ලටුකිකොපමසුත්තං ඡට්ඨං.
2. 2. 7.
චාතුම සුත්තං
එවං මෙ සුතං එකං සමයං භගවා චාතුමායං විහරති ආමලකීවනෙ. තෙන ඛො පන සමයෙන සාරිපුත්තමොග්ගල්ලානපමුඛානි පඤ්චමත්තානි භික්ඛුසතානි චාතුමං අනුප්පත්තානි හොන්ති භගවන්තං දස්සනාය. තෙ ච ආගන්තුකා භික්ඛූ නෙවාසිකෙහි භික්ඛූහි සද්ධිං පටිසම්මොදමානා සෙනාසනානි පඤ්ඤාපයමානා පත්තචීවරානි පටිසාමයමානා උච්චාසද්දා මහාසද්දා අහෙසුං. අථ ඛො භගවා ආයස්මන්තං ආනන්දං ආමන්තෙසි{1}: ‘කෙ පනෙතෙ ආනන්ද උච්චාසද්දා මහාසද්දා කෙවට්ටා මඤ්ඤෙ මච්ඡවිලොපෙති.
‘එතානි භන්තෙ සාරිපුත්තමොග්ගල්ලානපමුඛානි පඤ්චමත්තානි භික්ඛුසතානි චාතුමං අනුප්පත්තානි භගවන්තං දස්සනාය. තෙ ආගන්තුකා භික්ඛූ නෙවාසිකෙහි භික්ඛූහි සද්ධිං පටිසම්මොදමානා සෙනාසනානි පඤ්ඤාපයමානා පත්තචීවරානි පටිසාමයමානා උච්චාසද්දා මහාසද්දා’ති. තෙන හානන්ද මම වචනෙන තෙ භික්ඛූ ආමන්තෙහි. සත්ථායස්මන්තෙ ආමන්තෙතී’ති. එවං භන්තෙති ඛො ආයස්මා ආනන්දො භගවතො පටිස්සුත්වා යෙන තෙ භික්ඛූ තෙනුපසඞ්කමි. උපසඞ්කමිත්වා තෙ භික්ඛූ එතදවොච: ‘සත්ථායස්මන්තෙ ආමන්තෙතී’ති. එවමාවුසොති ඛො තෙ භික්ඛූ ආයස්මතො ආනන්දස්ස පටිස්සුත්වා යෙන භගවා තෙනුපසඞ්කමිංසු. උපසඞ්කමිත්වා භගවන්තං අභිවාදෙත්වා එකමන්තං නිසීදිංසු. එකමන්තං නිසින්නෙ ඛො තෙ භික්ඛූ භගවා එතදවොච: ‘කින්නු තුම්හෙ භික්ඛවෙ උච්චාසද්දා මහාසද්දා කෙවට්ටා මඤ්ඤෙ මච්ඡවිලොපෙ’ති.
ඉමානි භන්තෙ සාරිපුත්තමොග්ගල්ලානප්පමුඛානි පඤ්චමත්තානි භික්ඛුසතානි චාතුමං අනුප්පත්තානි භගවන්තං දස්සනාය. තෙමෙ ආගන්තුකා භික්ඛූ නෙවාසිකෙහි භික්ඛූහි සද්ධිං පටිසම්මොදමානා සෙනාසනානි පඤ්ඤාපයමානා පත්තචීවරානි පටිසාමයමානා උච්චාසද්දා මහාසද්දා’ති. ‘ගච්ඡථ භික්ඛවෙ පණාමෙමි වො, න වො මම සන්තිකෙ වත්ථබ්බ’න්ති. එවං භන්තෙති ඛො තෙ භික්ඛූ භගවතො පටිස්සුත්වා උට්ඨායාසනා භගවන්තං අභිවාදෙත්වා පදක්ඛිණං කත්වා සෙනාසනං සංසාමෙත්වා පත්තචීවරං ආදාය පක්කමිංසු.
තෙන ඛො පන සමයෙන චාතුමෙය්යකා සක්යා සන්ථාගාරෙ සන්නිපතිතා හොන්ති කෙනචිදෙව කරණීයෙන. අද්දසංසු{1} ඛො චාතුමෙය්යකා සක්යා තෙ භික්ඛූ දූරතොව ගච්ඡන්තෙ, දිස්වාන යෙන තෙ භික්ඛූ තෙනුපසඞ්කමිංසු, උපසඞ්කමිත්වා තෙ භික්ඛූ එතදවොචුං: ‘හන්ද කහං පන තුම්හෙ ආයස්මන්තො ගච්ඡථා’ති. භගවතා ඛො ආවුසො භික්ඛුසඞ්ඝො පණාමිතො’ති. ‘තෙන හායස්මන්තො මුහුත්තං නිසීදථ, අප්පෙව නාම මයං සක්කුණෙය්යාම භගවන්තං පසාදෙතු’න්ති. එවමාවුසොති ඛො තෙ භික්ඛූ චාතුමෙය්යකානං සක්යානං පච්චස්සොසුං.
අථ ඛො චාතුමෙය්යකා සක්යා යෙන භගවා තෙනුපසඞ්කමිංසු, උපසඞ්කමිත්වා භගවන්තං අභිවාදෙත්වා එකමන්තං නිසීදිංසු. එකමන්තං නිසින්නා ඛො චාතුමෙය්යකා සක්යා භගවන්තං එතදවොචුං: ‘අභිනන්දතු භන්තෙ භගවා භික්ඛුසඞ්ඝං, අභිවදතු භන්තෙ භගවා භික්ඛුසඞ්ඝං. සෙය්යථාපි භන්තෙ භගවතා පුබ්බෙ භික්ඛුසඞ්ඝො අනුග්ගහිතො, එවමෙව{1} භගවා එතරහි අනුගණ්හාතු භික්ඛුසඞ්ඝං. සන්තෙත්ථ භන්තෙ භික්ඛූ නවා අචිරපබ්බජිතා අධුනාගතා ඉමං ධම්මවිනයං. තෙසං භගවන්තං දස්සනාය අලභන්තානං සියා අඤ්ඤථත්තං, සියා විපරිණාමො. සෙය්යථාපි භන්තෙ බීජානං තරුණානං උදකං අලභන්තානං සියා අඤ්ඤථත්තං සියා විපරිනාමො, එවමෙව ඛො භන්තෙ සන්තෙත්ථ භික්ඛූ නවා අචිරපබ්බජිතා අධුනාගතා ඉමං ධම්මවිනයං, තෙසං භගවන්තං දස්සනාය අලභන්තානං සියා අඤ්ඤථත්තං, සියා විපරිනාමො.
සෙය්යථාපි භන්තෙ වච්ඡස්ස තරුණස්ස මාතරං අපස්සන්තස්ස සියා අඤ්ඤථත්තං, සියා විපරිනාමො, එවමෙව ඛො භන්තෙ සන්තෙත්ථ භික්ඛූ නවා අචිරපබ්බජිතා අධුනාගතා ඉමං ධම්මවිනයං, තෙසං භගවන්තං අපස්සන්තානං සියා අඤ්ඤථත්තං, සියා විපරිණාමො. අභිනන්දතු භන්තෙ භගවා භික්ඛුසඞ්ඝං. අභිවදතු භන්තෙ භගවා භික්ඛුසඞ්ඝං. සෙය්යථාපි භන්තෙ භගවතා පුබ්බෙ භික්ඛුසඞ්ඝො අනුග්ගහිතො. එවමෙව භගවා එතරහි අනුගණ්හාතු භික්ඛුසඞ්ඝ’න්ති.
අථ ඛො බ්රහ්මා සහම්පති භගවතො චෙතසා චෙතො පරිවිතක්කමඤ්ඤාය සෙය්යථාපි නාම බලවා පුරිසො සම්මිඤ්ජිතං වා බාහං පසාරෙය්ය, පසාරිතං වා බාහං සමිඤ්ජෙය්ය. එවමෙව බ්රහ්මලොකෙ අන්තරහිතො භගවතො පුරතො පාතුරහොසි. අථ ඛො බ්රහ්මා සහම්පති එකංසං උත්තරාසඞ්ගං කරිත්වා යෙන භගවා තෙනඤ්ජලිං පණාමෙත්වා භගවන්තං එතදවොච: අභිනන්දතු භන්තෙ භගවා භික්ඛුසඞ්ඝං, අභිවදතු භන්තෙ භගවා භික්ඛුසඞ්ඝං. සෙය්යථාපි භන්තෙ භගවතා පුබ්බෙ භික්ඛුසඞ්ඝො අනුග්ගහිතො. එවමෙව භගවා එතරහි අනුග්ගණ්හාතු භික්ඛුසඞ්ඝං. සන්තෙත්ථ භන්තෙ භික්ඛූ නවා අචිරපබ්බජිතා අධුනාගතා ඉමං ධම්මවිනයං. තෙසං භගවන්තං දස්සනාය අලභන්තානං සියා අඤ්ඤථත්තං, සියා විපරිණාමො.
සෙය්යථාපි භන්තෙ බීජානං තරුණානං උදකං අලභන්තානං සියා අඤ්ඤථත්තං, සියා විපරිණාමො. එවමෙව ඛො භන්තෙ, සන්තෙත්ථ භික්ඛූ නවා අචිරපබ්බජිතා අධුනාගතා ඉමං ධම්මවිනයං, තෙසං භගවන්තං දස්සනාය අලභන්තානං සියා අඤ්ඤථත්තං, සියා විපරිණාමො.
සෙය්යථාපි භන්තෙ වච්ඡස්ස තරුණස්ස මාතරං අපස්සන්තස්ස සියා අඤ්ඤථත්තං, සියා විපරිණාමො. එවමෙව ඛො භන්තෙ සන්තෙත්ථ භික්ඛූ නවා අචිරපබ්බජිතා අධුනාගතා ඉමං ධම්මවිනයං, තෙසං භගවන්තං අපස්සන්තානං සියා අඤ්ඤථත්තං, සියා විපරිණාමො. අභිනන්දතු භන්තෙ භගවා භික්ඛුසඞ්ඝං, අභිවදතු භන්තෙ භගවා භික්ඛුසඞ්ඝං. සෙය්යථාපි භන්තෙ භගවතා පුබ්බෙ භික්ඛුසඞ්ඝො අනුග්ගහිතො, එවමෙව භගවා එතරහි අනුගණ්හාතු භික්ඛුසඞ්ඝ’න්ති.
අසක්ඛිංසු ඛො චාතුමෙය්යකා ච සක්යා බ්රහ්මා ච සහම්පති භගවන්තං පසාදෙතුං බීජූපමෙන ච තරුණූපමෙන ච. අථ ඛො ආයස්මා මහාමොග්ගල්ලානො භික්ඛූ ආමන්තෙසි: ‘උට්ඨහථාවුසො, ගණ්හාථ පත්තචීවරං, පසාදිතො භගවා චාතුමෙය්යකෙහි ච සක්යෙහි බ්රහ්මුනා ච සහම්පතිනා බීජූපමෙන ච තරුණූපමෙන චා’ති. එවමාවුසොති ඛො තෙ භික්ඛූ ආයස්මතො මහාමොග්ගල්ලානස්ස පටිස්සුත්වා උට්ඨායාසනා පත්තචීවරං ආදාය යෙන භගවා තෙනුපසඞ්කමිංසු. උපසඞ්කමිත්වා භගවන්තං අභිවාදෙත්වා එකමන්තං නිසීදිංසු. එකමන්තං නිසින්නං ඛො ආයස්මන්තං සාරිපුත්තං භගවා එතදවොච: කින්ති තෙ සාරිපුත්ත අහොසි මයා භික්ඛුසඞ්ඝෙ පණාමිතෙ’ති. එවං ඛො මෙ භන්තෙ අහොසි භගවතා භික්ඛුසඞ්ඝෙ පණාමිතෙ{1} අප්පොස්සුක්කොදා’නි භගවා දිට්ඨධම්මසුඛවිහාරං අනුයුත්තො විහරිස්සති. මයම්පිදානි අප්පොස්සුක්කා දිට්ඨධම්මසුඛවිහාරං අනුයුත්තා විහරිස්සාමා’ති. ආගමෙහි ත්වං සාරිපුත්ත, ආගමෙහි ත්වං සාරිපුත්ත, දිට්ඨධම්මසුඛවිහාරන්ති න ඛො තෙ සාරිපුත්ත පුනපි එවරූපං චිත්තං උප්පාදෙතබ්බන්ති{2}.
අථ ඛො භගවා ආයස්මන්තං මහාමොග්ගල්ලානං ආමන්තෙසි. ‘කින්ති තෙ මොග්ගල්ලාන අහොසි මයා භික්ඛුසඞ්ඝෙ පණාමිතෙති. එවං ඛො මෙ භන්තෙ අහොසි භගවතා භික්ඛුසඞ්ඝෙ පණාමිතෙ අප්පොස්සුක්කො’දානි භගවා දිට්ඨධම්මසුඛවිහාරං අනුයුත්තො විහරිස්සති. අහඤ්චදානි ආයස්මා ච සාරිපුත්තො භික්ඛුසඞ්ඝං පරිහරිස්සාමා’ති. සාධු සාධු මොග්ගල්ලාන, අහං වා හි මොග්ගල්ලාන භික්ඛුසඞ්ඝං පරිහරෙය්යං සාරිපුත්ත මොග්ගල්ලානා වාති.
අථ ඛො භගවා භික්ඛූ ආමන්තෙසි: චත්තාරිමානි භික්ඛවෙ භයානි උදකොරොහන්තෙ පාටිකඞ්ඛිතබ්බානි. කතමානි චත්තාරි: ඌමිභයං කුම්භීලභයං ආවට්ටභයං සුසුකාභයං. ඉමානි ඛො භික්ඛවෙ චත්තාරි භයානි උදකොරොහන්තෙ පාටිකඞ්ඛිතබ්බානි. එවමෙව ඛො භික්ඛවෙ චත්තාරිමානි භයානි ඉධෙකච්චෙ පුග්ගලෙ ඉමස්මිං ධම්මවිනයෙ අගාරස්මා අනගාරියං පබ්බජිතෙ පාටිකඞ්ඛිතබ්බානි. කතමානි චත්තාරි: ඌමිභයං කුම්භීලභයං ආවට්ටභයං සුසුකාභයං.
කතමඤ්ච භික්ඛවෙ ඌමිභයං: ඉධ භික්ඛවෙ එකච්චො කුලපුත්තො සද්ධා අගාරස්මා අනගාරියං පබ්බජිතො හොති, ‘ඔතිණ්ණොම්හි ජාතියා ජරාය මරණෙන සොකෙහි පරිදෙවෙහි දුක්ඛෙහි දොමනස්සෙහි උපායාසෙහි, දුක්ඛොතිණ්ණො දුක්ඛපරෙතො. අප්පෙව නාම ඉමස්ස කෙවලස්ස දුක්ඛක්ඛන්ධස්ස අන්තකිරියා පඤ්ඤායෙථා’ති. තමෙනං තථා පබ්බජිතං සමානං සබ්රහ්මචාරී ඔවදන්ති අනුසාසන්ති: ‘එවන්තෙ අභික්කමිතබ්බං. එවන්තෙ පටික්කමිතබ්බං. එවන්තෙ ආලොකිතබ්බං. එවන්තෙ විලොකිතබ්බං. එවන්තෙ සමිඤ්ජිතබ්බං. එවන්තෙ පසාරෙතබ්බං{3}. එවන්තෙ සඞ්ඝාටිපත්තචීවරං ධාරෙතබ්බ’න්ති. තස්ස එවං හොති:
මයං ඛො පුබ්බෙ අගාරියභූතා සමානා අඤ්ඤෙ ඔවදාමපි{1} අනුසාසාම්පි{2} ඉමෙ පනම්හාකං පුත්තමත්තා මඤ්ඤෙ, නත්තමත්තා මඤ්ඤෙ, අම්හෙ ඔවදිතබ්බං අනුසාසිතබ්බං මඤ්ඤන්තීති. සො සික්ඛං පච්චක්ඛාය හීනායාවත්තති. අයං වුච්චති භික්ඛවෙ ඌමිභයස්ස භීතො සික්ඛං පච්චක්ඛාය හීනායාවත්තො. ඌමිභයන්ති ඛො භික්ඛවෙ කොධුපායාසස්සෙතං අධිවචනං.
කතමඤ්ච භික්ඛවෙ කුම්භීලභයං: ඉධ භික්ඛවෙ එකච්චො කුලපුත්තො සද්ධා අගාරස්මා අනගාරියං පබ්බජිතො හොති, ඔතිණ්ණොම්හි ජාතියා ජරාය මරණෙන සොකෙහි පරිදෙවෙහි දුක්ඛෙහි දොමනස්සෙහි උපායාසෙහි, දුක්ඛොතිණ්ණො දුක්ඛපරෙතො. අප්පෙවනාම ඉමස්ස කෙවලස්ස දුක්ඛක්ඛන්ධස්ස අන්තකිරියා පඤ්ඤායෙථා’ති.
තමෙනං තථා පබ්බජිතං සමානං සබ්රහ්මචාරී ඔවදන්ති. අනුසාසන්ති: ‘ඉදං තෙ ඛාදිතබ්බං, ඉදං තෙ න ඛාදිතබ්බං, ඉදං තෙ භුඤ්ජිතබ්බං, ඉදං තෙ න භුඤ්ජිතබ්බං, ඉදං තෙ සායිතබ්බං, ඉදං තෙ න සායිතබ්බං, ඉදං තෙ පාතබ්බං, ඉදං තෙ න පාතබ්බං, කප්පියං තෙ ඛාදිතබ්බං, අකප්පියං තෙ න ඛාදිතබ්බං, කප්පියං තෙ භුඤ්ජිතබ්බං, අකප්පියං තෙ න භුඤ්ජිතබ්බං, කප්පියං තෙ සායිතබ්බං, අකප්පියං තෙ න සායිතබ්බං, කප්පියං තෙ පාතබ්බං, අකප්පියං තෙ න පාතබ්බං, කාලෙ තෙ ඛාදිතබ්බං, විකාලෙ තෙ න ඛාදිතබ්බං, කාලෙ තෙ භුඤ්ජිතබ්බං, විකාලෙ තෙ න භුඤ්ජිතබ්බං, කාලෙ තෙ සායිතබ්බං, විකාලෙ තෙ න සායිතබ්බං, කාලෙ තෙ පාතබ්බං, විකාලෙ තෙ න පාතබ්බ’න්ති. තස්ස එවං හොති: මයං ඛො පුබ්බෙ අගාරියභූතා සමානා යං ඉච්ඡාම තං ඛාදාම, යං න ඉච්ඡාම න තං ඛාදාම, යං ඉච්ඡාම තං භුඤ්ජාම, යං න ඉච්ඡාම න තං භුඤ්ජාම, යං ඉච්ඡාම තං සායාම, යං න ඉච්ඡාම න තං සායාම, යං ඉච්ඡාම තං පිවාම{3} යං න ඉච්ඡාම න තං පිවාම. කප්පියම්පි ඛාදාම, අකප්පියම්පි ඛාදාම, කප්පියම්පි භුඤ්ජාම, අකප්පියම්පි භුඤ්ජාම, කප්පියම්පි සායාම, අකප්පියම්පි සායාම, කප්පියම්පි පිවාම, අකප්පියම්පි පිවාම. කාලෙපි ඛාදාම, විකාලෙපි ඛාදාම, කාලෙපි භුඤ්ජාම විකාලෙපි භුඤ්ජාම, කාලෙපි සායාම, විකාලෙපි සායාම, කාලෙපි පිවාම, විකාලෙපි පිවාම. යම්පි නො සද්ධා ගහපතිකා දිවා විකාලෙ පණීතං ඛාදනීයං භොජනීයං දෙන්ති, තත්ථපි මෙ මුඛාවරණං මඤ්ඤෙ කරොන්තී’ති. සො සික්ඛං පච්චක්ඛාය හීනායාවත්තති. අයං වුච්චති භික්ඛවෙ කුම්භීලභයස්ස භීතො සික්ඛං පච්චක්ඛාය හීනායාවත්තො. කුම්භීලභයන්ති ඛො භික්ඛවෙ ඔදරිකත්තස්සෙතං අධිවචනං.
කතමඤ්ච භික්ඛවෙ ආවට්ටභයං, ඉධ භික්ඛවෙ එකච්චො කුලපුත්තො සද්ධා අගාරස්මා අනගාරියං පබ්බජිතො හොති. ඔතිණ්ණොම්හි ජාතියා ජරාය මරණෙන සොකෙහි පරිදෙවෙහි දුක්ඛෙහි දොමනස්සෙහි උපායාසෙහි, දුක්ඛොතිණ්ණො දුක්ඛපරෙතො. අප්පෙවනාම ඉමස්ස කෙවලස්ස දුක්ඛක්ඛන්ධස්ස අන්තකිරියා පඤ්ඤායෙථා’ති. සො එවං පබ්බජිතො සමානො පුබ්බණ්හසමයං නිවාසෙත්වා පත්තචීවරං ආදාය ගාමං වා නිගමං වා පිණ්ඩාය පවිසති. අරක්ඛිතෙනෙව කායෙන, අරක්ඛිතාය වාචාය, අනුපට්ඨිතාය සතියා, අසංවුතෙහි ඉන්ද්රියෙහි. සො තත්ථ පස්සති ගහපතිං වා ගහපතිපුත්තං වා පඤ්චහි කාමගුණෙහි සමප්පිතං සමඞ්ගීභූතං පරිචාරයමානං. තස්ස එවං හොති: මයං ඛො පුබ්බෙ අගාරියභූතා සමානා පඤ්චහි කාමගුණෙහි සමප්පිතා සමඞ්ගීභූතා පරිචාරිම්හා. සංවිජ්ජන්තෙ{1} ඛො කුලෙ{2} භොගා. සක්කා භොගෙ ච භුඤ්ජිතුං පුඤ්ඤානි ච කාතු’න්ති. සො සික්ඛං පච්චක්ඛාය හීනායාවත්තති. අයං වුච්චති භික්ඛවෙ ආවට්ටභයස්ස භීතො සික්ඛං පච්චක්ඛාය හීනායාවත්තො. ආවට්ටභයන්ති ඛො භික්ඛවෙ පඤ්චන්නෙතං කාමගුණානං අධිවචනං.
කතමඤ්ච භික්ඛවෙ සුසුකාභයං, ඉධ භික්ඛවෙ එකච්චො කුලපුත්තො සද්ධා අගාරස්මා අනගාරියං පබ්බජිතො හොති, ඔතිණ්ණොම්හි ජාතියා ජරාය මරණෙන සොකෙහි පරිදෙවෙහි දුක්ඛෙහි දොමනස්සෙහි උපායාසෙහි, දුක්ඛොතිණ්ණො දුක්ඛපරෙතො, අප්පෙවනාම ඉමස්ස කෙවලස්ස දුක්ඛක්ඛන්ධස්ස අන්තකිරියා පඤ්ඤායෙථා’ති. සො එවං පබ්බජිතො සමානො පුබ්බණ්හසමයං නිවාසෙත්වා පත්තචීවරං ආදාය ගාමං වා නිගමං වා පිණ්ඩාය පවිසති. අරක්ඛිතෙනෙව කායෙන අරක්ඛිතාය වාචාය, අනුපට්ඨිතාය සතියා, අසංවුතෙහි ඉන්ද්රියෙහි සො තත්ථ පස්සති මාතුගාමං දුන්නිවත්ථං වා දුප්පාරුතං වා. තස්ස මාතුගාමං දිස්වා දුන්නිවත්ථං වා දුප්පාරුතං වා රාගො චිත්තං අනුද්ධංසෙති. සො රාගානුද්ධස්තෙන{3} චිත්තෙන සික්ඛං පච්චක්ඛාය හීනායාවත්තති . අයං වුච්චති භික්ඛවෙ, සුසුකාභයස්ස භීතො සික්ඛං පච්චක්ඛාය හීනායාවත්තො. සුසුකාභයන්ති ඛො භික්ඛවෙ මාතුගාමස්සෙතං අධිවචනං.
ඉමානි ඛො භික්ඛවෙ චත්තාරි භයානි, ඉධෙකච්චෙ පුග්ගලෙ ඉමස්මිං ධම්මවිනයෙ අගාරස්මා අනගාරියං පබ්බජිතෙ පාටිකඞ්ඛිතබ්බානීති.
ඉදමවොච භගවා. අත්තමනා තෙ භික්ඛූ භගවතො භාසිතං අභිනන්දුන්ති.
චාතුම සුත්තං සත්තමං.
2. 2 .8
නළකපාන සුත්තං
එවං මෙ සුතං එකං සමයං භගවා කොසලෙසු විහරති නළකපානෙ පලාසවනෙ. තෙන ඛො පන සමයෙන සම්බහුලා අභිඤ්ඤාතා අභිඤ්ඤාතා කුලපුත්තා භගවන්තං උද්දිස්ස සද්ධා අගාරස්මා අනගාරියං පබ්බජිතා හොන්ති. ආයස්මා ච අනුරුද්ධො ආයස්මා ච භද්දියො ආයස්මා ච කිම්බිලො{1} ආයස්මා ච භගු ආයස්මා ච කුණ්ඩධානො{2} ආයස්මා ච රෙවතො, ආයස්මා ච ආනන්දො: අඤ්ඤෙ ච අභිඤ්ඤාතා අභිඤ්ඤාතා කුලපුත්තා.
තෙන ඛො පන සමයෙන භගවා භික්ඛුසඞ්ඝපරිවුතො අබ්භොකාසෙ නිසින්නො හොති. අථ ඛො භගවා තෙ කුලපුත්තෙ ආරබ්භ භික්ඛූ ආමන්තෙසි, යෙ තෙ භික්ඛවෙ කුලපුත්තා මමං උද්දිස්ස සද්ධා අගාරස්මා අනගාරියං පබ්බජිතා, කච්චි තෙ භික්ඛවෙ භික්ඛූ අභිරතා බ්රහ්මචරියෙ’ති. එවං වුත්තෙ තෙ භික්ඛූ තුණ්හී අහෙසුං. දුතියම්පි -පෙ- තුණ්හී අහෙසුං. තතියම්පි ඛො භගවා තෙ කුලපුත්තෙ ආරබ්භ භික්ඛූ ආමන්තෙසි, යෙ තෙ භික්ඛවෙ කුලපුත්තා මමං උද්දිස්ස සද්ධා අගාරස්මා අනගාරියං පබ්බජිතා, කච්චි තෙ භික්ඛවෙ භික්ඛූ අභිරතා බ්රහ්මචරියෙ’ති. තතියම්පි ඛො තෙ භික්ඛූ තුණ්හී අහෙසුං.
අථ ඛො භගවතො එතදහොසි: යන්නූනාහං තෙව{3} කුලපුත්තෙ පුච්ඡෙය්ය’න්ති. අථ ඛො භගවා ආයස්මන්තං අනුරුද්ධං ආමන්තෙසි: කච්චි තුම්හෙ අනුරුද්ධා අභිරතා බ්රහ්මචරියෙ’ති. තග්ඝ මයං භන්තෙ අභිරතා බ්රහ්මචරියෙති. සාධු සාධු අනුරුද්ධා එතං ඛො අනුරුද්ධා තුම්හාකං පතිරූපං කුලපුත්තානං සද්ධා අගාරස්මා අනගාරියං පබ්බජිතානං යං තුම්හෙ අභිරමෙය්යාථ බ්රහ්මචරියෙ. යෙන තුම්හෙ අනුරුද්ධා භද්රෙන යොබ්බනෙන සමන්නාගතා පඨමෙන වයසා සුසු කාලකෙසා කාමෙ පරිභුඤ්ජෙය්යාථ. තෙන තුම්හෙ අනුරුද්ධා භද්රෙන{4} යොබ්බනෙන සමන්නාගතා පඨමෙන වයසා සුසු කාලකෙසා අගාරස්මා අනගාරියං පබ්බජිතා. තෙ ඛො{5} පන තුම්හෙ අනුරුද්ධා නෙව රාජාභිනීතා අගාරස්මා අනගාරියං පබ්බජිතා, න චොරාභිනීතා අගාරස්මා අනගාරියං පබ්බජිතා, න ඉණට්ටා අගාරස්මා අනගාරියං පබ්බජිතා, න භයට්ටා අගාරස්මා අනගාරියං පබ්බජිතා, න ආජීවිකාපකතා අගාරස්මා අනගාරියං පබ්බජිතා. අපි ච ඛොම්හි ඔතිණ්ණො ජාතියා ජරාය මරණෙන සොකෙහි පරිදෙවෙහි දුක්ඛෙහි දොමනස්සෙහි උපායාසෙහි, දුක්ඛොතිණ්ණො දුක්ඛපරෙතො අප්පෙවනාම ඉමස්ස කෙවලස්ස දුක්ඛක්ඛන්ධස්ස අන්තකිරියා පඤ්ඤායෙථාති. නනු තුම්හෙ අනුරුද්ධා එවං සද්ධා අගාරස්මා අනගාරියං පබ්බජිතා’ති. එවං භන්තෙ. එවං පබ්බජිතෙන ච පන අනුරුද්ධා කුලපුත්තෙන කිමස්ස
කරණීයං: ‘විවෙකං අනුරුද්ධා කාමෙහි විවෙකං අකුසලෙහි ධම්මෙහි පීතිසුඛං නාධිගච්ඡති අඤ්ඤං වා තතො සන්තතරං. තස්ස අභිජ්ඣාපි චිත්තං පරියාදාය තිට්ඨති. බ්යාපාදොපි චිත්තං පරියාදාය තිට්ඨති. ථීනමිද්ධම්පි චිත්තං පරියාදාය තිට්ඨති. උද්ධච්චකුක්කුච්චම්පි චිත්තං පරියාදාය තිට්ඨති. විචිකිච්ඡාපි චිත්තං පරියාදාය තිට්ඨති. අරතීපි චිත්තං පරියාදාය තිට්ඨති. තත්දීපි චිත්තං පරියාදාය තිට්ඨති. විවෙකං අනුරුද්ධා කාමෙහි විවෙකං අකුසලෙහි ධම්මෙහි පීතිසුඛං නාධිගච්ඡති අඤ්ඤං වා තතො සන්තතරං. විවෙකං අනුරුද්ධා කාමෙහි විවෙකං අකුසලෙහි ධම්මෙහි පීතිසුඛං අධිගච්ඡති අඤ්ඤං වා තතො සන්තතරං. තස්ස අභිජ්ඣාපි චිත්තං න පරියාදාය තිට්ඨති. බ්යාපාදොපි චිත්තං න පරියාදාය තිට්ඨති. ථීනමිද්ධම්පි චිත්තං න පරියාදාය තිට්ඨති. උද්ධච්චකුක්කුච්චම්පි චිත්තං න පරියාදාය තිට්ඨති. විචිකිච්ඡාපි චිත්තං න පරියාදාය තිට්ඨති. අරතීපි චිත්තං න පරියාදාය තිට්ඨති. තන්දීපි චිත්තං න පරියාදාය තිට්ඨති. විවෙකං අනුරුද්ධා කාමෙහි විවෙකං අකුසලෙහි ධම්මෙහි පීතිසුඛං අධිගච්ඡති අඤ්ඤං වා තතො සන්තතරං.
කින්ති වො අනුරුද්ධා මයි හොති: යෙ ආසවා සංකිලෙසිකා පොනොභවිකා සදරා දුක්ඛවිපාකා ආයතිං ජාතිජරාමරණීයා, අප්පහීනා තෙ තථාගතස්ස. තස්මා තථාගතො සඞ්ඛායෙකං පටිසෙවති, සඞ්ඛායෙකං අධිවාසෙති, සඞ්ඛායෙකං පරිවජ්ජෙති, සඞ්ඛායෙකං විනොදෙතී’ති.
න ඛො නො භන්තෙ භගවති එවං හොති: ‘යෙ ආසවා සඞ්කිලෙසිකා පොනොභවිකා සදරා දුක්ඛවිපාකා ආයතිං ජාතිජරාමරණියා, අප්පහීනා තෙ තථාගතස්ස. තස්මා තථාගතො සඞ්ඛායෙකං පටිසෙවති, සඞ්ඛායෙකං අධිවාසෙති, සඞ්ඛායෙකං පරිවජ්ජෙති, සඞ්ඛායෙකං විනොදෙතී’ති.
එවං ඛො නො භන්තෙ භගවති හොති: යෙ ආසවා සංකිලෙසිකා පොනොභවිකා සදරා දුක්ඛවිපාකා ආයතිං ජාතිජරාමරණීයා, පහීනා තෙ තථාගතස්ස. තස්මා තථාගතො සඞ්ඛායෙකං පටිසෙවති, සඞ්ඛායෙකං අධිවාසෙති, සඞ්ඛායෙකං පරිවජ්ජෙති, සඞ්ඛායෙකං විනොදෙතී’ති. සාධු සාධු අනුරුද්ධා, තථාගතස්ස අනුරුද්ධා, යෙ ආසවා සඞ්කිලෙසිකා පොනොභවිකා සදරා දුක්ඛවිපාකා ආයතිං ජාතිජරාමරණියා, පහීනා තෙ උච්ඡින්නමූලා තාලාවත්ථුකතා අනභාවකතා{1} ආයතිං අනුප්පාදධම්මා. සෙය්යථාපි අනුරුද්ධා තාලො මත්ථකච්ඡින්නො අභබ්බො පුනවිරූළ්හියා. එවමෙව ඛො අනුරුද්ධා තථාගතස්ස යෙ ආසවා සඞ්කිලෙසිකා පොනොභවිකා සදරා දුක්ඛවිපාකා ආයතිං ජාතිජරාමරණීයා. පහීනා තෙ උච්ඡින්නමූලා තාලාවත්ථුකතා අනභාවකතා{1} ආයතිං අනුප්පාදධම්මා. තස්මා තථාගතො සඞ්ඛායෙකං පටිසෙවති, සඞ්ඛායෙකං අධිවාසෙති, සඞ්ඛායෙකං පරිවජ්ජෙති, සඞ්ඛායෙකං විනොදෙති’.
තං කිම්මඤ්ඤසි අනුරුද්ධා කං අත්ථවසං සම්පස්සමානො තථාගතො සාවකෙ අබ්භතීතෙ කාලකතෙ උපපත්තීසු බ්යාකරොති: ‘අසු අමුත්ර උපපන්නො, අසු අමුත්ර උපපන්නො’ති.
භගවම්මූලකා නො භන්තෙ ධම්මා, භගවන්නෙත්තිකා, භගවම්පටිසරණා. සාධු වත භන්තෙ භගවන්තඤ්ඤෙව පටිභාතු එතස්ස භාසිතස්ස අත්ථො. භගවතො සුත්වා භික්ඛූ ධාරෙස්සන්තී’ති .
න ඛො අනුරුද්ධා තථාගතො ජනකුහනත්ථං න ජනලපනත්ථං න ලාභසක්කාරසිලොකානිසංසත්ථං, න ඉති මං ජනො ජානාතූ’ති සාවකෙ අබ්භතීතෙ කාලකතෙ උපපත්තීසු බ්යාකරොති: ‘අසු අමුත්ර උපපන්නො, අසු අමුත්ර උපපන්නො’ති. සන්ති ච ඛො අනුරුද්ධා කුලපුත්තා සද්ධා උළාරවෙදා උළාරපාමොජ්ජා{1}. ‘තෙ තං සුත්වා තථත්තාය චිත්තං උපසංහරන්ති. තෙසන්තං අනුරුද්ධා හොති දීඝරත්තං හිතාය සුඛාය.
ඉධානුරුද්ධා භික්ඛු සුණාති: ඉත්ථන්නාමො භික්ඛු කාලකතො{2} සො භගවතා බ්යාකතො අඤ්ඤාය සණ්ඨහී’ති. සො ඛො පනස්ස ආයස්මා සාමං දිට්ඨො වා හොති අනුස්සවසුතො වා, ‘එවංසීලො සො ආයස්මා අහොසි ඉතිපි, එවංධම්මො සො ආයස්මා අහොසි ඉතිපි, එවම්පඤ්ඤො සො ආයස්මා අහොසි ඉතිපි, එවංවිහාරී සො ආයස්මා අහොසි ඉතිපි, එවං විමුත්තො සො ආයස්මා අහොසි ඉතිපීති. සො තස්ස සද්ධඤ්ච සීලඤ්ච සුතඤ්ච චාගඤ්ච පඤ්ඤඤ්ච අනුස්සරන්තො තථත්තාය චිත්තං උපසංහරති. එවම්පි ඛො අනුරුද්ධා භික්ඛුනො ඵාසුවිහාරො හොති.
ඉධානුරුද්ධා භික්ඛු සුණාති: ‘ඉත්ථන්නාමො භික්ඛු කාලකතො, සො භගවතා බ්යාකතො: පඤ්චන්නං ඔරම්භාගියානං සංයොජනානං පරික්ඛයා ඔපපාතිකො තත්ථ පරිනිබ්බායී අනාවත්තිධම්මො තස්මා ලොකා’ති. සො ඛො පනස්ස ආයස්මා සාමං දිට්ඨො වා හොති අනුස්සවසුතො{3} වා: ‘එවංසීලො සො ආයස්මා අහොසි ඉතිපි, එවංධම්මො -පෙ- එවංපඤ්ඤො -පෙ- එවංවිහාරී -පෙ- එවංවිමුත්තො සො ආයස්මා අහොසි ඉතිපී’ති. සො තස්ස සද්ධඤ්ච -පෙ- පඤ්ඤඤ්ච අනුස්සරන්තො තථත්තාය චිත්තං උපසංහරති. එවම්පි ඛො අනුරුද්ධා භික්ඛුනො ඵාසුවිහාරො හොති.
ඉධානුරුද්ධා භික්ඛු සුණාති: ‘ඉත්ථන්නාමො භික්ඛු කාලකතො, සො භගවතා බ්යාකතො තිණ්ණං සංයොජනානං පරික්ඛයා රාගදොසමොහාන තනුත්තා සකදාගාමී, සකිදෙව ඉමං ලොකං ආගන්ත්වා දුක්ඛස්සන්තං කරිස්සතී’ති. සො ඛො පනස්ස ආයස්මා සාමං දිට්ඨො වා හොති අනුස්සවසුතො වා. එවංසීලො සො ආයස්මා අහොසි ඉතිපි, එවංධම්මො -පෙ- එවං පඤ්ඤො -පෙ- එවංවිහාරී -පෙ- එවංවිමුත්තො සො ආයස්මා අහොසි ඉතිපී’ති. සො තස්ස සද්ධඤ්ච -පෙ- පඤ්ඤඤ්ච අනුස්සරන්තො තථත්තාය චිත්තං උපසංහරති. එවම්පි ඛො අනුරුද්ධා භික්ඛුනො ඵාසුවිහාරො හොති.
ඉධානුරුද්ධා භික්ඛු සුණාති: ‘ඉත්ථන්නාමො භික්ඛු කාලකතො, සො භගවතා බ්යාකතො: ‘තිණ්ණං සංයොජනානං පරික්ඛයා සොතාපන්නො අවිනිපාතධම්මො නියතො සම්බොධිපරායණො’ති. සො ඛො පනස්ස ආයස්මා සාමං දිට්ඨො වා හොති අනුස්සවසුතො වා: ‘එවංසීලො සො ආයස්මා අහොසි ඉතිපි, එවංධම්මො -පෙ- එවංපඤ්ඤො -පෙ- එවං විහාරී -පෙ- එවංවිමුත්තො සො අයස්මා අහොසි ඉතිපී’ති. සො තස්ස සද්ධඤ්ච -පෙ- පඤ්ඤඤ්ච අනුස්සරන්තො තථත්තාය චිත්තං උපසංහරති. එවම්පි ඛො අනුරුද්ධා භික්ඛුනො ඵාසුවිහාරො හොති.
ඉධානුරුද්ධා භික්ඛුනී සුණාති: ‘ඉත්ථන්නාමා භික්ඛුනී කාලකතා, සා භගවතා බ්යාකතා: අඤ්ඤාය සණ්ඨහී’ති. සා ඛො පනස්ස භගිනී සාමං දිට්ඨා වා හොති අනුස්සවසුතා වා: ‘එවංසීලා සා භගිනී අහොසි ඉතිපි, එවංධම්මා සා භගිනී අහොසි ඉතිපි, එවංපඤ්ඤා සා භගිනී අහොසි ඉතිපි, එවංවිහාරිනී සා භගිනී අහොසි ඉතිපි, එවංවිමුත්තා සා භගිනී අහොසි ඉතිපී’ති. සා තස්සා සද්ධඤ්ච සීලඤ්ච සුතඤ්ච චාගඤ්ච පඤ්ඤඤ්ච අනුස්සරන්තී තථත්තාය චිත්තං උපසංහරති. එවම්පි ඛො අනුරුද්ධා භික්ඛුනියා ඵාසුවිහාරො හොති.
ඉධානුරුද්ධා භික්ඛුනී සුණාති: ‘ඉත්ථන්නාමා භික්ඛුනී කාලකතා{1} සා භගවතා බ්යාකතා පඤ්චන්නං ඔරම්භාගියානං සංයොජනානං පරික්ඛයා ඔපපාතිකා තත්ථ පරිනිබ්බායිනී අනාවත්තිධම්මා තස්මා ලොකා’ති. සා ඛො පනස්සා භගිනී සාමං දිට්ඨා වා හොති අනුස්සවසුතා වා. එවංසීලා සා භගිනී අහොසි ඉතිපි, එවංධම්මා -පෙ- එවංපඤ්ඤා -පෙ- එවංවිහාරිනී -පෙ- එවංවිමුත්තා සා භගිනී අහොසි ඉතිපී’ති. සා තස්සා සද්ධඤ්ච -පෙ- පඤ්ඤඤ්ච අනුස්සරන්තී තථත්තාය චිත්තං උපසංහරති. එවම්පි ඛො අනුරුද්ධා භික්ඛුනියා ඵාසුවිහාරො හොති.
ඉධානුරුද්ධා භික්ඛුනී සුණාති: ‘ඉත්ථන්නාමා භික්ඛුනී කාලකතා, සා භගවතා බ්යාකතා: ‘තිණ්ණං සංයොජනානං පරික්ඛයා රාගදොසමොහානං තනුත්තා සකදාගාමිනී, සකිදෙව ඉමං ලොකං ආගන්ත්වා දුක්ඛස්සන්තං කරිස්සතී’ති. සා ඛො පනස්සා භගිනී සාමං දිට්ඨා වා හොති අනුස්සවසුතා වා: ‘එවංසීලා සා භගිනී අහොසි ඉතිපි, එවංධම්මා -පෙ- එවංපඤ්ඤා -පෙ- එවංවිහාරිනී -පෙ- එවංවිමුත්තා සා භගිනී අහොසි ඉතිපී’ති. සා තස්සා සද්ධඤ්ච -පෙ- පඤ්ඤඤ්ච අනුස්සරන්තී තථත්තාය චිත්තං උපසංහරති. එවම්පි ඛො අනුරුද්ධා භික්ඛුනියා ඵාසුවිහාරො හොති.
ඉධානුරුද්ධා භික්ඛුනී සුණාති: ‘ඉත්ථන්නාමා භික්ඛුනී කාලකතා, සා භගවතා බ්යාකතා: තිණ්ණං සංයොජනානං පරික්ඛයා සොතාපන්නා අවිනිපාතධම්මා නියතා සම්බොධිපරායණා’ති. සා ඛො පනස්සා භගිනී සාමං දිට්ඨා වා හොති අනුස්සවසුතා වා: ‘එවංසීලා සා භගිනී අහොසි ඉතිපි, එවංධම්මා -පෙ- එවං පඤ්ඤා -පෙ- එවංවිහාරිනී -පෙ- එවං විමුත්තා සා භගිනී අහොසි ඉතිපී’ති. සා තස්සා සද්ධඤ්ච -පෙ- පඤ්ඤඤ්ච අනුස්සරන්තී තථත්තාය චිත්තං උපසංහරති. එවම්පි ඛො අනුරුද්ධා භික්ඛුනියා ඵාසුවිහාරො හොති.
ඉධානුරුද්ධා උපාසකො සුණාති: ‘ඉත්ථන්නාමො උපාසකො කාලකතො, සො භගවතා බ්යාකතො: ‘පඤ්චන්නං ඔරම්භාගියානං සංයොජනානං පරික්ඛයා ඔපපාතිකො තත්ථ පරිනිබ්බායී අනාවත්තිධම්මො තස්මා ලොකා’ති. සො ඛො පනස්ස ආයස්මා සාමං දිට්ඨො වා හොති අනුස්සවසුතො වා: ‘එවංසීලො සො ආයස්මා අහොසි ඉතිපි. එවංධම්මො සො ආයස්මා අහොසි ඉතිපි. එවංපඤ්ඤො සො ආයස්මා අහොසි ඉතිපි, එවංවිහාරී සො ආයස්මා අහොසි ඉතිපි, එවංවිමුත්තො සො ආයස්මා අහොසි ඉතිපී’ති. සො තස්ස සද්ධඤ්ච සුතඤ්ච චාගඤ්ච පඤ්ඤඤ්ච අනුස්සරන්තො තථත්තාය චිත්තං උපසංහරති. එවම්පි ඛො අනුරුද්ධා උපාසකස්ස ඵාසුවිහාරො හොති.
ඉධානුරුද්ධා උපාසකො සුණාති: ‘ඉත්ථන්නාමො උපාසකො කාලකතො, සො භගවතා බ්යාකතො: තිණ්ණං සංයොජනානං පරික්ඛයා රාගදොසමොහානං තනුත්තා සකදාගාමී, සකිදෙව ඉමං ලොකං ආගන්ත්වා දුක්ඛස්සන්තං කරිස්සතී’ති. සො ඛො පනස්ස ආයස්මා සාමං දිට්ඨො වා හොති අනුස්සවසුතො වා. එවංසීලො සො ආයස්මා අහොසි ඉතිපි, එවංධම්මො -පෙ- එවංපඤ්ඤො -පෙ- එවංවිහාරී -පෙ- එවංවිමුත්තො සො ආයස්මා අහොසි ඉතිපී’ති. සො තස්ස සද්ධඤ්ච -පෙ- පඤ්ඤඤ්ච අනුස්සරන්තො තථත්තාය චිත්තං උපසංහරති. එවම්පි ඛො අනුරුද්ධා උපාසකස්ස ඵාසුවිහාරො හොති.
ඉධානුරුද්ධා උපාසකො සුණාති: ‘ඉත්ථන්නාමො උපාසකො කාලකතො, සො භගවතා බ්යාකතො: තිණ්ණං සංයොජනානං පරික්ඛයා සොතාපන්නො අවිනිපාතධම්මො නියතො සම්බොධිපරායණො’ති. සො ඛො පනස්ස ආයස්මා සාමං දිට්ඨො වා හොති අනුස්සවසුතො වා: ‘එවංසීලො සො ආයස්මා අහොසි ඉතිපි, එවංධම්මො -පෙ- එවංපඤ්ඤා -පෙ- එවංවිහාරී -පෙ- එවංවිමුත්තො සො ආයස්මා අහොසි ඉතිපී’ති. සො තස්ස සද්ධඤ්ච -පෙ- පඤ්ඤඤ්ච අනුස්සරන්තො තථත්තාය චිත්තං උපසංහරති. එවම්පි ඛො අනුරුද්ධා උපාසකස්ස ඵාසුවිහාරො හොති.
ඉධානුරුද්ධා උපාසිකා සුණාති: ‘ඉත්ථන්නාමා උපාසිකා කාලකතා{1} සා භගවතා බ්යාකතා: පඤ්චන්නං ඔරම්භාගියානං සංයොජනානං පරික්ඛයා ඔපපාතිකා තත්ථ පරිනිබ්බායිනී අනාවත්තිධම්මා තස්මා ලොකා’ති. සා ඛො පනස්ස භගිනී සාමං දිට්ඨා වා හොති අනුස්සවසුතා වා: ‘එවංසීලා සා භගිනී අහොසි ඉතිපි, එවංධම්මා සා භගිනී අහොසි ඉතිපි, එවංපඤ්ඤා සා භගිනී අහොසි ඉතිපි, එවංවිහාරිනී සා භගිනී අහොසි ඉතිපි, එවංවිමුත්තා සා භගිනී අහොසි ඉතිපී’ති. සා තස්සා සද්ධඤ්ච සීලඤ්ච සුතඤ්ච චාගඤ්ච පඤ්ඤඤ්ච අනුස්සරන්තී තථත්තාය චිත්තං උපසංහරති. එවම්පි ඛො අනුරුද්ධා උපාසිකාය ඵාසුවිහාරො හොති.
ඉධානුරුද්ධා උපාසිකා සුණාති: ඉත්ථන්නාමා උපාසිකා කාලකතා{1} සා භගවතා බ්යාකතා: තිණ්ණං සංයොජනානං පරික්ඛයා රාගදොසමොහානං තනුත්තා සකදාගාමිනී සකිදෙව ඉමං ලොකං ආගන්ත්වා දුක්ඛස්සන්තං කරිස්සතී’ති. සා ඛො පනස්සා භගිනී සාමං දිට්ඨා වා හොති අනුස්සවසුතා වා: එවංසීලා සා භගිනී අහොසි ඉතිපි, එවංධම්මා -පෙ- එවංපඤ්ඤා -පෙ- එවංවිහාරිනී -පෙ- එවංවිමුත්තා සා භගිනී අහොසි ඉතිපී’ති. සා තස්සා සද්ධඤ්ච -පෙ- පඤ්ඤඤ්ච අනුස්සරන්තී තථත්තාය චිත්තං උපසංහරති. එවම්පි ඛො අනුරුද්ධා උපාසිකාය ඵාසුවිහාරො හොති.
ඉධානුරුද්ධා උපාසිකා සුණාති: ‘ඉත්ථන්නාමා උපාසිකා කාලකතා සා භගවතා බ්යාකතා: ‘තිණ්ණං සංයොජනානං පරික්ඛයා සොතාපන්නා අවිනිපාතධම්මා නියතා සම්බොධිපරායණා’ති. සා ඛො පනස්සා භගිනී සාමං දිට්ඨා වා හොති අනුස්සවසුතා වා: එවංසීලා සා භගිනී අහොසි ඉතිපි. එවංධම්මා සා භගිනී අහොසි ඉතිපි. එවංපඤ්ඤා සා භගිනී අහොසි ඉතිපි. එවංවිහාරිනී සා භගිනී අහොසි ඉතිපි. එවංවිමුත්තා සා භගිනී අහොසි ඉතිපී’ති. සා තස්සා සද්ධඤ්ච සීලඤ්ච සුතඤ්ච චාගඤ්ච පඤ්ඤඤ්ච අනුස්සරන්තී තථත්තාය චිත්තං උපසංහරති. එවම්පි ඛො අනුරුද්ධා උපාසිකාය ඵාසුවිහාරො හොති.
ඉති ඛො අනුරුද්ධා තථාගතො න ජනකුහනත්ථං, න ජනලපනත්ථං න ලාභසක්කාරසිලොකානිසංසත්ථං, න ඉති මං ජනො ජානාතූ’ති සාවකෙ අබ්භතීතෙ කාලකතෙ උපපත්තීසු බ්යාකරොති: ‘අසු අමුත්ර උපපන්නො අසු අමුත්ර උපපන්නො’ති. සන්ති ච ඛො අනුරුද්ධා කුලපුත්තා සද්ධා උළාරවෙදා උළාරපාමොජ්ජා. තෙ තං සුත්වා තථත්තාය චිත්තං උපසංහරන්ති. තෙසං තං අනුරුද්ධා හොති දීඝරත්තං හිතාය සුඛායාති.
ඉදමවොච භගවා. අත්තමනො ආයස්මා අනුරුද්ධො භගවතො භාසිතං අභිනන්දීති.
නළකපානසුත්තං අට්ඨමං.
2. 2. 9.
ගුලිස්සානි සුත්තං
එවං මෙ සුතං. එකං සමයං භගවා රාජගහෙ විහරති වෙළුවනෙ කලන්දකනිවාපෙ. තෙන ඛො පන සමයෙන ගුලිස්සානි{1} නාම භික්ඛු ආරඤ්ඤකො{2} පදරසමාචාරො{3} සඞ්ඝමජ්ඣෙ ඔසටො හොති කෙනචිදෙව කරණීයෙන. තත්ර ඛො ආයස්මා සාරිපුත්තො ගුලිස්සානිං භික්ඛුං ආරබ්භ භික්ඛූ ආමන්තෙසි.
ආරඤ්ඤකෙන’හාවුසො{4}, භික්ඛුනා සඞ්ඝගතෙන සඞ්ඝෙ විහරන්තෙන සබ්රහ්මචාරීසු සගාරවෙන භවිතබ්බං සප්පතිස්සෙන. සචෙ ආවුසො ආරඤ්ඤකො{2} භික්ඛු සඞ්ඝගතො සඞ්ඝෙ විහරන්තො සබ්රහ්මචාරීසු අගාරවො හොති අප්පතිස්සො. තස්ස භවන්ති වත්තාරො: ‘කිම්පනිමස්ස ආයස්මතො ආරඤ්ඤකස්ස එකස්සාරඤ්ඤෙ සෙරිවිහාරෙන, යො අයමායස්මා සබ්රහ්මචාරීසු අගාරවො{5} අප්පතිස්සො’තිස්ස{6} භවන්ති වත්තාරො. තස්මා ආරඤ්ඤකෙන භික්ඛුනා සඞ්ඝගතෙන සඞ්ඝෙ විහරන්තෙන සබ්රහ්මචාරීසු සගාරවෙන භවිතබ්බං සප්පතිස්සෙන.
ආරඤ්ඤකෙන’හාවුසො{4} භික්ඛුනා සඞ්ඝගතෙන සඞ්ඝෙ විහරන්තෙන ආසනකුසලෙන භවිතබ්බං ‘ඉති ථෙරෙ ච භික්ඛූ නානුපඛජ්ජ නිසීදිස්සාමි. නවෙ ච භික්ඛූ න ආසනෙන පටිබාහිස්සාමී’ති. සචෙ ආවුසො ආරඤ්ඤකො භික්ඛු සඞ්ඝගතො සඞ්ඝෙ විහරන්තො න ආසනකුසලො{7} හොති. තස්ස භවන්ති වත්තාරො: ‘කිම්පනිමස්ස ආයස්මතො ආරඤ්ඤකස්ස එකස්සාරඤ්ඤෙ සෙරිවිහාරෙන, යො අයමායස්මා ආභිසමාචාරිකම්පි ධම්මං න ජානාතී’තිස්ස භවන්ති වත්තාරො. තස්මා ආරඤ්ඤකෙන භික්ඛුනා සඞ්ඝගතෙන සඞ්ඝෙ විහරන්තෙන ආසනකුසලෙන භවිතබ්බං.
ආරඤ්ඤකෙන’හාවුසො{4} භික්ඛුනා සඞ්ඝගතෙන සඞ්ඝෙ විහරන්තෙන නාතිකාලෙන ගාමො පවිසිතබ්බො. නාති දිවා පටික්කමිතබ්බං. සචෙ ආවුසො ආරඤ්ඤකො භික්ඛු සඞ්ඝගතො සඞ්ඝෙ විහරන්තො අතිකාලෙන ගාමං පවිසති. අතිදිවා{8} පටික්කමති. තස්ස භවන්ති වත්තාරො. කිම්පනිමස්ස ආයස්මතො ආරඤ්ඤකස්ස එකස්සාරඤ්ඤෙ සෙරිවිහාරෙන, යො අයමායස්මා අතිකාලෙන ගාමං පවිසති, අතිදිවා පටික්කමතී’තිස්ස{6} භවන්ති වත්තාරො. තස්මා ආරඤ්ඤකෙන භික්ඛුනා සඞ්ඝගතෙන සඞ්ඝෙ විහරන්තෙන නාතිකාලෙන ගාමො පවිසිතබ්බො. නාති දිවා පටික්කමිතබ්බං.
ආරඤ්ඤකෙන’හාවුසො භික්ඛුනා සඞ්ඝගතෙන සඞ්ඝෙ විහරන්තෙන න පුරෙභත්තං පච්ඡාභත්තං කුලෙසු චාරිත්තං ආපජ්ජිතබ්බං. සචෙ ආවුසො ආරඤ්ඤකො{1} භික්ඛු සඞ්ඝගතො සඞ්ඝෙ විහරන්තො පුරෙභත්තං පච්ඡාභත්තං කුලෙසු චාරිත්තං ආපජ්ජති, තස්ස භවන්ති වත්තාරො: අයන්නූනිමස්සායස්මතො ආරඤ්ඤකස්ස එකස්සාරඤ්ඤෙ සෙරිවිහාරෙන විහරතො විකාලචරියා බහුලීකතා, තමෙනං සඞ්ඝගතම්පි සමුදාචරතී’තිස්ස{2} භවන්ති වත්තාරො. තස්මා ආරඤ්ඤකෙන භික්ඛුනා සඞ්ඝගතෙන සඞ්ඝෙ විහරන්තෙන න පුරෙභත්තං පච්ඡාභත්තං කුලෙසු චාරිත්තං ආපජ්ජිතබ්බං.
ආරඤ්ඤකෙන’හාවුසො භික්ඛුනා සඞ්ඝගතෙන සඞ්ඝෙ විහරන්තෙන අනුද්ධතෙන භවිතබ්බං අචපලෙන. සචෙ ආවුසො ආරඤ්ඤකො භික්ඛු සඞ්ඝගතො සඞ්ඝෙ විහරන්තො උද්ධතො හොති. චපලො තස්ස භවන්ති වත්තාරො: ‘ඉදන්නූනිමස්සායස්මතො ආරඤ්ඤකස්ස එකස්සාරඤ්ඤෙ සෙරිවිහාරෙන විහරතො උද්ධච්චං චාපල්යං බහුලීකතං, තමෙනං සඞ්ඝගතම්පි සමුදාචරතී’තිස්ස භවන්ති වත්තාරො. තස්මා ආරඤ්ඤකෙන භික්ඛුනා සඞ්ඝගතෙන සඞ්ඝෙ විහරන්තෙන අනුද්ධතෙන භවිතබ්බං අචපලෙන.
ආරඤ්ඤකෙන’හාවුසො භික්ඛුනා සඞ්ඝගතෙන සඞ්ඝෙ විහරන්තෙන අමුඛරෙන භවිතබ්බං අවිකිණ්ණවාචෙන. සචෙ ආවුසො ආරඤ්ඤකො භික්ඛු සඞ්ඝගතො සඞ්ඝෙ විහරන්තො මුඛරො හොති විකිණ්ණවාචො. තස්ස භවන්ති වත්තාරො: ‘කිම්පනිමස්සායස්මතො ආරඤ්ඤකස්ස එකස්සාරඤ්ඤෙ සෙරිවිහාරෙන, යො අයමායස්මා මුඛරො විකිණ්ණවාචො’තිස්ස භවන්ති වත්තාරො. තස්මා ආරඤ්ඤකෙන භික්ඛුනා සඞ්ඝගතෙන සඞ්ඝෙ විහරන්තෙන අමුඛරෙන භවිතබ්බං අවිකිණ්ණවාචෙන.
ආරඤ්ඤකෙන’හාවුසො භික්ඛුනා සඞ්ඝගතෙන සඞ්ඝෙ විහරන්තෙන සුබ්බචෙන{3} භවිතබ්බං කල්යාණමිත්තෙන. සචෙ ආවුසො ආරඤ්ඤකො භික්ඛු සඞ්ඝගතො සඞ්ඝෙ විහරන්තො දුබ්බචො හොති පාපමිත්තො, තස්ස භවන්ති වත්තාරො: ‘කිම්පනිමස්සායස්මතො ආරඤ්ඤකස්ස එකස්සාරඤ්ඤෙ සෙරිවිහාරෙන. යො අයමායස්මා දුබ්බචො පාපමිත්තොතිස්ස භවන්ති වත්තාරො. තස්මා ආරඤ්ඤකෙන භික්ඛුනා සඞ්ඝගතෙන සඞ්ඝෙ විහරන්තෙන සුබ්බචෙන{3} භවිතබ්බං කල්යාණමිත්තෙන.
ආරඤ්ඤකෙන’හාවුසො භික්ඛුනා ඉන්ද්රියෙසු ගුත්තද්වාරෙන භවිතබ්බං. සචෙ ආවුසො ආරඤ්ඤකො භික්ඛු ඉන්ද්රියෙසු අගුත්තද්වාරො හොති, තස්ස භවන්ති වත්තාරො: කිම්පනිමස්සායස්මතො ආරඤ්ඤකස්ස එකස්සාරඤ්ඤෙ සෙරිවිහාරෙන, යො අයමායස්මා ඉන්ද්රියෙසු අගුත්තද්වාරො’තිස්ස භවන්ති වත්තාරො. තස්මා ආරඤ්ඤකෙන භික්ඛුනා ඉන්ද්රියෙසු ගුත්තද්වාරෙන භවිතබ්බං.
ආරඤ්ඤකෙන’හාවුසො භික්ඛුනා භොජනෙ මත්තඤ්ඤුනා භවිතබ්බං. සචෙ ආවුසො ආරඤ්ඤකො භික්ඛු භොජනෙ අමත්තඤ්ඤූ හොති, තස්ස භවන්ති වත්තාරො: කිම්පනිමස්සායස්මතො ආරඤ්ඤකස්ස එකස්සාරඤ්ඤෙ සෙරිවිහාරෙන, යො අයමායස්මා භොජනෙ අමත්තඤ්ඤූ’තිස්ස{1} භවන්ති වත්තාරො. තස්මා ආරඤ්ඤකෙන භික්ඛුනා භොජනෙ මත්තඤ්ඤුනා භවිතබ්බං.
ආරඤ්ඤකෙන’හාවුසො භික්ඛුනා ජාගරියං අනුයුත්තෙන භවිතබ්බං. සචෙ ආවුසො ආරඤ්ඤකො භික්ඛු ජාගරියං අනනුයුත්තො හොති, තස්ස භවන්ති වත්තාරො: කිම්පනිමස්සායස්මතො ආරඤ්ඤකස්ස එකස්සාරඤ්ඤෙ සෙරිවිහාරෙන, යො අයමායස්මා ජාගරියං අනනුයුත්තොතිස්ස භවන්ති වත්තාරො. තස්මා ආරඤ්ඤකෙන භික්ඛුනා ජාගරියං අනුයුත්තෙන භවිතබ්බං.
ආරඤ්ඤකෙන’හාවුසො භික්ඛුනා ආරද්ධවිරියෙන භවිතබ්බං. සචෙ ආවුසො ආරඤ්ඤකො භික්ඛු කුසීතො හොති. තස්ස භවන්ති වත්තාරො: කිම්පනිමස්සායස්මතො ආරඤ්ඤකස්ස එකස්සාරඤ්ඤෙ සෙරිවිහාරෙන, යො අයමායස්මා කුසීතො’තිස්ස භවන්ති වත්තාරො. තස්මා ආරඤ්ඤකෙන භික්ඛුනා ආරද්ධවිරියෙන භවිතබ්බං.
ආරඤ්ඤකෙන’හාවුසො භික්ඛුනා උපට්ඨිතසතිනා{2} භවිතබ්බං. සචෙ ආවුසො ආරඤ්ඤකො භික්ඛු මුට්ඨස්සති හොති, තස්ස භවන්ති වත්තාරො: කිම්පනිමස්සායස්මතො ආරඤ්ඤකස්ස එකස්සාරඤ්ඤෙ සෙරිවිහාරෙන, යො අයමායස්මා මුට්ඨස්සතී’තිස්ස භවන්ති වත්තාරො. තස්මා ආරඤ්ඤකෙන භික්ඛුනා උපට්ඨිතසතිනා භවිතබ්බං.
ආරඤ්ඤකෙන’හාවුසො භික්ඛුනා සමාහිතෙන භවිතබ්බං. සචෙ ආවුසො ආරඤ්ඤකො භික්ඛු අසමාහිතො හොති, තස්ස භවන්ති වත්තාරො: කිම්පනිමස්සායස්මතො ආරඤ්ඤකස්ස එකස්සාරඤ්ඤෙ සෙරිවිහාරෙන, යො අයමායස්මා අසමාහිතො’තිස්ස භවන්ති වත්තාරො. තස්මා ආරඤ්ඤකෙන භික්ඛුනා සමාහිතෙන භවිතබ්බං.
ආරඤ්ඤකෙන’හාවුසො භික්ඛුනා පඤ්ඤවතා භවිතබ්බං. සචෙ ආවුසො ආරඤ්ඤකො භික්ඛු දුප්පඤ්ඤො හොති, තස්ස භවන්ති වත්තාරො: කිම්පනිමස්සායස්මතො ආරඤ්ඤකස්ස එකස්සාරඤ්ඤෙ සෙරිවිහාරෙන, යො අයමායස්මා දුප්පඤ්ඤො’තිස්ස භවන්ති වත්තාරො. තස්මා ආරඤ්ඤකෙන භික්ඛුනා පඤ්ඤවතා භවිතබ්බං.
ආරඤ්ඤකෙන’හාවුසො භික්ඛුනා අභිධම්මෙ අභිවිනයෙ යොගො කරණීයො. සන්තාවුසො ආරඤ්ඤකං භික්ඛුං අභිධම්මෙ අභිවිනයෙ පඤ්හං පුච්ඡිතාරො. සචෙ ආවුසො ආරඤ්ඤකො භික්ඛු අභිධම්මෙ අභිවිනයෙ පඤ්හං පුට්ඨො න සම්පායති, තස්ස භවන්ති වත්තාරො: කිම්පනිමස්සායස්මතො ආරඤ්ඤකස්ස එකස්සාරඤ්ඤෙ සෙරිවිහාරෙන, යො අයමායස්මා අභිධම්මෙ අභිවිනයෙ පඤ්හං පුට්ඨො න සම්පායතී’තිස්ස භවන්ති වත්තාරො. තස්මා ආරඤ්ඤකෙන භික්ඛුනා අභිධම්මෙ අභිවිනයෙ යොගො කරණීයො.
ආරඤ්ඤකෙන’හාවුසො භික්ඛුනා යෙ තෙ සන්තා විමොක්ඛා අතික්කම්ම රූපෙ ආරුප්පා, තත්ථ යොගො කරණීයො. සන්තාවුසො ආරඤ්ඤකං භික්ඛුං යෙ තෙ සන්තා විමොක්ඛා අතික්කම්ම රූපෙ ආරුප්පා, තත්ථ පඤ්හං පුච්ඡිතාරො. සචෙ ආවුසො ආරඤ්ඤකො භික්ඛු යෙ තෙ සන්තා විමොක්ඛා අතික්කම්ම රූපෙ ආරුප්පා තත්ථ පඤ්හං පුට්ඨො න සම්පායති, තස්ස භවන්ති වත්තාරො: කිම්පනිමස්සායස්මතො ආරඤ්ඤකස්ස එකස්සාරඤ්ඤෙ සෙරිවිහාරෙන, යො අයමායස්මා යෙ තෙ සන්තා විමොක්ඛා අතික්කම්ම රූපෙ ආරුප්පා, තත්ථ පඤ්හං පුට්ඨො න සම්පායතී’තිස්ස භවන්ති වත්තාරො. තස්මා ආරඤ්ඤකෙන භික්ඛුනා යෙ තෙ සන්තා විමොක්ඛා අතික්කම්ම රූපෙ ආරුප්පා, තත්ථ යොගො කරණීයො.
ආරඤ්ඤකෙන’හාවුසො භික්ඛුනා උත්තරිමනුස්සධම්මෙ යොගො කරණීයො. සන්තාවුසො ආරඤ්ඤකං භික්ඛුං උත්තරිමනුස්සධම්මෙ පඤ්හං පුච්ඡිතාරො. සචෙ ආවුසො ආරඤ්ඤකො භික්ඛු උත්තරිමනුස්සධම්මෙ පඤ්හං පුට්ඨො න සම්පායති, තස්ස භවන්ති වත්තාරො: කිම්පනිමස්සායස්මතො ආරඤ්ඤකස්ස එකස්සාරඤ්ඤෙ සෙරිවිහාරෙන යො අයමායස්මා යස්සත්ථාය පබ්බජිතො තමත්ථං න ජානාතී’තිස්ස භවන්ති වත්තාරො. තස්මා ආරඤ්ඤකෙන භික්ඛුනා උත්තරිමනුස්සධම්මෙ යොගො කරණීයොති.
එවං වුත්තෙ ආයස්මා මහාමොග්ගල්ලානො ආයස්මන්තං සාරිපුත්තං එතදවොච: ආරඤ්ඤකෙනෙව නු ඛො ආවුසො සාරිපුත්ත භික්ඛුනා ඉමෙ ධම්මා සමාදාය වත්තිතබ්බා උදාහු ගාමන්තවිහාරිනාපීති. ආරඤ්ඤකෙනාපි ඛො ආවුසො මොග්ගල්ලාන භික්ඛුනා ඉමෙ ධම්මා සමාදාය වත්තිතබ්බා. පගෙව ගාමන්තවිහාරිනාති.
ගුලිස්සානි සුත්තං නවමං.
2. 2. 10.
කීටාගිරි සුත්තං
එවං මෙ සුතං එකං සමයං භගවා කාසීසු චාරිකං චරති මහතා භික්ඛුසඞ්ඝෙන සද්ධිං. තත්ර ඛො භගවා භික්ඛූ ආමන්තෙසි: අහං ඛො භික්ඛවෙ, අඤ්ඤත්රෙව රත්තිභොජනා භුඤ්ජාමි. අඤ්ඤත්ර ඛො පනාහං භික්ඛවෙ, රත්තිභොජනා භුඤ්ජමානො අප්පාබාධතඤ්ච සඤ්ජානාමි අප්පාතඞ්කතඤ්ච ලහුට්ඨානඤ්ච බලඤ්ච ඵාසුවිහාරඤ්ච. එථ තුම්හෙපි භික්ඛවෙ අඤ්ඤත්රෙව රත්තිභොජනා භුඤ්ජථ. අඤ්ඤත්ර ඛො පන භික්ඛවෙ, තුම්හෙපි රත්තිභොජනා භුඤ්ජමානා අප්පාබාධතඤ්ච සඤ්ජානිස්සථ අප්පාතඞ්කතඤ්ච ලහුට්ඨානඤ්ච බලඤ්ච ඵාසුවිහාරඤ්චා’ති. එවම්භන්තෙති ඛො තෙ භික්ඛූ භගවතො පච්චස්සොසුං. අථ ඛො භගවා කාසීසු අනුපුබ්බෙන චාරිකං චරමානො යෙන කීටාගිරි නාම කාසීනං නිගමො තදවසරි. තත්ර සුදං භගවා කීටාගිරිස්මිං විහරති කාසීනං නිගමෙ.
තෙන ඛො පන සමයෙන අස්සජිපුනබ්බසුකා නාම භික්ඛූ කීටාගිරිස්මිං ආවාසිකා හොන්ති. අථ ඛො සම්බහුලා භික්ඛූ යෙන අස්සජිපුනබ්බසුකා භික්ඛූ තෙනුපසඞ්කමිංසු. උපසඞ්කමිත්වා අස්සජිපුනබ්බසුකෙ භික්ඛූ එතදවොචුං: භගවා ඛො ආවුසො, අඤ්ඤත්රෙව රත්තිභොජනා භුඤ්ජති භික්ඛුසඞ්ඝො ච. අඤ්ඤත්ර ඛො පනාවුසො, රත්තිභොජනා භුඤ්ජමානා අප්පාබාධතඤ්ච සඤ්ජානන්ති අප්පාතඞ්කතඤ්ච ලහුට්ඨානඤ්ච බලඤ්ච ඵාසුවිහාරඤ්ච. එථ තුම්හෙපි ආවුසො, අඤ්ඤත්රෙව රත්තිභොජනා භුඤ්ජථ. අඤ්ඤත්ර ඛො පනාවුසො, තුම්හෙපි රත්තිභොජනා භුඤ්ජමානා අප්පාබාධතඤ්ච සඤ්ජානිස්සථ, අප්පාතඞ්කතඤ්ච ලහුට්ඨානඤ්ච බලඤ්ච ඵාසුවිහාරඤ්චා’ති. එවං වුත්තෙ අස්සජිපුනබ්බසුකා භික්ඛූ තෙ භික්ඛූ එතදවොචුං: ‘මයං ඛො ආවුසො, සායඤ්චෙව භුඤ්ජාම පාතො ච දිවා ච විකාලෙ. තෙ මයං සායඤ්චෙව භුඤ්ජමානා පාතො ච දිවා ච විකාලෙ අප්පාබාධතඤ්ච සඤ්ජානාම අප්පාතඞ්කතඤ්ච ලහුට්ඨානඤ්ච බලඤ්ච ඵාසුවිහාරඤ්ච. තෙ මයං කිං සන්දිට්ඨිකං හිත්වා කාලිකං අනුධාවිස්සාම, සායඤ්චෙව මයං භුඤ්ජිස්සාම පාතො ච දිවා ච විකාලෙ’ති. යතො ඛො තෙ භික්ඛූ නාසක්ඛිංසු අස්සජිපුනබ්බසුකෙ භික්ඛූ සඤ්ඤාපෙතුං, අථ යෙන භගවා තෙනුපසඞ්කමිංසු. උපසඞ්කමිත්වා භගවන්තං අභිවාදෙත්වා එකමන්තං නිසීදිංසු. එකමන්තං නිසින්නා ඛො තෙ භික්ඛූ භගවන්තං එතදවොචුං.
ඉධ මයං භන්තෙ යෙන අස්සජිපුනබ්බසුකා භික්ඛූ තෙනුපසඞ්කමිම්හ. උපසඞ්කමිත්වා අස්සජිපුනබ්බසුකෙ භික්ඛූ එතදවොචුම්හ: ‘භගවා ඛො ආවුසො, අඤ්ඤත්රෙව රත්තිභොජනා භුඤ්ජති ..... පෙ..... ඵාසුවිහාරඤ්චා’ති. එවං වුත්තෙ භන්තෙ, අස්සජිපුනබ්බසුකා භික්ඛූ අම්හෙ එතදවොචුං: ‘මයං ඛො ආවුසො, ..... පෙ..... දිවා ච විකාලෙ’ති. යතො ඛො මයං භන්තෙ, නාසක්ඛිම්හ අස්සජිපුනබ්බසුකෙ භික්ඛූ සඤ්ඤාපෙතුං. අථ මයං එතමත්ථ භගවතො ආරොචෙමා”ති.
අථ ඛො භගවා අඤ්ඤතරං භික්ඛුං ආමන්තෙසි: ‘එහි ත්වං භික්ඛු, මම වචනෙන අස්සජිපුනබ්බසුකෙ භික්ඛූ ආමන්තෙහි, සත්ථායස්මන්තෙ ආමන්තෙතී’ති. එවම්භන්තෙති ඛො සො භික්ඛු භගවතො පටිස්සුත්වා යෙන අස්සජිපුනබ්බසුකා භික්ඛූ තෙනුපසඞ්කමි. උපසඞ්කමිත්වා අස්සජිපුනබ්බසුකෙ භික්ඛූ එතදවොච: ‘සත්ථායස්මන්තෙ ආමන්තෙතී’ති. එවමාවුසොති ඛො අස්සජිපුනබ්බසුකා භික්ඛූ තස්ස භික්ඛුනො පටිස්සුත්වා යෙන භගවා තෙනුපසඞ්කමිංසු. උපසඞ්කමිත්වා භගවන්තං අභිවාදෙත්වා එකමන්තං නිසීදිංසු. එකමන්තං නිසින්නෙ ඛො අස්සජිපුනබ්බසුකෙ භික්ඛූ භගවා එතදවොච,
‘සච්චං කිර භික්ඛවෙ, සම්බහුලා භික්ඛූ තුම්හෙ උපසඞ්කමිත්වා එතදවොචුං: භගවා ඛො ආවුසො අඤ්ඤත්රෙව රත්තිභොජනා භුඤ්ජති භික්ඛුසඞ්ඝො ච. අඤ්ඤත්ර ඛො පනාවුසො, රත්තිභොජනා භුඤ්ජමානා අප්පාබාධතඤ්ච සඤ්ජානන්ති අප්පාතඞ්කතඤ්ච ලහුට්ඨානඤ්ච බලඤ්ච ඵාසුවිහාරඤ්ච, එථ තුම්හෙපි ආවුසො, අඤ්ඤත්රෙව රත්තිභොජනා භුඤ්ජථ, අඤ්ඤත්ර ඛො පනාවුසො, තුම්හෙපි රත්තිභොජනා භුඤ්ජමානා අප්පාබාධතඤ්ච සඤ්ජානිස්සථ අප්පාතඞ්කතඤ්ච ලහුට්ඨානඤ්ච බලඤ්ච ඵාසුවිහාරඤ්චා’ති. එවං වුත්තෙ කිර භික්ඛවෙ, තුම්හෙ තෙ භික්ඛූ එවං අවචුත්ථ: ‘මයං ඛො ආවුසො, සායඤ්චෙව භුඤ්ජාම පාතො ච දිවා ච විකාලෙ, තෙ මයං සායඤ්චෙව භුඤ්ජමානා පාතො ච දිවා ච විකාලෙ, අප්පාබාධතඤ්ච සඤ්ජානාම අප්පාතඞ්කතඤ්ච ලහුට්ඨානඤ්ච බලඤ්ච ඵාසුවිහාරඤ්ච, තෙ මයං කිං සන්දිට්ඨිකං හිත්වා කාලිකං අනුධාවිස්සාම, සායඤ්චෙව මයං භුඤ්ජිස්සාම පාතො ච දිවා ච විකාලෙ’ති. එවම්භන්තෙ.
කින්නු මෙ තුම්හෙ භික්ඛවෙ, එවං ධම්මං දෙසිතං ආජානාථ. යං කිඤ්චායං පුරිසපුග්ගලො පටිසංවෙදෙති සුඛං වා දුක්ඛං වා අදුක්ඛමසුඛං වා, තස්ස අකුසලා ධම්මා පරිහායන්ති, කුසලා ධම්මා අභිවඩ්ඪන්තී’ති. නො’හෙතං භන්තෙ. නනු මෙ තුම්හෙ භික්ඛවෙ, එවං ධම්මං දෙසිතං ආජානාථ, ‘ඉධෙකච්චස්ස යං එවරූපං සුඛං වෙදනං වෙදියතො{1} අකුසලා ධම්මා අභිවඩ්ඪන්ති. කුසලා ධම්මා පරිහායන්ති. ඉධ පනෙකච්චස්ස එවරූපං සුඛං වෙදනං වෙදියතො{1} අකුසලා ධම්මා පරිහායන්ති. කුසලා ධම්මා අභිවඩ්ඪන්ති. ඉධෙකච්චස්ස එවරූපං දුක්ඛං වෙදනං වෙදියතො{1} අකුසලා ධම්මා අභිවඩ්ඪන්ති. කුසලා ධම්මා පරිහායන්ති. ඉධ පනෙකච්චස්ස එවරූපං දුක්ඛං වෙදනං වෙදියතො අකුසලා ධම්මා පරිහායන්ති. කුසලා ධම්මා අභිවඩ්ඪන්ති. ඉධෙකච්චස්ස එවරූපං අදුක්ඛමසුඛං වෙදනං වෙදියතො අකුසලා ධම්මා අභිවඩ්ඪන්ති, කුසලා ධම්මා පරිහායන්ති. ඉධ පනෙකච්චස්ස එවරූපං අදුක්ඛමසුඛං වෙදනං වෙදියතො අකුසලා ධම්මා පරිහායන්ති. කුසලා ධම්මා අභිවඩ්ඪන්තීති එවම්භන්තෙ.
සාධු භික්ඛවෙ, මයා’චෙතං භික්ඛවෙ, අඤ්ඤාතං අභවිස්ස අදිට්ඨං අවිදිතං අසච්ඡිකතං අඵස්සිතං පඤ්ඤාය: ඉධෙකච්චස්ස එවරූපං සුඛං වෙදනං වෙදියතො අකුසලාධම්මා අභිවඩ්ඪන්ති. කුසලා ධම්මා පරිහායන්තීති. එවමහං අජානන්තො ‘එවරූපං සුඛං වෙදනං පජහථා’ති වදෙය්යං, අපි නු මෙ එතං භික්ඛවෙ පතිරූපං අභවිස්සා’ති. නො හෙතං භන්තෙ, යස්මා ච ඛො එතං භික්ඛවෙ, මයා ඤාතං දිට්ඨං විදිතං සච්ඡිකතං ඵස්සිතං පඤ්ඤාය, ‘ඉධෙකච්චස්ස එවරූපං සුඛං වෙදනං වෙදියතො අකුසලා ධම්මා අභිවඩ්ඪන්ති, කුසලා ධම්මා පරිහායන්තී’ති. තස්මාහං ‘එවරූපං සුඛං වෙදනං පජහථා’ති වදාමි.
මයා’චෙතං භික්ඛවෙ, අඤ්ඤාතං අභවිස්ස අදිට්ඨං අවිදිතං අසච්ඡිකතං අඵස්සිතං පඤ්ඤාය: ‘ඉධෙකච්චස්ස එවරූපං සුඛං වෙදනං වෙදියතො අකුසලා ධම්මා පරිහායන්ති, කුසලා ධම්මා අභිවඩ්ඪන්තී’ති. එවමහං අජානන්තො ‘එවරූපං සුඛං වෙදනං උපසම්පජ්ජ විහරථා’ති වදෙය්යං. අපි නු මෙ එතං භික්ඛවෙ, පතිරූපං අභවිස්සාති. නො හෙතං භන්තෙ. ‘යස්මා ච ඛො එතං භික්ඛවෙ මයා ඤාතං දිට්ඨං විදිතං සච්ඡිකතං ඵස්සිතං පඤ්ඤාය ‘ඉධෙකච්චස්ස එවරූපං සුඛං වෙදනං වෙදියතො අකුසලා ධම්මා පරිහායන්ති, කුසලා ධම්මා අභිවඩ්ඪන්තී’ති. තස්මාහං එවරූපං සුඛං වෙදනං උපසම්පජ්ජ විහරථා’ති වදාමි.
මයා’චෙතං භික්ඛවෙ, අඤ්ඤාතං අභවිස්ස අදිට්ඨං අවිදිතං අසච්ඡිකතං අඵස්සිතං පඤ්ඤාය ‘ඉධෙකච්චස්ස එවරූපං දුක්ඛං වෙදනං වෙදියතො අකුසලා ධම්මා අභිවඩ්ඪන්ති, කුසලා ධම්මා පරිහායන්තී’ති. එවමහං අජානන්තො ‘එවරූපං දුක්ඛං වෙදනං පජහථා’ති වදෙය්යං, අපි නු මෙ එතං භික්ඛවෙ, පතිරූපං අභවිස්සා’ති. නො’හෙතං භන්තෙ. යස්මා ච ඛො එතං භික්ඛවෙ, මයා ඤාතං දිට්ඨං විදිතං සච්ඡිකතං ඵස්සිතං පඤ්ඤාය ‘ඉධෙකච්චස්ස එවරූපං දුක්ඛං වෙදනං වෙදියතො අකුසලා ධම්මා අභිවඩ්ඪන්ති, කුසලා ධම්මා පරිහායන්තී’ති, තස්මාහං එවරූපං දුක්ඛං වෙදනං පජහථාති වදාමි.
මයා’චෙතං භික්ඛවෙ, අඤ්ඤාතං අභවිස්ස අදිට්ඨං අවිදිතං අසච්ඡිකතං අඵස්සිතං පඤ්ඤාය: ‘ඉධෙකච්චස්ස එවරූපං දුක්ඛං වෙදනං වෙදියතො අකුසලා ධම්මා පරිහායන්ති, කුසලා ධම්මා අභිවඩ්ඪන්තී’ති. එවමහං අජානන්තො ‘එවරූපං දුක්ඛං වෙදනං උපසම්පජ්ජ විහරථා’ති වදෙය්යං ‘අපි නු මෙ එතං භික්ඛවෙ, පතිරූපං අභවිස්සා’ති. නො හෙතම්භන්තෙ, යස්මා ච ඛො එතං භික්ඛවෙ, මයා ඤාතං දිට්ඨං විදිතං සච්ඡිකතං ඵස්සිතං පඤ්ඤාය: ‘ඉධෙකච්චස්ස එවරූපං දුක්ඛං වෙදනං වෙදියතො අකුසලා ධම්මා පරිහායන්ති, කුසලා ධම්මා අභිවඩ්ඪන්තී’ති. තස්මාහං ‘එවරූපං දුක්ඛං වෙදනං උපසම්පජ්ජ විහරථා’ති වදාමි.
මයා චෙතං භික්ඛවෙ, අඤ්ඤාතං අභවිස්ස අදිට්ඨං අවිදිතං අසච්ඡිකතං අඵස්සිතං පඤ්ඤාය: ඉධෙකච්චස්ස එවරූපං අදුක්ඛමසුඛං වෙදනං වෙදියතො අකුසලා ධම්මා අභිවඩ්ඪන්ති, කුසලා ධම්මා පරිහායන්තී’ති. එවමහං අජානන්තො එවරූපං අදුක්ඛමසුඛං වෙදනං පජහථා’ති වදෙය්යං. අපි නු මෙ එතං භික්ඛවෙ, පතිරූපං අභවිස්සා’ති. නො හෙතම්භන්තෙ. යස්මා ච ඛො එතං භික්ඛවෙ, මයා ඤාතං දිට්ඨං විදිතං සච්ඡිකතං ඵස්සිතං පඤ්ඤාය: ඉධෙකච්චස්ස එවරූපං අදුක්ඛමසුඛං වෙදනං වෙදියතො අකුසලා ධම්මා අභිවඩ්ඪන්ති. කුසලා ධම්මා පරිහායන්තී’ති. තස්මාහං එවරූපං අදුක්ඛමසුඛං වෙදනං පජහථා’ති වදාමි.
මයා චෙතං භික්ඛවෙ, අඤ්ඤාතං අභවිස්ස අදිට්ඨං අවිදිතං අසච්ඡිකතං අඵස්සිතං පඤ්ඤාය: ‘ඉධෙකච්චස්ස එවරූපං අදුක්ඛමසුඛං වෙදනං වෙදියතො අකුසලා ධම්මා පරිහායන්ති, කුසලා ධම්මා අභිවඩ්ඪන්තී’ති. එවමහං අජානන්තො එවරූපං අදුක්ඛමසුඛං වෙදනං උපසම්පජ්ජ විහරථා’ති වදෙය්යං අපි නු මෙ එතං භික්ඛවෙ, පතිරූපං අභවිස්සාති. නො හෙතං භන්තෙ. යස්මා ච ඛො එතං භික්ඛවෙ මයා ඤාතං දිට්ඨං විදිතං සච්ඡිකතං ඵස්සිතං පඤ්ඤාය, ඉධෙකච්චස්ස එවරූපං අදුක්ඛමසුඛං වෙදනං වෙදියතො අකුසලා ධම්මා පරිහායන්ති, කුසලා ධම්මා අභිවඩ්ඪන්තී’ති, තස්මාහං එවරූපං අදුක්ඛමසුඛං වෙදනං උපසම්පජ්ජ විහරථා’ති වදාමි.
නාහං භික්ඛවෙ, සබ්බෙසංයෙව භික්ඛූනං අප්පමාදෙන කරණීයන්ති වදාමි. න පනාහං භික්ඛවෙ, සබ්බෙසංයෙව භික්ඛූනං නාප්පමාදෙන කරණීයන්ති වදාමි. යෙ තෙ භික්ඛවෙ, භික්ඛූ අරහන්තො ඛීණාසවා වුසිතවන්තො කතකරණීයා ඔහිතභාරා අනුප්පත්තසදත්ථා පරික්ඛීණභවසඤ්ඤොජනා සම්මදඤ්ඤා විමුත්තා. තථාරූපානාහං භික්ඛවෙ, භික්ඛූනං නාප්පමාදෙන කරණීයන්ති වදාමි. තං කිස්ස හෙතු: කතං තෙසං අප්පමාදෙන අභබ්බා තෙ පමජ්ජිතුං.
යෙ ච ඛො තෙ භික්ඛවෙ, භික්ඛූ සෙක්ඛා අප්පත්තමානසා අනුත්තරං යොගක්ඛෙමං පත්ථයමානා විහරන්ති. තථාරූපානාහං භික්ඛවෙ, භික්ඛූනං අප්පමාදෙන කරණීය’න්ති වදාමි. තං කිස්ස හෙතු: අප්පෙවනාමිමෙ ආයස්මන්තො අනුලොමිකානි සෙනාසනානි පටිසෙවමානා කල්යාණමිත්තෙ භජමානා ඉන්ද්රියානි සමන්නානයමානා යස්සත්ථාය කුලපුත්තා සම්මදෙව අගාරස්මා අනගාරියං පබ්බජන්ති, තදනුත්තරං බ්රහ්මචරියපරියොසානං දිට්ඨෙව ධම්මෙ සයං අභිඤ්ඤා සච්ඡිකත්වා උපසම්පජ්ජ විහරෙය්යු’න්ති. ඉමං ඛො අහං භික්ඛවෙ, ඉමෙසං භික්ඛූනං අප්පමාදඵලං සම්පස්සමානො අප්පමාදෙන කරණීයන්ති වදාමි.
සත්තිමෙ භික්ඛවෙ, පුග්ගලා සන්තො සංවිජ්ජමානා ලොකස්මිං. කතමෙ සත්ත: උභතොභාගවිමුත්තො පඤ්ඤාවිමුත්තො කායසක්ඛි දිට්ඨප්පත්තො{1} සද්ධාවිමුත්තො ධම්මානුසාරී සද්ධානුසාරී.
කතමො ච භික්ඛවෙ, පුග්ගලො උභතොභාගවිමුත්තො: ඉධ භික්ඛවෙ, එකච්චො පුග්ගලො යෙ තෙ සන්තා විමොක්ඛා අතික්කම්ම රූපෙ ආරුප්පා තෙ කායෙන ඵස්සිත්වා{2} විහරති, පඤ්ඤාය චස්ස දිස්වා ආසවා පරික්ඛීණා හොන්ති. අයං වුච්චති භික්ඛවෙ, පුග්ගලො උභතොභාගවිමුත්තො. ඉමස්ස ඛො අහං භික්ඛවෙ, භික්ඛුනො න අප්පමාදෙන කරණීයන්ති වදාමි. තං කිස්ස හෙතු: කතං තස්ස අප්පමාදෙන. අභබ්බො සො පමජ්ජිතුං.
කතමො ච භික්ඛවෙ, පුග්ගලො පඤ්ඤාවිමුත්තො: ඉධ භික්ඛවෙ, එකච්චො පුග්ගලො යෙ තෙ සන්තා විමොක්ඛා අතික්කම්ම රූපෙ ආරුප්පා තෙ න කායෙන ඵස්සිත්වා{1} විහරති, පඤ්ඤාය චස්ස දිස්වා ආසවා පරික්ඛීණා හොන්ති. අයං වුච්චති භික්ඛවෙ, පුග්ගලො පඤ්ඤාවිමුත්තො. ඉමස්සපි ඛො අහං භික්ඛවෙ, භික්ඛුනො න අප්පමාදෙන කරණීයන්ති වදාමි. තං කිස්ස හෙතු: කතං තස්ස අප්පමාදෙන, අභබ්බො සො පමජ්ජිතුං.
කතමො ච භික්ඛවෙ, පුග්ගලො කායසක්ඛී: ඉධ භික්ඛවෙ, එකච්චො පුග්ගලො යෙ තෙ සන්තා විමොක්ඛා අතික්කම්ම රූපෙ ආරුප්පා තෙ න කායෙන ඵස්සිත්වා{1} විහරති, පඤ්ඤාය චස්ස දිස්වා එකච්චෙ ආසවා පරික්ඛීණා හොන්ති. අයං වුච්චති භික්ඛවෙ, පුග්ගලො කායසක්ඛි. ඉමස්ස ඛො අහං භික්ඛවෙ, භික්ඛුනො අප්පමාදෙන කරණීයන්ති වදාමි. තං කිස්ස හෙතු: අප්පෙවනාම අයමායස්මා අනුලොමිකානි සෙනාසනානි පටිසෙවමානො කල්යාණමිත්තෙ භජමානො ඉන්ද්රියානි සමන්නානයමානො යස්සත්ථාය කුලපුත්තා සම්මදෙව අගාරස්මා අනගාරියං පබ්බජන්ති, තදනුත්තරං බ්රහ්මචරියපරියොසානං දිට්ඨෙව ධම්මෙ සයං අභිඤ්ඤා සච්ඡිකත්වා උපසම්පජ්ජ විහරෙය්යාති. ඉමං ඛො අහං භික්ඛවෙ, ඉමස්ස භික්ඛුනො අප්පමාදඵලං සම්පස්සමානො අප්පමාදෙන කරණීයන්ති වදාමි.
කතමො ච භික්ඛවෙ, පුග්ගලො දිට්ඨප්පත්තො{2}, ඉධ භික්ඛවෙ, එකච්චො පුග්ගලො යෙ තෙ සන්තා විමොක්ඛා අතික්කම්ම රූපෙ ආරුප්පා තෙ න කායෙන ඵස්සිත්වා{1} විහරති, පඤ්ඤාය චස්ස දිස්වා එකච්චෙ ආසවා පරික්ඛීණා හොන්ති. තථාගතප්පවෙදිතා චස්ස ධම්මා පඤ්ඤාය වොදිට්ඨා හොන්ති වොචරිතා. අයං වුච්චති භික්ඛවෙ, පුග්ගලො දිට්ඨප්පත්තො{2}. ඉමස්සපි ඛො අහං භික්ඛවෙ, භික්ඛුනො අප්පමාදෙන කරණීයන්ති වදාමි. තං කිස්ස හෙතු: අප්පෙවනාම අයමායස්මා අනුලොමිකානි සෙනාසනානි පටිසෙවමානො කල්යාණමිත්තෙ භජමානො ඉන්ද්රියානි සමන්නානයමානො යස්සත්ථාය කුලපුත්තා සම්මදෙව අගාරස්මා අනගාරියං පබ්බජන්ති. තදනුත්තරං බ්රහ්මචරියපරියොසානං දිට්ඨෙව ධම්මෙ සයං අභිඤ්ඤා සච්ඡිකත්වා උපසම්පජ්ජ විහරෙය්යාති. ඉමං ඛො අහං භික්ඛවෙ, ඉමස්ස භික්ඛුනො අප්පමාදඵලං සම්පස්සමානො අප්පමාදෙන කරණීයන්ති වදාමි.
කතමො ච භික්ඛවෙ, පුග්ගලො සද්ධාවිමුත්තො: ඉධ භික්ඛවෙ, එකච්චො පුග්ගලො යෙ තෙ සන්තා විමොක්ඛා අතික්කම්ම රූපෙ ආරුප්පා තෙ න කායෙන ඵස්සිත්වා{1} විහරති, පඤ්ඤාය චස්ස දිස්වා එකච්චෙ ආසවා පරික්ඛීණා හොන්ති. තථාගතෙ චස්ස සද්ධා නිවිට්ඨා හොති මූලජාතා පතිට්ඨිතා. අයං වුච්චති භික්ඛවෙ, පුග්ගලො සද්ධාවිමුත්තො. ඉමස්සපි ඛො අහං භික්ඛවෙ, භික්ඛුනො අප්පමාදෙන කරණීයන්ති වදාමි. තං කිස්ස හෙතු: අප්පෙවනාම අයමායස්මා
අනුලොමිකානි සෙනාසනානි පටිසෙවමානො කල්යාණමිත්තෙ භජමානො ඉන්ද්රියානි සමන්නානයමානො යස්සත්ථාය කුලපුත්තා සම්මදෙව අගාරස්මා අනගාරියං පබ්බජන්ති, තදනුත්තරං බ්රහ්මචරියපරියොසානං දිට්ඨෙව ධම්මෙ සයං අභිඤ්ඤා සච්ඡිකත්වා උපසම්පජ්ජ විහරෙය්යාති. ඉමං ඛො අහං භික්ඛවෙ, ඉමස්ස භික්ඛුනො අප්පමාදඵලං සම්පස්සමානො අප්පමාදෙන කරණීයන්ති වදාමි.
කතමො ච භික්ඛවෙ, පුග්ගලො ධම්මානුසාරී: ඉධ භික්ඛවෙ, එකච්චො පුග්ගලො යෙ තෙ සන්තා විමොක්ඛා අතික්කම්ම රූපෙ ආරුප්පා තෙ න කායෙන ඵස්සිත්වා විහරති, පඤ්ඤාය චස්ස දිස්වා ආසවා අපරික්ඛීණා{1} හොන්ති, තථාගතප්පවෙදිතා චස්ස ධම්මා පඤ්ඤාය මත්තසො නිජ්ඣානං ඛමන්ති. අපි චස්ස ඉමෙ ධම්මා හොන්ති, සෙය්යථිදං: සද්ධින්ද්රියං විරියින්ද්රියං සතින්ද්රියං සමාධින්ද්රියං පඤ්ඤින්ද්රියං. අයං වුච්චති භික්ඛවෙ, පුග්ගලො ධම්මානුසාරී. ඉමස්සපි ඛො අහං භික්ඛවෙ, භික්ඛුනො අප්පමාදෙන කරණීයන්ති වදාමි. තං කිස්ස හෙතු: අප්පෙවනාම අයමායස්මා අනුලොමිකානි සෙනාසනානි පටිසෙවමානො කල්යාණමිත්තෙ භජමානො ඉන්ද්රියානි සමන්නානයමානො යස්සත්ථාය කුලපුත්තා සම්මදෙව අගාරස්මා අනගාරියං පබ්බජන්ති, තදනුත්තරං බ්රහ්මචරියපරියොසානං දිට්ඨෙව ධම්මෙ සයං අභිඤ්ඤා සච්ඡිකත්වා උපසම්පජ්ජ විහරෙය්යාති. ඉමං ඛො අහං භික්ඛවෙ, ඉමස්ස භික්ඛුනො අප්පමාදඵලං සම්පස්සමානො අප්පමාදෙන කරණීයන්ති වදාමි.
කතමො ච භික්ඛවෙ, පුග්ගලො සද්ධානුසාරී: ඉධ භික්ඛවෙ, එකච්චො පුග්ගලො යෙ තෙ සන්තා විමොක්ඛා අතික්කම්ම රූපෙ ආරුප්පා තෙ න කායෙන ඵස්සිත්වා විහරති, පඤ්ඤාය චස්ස දිස්වා ආසවා අපරික්ඛීණා{1} හොන්ති, තථාගතෙ චස්ස සද්ධාමත්තං හොති පෙමමත්තං. අපි චස්ස ඉමෙ ධම්මා හොන්ති. සෙය්යථිදං: සද්ධින්ද්රියං විරියින්ද්රියං සතින්ද්රියං සමාධින්ද්රියං පඤ්ඤින්ද්රියං. අයං වුච්චති භික්ඛවෙ, පුග්ගලො සද්ධානුසාරී. ඉමස්සපි ඛො අහං භික්ඛවෙ, භික්ඛුනො අප්පමාදෙන කරණීයන්ති වදාමි. තං කිස්ස හෙතු: අප්පෙවනාම අයමායස්මා අනුලොමිකානි සෙනාසනානි පටිසෙවමානො කල්යාණමිත්තෙ භජමානො ඉන්ද්රියානි සමන්නානයමානො යස්සත්ථාය කුලපුත්තා සම්මදෙව අගාරස්මා අනගාරියං පබ්බජන්ති, තදනුත්තරං බ්රහ්මචරියපරියොසානං දිට්ඨෙව ධම්මෙ සයං අභිඤ්ඤා සච්ඡිකත්වා උපසම්පජ්ජ විහරෙය්යාති. ඉමං ඛො අහං භික්ඛවෙ, ඉමස්ස භික්ඛුනො අප්පමාදඵලං සම්පස්සමානො අප්පමාදෙන කරණීයන්ති වදාමි.