6780. දුක්ඛස්ස හදයං ආසි අථො උණ්හම්පි පස්සසි, රොහිණීහෙව තම්බක්ඛි පිතා අස්සූනි වත්තයි,
6781. යං තං කණ්හාජිනාවොච අයං මං තාත බ්රාහ්මණො, ලට්ඨියා පතිකොටෙති ඝරෙ ජාතංව දාසියං.
6782. න චායං බ්රාහ්මණො තාත ධම්මිකා හොන්ති බ්රාහ්මණා, යක්ඛො බ්රාහ්මණවණ්ණෙන ඛාදිතුං තාත නෙති නො; නීයමානෙ පිසාචෙන කින්නු තාත උදික්ඛසි.
6783. රාජපුත්තී ච වො මාතා රාජපුත්තො ච වො පිතා, පුබ්බෙ මෙ අඞ්කමාරුය්හ කින්නු තිට්ඨථ ආරකා.
6784. රාජපුත්තී ච නො මාතා රාජපුත්තො ච නො පිතා, දාසා මයං බ්රාහ්මණස්ස තස්මා තිට්ඨාම ආරකා.
6785. මා සම්මෙචං අවචුත්ථ දය්හතෙ හදයං මම, චිතකා විය{1} මෙ කායො ආසනෙ න සුඛං ලභෙ.
6786. මා සම්මෙවං අවචුත්ථ භිය්යො සොකං ජනෙථ මං, නික්කිණිස්සාමි දණ්ඩෙන න වො දාසා භවිස්සථ.
6787. කිමග්ඝියං හි වො තාත බ්රාහ්මණස්ස පිතා අදා, යථාභූතං මෙ අක්ඛාථ පටිපාදෙන්තු බ්රාහ්මණං.
6788. සහස්සග්ඝං හි මං තාත බ්රාහ්මණස්ස පිතා අදා. අච්ඡං කණ්හාජිනං කඤ්ඤං හත්ථිනා{2} ච සතෙන ච.
6789. උට්ඨෙහි කත්තෙ තරමානො බ්රාහ්මණස්ස අවාකර,{3} දාසීසතං දාසසතං ගවං හත්ථූසභං සතං; ජාතරූපසභස්සඤ්ච පුත්තානං දෙහි නික්කයං.
6790. තතො කත්තා තරමානො බ්රාහ්මණස්ස අවාකරි, දාසීසතං දාසසතං ගවං හත්ථූසභා සතං; ජාතරූපසභස්සඤ්ච පුත්තානං දාසි නික්කයං.
6791. නික්කිණිත්වා නහාපෙත්වා භොජයිත්වාන දාරකෙ, සමලඞ්කරිත්වා භණ්ඩෙන උච්ඡඞ්ගෙ උපවෙසයුං.
6793. සීසං නහාතෙ සුචිවත්ථෙ සබ්බාභරණභූසිතෙ, රාජා අඞ්කෙ කරිත්වාන අය්යකො පරිපුච්ඡථ.
6794. කුණ්ඩලෙ ඝුසිතෙ මාලෙ සබ්බාලඞ්කාරභූසිතෙ,{1} රාජා අඞ්කෙ කරිත්වාන ඉදං වචනමබ්රවි:
6795. කච්චි උබො අරොගා තෙ ජාලි මාතාපිතා තව, කච්චි උඤ්ඡෙන යාපෙන්ති කච්චි මූලඵලා බහූ.
6796. කච්චි ඩංසා ච මකසා ච අප්පමෙව සිරිංසපා, වනෙ වාලමිගාකිණ්ණෙ හිංසා තෙසං න විජ්ජති.{2}
6797. අථො උභො අරොග මෙ දෙව මාතාපිතා මම, අථො උඤ්ඡෙන යාපෙන්ති අථො මූලඵලා බහූ.
6798. අතො ඩංසා ච මකසා ච අප්පමෙව සිරිංසපා, වනෙ වාලමිගාකිණ්ණෙ හිංසා තෙසං න විජ්ජති.
6799. ඛණන්තාලූකලම්බානි බිළාලි තක්කලානි ච, කොලං භල්ලාටකං බෙලලං සා නො ආහච්ච පොසති.
6800. යඤ්චෙව සා ආහරති වනමූලඵලහාරිකා, තං නො සබ්බෙ සමාගන්ත්වා රත්තිං භුඤ්ජාම නො දිවා.
6801. අම්මා ච නො කිසා පණ්ඩු ආහරන්තී දුමප්ඵලං,{3} වාතාතපෙන සුඛුමාලී පදුමං හත්ථගතාමිව.
6802. අම්මාය පතනූ කෙසා විචරන්ත්යා බ්රහාවනෙ, වනෙ වාලමිගාකිණ්ණෙ ඛග්ගදීපිනිසෙවිතෙ.
6803. කෙසෙසු ජටං බන්ධිත්වා කච්ඡෙ ජල්ලමධාරයි, චම්මවාසී ඡමා සෙති ජාතවෙදං නමස්සති.
6804. පුත්තා පියා මනුස්සානං ලොකස්මිං උදපජ්ජිසුං, නහ නූනම්හාකං අය්යස්ස පුත්තෙ සෙනහො අජායථ.
6805. දුක්කතඤ්ච හි නො පුත්ත භූනහච්චා කතං මයා, යොහං සිවීනං වචනා පබ්බාජෙසිං අදූසකං.
6806. යං මෙ කිඤ්චි ඉධ අත්ථි ධනං ධඤ්ඤඤ්ච විජ්ජති, එතු වෙස්සන්තරො රාජා සිවිරට්ඨෙ පසාසතු.
6807. න දෙව මය්හං වචනා එහිති සිවිසුත්තමො, සයමෙව දෙවො ගන්ත්වාන සිඤ්ච භොගෙහි අත්රජං.
6808. තතො සෙනාපතිං රාජා සඤ්ජයො අජ්ඣභාසථ, හත්ථි අස්සා රථා පත්ති සෙනා සන්නාහයන්තු නං, නෙගමා ච මං අන්වෙන්තු බ්රාහ්මණා ච පුරොහිතා.
6809. තතො සට්ඨිසහස්සානි යුධිනො චාරුදස්සනා, ඛිප්පමායන්තු සන්නද්ධා නානාවණ්ණෙහිලඞ්කතා.
6810. නීලවත්ථධරානෙකෙ පීතානෙකෙ නිවාසිතා, අඤ්ඤෙ ලොහිතඋණ්හීසා සුද්ධානෙකෙ නිවාසිතා; ඛිප්පමායන්තු සන්නද්ධා නානාවත්ථෙහිලඞ්කතා.{1}
6811. හිමාවා යථා ගන්ධධරො පබ්බතො ගන්ධමාදනො, නානාරුක්ඛෙහි සඤ්ඡන්නො මහාභූතගණාලයො.
6812. ඔසධෙහි ච දිබ්බෙහි දිසා භාති පවාති ච, ඛිප්පමායන්තු සන්නද්ධා දිසා භන්තු පවන්තු ච.{2}
6813. තතො නාගසහස්සානි යොජයන්තු චතුද්දස, සුවණ්ණකච්ඡා මාතඞ්ගා හෙමකප්පනවාසසා.
6814. ආරූළ්හා ගාමණීයෙහි තොමරඞ්කුසපාණිහි, ඛිප්පමායන්තු සන්නද්ධා හත්ථක්ඛන්ධෙහි දස්සිතා.
6815. තතො අස්සසහස්සානි යොජයන්තු චතුද්දස, ආජානීයාව ජාතියා සින්ධවා සීඝවාහනා.
6816. ආරූළ්හා ගාමණීයෙහි ඉල්ලියා{3} චාපධාරිහි, ඛිප්පමායන්තු සන්නද්ධා අස්සපිට්ඨෙහිලඞ්කතා.
6817. තතො රථසහස්සානි යොජයන්තු චතුද්දස,{4} අයො සුකතනෙමියො සුවණ්ණචිතපක්ඛරෙ.
6818. ආරොපෙන්තු ධජෙ තත්ථ චම්මානි කවචානි ච, විප්ඵාලෙන්තු ච චාපානි දළ්හධම්මා පහාරිනො; ඛිප්පමායන්තු සන්නද්ධා රථෙසු රථජීවිනො.
6819. ලාජා ඔලොපියා{1} පුප්ඵා මාලාගන්ධවිලෙපනා, අග්ඝීයානි ච තිට්ඨන්තු යෙන මග්ගෙන එහිති.
6820. ගාමෙ ගාමෙ සතං කුම්භා මෙරයස්ස සුරාය ච, මග්ගම්භි පතිතිට්ඨන්තු{2} යෙන මග්ගෙන එහිති.
6821. මංසා පූවා සඞ්කුලීයො කුම්මාසා මච්ඡසංයුතා, මග්ගමහි පතිතිට්ඨන්තු යෙන මග්ගෙන එහිති.
6822. සප්පි තෙලං දධිං ඛීරං කඞ්ගු{3} වීහි බහූ සුරා, මග්ගමහි පතිතිට්ඨන්තු යෙන මග්ගෙන එහිති.
6823. ආළාරිකා ච සූදා ච නටනට්ටක ගායකා,{4} පාණිස්සරා කුම්භථූනියො මණ්ඩකා{5} සොකඣායිකා.
6824. ආහඤ්ඤන්තු සබ්බවීණා භෙරියො දෙණ්ඩිමානි{6} ච, ඛරමුඛානි ධම්මන්තු වදන්තු එකපොක්ඛරා.
6825. මුතිඞ්ගා පණවා සඞ්ඛා ගොධා පරිවදෙන්තිකා, දින්දිමානි ච හඤ්ඤන්තු කුටුම්බදින්දිමානි ච.
6826. සා සෙනා මහතී ආසි උය්යුත්තා සිවිවාහිනී, ජාලිනා මග්ගනායෙන වඞ්කං පායාසි පබ්බතං.
6827. කුඤ්චං{7} නදති මාතඞ්ගො කුඤ්ජරො සට්ඨිහායනො, කච්ඡාය බද්ධමානාය කුඤ්චං නදති වාරණො.
6828. ආජානීයා හසිස්සිංසු{8} නෙමිඝොසො අජායථ, අබ්භං රජො අච්ඡාදෙසි උය්යුත්තා සිවිවාහිනී.
6829. සා සෙනා මහතී ආසි උය්යුත්තා හාරහාරිණී, ජාලිනා මග්ගනායෙන වඞ්කං පායාසි පබ්බතං.
6830. තෙ පාවිසුං බ්රහාරඤ්ඤං බහුසාකං බහූදකං,{1} පුප්ඵරුක්ඛෙහි සඤ්ඡන්නං ඵලරුක්ඛෙහි චූභයං.
6831. තත්ථ බින්දුස්සරා වග්ගු නානාවණ්ණා බහූ දිජා, කූජන්තමුපකූජන්ති උතුසමපුප්ඵිතෙ දුමෙ.
6832. තෙ ගන්ත්වා දීඝමද්ධානං අහොරත්තානමච්චයෙ, පදෙසං තං උපාගඤ්ඡුං යත්ථ වෙස්සන්තරො අහු.
මහාරාජපබ්බං නිට්ඨිතං.
6833. තෙසං සුත්වාන නිග්ඝොසං භීතො වෙස්සන්තරො අහු, පබ්බතං අභිරූහිත්වා භීතො සෙනං උදික්ඛති.{2}
6834. ඉඞ්ඝ මද්දි නිසාමෙහි නිග්ඝොසො යාදිසො වනෙ, ආජානීයා හසිස්සන්ති ධජග්ගානි ච දිස්සරෙ.
6835. ඉමෙ නූන අරඤ්ඤස්මිං මිගසඞ්ඝානි ලුද්දකා, වාගුරාහි{3} පරික්ඛිප්ප සොබ්භං පාතෙත්වා තාවදෙ; වික්කොසමානා තිප්පාහි{4} හන්ති නෙසං වරං වරං.
6836. යථා මයං අදූසකා අරඤ්ඤෙ අවරුද්ධකා, අමිත්තහත්ථත්ථගතා පස්ස දුබ්බලඝාතකං.
6837. අමිත්තා නප්පසහෙය්යුං අග්ගීව උදකණ්ණවෙ, තදෙව ත්වං විචින්තෙහි අපි සොත්ථි ඉතො සියා.
6838. තතො වෙස්සන්තරො රාජා ඔරොහිත්වාන පබ්බතා, නිසීදි පණ්ණසාලයං දළ්හං කත්වාන මානසං.
6839. නිවත්තයිත්වාන රථං වොත්ථාපෙත්වාන{5} සෙනියො, එකං අරඤ්ඤෙ විහරන්තං පිතා පුත්තං උපාගමී.
6840. හත්ථික්ඛන්ධතො ඔරුය්හ එකංසො පඤ්ජලීකතො, පරික්ඛිත්තො අමච්චෙහි පුත්තං සිඤ්චිතුමාගමි.
6841. තත්ථද්දස කුමාරං සො රම්මරූපං සමාහිතං, නිසින්නං පණ්ණසාලායං ඣායන්තං අකුතොභයං.
6842. තඤ්ච දිස්වාන ආයන්තං පිතරං පුත්තගිද්ධිනං, වෙස්සන්තරො ච මද්දී ච පච්චුග්ගන්ත්වා අවන්දිසුං.
6843. මද්දී ච සිරසා පාදෙ සසුරස්සාභිවාදයි, මද්දී අහං හි තෙ දෙව පාදෙ වන්දාමි තෙ හුසා,{1} තෙසු තත්ථ පලිස්සජ්ජ පාණිනා පරිමජ්ජථ.
6844. කච්චි වො කුසලං පුත්ත කච්චි පුත්ත අනාමයං, කච්චි උඤ්ඡෙන යාපෙථ කච්චි මූලඵලාබහූ.
6845. කච්චි ඩංසා ච මකසා ච අප්පමෙව සිරිංසපා, වනෙ වාලමිගාකිණ්ණෙ කච්චි හිංසා න විජ්ජති.
6846. අත්ථි නො ජීවිකා දෙව යා ච යාදිසි කීදිසා, කයිරා හි ජිවිකා හොම උඤ්ඡාචරියාය ජීවිකං.{2}
6847. අනිද්ධිනං මහාරාජ දමෙතස්සංව{3} සාරථි, ත්යම්හා අනිද්ධිකා දන්තා අසමිද්ධි දමෙති නො.
6848. අපි නො කිසානි මංසානි පිතු මාතු අදස්සනා, අවරුද්ධානං මහාරාජ අරඤ්ඤෙ ජීවසොකිනං.{4}
6849. යෙ පි තෙ සිවිසෙට්ඨස්ස දායාදප්පත්තමානසා, ජාලී කණ්හාජිනාචුභො බ්රාහ්මණස්ස වසානුගා; අච්චායිකස්ස ලුද්දස්ස යො නෙ ගාවොව සුම්භති.
6850. තෙ රාජපුත්තියා පුත්තෙ යදි ජානාථ සංසථ, පරියාපුණාථ නො ඛිප්පං සප්පදට්ඨංව මාණවං.
6851. උභො කුමාරා නික්කීතා ජාලී කණ්හාජිනා චුභො, බ්රාහ්මණස්ස ධනං දත්වා පුත්ත මා භායි අස්සස.{5}
6852. කච්චින්නු තාත කුසලං කච්චි තාත අනාමයං, කච්චින්නු තාත මෙ මාතු චක්ඛුං න පරිහායති.
6853. කුසලං චෙව මෙ පුත්ත අථො පුත්ත අනාමයං අථොපි පුත්ත තෙ මාතු චක්ඛුං න පරිහායති.
6854. කච්චි අරොගං යොග්ගං තෙ කච්චි වහති වාහනං, කච්චි ඵිතා ජනපදා{1} කච්චි මුට්ඨි න ඡිජ්ජති.
6855. අථො ආරොගං යොග්ගං මෙ අථො වහති වාහනං, අථො ඵිතා ජනපදා අථො වුට්ඨි න ඡිජ්ජති.
6856. ඉච්චෙවං මන්තයන්තානං මාතා නෙසං අදිස්සථ, රාජපුත්ති ගිරිද්වාරෙ පත්තිකා අනුපාහනා.
6857. තඤ්ච දිස්වාන ආයන්තිං මාතරං පුත්තගිද්ධිනිං, වෙස්සන්තරො ච මද්දී ච පච්චුග්ගන්ත්වා අවන්දිසුං.
6858. මද්දී ච සිරසා පාදෙ සස්සුසා අභිවාදයි, මද්දි අහම්හි තෙ අය්යෙ පාදෙ වන්දාමි තෙ හුසා.{2}
6859. මද්දිඤ්ච පුත්තකා දිස්වා දූරතො සොත්ථිමාගතා, කන්දින්තා අභිධාවිංසු වච්ඡා බාලාව මාතරං.
6860. මද්දී ච පුත්තකෙ දිස්වා දූරතො සොත්ථිමාගතෙ, වාරුණී ව පවෙධෙන්ති ථනධාරාභිසිඤ්චථ.
6861. සමාතානං ඤාතීනං මහාඝොසො අජායථ, පබ්බතා සමනාදිංසු{3} මහී පකම්පිතා අහු;
6862. වුට්ඨිධාරං පවෙච්ඡන්තො දෙවො පාවස්සි තාවදෙ. අථ වෙස්සන්තරො රාජා ඤාතීහි සමගච්ඡථ,
6863. නත්තාරො සුණිසා පුත්තො රාජා දෙවී ච එකතො. යදා සමාගතා ආසුං තදාසි ලොමහංසනං.
6864. පඤ්ජලිකා තස්ස යාචන්ති රොදන්තා භෙරවෙ වනෙ. වෙස්සන්තරඤ්ච මද්දිඤ්ච සබ්බෙ රට්ඨා සමාගතා. ත්වං නොසි ඉස්සරො රාජා රජ්ජං කරෙථ නො උභො.
ඡකඛත්තියපබ්බං.
6865. ධම්මෙන රජ්ජං{1} කාරෙන්තං රට්ඨා පබ්බාජයිත්ථ මං, ත්වඤ්ච ජානපදා චෙව නෙගමා ච සමාගතා.
6866. දුක්කතඤ්ච හි නො පුත්ත භූනහච්චං කතං මයා, යොහං සිවීනං වචනා පබ්බාජෙසිං අදූසතං.
6867. යෙන කෙනචි වණ්ණෙන පිතු දුක්ඛං උදබ්බහෙ, මාතු භගිනියා චාපි අපි පාණෙහි අත්තනො.
6868. තතො වෙස්සන්තරො රාජා රජොජල්ලං පවාහයි, රජොජල්ලං පවාහෙත්වා සච්චවණ්ණං{2} අධාරයි.
6869. සීසං නහාතො සුචිවත්ථො සබ්බාභරණභූසිතො, පච්චයං නාගමාරුයහ ඛග්ගං බන්ධි පරන්තපං.
6870. තතො සට්ඨිසහස්සානි යුධිනො{3} චාරුදස්සනා, සහජාතා පරිකරිංසු{4} නන්දයන්තා රථෙසභං.
6871. තතො මද්දිම්පි නහාපෙසුං සිවිකඤ්ඤා සමාගතා, වෙස්සන්තරො තං පාලෙතු ජාලීකණ්හාජිනා චුභො; අථොපි තං මහාරාජා සඤ්ජයො අභිරක්ඛතු.
6872. ඉදඤ්ච පච්චයං ලද්ධා පුබ්බෙ කිලෙසමත්තනො, ආනන්දියං ආචරිංසු රමණීයෙ ගිරිබ්බජෙ.
6873. ඉදඤ්ච පච්චයං ලද්ධා පුබ්බෙ කිලෙසමත්තනො,{5} ආනන්දි චිත්තා සුමනා පුත්තෙ සඞ්ගම්ම ලක්ඛණා.
6874. ඉදඤ්ච පච්චයං ලද්ධා පුබ්බෙ කිලෙසමත්තනො, ආනන්දි විත්තා පතීතා සහ පුත්තෙහි ලක්ඛණා.
6875. එකභත්තා{6} පුරෙ ආසිං නිච්චං ථණ්ඩිලසායිනී, ඉති මෙතං වතං ආසි තුම්හං කාමාහි පුත්තකා.
6876. තං මෙ වතං සමිද්ධජ්ජ තුම්හෙ සඞ්ගම්ම පුත්තකා, මාතුජම්පි තං පාලෙතු පිතුජම්පි ච පුත්තකා, අථො පි තං මහාරාජා සඤ්ජයො අභිරක්ඛතු.
6877. යං කිඤ්චත්ථි කතං පුඤ්ඤං මය්හං වෙච පිතුච්ච තෙ, සබ්බෙන තෙන කුසලෙන අජරො ත්වං අමරො භව.
6878. කප්පාසිකඤ්ච{1} කොසෙය්යං ඛොමකොදුම්බරානි{2} ච, සස්සු සුණ්හාය පාහෙසි යෙහි මද්දී අසොභථ.