6288. බහූ කීටා පටංගා ච මකසා මධුමක්ඛිකා, තෙපි තං තත්ථ හිංසෙය්යුං තං තෙ දුක්ඛතරං සියා.
6289. අපරෙ පස්ස සන්තාපෙ නදීනුපනිසෙවිතෙ, සප්පා අජගරා නාම අවිසා තෙ මහබ්බලා.
6290. තෙ මනුස්සං මිගං වාපි අපි මාසන්නමාගතං, පරික්ඛිපිත්වා භොගෙහි වසමානෙනන්ති අත්තනො.
6291. අඤ්ඤෙපි කණ්හජටිනො අච්ඡා නාම අඝම්මිගා, න තෙහි පුරිසො දිට්ඨො රුක්ඛමාරුය්හ මුච්චති.
6292. සඞ්ඝට්ටයන්තා සිඞ්ගානි තික්ඛග්ගානි පහාරිනො. මහිසා විචරන්නෙත්ථ නදිං සොතුම්බරං පති.
6293. දිස්වා මිගානං යූථානං ගවං සඤ්චරතං{1} වනෙ, ධෙනූව වච්ඡගිද්ධාව කථං මද්දී කරිස්සසි.
6294. දිස්වා සම්පතිතෙ ඝොරෙ දුම්මග්ගෙසු ප්ලවඞ්ගමෙ, අඛෙත්තඤ්ඤාය තෙ මද්දි භවිතන්තෙ{2} මහබ්භයං.
6295. යා ත්වං සිවාය සුත්වාන මුහුං උත්තසසෙ පුරෙ, සා ත්වං වඞ්කං අනුප්පත්තා කථං මද්දී කරිස්සසි.
6296. ඨිතෙ මජ්ඣන්තිකෙ කාලෙ සන්නිසින්නෙසු{1} පක්ඛිසු, සනතෙව බ්රහාරඤ්ඤං තත්ථ කිං ගන්තුමිච්ඡසි.
6297. තමබ්රවී රාජපුත්ති මද්දී සබ්බඞ්ගසොභනා, යානි එතානි අක්ඛාසි වනෙ පටිභයානි මෙ; සබ්බානි අභිසම්භොස්සං ගච්ඡඤ්ඤෙව රථෙසභ.
6298. කාසං කුසං පොටකිලං උසීරං මුඤ්ජබ්බබජං. උරසා පනුදහෙස්සාමි නාස්ස හෙස්සාමි දුන්නයා.
6299. බහූහි වත චරියාහි කුමාරී වින්දතෙ පතිං, උදරස්සුපරොධෙන ගොහනුබ්බෙඨනෙන ච.
6300. අග්ගිස්ස පාරිචරියාය උදකුම්මුජ්ජනෙන ච, වෙධබ්බං{2} කටුකං ලොකෙ ගච්ඡඤ්ඤෙව රථෙසභ.
6301. අපිස්සා හොති අප්පත්තො උච්ඡිට්ඨමපි භුඤ්ජිතුං, යො නං හත්ථෙ ගහෙත්වාන අකාමං පරිකඩ්ඪති; වෙධබ්බං කටුකං ලොකෙ ගච්ඡඤ්ඤෙව රථෙසභ.
6302. කෙසග්ගහණමුක්ඛෙපා භූම්යා ච පරිසුම්භනා, දත්වා ච නො පක්කමති බහුං දුක්ඛං අනප්පකං; වෙධබ්බං කටුකං ලොකෙ ගච්ඡඤ්ඤෙව රථෙසභ.
6303. සුක්කච්ඡවී වෙධවෙරා දත්වා සුභගමානිනො, අකාමං පරිකඩ්ඪන්ති උලූකඤ්ඤෙව වායසා; වෙධබ්බං කටුකං ලොකෙ ගච්ඡඤ්ඤෙව රථෙසභ.
6304. අපි ඤාතිකුලෙ ඵීතෙ කංසපජ්ජොතනෙ වසං, නෙවාතිවාක්යං{3} න ලභෙ භාතූහි සඛිකාහි{4} ච; වෙධබ්බං කටුකං ලොකෙ ගච්ඡඤ්ඤෙව රථෙසභ.
6305. නග්ගා නදී අනුදකා නග්ගා රට්ඨං අරාජිකං, ඉත්ථිපි විධවා නග්ගා යස්සාපි දස භාතරො; වෙධබ්බං කටුකං ලොකෙ ගච්ඡඤ්ඤෙව රථෙසභ.
6306. ධජො රථස්ස පඤ්ඤාණං ධූමො පඤ්ඤාණමග්ගිනො, රාජා රට්ඨස්ස පඤ්ඤාණං භත්තා පඤ්ඤාණමිත්ථියා; වෙධබ්බං කටුකං ලොකෙ ගච්ඡඤ්ඤෙව රථෙසභ.
6307. යා දළිද්දී දළිද්දස්ස අඩ්ඪා අඩ්ඪස්ස කිත්තිමා,{1} තං වෙ දෙවා පසංසන්ති දුක්කරං හි කරොති සා.
6308. සාමිකං අනුබන්ධිස්සං සදා කාසායවාසිනී, පථව්යාපි අභෙජ්ජන්ත්යා{2} නිච්ඡෙ වෙස්සන්තරං විනා; වෙධබ්බං කටුකං ලොකෙ{3} ගච්ඡඤ්ඤෙව රථෙසභ.
6309. අපි සාගරපරියන්තං පහුවිත්තධරං මහිං, නානාරතනපරිපූරං නිච්ඡෙ වෙස්සන්තරං විනා.
6310. කථන්නු තාසං හදයං සුඛරා වත ඉත්ථියො, යා සාමිකෙ දුක්ඛිතම්හි සුඛමිච්ඡන්ති අත්තනො.
6311. නික්ඛමන්තෙ මහාරාජෙ සිවීනං රට්ඨවඩ්ඪනෙ, තමහං අනුබන්ධිස්සං සබ්බකාමදදො හි මෙ.
6312. තමබ්රවී මහාරාජා මද්දිං සබ්බඞ්ගසොභනං, ඉමෙ තෙ දහරා පුත්තා ජාලී කණ්හාජිනා චුභො; නික්ඛිප්ප ලක්ඛණෙ ගච්ඡ මයං තෙ පොසියාමසෙ.
6313. තමබ්රවී රාජපුත්තී මද්දී සබ්බඞ්ගසොභනා, පියා මෙ පුත්තකා දෙව ජාලී කණ්හාජිනා චුභො; ත්යම්භං තත්ථ රමෙස්සන්ති අරඤ්ඤෙ ජීවසොකිනං.
6314. තමබ්රවී මහාරාජා සිවීනං රට්ඨවඩ්ඪනො, සාලීනං ඔදනං භුත්වා සුචිං මංසූපසෙචනං; රුක්ඛඵලානි භුඤ්ජන්තා කථං කාහන්ති දාරකා.
6315. භුත්වා සතඵලෙ කංසෙ සොවණ්ණෙ සතරාජිකෙ, රුක්ඛපත්තෙසු භුඤ්ජන්තා කථං කාහන්ති දාරකා.
6316. කාසියානි ච ධාරෙත්ථා ඛොමකොදුම්බරානි ච,{4} කුසචීරානි ධාරෙන්තා කථං කාහන්ති දාරකා.
6317. වය්හාහි පරියායිත්වා සිවිකාය රථෙන ච, පත්තිකා පරිධාවන්තා කථං කාහන්ති දාරකා.
6318. කූටාගාරෙ සයිත්වාන නිවාතෙ ඵුස්සිතග්ගලෙ, සයන්තා රුක්ඛමූලස්මිං කථං කාහන්ති දාරකා.
6319. පල්ලඞ්කෙසු සයිත්වාන ගොනකෙ චිත්තසන්ථතෙ, සයන්තා තිණසන්ථාරෙ කථං කාහන්ති දාරකා.
6320. ගන්ධකෙන විලිම්පිත්වා අගරූ{1}චන්දනෙන ච, රජොජල්ලානි ධාරෙන්තා කථං කාහන්ති දාරකා.
6321. චමරීමොරහත්ථෙහි විජිතඞ්ගා සුඛෙධිතා, දට්ඨා{2} ඩංසෙහි මකසෙහි කථං කාහන්ති දාරකා.
6322. තමබ්රවී රාජපුත්තී මද්දී සබ්බඞ්ගසොභනා, මා දෙව පරිදෙවෙසි මා ච ත්වං විමනො අහූ; යථා මයං භවිස්සාම තථා හෙස්සන්ති දාරකා.
6323. ඉදං වත්වාන පක්කාමි මද්දී සබ්බඞ්ගසොභනා, සිවිමග්ගෙන අන්වෙසි පුත්තෙ ආදාය ලක්ඛණා.
6324. තතො වෙස්සන්තරො රාජා දානං දත්වාන ඛත්තියො, පිතු මාතු ච වන්දිත්වා කත්වා ච නං පදක්ඛිණං.
6325. චතුවාහිං රථං යුත්තං සීඝ{3}මාරුය්හ සන්දනං, ආදාය පුත්තදාරඤ්ච වඞ්කං පායාසි පබ්බතං.
6326. තතො වෙස්සන්තරො රාජා යෙනාසි බහුකො ජනො, ආමන්ත ඛො තං ගච්ඡාම අරොගා හොන්තු ඤාතයො.
6327. ඉංඝ මද්දී නිසාමෙහි රම්මරූපංව{4} දිස්සති, ආවාසො සිවිසෙට්ඨස්ස පෙත්තිකං භවනං මම.
6328. තං බ්රාහ්මණා අන්වගමුං තෙ තං අස්සෙ අයාචිසුං, යාචිතො පටිපාදෙසි චතුන්නං චතුරො හයෙ.
6329. ඉඞ්ඝ මද්දී නිසාමෙහි චිත්තරූපංව දිස්සති, මිගා රොහිච්චවණ්ණෙන දක්ඛිණස්සා වහන්ති මං.
6330. අථෙත්ථ පඤ්චමො ආග{1} සො තං රථමයාචථ, තස්ස තං යාචිතොදාසි නචස්සුපහතො මනො.
6331. තතො වෙස්සන්තරො රාජා ඔරොපෙත්වා{2} සකං ජනං, අස්සාසයී අස්සරථං බ්රාහ්මණස්ස ධනෙසිනො.
6332. ත්වං මද්දී කණ්හාජිනං ගණ්හ{3} ලහුකා එසා කණිට්ඨිකා, අහං ජාලිං ගණ්හිස්සාමි ගරුකො භාතිකො හි සො.
6333. රාජා කුමාරං ආදාය රාජපුත්තී ච දාරිකං, සම්මොදමානං පක්කාමුං{4} අඤ්ඤමඤ්ඤපියංවදා.
දානකණ්ඩං නිට්ඨිතං.
6334. යදි කෙචි මනුජා එන්ති අනුමග්ගෙ පටිපථෙ, මග්ගං තෙ පටිපුච්ඡාම කුහිං වඞ්කතපබ්බතො.
6335. තෙ තත්ථ අම්හෙ පස්සිත්වා කරුණං පරිදෙවයුං, දුක්ඛං තෙ පටිවෙදෙන්ති දූරෙ වඞ්කතපබ්බතො.
6336. යදි පස්සන්ති පවනෙ දාරකා ඵලිතෙ{5} දුමෙ, තෙසං ඵලානං හෙතූහි උපරොදන්ති දාරකා.
6337. රොදන්තෙ දාරකෙ දිස්වා උබ්බිග්ගා{6} විපුලා දුමා, සයමෙවොනමිත්වාන උපගච්ඡන්ති දාරකෙ.
6338. ඉදං අච්ඡෙරකං දිස්වා අබ්භුතං ලොමහංසනං, සාධුකාරං පවත්තෙසි මද්දී සබ්බඞ්ගසොභනා.
6339. අච්ඡෙරං වත ලොකස්මිං අබ්භුතං ලොමහංසනං, වෙස්සන්තරස්ස තෙජෙන සයමෙවොනතා දුමා.
6340. සඞ්ඛිපිංසු පථං යක්ඛා අනුකම්පාය දාරකෙ, නික්ඛන්තදිවසෙනෙව චෙතරට්ඨං උපාගමුං.
6341. තෙ ගන්ත්වා දීඝමද්ධානං චෙතරට්ඨමුපාගමුං, ඉද්ධං ඵීතං ජනපදං බහුමංසසුරොදනං.
6342. චෙතියා පරිකරිංසු දිස්වා ලක්ඛණමාගතං, සුඛුමාලී වතයං අය්යා පත්තිකා පරිධාවති.
6343. වය්හාහි පරියායිත්වා සිවිකාය ච ඛත්තියා,{1} සාජ්ජ මද්දී අරඤ්ඤස්මිං පත්තිකා පරිධාවති.
6344. තං දිස්වා චෙතපාමොක්ඛා රොදමානා උපාගමුං, කච්චින්නු දෙව කුසලං කච්චි දෙව අනාමයං; කච්චි පිතා අරොගා තෙ සිවීනඤ්ච අනාමයං.
6345. කො තෙ බලං මහාරාජ කොනු තෙ රථමණ්ඩලං, අනස්සකො අරථකො දීඝමද්ධානමාගතො; කච්චි නාමිත්තෙහි{2} පකතො අනුප්පත්තොසිමං දිසං.
6346. කුසලං චෙව මෙ සම්මා අථො සම්මා අනාමයං, අථො පිතා අරොගො මෙ සිවීනඤ්ච අනාමයං.
6347. අහං හි කුඤ්ජරං දප්පං ඊසාදන්තං උරූළ්හවං, ඛෙත්තඤ්ඤුං සබ්බයුද්ධානං සබ්බසෙතං ගජුත්තමං.
6348. පණ්ඩුකම්බලසඤ්ඡන්නං පභින්නං සත්තුමද්දනං, දන්තිං සවාළවීජනිං සෙතං කෙලාසසාදිසං.
6349. සසෙතච්ඡත්තං සඋපථෙය්යං{3} සාථබ්බනං සහත්ථිපං, අග්ගයානං රාජවාහිං බ්රාහ්මණානං අදාසහං,{4}
6350. තස්මිං මෙ සිවයො කුද්ධා පිතා ච අපහතො මනො, අවරුද්ධති{5} මං රාජා වඞ්කං ගච්ඡාමි පබ්බතං; ඔකාසං සම්මා{6} ජානාථ වනෙ යත්ථ වසාමසෙ.
6351. ස්වාගතන්තෙ මහාරාජ අථො තෙ අදුරාගතං, ඉස්සරොසි අනුප්පත්තො යං ඉධත්ථි පවෙදය,
6352. සාකං භිසං මධුං මංසං සුද්ධං සාලීනමොදනං, පරිභුඤ්ජ මහාරාජ පාහුනො නොසි ආගතො.
6353. පටිග්ගහිතං යං දින්නං සබ්බස්ස අග්ඝියං කතං, අවරුද්ධති මං රාජා වඞ්කං ගච්ඡාමි පබ්බතං; ඔකාසං සම්මා ජානාථ වනෙ යත්ථ වසාමසෙ.
6354. ඉධෙව තාව අච්ඡස්සු චෙතරට්ඨෙ රථෙසභ, යාව චෙතා ගමිස්සන්ති රඤ්ඤො සන්තික යාචිතුං නිජ්ඣාපෙතුං මහාරාජං සිවීනං රට්ඨවඩ්ඪනං.
6355. තං තං චෙතා පුරක්ඛත්වා{1} පතීතා ලද්ධපච්චයා, පරිවාරෙත්වාන{2} ගච්ඡන්ති එවං ජානාහි ඛත්තිය.
6356. මා වො රුච්චිත්ථ ගමනං රඤ්ඤො සන්තික යාචිතුං නිජ්ඣාපෙතුං මහාරාජං රාජා තත්ථ න ඉස්සරො.
6357. අච්චුග්ගතාහි සිවයො බලත්ථා නෙගමා ච යෙ, තෙ පධංසෙතුමිච්ඡන්ති රාජානං මම කාරණා.
6358. සචෙ එසා පවත්තෙත්ථ රට්ඨස්මිං රට්ඨවඩ්ඪන, ඉධෙව රජ්ජං කාරෙහි චෙතෙහි පරිවාරිතො.
6359. ඉද්ධං ඵිතඤ්චිදං රට්ඨං ඉද්ධො ජනපදො මහා මතිං කරොහි ත්වං දෙව රජ්ජස්සමනුසාසිතුං.
6360. න මෙ ඡන්දො මති අත්ථි රජ්ජස්සමනුසාසිතුං, පබ්බාජිතස්ස රට්ඨස්මා චෙතපුත්තා සුණාථ මෙ.
6361. අතුට්ඨා සිවයො අස්සු{3} බලත්ථා{4} නෙගමා ච යෙ, පබ්බාජිතස්ස රට්ඨස්මා චෙතා රජ්ජෙභිසෙචයුං.
6362. අසම්මොදියම්පි වො අස්ස අච්චන්තං මම කාරණා, සිවීනං භණ්ඩනඤ්චාපි විග්ගහො මෙ න රුච්චති.
6363. අථස්ස භණ්ඩනං ඝොරං සම්පහාරො අනප්පකො, එකස්ස කාරණා මය්හං හිංසෙය්යුං බහුකෙ ජනෙ.{5}
6364. පටිග්ගහීතං යං දින්නං සබ්බස්ස අග්ඝියං කතං, අවරුද්ධති මං රාජා වඞ්කං ගච්ඡාමි පබ්බතං; ඔකාසං සම්මා ජානාථ වනෙ යත්ථ වසාමසෙ.
6365. තග්ඝ තෙ මයමක්ඛාම යථාපි කුසලා තථා, රාජිසී යත්ථ සම්මන්ති ආහුතග්ගී සමාහිතා.
6366. එස සෙලො මහාරාජ පබ්බතො ගන්ධමාදනො, යත්ථ ත්වං සහ පුත්තෙහි සහ භරියාය වච්ඡසි.{1}
6367. තං චෙතා අනුසාසිංසු අස්සුනෙත්තා රුදම්මුඛා, ඉතො ගච්ඡ මහාරාජ උජුං{2} යෙනුත්තරාමුඛො.
6368. අථ දක්ඛිසි භද්දන්තෙ විපුලං{3} නාම පබ්බතං, නානාදුමගණාකිණ්ණං සීතච්ඡායං මනොරමං.{4}
6369. තමතික්කම්ම භද්දන්තෙ අථ දක්ඛිසි ආපකං,{5} නදිං කෙතුමතිං නාම ගම්භීරං ගිරිගබ්භරං.
6370. පුථුලොමමච්ඡාකිණ්ණං සුපතිත්ථං මහොදිකං,{6} තත්ථ නහාත්වා විපිත්වා ච අස්සාසෙත්වා ච පුත්තකෙ.
6371. අථ දක්ඛිසි භද්දන්තෙ නිග්රොධං මධුවිප්ඵලං,{7} රම්මකෙ සිඛරෙ ජාතං සීතච්ඡායං මනොරමං.
6372. අථ දක්ඛිසි භද්දන්තෙ නාලිකං නාම පබ්බතං, නානාදිජගණාකිණ්ණං සෙලං කිම්පුරිසායුතං.
6373. තස්ස උත්තරපුබ්බෙන මුචලින්දො නාම සො සරො, පුණ්ඩරීකෙහි සඤ්ඡන්නො සෙතසොගන්ධියෙහි ච.
6374. සො වනං මෙඝසඞ්කාසං ධුවං හරිතසද්දලං, සීහොවාමිසපෙක්ඛීව වනසණ්ඩං විගාහය; පුප්ඵරුක්ඛෙහි සඤ්ඡන්නං ඵලරුක්ඛෙහි චූහභං.
6375. තත්ථ බින්දුස්සරා වග්ගු නානාවණ්ණා බහූ දිජා, කූජන්තමුපකූජන්ති{1} උතු සම්පුප්ඵිතෙ දුමෙ.
6376. ගන්ත්වා ගිරිවිදුග්ගානං නදීනං පභවානි ච, සො දක්ඛසි පොක්ඛරණිං කරඤ්ජකකුධායුතං.{2}
6377. පුථුලොමමච්ඡාකිණ්ණං සුපතිත්ථං මහොදිකං, සමඤ්ච චතුරස්සඤ්ච සාධුං අප්පටිගන්ධියං.
6378. තස්සා උත්තරපුබ්බෙන පණ්ණසාලං අමාපය,{3} පණ්ණසාලං අමාපෙත්වා උඤ්ඡාචරියාය ඊහථ.
වනප්පවෙසනඛණ්ඩං නිට්ඨිතං.
6379. අහූ වාසී කලිඞ්ගෙසු ජූජකො නාම බ්රාහ්මණො, තස්සාසි දහරා භරියා නාමෙනාමිත්තතාපනා.
6380. තා නං තත්ථ ගතාවොචුං නදීඋදකහාරිකා,{4} ථියො නං පරිභාසිංසු සමාගන්ත්වා කුතූහලා.
6381. අමිත්තා නූන තෙ මාතා අමිත්තො නූන තෙ පිතා යෙ තං ජිණ්ණස්ස පාදංසු එවං දහරියං සතිං.
6382. අහිතං{5} වත තෙ ඤාතී මන්තයිංසු රහොගතා, යෙ තං ජිණ්ණස්ස පාදංසු එවං දහරියං සතිං.
6383. දුක්කරං{6} වත තෙ ඤාතී මන්තයිංසු රහොගතා, යෙ තං ජිණ්ණස්ස පාදංසු එවං දහරියං සතිං.
6384. පාපකං වත තෙ ඤාතී මන්තයිංසු රහොගතා, යෙ තං ජිණ්ණස්ස පාදංසු එවං දහරියං සතිං.
6385. අමනාපං වත තෙ ඤාතී මන්තයිංසු රහොගතා, යෙ තං ජිණ්ණස්ස පාදංසු එවං දහරියං සතිං.