6583. තදාසි යං භිංසනකං තදාසි ලොමහංසනං, යං කුමාරෙ පදින්නම්හි මෙදිනී සමකම්පථ.
6584. තදාසි යං භිංසනකං තදාසි ලොමහංසනං, යං පඤ්ජලිකතො රාජා කුමාරෙ සුඛවච්ඡිතෙ; බ්රාහ්මණස්ස අදා දානං සිවීනං රට්ඨවඩ්ඪනො.
6585. තතො සො බ්රාහ්මණො ලුද්දො ලතං දන්තෙහි ඡින්දිය, ලතාය හත්ථෙ බන්ධිත්වා ලතාය අනුමජ්ජථ,{6}
6586. තතො සො රජ්ජුමාදාය දණ්ඩඤ්චාදාය බ්රාහ්මණො, ආකොටයන්තො තෙ නෙති සිවිරාජස්ස පෙක්ඛතො.
6587. තතො කුමාරා පක්කාමුං බ්රාහ්මණස්ස පමුඤ්චිය, අස්සුපුණ්ණෙහි නෙත්තෙහි පිතරං සො උදික්ඛති.
6588. වෙධං අස්සත්ථපන්නංව පිතු පාදානි වන්දති, පිතුපාදානි වන්දිත්වා ඉදං වචනමබ්රවි.
6589. අම්මා ච තාත නික්ඛන්තා ත්වං ච නො තාත දස්සසි, යාව අම්මම්පි පස්සෙමු අථ නො තාත දස්සසි.
6590. අම්මා ච තාත නික්ඛන්තා ත්වං ච නො තාත දස්සසි, මා නො ත්වං තාත අද්දා යාව අම්මාපි එති{1} නො; තදායං බ්රාහ්මණො කාමං වික්කිණාතු හනාතු වා.
6591. බලඞ්කපාදො{2} අද්ධනඛො අථො ඔවද්ධපිණ්ඩිකො, දීඝුත්තරොට්ඨො චපලො කළාරො භග්ගනාසකො.
6592. කුම්භොදරො භග්ගපිට්ඨි අථො විසම චක්ඛුලො,{3} ලොහමස්සු භරිතකෙසො වලීනං තිලකාහතො.
6593. පිඞ්ගලො ච විනතො ච විකටො{4} ච බ්රහා ඛරො, අජිනානි ච සන්නද්ධො අමනුස්සො භයානකො.
6594. මනුස්සො උදාහු යක්ඛො මංසලොහිතභොජනො, ගාමා අරඤ්ඤං ආගම්ම ධනං තං තාත යාචති, නීයමානෙ පිසාචෙන කින්නු තාත උදික්ඛසි.
6595. අස්මා නූන තෙ හදයං ආයසං දළ්හබන්ධනං. යො නො බද්ධෙ න ජානාසි බ්රාහ්මණෙන ධනෙසිනා, අච්චායිකෙන ලුද්දෙන යො නො ගාවොව සුම්භති.
6596. ඉධෙව අච්ඡථං කණ්හා න සා ජානාසි කිස්මිචි, මිගීව ඛීරසම්මත්තා යූථා{5} හීනා පකන්දති,
6597. න මෙ ඉදං තථා දුක්ඛං ලබ්භා හි පුමුනා ඉදං, යඤ්ච අම්මං න පස්සාමි{6} තං මෙ දුක්ඛතරං ඉතො.
6598. න මෙ ඉදං තථා දුක්ඛං ලබ්භා හි පුමුනා ඉදං, යඤ්ච තාතං න පස්සාමි තං මෙ දුක්ඛතරං ඉතො.
6599. සා නූන කපණා අම්මා චිරරත්තාය රුච්ඡති, කණ්හාජිනං අපස්සන්තී කුමාරිං චාරුදස්සනිං.
6600. සො නූන කපණො තාතො චිරරත්තාය රුච්ඡති, කණ්හාජිනං අපස්සන්තො කුමාරිං චාරුදස්සනිං.
6601. සා නූන කපණා අම්මා චිර රත්තාය රුච්ඡති අස්සමෙ, කණ්හාජිනං අපස්සන්තී කුමාරිං චාරුදස්සනිං
6602. සො නූන කපණො තතො චිරං රුච්ඡති අස්සමෙ, කණ්හාජිනං අපස්සන්තො කුමාරිං චාරුදස්සනිං.
6603. සා නූන කපණා අම්මා චිරරත්තාය රුච්ඡති, අඩ්ඪරත්තෙ ව රත්තෙ වා නදීව අවසුච්ඡති.
6604. සො නූන කපණො තාතො චිරරත්තාය රුච්ඡති, අඩ්ඪරත්තෙ ව රත්තෙ වා නදීව අවසුච්ඡති.{1}
6605. ඉමෙ තෙ ජම්බුකා රුක්ඛා වෙදිසා සින්ධුවාරිකා,{2} විවිධානි රුක්ඛජාතානි තානි අජ්ජ ජහාමසෙ.
6606. අස්සත්ථා පනසා චෙමෙ නිග්රොධා ච කපිත්ථනා, විවිධානි ඵලජාතානි තානි අජ්ජ ජහාමසෙ.
6607. ඉමෙ තිට්ඨන්ති ආරාමා අයං සීතොදිකා{3} නදී, යත්ථස්සු පුබ්බෙ කීළාම තානි අජ්ජ ජහාමසෙ.
6608. විවිධානි පුප්ඵජාතානි අස්මිං උපරි පබ්බතෙ, යානස්සු පුබ්බෙ ධාරෙම තානි අජ්ජ ජහාමසෙ.
6609. විවිධානි ඵලජාතානි අස්මිං උපරි පබ්බතෙ, යානස්සු පුබ්බෙ භුඤ්ජාම තානි අජ්ජ ජහාමසෙ.
6610. ඉමෙ නො හත්ථිකා අස්සා බලිවද්දා ච නො ඉමෙ, යෙහිස්සු පුබ්බෙ කීළාම තානි ආජ්ජ ජහාමසෙ.
6611. නීයමානා කුමාරා තෙ පිතරං එතදබ්රවුං, අම්මං ආරොග්යං වජ්ජාසි ත්වං ච තාත සුඛී භව.
6612. ඉමෙ නො හත්ථිකා අස්සා බලිවද්දා ච නො ඉමෙ, තානි අම්මාය දජ්ජාසි සොකං තෙහි විනෙස්සති.{1}
6613. ඉමෙ නො හත්ථිකා අස්සා බලිවද්දා ච නො ඉමෙ, තානි අම්මා උදික්ඛන්ති සොකං පටිවිනෙස්සති.
6614. තතො වෙස්සන්තරො රාජා දානං දත්වාන ඛත්තියො, පණ්ණසාලං පවිසිත්වා කරුණං පරිදෙවයි.
6615. ක න්වජ්ජ ජාතා තසිතා උපරුච්ඡන්ති දාරකා, සායං සංවෙසනාකාලෙ කො නෙ දස්සති භොජනං.
6616. කං න්වජ්ජ ඡාතා තසිතා උපරුච්ඡන්ති දාරකා, සායං සංවෙසනාකාලෙ අම්ම ඡාතම්හ දෙථ නො.
6617. කථන්නු පථං ගච්ඡන්ති පත්තිකා අනුපාහනා, සන්තා සූණෙහි පදෙහි කො නෙ හත්ථෙ ගහෙස්සති.
6618. කථන්නු සො න ලජ්ජෙය්ය සම්මුඛා පහරං මම, අදූසකානං පුත්තානං අලජ්ජී වත බ්රාහ්මණො.
6619. යො හි මෙ දාසි දාසස්ස අඤ්ඤො වා පන ජෙස්සියො,{2} තස්සාපි සුවිහීනස්ස කො ලජ්ජි පහරිස්සති.
6620. වාරිජස්සෙව මෙ සතො බුද්ධස්ස කුමිනාමුඛෙ, අක්කොසති පහරති පියෙ පුත්තෙ අපස්සතො.
6621. ආදුං{3} චාපං ගහෙත්වාන ඛග්ගං බන්ධිත්වා වාමතො, ආනයාමි සකෙ පුත්තෙ පුත්තානං හි වධො දුඛො.
6622. අට්ඨානමෙතං{4} දුක්ඛරූපං යං කුමාරා විහඤ්ඤරෙ, සතඤ්ච ධම්මමඤ්ඤාය කො දත්වා අථ තප්පති.
6623. සච්චං කිරෙවමාහංසු නරා එකච්චියා ඉධ, යස්ස නත්ථි සකා මාතා යථා නත්ථි{5} තථෙව සො.
6624. එහි කණ්හෙ මරිස්සාම නත්ථත්ථො ජීවිතෙන නො, දින්නම්හාපි{1} ජනින්දෙන බ්රාහ්මණස්ස ධනෙසිනො; අච්චායිකස්ස ලුද්දස්ස යො නො ගාවොව සුම්භති.
6625. ඉමෙ තෙ ජම්බුකා රුක්ඛා වෙදිසා සින්ධුවාරිකා, විවිධානි රුක්ඛජාතානි තානි කණ්හෙ ජහාමසෙ.
6626. අස්සත්ථා පනසා චෙමෙ නිග්රොධා ච කපිත්ථනා, විවිධානි ඵලජාතානි තානි කණ්හෙ ජහාමසෙ.
6627. ඉමෙ තිට්ඨන්ති ආරාමා අයං සීතොදිකා නදී, යත්ථස්සු පුබ්බෙ කීළාම තානි කණ්හෙ ජහාමසෙ.
6628. විවිධානි පුප්ඵජාතානි අස්මිං උපරි පබ්බතෙ, යානස්සු පුබ්බෙ ධාරෙම තානි කණ්හෙ ජහාමසෙ.
6629. විවිධානි ඵලජාතානි අස්මිං උපරි පබ්බතෙ, යානස්සු පුබ්බෙ භුඤ්ජාම තානි කණ්හෙ ජහාමසෙ.
6630. ඉමෙ නො හත්ථිකා අස්සා බලිවද්දා ච නො ඉමෙ, යෙහිස්සු පුබ්බෙ කීළාම තානි කණ්හෙ ජහාමෙස.
6631. නීයමානා කුමාරා තෙ බ්රාහ්මණස්ස පමුඤ්චිය, තෙන තෙන පධාවිංසු ජාලී කණ්හාජිනා චුභො.
6632. තතො සො රජ්ජුමාදාය දණ්ඩඤ්චාදාය බ්රාහ්මණො, ආකොටයන්තො තෙ නෙති සිවිරාජස්ස පෙක්ඛතො.
6633. තං තං කණ්හාජිනාවොච අයං මං තාත බ්රාහ්මණො, ලට්ඨියා පතිකොටෙති ඝරෙ ජාතංව දාසියං.
6634. න චායං බ්රාහ්මණො තාත ධම්මිකා හොන්ති බ්රාහ්මණා, යක්ඛො බ්රාහ්මණවණ්ණෙන ඛාදිතුං තාත නෙති නො; නියමානෙ පිසාචෙන කින්නු තාතා උදික්ඛසි.
6635. ඉමෙ නො පාදුකා දුක්ඛා දීඝො චද්ධා සුදුග්ගමො, නීචෙ වොලම්බතෙ සුරියො බ්රාහ්මණො ච තරෙති{2} නො.
6636. ඔකන්දාමසි{3} භූතානි පබ්බතානි වනානි ච, සරස්ස සිරසා වන්දාම සුපතිත්ථෙ ච ආපකෙ.{4}
6637. තිණලතා ච ඔසද්ධ්යො පබ්බතානි වනානි ච, අම්මං ආරොග්යං වජ්ජාථ අයං නො නෙති බ්රාහ්මණො.
6638. වජ්ජන්නු භොන්තො අම්මඤ්ච මද්දිං අම්හාකමාතරං, සචෙ අනුපතිතුකාමාසි ඛිප්පං අනුපතියාසි නො.
6639. අයං එකපදී එති උජුං ගච්ඡති අස්සමං, තමෙවනුපතෙය්යාසි අපි පස්සෙසි නො ලහුං.
6640. අහො වත රෙ ජටිනි වනමූලඵලහාරිකෙ, සුඤ්ඤං දිස්වාන අස්සමං තං තෙ දුක්ඛං භවිස්සති.
6641. අතිවෙලං නූන අම්මාය උඤ්ඡාලද්ධො අනප්පකො, යා නො බද්ධෙ{1} න ජානාති බ්රාහ්මණෙන ධනෙසිනා; අච්චායිකෙන ලුද්දෙන යො නො ගාවොව සුම්භති.
6642. අහජ්ජ{2} අම්මං පස්සෙමු සායං උඤ්ඡාතො ආගතං, දජ්ජා අම්මා බ්රාහ්මණස්ස ඵලං ඛුද්දෙන මිස්සිතං.
6643. තදායං අසිතො ධාතො න බාළ්හං තරයෙය්ය නො, සූණා ච වත නො පදා බාළ්හං තාරෙති බ්රාහ්මණො; ඉති තත්ථ විලපිංසු කුමාරා මාතුගිද්ධිනො.
කුමාරපබ්බං.
6644. තෙසං ලාලප්පිතං සුත්වා තයො වාලා වනෙ මිගා, සීහො ව්යග්ඝො ච දීපි ච ඉදං වචනමබ්රවුං.
6645. මාහෙව නො රාජපුත්තී සායං උඤ්ඡාතො ආගමා, මාහෙවම්භාකං නිබ්භොගෙ හෙඨයිත්ථ{3} වනෙ මිගා.
6646. සීහො චෙනං විහෙඨෙය්ය ව්යග්ඝො දීපි ච ලක්ඛණං, නෙව ජාලීකුමාරස්ස කුතො කණ්හාජිනා සියා; උභයෙනෙව ජීයෙථ පතිං පුත්තෙ ච ලක්ඛණාති.
6647. ඛණිත්තිකං මෙ පතති{1} දක්ඛිණක්ඛී ච ඵන්දති,{2} අඵලා ඵලිනො රුක්ඛා සබ්බා මුය්හන්ති මෙ දිසා.
6648. තස්සා සායන්හකාලම්හි අස්සමාගමනං පති, අත්ථඞ්ගතම්භි{3} සුරියම්හි වාලා පන්ථෙ උපට්ඨහුං.
6649. නීචෙ වොලම්බතෙ සුරියො දූරෙ ච වත අස්සමො, යඤ්ච නෙසං ඉතො භස්සං{4} තං තෙ භුඤ්ජෙය්යුං භොජනං.
6650. සො නූන ඛත්තියො එකො පණ්ණසාලාය අච්ඡති, තොසෙන්තො දාරකෙ ඡාතෙ මමං දිස්වා අනායතිං.
6651. තෙ නූන පුත්තකා මය්හං කපණාය වරාකියා, සායං සංවෙසනාකාලෙ ඛිරපීතාව{5} අච්ඡරෙ.
6652. තෙ නූන පුත්තකා මය්හං කපණාය වරාකියා, සායං සංවෙසනාකාලෙ වාරිපීතාව අච්ඡරෙ.
6653. තෙ නූන පුත්තකා මය්හං කපණාය වරාකියා, පච්චුග්ගතා මං තිට්ඨන්ති වච්ඡා බාලාව මාතරං.
6654. තෙ නූන පුත්තකා මය්හං කපණාය වරාකියා, පච්චුග්ගතා මං තිට්ඨන්ති හංසාව උපරි පල්ලලෙ.
6655. තෙ නූන පුත්තකා මය්හං කපණාය වරාකියා, පච්චුග්ගතා මං තිට්ඨන්ති අස්සමස්සාවිදූරතො.
6656. එකායනො එකපථො සරා සොබ්භා ච පස්සතො, අඤ්ඤං මග්ගං න පස්සාමි යෙන ගච්ඡෙය්ය අස්සමං.
6657. මිගා නමත්ථු රාජානො කානනස්මිං මහබ්බලා, ධම්මෙන භාතරො හොථ මග්ගං මෙ දෙථ යාචිතා.
6658. අවරුද්ධස්සහං භරියා රාජපුත්තස්ස සිරීමතො, තඤ්චාහං නාතිමඤ්ඤාමි රාමං සීතාවනුබ්බතා.
6659. තුම්හෙ ච පුත්තෙ පස්සෙථ සායං සංවෙසනං පති, අහඤ්ච පුත්තෙ පස්සෙය්යං ජාලිං කණ්හාජිනඤ්චුභො.
6660. බහුං චිදං මූලඵලං භක්ඛො චායං අනප්පකො, තතො උපඩ්ඪං දස්සාමි මග්ගං මෙ දෙථ යාචිතා.
6661. රාජපුත්තී ච නො මාතා රාජපුත්තො ච නො පිතා, ධම්මෙන භාතරො හොථ මග්ගං මෙ දෙථ යාචිතා.
6662. තස්සා ලාලප්පමානාය බහුං කාරුඤ්ඤසංහිතං, සුත්වා නෙලපතිං වාචං වාලා පන්ථා අපක්කමුං.
6663. ඉමම්භහි නං පදෙසම්භි පුත්තකා පංසුකුණ්ඨිතා, පච්චුග්ගතා මං තිට්ඨන්ති වච්ඡා බාලාව මාතරං.
6664. ඉමම්හි නං පදෙසම්භි පුත්තකා පංසුකුණ්ඨිතා, පච්චුග්ගතා මං තිට්ඨන්ති හංසාව උපරි පල්ලලෙ.
6665. ඉමම්හි නං පදෙසම්භි පුත්තකා පංසුකුණ්ඨිතා, පච්චුග්ගතා මං තිට්ඨන්ති අස්සමස්සාවිදූරතො.
6666. තෙ මිගා විය උක්කණ්ණා සමන්තාමභිධාවිනො, ආනන්දිතා පමුදිතා වග්ගමානාව කම්පරෙ. ත්යජ්ජ පුත්තෙ න පස්සාමි ජාලිං කණ්හාජිනඤ්චුභො.
6667. ඡකලීව{1} මිගී ඡාපං පක්ඛී මුත්තාව පඤ්ජරා, ඔහාය පුත්තෙ නික්ඛමිං සිහීවාමිසගිද්ධිනි; ත්යජ්ජ පුත්තෙ න පස්සාමි ජාලිං කණ්හාජිනඤ්චුභො.
6668. ඉදං තෙසං පරක්කන්තං නාගානමිව පබ්බතෙ, චිතකා පරිකිණ්ණායො{2} අස්සමස්සාවිදූරතො; ත්යජ්ජ පුත්තෙ න පස්සාමි ජාලිං කණ්හාජිනඤ්චුභො.
6669. වාලුකායපි{3} ඔකිණ්ණා පුත්තකා පංසුකුණ්ඨිතා, සමන්තා මභිධාවන්ති තෙ න පස්සාමි දාරකෙ.
6670. යෙ මං පුරෙ පච්චුදෙන්ති{4} අරඤ්ඤාදූරමායතිං, ත්යජ්ජ පුත්තෙ න පස්සාමි ජාලිං කණ්හාජිනඤ්චුභො.
6671. ඡකලිංව මිගිං ඡාපා පච්චුග්ගන්ත්වාන අස්සමං, දූරෙ මං පටිවිලොකෙන්ති තෙ න පස්සාමි දාරකෙ.
6672. ඉදං ච තෙසං කීළන්තං පතිතං පණ්ඩුබෙලුවං, ත්යජ්ජ පුත්තෙ න පස්සාමි ජාලිං කණ්හාජිනඤ්චුභො.
6673. ථනා ච මය්හිමෙ පුරා උරො ච සම්පදාලති, ත්යජ්ජ පුත්තෙ න පස්සාමි ජාලිං කණ්හාජිනඤ්චුභො.
6674. උච්ඡඞ්ගෙ මෙ විචිනන්ති ථනා එකාවලම්බති, ත්යජ්ජ පුත්තෙ න පස්සාමි ජාලිං කණ්හාජිනඤ්චුභො.
6675. යස්සු සායන්හසමයං පුත්තකා පංසුකුණ්ඨිතා, උච්ඡඞ්ගෙ මෙ විවත්තන්ති තෙ න පස්සාමි දාරකෙ.
6676. අයං සො අස්සමො පුබ්බෙ සමජ්ජො පටිභාති මං, ත්යජ්ජ පුත්තෙ අපස්සන්ත්යා භමතෙ විය අස්සමො.
6677. කිමිදං අප්පසද්දොව අස්සමො පටිභාති මං, කාකොලාපි න වස්සන්ති මතා මෙ නූන දාරකා.
6678. කිමිදං අප්පසද්දොව අස්සමො පටිභාති මං, සකුණාපි න වස්සන්ති මතා මෙ නූන දාරකා.
6679. කිමිදං තුණ්හීභූතොසි අපි රත්තෙව මෙ මනො, කාකොලාපි න වස්සන්ති මතා මෙ නූන දාරකා.
6680. කිමිදං තුණ්හීභූතොසි අපි රත්තෙව මෙ මනො, සකුණාපි න වස්සන්ති මතා මෙ නූන දාරකා.
6681. කච්චිනු මෙ අය්යපුත්ත මිගා ඛාදිංසු දාරකෙ, අරඤ්ඤෙ ඉරිනෙ{1} විවනෙ කෙන නීතා මෙ දාරකා.