411. නාහං තුම්හෙ විනින්දාමි යෙ චඤ්ඤෙ වානරා වනෙ, විස්සසෙනොව ගාරය්හො යස්සත්ථා රුක්ඛරොපකා’ති
8. ආරාමදූසකජාතකං.
412. න හි වණ්ණෙන සම්පන්නා මඤ්ජුකා පියදසස්නා ඛරවාචා පියා හොන්ති අස්මිං ලොකෙ පරම්හි ච.
413. නනු පස්සසිමං කාළිං දුබ්බණ්ණං තිලකාහතං, කොකිලං සණ්හභාණෙන බහුන්නං පාණිනං පියං.
414. තස්මා සඛිලවාචස්ස මත්තභාණි අනුද්ධතො, අත්ථං ධම්මඤ්ච දීපෙති මධුරං තස්ස භාසිතන්ති.
9. සුජාතජාතකං.
415. සබ්බෙහි කිර ඤාතීහි කොසියො ඉස්සරො කතො, සචෙ ඤාතීහනුඤ්ඤාතො භණෙය්යාහං එකවාචියං.
416. භණ සම්ම අනුඤ්ඤාතො අත්ථං ධම්මඤ්ච කෙවලං, සන්ති හි දහරා පක්ඛී පඤ්ඤාවන්තො ජුතින්ධරා.
417. න මෙ රුච්චති භද්දං වො උලූකස්සාභිසෙචනං, අකුද්ධස්ස මුඛං පස්ස කථං කුද්ධො කරිස්සතීති.
10. උලූකජාතකං.
{1}පදුමවග්ගො දුතියො
තස්සුද්දානං:
පදුමුත්තමනාගසිරිව්හයනො සමහණ්ණවයූපඛුරප්පවරො, අථ කුන්දලිකුඤ්ජරරුක්ඛ පුන ඛරවාචඋලූකවරෙන දසා’ති.
3. අරඤ්ඤවග්ගො
418. ආරඤ්ඤකස්ස{1} ඉසිනො චිරරත්තතපස්සිනො{2}, කිච්ඡා කතං උදපානං කථං සම්ම අවාහසි{3}.
419. එසධම්මො සිගාලානං යම්පීත්වා ඔභදාමසෙ, පිතුපිතාමහං ධම්මො න නං උජ්ඣාතුමරහසි.
420. යෙසං වො එදිසො ධම්මො අධම්මො පන කීදිසො, මා වො ධම්මං අධම්මං වා අද්දසාම කුදාචනන්ති.
1. උදපානදූසකජාතකං.
421. යෙන මිත්තෙන සංසග්ගා{4} යොයගක්ඛෙමො{5} විහිංසති, පුබ්බෙවජ්ඣාහවන්තස්ස රක්ඛෙ අක්ඛීව පණ්ඩිතො,
422. යෙන මිත්තෙන සංසග්ගා යොගක්ඛෙමො පවඩ්ඪති, කරෙය්යත්තසමං වුත්තිං සබ්බකිච්චෙසු පණ්ඩිතො.
423. එථ ව්යග්ඝා නිවත්තව්හො පච්චමෙථ{6} මහාවනං, මා වනං{7} ඡින්දි නිව්යග්ඝං ව්යග්ඝා මාහෙසු නිබ්බනා’ති.
2. ව්යග්ඝජාතකං.
424. කො නු උද්දීතභත්තොව{8} පූරහත්ථොව බ්රාහ්මණො, කහන්නු භික්ඛං අචරි කං සද්ධං උපසඞ්කමි.
425. අහං කපිස්මි{9} දුම්මෙධො අනාමාසානි ආමසිං, ත්වං මං මොවය භද්දන්තෙ මුත්තො ගච්ඡෙය්ය පබ්බතං
426. කච්ඡපා කස්සපා හොන්ති කොණ්ඩඤ්ඤා හොන්ති මක්කටා, මුඤ්ච කස්සප කොණ්ඩඤ්ඤං කතං මෙථුනකං තයා’ති.
3. කච්ඡපජාතකං.
427. කායං බලාකා සිඛිනී චොරී ලඞ්ඝිපිතාම්හා, ඔරං බලාකෙ ආගච්ඡ චණ්ඩො මෙ වායසො සඛා,
428. නාහං බලාකා සිඛිනී අහං ලොලොස්මි වායසො, අකත්වා වචනං තුය්හං පස්ස ලූනොස්මි ආගතො.
429. පුන පාපජ්ජසි සම්ම සීලං හි තව තාදිසං, න හි මානුසකා භොගා සුභුඤ්ජා හොන්ති පක්ඛිනා’ති.
4. ලොලජාතකං
430. කායං බලාකා රුචිරා කාකනීළස්මිං{1} අච්ඡති,{2} චණ්ඩො කාකො සඛා මය්හං තස්ස චෙතං කුලාවකං.
431. නනු මං සම්ම ජානාසි දිජ සාමාකභොජන, අකත්වා වචනං තුය්හං පස්ස ලූනොස්මි ආගතො.
432. පුනපාපජ්ජසි සම්ම සීලං හි තව තාදිසං, න හි මානුසකා{3} භොගා සුභුඤ්ජා හොන්ති පක්ඛිනා’ති.
5. රුචිරජාතකං.
433. තව සද්ධඤ්ච සීලඤ්ච විදිත්වාන ජානාධිප වණ්ණං අඤජනවණ්ණෙන කාලිඞ්ගස්මිං{4} නිමිම්හසෙ.{5}
434. අන්නභච්චා ච භච්චා ච යොධ උද්දිස්ස ගච්ඡති, සබ්බෙ තෙ අප්පටික්ඛිප්පා{6} පුබ්බාචරියවචො ඉදං.
435. දදාමි වො බ්රාහ්මණා නාගමෙතං රාජාරහං රාජ භොග්ගං{1} යසස්සිනං, අලඞ්කතං හෙමජාලාභිඡන්නං සසාරථිං ගච්ඡථ යෙන කාම’න්ති
6. කුරුධම්මජාතකං.
436. වස්සානි පඤ්ඤාස සමාධිකානි වසිම්හ සෙලස්ස ගුහාය රොමක, අසඞ්කමානා අභිනිබ්බුතත්තා{2} හත්ථත්තමායන්ති මමණ්ඩජා පුරෙ
437. තෙදානි වක්කඞ්ග කිමත්ථමුසසුකා භජන්ති අඤ්ඤං ගිරිකන්දරං දිජා, න නූන මඤ්ඤන්ති මමං යථා පුරෙ චිරප්පවුත්ථා{3} අථවා න තෙ ඉමෙ.
438. ජානාම තං න මයමස්ම මූළ්හා{4} සොයෙව{5} ත්වන්තෙ මයමස්ම නාඤ්ඤො, චිත්තඤ්ච තෙ අස්මිං ජනෙ පදුට්ඨං ආජිවක තෙන තං උත්තසාමාති.
7. රොමකජාතකං.
439. කමත්ථමභිසන්ධාය{6} ලහුචිත්තස්ස දූභිනො{7}, සබ්බකාමදුභස්සෙව{8} ඉදං දුක්ඛං තිතික්ඛසි.
440. සිඞ්ගෙන නිහනාහෙතං පදසා ච අධිට්ඨහ, භීයො බාලා පකුජ්ඣෙය්යුං නො චස්ස පටිසෙධකො.
441. මමෙවායං මඤ්ඤමානො අඤ්ඤම්පෙවං කරිස්සති, තෙ තං තත්ථ වධිස්සන්ති සා මෙ මුත්ති භවිස්සතී’ති.
8. මහිසජාතකං.
442. යථා මාණවකො පන්ථෙ සිගාලිං වනගොචරිං, අත්ථකාමං පවෙදෙන්තිං{1} අනත්ථකාමාති මඤ්ඤති අනත්ථකාමං සතපත්තං අත්ථකාමොති මඤ්ඤති.
443. එවමෙව ඉධෙකච්චො පුග්ගලො හොති තාදිසො, හිතෙහි වචනං වුත්තො පතිගණ්හාති{2} වාමතො.
444. යෙ ච ඛො නං පසංසන්ති භයා උක්කංසයන්ති ච{3} තඤ්හි සො මඤ්ඤතෙ මිත්තං සතපත්තංව මාණවො’ති
9. සතපත්තජාතකං.
445. අද්ධා හි නූන මිගරාජා පුටකම්මස්ස කොවිදො, තථාහි පුටං දූසෙති අඤ්ඤං නූන කරිස්සති.
446. න මෙ පිතා වා මාතා වා පුටකම්මස්ස කොවිදො{4}, කතං කතං ඛො දූසෙම එවං ධම්මමිදං කුලං.
447. යෙසං වො එදිසො ධම්මො අධම්මො පන කීදිසො{5}, මා වො ධම්මං අධම්මං වා අද්දසාම කුදාචන’න්ති.
10. පුටදූසකජාතකං.
අරඤ්ඤවග්ගො{6} තතියො
තස්සුද්දානං:
උදපානවරං වනබ්යග්ඝකපි සිඛිනී ච බලාකරුචිරවරො, සුජනාධිපරොමකදූස පුන සතපත්තවරො පුටකම්ම දසා’ති.
4. අබ්භන්තරවග්ගො
448. අබ්භන්තරං{1} නාම දුමො යස්ස දිබ්බමිදං ඵලං, භුත්වා දොහළිනී නාරී චක්කවත්තිං විජායති.
449. තඤ්ච{2} භද්දෙ මහෙසීසි සා චා{3} සි පතිනො සියා, ආහරිස්සති තෙ රාජා ඉදං අබ්භන්තරං ඵලං.
450. භත්තුරත්ථෙ පරක්කන්තො යං ඨානමධිගච්ඡති, සූරො අත්තපරිච්චාගී ලභමානො භවාමහන්ති.
1. අබ්භන්තරජාතකං.
451. සෙය්යංසො සෙය්යසො හොති යො සෙය්යමුපසෙවති, එකෙන සන්ධිං කත්වාන සතං වජ්ඣෙ අමොචයිං.
452. තස්මා සබ්බෙන{4} ලොකෙන සන්ධිං කත්වාන එකකො, පෙච්ච සග්ගං නිගච්ඡෙය්ය ඉදං සුණොථ කාසයො{5}.
453. ඉදං වත්වා මහාරාජා{6} කංසො බාරාණසිග්ගහො, ධනුං තූණිඤ්ච{7} නික්ඛිප්ප සංයමං අජ්ඣුපාගමී’ති.
2. සෙය්යංසජාතකං{8}.
454. වරං වරං ත්වං නිහනං පුරෙ චරි{9} අස්මිං පදෙසෙ අභිභුය්ය සූකරෙ, සොදානි එකො ව්යපගම්ම{10} ඣායසි බලන්නු තෙ ව්යග්ඝ න චජ්ජ විජ්ජති.
455. ඉමෙ{11} සුදං යන්ති දිසොදිසං පුරෙ භයට්ටිතා ලෙණගවෙසිනො පුථු, තෙ දානි සංගම්ම රසන්ති එකතො යත්ථ ඨිතා දුප්පසභජ්ජ, මෙ මයා.
456. නමත්ථු සඞ්ඝානං සමාගතානං දිස්වා සයං සබ්යං වදාමි අබ්භුතං, ව්යග්ඝං මිගා යත්ථ ජිනිංසු දාඨිනො සාමග්ගියා දාඨබලෙසු මුච්චරෙති.
3. වඩ්ඪකීසූකරජාතකං.
457. යං උස්සුකා සඞ්ඝරන්ති අලක්ඛිකා බහුං ධනං, සිප්පවන්තො අසිප්පා ච ලක්ඛීවා තානි භුඤ්ජති.
458. සබ්බත්ථ කතපුඤ්ඤස්ස අතිච්චඤ්ඤෙව{1} පාණිනො, උප්පජ්ජන්ති බහූ භොගා අප්පනායතනෙසුපි{2}.
459. කුක්කුටමණයො{3} දණ්ඩා ථියො ච පුඤ්ඤලක්ඛණා, උප්පජ්ජන්ති අපාපස්ස කතපුඤ්ඤස්ස ජන්තුනො’ති.
4. සිරිජාතකං.
460. දරියා{4} සත්තවස්සානි තිංසමත්තා වසාමසෙ, හඤ්ජෙම{5} මණිනො ආභං ඉති නො මන්තිතං අහූ.
461. යාව{6} යාව නිඝංසාම භිය්යො වොදායතෙ මණි, ඉදඤ්චදානි{7} පුච්ඡාම කිං කිච්චං ඉධ මඤ්ඤසි.
462. අයං මණි වෙළුරියො අකාචො විමලො සුභො{8}, නාස්ස සක්කා සිරිං ගන්තුං අපක්කමථ සූකරා’ති.
5. මණිසූකරජාතකං{9}.
463. මා සාලුකස්ස පිහයී{1} ආතුරන්නානි{2} භුඤ්ජති, අප්පොස්සුක්කො භුසං ඛාද එතං දීඝායුලක්ඛණං.
464. ඉදානි සො ඉධාගන්ත්වා අතිථි යුත්තසෙවකො, අථ දක්ඛසි සාලුකං සයන්තං මුසලුත්තරං.
465. විකන්තං{3} සූකරං දිස්වා සයන්තං මුසලුත්තරං, ජරග්ගවා{4} විචින්නෙසුං වරම්හාකං භුසාමිවා’ති.
6. සාලුකජාතකං.
466. නානුම්මත්තො නාපිසුනො නානටො{5} නාකුතූහලො, මූළ්හෙසු ලභතෙ ලාභං එසා තෙ අනුසාසනී.
467. ධිරත්ථු තං යසලාභං ධනලාභඤ්ච බුහ්මණ, යා වුත්ති විනිපාතෙන අධම්මචරියාය වා{6}.
468. අපි චෙ පත්තමාදාය අනාගාරො පරිබ්බජෙ, එසාව ජිවිකා සෙය්යො යා චාධම්මෙන එසනා’ති.
7. ලාභගරහජාතකං{7}.
469. අග්ඝන්ති මච්ඡා අධිකං සහස්සං න සො අත්ථි යො ඉමං සද්දහෙය්ය, මය්හඤ්ච අස්සු ඉධ සත්ත මාසා අහම්පි තං මච්ඡුද්දානං{8} කිණෙය්යන්ති.
470. මච්ඡානං භොජනං දත්වා මම දක්ඛිණමාදිසි{9}, තං දක්ඛිණං සරන්තියා කතං අපචිතිං තයා.
471. පදුට්ඨචිත්තස්ස න ඵාති හොති න චාපි නං දෙවතා පූජයන්ති, යො භාතරං පෙත්තිකං සාපතෙය්යං අවඤ්චයී දුක්කතකම්මකාරී’ති.{1}
8. මච්ඡුද්දානජාතකං{2}.
472. නානාච්ඡන්දා{3} මහාරාජ එකාගාරෙ වසාමසෙ, අහං ගාමවරං ඉච්ඡෙ බ්රාහ්මණී ච ගවං සතං.
473. ඡත්තො ච{4} ආජඤ්ඤරථං කඤ්ඤා ච මණිකුණ්ඩලං යා චෙසා පුණ්ණිකා ජම්මී{5} උදුක්ඛලං{6} අභිකඞ්ඛති.
474. බ්රාහ්මණස්ස ගාමවරං දෙථ බ්රාහ්මණියා ගවං සතං, පුත්තස්ස ආජඤ්ඤරථං කඤ්ඤාය මණිකුණ්ඩලං යඤ්චෙතං පුණ්ණිකං ජම්මිං පටියාදෙථ උදුක්ඛල’න්ති.
9. නානාච්ඡන්දජාතකං.
475. සීලං කිරෙව කල්යාණං සීලං ලොකෙ අනුත්තරං, පස්ස ඝොරවිසො නාගො සීලවාති න හඤ්ඤති.
476. සොහං සීලං සමාදිස්සං ලොකෙ අනුමතං සිවං, අරියවුත්ති{7} සමාචාරො යෙන වුච්චති සීලවා.
477. ඤාතීනඤ්ච පියො හොති මිත්තෙසු ච විරොචති, කායස්ස භෙදා සුගතිං උපපජ්ජති{8} සීලවාති.
10. සීලවීමංසජාතකං.
අබ්භන්තරවග්ගො චතුත්ථො.
තස්සුද්දානං: