6879. තතො ඛොමඤ්ච{3} කායූරං අඞ්ගදං මණිමෙඛලං, සස්සු සුණ්හාය පාහෙසි යෙහි මද්දී අසොභථ.
6880. තතො ඛොමඤ්ච කායූරං ගීවෙය්යං රතනාමයං, සස්සු සුණ්හාය පාහෙසි යෙහි මද්දී අසොභථ.
6881. උණ්ණතං මුඛඵුල්ලඤ්ච නානාරත්තෙ ච මාණියෙ,{4} සස්සු සුණ්හාය පාහෙසි යෙහි මද්දී අසොභථ.
6882. උග්ගත්ථනං ගිඞ්ගමකං මෙඛලං පටිපාදුකං,{5} සස්සු සුණ්හාය පාහෙසි යෙහි මද්දි අසොභථ.
6883. සුත්තඤ්ච සුත්තවජ්ජඤ්ච උපනිජ්ඣාය සෙය්යසි, අසොභථ රාජපුත්තී දෙවකඤ්ඤාව නන්දනෙ.
6884. සීසං නාහාතා සුචිවත්ථා සබ්බාභරණභූසිතා, අසොභථ රාජපුත්තී තාවතිංසාව අච්ඡරා.
6885. කදලීව වාතච්ඡුපිතා ජාතා චිත්තලතාවනෙ, දන්තාවරණසම්පන්නා රාජපුත්තී අසොභථ.
6886. සකුණී මානුසිනීව ජාතා චිත්තපත්තා පතී, නිග්රොධපක්කබිම්බොට්ඨි රාජපුත්තී අසොභථ.
6887. තස්සා ච නාගමානෙසුං නාතිවද්ධඤ්ච{6} කුඤ්ජරං, සත්තික්ඛමං සරක්ඛමං ඊසාදන්තං උරූළ්හවං.
6888. සා මද්දී නාගමාරුය්හි නාතිවද්ධඤ්ච කුඤ්ජරං, සත්තික්ඛමං සරක්ඛමං ඊසාදන්තං උරූළ්හවං.
6889. සබ්බම්හි තං අරඤ්ඤම්හි යාවන්තෙත්ථ මිගා අහු, වෙස්සන්තරස්ස තෙජෙන නාඤ්ඤමඤ්ඤමහෙඨයුං.
6890. සබ්බම්හි තං අරඤ්ඤම්හි යාවන්තෙත්ථ දිජා අහු, වෙස්සන්තරස්ස තෙජෙන නාඤ්ඤමඤ්ඤමහෙඨයුං.
6891. සබ්බම්හි තං අරඤ්ඤම්හි යාවන්තෙත්ථ මිගා අහු, එකජ්ඣං සන්නිපතිංසු; වෙස්සන්තරෙ පයාතම්හි සිවීනං රට්ඨවඩ්ඪනෙ.
6892. සබ්බම්හි තං අරඤ්ඤම්හි යාවන්තෙත්ථ දිගා අහු, එකජ්ඣං සන්නිපතිංසු; වෙස්සන්තරෙ පයාතම්හි සිවීනං රට්ඨවඩ්ඪනෙ.
6893. සබ්බම්හි තං අරඤ්ඤම්හි යාවන්තෙත්ථ මිගා අහු, නාස්සු මඤ්ජූනි කූජිංසූ; වෙස්සන්තරෙ පයාතම්හි සිවීනං රට්ඨවඩ්ඪනෙ.
6894. සබ්බම්හි තං අරඤ්ඤම්හි යාවන්තෙත්ථ දිගා අහු, නාස්සු මංජූනි කූජිංසු; වෙස්සන්තරෙ පයාතම්හි සිවීනං රට්ඨවඩ්ඪනෙ.
6895. පටියත්තො රාජාමග්ගො විචිත්තො පුප්පසන්ථතො, වසී වෙස්සන්තරො යත්ථ යාවතා ච ජෙතුත්තරා.
6896. තතො සට්ඨිසහස්සානි යුධිනො{1} චාරුදස්සනා, සමන්තා පරිකරිංසු{2}. වෙස්සන්තරෙ පයාතම්හි සිවීනං රට්ඨවඩ්ඪනෙ.
6897. ඔරොධා ච කුමාරා ච වෙසියානා ච බ්රාහ්මණා, සමන්තා පරිකරිංසු; වෙස්සන්තරෙ පයාතම්හි සිවීනං රට්ඨවඩ්ඪනෙ.
6898. හත්ථාරූහා අනීකට්ඨා රථිකා පත්තිකාරකා, සමන්තා පරිකරිංසු; වෙස්සන්තරෙ පයාතම්හි සිවීනං රට්ඨවඩ්ඪනෙ.
6899. සමාගතා ජානපදා නෙගමා ච සමාගතා, සමන්තා පරිකරිංසු; වෙස්සන්තරෙ පයාතම්හි සිවීනං රට්ඨවඩ්ඪනෙ.
6900. කරොටියා චම්මධරා ඛග්ගහත්ථා{1} සුවම්මිනො, පුරතො පටිපජ්ජිංසු; වෙස්සන්තරෙ පයාතම්හි සිවීනං රට්ඨවඩ්ඪනෙ.
6901. තෙ පාවිසුං පුරං රම්මං බහුපාකාරතොරණං,{2} උපෙතං අන්නපානෙහි නච්චගීතෙහි චූභයං.
6902. විත්තා ජානපදා ආසුං නෙගමා ච සමාගතා, අනුප්පත්තෙ කුමාරම්භි සිවීනං රට්ඨවඩ්ඪනෙ.
6903. චෙලුක්ඛෙපො අවත්තිත්ථ ආගතෙ ධනදායකෙ, නන්දිප්පවෙසි නගරෙ බන්ධනමොක්ඛො අගොසථ.
6904. ජාතරූපමයං වස්සං දෙවො පාවස්සි තාවදෙ, වෙස්සන්තරෙ පවිට්ඨම්හි සිවීනං රට්ඨවඩ්ඪනෙ.
6905. තතො වෙස්සන්තරො රාජා දානං දත්වාන ඛත්තියො, කායස්ස භෙදා සප්පඤ්ඤො සග්ගං සො උපපජ්ජථාති.
නගරඛණ්ඩො
මහාවෙස්සන්තරජාතකං.
මහානිපාතවණ්ණනා නිට්ඨිතා.
ජාතකපාළි සමත්තා.