6386. අමනාපවාසං වසසි ජිණ්ණෙන පතිනා සහ, යා ත්වං වසසි ජිණ්ණස්ස මතන්තෙ ජීවිතා වරං.
6387. න හි නූන තුය්හං කල්යාණි පිතා මාතා ච සොභනෙ, අඤ්ඤං භත්තාරං වින්දිංසු යෙ තං ජිණ්ණස්ස පාදංසු; එවං දහරියං සතිං.
6388. දුයයිට්ඨං තෙ නවමියං අකතං අග්ගිහුත්තකං, යෙ තං ජිණ්ණස්ස පාදංසු එවං දහරියං සතිං.
6389. සමණෙ බ්රාහ්මණෙ නූන බ්රහ්මචරියපරායණෙ, සා ත්වං ලොකෙ අභිසපි සීලවන්තෙ බහුස්සුතෙ; යා ත්වං වසසි ජිණ්ණස්ස එවං දහරියං සතිං.
6390. න දුක්ඛං අහිනා දට්ඨං න දුක්ඛං සත්තියා හතං, තඤ්ච දුක්ඛඤ්ච තිප්පඤ්ච{1} යං පස්සෙ ජිණ්ණකං පතිං.
6391. නත්ථි ඛිඩ්ඩා නත්ථි රතී ජිණ්ණෙන පතිනා සහ, නත්ථි අල්ලාපසල්ලාපො ජග්ඝිතම්පි{2} න සොභති.
6392. යදා ච දහරො දහරා මන්තයන්ති රහොගතා, සබ්බෙසං සොකා නස්සන්ති{3} යෙ කෙචි හදයනිස්සිතා.
6393. දහරා ත්වං රුපවතී පුරිසානං අභිපත්ථිතා, ගච්ඡ ඤාති කුලෙ අච්ඡ කිං ජිණ්ණො රමයිස්සති.
6394. න තෙ බ්රාහ්මණ ගච්ඡාමි නදිං උදකහාරියා, ථියො මං පරිභාසන්ති තයා ජිණ්ණෙන බ්රාහ්මණ.
6395. මා මෙ ත්වං අකරා කම්මං මා මෙ උදකමාහරි, අහං උදකමාහිස්සං මා හොති කුපිතා අහු.
6396. නාහං තම්හි කුලෙ ජාතා යං ත්වං උදකමාහරෙ, එවං බ්රාහ්මණ ජානාහි න තෙ වච්ඡාමහං ඝරෙ.
6397. සචෙ මෙ දාසං දාසිං වා නානයිස්සසි බ්රාහ්මණ, එවං බ්රාහ්මණ ජානාහි න තෙ වච්ඡාමි සන්තිකෙ.
6398. නත්ථි මෙ සිප්පටඨානං වා ධනං ධඤ්ඤච්ච බ්රාහ්මණිං, කුතොහං දාසං දාසිං වා ආනයිස්සාමි භොතියා; අහං හොතිං උපට්ඨිස්සං මා හොති කුපිතා අහු.
6399. එහි තෙ අහමක්ඛිස්සං යථා මෙ වචනං සුතං,{1} එස වෙස්සන්තරො රාජා වඞ්කෙ වසති පබ්බතෙ.
6400. තං ත්වං ගන්ත්වාන යාචස්සු දාසං දාසිං ච බ්රාහ්මණ, සො තෙ දස්සති යාචිතො දාසං දාසිඤ්ච ඛත්තියො.
6401. ජිණ්ණොහමස්මි අබලො දීඝො චද්ධා සුදුග්ගමො, මා භොතී පරිදෙවෙසී{2} මා ච ත්වං විමනා අහු; අහං භොතිං උපට්ඨිස්සං මා භොතී කුපිතා අහූ.
6402. යථා අගන්ත්වා සඞ්ගාමං අයුද්ධොව පරාජිතො, එවමෙව තුවං බ්රහ්මෙ අගන්ත්වාව පරාජිතො.
6403. සචෙ මෙ දාසං දාසිං වා නානයිස්සසි බ්රාහ්මණ, එවං බ්රාහ්මණ ජානාහි න තෙ වච්ඡාමහං ඝරෙ, අමනාපං තෙ කරිස්සාමි තං තෙ දුක්ඛං භවිස්සති.
6404. නක්ඛත්තෙ උතුපබ්බෙසු{3} යදා මං දක්ඛසි ලඞ්කතං, අඤ්ඤෙහි සද්ධිං රමමානං තං තෙ දුක්ඛං භවිස්සති.
6405. අදස්සනෙන මය්හං තෙ ජිණ්ණස්ස පරිදෙවතො භීයො වඞ්කා ච පලිතා බහූ හෙස්සන්ති බ්රාහ්මණා.
6406. තතො සො බ්රාහ්මණො භීතො බ්රාහ්මණියා වසානුගො, අට්ටිතො කාමරාගෙන බ්රාහ්මණිං එතදබ්රවි.
6407. පාථෙය්යං මෙ කරොහි ත්වං සඞ්කුල්යා සගුළානි ච,{4} මධුපිණ්ඩිකා ච සුකතායො සත්තුභත්තඤ්ච බ්රාහ්මණී.
6408. ආනයිස්සං මෙථුනකෙ උභෙ දාසකුමාරකෙ, තෙ තං පරිචරිස්සන්ති රත්තින්දිවමතන්දිතා.
6409. ඉදං වත්වා බ්රහ්මබන්ධු පටිමුඤ්චි උපාහනා, තතො සො මන්තයිත්වාන භරියං කත්වා පදක්ඛිණං.
6410. පක්කාමි සො රුණ්ණමුඛො බ්රාහ්මණො සහිතබ්බතො, සිවීනං නගරං ඵීතං දාසපරියෙසනං චරං.
6411. සො තත්ථ ගන්ත්වා අවච යෙ තත්ථාසුං සමාගතා, කුහිං වෙස්සන්තරො රාජා කත්ථ පස්සෙමු ඛත්තියං.
6412. සො ජනො තං අවචාසි{1} යෙ තත්ථාසුං සමාගතා, තුම්හෙහි බ්රහ්මෙ පකතො අතිදානෙන ඛත්තියො; පබ්බාජිතො සකා රට්ඨා වඞ්කෙ වසති පබ්බතෙ.
6413. තුම්භිහි බ්රහ්මෙ පකතො අතිදානෙන ඛත්තියො, ආදාය පුත්තරඤ්ච වඞ්කෙ වසති පබ්බතෙ.
6414. සො චොදිතො බ්රාහ්මණියා බ්රාහ්මණො කාමගිද්ධිමා, අඝං තං පතිසෙවිත්ථ; වනෙ වාළමිගාකිණ්ණෙ ඛග්ගදීපිනිසෙවිතෙ.
6415. ආදාය බෙලුවං දණ්ඩං අග්ගිහුත්තං කමණ්ඩලුං, සො පාවිසි බ්රහාරඤ්ඤං යත්ථ අස්සොසි කාමදං.
6416. තං පවිට්ඨං බ්රහාරඤ්ඤං කොකා නං පරිවාරයුං, වික්කන්දි සො විප්පනට්ඨො දූරෙ පන්ථා අපක්කමි.
6417. තතො සො බ්රාහ්මණො ගන්ත්වා භොගලුද්දො අසඤ්ඤතො, වඞ්කස්සොහරණෙ නට්ඨො, {*} [සුනඛෙහි පරිවාරිතො රුක්ඛස්මිඤ්ච නිසින්නොව]; ඉමා ගාථා අභාසථ.
6418. කො රාජපුත්තං නිසභං ජයන්තමපරාජිතං, භයෙ ඛෙමස්ස දාතාරං කො මෙ වෙස්සන්තරං විදූ.
6419. යො යාචතං පතිට්ඨාසි භූතානං ධරණීරිව, ධරණූපමං මහාරාජං කො මෙ වෙස්සන්තරං විදූ.
6420. යො යාචතං ගතී ආසි සවන්තීනංව සාගරො, උදධූපමං{2} මහාරාජං කො මෙ වෙස්සන්තරං විදූ.
6421. කල්යාණතිත්ථං සුචිමං සීතූදකං මනොරමං, පුණ්ඩරීකෙහි සංඡන්නං යුත්තං කිඤ්ජක්ඛරෙණුනා; රහදූපමං{3} මහාරාජං කො මෙ වෙස්සන්තරං විදූ.
6422. අස්සත්ථංච පථෙ ජාතං සීතච්ඡායං මනොරමං, සන්තානං විස්සමෙ{1}තාරං කිලන්තානං පටිග්ගහං; තථූපමං මහාරාජං කො මෙ වෙස්සන්තරං විදූ.
6423. නිග්රොධංව පථෙ ජාතං සීතච්ඡායං මනොරමං, සන්තානං විස්සමෙතාරං කිලන්තානං පටිග්ගහං; තථූපමං මහාරාජං කො මෙ වෙස්සන්තරං විදූ.
6424. අම්බං ඉව පථෙ ජාතං සීතච්ඡායං මනොරමං, සන්තානං විස්සමෙතාරං කිලන්තානං පටිග්ගහං; තථූපමං මහාරාජං කො මෙ වෙස්සන්තරං විදූ.
6425. සාලං ඉව පථෙ ජාතං සීතච්ඡායං මනොරමං, සන්තානං විස්සමෙතාරං කිලන්තානං පටිග්ගහං; තථූපමං මහාරාජං කො මෙ වෙස්සන්තරං විදූ.
6426. දුමං ඉව පථෙ ජාතං සීතච්ඡායං මනොරමං, සන්තානං විස්සමෙතාරං කිලන්තානං පටිග්ගහං; තථූපමං මහාරාජං කො මෙ වෙස්සන්තරං විදූ.
6427. එවඤ්ච මෙ විලපතො පවිට්ඨස්ස බ්රහාවනෙ, අහං ජානන්ති යො වජ්ජා නන්දිං සො ජනයෙ මමං{2}
6428. එවඤ්ච මෙ විලපතො පවිට්ඨස්ස බ්රහාවනෙ, අහං ජානන්ති යො වජ්ජා (වෙස්සන්තරනිවෙසනං;) තාය සො එකච්චාය පසවෙ පුඤ්ඤං අනප්පකං.
6429. තස්ස චෙතො පටිස්සොසි අරඤ්ඤෙ ලුද්දකො චරං,{3} තුම්හෙහි බ්රහ්මෙ පකතො අතිදානෙන ඛත්තියො; පබ්බාජිතො සකා රට්ඨා වඞ්කෙ වසති පබ්බතෙ.
6430. තුම්හෙහි බ්රහ්මෙ පකතො අතිදානෙන ඛත්තියො, ආදාය පුත්තදාරඤ්ච වඞ්කෙ වසති පබ්බතෙ.
6431. අකිච්චකාරී දුම්මෙධො රට්ඨා විව{4}නමාගතො, රාජපුත්තං ගවෙසන්තො බකො මච්ඡමිවොදකෙ.
6432. තස්ස ත්යාහං න දස්සාමි ජීවිතං ඉධ බ්රාහ්මණ, අයං හි තෙ{1} මයා නුන්නො සරො පාස්සති{2} ලොහිතං.
6433. සිරො තෙ වජ්ඣයිත්වාන{3} හදයං ඡෙත්වා සබන්ධනං, පන්ථසකුණං{4} යජිස්සාමි තුය්හං මංසෙන බ්රාහ්මණං.
6434. තුය්හං මංසෙන මෙදෙන මත්ථකෙන ච බ්රාහ්මණ, අහුතිං පග්ගහෙස්සාමි ඡෙත්වාන හදයං තව.
6435. තං මෙ සුයිට්ඨං සුහුතං තුය්හං මංසෙන බ්රාහ්මණ, න ච ත්වං රාජපුත්තස්ස භරියං පුත්තෙ ච නෙස්සසි.
6436. අවජ්ඣො බ්රාහ්මණො දූතො චෙතපුත්ත සුණොහි මෙ, තස්මා හි දූතං න හනන්ති එස ධම්මො සනන්තනො.
6437. නිජ්ඣත්තා සිවයො සබ්බෙ පිතා නං දට්ඨුමිච්ඡති, මාතා ච දුබ්බලා තස්ස අචිරා චක්ඛූනි ජීයරෙ.
6438. තෙසාහං පහිතො දූතො චෙතපුත්ත සුණොහි මෙ, රාජපුත්තං නයිස්සාමි යදි ජානාසි සංස{5} මෙ.
6439. පියස්ස මෙ පියො දූතො පුණ්ණපත්තං දදාමි තෙ, ඉමඤ්ච මධුනො තුම්බං මිගසත්ථිඤ්ච{6} බ්රාහ්මණ; තඤ්ච තෙ දෙසමක්ඛිස්සං යත්ථ සම්මති කාමදො.
ජූජකපබ්බං නිට්ඨිතං.
6440. එස සෙලො මහාබ්රහ්මෙ පබ්බතො ගන්ධමාදනො, යත්ථ වෙස්සන්තරො ජාරා සහ පුත්තෙහි සම්මති.
6441. ධාරෙන්තො බ්රාහ්මණං වණ්ණං ආසඤ්ච මසං ජටං, චම්මවාසී ඡමා සෙති ජාතවෙදං නමසස්ති.
6442. එතෙ නීලා පදිස්සන්ති නානාඵලධරා දුමා, උග්ගතා අබ්භකූටං{7} ච නීලා අඤ්ජනපබ්බතා.
6443. ධවස්සකණ්ණා ඛදිරා සාලා ඵන්දනමාලුවා, සම්පවෙධන්ති වාතෙන සකිං පීතාව මාණවා.
6444. උපරි දුමපරියායෙසු සංගීතියොව සූයරෙ, නජ්ජුහා කොකිලසඞ්ඝා සම්පතන්ති දුමා දුමං.
6445. අව්හයන්තෙව ගච්ඡන්තං සාඛාපණ්ණ{1}සමෙරිතා, අමයන්තෙව ආගන්තුං මොදයන්ති නිවාසිනං; යත්ථ වෙස්සන්තරො රාජා සහ පුත්තෙහි සම්මති.
6446. ධාරෙන්තො බ්රාහ්මණං වණ්ණං ආසදඤ්ච මසංජටං, චම්මවාසී ඡමා සෙති ජාතවෙදං නමස්සති.
6447. අම්බා කපිත්ථා{2} පනසා සාලා ජම්බු විභීතකා,{3} හරීතකී ආමලකා අස්සත්ථා ඛදරානි ච,{4}
6448. චාරු තිම්බරුක්ඛා චෙත්ථ නිග්රොධා ච කපිත්ථනා, මධු මධුකා ථෙවන්ති නීචෙ පක්කා චුදුම්බරා.
6449. පාරෙවතා භවෙය්යා ච මුද්දිකා ච මධුත්ථිකා,{5} මධුං අනෙලකං තත්ථ සකමාදාය භුඤ්ජරෙ.
6450. අඤ්ඤෙත්ථ පුප්ඵිතා අම්බා අඤ්ඤෙ තිට්ඨන්ති දොමිලා, අඤ්ඤෙ ආමා ච පක්කා ච භෙකවණ්ණා{6} තදූභයං.
6451. අථෙත්ථ හෙට්ඨා පුරිසො අම්බපක්කානි ගණ්හති, ආමානි චෙව පක්කානි වන්නගන්ධරසුත්තමෙ.{7}
6452. අතෙව{8} මෙ අච්ඡරියං හිඞ්කාරො පටිභාති මං, දෙවානමිව ආවාසො සොභති නන්දනූපමො.
6453. විභෙදිකා නාළිකෙරා ඛජ්ජූරීනං බ්රහාවනෙ, මාලාව ගන්ථිතා ඨන්ති ධජග්ගානෙව දිස්සරෙ; නානාවණ්ණෙහි පුප්ඵෙහි නභං තාරාචිතාමිව.
6454. කුටජි කුට්ඨතගරා{9} පාටලියො ච පුප්ඵිතා, පුන්නාගා ගිරිපුන්නාගා කොවිළාරා ච පුප්ඵිතා.
6455. උද්දාලකා සොමරුක්ඛා අගරු{1}භල්ලියො බහූ, පුත්තජීවා{2} ච කකුධා{3} අසනා චෙත්ථ පුප්ඵිතා.
6456. කුටජා සලලා නීපා කොසම්බලබුජා ධවා, සාලා ච පුප්ඵිතා තත්ථ පලාලඛලසන්නිභා.{4}
6457. තස්සාවිදූරෙ පොක්ඛරණී භූමිභාගෙ මනොරමෙ, පදුමුප්පලසඤ්ඡන්නා දෙවානමිව නන්දනෙ.
6458. අථෙත්ථ පුප්ඵරසමත්තා කොකිලා මඤ්ජුභාණිකා, අභිනාදෙන්ති පවනං{5} උතුසම්පුප්ඵිතෙ දුමෙ.
6459. භස්සන්ති මකරන්දෙහි{6} පොක්ඛරෙ පොක්ඛරෙ මධු, අථෙත්ථ වාතා වායන්ති දක්ඛිණා අථ පච්ඡිමා; පදුමකිඤ්ජක්ඛරෙණුහි ඔකිණ්ණො හොති අස්සමො.
6460. ථූලා සිඞ්ඝාටකා චෙත්ථ සංසාදියා පසාදියා,{7} මච්ඡකච්ඡපව්යාවිද්ධා බහු චෙත්ථ මුපයානකා; මධුං භිංසෙහි සවති ඛීරං සප්පි මුලාලිහි.{8}
6461. සුරභි තං වනං වාති නානාගන්ධසමෙරිතං,{9} සම්මද්දතෙව ගන්ධෙන පුප්ඵසාඛාහි තං වනං; භමරා පුප්ඵගන්ධෙන සමන්තාමභිනාදිතා.
6462. අථෙත්ථ සකුණා සන්ති නානාවණ්ණා බහූ දිජා, මොදන්ති සහ භරියාහි අඤ්ඤමඤ්ඤං පකූජිනො.
6463. නන්දිකා ජීවපුත්තා ච ජීව පුත්තා ච පියා ච නො, පියා පුත්තා පියා නන්දා දිජා පොක්ඛරණිඝරා.
6464. මාලාව ගන්ථිතා ඨන්ති ධජග්ගානෙව දිස්සරෙ, නානාවණ්ණෙහි පුප්ඵෙහි කුසලෙහි සුගන්ධිකා; යත්ථ වෙස්සන්තරො රාජා සහ පුත්තෙහි සම්මති.
6465. ධාරෙන්තො බ්රාහ්මණං වණ්ණං ආසදං ච මසං ජටං, චම්මවාසී ඡමා සෙති ජාතවෙදං නමස්සති.
6466. ඉදඤ්ච මෙ සත්තුභත්තං මධුනා පටිසංයුතං, මධුපිණ්ඩිකා ච සුකතායො සත්තුභත්තං දදාමි තෙ.
6467. තුය්හෙව සම්බලං හොතු නාහං ඉච්ඡාමි සම්බලං, ඉතොපි බ්රහ්මෙ ගණ්හාහි ගච්ඡ බ්රහ්මෙ යථාසුඛං.
6468. අයං එකපදී එති උජුං ගච්ඡති අස්සමං, ඉසීපි අච්චුතො තත්ථ පඞ්කදන්තො රජස්සිරො; ධාරෙන්තො බ්රාහ්මණං වණ්ණං ආසදඤ්ච මසඤ්ජටං.
6469. චම්මවාසී ඡමා සෙති ජාතවෙදං නමස්සති, තං ත්වං ගන්ත්වාන පුච්ඡස්සු සො තෙ මග්ගං පවක්ඛති.
6470. ඉදං සුත්වා බ්රහ්මබන්ධු චෙතං කත්වා පදක්ඛිණං, උදග්ගචිත්තො පක්කාමි යෙනාසි අච්චුතො{1} ඉසි.
චූළවනවණ්ණනා නිට්ඨිතා.
6471. ගච්ඡන්තො සො භාරද්වාජො අද්දසා අච්චුතං ඉසිං, දිස්වානං තං භාරද්වාජො සම්මොදි ඉසිනා සහ.
6472. කච්චින්නු භොතො කුසලං කච්චි භොතො අනාමයං, කච්චි උඤ්ඡෙන යාපෙසි කච්චි මූලඵලා බහූ.
6473. කච්චි ඩංසා ච මකසා ච අප්පමෙව සිරිංසපා,{2} වනෙ වාළමිගාකිණ්ණෙ කච්චි හිංසා න විජ්ජති.
6474. කුසලඤ්චෙව මෙ බ්රහ්මෙ අථො බ්රහ්මෙ අනාමයං, අථො උඤ්ඡෙන යාපෙමි අථො මූලඵලා බහූ.
6475. අථො ඩංසා ච මකසා ච අප්පමෙව සිරිංසපා, වනෙ වාළමිගාකිණ්ණෙ හිංසා මය්හං න විජ්ජති.
6476. බහූනි චස්ස පූගානි අස්සමෙ වසතො{3} මම, නාභිජානාමි උප්පන්නං ආබාධං අමනොරමං.
6477. ස්වාගං තෙ මහාබ්රහ්මෙ අථො තෙ අදුරාගතං. අන්තො පවිස භද්දන්තෙ පාදෙ පක්ඛාලයස්සු තෙ.
6478. තින්දුකානි පියාලානි මධුකෙ කාසුමාරියො, ඵලානි ඛුද්දකප්පානි භුඤ්ජ බ්රහ්මෙ වරං වරං.
6479. ඉදම්පි පානීයං සීතං ආභතං ගිරිගබ්භරා, තතො පිව මහාබ්රහ්මෙ සචෙ ත්වං අභිකඞ්ඛසි.
6480. පටිග්ගහීතං යං දින්නං සබ්බස්ස අග්ඝියං කතං, සඤ්ජයස්ස සකං පුත්තං සිවීහි විප්පවාසිතං; තමහං දස්සනමාගතො යදි ජානාසි සංස මෙ.
6481. න භවං එති පුඤ්ඤත්ථං සිවිරාජස්ස දස්සනං, මඤ්ඤෙ භවං පත්ථයති රඤ්ඤො භරියං පතිබ්බතං.
6482. මඤ්ඤෙ කණ්හාජිනං දාසිං ජාලිං දාසඤ්ච ඉච්ඡසි, අථවා තයො මාතාපුත්තෙ අරඤ්ඤා නෙතුමාගතො; න තස්ස භොගා විජ්ජන්ති ධනං ධඤ්ඤඤ්ච බ්රාහ්මණ.
6483. අකුද්ධරූපාහං භොතො නාහං යාචිතුමාගතො, සාධු දස්සනමරියානං සන්නිවාසො සදා සුඛො.