6682. ආදු තෙ පහිතා දූතා ආදු සුත්තා පියංවදා, ආදු බහි නො නික්ඛන්තා ඛිඩ්ඪාසු පසුතා නු තෙ.
6683. නෙවාසං කෙසා දිස්සන්ති හත්ථපාදා න ජාලිනො, සකුණානං ව ඔපාතො කෙන නීතා මෙ දාරකා.
6684. ඉදං තතො දුක්ඛතරං සල්ලවිද්ධො යථා වණෙ, ත්යජ්ජ පුත්තෙ න පස්සාමි ජාලිං කණ්හාජිනඤ්චුභො.
6685. ඉදම්පි දුතියං සල්ලං කම්පෙති හදයං මම යඤ්ච පුත්තෙ න පස්සාමි ත්වඤ්ච මං නාභිභාසසි.
6686. අජ්ජෙව මෙ ඉමං රත්තිං රාජපුත්ත න සංසසි, මඤ්ඤෙ උක්කන්තසන්තං මං පාතො දක්ඛසි නො මතං.
6687. නනු මද්දී වරාරොහා රාජපුත්ති යසස්සිනී, පාතො ගතාසි උඤ්ඡාය කිමිදං සායමාගතා.
6688. නනු ත්වං සද්දමස්සොසි යෙ සරං පාතුමාගතා, සීහස්ස විනදන්තස්ස ව්යග්ඝස්ස ච නිකුජ්ජිතං.
6689. අහු පුබ්බනිමිත්තං මෙ විචරන්ත්යා බ්රහාවනෙ, ඛණිත්තො මෙ හත්ථා පතිතො උග්ගීවඤ්චාපි අංසතො.
6690. තදාහං බ්යථිතා භීතා පුථුං කත්වාන අඤ්ජලිං, සබ්බා දිසා නමස්සිස්සං අපි සොත්ථි ඉතො සියා.
6691. මා හෙව නො රාජපුත්තො හතො සීහෙන දීපිනා, දාරකා වා පරාමට්ඨා අච්ඡකොකතරච්ඡිහි.{1}
6692. සීහො ව්යග්ඝො ච දීපී ච තයො වාලා වනෙ මිගා, තෙ මං පරියාවරුං මග්ගං තෙන සායම්හි ආගතා.
6693. අහං පතිඤ්ච පුත්තෙ ච ආචෙරමිව මාණවො, අනුට්ඨිතා{2} දිවාරත්තිං ජටිනී බ්රහ්මචාරිනී.
6694. අජිනානි පරිදහිත්වා වනමූලඵලහාරියා, විචරාමි දිවාරත්තිං තුම්හං කාමා හි පුත්තකා.
6695. ඉමං{3} සුවණ්ණහාලිද්දිං ආභතං පණ්ඩුබෙළුවං, රුක්ඛපක්කානි චාහාසිං ඉමෙ තෙ පුත්තා කීළනා.
6696. ඉමං මුළාවටකං{4} සාලුකං පිඤ්ජරොදකං,{5} භුඤ්ජ ඛුද්දෙහි සංයුත්තං සහ පුත්තෙහි ඛත්තිය.
6697. පදුමං ජාලිනො දෙහි කුමුදං පන කුමාරියා, මාලිනෙ පස්ස නච්චන්තෙ සිවි පුත්තානි අව්භය.
6698. තතො කණ්හාජිනායාපි නිසාමෙහි රථෙසභ, මඤ්ජුස්සරාය වග්ගුයා අස්සමං උපයන්තියා.{6}
6699. සමානුසුඛදුක්ඛම්හා රට්ඨා පබ්බජිතා උභො, අපි සිවිපුත්තෙ පස්සෙසි ජාලිං කණ්හාජිනඤ්චුභො.
6700. සමණෙ බ්රාහ්මණෙ නූන බ්රහ්මචරියපරායනෙ, අහං ලොකෙ අභිසපිං සීලවන්තෙ බහුස්සුතෙ; ත්යජ්ජ පුත්තෙ න පස්සාමි ජාලිං කණ්හාජිනඤ්චුභො.
6701. ඉමෙ තෙ ජම්බුකා රුක්ඛා වෙදිසා සින්ධුවාරිකා, විවිධානි රුක්ඛජාතානි තෙ කුමාරා න දිස්සරෙ.
6702. අස්සත්ථා පනසා චෙමෙ නිග්රොධා ච කපිත්ථනා, විවිධානි ඵලජාතානි තෙ කුමාරා න දිස්සරෙ.
6703. ඉමෙ තිට්ඨන්ති ආරාමා අයං සීතොදිකා නදී, යත්ථස්සු පුබ්බෙ කීළිංසු තෙ කුමාරා න දිස්සරෙ.
6704. විවිධානි පුප්ඵජාතානි අස්මිං උපරිපබ්බතෙ, යත්ථස්සු පුබ්බෙ ධාරිංසු තෙ කුමාරා න දිස්සරෙ.
6705. විවිධානි ඵලජාතානි අස්මිං උපරිපබ්බතෙ, යත්ථස්සු පුබ්බෙ භුඤ්ජිංසු තෙ කුමාරා න දිස්සරෙ.
6706. ඉමෙ තෙ හත්ථිකා අස්සා බලිවද්දා ච තෙ ඉමෙ, යෙහිස්සු පුබ්බෙ කීළිංසු තෙ කුමාරා න දිස්සරෙ.
6707. ඉමෙ සාමා සසොලූකා{1} බහුකා කදලීමිගා, යෙහිස්සු පුබ්බෙ කීළිංසු තෙ කුමාරා න දිස්සරෙ.
6708. ඉමෙ හංසා ච කොඤ්චා ච මයූරා චිත්රපෙඛුනා, යෙහිස්සු පුබ්බෙ කීළිංසු තෙ කුමාරා න දිස්සරෙ.
6709. ඉමා තා වනගුම්බායො පුප්ඵිතා සබ්බකාලිකා, යත්ථස්සු පුබ්බෙ කීළිංසු තෙ කුමාරා න දිස්සරෙ.
6710. ඉමා තා පොක්ඛරණියො රම්මා චක්කවාකූපකූජිතා, මද්දාලකෙහි සඤ්ඡන්නා පදුමුප්පලකෙහි ච; යත්ථස්සු පුබ්බෙ කීළිංසු තෙ කුමාරා න දිස්සරෙ.
6711. න තෙ කට්ඨානි භින්නානි න තෙ උදකමාභතං, අග්ගිපි තෙ න හාපිතො කින්නු මන්දොව ඣායසී:
6712. පියො පියෙන සඞ්ගම්ම සමො මෙ ව්යපහඤ්ඤති, ත්යජ්ජ පුත්තෙ න පස්සාමි ජාලිං කණ්හාජිනඤ්චුභො.
6713. න ඛො නො දෙව පස්සාමි යෙන තෙ නිහතා මතා, කාකොලාපි න වස්සන්ති හතා මෙ නූන දාරකා.
6714. න ඛො නො දෙව පස්සාමි යෙන තෙ නිහතා මතා, සකුණාපි න වස්සන්ති මතා මෙ නූන දාරකා.
6715. සා තත්ථ පරිදෙවිත්වා පබ්බතානි වනානි ච, පුනදෙවස්සමං ගන්ත්වා සාමිකස්සන්ති{1} රොදති.
6716. න ඛො නො දෙව පස්සාමි යෙන තෙ නිහතා මතා, කාකොලාපි න වස්සන්ති හතා මෙ නූන දාරකා.
6717. න ඛො නො දෙව පස්සාමි යෙන තෙ නිහතා{2} මතා, සකුණාපි න වස්සන්ති මතා මෙ නූන දාරකා.
6718. න ඛො නො දෙව පස්සාමි යෙන තෙ නිහතා මතා, විචරන්ති රුක්ඛමූලෙසු පබ්බතෙසු ගුහාසු ච.
6719. ඉති මද්දි වරාරොහා රාජපුත්තී යසස්සිනී, බාහා පග්ගය්හ කන්දිත්වා තත්ථෙව පතිතා ඡමා.
6720. තමජ්ඣපත්තං රාජපුත්තිං උදකෙන අභිසිඤ්චථ, අස්සත්ථං තං විදිත්වාන අථ නං එතදබ්රවි.
6721. ආදියෙනෙව තෙ මද්දී දුක්ඛං න කාතුමිච්ඡිසං, දළිද්දො යාචකො වුද්ධො බ්රාහ්මණො ඝරමාගතො; තස්ස දින්නා මයා පුත්තා මද්දී මා භායි අස්සස.{3}
6722. මං පස්ස මද්දී මා පුත්තෙ බාළ්හං පරිදෙවසි, ලච්ඡාම පුත්තෙ ජිවන්තා අරොගා ච භවාමසෙ.
6723. පුත්තෙ පසුඤ්ච ධඤ්ඤඤ්ච යඤ්ච අඤ්ඤං ඝරෙ ධනං, දජ්ජා සප්පුරිසො දානං දිස්වා යාචකමාගතෙ; අනුමොදාහි මෙ මද්දී පුත්තකෙ දානමුත්තමං.
6724. අනුමොදාමි තෙ දෙව පුත්තකෙ දානමුත්තමං, දත්වා චිත්තං පසාදෙහි භීයො දානදදො භව.
6725. යො ත්වං මච්ඡෙරභූතෙසු මනුස්සෙසු ජනාධිප, බ්රාහ්මණස්ස අදා දානං සිවීනං රට්ඨවඩ්ඪනො.
6726. නින්නාදිතා තෙ පඨවී සද්දො තෙ තිදිවං ගතො, සමන්තා විජ්ජුතා ආගුං ගිරීනංව පටිස්සුතා.
6727. තස්ස තෙ අනුමොදන්ති උභො නාරදපබ්බතා ඉන්දො ච බ්රහ්මා ච පජාපති ච සොමො යමො වෙස්සවණො ච රාජා සබ්බෙ දෙවා අනුමොදන්ති තාවතිංසා ස ඉන්දකා.
6728. ඉති මද්දී වරාරොහා රාජපුත්ති යසස්සිනී, වෙස්සන්තරස්ස අනුමොදි පුත්තකෙ දානමුත්තමං.
මද්දිපබ්බං නිට්ඨිතං.
6729. තතො රත්යා විවසනෙ සුරියස්සුග්ගමනම්පති, සක්කො බ්රාහ්මණවණෙණ පාතො තෙසං අදිස්සථ.{1}
6730. කච්චින්නු භොතො කුසලං කච්චි භොතො අනාමයං, කච්චි උඤ්ඡෙන යාපෙථ කච්චි මූලඵලාබහු.
6731. කච්චි ඩංසා ච මකසා ච අප්පමෙව සිරිංසපා,{2} වනෙ වාලමිගාකිණ්ණෙ කච්චි හිංසා න විජ්ජති.
6732. කුසඤ්චෙව නො බ්රහ්මෙ අථො බ්රහ්මෙ අනාමයං, අථො උඤ්ඡෙන යාපෙම අථො මූලඵලාබහු.
6733. අතො ඩංසා ච මකසා ච අප්පමෙව සිරිංසපා,{2} වනෙ වාලමිගාකිණ්ණෙ හිංසා අම්හං න විජ්ජති.
6734. සත්ත නො මාසෙ වසතං අරඤ්ඤෙ ජීවසොකිනං, ඉදම්පි දුතියං පස්සාම බ්රාහ්මණං දෙවවණ්ණිනං; ආදාය බෙළුවං දණ්ඩං ධාරෙන්තං අජිනක්ඛිපං.
6735. ස්වාගතන්තෙ මහාබ්රහ්මෙ අථොතෙ අදුරාගතං, අන්තො පවිස භද්දන්තෙ පාදෙ පක්ඛාලයස්සු තෙ.
6736. තින්දුකානි පියාලානි මධුකෙ කාසුමාරියො, ඵලානි ඛුද්දකප්පානි භුඤ්ජ බ්රහ්මෙ වරං වරං.
6737. ඉදම්පි පානීයං සීතං ආභතං ගිරිගබ්භරා, තතො පිව මහාබ්රහ්මෙ සචෙ ත්වං අභිකඞ්ඛසි.
6738. අථ ත්වං කෙන වණ්ණෙන කෙන වා පන හෙතුනා, අථප්පත්තො බ්රහාරඤ්ඤං තං මෙ අක්ඛාහි පුච්ඡිතො.
6739. යථා වාරිවහො පූරො සබ්බකාලං න ඛීයති, එවං ත යාචිතාගඤ්ඡිං භරියං මෙ දෙහි යාචිතො.
6740. දදාමි න විකම්පාමි යං මං යාචසි බ්රහාමණ, සන්තං නප්පටිගූහාමි{1} දානෙ මෙ රමතී මනො.
6741. මද්දිං හත්ථෙ ගහෙත්වාන උදකස්ස ච කමණ්ඩලුං, බ්රාහ්මණස්ස අදා දානං සිවීනං රට්ඨවඩ්ඪනො.
6742. තදාසි යං භිංසනකං තදාසි ලොමංසනං, මද්දිං පරිච්චජන්තස්ස මෙදිනී සමකම්පථ.
6743. නෙවස්ස මද්දී භකුටී{2} න සන්ධීයති න රොදති, පෙක්ඛතෙවස්ස තුණ්හී සා එසො ජානාති යං වරං.
6744. ජාලිං කණ්හාජිනං ධීතං මද්දිදෙවිං පතිබ්බතං, චජමානො න චින්තෙසිං බොධියා යෙව කාරණා.
6745. න මෙ දෙස්සා උභො පුත්තා මද්දී දෙවී න දෙස්සියා, සබ්බඤ්ඤුතං පියං මය්හං තස්මා පියෙ අදාසහං.
6746. කොමාරී යස්සහං{3} භරියා සාමිකො මම ඉස්සරො, යස්සිච්ඡෙ තස්ස මං දජ්ජා වික්කිණෙය්ය හනෙය්ය වා.
6747. තෙසං සඞ්කප්පමඤ්ඤාය දෙවින්දො එතදබ්රවි, සබ්බෙ ජිතා තෙ පච්චුහා යෙ දිබ්බා යෙ ච මානුසා.
6748. නින්නාදිතා තෙ පඨවී සද්දො තෙ තිදිවං ගතො, සමන්තා විජ්ජුතා ආගුං ගිරීනංව පටිස්සුතා.
6749. තස්ස තෙ අනුමොදන්ති උභො නාරදපබ්බතා, ඉන්දො ච බ්රහ්මා ච පජාපතී ච, සොමො යමො වෙස්සවණො ච රාජා සබ්බෙ දෙවා අනුමොදන්ති දුක්කරං හි කරොති සො.
6750. දුද්දදං දදමානානං දුක්කරං කම්ම කුබ්බතං, අසන්තො නානුකුබ්බන්ති සතං ධම්මො දුරන්නයො.
6751. තස්මා සතඤ්ච අසතඤ්ච නානා හොති ඉතොගති, අසන්තො නිරයං යන්ති සන්තො සග්ගපරායණා.
6752. යමෙතං කුමාරෙ අද්දා භරියං අදදා වනෙ වසං, බ්රහ්මයානමනොක්කම්ම සග්ගෙ තෙ තං විපච්චතු.{1}
6753. දදාමි භොතො භරියං මද්දිං සබ්බඞ්ගසොභනං, ත්වඤ්ඤෙව මද්දියා ඡන්නො මද්දී ච පතිනා සහ.
6754. යථා පයො ච සඞ්ඛො ච උභො සමානවණ්ණිනො, එවං තුවං ච මද්දී ච සමානමනචෙතසා.
6755. අවරුද්ධෙත්ථ අරඤ්ඤමිං උභො සම්මථ අස්සමෙ, ඛත්තියා ගොත්තසම්පන්නා සුජාතා මාතුපෙත්තිතො; යථා පුඤ්ඤානි කයිරාථ දදන්තා අපරාපරං.
6756. සක්කොහමස්මි දෙවින්දො ආගතොස්මි තවන්තිකෙ, වරං වරස්සු රාජිසි වරෙ අට්ඨ දදාමි තෙ.
6757. වරං වෙ මෙ අදො සක්ක සබ්බභූතානමිස්සර, පිතා මං අනුමොදෙය්ය ඉතො පත්තං සකං ඝරං; ආසන්නෙ නිමන්තෙය්ය පඨමං තං වරං වරෙ.
6758. පුරිසස්ස වධං න රොචෙය්යං අපිකිබ්බිසකාරිකං, වජ්ඣං වධම්භා මොචෙය්යං දුතියෙතං වරං වරං.
6759. යෙ වුද්ධා යෙ ච දහරා යෙ ච මජ්ඣිමපොරිසා, මමෙව උපජීවෙය්යුං තතියෙතං වරං වරෙ.
6760. පරදාරං න ගච්ඡෙය්යං සදාරපසුතො සියං, ථිනං වසං නගච්ඡෙය්යං චතුත්ථෙතං වරං වරෙ,
6761. පුත්තො මෙ සක්ක ජායෙථ සො ච දීඝායුකො සියා, ධම්මෙන ජිනෙ පඨවිං පඤ්චමෙතං වරං වරෙ.
6762. තතො රත්යා විවසනෙ සුරියස්සුග්ගමනම්පති, දිබ්බා භක්ඛා පාතුභාවෙය්යුං ඡට්ඨමෙතං වරං වරෙ.
6763. දදතො මෙ න ඛීයෙථ දත්වා නානුතපෙය්යහං, දදං චිත්තං පසාදෙය්යං සත්තමෙතං වරං වරෙ.
6764. ඉතො චිමුච්චමානාහං සග්ගගාමී විසෙසගු, අනිබ්බත්ති තතො අස්සං අට්ඨමෙතං වරං වරෙ.
6765. තස්ස තං වචනං සුත්වා දෙවින්දො එතදබ්රවි, අචිරං වත තෙ තාතො පිතා තං දිට්ඨුමෙස්සති.
6766. ඉදං වත්වාන මඝවා දෙවරාජා සුජම්පති, වෙස්සන්තරෙ වරං දත්වා සග්ගකායං අපක්කමි.
සක්කපබ්බං නිට්ඨිතං.
6767. කස්සෙතං මුඛමාභාති හෙමං වුත්තත්තමග්ගිනා, නික්ඛංව ජාතරූපස්ස උක්කාමුඛපභංසිතං.
6768. උභො සදීසපචචඞ්ගා උභො සදිසලක්ඛණා, ජාලිස්ස සදිසො එකො එකා කණ්හාජිනා යථා.
6769. සීහා බිලාව නික්ඛන්තා උභො සම්පතිරූපකා, ජාතරූපමයා යෙව ඉමෙ දිස්සන්ති දාරකා.
6770. කුතො නු ත්වං{1} භාරද්වාජ ඉමෙ ආනෙසි දාරකෙ, අජ්ජ රට්ඨමනුප්පත්තො කුතො ආගච්ඡසි බ්රාහ්මණ.{2}
6771. මය්හන්තෙ දාරකා දෙව දින්නා විත්තෙන සඤ්ජය, අජ්ජ පන්නරසා රත්තී යතො දින්නාමෙ{3} දාරකා.
6772. කෙන වා වාචපෙය්යෙන{4} සම්මාඤායෙන සද්දහෙ, කො තෙ තං දානමද්දා පුත්තකෙ දානමුත්තමං.
6773. යො යාචතං පතිට්ඨාසි භූතානං ධරණීරිව, සො මෙ වෙස්සන්තරො රාජා පුත්තෙදාසි වනෙ වසං.
6774. යො යාචතං ගතී ආසි සවන්තීනංව සාගරො, සො මෙ වෙස්සන්තරො රාජා පුත්තෙදාසි වනෙ වසං.
6775. දුක්කං වත භො රඤ්ඤා සද්ධෙන ඝරමෙසිනා, කථං නු පුත්තකෙ දජ්ජා අරඤ්ඤෙ අවරුද්ධකො.
6776. ඉමං භොන්තො නිසාමෙථ යාවන්තෙත්ථ සමාගතා, කථං මෙ වෙස්සන්තරො රාජා පුත්තෙදාසි වනෙ වසං.
6777. දාසං දාසිඤ්ච සො දජ්ජා අස්සං වාස්සතරීරථං,{5} හත්ථිඤ්ච කුඤ්ජරං දජ්ජා කථං සො දජ්ජා දාරකෙ.
6778. යස්ස නත්ථි{6} ඝරෙ දාසො අස්සො වාස්සතරීරථො, හත්ථි ච කුඤ්ජරො නාගො කිං සො දජ්ජා පිතාමහ.
6779. දානමස්ස පසංසාම න ච නින්දාම{7} පුත්තකා, කථන්නු හදයං ආසි තුම්හෙ දත්වා වණිබ්බකෙ.