6189. ඉමෙ කුමාරෙ පස්සන්තො මඤ්ජුකෙ පියභාණිනො, අස්සමෙ රමණීයම්හි න රජ්ජස්ස සරිස්සසි.
6190. ඉමෙ කුමාරෙ පස්සන්තො මඤ්ජුකෙ පියභාණිනො, කීළන්තෙ අස්සමෙ රම්මෙ න රජ්ජස්ස සරිස්සසි.
6191. ඉමෙ කුමාරෙ පස්සන්තො මාලාධාරී අලඞ්කතෙ, අස්සමෙ රමණීයම්හි න න රජ්ජස්ස සරිස්සසි.
6192. ඉමෙ කුමාරෙ පස්සන්තො මාලධාරි අලඞ්කතෙ, කීළන්තෙ අස්සමෙ රම්මෙ න රජ්ජස්ස සරිස්සසි.
6193. යදා දක්ඛිසි නච්චන්තෙ කුමාරෙ මාලධාරිනො,{3} අස්සමෙ රමණීයම්හි න රජ්ජස්ස සරිස්සසි.
6194. යදා දක්ඛිසි නච්චන්තෙ කුමාරෙ මාලධාරිනො, කීළන්තෙ අස්සමෙ රම්මෙ න රජ්ජස්ස සරිස්සසි.
6195. යදා දක්ඛිසි මාතඞ්ගං කුඤ්ජරං සට්ඨිහායනං, එකං අරඤ්ඤෙ විචරන්තං න රජ්ජස්ස සරිස්සසි.
6196. යදා දක්ඛිසි මාතඞ්ගං කුඤ්ජරං සට්ඨිහායනං, සායං{4} පාතො විචරන්තං න රජ්ජස්ස සරිස්සසි.
6197. යදා කණෙරුසඞ්ඝස්ස යූථස්ස පුරතො වජං, කොඤ්චං කාහති මාතඞ්ගො කුඤ්ජරො සට්ඨිහායනො; තස්ස තං නදතො සුත්වා න රජ්ජස්ස සරිස්සසි.
6198. දුභතො වනවිකාසෙ{1} යදා දක්ඛිසි කාමදං,{2} වනෙ වාළමිගාකිණ්ණෙ න රජ්ජස්ස සරිස්සසි.
6199. මිගං දිස්වාන සායන්හං පඤ්චමාලිනමාගතං,{3} කිම්පුරිසෙ ච නච්චන්තෙ න රජ්ජස්ස සරිස්සසි.
6200. යදා සොස්සසි{4} නිග්ඝොසං සන්දමානාය සින්ධුයා, ගීතං කිම්පුරිසානඤ්ච න රජ්ජස්ස සරිස්සසි.
6201. යදා සොස්සිසි නිග්ඝොසං ගිරිගබ්භරචාරිනො, වස්සමානස්ස ලූකස්ස න රජ්ජස්ස සරිස්සසි.
6202. යදා සීහස්ස ව්යග්ඝස්ස ඛග්ගස්ස ගවයස්ස ච, වනෙ සොස්සසි වාළානං න රජ්ජස්ස සරිස්සසි.
6203. යදා මොරීහි පරිකිණ්ණං බරිහීනං{5} මත්ථකාසීනං, මොරං දක්ඛිසි නච්චන්තං න රජ්ජස්ස සරිස්සසි.
6204. යදා මොරීහි පරිකිණ්ණං අණ්ඩජං චිත්ර පෙක්ඛුනං,{6} මොරං දක්ඛිසි නච්චන්තං න රජ්ජස්ස සරිස්සසි.
6205. යදා මොරීහි පරිකිණ්ණං නිලගීවං සිඛණ්ඩිනං, මොරං දක්ඛිසි නච්චන්තං න රජ්ජස්ස සරිස්සසි.
6206. යදා දක්ඛිසි හෙමන්තෙ පුප්ඵිතෙ ධරණීරුහෙ, සුරභිසම්පවායන්තෙ න රජ්ජස්ස සරිස්සසි.
6207. යදා හෙමන්තිකෙ මාසෙ හරිතං දක්ඛිසි මෙදිනිං, ඉන්දගොපකසඤ්ඡන්නං න රජ්ජස්ස සරිස්සසි.
6208. යදා දක්ඛිසි හෙමන්තෙ පුප්ඵිතෙ ධරණීරුහෙ, කුටජං බිම්බජාලඤ්ච පුප්ඵිතං ලොමපදමකං,{7} සුරභිසම්පවායන්තෙ න රජ්ජස්ස සරිස්සසි.
6209. යදා හෙමන්තිකෙ මාසෙ වනං දක්ඛිසි පුප්ඵිතං, ඔපුප්ඵානි ච පදුමානි{8} න රජ්ජස්ස සරිස්සසි.
හිමවන්තවණ්ණනා.
6210. තෙසං ලාලප්පිතං සුත්වා පුත්තස්ස සුණිසාය ච, කරුණං පරිදෙවෙසි රාජපුත්ති යසස්සිනී.
6211. සෙය්යො විසං මෙ ඛායිතං පපාතා පපතෙය්යහං, රජ්ජුයා බජ්ඣ මිය්යාහං කස්මා වෙස්සන්තරං පුත්තං පබ්බාජෙන්ති අදූසකං.
6212. අජ්ඣායකං දානපතිං යාචයොගං අමච්ඡරිං, පූජිතං පතිරාජෙහි කිත්තිමන්තං යසස්සසිනං; කස්මා වෙස්සන්තරං පුත්තං පබ්බාජෙන්ති අදූසකං.
6213. මාතාපෙත්තිභරං ජන්තුං කුලෙජෙට්ඨාපචායිකං, කස්මා වෙස්සන්තරං පුත්තං පබ්බාජෙන්ති අදූසකං.
6214. රඤ්ඤො හිතං දෙවහිතං ඤාතීනං සඛීනං හිතං, හිතං සබ්බස්ස රට්ඨස්ස කස්මා වෙස්සන්තරං පුත්තං පබ්බාජෙන්ති අදූසකං.
6215. මධූනීව පලාතානි අම්බාව පතිතා ඡමා, එවං හෙස්සති තෙ රට්ඨං පබ්බාජෙන්ති අදූසකං.
6216. හංසො නික්ඛිණපත්තොව පල්ලලස්මිං අනූදකෙ, අපවිද්ධො{1} අමචෙචති එකො රාජ විහීයසි.
6217. තං තං බ්රූමි මහාරාජ අත්ථො තෙ මා උපච්චගා, මා තං සිවීනං වචනා පබ්බාජෙසි අදූසකං.
6218. ධම්මස්සාපචිතිං කුම්මී සිවීනං විනයං ධජං, පබ්බාජෙමි සකං පුත්තං පාණා පියතරොහි මෙ.
6219. යස්ස පුබ්බෙ ධජග්ගානි කණිකාරාව පුප්ඵිතා, යායන්තමනුයායන්ති ස්වාජ්ජෙකොව ගමිස්සති.
6220. යස්ස පුබ්බෙ ධජග්ගානි කණිකාරාවනානිව, යායන්තමනුයායන්ති ස්වාජ්ජෙකොව ගමිස්සති.
6221. යස්ස පුබ්බෙ අණීකානි කණිකාරාව පුප්ඵිතා, යායන්තමනුයායන්ති ස්වාජ්ජෙකොව ගමිස්සති.
6222. යස්ස පුබ්බෙ අණීකානි කණිකාරාවනානිව, යායන්තමනුයායන්ති ස්වාජ්ජෙකොව ගමිස්සති
6223. ඉන්දගොපකවණ්ණාභා ගන්ධාරා පණ්ඩුකම්බලා, යායන්තමනුයායන්ති ස්වාජ්ජෙකොව ගමිස්සති.
6224. යො පුබ්බෙ හත්ථිනා යාති සිවිකාය රථෙන ච, ස්වාජ්ජ වෙස්සන්තරො රාජා කථං ගච්ඡති පත්තිකො.
6225. කථං චන්දනලිත්තඞ්ගො නච්චගීතප්පබොධනො, ඛරාජිනං ඵරසුඤ්ච ඛාරිකාජඤ්ච භාහිති.{1}
6226. කස්මා නාභිහරීයන්ති කාසාවා අජානානි වා{2} පවිසන්තං බ්රහාරඤ්ඤං කස්මා චීරං න බජ්ඣරෙ.
6227. කථන්නු චීරං ධාරෙන්ති රාජපබ්බජිතා ජනා, කථං කුසමයං චීරං මද්දී පරිදහෙස්සති.{3}
6228. කාසියානි ච ධාරෙත්වා ඛොමකොදුම්බරානි ච,{4} කුසචීරානි ධාරෙන්ති කථං මද්දී කරිස්සති.
6229. වය්හාහි පරියායිත්වා සිවිකාය රථෙන ච, සා කථජ්ජ අනුච්චඞ්ගී පථං ගච්ඡති පත්තිකා.
6230. යස්සා මුදුතලා හත්ථා චරණා ච සුඛෙධිතා, සා කථජ්ජ අනුච්චඞ්ගී වනං ගච්ඡති භීරුකා.{5}
6231. යස්සා මුදුතලා පාදා චරණා ච{6} සුඛෙධිතා,{7} පාදුකාහි සුවණ්ණාහි පීළමානාව ගච්ඡති; සා කථජ්ජ අනුච්චඞ්ගී පථං ගච්ඡති පත්තිකා.
6232. යාස්සු ඉත්ථි සහස්සස්ස{1} පුරතො ගච්ඡති මාලිනී, සා කථජ්ජ අනුච්චඞ්ගී වනං ගච්ඡති එකිකා.
6233. යාස්සු සිවාය සුත්වාන මුහුං උත්තසතෙ පුරෙ, සා කථජ්ජ අනුච්චඞ්ගී වනං ගච්ඡති භීරුකා.
6234. යාස්සු ඉන්දස්ස ගොත්තස්ස උලූකස්ස පවස්සතො, සුත්වාන නදතො භීතා වාරුණීව පවෙධති: සා කථජ්ජ අනුච්චඞ්ගී වනං ගච්ඡති භීරුකා.
6235. සකුණී හතපුත්තාව සුඤ්ඤං දිස්වා කුලාවකං, චිරං දුක්ඛෙන ඣායිස්සං සුඤ්ඤං ආගම්මිමං පුරං.
6236. සකුණීහතපුත්තාව සුඤ්ඤං දිස්වා කුලාවකං, කිසා පණ්ඩු භවිස්සාමි පියෙ පුත්තෙ අපස්සති.
6237. සකුණී හත පුත්තාව සුඤ්ඤං දිස්වා කුලාවකං, තෙන තෙන පධාවිස්සං පියෙ පුත්තෙ අපස්සතී.
6238. කුරරී{2} හතඡාපාව සුඤ්ඤං දිස්වා කුලාවකං, චිරං දුක්ඛෙන ඣායිස්සං සුඤ්ඤං ආගම්මිමං පුරං.
6239. කුරරී හතඡාපාව සුඤ්ඤං දිස්වා කුලාවකං, කිසා පණ්ඩු භවිස්සාමි පියෙ පුත්තෙ අපස්සතී.
6240. කුරරී හතඡාපාව සුඤ්ඤං දිස්වා කුලාවකං, තෙන තෙන පධාවිස්සං පියෙ පුත්තෙ අපස්සතී.
6241. සා නූන චක්කවාකීව පල්ලලස්මිං අනූදකෙ, චිරං දුක්ඛෙන ඣායිස්සං සුඤ්ඤං ආගම්මිමං පුරං.
6242. සා නූන චක්කවාකීව පල්ලලස්මිං අනූදකෙ, කිසා පණ්ඩු භවිස්සාමි පියෙ පුත්තෙ අපස්සතී.
6243. සා නූන චක්කවාකීව පල්ලලස්මිං අනූදකෙ, තෙන තෙන පධාවිස්සං පියෙ පුත්තෙ අපස්සතී.
6244. එවං චෙ මෙ විලපන්තියා රාජපුත්තං අදූසකං, පබ්බාජෙසි වනං රට්ඨා මඤ්ඤෙ හෙස්සාමි ජීවිතං,
6245. තස්සා ලාලප්පිතං සුත්වා සබ්බා අන්තෙපුරෙ බහූ,{1} බාහා පග්ගය්හ පක්කන්දුං සිවිකඤ්ඤා සමාගතා.
6246. සාලාව සම්පමථිතා මාලුතෙන පමද්දිතා, සෙන්ති පුත්තා ච දාරා ච වෙස්සන්තරනිවෙසනෙ.
6247. ඔරොධා ච කුමාරා ච වෙසියානා ච බ්රාහ්මණා, බාහා පග්ගය්හ පක්කන්දුං වෙස්සන්තරනිවෙසනෙ,
6248. හත්ථාරූහා අනීකට්ඨා රථිකා පත්තිකාරකා, බාහා පග්ගය්හ පක්කන්දුං වෙස්සන්තරනිවෙසනෙ.
6249. තතො රත්යා විවසනෙ සුරියස්සුග්ගමනං පති, අථ වෙස්සන්තරො රාජා දානං දාතුං උපාගමි.
6250. වත්ථානි වත්ථකාමානං සොණ්ඩානං දෙථ වාරුණිං. භොජනං භොජනත්ථිනං සම්මා දෙථ{2} පචෙච්ඡථ.
6251. මා ච කඤ්චි වණිබ්බකෙ හෙඨයිත්ථ ඉධාගතෙ, තප්පෙථ අන්නපානෙන ගච්ඡන්තු පටිපූජිතා.{*}
6252. තෙසු මත්තා කිළන්තාව සම්පතන්තී වණිබ්බකා, නික්ඛමන්තෙ මහාරාජෙ සිවීනං රට්ඨවඩ්ඪනෙ.
6253. අච්ඡෙච්ඡුං වත භො රුක්ඛං සබ්බකාමදදං දුමං, යථා වෙස්සන්තරං රට්ඨා පබ්බාජෙන්ති අදූසකං.
6254. අච්ඡෙච්ඡුං වත භො රුක්ඛං නානාඵලධරං දුමං, යථා වෙස්සන්තරං රට්ඨා පබ්බාජෙන්ති අදූසකං.
6255. අච්ඡෙච්ඡුං වත භො රුක්ඛං සබ්බකාමරසාහරං, යථා වෙස්සන්තරං රට්ඨා පබ්බාජෙන්ති අදූසකං.
6256. යෙ වුද්ධා යෙ ච දහරා යෙ ච මජ්ඣිමපොරිසා, බාහා පග්ගය්හ පක්කන්දුං; නික්ඛමන්තෙ මහාරාජෙ සිවීනං රට්ඨවඩ්ඪනෙ.
6257. අතියක්ඛා වස්සවරා ඉත්ථාගාරඤ්ච රාජිනො, බාහා පග්ගය්හ පක්කන්දුං; නික්ඛමන්තෙ මහාරාජෙ සිවීනං රට්ඨවඩ්ඪනෙ.
6258. ථියොපි තත්ථ පක්කන්දුං යා තම්හි නගරෙ අහු, නික්ඛමන්තෙ මහාරාජෙ සිවීනං රට්ඨවඩ්ඪනෙ.
6259. යෙ බ්රාහ්මණා යෙ ච සමණා අඤ්ඤෙවාපි වණිබ්බකා, බාහා පග්ගය්හ පක්කන්දුං අධම්මො කිර භො ඉති.
6260. යථා වෙස්සන්තරො රාජා යජමානො සකෙ පුරෙ, සිවීනං වචනත්ථෙන සම්හා රට්ඨා නිරජ්ජති.
6261. සත්ත හත්ථිසතෙ දත්වා සබ්බාලඞ්කාරභූසිතෙ, සුවණ්ණකච්ඡෙ මාතඞ්ගෙ හෙමකප්පනවාසසෙ.
6262. අරූළ්හෙ ගාමණීයෙහි තොමරඞ්කුසපාණිහි, එස වෙස්සන්තරො රාජා සම්හා රට්ඨා නිරජ්ජති.
6263. සත්ත අස්සසතෙ දත්වා සබ්බාලඞ්කාරභූසිතෙ, ආජානීයෙ ච ජාතියා සින්ධවෙ සීඝවාහනෙ.
6264. ආරූළ්හෙ ගාමණීයෙහි ඉල්ලියාචාපධාරිහි, එස වෙස්සන්තරො රාජා සම්හා රට්ඨා නිරජ්ජති.
6265. සත්ත රථසතෙ දත්වා සන්නද්ධෙ උස්සිතද්ධජෙ, දීපෙ අථොපි වෙය්යඝ්ගෙ සබ්බාලඞ්කාරභූසිතෙ.
6266. අරූළ්හෙ ගාමණීයෙහි චාපහත්ථෙහි වම්මිහි, එස වෙස්සන්තරො රාජා සම්හා රට්ඨා නිරජ්ජති.
6267. සත්ත ඉත්ථිසතෙ දත්වා එකමෙකා රථෙ ඨිතා, සන්නද්ධා නික්ඛරජ්ජූහි සුවණ්ණෙන අලඞ්කතා.
6268. පීතාලඞ්කාරා පීතවසනා පීතාභරණභූසිතා, ආළාරපඛුමා{1} හසුලා සුසඤ්ඤා තනුමජ්ඣිමා; එස වෙස්සන්තරො රාජා සම්හා රට්ඨා නිරජ්ජති.
6269. සන්ත ධෙනුසතෙ දත්වා සබ්බා කංසූපධාරණා,{1} එස වෙස්සන්තරො රාජා සම්හා රට්ඨා නිරජ්ජති.
6270. සත්තදාසීසතෙ දත්වා සත්තදාසසතානි ච එස වෙස්සන්තරො රාජා සම්හා රට්ඨා නිරජ්ජති.
6271. හත්ථි අස්සෙ රථෙ දත්වා නාරියො ච අලඞ්කතා, එස වෙස්සන්තරො රාජා සම්හා රට්ඨා නිරජ්ජති.
6272. තදාසිං යං භිංසනකං තදාසි ලොමහංසනං, මහාදානෙ පදින්නම්හි මෙදිනී සමකම්පථ.
6273. තදාසිං යං භිංසනකං තදාසි ලොමහංසනං, යං පඤ්ජලිකතො රාජා සම්හා රට්ඨා නිරජ්ජති.
6274. අථෙත්ථ වත්තතී සද්දො තුමුලො භෙරවො මහා, දානෙන තං නීහරන්ති පුන දානං අදා තුවං.
6275. තෙසු මත්තා කිලන්තා ච සම්පතන්ති වණිබ්බකා, නික්ඛමන්තෙ මහාරාජෙ සිවීනං රට්ඨවඩ්ඪනෙ.
6276. ආමන්තයිත්ථ රාජානං සඤ්ජයං ධම්මිනං වරං, අවරුද්ධසි මං දෙව වඞ්කං{2} ගච්ඡාමි පබ්බතං.
6277. යෙ හි කෙචි මහාරාජ භූතා යෙ ච භවිස්සරෙ, අතිත්තා යෙව කාමෙහි ගච්ඡන්ති යමසාධනං.
6278. සොහං සකෙ අභිසසිං යජමානො සකෙ පුරෙ, සිවීනං වචනත්ථෙන සම්හා රට්ඨා නිරජ්ජහං.
6279. අඝං තං පතිසෙවිස්සං වනෙ වාළමිගාකිණ්ණෙ, ඛග්ගදීපිනිසෙවිතෙ අහං පුඤ්ඤානි කරොමි; තුම්හෙ පඞ්කම්හි සීදථ.
6280. අනුජානාහි මං අම්ම පබ්බජ්ජා මම රුච්චති, සොහං සකෙ අභිසසිං යජමානො සකෙ පුරෙ. සිවීනං වචනත්ථෙන සම්හා රට්ඨා නිරජ්ජහං.
6281. අඝං තං පතිසෙවිස්සං වනෙ වාළමිගාකිණ්ණෙ, ඛග්ගදීපිනිසෙවිතෙ අහං පුඤ්ඤානි කරොමි; තුම්හෙ පඞ්කම්හි සීදථ.
6282. අනුජානාමි තං පුත්තං පබ්බජ්ජා තෙ සමිජ්ඣතු, අයඤ්ච මද්දී කල්යාණී සුසඤ්ඤා තනුමජ්ඣිමා; අච්ඡතං සහ පුත්තෙහි කිං අරඤ්ඤෙ කරිස්සති.
6283. නාහං අකාමා දාසිම්පි අරඤ්ඤං නෙතුමුස්සහෙ, සචෙ ඉච්ඡති අන්වෙතු සචෙ නිච්ඡති අච්ඡතු.
6284. තතො සුණ්හං මහාරාජා යාචිතුං පටිපජ්ජථ, මා චන්දන සමාචාරෙ රජොජල්ලං අධාරයි.
6285. මා කාසියානි ධාරෙත්වා කුසචීරමධාරයි, දුක්ඛො වාසො අරඤ්ඤස්මිං මා හි ත්වං ලක්ඛණෙ ගමි.
6286. තමබ්රවී රාජපුත්ති මද්දි සබ්බඞ්ගසොභනා, නාහං තං සුඛමිච්ඡෙය්යං යං මෙ වෙස්සන්තරං විනා.
6287. තමබ්රවී මහාරාජා සිවීනං රට්ඨවඩ්ඪනො, ඉඞ්ඝ මද්දී නිසාමෙහි වනෙ යෙ හොන්ති දුස්සභා.