඤාණදස්සනං පච්චුපට්ඨිතන්ති. යෙ තෙ භන්තෙ එවමාහංසු: සමණො ගොතමො සබ්බඤ්ඤූ සබ්බදස්සාවී අපරිසෙසං ඤාණදස්සනං පටිජානාති: චරතො ච මෙ තිට්ඨතො ච සුත්තස්ස ච ජාගරස්ස ච සතතං සමිතං ඤාණදස්සනං පච්චුපට්ඨිතන්ති. කච්චි තෙ භන්තෙ භගවතො වුත්තවාදිනො, න ච භගවන්තං අභූතෙන අබ්භාචික්ඛන්ති. ධම්මස්ස චානුධම්මං බ්යාකරොන්ති. න ච කොචි සහධම්මිකො වාදානුවාදො ගාරය්හං ඨානං ආගච්ඡතීති.
යෙ තෙ වච්ඡ, එවමාහංසු: සමණො ගොතමො සබ්බඤ්ඤූ සබ්බදස්සාවී අපරිසෙසං ඤාණදස්සනං පටිජානාති: චරතො ච මෙ තිට්ඨතො ච සුත්තස්ස ච ජාගරස්ස ච සතතං සමිතං ඤාණදස්සනං පච්චුපට්ඨිත’න්ති. න මෙ තෙ වුත්තවාදිනො, අබ්භාචික්ඛන්ති ච පන මං තෙ අසතා අභූතෙනා’ති.
කථං බ්යාකරමානා පන මයං භන්තෙ වුත්තවාදිනො චෙව භගවතො අස්සාම, න ච භගවන්තං අභූතෙන අබ්භාචික්ඛෙය්යාම. ධම්මස්ස චානුධම්මං බ්යාකරෙය්යාම. න ච කොචි සහධම්මිකො වාදානුවාදො ගාරය්හං ඨානං ආගච්ඡෙය්යා’ති.
‘තෙවිජ්ජො සමණො ගොතමො’ති ඛො වච්ඡ බ්යාකරමානො වුත්තවාදී චෙව මෙ අස්ස, න ච මං අභූතෙන අබ්භාචික්ඛෙය්ය, ධම්මස්ස චානුධම්මං බ්යාකරෙය්ය, න ච කොචි සහධම්මිකො වාදානුවාදො{1} ගාරය්හං ඨානං ආගච්ඡෙය්ය. අහං හි වච්ඡ යාවදෙව ආකඞ්ඛාමි අනෙකවිහිතං පුබ්බෙනිවාසං අනුස්සරාමි. සෙය්යථිදං: එකම්පි ජාතිං ද්වෙපි ජාතියො -පෙ- ඉති සාකාරං සඋද්දෙසං අනෙකවිහිතං පුබ්බෙනිවාසං අනුස්සරාමි. අහං හි වච්ඡ යාවදෙව ආකඞ්ඛාමි දිබ්බෙන චක්ඛුනා විසුද්ධෙන අතික්කන්තමානුසකෙන සත්තෙ පස්සාමි චවමානෙ උපපජ්ජමානෙ හීනෙ පණීතෙ සුවණ්ණෙ දුබ්බණ්ණෙ සුගතෙ දුග්ගතෙ -පෙ- යථාකම්මූපගෙ සත්තෙ පජානාමි. අහං හි වච්ඡ ආසවානං ඛයා අනාසවං චෙතොවිමුත්තිං පඤ්ඤාවිමුත්තිං දිට්ඨෙව ධම්මෙ සයං අභිඤ්ඤා සච්ඡිකත්වා උපසම්පජ්ජ විහරාමි. ‘තෙවිජ්ජො සමණො ගොතමො’ති ඛො වච්ඡ බ්යාකරමානො වුත්තවාදී චෙව මෙ අස්ස න ච මං අභූතෙන අබ්භාචික්ඛෙය්ය, ධම්මස්ස චානුධම්මං බ්යාකරෙය්ය, න ච කොචි සහධම්මිකො වාදානුවාදො{1} ගාරය්හං ඨානං ආගච්ඡෙය්යා’ති.
එවං වුත්තෙ වච්ඡගොත්තො පරිබ්බාජකො භගවන්තං එතදවොච: අත්ථි නු ඛො භො ගොතම කොචි ගිහී ගිහීසඤ්ඤොජනං අප්පහාය කායස්ස භෙදා දුක්ඛස්සන්තකරො’ති{2}. නත්ථි ඛො වච්ඡ කොචි ගිහී ගිහීසඤ්ඤොජනං අප්පහාය කායස්ස භෙදා දුක්ඛස්සන්තකරො’ති{2}.
අත්ථි පන භො ගොතම කොචි ගිහී ගිහීසංයොජනං අප්පහාය කායස්ස භෙදා සග්ගූපගො’ති. න ඛො වච්ඡ එකඤ්ඤෙව සතං න ද්වෙ සතානි න තීණි සතානි න චත්තාරි සතානි න පඤ්ච සතානි, අථ ඛො භිය්යොව යෙ ගිහී ගිහීසඤ්ඤොජනං අප්පහාය කායස්ස භෙදා සග්ගූපගා’ති.
අත්ථි නු ඛො භො ගොතම කොචි ආජීවකො කායස්ස භෙදා දුක්ඛස්සන්තකරො’ති. නත්ථි ඛො වච්ඡ කොචි ආජීවකො කායස්ස භෙදා දුක්ඛස්සන්තකරො’ති.
අත්ථි පන භො ගොතම කොචි ආජීවකො කායස්ස භෙදා සග්ගූපගො’ති. ඉතො ඛො සො වච්ඡ එකනවුතො කප්පො යමහං අනුස්සරාමි. නාභිජානාමි කඤ්චි ආජීවකං සග්ගූපගං අඤ්ඤත්ර එකෙන, සොපාසි කම්මවාදී කිරියවාදීති.
එවං සන්තෙ භො ගොතම සුඤ්ඤං අදුං තිත්ථායතනං අන්තමසො සග්ගූපගෙනාපීති. එවං සන්තෙ වච්ඡ සුඤ්ඤං අදුං තිත්ථායතනං අන්තමසො සග්ගූපගෙනාපීති.
ඉදමවොච භගවා. අත්තමනො වච්ඡගොත්තො පරිබ්බාජකො භගවතො භාසිතං අභිනන්දීති.
තෙවිජ්ජවච්ඡගොත්ත සුත්තං පඨමං.{3}
2. 3. 2.
අග්ගිවච්ඡගොත්ත සුත්තං
එවං මෙ සුතං, එකං සමයං භගවා සාවත්ථියං විහරති ජෙතවනෙ අනාථපිණ්ඩිකස්ස ආරාමෙ. අථ ඛො වච්ඡගොත්තො පරිබ්බාජකො යෙන භගවා තෙනුපසඞ්කමි. උපසඞ්කමිත්වා භගවතා සද්ධිං සම්මොදි. සම්මොදනීයං කථං සාරාණීයං වීතිසාරෙත්වා එකමන්තං නිසීදි. එකමන්තං නිසින්නො ඛො වච්ඡගොත්තො පරිබ්බාජකො භගවන්තං එතදවොච:
කින්නු ඛො භො ගොතම ‘සස්සතො ලොකො ඉදමෙව සච්චං මොඝමඤ්ඤ’න්ති එවංදිට්ඨි භවං ගොතමො’ති. න ඛො අහං වච්ඡ එවංදිට්ඨි ‘සස්සතො ලොකො ඉදමෙව සච්චං මොඝමඤ්ඤ’න්ති.
කිම්පන භො ගොතම ‘අසස්සතො ලොකො ඉදමෙව සච්චං මොඝමඤ්ඤන්ති එවංදිට්ඨි භවං ගොතමො’ති. න ඛො අහං වච්ඡ එවංදිට්ඨි. ‘අසස්සතො ලොකො ඉදමෙව සච්චං, මොඝමඤ්ඤ’න්ති.
කින්නු ඛො භො ගොතම, ‘අන්තවා ලොකො ඉදමෙව සච්චං මොඝමඤ්ඤ’න්ති එවංදිට්ඨි භවං ගොතමොති. න ඛො අහං වච්ඡ එවංදිට්ඨි, ‘අන්තවා ලොකො ඉදමෙව සච්චං, මොඝමඤ්ඤ’න්ති.
කිම්පන භො ගොතම, ‘අනන්තවා ලොකො ඉදමෙව සච්චං මොඝමඤ්ඤ’න්ති එවංදිට්ඨි භවං ගොතමොති. න ඛො අහං වච්ඡ එවංදිට්ඨි, ‘අනන්තවා ලොකො ඉදමෙව සච්චං, මොඝමඤ්ඤ’න්ති.
කින්නු ඛො භො ගොතම, ‘තං ජීවං තං සරීරං ඉදමෙව සච්චං මොඝමඤ්ඤ’න්ති එවංදිට්ඨි භවං ගොතමොති. න ඛො අහං වච්ඡ එවංදිට්ඨි, ‘තං ජීවං තං සරීරං ඉදමෙව සච්චං, මොඝමඤ්ඤ’න්ති.
කිම්පන භො ගොතම, ‘අඤ්ඤං ජීවං අඤ්ඤං සරීරං ඉදමෙව සච්චං මොඝමඤ්ඤ’න්ති එවංදිට්ඨි භවං ගොතමොති. න ඛො අහං වච්ඡ එවංදිට්ඨි, ‘අඤ්ඤං ජීවං අඤ්ඤං සරීරං ඉදමෙව සච්චං, මොඝමඤ්ඤ’න්ති.
කින්නු ඛො භො ගොතම, ‘හොති තථාගතො පරම්මරණා ඉදමෙව සච්චං මොඝමඤ්ඤ’න්ති එවංදිට්ඨි භවං ගොතමොති. න ඛො අහං වච්ඡ එවංදිට්ඨි, ‘හොති තථාගතො පරම්මරණා ඉදමෙව සච්චං, මොඝමඤ්ඤ’න්ති.
කිම්පන භො ගොතම, ‘න හොති තථාගතො පරම්මරණා, ඉදමෙව සච්චං මොඝමඤ්ඤ’න්ති එවංදිට්ඨි භවං ගොතමොති. න ඛො අහං වච්ඡ එවංදිට්ඨි, ‘න හොති තථාගතො පරම්මරණා ඉදමෙව සච්චං, මොඝමඤ්ඤ’න්ති.
කින්නු ඛො භො ගොතම, ‘හොති ච න ච හොති තථාගතො පරම්මරණා, ඉදමෙව සච්චං, මොඝමඤ්ඤ’න්ති එවංදිට්ඨි භවං ගොතමොති. න ඛො අහං වච්ඡ එවංදිට්ඨි, ‘හොති ච න ච හොති තථාගතො පරම්මරණා, ඉදමෙව සච්චං, මොඝමඤ්ඤ’න්ති.
කිම්පන භො ගොතම, ‘නෙව හොති න න හොති තථාගතො පරම්මරණා, ඉදමෙව සච්චං මොඝමඤ්ඤ’න්ති එවංදිට්ඨි භවං ගොතමොති. න ඛො අහං වච්ඡ එවංදිට්ඨි, ‘නෙව හොති න න හොති තථාගතො පරම්මරණා, ඉදමෙව සච්චං, මොඝමඤ්ඤ’න්ති.
කින්නු ඛො භො ගොතම, ‘සස්සතො ලොකො, ඉදමෙව සච්චං, මොඝමඤ්ඤ’න්ති එවංදිට්ඨි භවං ගොතමොති{1} ඉති පුට්ඨො සමානො න ඛො අහං වච්ඡ එවංදිට්ඨි, ‘සස්සතො ලොකො, ඉදමෙව සච්චං මොඝමඤ්ඤන්තී’ති වදෙසි{2} කිම්පන භො ගොතම, ‘අසස්සතො ලොකො, ඉදමෙව සච්චං, මොඝමඤ්ඤ’න්ති එවංදිට්ඨි භවං ගොතමොති ඉති පුට්ඨො සමානො, න ඛො අහං වච්ඡ එවංදිට්ඨි ‘අසස්සතො ලොකො, ඉදමෙව සච්චං, මොඝමඤ්ඤන්තී’ති වදෙසි.
කින්නු ඛො භො ගොතම, ‘අන්තවා ලොකො, ඉදමෙව සච්චං මොඝමඤ්ඤ’න්ති එවංදිට්ඨි භවං ගොතමොති ඉති පුට්ඨො සමානො ‘න ඛො අහං වච්ඡ එවංදිට්ඨි, අන්තවා ලොකො ඉදමෙව සච්චං, මොඝමඤ්ඤන්තී’ති වදෙසි. කිම්පන භො ගොතම ‘අනන්තවා ලොකො ඉදමෙව සච්චං, මොඝමඤ්ඤ’න්ති එවංදිට්ඨි භවං ගොතමොති ඉති පුට්ඨො සමානො ‘න ඛො අහං වච්ඡ එවංදිට්ඨි, අනන්තවා ලොකො ඉදමෙව සච්චං, මොඝමඤ්ඤන්තී’ති වදෙසි.
කින්නු ඛො භො ගොතම, ‘තං ජීවං තං සරීරං, ඉදමෙව සච්චං මොඝමඤ්ඤන්ති එවංදිට්ඨි භවං ගොතමොති ඉති පුට්ඨො සමානො න ඛො අහං වච්ඡ එවංදිට්ඨි ‘තං ජීවං තං සරීරං, ඉදමෙව සච්චං, මොඝමඤ්ඤන්තී’ති වදෙසි. කිම්පන භො ගොතම ‘අඤ්ඤං ජීවං අඤ්ඤං සරීරං, ඉදමෙව සච්චං, මොඝමඤ්ඤ’න්ති එවංදිට්ඨි භවං ගොතමොති ඉති පුට්ඨො සමානො ‘න ඛො අහං වච්ඡ එවංදිට්ඨි ‘අඤ්ඤං ජීවං අඤ්ඤං සරීරං, ඉදමෙව සච්චං මොඝමඤ්ඤන්ති’ති වදෙසි.
කින්නු ඛො භො ගොතම ‘හොති තථාගතො පරම්මරණා, ඉදමෙව සච්චං මොඝමඤ්ඤ’න්ති එවංදිට්ඨි භවං ගොතමොති ඉති පුට්ඨො සමානො ‘න ඛො අහං වච්ඡ එවංදිට්ඨි ‘හොති තථාගතො පරම්මරණා ඉදමෙව සච්චං මොඝමඤ්ඤන්තී’ති වදෙසි. කිම්පන භො ගොතම ‘න හොති තථාගතො පරම්මරණා. ඉදමෙව සච්චං මොඝමඤ්ඤ’න්ති එවංදිට්ඨි භවං ගොතමොති ඉති පුට්ඨො සමානො ‘න ඛො අහං වච්ඡ එවංදිට්ඨි, ‘න හොති තථාගතො පරම්මරණා, ඉදමෙව සච්චං, මොඝමඤ්ඤන්තී’ති වදෙසි.
කින්නු ඛො භො ගොතම ‘හොති ච න ච හොති තථාගතො පරම්මරණා, ඉදමෙව සච්චං මොඝමඤ්ඤ’න්ති එවංදිට්ඨි භවං ගොතමොති ඉති පුට්ඨො සමානො ‘න ඛො අහං වච්ඡ එවංදිට්ඨි, හොති ච න ච හොති තථාගතො පරම්මරණා, ඉදමෙව සච්චං මොඝමඤ්ඤන්තී’ති වදෙසි. කිම්පන භො ගොතම ‘නෙව හොති න න හොති තථාගතො පරම්මරණා, ඉදමෙව සච්චං මොඝමඤ්ඤ’න්ති එවංදිට්ඨි භවං ගොතමොති ඉති පුට්ඨො සමානො ‘න ඛො අහං වච්ඡ එවංදිට්ඨි, නෙව හොති න න හොති තථාගතො පරම්මරණා, ඉදමෙව සච්චං මොඝමඤ්ඤන්තී’ති වදෙසි. කිම්පන භවං ගොතමො ආදීනවං සම්පස්සමානො එවං ඉමානි සබ්බසො දිට්ඨිගතානි අනුපගතොති.
සස්සතො ලොකොති ඛො වච්ඡ දිට්ඨිගතමෙතං දිට්ඨිගහනං දිට්ඨිකන්තාරං දිට්ඨිවිසූකං දිට්ඨිවිප්ඵන්දිතං දිට්ඨිසඤ්ඤොජනං, සදුක්ඛං සවිඝාතං සඋපායාසං සපරිළාහං. න නිබ්බිදාය න විරාගාය න නිරොධාය න උපසමාය න අභිඤ්ඤාය න සම්බොධාය න නිබ්බානාය සංවත්තති. අසස්සතො ලොකොති ඛො වච්ඡ -පෙ- අන්තවා ලොකොති ඛො වච්ඡ -පෙ- අනන්තවා ලොකොති ඛො වච්ඡ -පෙ- තං ජීවං තං සරීරන්ති ඛො වච්ඡ -පෙ- අඤ්ඤං ජීවං අඤ්ඤං සරීරන්ති ඛො වච්ඡ -පෙ- හොති තථාගතො පරම්මරණාති ඛො වච්ඡ -පෙ- න හොති තථාගතො පරං මරණාති ඛො වච්ඡ -පෙ- හොති ච න ච හොති තථාගතො පරම්මරණාති ඛො වච්ඡ -පෙ- නෙව හොති න න හොති තථාගතො පරම්මරණාති ඛො වච්ඡ දිට්ඨිගතමෙතං දිට්ඨිගහනං දිට්ඨිකන්තාරං දිට්ඨිවිසූකං දිට්ඨිවිප්ඵන්දිතං දිට්ඨිසඤ්ඤොජනං, සදුක්ඛං සවිඝාතං සඋපායාසං සපරිළාහං, න නිබ්බිදාය න විරාගාය න නිරොධාය න උපසමාය න අභිඤ්ඤාය න සම්බොධාය න නිබ්බානාය සංවත්තති. ඉමං ඛො අහං වච්ඡ ආදීනවං සම්පස්සමානො එවං ඉමානි සබ්බසො දිට්ඨිගතානි අනුපගතොති.
‘අත්ථි පන භොතො ගොතමස්ස කිඤ්චි දිට්ඨිගත’න්ති. දිට්ඨිගතන්ති ඛො වච්ඡ අපනීතමෙතං තථාගතස්ස. දිට්ඨං හෙතං වච්ඡ තථාගතෙන: ඉති රූපං, ඉති රූපස්ස සමුදයො, ඉති රූපස්ස අත්ථඞ්ගමො. ඉති වෙදනා, ඉති වෙදනාය සමුදයො, ඉති වෙදනාය අත්ථඞ්ගමො. ඉති සඤ්ඤා, ඉති සඤ්ඤාය සමුදයො, ඉති සඤ්ඤාය අත්ථඞ්ගමො. ඉති සඞ්ඛාරා, ඉති සඞ්ඛාරානං සමුදයො, ඉති සඞ්ඛාරානං අත්ථඞ්ගමො. ඉති විඤ්ඤාණං, ඉති විඤ්ඤාණස්ස සමුදයො, ඉති විඤ්ඤාණස්ස අත්ථඞ්ගමොති. තස්මා තථාගතො සබ්බමඤ්ඤිතානං සබ්බමථිතානං සබ්බඅභිඞ්කාරමමිඞ්කාරමානානුසයානං{1} ඛයා විරාගා නිරොධා චාගා පටිනිස්සග්ගා අනුපාදා විමුත්තොති වදාමීති.
එවං විමුත්තචිත්තො පන භො ගොතම භික්ඛු කුහිං උපපජ්ජතීති? උපපජ්ජතීති ඛො වච්ඡ න උපෙති. තෙන හි භො ගොතම න උපපජ්ජතීති? න උපපජ්ජතීති ඛො වච්ඡ න උපෙති. තෙන හි භො ගොතම උපපජ්ජතීති ච න ච උපපජ්ජතීති? උපපජ්ජති ච න ච උපපජ්ජතීති ඛො වච්ඡ න උපෙති. තෙන හි භො ගොතම නෙව උපපජ්ජති න නූපපජ්ජතීති? නෙව උපපජ්ජති න නූපපජ්ජතීති ඛො වච්ඡ න උපෙතීති.
එවං විමුත්තචිත්තො පන භො ගොතම භික්ඛු කුහිං උපපජ්ජතීති ඉති පුට්ඨො සමානො ‘උපපජ්ජතීති ඛො වච්ඡ න උපෙතී’ති වදෙසි. තෙන හි භො ගොතම න උපපජ්ජතී’ති ඉති පුට්ඨො සමානො ‘න උපපජ්ජතීති ඛො වච්ඡ න උපෙතී’ති වදෙසි. තෙන හි භො ගොතම උපපජ්ජති ච න ච උපපජ්ජතීති ඉති පුට්ඨො සමානො ‘උපපජ්ජති ච න ච උපපජ්ජතීති ඛො වච්ඡ න උපෙතී’ති වදෙසි. තෙන හි භො ගොතම නෙව උපපජ්ජති න නූපපජ්ජතීති ඉති පුට්ඨො සමානො ‘නෙව උපපජ්ජති, න නූපපජ්ජතීති ඛො වච්ඡ න උපෙතී’ති වදෙසි. එත්ථාහං භො ගොතම අඤ්ඤාණමාපාදිං, එත්ථ සම්මොහමාපාදිං. යාපි මෙ එසා භොතො ගොතමස්ස පුරිමෙන කථාසල්ලාපෙන අහු පසාදමත්තා, සාපි මෙ එතරහි අන්තරහිතාති.
අලං හි තෙ වච්ඡ අඤ්ඤාණාය, අලං සම්මොහාය. ගම්භීරොහායං{1} වච්ඡ ධම්මො දුද්දසො දුරනුබොධො සන්තො පණීතො අතක්කාවචරො නිපුණො පණ්ඩිතවෙදනීයො. සො තයා දුජ්ජානො අඤ්ඤදිට්ඨිකෙන අඤ්ඤඛන්තිකෙන අඤ්ඤරුචිකෙන අඤ්ඤත්රයොගෙන අඤ්ඤත්ථාචරියකෙන.{2} තෙන හි වච්ඡ තඤ්ඤෙ’වෙත්ථ පටිපුච්ඡිස්සාමි. යථා තෙ ඛමෙය්ය තථා නං බ්යාකරෙය්යාසි.
තං කිං මඤ්ඤසි වච්ඡ, සචෙ තෙ පුරතො අග්ගි ජලෙය්ය, ජානෙය්යාසි ත්වං අයං මෙ පුරතො අග්ගි ජලතීති? සචෙ මෙ භො ගොතම පුරතො අග්ගි ජලෙය්ය, ජානෙය්යාහං ‘අයං මෙ පුරතො අග්ගි ජලතී’ති. සචෙ පන තං වච්ඡ එවං පුච්ඡෙය්ය, ‘යො තෙ අයං පුරතො අග්ගි ජලති, අයං අග්ගි කිං පටිච්ච ජලතී’ති. එවං පුට්ඨො ත්වං වච්ඡ කින්ති බ්යාකරෙය්යාසීති? සචෙ මං භො ගොතම එවං පුච්ඡෙය්ය ‘යො තෙ අයං පුරතො අග්ගි ජලති, අයං අග්ගි කිං පටිච්ච ජලතී’ති. එවං පුට්ඨො අහං භො ගොතම එවං බ්යාකරෙය්යං. ‘යො මෙ අයං පුරතො අග්ගි ජලති, අයං අග්ගි තිණකට්ඨුපාදානං පටිච්ච ජලතීති. සචෙ තෙ වච්ඡ පුරතො සො අග්ගි නිබ්බායෙය්ය, ජානෙය්යාසි ත්වං අයං මෙ පුරතො අග්ගි නිබ්බුතොති? සචෙ මෙ භො ගොතම පුරතො සො අග්ගි නිබ්බායෙය්ය, ජානෙය්යාහං අයං මෙ පුරතො අග්ගි නිබ්බුතොති. සචෙ පන තං වච්ඡ එවං පුච්ඡෙය්ය ‘යො තෙ අයං පුරතො අග්ගි නිබ්බුතො සො අග්ගි ඉතො කතමං දිසං ගතො, පුරත්ථිමං වා පච්ඡිමං වා උත්තරං වා දක්ඛිණං වාති. එවං පුට්ඨො ත්වං වච්ඡ කින්ති බ්යාකරෙය්යාසීති? න උපෙති භො ගොතම. යං හි සො භො ගොතම අග්ගි තිණකට්ඨුපාදානං පටිච්ච අජලි{3} තස්ස ච පරියාදානා අඤ්ඤස්ස ච අනුපහාරා අනාහාරො නිබ්බුතො’තෙව සඞ්ඛං ගච්ඡතී’ති.
එවමෙව ඛො වච්ඡ යෙන රූපෙන තථාගතං පඤ්ඤාපයමානො පඤ්ඤාපෙය්ය, තං රූපං තථාගතස්ස පහීනං උච්ඡින්නමූලං තාලාවත්ථුකතං අනභාවකතං ආයතිං අනුප්පාදධම්මං. රූපසඞ්ඛාවිමුත්තො{1} ඛො වච්ඡ තථාගතො ගම්භීරො අප්පමෙය්යො දුප්පරියොගාහො{2} සෙය්යථාපි මහාසමුද්දො, උපපජ්ජතීති න උපෙති, න උපපජ්ජතීති න උපෙති, උපපජ්ජති ච න ච උපපජ්ජතීති න උපෙති, නෙව උපපජ්ජති න නූපපජ්ජතීති න උපෙති. යාය වෙදනාය තථාගතං පඤ්ඤාපයමානො පඤ්ඤාපෙය්ය, සා වෙදනා තථාගතස්ස පහීනා උච්ඡින්නමූලා තාලාවත්ථුකතා අනභාව කතා ආයතිං අනුප්පාදධම්මා. වෙදනා සඞ්ඛාවිමුත්තො{3} ඛො වච්ඡ තථාගතො ගම්භීරො අප්පමෙය්යො දුප්පරියොගාහො සෙය්යථාපි මහාසමුද්දො, උපපජ්ජතීති න උපෙති, න උපපජ්ජතීති න උපෙති, උපපජ්ජති ච න ච උපපජ්ජතීති න උපෙති, නෙව උපපජ්ජති න නූපපජ්ජතීති න උපෙති. යාය සඤ්ඤාය තථාගතං පඤ්ඤාපයමානො පඤ්ඤාපෙය්ය සා සඤ්ඤා තථාගතස්ස පහීනා උච්ඡින්නමූලා තාලාවත්ථුකතා අනභාවකතා ආයතිං අනුප්පාදධම්මා. සඤ්ඤාසඞ්ඛාවිමුත්තො ඛො වච්ඡ තථාගතො ගම්භීරො අප්පමෙය්යො දුප්පරියොගාහො, සෙය්යථාපි මහාසමුද්දො, උපපජ්ජතීති න උපෙති, න උපපජ්ජතීති න උපෙති, උපපජ්ජති ච න ච උපපජ්ජතීති න උපෙති, නෙව උපපජ්ජති න නූපපජ්ජතීති න උපෙති. යෙහි සඞ්ඛාරෙහි තථාගතං පඤ්ඤාපයමානො පඤ්ඤාපෙය්ය, තෙ සඞ්ඛාරා තථාගතස්ස පහීනා උච්ඡින්නමූලා තාලාවත්ථුකතා අනභාවකතා ආයතිං අනුප්පාදධම්මා. සඞ්ඛාරසඞ්ඛාවිමුත්තො ඛො වච්ඡ තථාගතො ගම්භීරො අප්පමෙය්යො දුප්පරියොගාහො සෙය්යථාපි මහාසමුද්දො, උපපජ්ජතීති න උපෙති, න උපපජ්ජතීති න උපෙති, උපපජ්ජති ච න ච උපපජ්ජතීති න උපෙති, නෙව උපපජ්ජති න නූපපජ්ජතීති න උපෙති. යෙන විඤ්ඤාණෙන තථාගතං පඤ්ඤාපයමානො පඤ්ඤාපෙය්ය, තං විඤ්ඤාණං තථාගතස්ස පහීනං උච්ඡින්නමූලං තාලාවත්ථුකතං අනභාවකතං ආයතිං අනුප්පාදධම්මං. විඤ්ඤාණසඞ්ඛාවිමුත්තො ඛො වච්ඡ තථාගතො ගම්භීරො අප්පමෙය්යො දුප්පරියොගාහො සෙය්යථාපි මහාසමුද්දො, උපපජ්ජතීති න උපෙති, න උපපජ්ජතීති න උපෙති, උපපජ්ජති ච න ච උපපජ්ජතීති න උපෙති, නෙව උපපජ්ජති න නූපපජ්ජතීති න උපෙතීති.
එවං වුත්තෙ වච්ඡගොත්තො පරිබ්බාජකො භගවන්තං එතදවොච: සෙය්යථාපි භො ගොතම ගාමස්ස වා නිගමස්ස වා අවිදූරෙ මහාසාළරුක්ඛො. තස්ස අනිච්චතා සාඛාපලාසං{4} පලුජ්ජෙය්ය තචපපටිකං{5} පලුජ්ජෙය්ය{6} ඵෙග්ගු පලුජ්ජෙය්ය. සො අපරෙන සමයෙන අපගතසාඛා පලාසො අපගතතචපපටිකො අපගතඵෙග්ගුකො සුද්ධො අස්ස සාරෙ පතිට්ඨිතො, එවමෙවිදං භොතො ගොතමස්ස පාවචනං අපගතසාඛා පලාසං අපගත තචපපටිකං අපගතඵෙග්ගුකං සුද්ධං සාරෙ පතිට්ඨිතං. අභික්කන්තං භො ගොතම. අභික්කන්තං භො ගොතම -පෙ- උපාසකං මං භවං ගොතමො ධාරෙතු අජ්ජතග්ගෙ පාණුපෙතං සරණඞ්ගතන්ති.
අග්ගිවච්ඡගොත්ත සුත්තං දුතියං.
2. 3. 3.
මහාවච්ඡගොත්ත සුත්තං
එවං මෙ සුතං එකං සමයං භගවා රාජගහෙ විහරති වෙළුවනෙ කලන්දකනිවාපෙ. අථ ඛො වච්ඡගොත්තො පරිබ්බාජකො යෙන භගවා තෙනුපසඞ්කමි. උපසඞ්කමිත්වා භගවතා සද්ධිං සම්මොදි. සම්මොදනීයං කථං සාරාණීයං වීතිසාරෙත්වා එකමන්තං නිසීදි. එකමන්තං නිසින්නො ඛො වච්ඡගොත්තො පරිබ්බාජකො භගවන්තං එතදවොච:
දීඝරත්තාහං භොතා ගොතමෙන සහකථී, සාධු මෙ භවං ගොතමො සංඛිත්තෙන කුසලාකුසලං දෙසෙතූ’ති.
සංඛිත්තෙනපි ඛො තෙ අහං වච්ඡ කුසලාකුසලං දෙසෙය්යං, විත්ථාරෙනපි ඛො තෙ අහං වච්ඡ කුසලාකුසලං දෙසෙය්යං. අපි ච තෙ අහං වච්ඡ සංඛිත්තෙන කුසලාකුසලං දෙසිස්සාමි. තං සුණාහි, සාධුකං මනසි කරොහි, භාසිස්සාමීති.
එවං භොති ඛො වච්ඡගොත්තො පරිබ්බාජකො භගවතො පච්චස්සොසි. භගවා එතදවොච:
ලොභො ඛො වච්ඡ අකුසලං, අලොභො කුසලං. දොසො ඛො වච්ඡ අකුසලං, අදොසො කුසලං. මොහො ඛො වච්ඡ අකුසලං, අමොහො කුසලං. ඉති ඛො වච්ඡ ඉමෙ තයො ධම්මා අකුසලා, තයො ධම්මා කුසලා. පාණාතිපාතො ඛො වච්ඡ අකුසලං, පාණාතිපාතා වෙරමණී කුසලං. අදින්නාදානං ඛො වච්ඡ අකුසලං, අදින්නාදානා වෙරමණී කුසලං. කාමෙසුමිච්ඡාචාරො ඛො වච්ඡ අකුසලං, කාමෙසුමිච්ඡාචාරා වෙරමණී කුසලං. මුසාවාදො ඛො වච්ඡ අකුසලං, මුසාවාදා වෙරමණී කුසලං. පිසුණා වාචා ඛො වච්ඡ අකුසලං, පිසුනා වාචා{1} වෙරමණී කුසලං. ඵරුසා වාචා ඛො වච්ඡ අකුසලං, ඵරුසා වාචා{2} වෙරමණී කුසලං. සම්ඵප්පලාපා ඛො වච්ඡ අකුසලං, සම්ඵප්පලාපා වෙරමණී කුසලං. අභිජ්ඣා ඛො වච්ඡ අකුසලං, අනභිජ්ඣා කුසලං. බ්යාපාදො ඛො වච්ඡ අකුසලං, අබ්යාපාදො කුසලං. මිච්ඡාදිට්ඨි ඛො වච්ඡ අකුසලං, සම්මාදිට්ඨි කුසලං. ඉති ඛො වච්ඡ ඉමෙ දස ධම්මා අකුසලා, දස ධම්මා කුසලා.
යතො ඛො වච්ඡ භික්ඛුනො තණ්හා පහීනා හොති උච්ඡින්නමූලා තාලාවත්ථුකතා අනභාවකතා{3} ආයතිං අනුප්පාදධම්මා. සො හොති භික්ඛු අරහං ඛීණාසවො වුසිතවා කතකරණීයො ඔහිතභාරො අනුප්පත්තසදත්ථො පරික්ඛීණභවසඤ්ඤොජනො සම්මදඤ්ඤාවිමුත්තොති.
තිට්ඨතු භවං ගොතමො. අත්ථි පන භොතො ගොතමස්ස එකභික්ඛූපි සාවකො{1} ආසවානං ඛයා අනාසවං චෙතොවිමුත්තිං පඤ්ඤාවිමුත්තිං දිට්ඨෙව ධම්මෙ සයං අභිඤ්ඤා සච්ඡිකත්වා උපසම්පජ්ජ විහරතීති.
න ඛො වච්ඡ එකංයෙව සතං න ද්වෙ සතානි න තීණි සතානි න චත්තාරි සතානි න පඤ්ච සතානි, අථ ඛො භිය්යොව යෙ භික්ඛූ මම සාවකා ආසවානං ඛයා අනාසවං චෙතොවිමුත්තිං පඤ්ඤාවිමුත්තිං දිට්ඨෙව ධම්මෙ සයං අභිඤ්ඤා සච්ඡිකත්වා උපසම්පජ්ජ විහරන්තීති.
තිට්ඨතු භවං ගොතමො, තිට්ඨන්තු භික්ඛූ. අත්ථි පන භොතො ගොතමස්ස එකභික්ඛුනීපි සාවිකා ආසවානං ඛයා අනාසවං චෙතොවිමුත්තිං පඤ්ඤාවිමුත්තිං දිට්ඨෙව ධම්මෙ සයං අභිඤ්ඤා සච්ඡිකත්වා උපසම්පජ්ජ විහරතීති.
න ඛො වච්ඡ එකංයෙව සතං න ද්වෙ සතානි න තීණි සතානි න චත්තාරි සතානි න පඤ්ච සතානි. අථ ඛො භිය්යොව යා භික්ඛුනියො මම සාවිකා ආසවානං ඛයා අනාසවං චෙතොවිමුත්තිං පඤ්ඤාවිමුත්තිං දිට්ඨෙව ධම්මෙ සයං අභිඤ්ඤා සච්ඡිකත්වා උපසම්පජ්ජ විහරන්තීති.
තිට්ඨතු භවං ගොතමො, තිට්ඨන්තු භික්ඛූ, තිට්ඨන්තු භික්ඛුනියො. අත්ථි පන භොතො ගොතමස්ස එකුපාසකොපි සාවකො ගිහී ඔදාතවසනො බ්රහ්මචාරී පඤ්චන්නං{2} ඔරම්භාගියානං සඤ්ඤොජනානං පරික්ඛයා ඔපපාතිකො තත්ථ පරිනිබ්බායී අනාවත්තිධම්මො තස්මා ලොකාති.
න ඛො වච්ඡ එකංයෙව සතං න ද්වෙ සතානි න තීණි සතානි න චත්තාරි සතානි න පඤ්ච සතානි. අථ ඛො භිය්යොව යෙ උපාසකා මම සාවකා ගිහී ඔදාතවසනා බ්රහ්මචාරිනො පඤ්චන්නං ඔරම්භාගියානං සඤ්ඤොජනානං පරික්ඛයා ඔපපාතිකා තත්ථ පරිනිබ්බායිනො අනාවත්තිධම්මා තස්මා ලොකාති.
තිට්ඨතු භවං ගොතමො, තිට්ඨන්තු භික්ඛූ, තිට්ඨන්තු භික්ඛුනියො, තිට්ඨන්තු උපාසකා ගිහී ඔදාතවසනා බ්රහ්මචාරිනො. අත්ථි පන භොතො ගොතමස්ස එකුපාසකොපි සාවකො ගිහී ඔදාතවසනො කාමභොගී සාසනකරො ඔවාදපතිකරො තිණ්ණවිචිකිච්ඡො{3} විගතකථඞ්කථො වෙසාරජ්ජප්පත්තො අපරප්පච්චයො සත්ථුසාසනෙ විහරතීති.
න ඛො වච්ඡ එකංයෙව සතං න ද්වෙ සතානි න තීණි සතානි න චත්තාරි සතානි න පඤ්ච සතානි. අථ ඛො භිය්යොව යෙ උපාසකා මම සාවකා ගිහී ඔදාතවසනා කාමභොගිනො සාසනකරා ඔවාදපතිකරා තිණ්ණවිචිකිච්ඡා විගතකථඞ්කථා වෙසාරජ්ජප්පත්තා අපරප්පච්චයා සත්ථුසාසනෙ විහරන්තීති.
තිට්ඨතු භවං ගොතමො, තිට්ඨන්තු භික්ඛූ, තිට්ඨන්තු භික්ඛුනියො, තිට්ඨන්තු උපාසකා ගිහී ඔදාතවසනා බ්රහ්මචාරිනො, තිට්ඨන්තු උපාසකා ගිහී ඔදාතවසනා කාමභොගිනො. අත්ථි පන භොතො ගොතමස්ස එකුපාසිකාපි සාවිකා ගිහිනී ඔදාතවසනා බ්රහ්මචාරිනී පඤ්චන්නං{1} ඔරම්භාගියානං සඤ්ඤොජනානං පරික්ඛයා ඔපපාතිකා තත්ථ පරිනිබ්බායිනී අනාවත්තිධම්මා තස්මා ලොකාති.
න ඛො වච්ඡ එකංයෙව සතං න ද්වෙ සතානි න තීණි සතානි න චත්තාරි සතානි න පඤ්ච සතානි. අථ ඛො භිය්යොව යා උපාසිකා මම සාවිකා ගිහිනියො ඔදාතවසනා බ්රහ්මචාරිණියො පඤ්චන්නං ඔරම්භාගියානං සඤ්ඤොජනානං පරික්ඛයා ඔපපාතිකා තත්ථ පරිනිබ්බායිනියො අනාවත්තිධම්මා තස්මා ලොකාති.
තිට්ඨතු භවං ගොතමො, තිට්ඨන්තු භික්ඛූ, තිට්ඨන්තු භික්ඛුනියො, තිට්ඨන්තු උපාසකා ගිහී ඔදාතවසනා බ්රහ්මචාරිනො, තිට්ඨන්තු උපාසකා ගිහී ඔදාතවසනා කාමභොගිනො, තිට්ඨන්තු උපාසිකා ගිහිනියො ඔදාතවසනා බ්රහ්මචාරිනියො. අත්ථි පන භොතො ගොතමස්ස එකුපාසිකාපි සාවිකා ගිහිනී ඔදාතවසනා කාමභොගිනී{2} සාසනකරා ඔවාදපතිකරා තිණ්ණවිචිකිච්ඡා විගතකථඞ්කථා වෙසාරජ්ජප්පත්තා අපරප්පච්චයා සත්ථුසාසනෙ විහරතීති.
න ඛො වච්ඡ එකංයෙව සතං න ද්වෙ සතානි න තීණි සතානි න චත්තාරි සතානි න පඤ්ච සතානි. අථ ඛො භිය්යොව යා උපාසිකා මම සාවිකා ගිහිනියො{3} ඔදාතවසනා කාමභොගිනියො සාසනකරා ඔවාදපතිකරා තිණ්ණවිච්ඡිකිච්ඡා විගතකථඞ්කථා වෙසාරජ්ජප්පත්තා අපරප්පච්චයා සත්ථුසාසනෙ විහරන්තීති.
සචෙ හි භො ගොතම ඉමං ධම්මං භවඤ්ඤෙව ගොතමො ආරාධකො අභවිස්ස. නො ච ඛො භික්ඛූ ආරාධකා අභවිංසු. එවමිදං බ්රහ්මචරියං අපරිපූරං අභවිස්ස තෙනඞ්ගෙන. යස්මා ච ඛො භො ගොතම ඉමං ධම්මං භවඤ්චෙව ගොතමො ආරාධකො භික්ඛූ ච ආරාධකා. එවමිදං බ්රහ්මචරියං පරිපූරං තෙනඞ්ගෙන.
සචෙ හි භො ගොතම ඉමං ධම්මං භවඤ්චෙව ගොතමො ආරාධකො අභවිස්ස, භික්ඛූ ච ආරාධකා අභවිංසු, නො ච ඛො භික්ඛුනියො ආරාධිකා අභවිංසු, එවමිදං බ්රහ්මචරියං අපරිපූරං අභවිස්ස තෙනඞ්ගෙන. යස්මා ච ඛො භො ගොතම ඉමං ධම්මං භවඤ්චෙව ගොතමො ආරාධකො භික්ඛූ ච ආරාධකා, භික්ඛුනියො ච ආරාධිකා, එවමිදං බ්රහ්මචරියං පරිපූරං තෙනඞ්ගෙන.
සචෙ හි භො ගොතම ඉමං ධම්මං භවඤ්චෙව ගොතමො ආරාධකො අභවිස්ස, භික්ඛූ ච ආරාධකා අභවිංසු, භික්ඛුනියො ච ආරාධිකා අභවිංසු, නො ච ඛො උපාසකා ගිහී ඔදාතවසනා බ්රහ්මචාරිනො ආරාධකා අභවිංසු, එවමිදං බ්රහ්මචරියං අපරිපූරං අභවිස්ස තෙනඞ්ගෙන. යස්මා ච ඛො භො ගොතම ඉමං ධම්මං භවඤ්චෙව ගොතමො ආරාධකො, භික්ඛූ ච ආරාධකා, භික්ඛුනියො ච ආරාධිකා, උපාසකා ච ගිහී ඔදාතවසනා බ්රහ්මචාරිනො ආරාධකා, එවමිදං බ්රහ්මචරියං පරිපූරං තෙනඞ්ගෙන.
සචෙ හි භො ගොතම ඉමං ධම්මං භවඤ්චෙව ගොතමො ආරාධකො අභවිස්ස, භික්ඛූ ච ආරාධකා අභවිංසු, භික්ඛුනියො ච ආරාධිකා අභවිංසු, උපාසකා ච ගිහී ඔදාතවසනා බ්රහ්මචාරිනො ආරාධකා අභවිංසු, නො ච ඛො උපාසකා ගිහී ඔදාතවසනා කාමභොගිනො ආරාධකා අභවිංසු, එවමිදං බ්රහ්මචරියං අපරිපූරං අභවිස්ස තෙනඞ්ගෙන. යස්මා ච ඛො භො ගොතම ඉමං ධම්මං භවඤ්චෙ ව ගොතමො ආරාධකො, භික්ඛූ ච ආරාධකා, භික්ඛුනියො ච ආරාධිකා, උපාසකා ච ගිහී ඔදාතවසනා බ්රහ්මචාරිනො ආරාධකා උපාසකා ච ගිහී ඔදාතවසනා කාමභොගිනො ආරාධකා, එවමිදං බ්රහ්මචරියං පරිපූරං තෙනඞ්ගෙන.
සචෙ හි භො ගොතම ඉමං ධම්මං භවඤ්චෙව ගොතමො ආරාධකො අභවිස්ස, භික්ඛූ ච ආරාධකා අභවිංසු, භික්ඛුනියො ච ආරාධිකා අභවිංසු, උපාසකා ච ගිහී ඔදාතවසනා බ්රහ්මචාරිනො ආරාධකා අභවිංසු, උපාසකා ච ගිහී ඔදාතවසනා කාමභොගිනො ආරාධකා අභවිංසු, නො ච ඛො උපාසිකා ගිහිනියො ඔදාතවසනා බ්රහ්මචාරිණියො ආරාධිකා අභවිංසු, එවමිදං බ්රහ්මචරියං අපරිපූරං අභවිස්ස තෙනඞ්ගෙන. යස්මා ච ඛො භො ගොතම ඉමං ධම්මං භවඤ්චෙව ගොතමො ආරාධකො භික්ඛූ ච ආරාධකා භික්ඛුනියො ච ආරාධිකා උපාසකා ච ගිහී ඔදාතවසනා බ්රහ්මචාරිනො ආරාධකා උපාසකා ච ගිහී ඔදාතවසනා කාමභොගිනො ආරාධකා උපාසිකා ච ගිහිනියො ඔදාතවසනා බ්රහ්මචාරිණියො ආරාධිකා, එවමිදං බ්රහ්මචරියං පරිපූරං තෙනඞ්ගෙන.
සචෙ හි භො ගොතම ඉමං ධම්මං භවඤ්චෙව ගොතමො ආරාධකො අභවිස්ස, භික්ඛූ ච ආරාධකා අභවිංසු, භික්ඛුනියො ච ආරාධිකා අභවිංසු, උපාසකා ච ගිහී ඔදාතවසනා බ්රහ්මචාරිනො ආරාධකා අභවිංසු, උපාසකා ච ගිහී ඔදාතවසනා කාමභොගිනො ආරාධකා අභවිංසු, උපාසිකා ච ගිහිනියො ඔදාතවසනා බ්රහ්මචාරිණියො ආරාධිකා අභවිංසු, නො ච ඛො උපාසිකා ගිහිනියො ඔදාතවසනා කාමභොගිනියො ආරාධිකා අභවිංසු, එවමිදං බ්රහ්මචරියං අපරිපූරං අභවිස්ස තෙනඞ්ගෙන. යස්මා ච ඛො භො ගොතම ඉමං ධම්මං භවඤ්චෙව ගොතමො ආරාධකො භික්ඛූ ච ආරාධකා භික්ඛුනියො ච ආරාධිකා උපාසකා ච ගිහී ඔදාතවසනා බ්රහ්මචාරිනො ආරාධකා උපාසකා ච ගිහී ඔදාතවසනා කාමභොගිනො ආරාධකා උපාසිකා ච ගිහිනියො ඔදාතවසනා බ්රහ්මචාරිණියො ආරාධිකා උපාසිකා ච ගිහිනියො ඔදාතවසනා කාමභොගිනියො ආරාධිකා. එවමිදං බ්රහ්මචරියං පරිපූරං තෙනඞ්ගෙන.
සෙය්යථාපි භො ගොතම ගඞ්ගානදී සමුද්දනින්නා සමුද්දපොණා සමුද්දපබ්භාරා සමුද්දං ආහච්ච තිට්ඨති. එවමෙවායං භොතො ගොතමස්ස පරිසා සගහට්ඨපබ්බජිතා නිබ්බානනින්නා නිබ්බානපොණා නිබ්බානපබ්භාරා නිබ්බානං ආහච්ච තිට්ඨති. අභික්කන්තං -පෙ- එසාහං භගවන්තං ගොතමං සරණං ගච්ඡාමි ධම්මඤ්ච භික්ඛුසඞ්ඝඤ්ච. ලභෙය්යාහං භොතො ගොතමස්ස සන්තිකෙ පබ්බජ්ජං ලභෙය්යං උපසම්පදන්ති.
යො ඛො වච්ඡ අඤ්ඤතිත්ථියපුබ්බො ඉමස්මිං ධම්මවිනයෙ ආකඞ්ඛති පබ්බජ්ජං, ආකඞ්ඛති උපසම්පදං. සො චත්තාරො මාසෙ පරිවසති. චතුන්නං මාසානං අච්චයෙන ආරද්ධචිත්තා භික්ඛූ පබ්බාජෙන්ති, උපසම්පාදෙන්ති භික්ඛුභාවාය. අපි ච මෙත්ථ පුග්ගලවෙමත්තතා විදිතාති.
සචෙ භන්තෙ අඤ්ඤතිත්ථියපුබ්බා ඉමස්මිං ධම්මවිනයෙ ආකඞ්ඛන්තා පබ්බජ්ජං ආකඞ්ඛන්තා උපසම්පදං චත්තාරො මාසෙ පරිවසන්ති. චතුන්නං මාසානං අච්චයෙන ආරද්ධචිත්තා භික්ඛූ පබ්බාජෙන්ති, උපසම්පාදෙන්ති භික්ඛුභාවාය. අහං චත්තාරි වස්සානි පරිවසිස්සාමි. චතුන්නං මං වස්සානං අච්චයෙන ආරද්ධචිත්තා භික්ඛූ පබ්බාජෙන්තු, උපසම්පාදෙන්තු භික්ඛුභාවායාති. අලත්ථ ඛො වච්ඡගොත්තො පරිබ්බාජකො භගවතො සන්තිකෙ පබ්බජ්ජං, අලත්ථ උපසම්පදං.
අචිරූපසම්පන්නො ඛො පනායස්මා වච්ඡගොත්තො අද්ධමාසූපසම්පන්නො යෙන භගවා තෙනුපසඞ්කමි, උපසඞ්කමිත්වා භගවන්තං අභිවාදෙත්වා එකමන්තං නිසීදි. එකමන්තං නිසින්නො ඛො ආයස්මා වච්ඡගොත්තො භගවන්තං එතදවොච: ‘යාවතකං භන්තෙ සෙඛෙන ඤාණෙන සෙඛාය විජ්ජාය පත්තබ්බං, අනුප්පත්තං තං මයා උත්තරිං{1} මෙ භගවා ධම්මං දෙසෙතූ’ති. තෙන හි ත්වං වච්ඡ, ද්වෙ ධම්මෙ උත්තරිං{1} භාවෙහි, සමථඤ්ච විපස්සනඤ්ච. ඉමෙ ඛො තෙ වච්ඡ ද්වෙ ධම්මා උත්තරිං{1} භාවිතා, සමථො ච විපස්සනා ච. අනෙකධාතුපටිවෙධාය සංවත්තිස්සන්ති. සො ත්වං වච්ඡ යාවදෙව ආකඞ්ඛිස්සසි, අනෙකවිහිතං ඉද්ධිවිධං පච්චනුභවෙය්යං, එකොපි හුත්වා බහුධා අස්සං, බහුධාපි හුත්වා එකො අස්සං, ආවිභාවං තිරොභාවං තිරොකුඩ්ඩං තිරොපාකාරං තිරොපබ්බතං අසජ්ජමානො ගච්ඡෙය්යං සෙය්යථාපි ආකාසෙ පඨවියාපි උම්මුජ්ජනිමුජ්ජං කරෙය්යං සෙය්යථාපි උදකෙ, උදකෙපි අභෙජ්ජමානෙ{2} ගච්ඡෙය්යං සෙය්යථාපි පඨවියං, ආකාසෙපි පල්ලඞ්කෙන කමෙය්යං සෙය්යථාපි පක්ඛී සකුණො, ඉමෙපි චන්දිමසුරියෙ එවං මහිද්ධිකෙ එවං මහානුභාවෙ පාණිනා පරිමසෙය්යං, පරිමජ්ජෙය්යං, යාව බ්රහ්මලොකාපි කායෙන වසං වත්තෙය්ය’න්ති. තත්ර තත්රෙව සක්ඛිභබ්බතං පාපුණිස්සසි සති සති ආයතනෙ.
සො ත්වං වච්ඡ යාවදෙව ආකඞ්ඛිස්සසි: දිබ්බාය සොතධාතුයා විසුද්ධාය අතික්කන්තමානුසිකාය උභො සද්දෙ සුණෙය්යං, දිබ්බෙ ච මානුසෙ ච, යෙ දූරෙ සන්තිකෙ චාති තත්ර තත්රෙව සක්ඛිභබ්බතං පාපුණිස්සසි සති සති ආයතනෙ.
සො ත්වං වච්ඡ යාවදෙව ආකඞ්ඛිස්සසි: පරසත්තානං පරපුග්ගලානං චෙතසා චෙතො පරිච්ච පජානෙය්යං. සරාගං වා චිත්තං සරාගං චිත්තන්ති පජානෙය්යං, වීතරාගං වා චිත්තං වීතරාගං චිත්තන්ති පජානෙය්යං, සදොසං වා චිත්තං සදොසං චිත්තන්ති පජානෙය්යං, වීතදොසං වා චිත්තං වීතදොසං චිත්තන්ති පජානෙය්යං, සමොහං වා චිත්තං සමොහං චිත්තන්ති පජානෙය්යං, වීතමොහං වා චිත්තං වීතමොහං චිත්තන්ති පජානෙය්යං, සඞ්ඛිත්තං වා චිත්තං සඞ්ඛිත්තං චිත්තන්ති පජානෙය්යං, වික්ඛිත්තං වා චිත්තං වික්ඛිත්තං චිත්තන්ති පජානෙය්යං, මහග්ගතං වා චිත්තං මහග්ගතං චිත්තන්ති පජානෙය්යං, අමහග්ගතං වා චිත්තං අමහග්ගතං චිත්තන්ති පජානෙය්යං, ස උත්තරං වා චිත්තං සඋත්තරං චිත්තන්ති පජානෙය්යං, අනුත්තරං වා චිත්තං අනුත්තරං චිත්තන්ති පජානෙය්යං, සමාහිතං වා චිත්තං සමාහිතං චිත්තන්ති පජානෙය්යං, අසමාහිතං වා චිත්තං අසමාහිතං චිත්තන්ති පජානෙය්යං, විමුත්තං වා චිත්තං විමුත්තං චිත්තන්ති පජානෙය්යං, අවිමුත්තං වා චිත්තං අවිමුත්තං චිත්තන්ති පජානෙය්යන්ති. තත්ර තත්රෙව සක්ඛිභබ්බතං පාපුණිස්සසි සති සති ආයතනෙ.
සො ත්වං වච්ඡ යාවදෙව ආකඞ්ඛිස්සසි: අනෙකවිහිතං පුබ්බෙනිවාසං අනුස්සරෙය්යං, සෙය්යථිදං: එකම්පි ජාතිං ද්වෙපි ජාතියො තිස්සොපි ජාතියො චතස්සොපි ජාතියො පඤ්චපි ජාතියො දසපි ජාතියො වීසතිම්පි ජාතියො තිංසම්පි ජාතියො චත්තාරීසම්පි ජාතියො පඤ්ඤාසම්පි ජාතියො ජාතිසතම්පි ජාතිසහස්සම්පි ජාතිසතසහස්සම්පි අනෙකෙපි සංවට්ටකප්පෙ අනෙකෙපි විවට්ටකප්පෙ අනෙකෙපි සංවට්ටවිවට්ටකප්පෙ, අමුත්රාසිං එවන්නාමො එවඞ්ගොත්තො එවංවණ්ණො එවමාහාරො එවංසුඛදුක්ඛපටිසංවෙදී එවමායුපරියන්තො, සො තතො චුතො අමුත්ර උපපාදිං. තත්රාපාසිං එවන්නාමො එවඞ්ගොත්තො එවංවණ්ණො එවමාහාරො එවංසුඛදුක්ඛපටිසංවෙදී එවමායුපරියන්තො. සො තතො චුතො ඉධූපපන්නො’ති. ඉති සාකාරං සඋද්දෙසං අනෙකවිහිතං පුබ්බෙනිවාසං අනුස්සරෙය්යන්ති. තත්ර තත්රෙව සක්ඛිභබ්බතං පාපුණිස්සසි සති සති ආයතනෙ.
සො ත්වං වච්ඡ යාවදෙව ආකඞ්ඛිස්සසි: දිබ්බෙන චක්ඛුනා විසුද්ධෙන අතික්කන්තමානුසකෙන සත්තෙ පස්සෙය්යං චවමානෙ උපපජ්ජමානෙ හීනෙ පණීතෙ සුවණ්ණෙ දුබ්බණ්ණෙ සුගතෙ දුග්ගතෙ යථාකම්මූපගෙ සත්තෙ පජානෙය්යං, ඉමෙ වත භොන්තො සත්තා කායදුච්චරිතෙන සමන්නාගතා වචීදුච්චරිතෙන සමන්නාගතා මනොදුච්චරිතෙන සමන්නාගතා අරියානං උපවාදකා මිච්ඡාදිට්ඨිකා මිච්ඡාදිට්ඨිකම්මසමාදානා, තෙ කායස්ස භෙදා පරම්මරණා අපායං දුග්ගතිං විනිපාතං නිරයං උපපන්නා. ඉමෙ වා පන{1} භොන්තො සත්තා කායසුචරිතෙන සමන්නාගතා වචීසුචරිතෙන සමන්නාගතා මනොසුචරිතෙන සමන්නාගතා අරියානං අනුපවාදකා සම්මාදිට්ඨිකා සම්මාදිට්ඨිකම්මසමාදානා, තෙ කායස්ස භෙදා පරම්මරණා සුගතිං සග්ගං ලොකං උප්පන්නා’ති. ඉති දිබ්බෙන චක්ඛුනා විසුද්ධෙන අතික්කන්තමානුසකෙන සත්තෙ පස්සෙය්යං චවමානෙ උපපජ්ජමානෙ හීනෙ පණීතෙ සුවණ්ණෙ දුබ්බණ්ණෙ සුගතෙ දුග්ගතෙ යථාකම්මූපගෙ සත්තෙ පජානෙය්යන්ති. තත්ර තත්රෙව සක්ඛිභබ්බතං පාපුණිස්සසි සති සති ආයතනෙ.
සො ත්වං වච්ඡ, යාවදෙව ආකඞ්ඛිස්සසි ආසවානං ඛයා අනාසවං චෙතොවිමුත්තිං පඤ්ඤාවිමුත්තිං දිට්ඨෙවධම්මෙ සයං අභිඤ්ඤා සච්ඡිකත්වා උපසම්පජ්ජ විහරෙය්යන්ති. තත්ර තත්රෙව සක්ඛිභබ්බතං පාපුණිස්සසි, සති සති ආයතනෙති.
අථ ඛො ආයස්මා වච්ඡගොත්තො භගවතො භාසිතං අභිනන්දිත්වා අනුමොදිත්වා උට්ඨායාසනා භගවන්තං අභිවාදෙත්වා පදක්ඛිණං කත්වා පක්කාමි. අථ ඛො ආයස්මා වච්ඡගොත්තො එකො වූපකට්ඨො අප්පමත්තො ආතාපී පහිතත්තො විහරන්තො න චිරස්සෙව යස්සත්ථාය කුලපුත්තා සම්මදෙව අගාරස්මා අනගාරියං පබ්බජන්ති, තදනුත්තරං බ්රහ්මචරියපරියොසානං දිට්ඨෙව ධම්මෙ සයං අභිඤ්ඤා සච්ඡිකත්වා උපසම්පජ්ජ විහාසි. ඛීණා ජාති, වුසිතං බ්රහ්මචරියං, කතං කරණීයං, නාපරං ඉත්ථත්තායාති අබ්භඤ්ඤාසි. අඤ්ඤතරො ච ඛො පනායස්මා වච්ඡගොත්තො අරහතං අහොසි.
තෙන ඛො පන සමයෙන සම්බහුලා භික්ඛූ භගවන්තං දස්සනාය ගච්ඡන්ති අද්දසා ඛො ආයස්මා වච්ඡගොත්තො තෙ භික්ඛූ දූරතොව ගච්ඡන්තෙ. දිස්වාන යෙන තෙ භික්ඛූ තෙනුපසඞ්කමි, උපසඞ්කමිත්වා තෙ භික්ඛූ එතදවොච: හන්ද කහං පන තුම්හෙ ආයස්මන්තො ගච්ඡථා’ති භගවන්තං ඛො මයං ආවුසො දස්සනාය ගච්ඡාමාති. තෙන’හායස්මන්තො මම වචනෙන භගවතො පාදෙ සිරසා වන්දථ, එවං ච වදෙථ. ‘වච්ඡගොත්තො භන්තෙ භික්ඛු භගවතො පාදෙ සිරසා වන්දති, එවඤ්ච වදෙති, පරිචිණ්ණො මෙ භගවා පරිචිණ්ණො මෙ සුගතො’ති. එවමාවුසොති ඛො තෙ භික්ඛූ ආයස්මතො වච්ඡගොත්තස්ස පච්චස්සොසුං. අථ ඛො තෙ භික්ඛූ යෙන භගවා තෙනුපසඞ්කමිංසු, උපසඞ්කමිත්වා භගවන්තං අභිවාදෙත්වා එකමන්තං නිසීදිංසු. එකමන්තං නිසින්නා ඛො තෙ භික්ඛූ භගවන්තං එතදවොචුං: ආයස්මා භන්තෙ වච්ඡගොත්තො භගවතො පාදෙ සිරසා වන්දති, එවඤ්ච වදෙති: පරිචිණ්ණො මෙ භගවා, පරිචිණ්ණො මෙ සුගතො’ති.
පුබ්බෙව මෙ භික්ඛවෙ වච්ඡගොත්තො භික්ඛු චෙතසා චෙතො පරිච්ච විදිතො. තෙවිජ්ජො වච්ඡගොත්තො භික්ඛු මහිද්ධිකො මහානුභාවො’ති. දෙවතාපි මෙ එතමත්ථං ආරොචෙසුං: තෙවිජ්ජො භන්තෙ වච්ඡගොත්තො භික්ඛු මහිද්ධිකො මහානුභාවො’ති.
ඉදමවොච භගවා. අත්තමනා තෙ භික්ඛූ භගවතො භාසිතං අභිනන්දුන්ති.
මහාවච්ඡගොත්තසුත්තං තතියං.
2. 3. 4.
දීඝනඛ සුත්තං
එවං මෙ සුතං එකං සමයං භගවා රාජගහෙ විහරති ගිජ්ඣකූටෙ පබ්බතෙ සූකරඛතායං.{1} අථ ඛො දීඝනඛො පරිබ්බාජකො යෙන භගවා තෙනුපසඞ්කමි. උපසඞ්කමිත්වා භගවතා සද්ධිං සම්මොදි, සම්මොදනීයං කථං සාරාණීයං වීතිසාරෙත්වා එකමන්තං අට්ඨාසි. එකමන්තං ඨිතො ඛො දීඝනඛො පරිබ්බාජකො භගවන්තං එතදවොච:
අහං හි භො ගොතම එවං වාදී එවංදිට්ඨි, සබ්බං මෙ න ඛමතීති. යාපි ඛො තෙ එසා අග්ගිවෙස්සන දිට්ඨි සබ්බං මෙ න ඛමතීති, එසාපි තෙ දිට්ඨි න ඛමතීති. එසා චෙ මෙ භො ගොතම දිට්ඨි ඛමෙය්ය තම්පස්ස තාදිසමෙව, තම්පස්ස තාදිසමෙවාති. අතො ඛො තෙ අග්ගිවෙස්සන බහූහි බහුතරා ලොකස්මිං යෙ එවමාහංසු: තම්පස්ස තාදිසමෙව, තම්පස්ස තාදිසමෙවාති. තෙ තඤ්චෙව දිට්ඨිං නප්පජහන්ති, අඤ්ඤඤ්ච දිට්ඨිං උපාදියන්ති. අතො ඛො තෙ අග්ගිවෙස්සන තනූහි තනුතරා ලොකස්මිං යෙ එවමාහංසු: තම්පස්ස තාදිසමෙව, තම්පස්ස තාදිසමෙවාති. තෙ තඤ්චෙව දිට්ඨිං පජහන්ති, අඤ්ඤඤ්ච දිට්ඨිං න උපාදියන්ති.
සන්තග්ගිවෙස්සන එකෙ සමණබ්රාහ්මණා එවං වාදිනො එවංදිට්ඨිනො සබ්බං මෙ ඛමතී’ති. සන්තග්ගිවෙස්සන එකෙ සමණබ්රාහ්මණා එවං වාදිනො එවංදිට්ඨිනො සබ්බං මෙ න ඛමතී’ති. සන්තග්ගිවෙස්සන එකෙ සමණබ්රාහ්මණා එවං වාදිනො එවංදිට්ඨිනො එකච්චං මෙ ඛමති, එකච්චං මෙ න ඛමතීති.
තත්රග්ගිවෙස්සන යෙ තෙ සමණබ්රාහ්මණා එවං වාදිනො එවංදිට්ඨිනො සබ්බං මෙ ඛමතී’ති. තෙසමයං දිට්ඨි සාරාගාය සන්තිකෙ සංයොගාය සන්තිකෙ අභිනන්දනාය සන්තිකෙ අජ්ඣොසානාය සන්තිකෙ උපාදානාය සන්තිකෙ.
තත්රග්ගිවෙස්සන යෙ තෙ සමණබ්රාහ්මණා එවංවාදිනො එවංදිට්ඨිනො සබ්බං මෙ න ඛමතී’ති. තෙසමයං දිට්ඨි අසාරාගාය සන්තිකෙ අසංයොගාය සන්තිකෙ අනභිනන්දනාය සන්තිකෙ අනජ්ඣොසානාය සන්තිකෙ අනුපාදානාය සන්තිකෙති.
එවං වුත්තෙ දීඝනඛො පරිබ්බාජකො භගවන්තං එතදවොච: උක්කංසති මෙ භවං ගොතමො දිට්ඨිගතං සමුක්කංසති මෙ භවං ගොතමො දිට්ඨිගත’න්ති.
තත්රග්ගිවෙස්සන යෙ තෙ සමණබ්රාහ්මණා එවංවාදිනො එවංදිට්ඨිනො: එකච්චං මෙ ඛමති, එකච්චං මෙ න ඛමතී’ති. යා හි ඛො නෙසං ඛමති සායං දිට්ඨි සාරාගාය සන්තිකෙ, සංයොගාය සන්තිකෙ, අභිනන්දනාය සන්තිකෙ, අජ්ඣොසානාය සන්තිකෙ, උපාදානාය සන්තිකෙ. යාහි ඛො තෙසං න ඛමති සායං දිට්ඨි අසාරාගාය සන්තිකෙ අසංයොගාය සන්තිකෙ අනභිනන්දනාය සන්තිකෙ අනජ්ඣොසානාය සන්තිකෙ අනුපාදානාය සන්තිකෙ.