6484. අදිට්ඨපුබ්බො සිවිරාජා සිවීහි විප්පවාසිතො, තමහං දස්සනමාගතො යදි ජානාසි සංස මෙ.
6485. එස සෙලො මහාබ්රහ්මෙ පබ්බතො ගන්ධමාදනො, යත්ථ වෙස්සන්තරො රාජා සහපුත්තෙහි සම්මති.
6486. ධාරෙන්තො බ්රාහ්මණං වණ්ණං ආසදඤ්ච මසං ජටං, චම්මවාසී ඡමා සෙති ජාතවෙදං නමස්සති.
6487. එතෙ නීලා පදිස්සන්ති නානාඵලධරා දුමා, උග්ගතා අබ්භකූටාව නීලා අඤ්ජනපබ්බතා.
6488. ධවස්සකණ්ණා ඛදිරා සාලාඵන්දනමාලුවා, සම්පවෙධන්ති වාතෙන සකිං පීතාව මාණවා.
6489. උපරි දුමපරියායෙසු සංගීතියොව සූයරෙ, නජ්ජුහා කොකිලසඞ්ඝා සම්පතන්ති දුමා දුමං.
6490. අව්හයන්තෙව ගච්ඡන්තං සාඛාපත්තසමෙරිතා,{1} රමයන්තෙව ආගන්තුං මොදයන්ති නිවාසිනං; යත්ථ වෙස්සන්තරො රාජා සහ පුත්තෙහි සම්මති.
6491. ධාරෙන්තො බ්රාහ්මණං වණ්ණං ආසදඤ්ච මසං ජටං, චම්මවාසී ඡමා සෙති ජාතවෙදං නමස්සති.
6492. කරෙරිමාලා විතතා භූමිභාගෙ මනොරමෙ, සද්දලාහරිතා භූමි න තත්ථුද්ධංසතෙ රජො.
6493. මයූරගීවසඞ්කාසා තූලඵස්සසමූපමා, තිණානි නාතිවත්තන්ති සමන්තා චතුරඞ්ගුලා.
6494. අම්බා ජම්බූ කපිත්ථා ච නීචෙ පක්කා උදුම්බරා, පරිභොගෙහි රුක්ඛෙහි වනං තං රතිවඩ්ඪනං.
6495. වෙළුරියවණ්ණූපනිභං මච්ඡගුම්බනිසවිතං, සුචිං සුගන්ධං සලිලං ආපො තත්ථපි සන්දති.
6496. තස්සාවිදූරෙ පොක්ඛරණී භූමිභාගෙ මනොරමෙ, පදුමුප්පලසඤ්ඡන්නා දෙවානමිව නන්දනෙ.
6497. තීණි උප්පලජාතානි තස්මිං සරසි බ්රාහ්මණ, විචිත්ර නීලානෙකානී සෙතා ලොහිතකානි ච.
6498. ඛොමා ච තත්ථ පදුමා සෙතයොගන්ධිකෙහි ච, කලම්බකෙහි{1} සඤ්ඡන්නො මුචලින්දො නාම සො සරො.
6499. අථෙත්ථ පදුමා ඵුල්ලා අපරියන්තාව{2} දිස්සරෙ, ගිම්හා හෙමන්තිකා ඵුල්ලා ජණ්ණුතග්ඝාඋපත්ථරා.
6500. සුරභී සම්පවායන්ති විචිත්තා පුප්ඵසන්ථතා, භමරා පුප්ඵගන්ධෙන සමන්තාමභිනාදිතා.
6501. අථෙත්ථ උදකන්තස්මිං රුක්ඛා තිට්ඨන්ති බ්රාහ්මණ, කදම්බා පාටලි ඵුල්ලා කොවිළාරා ච පුප්ඵිතා.
6502. අඞ්කොලා කච්චිකාරා ච පාරිජඤ්ඤා ච පුප්ඵිතා, වාරණසායනා රුක්ඛා මුචලින්දමභිතො{3} සරං.
6503. සිරීසා සෙතපාරීසා සාධු වායන්ති පද්මකා, නිග්ගුණ්ඩී සිරිනිග්ගුණ්ඩී අසනා චෙත්ථ පුප්ඵිතා.
6504. පංගුරා වකුලා සාලා{1} සොභඤ්ජනා ච පුප්ඵිතා, කෙතකා කණිකාරා ච කණවෙරා ච පුප්ඵිතා.
6505. අජ්ජුනා අජ්ජුකණ්ණා ච මහානාමා ච පුප්ඵිතා, සම්පුප්ඵිතග්ගා{2} තිට්ඨන්ති පජ්ජලන්තෙව කිංසුකා.
6506. සෙතපණ්ණී{3} සත්තපණ්ණා කදලියො කුසුම්භරා, ධනුතක්කාරි පුප්ඵෙහි සිංසපාවරණෙහි{4} ච.
6507. අච්ඡිවා සබලා රුක්ඛා සල්ලකියො ච පුප්ඵිතා. සෙතගෙරූ ච තගරා මංසිකුට්ඨා කුලාවරා.
6508. දහරා ච රුක්ඛා වුද්ධා ච අකුටිලා චෙත්ථ පුප්ඵිතා, අස්සමං උභතො ඨන්ති අග්යාගාරං සමන්තතො.
6509. අථෙත්ථ උදකන්තස්මිං බහුජාතො ඵජ්ජණිකො, මුග්ගතියො කරතියො සෙවාලසිංසකං බහූ.
6510. උද්දාපවන්තං{5} උල්ලුළිතං මක්ඛිකා භිංගුජාලකා, දාසීමකචකො{6} චෙත්ථ බහූ නීවෙකලම්බකා.
6511. ඵළම්බරකසඤ්ඡන්තා රුක්ඛා තිට්ඨන්ති බ්රාහ්මණ, සත්තාහං ධාරියමානානං ගන්ධො තෙසං න ඡිජ්ජති.
6512. උභතො සරං මුචලින්දං පුප්ඵා තිට්ඨන්ති සොභනා,{7} ඉන්දීවරෙහි සඤ්ඡන්නං වනං තං උපසොභිතං.{8} අඩ්ඪමාසං ධාරියමානානං ගන්ධො තෙසං න ඡිජ්ජති.
6513. නීලපුප්ඵි සෙතවාරී පුප්ඵිතා ගිරිකණ්ණිකා; කටෙරුකෙහි{9} සඤ්ඡන්නං වනං තං තුලසීභි ච.
6514. සද්දම්මතෙව ගන්ධෙන පුප්ඵසාඛාහි තං වනං, භමරා පුප්ඵගන්ධෙන සමන්තාමභිනාදිතා.
6515. තීණිකක්කරුජාතානි{1} තස්මිං සරසි බ්රාහ්මණ, කුම්භමත්තානි චෙකානි මුරජමත්තානි{2} තා උභො.
6516. අථෙත්ථ සාසපො බහුකො{3} නාදියො{4} හරිතායුතො, අසී තාලාව තිට්ඨන්ති ඡෙජ්ජා ඉන්දීවරා බහූ.
6517. අප්ඵොටා සුරියවල්ලී ච කාළියා{5} මධුගන්ධියා, අසොකා මුදයන්තී ච වල්ලිභො ඛුද්දපුප්ඵියො.
6518. කොරණ්ඩකා අනොජා ච පුප්ඵිතා නාගවල්ලිකා, රුක්ඛමාරුය්හ තිට්ඨන්ති ඵුල්ලා කිංසුකවල්ලියො.
6519. කටෙරුහා ච වාසන්තී යූථිකා{6} මධුගන්ධියො, නීලියා සුමනා භණ්ඩී සොභති පදුමුත්තරො.
6520. පාටලී සමුද්දකප්පාසි කණිකාරා ච පුප්ඵිතා, හෙමජාලාව දිස්සන්ති රුචිරා අග්ගිසිඛූපමා.
6521. යානි කානි{7} ච පුප්ඵානි ථලජානුදකානි ච, සබ්බානි තත්ථ දිස්සන්ති එවං රම්මො මහොදධි.
6522. අථස්සා පොක්ඛරණියා පහූතා වාරිගොචරා, රොහිතා නළපී{8} සිඞ්ගු කුම්භීලා මකරා සුසු.
6523. මධූ ච මධුලට්ඨි ච තාලීසා ච පියඞ්ගුකා, උන්නකා භද්දමුත්තා ච{9} සතපුප්ඵා{10} ච ලොලුපා.
6524. සුරභී ච රුක්ඛා තගරා{11} පහූතා තුඞ්ගවණ්ටකා,{12} පද්මකා නරදා කුට්ඨා ඣාමකා ච හරෙණුකා.
6525. හලිද්දකා ගන්ධසිලා හිරිවෙරා ච ගුග්ගුලා, විභෙදිකා{13} චොරකා කුට්ඨා කප්පූරා ච කලිඞ්ගු ච.{14}
6526. අථෙත්ථ සීහව්යග්ඝා ච පුරිසාලූ ච හත්ථියො,{15} එණෙය්යා පසදා චෙව රොහිච්චා සරභා මිගා.
6527. කොට්ඨුසුණා සුලොපී ච{1} තුලියා නළසන්නිභා, චමරී චලනී ලඞ්ඝි{2} ඣාපිතා මක්කටා පිචු,
6528. කක්කටා කතමායා ච{3} ඉක්කා ගොණසිරා බහූ, ඛග්ගා වරාහා නකුලා කාළකෙත්ථ බහූතසො.
6529. මහිසා සොණා සිගාලා ච පම්පකා ච සමන්තතො, ආකුච්චා පචලාකා ච චිත්රකා චාපි දීපියො.
6530. පෙලකා ච විඝාසාදා සීහා කොකනිසාතකා, අට්ඨපාදා ච මොරා ච භස්සරා ච කුකුත්ථකා,{4}
6531. වඞ්කොරා කුක්කුටා නාගා අඤ්ඤමඤ්ඤං පකූජිනො, බකා බලාකා නජ්ජුහා දින්දිභා කුඤ්ජවාදිකා.
6532. ව්යග්ඝීනසා ලොහපිට්ඨා පම්පකා{5} ජීවජීවකා, කපිඤ්ජරා තිත්තිරායො කුලාවා පටිකුත්තකා,
6533. මද්දාලකා චෙලකෙදු භණ්ඩුතිත්තිරනාමකා, වෙලාබකා පිඞ්ගුලායො ගොධකා{6} අඞ්ගහෙතුකා,
6534. කරවීයා ච{7} වග්ගා ච උහුඞ්කාරා ච කුක්කුභා, නානාදිජගණාකිණ්ණං නානාසරනිකුජ්ජිතං.
6535. අථෙත්ථ සකුණා සන්ති නීලකා{8} මඤජුභාණකා, මොදන්ති සභ භරියාහි අඤ්ඤමඤ්ඤං පකූජිනො.
6536. අථෙත්ථ සකුණා සන්තී දිජා මඤ්ජුස්සරා සිතා, සෙතච්ඡකූටා{9} භද්රක්ඛා අණ්ඩජා චිත්රපෙක්ඛුණා.{10}
6537. අථෙත්ථ සකුණා සන්තී දිජාමඤ්ජුස්සරා සිතා, සිඛණ්ඩිනීලගීවාහි අඤ්ඤමඤ්ඤං පකූජිනො.
6538. කුකුත්ථකා{11} කුලීරකා කොට්ඨා පොක්ඛරසාතකා,{12} කාළාමෙය්යා ඛලීයක්ඛා{13} කදම්බා සුවසාළිකා.
6539. හලිද්දා ලොහිතා සෙතා අථෙත්ථ නළකා බහු, වාරණා හිඞ්ගුරාජා ච කදම්බා සුචිකොකිලා,
6540. උක්කුසා කුරරා{1} හංසා ආටා පරිවදන්තිකා, පාකහංසා{2} අතිබලා නජ්ජූහා ජීවජීවකා,
6541. පාරෙවතා රවිහංසා චක්කවාකා{3} නදීචරා, වාරණාභිරුදා රම්මා උභො කාලූපකූජිනො.
6542. අථෙත්ථ සකුණා සන්ති නානාවණ්ණා බහූ දිජා, මොදන්ති සභ භරියාහි අඤ්ඤමඤ්ඤං පකූජිනො.
6543. අථෙත්ථ සකුණා සන්ති නානාවණ්ණා බහූ දිජා, සබ්බෙ{4} මඤ්ජූනි කූජන්ති මුචලින්දමභිතො{5} සරං.
6544. අථෙත්ථ සකුණා සන්ති කරවීයා නාම තෙ දිජා, මොදන්ති සභ භරියාහි අඤ්ඤමඤ්ඤං පකූජිනො.
6545. අථෙත්ථ සකුණා සන්ති කරවීයා නාම තෙ දිජා, සබ්බෙ මඤ්ජූනි කූජන්ති මුචලින්දමභිතො සරං.
6546. එණෙය්යපසදාකිණ්ණං නාගසංසෙවිතං වනං, නානාලතාහි සඤ්ඡන්නං කදලීමිගසෙවිතං.
6547. අථෙත්ථ සාසපො බහුකො{6} නීවාරො වරකො බහු, සාලී අකට්ඨපාකො ච උච්ඡු තත්ථ අනප්පකො.
6548. අයං එකපදී එති උජුං ගච්ඡති අස්සමං, ඛුදං පිපාසං අරතිං තත්ථ පත්තො න වින්දති: යත්ථ වෙස්සන්තරො රාජා සහ පුත්තෙහි සම්මති.
6549. ධාරෙන්තො බ්රාහ්මණං වණ්ණං ආසඤ්ච මසං ජටං, චම්මවාසී ඡමා සෙති ජාතවෙදං නමස්සති.
6550. ඉදං සුත්වා බ්රහ්මබන්ධු ඉසිං කත්වා පදක්ඛිණං, උදග්ගචිත්තො පක්කාමි යත්ථ වෙස්සන්තරො අහූ.
මහාවනවණ්ණනා නිට්ඨිතා.
6551. උට්ඨෙහි ජාලි පතිතිට්ඨ පොරාණං විය දිස්සති, බ්රාහ්මණං විය පස්සාමි නන්දියො මාභිකීරරෙ.
6552. අහංපි තාත පස්සාමි යො සො බ්රහ්මාව දිස්සති,{1} අත්ථිකො{2} විය ආයාති අතිථී නො භවිස්සති.
6553. කච්චින්නු භොතො කුසලං කච්චි භොතො අනාමයං, කච්චි උඤ්ඡෙන යාපෙථ කච්චි මූලඵලා බහු.
6554. කච්චි ඩංසා ච මකසා ච අප්පමෙව සිරිංසපා,{3} වනෙ වාළමිගාකිණ්ණෙ කච්චි හිංසා න විජ්ජති.
6555. කුසලඤ්චෙව නො බ්රහ්මෙ අථො බ්රහ්මෙ අනාමයං, අථො උඤ්ඡෙන යාපෙම අථො මූලඵලා බහු.
6556. අථො ඩංසා ච මකසා ච අප්පමෙව සිරිංසපා, වනෙ වාළමිගාකිණ්ණෙ හිංසා අම්හං{4} න විජ්ජති.
6557. සත්ත නො මාසෙ වසතං අරඤ්ඤෙ ජීවසොකිනං, ඉදම්පි පඨමං පස්සාම බ්රාහ්මණං දෙවවණ්ණිනං; ආදාය ඛෙළුවං දණ්ඩං අග්ගිහුත්තං කමණ්ඩලුං.
6558. ස්වාගතං තෙ මහාබ්රහ්මෙ අථො තෙ අදුරාගතං, අන්තො පවිස භද්දන්තෙ පදෙ පක්ඛාලයස්සු තෙ
6559. තින්දුකානි පියාලානි මධුකෙ කාසුමාරියො, ඵලානි ඛුද්දකප්පානි භුඤ්ජ බ්රහ්මෙ වරං වරං,
6560. ඉදම්පි පානීයං සීතං ආභතං ගිරිගබ්භරා, තතො පිච මහාබ්රහ්මෙ සචෙ ත්වං අභිකඞ්ඛසි.
6561. අථ ත්වං කෙන වණ්ණෙන කෙන වා පන හෙතුනා, අනුප්පත්තො බ්රහාරඤ්ඤං තං මෙ අක්ඛාහි පුච්ඡිතො.
6562. යථා වාරිවහො පූරො සබ්බකාලෙ න ඛීයති, එවං තං යාචිතාගඤ්ඡිං{5} පුත්තෙ මෙ දෙහි යාචිතො.
6563. දදාමි න විකම්පාමි ඉස්සරො නය බ්රාහ්මණ. පාතො ගතා රාජපුත්ති සායං උඤ්ඡාතො එහීති.{1}
6564. එකරත්තිං වසිත්වාන පාතො ගච්ඡසි බ්රාහ්මණ, තස්සා නහාතෙ උපඝාතෙ අථ නෙ මාලධාරිනෙ.
6565. එකරත්තිං වසිත්වාන පාතො ගච්ඡසි බ්රාහ්මණ, නානාපුප්ඵෙහි සඤ්ඡන්නෙ නානාගන්ධවිභූසිතෙ; නානාමූලඵලාකිණ්ණෙ ගච්ඡිස්සාදාය{2} බ්රාහ්මණ.
6566. න වාසමභිරොචාමි ගමනං මය්හ රුච්චති, අන්තරායොපි මෙ අස්ස ගච්ඡඤ්ඤෙව රථෙසභ.
6567. න හෙතා යාචයොගී නං අන්තරායස්ස කාරියා,{3} ඉත්ථියො{4} මන්තං ජානන්තී සබ්බං ගණ්හන්ති වාමතො.
6568. සද්ධාය දානං දදතො මාසං අද්දක්ඛි{5} මාතරං, අන්තරායම්පි සා කයිරා ගච්ඡඤ්ඤෙව රථෙසභ.
6569. ආමන්තයස්සු තෙ{6} පුත්තෙ මා තෙ මාතරමද්දසුං, සද්ධාය දානං දදතො එවං පුඤ්ඤං පවඩ්ඪති.
6570. ආමන්තයස්සු තෙ පුත්තෙ මා තෙ මාතරමද්දසුං, මාදිසස්ස ධනං දත්වා රාජ සග්ගං ගමිස්සසි.
6571. සචෙ ත්වං නිච්ඡසෙ අට්ඨුං මම භරියං පතිබ්බතං, අය්යකස්සපි{7} දස්සෙහි ජාලිං කණ්හාජිනඤ්චුභො.
6572. ඉමෙ කුමාරෙ දිස්වාන මඤ්ජුකෙ පියභාණිනෙ, පතීතො සුමනො විත්තො බහුං දස්සති තෙ ධනං.
6573. අච්ඡෙදනස්ස භායාමි රාජපුත්ත සුණොහි මෙ, රාජා දණ්ඩාය මං දජ්ජා වික්කිණෙය්ය හනෙය්ය වා; ජිනො ධනඤ්ච දාසෙ ච ගාරය්හස්ස බ්රහ්මබන්ධුයා.
6574. ඉමෙ කුමාරෙ දිස්වාන මඤ්ජුකෙ පියභාණිනෙ, ධම්මෙ ඨිතො මහාරාජා සිවීනං රට්ඨවඩ්ඪනො; ලද්ධා පීතිසොමනස්සං බහුං දස්සති තෙ ධනං.
6575. නාහං තම්පි කරිස්සාමි යං මං ත්වං අනුසාසසි, දාරකෙ ච අහං නෙස්සං බ්රාහ්මණියා පරිචාරකෙ,
6576. තතො කුමාරා බ්යථිතා සුත්වා ලුද්දස්ස භාසිතං, තෙන තෙන පධාවිංසු ජාලිකණ්හාජිනා චුභො.
6577. එහි තාත පියපුත්ත පූරෙථ මම පාරමිං, හදයං මෙභිසිඤ්චෙථ කරොථ වචනං මම.
6578. යානනාවා ච මෙ හොථ අචලා භවසාගරෙ, ජාතිපාරං තරිස්සාමි{1} සන්තාරෙස්සං{2} සදෙවකෙ.
6579. එහි අම්ම පියධීති{3} පූරෙථ මම පාරමිං,{4} හදයං මෙභිසිඤ්චෙථ කරොථ වචනං මම.
6580. යානනාවා ච මෙ හොථ අචලා භවසාගරෙ, ජාතිපාරං තරිස්සාමි උද්ධරිස්සං සදෙවකෙ
6581. තතො කුමාරෙ ආදාය ජාලිං කණ්හාජිනඤ්චුභො, බ්රාහ්මණස්ස අදා දානං සිවීනං රට්ඨවඩ්ඪනො.
6582. තතො කුමාරෙ ආදාය ජාලිං කණ්හාජිනඤ්චුභො, බ්රාහ්මණස්ස අදා විත්තො පුත්තකෙ දානමුත්තමං.