5994. නිවෙසනම්හි තෙ දෙව සෙනඞ්ගං පරිහාපිතං, තං දින්නං බ්රහ්මදත්තෙන අනායිස්සං රථෙසභ.
5995. අප්පසෙනො මහාසෙනං කථං විග්ගය්හ ඨස්සසි, දුබ්බලො බලවන්තෙන විහඤ්ඤිස්සසි පණ්ඩිත.
5996. අප්පසෙනොපි චෙ මන්තී මහාසෙනං අමන්තිනං, ජිනාති{4} රාජා රාජානො ආදිච්චොවුදයං තමං.
5997. සුසුඛං වත සංවාසො පණ්ඩිතෙහීති සෙනක, පක්ඛීව පඤ්ජරෙ බද්ධෙ{5} මච්ඡෙ ජාලගතෙරිව අමිත්තහත්ථත්ථගතෙ මොචයී නො මහොසධො.
5998. එවමෙතං මහාරාජ පණ්ඩිතා හි සුඛාවහා. පක්ඛීව පඤ්ජරෙ බද්ධෙ මච්ඡෙ ජාලගතෙරිව; අමිත්තහත්ථත්ථගතෙ මොචයී නො මහොසධො.
5999. රක්ඛිත්වා කසිණං රත්තිං චූළනීයො මහබ්බලො, උදෙන්තං අරුණුග්ගමහි උපකාරිං උපාගමි.
6000. ආරුය්හ පවරං නාගං බලවන්තං සට්ඨිහායනං, රාජා අවොච පඤ්චාලො චූළනීයො මහබ්බලො.
6001. සන්නද්ධො මණිවම්මෙන සරමාදාය පාණිනා, පෙස්සියෙ අජ්ඣභාසිත්ථ පුථුගුම්බෙ සමාගතෙ.
6002. හත්ථාරූහෙ අනීකට්ඨෙ රථිකෙ පත්තිකාරකෙ, උපාසනම්හි කතහත්ථෙ වාළවෙධෙ සමාගතෙ.
6003. පෙසෙථ කුඤ්ජරෙ දන්තී බලවන්තෙ සට්ඨිහායනෙ, මද්දන්තු කුඤ්ජරා නගරං{1} වෙදෙහෙන සුමාපිතං.
6004. වච්ඡදන්තමුඛා සෙතා තිඛිණග්ගා{2} අට්ඨීවෙධිනො, පනුන්නා ධනුවෙගෙන සම්පතන්තු තරීතරං.{3}
6005. මාණවා වම්මිනො සූරා චිත්රදණ්ඩයුතාවුධා, පක්ඛන්දිනො මහානාගා හත්ථීනං හොන්තු සම්මුඛා.
6006. සත්තියො තෙලධොතායො අච්චිමන්තී{4} පභස්සරා, විජ්ජොතමානා තිට්ඨන්තු සතරංසා විය තාරකා.
6007. ආවුධබලවන්තානං ගුණිකායූරධාරිනං, එතාදිසානං යොධානං සඞ්ගාමෙ අපලායිනං. වෙදෙහො කුතො මුච්චිස්සති සචෙ පක්ඛීව කාහති.{5}
6008. තිංස මෙ පුරිසනාවුත්යො සබ්බෙ වෙකෙකනිච්ඡිතා,{6} යෙසං සමං න පස්සාමි කෙවලං මහිමං චරං.
6009. නාගා ච කප්පිතා{7} දන්ති බලවන්තො සට්ඨිහායනා, යෙසං ඛන්ධෙසු සොභන්ති කුමාරා චාරුදස්සනා.
6010. පීතාලඞ්කාරා පීතවසනා පීතුත්තරනිවාසනා, නාගක්ඛන්ධෙසු සොභන්ති දෙවපුත්තාව නන්දනෙ.
6011. පාඨිනවණ්ණා{1} නෙත්තිංසා තෙලධොතා පභස්සරා, නිට්ඨිතා නරවීරෙහි{2} සමධාරා සුනිස්සිතා.{3}
6012. වෙල්ලාලිනො වීතමලා සික්කායස්මයා දළ්හා, ගහිතා බලවන්තෙහි සුප්පහාරප්පහාරිහි.
6013. සුවණ්ණථරුසම්පන්නා ලොහිතකච්ඡුපධාරිතා, විවත්තමානා සොභන්ති විජ්ජුවබ්භඝනන්තරෙ.
6014. පතාකා{4} වම්මිනො සූරා අසිචම්මස්ස කොවිදා, ථරුග්ගහා{5} සික්ඛිතාරො නාගක්ඛන්ධාතිපාතිනො.{6}
6015. එදිසෙහි{7} පරික්ඛිත්තො නත්ථි මොක්ඛො ඉතො තව, පභාවං තෙ න පස්සාමි යෙන ත්වං මිථිලං වජෙ.
6016. කින්නු සන්තරමානොව නාගං පෙසෙසි කුඤ්ජරං, පහට්ඨරූපො ආපතසි{8} ලද්ධත්ථොස්මීති{9} මඤ්ඤසි,
6017. ඔහරෙතං{10} ධනු චාපං ඛුරප්පං පටිසංහර, ඔහරෙතං සුභං චම්මං වෙළුරියමණියන්ථතං.{11}
6018. පසන්නමුඛවණ්ණොසි මිහිතපුබ්බඤ්ච භාසසි, හොති ඛො මරණකාලෙ තාදිසී{12} වණ්ණසම්පදා.
6019. මොඝං තෙ ගජ්ජිතං{13} භින්තමන්තොසි ඛත්තිය, දුග්ගණ්හො හි තයා රාජා ඛළුඞ්කෙනෙව{14} සින්ධවො.
6020. තිණ්ණෙ හිය්යො රාජා ගඞ්ගං සාමච්චො සපරිජ්ජනො, හංසරාජං යථා ධඞ්කො අනුජ්ජවං පපතිස්සසි.
6021. සිගාලා රත්තිභාගෙන ඵුල්ලං දිස්වාන කිංසුකං, මංසපෙසීති මඤ්ඤන්තා පරබ්බූළ්හා මිගාධමා.
6022. වීතිවත්තාසු රත්තීසු උග්ගතස්මිං දිවාකරෙ, කිංසුකං ඵුල්ලිතං දිස්වා ආසච්ඡින්තා මිගාධමා.
6023. එවමෙව තුවං රාජ වෙදෙහං පරිවාරිය,{1} ආසච්ඡින්නො ගමිස්සසි සිගාලා{2} කිංසුකං යථා.
6024. ඉමස්ස හත්ථපාදෙ ච කණ්ණනාසඤ්ච ඡින්දථ, යො මෙ අමිත්තං හත්ථගතං වෙදෙහං පරිමොචයි.
6025. ඉම මංසංව පාතබ්බං{3} සූලෙ කත්වා පචන්තු තං, යො මෙ අමිත්තං හත්ථගතං වෙදෙහං පරිමොචයි.
6026. යථාපි ආසභං චම්මං පථව්යා විතනිය්යති,{4} සීහස්ස අථො ව්යග්ඝස්ස හොති සඞ්කුසමාහතං.
6027. එවං තං විතනිත්වාන{5} වෙධයිස්සාමි සත්තියා, යො මෙ අමිත්තං හත්ථගතං වෙදෙහං පරිමොචයි.
6028. සචෙ මෙ හත්ථෙ ච පාදෙ ච කණ්ණනාසඤ්ච ඡෙච්ඡසි, එවං පඤ්චාලචණ්ඩස්ස{6} වෙදෙහො ඡෙදයිස්සති.
6029. සචෙ මෙ හත්ථෙ ච පාදෙ ච කණ්ණනාසඤ්ච ඡෙච්ඡසි, එවං පඤ්චාලචණ්ඩියා{7} වෙදෙහො ඡෙදයිස්සති.
6030. සචෙ මෙ හත්ථෙ ච පාදෙ ච කණ්ණනාසඤ්ච ඡෙච්ඡසි, එවං නන්දාය දෙවියා වෙදෙහො ඡෙදයිස්සති.
6031. සචෙ මෙ හත්ථෙ ච පාදෙ ච කණ්ණනාසඤ්ච ඡෙච්ඡසි, එවං තෙ පුත්තදාරස්ස වෙදෙහො ඡෙදයිස්සති.
6032. සචෙ මංසංව පාතබ්බං සූලෙ කත්වා පවිස්සසි, එවං පඤ්චාලචණ්ඩස්ස වෙදෙහො පාචයිස්සති.
6033. සචෙ මංසංව පාතබ්බං සූලෙ කත්වා පවිස්සසි, එවං පඤ්චාලචණ්ඩියා වෙදෙහො පාචයිස්සති.
6034. සචෙ මංසංව පාතබ්බං සූලෙ කත්වා පචිස්සසි, එවං නන්දාය දෙවියා වෙදෙහො පාචයිස්සති.
6035. සචෙ මංසංව පාතබ්බං සූලෙ කත්වා පචිස්සසි, එවං තෙ පුත්තදාරස්ස වෙදෙහො පාචයිස්සති.
6036. සචෙ මං විතනිත්වාන වෙධයිස්සසි සත්තියා, එවං පඤ්චාලචණ්ඩස්ස වෙදෙහො වෙධයිස්සති.
6037. සචෙ මං විතනිත්වාන වෙධයිස්සසි සත්තියා, එවං පඤ්චාලචණ්ඩියා වෙදෙහො වෙධයිස්සති.
6038. සචෙ මං විතනිත්වාන වෙධයිස්සසි සත්තියා, එවං නන්දාය දෙවියා වෙදෙහො වෙධයිස්සති.
6039. සචෙ මං විතනිත්වාන වෙධයිස්සසි සත්තියා, එවං තෙ පුත්තදාරස්ස වෙදෙහො වෙධයිස්සති; එවං නො මන්තිතං රහො වෙදෙහෙන මයා සභ.
6040. යථා පලසතං{1} චම්මං කොන්තිමන්තී{2}සුනිට්ඨිතං, උපෙති තනුතාණාය සරානං පටිහන්තවෙ.
6041. සුඛාවහො දුක්ඛනුදො වෙදෙහස්ස යසස්සිනො, මතිං තෙ පටිහඤ්ඤාමි උසුං පලසතෙනිව.{3}
6042. ඉඞ්ඝ පස්ස මහාරාජ සුඤ්ඤං අන්තෙපුරං තව, ඔරොධා ච කුමාරා ච තව මාතා ච ඛත්තිය උම්මග්ගා{4} නීහරිත්වාන වෙදෙහස්සුපනාමිතා.
6043. ඉඞ්ඝ අන්තෙපුරං මය්හං ගන්ත්වාන විචිනාථ නං, යථා ඉමස්ස වචනං සච්චං වා යදි වා මුසා.
6044. එවමෙතං මහාරාජ යථා ආහ මහොසධො, සුඤ්ඤං අන්තෙපුරං සබ්බං කාකපට්ටනකං යථා.
6045. ඉතො ගතා මහාරාජ නාරී සබ්බඞ්ගසොභනා, කොසුම්භඵලකසුස්සොණී හංසගග්ගරභාණිනී.
6046. ඉතො නීතා මහාරාජ නාරී සබ්බඞ්ගසොභනා, කොසෙය්යවසනා සාමා ජාතරූපසුමෙඛලා.
6047. සුරත්තපාදා කල්යාණී සුවණ්ණමණිමෙඛලා, පාරෙවතක්ඛී සුතනු බිම්බොට්ඨා තනුමජ්ඣිමා.
6048. සුජාතා භුජගලට්ඨිව වෙල්ලීව{1} තනුමජ්ඣිමා, දීඝස්සා කෙසා අසිතා ඊසකග්ගපවෙල්ලිතා.
6049. සුජාතා මිගඡාපීව{2} හෙමන්තග්ගිසිඛාරිව, නදීව ගිරිදුග්ගෙසු සඤ්ඡන්නා ඛුද්දවෙළුහි.
6050. නාගනාසූරු කල්යාණි පඨමා තිම්බරුත්ථනී, නාතිදීඝා නාතිරස්සා නාලොමා නාතිලොමසා.
6051. නන්දාය නූන මරණෙන නන්දසි සිරිවාහන, අහඤ්ච නූන නන්දා ච ගච්ඡාම යමසාධනං.
6052. දිබ්බං අධීයසෙ මායං අකාසි චක්ඛුමොහනං, යො මෙ අමිත්තං හත්ථගතං වෙදෙහං පරිමොචයි.
6053. අධීයන්ති මහාරාජ දිබ්බමායිධ පණ්ඩිතා, තෙ මොචයන්ති අත්තානං පණ්ඩිතා මන්තිනො ජනා.
6054. සන්ති මාණවපුත්ත කුසලා සන්ධිඡෙදකා, යෙසං කතෙන මග්ගෙන වෙදෙහො මිථිලං ගතො.
6055. ඉඞ්ඝ පස්ස මහාරාජ උම්මග්ගං සාධු මාපිතං, හත්ථීනං අථ අස්සානං රථානං අථ පත්තිනං. ආලොකභූතං තිට්ඨන්තං උම්මග්ගං{3} සාධු නිට්ඨිතං.
6056. ලාභා වත විදෙහානං යස්ස මෙ එදිසා පණ්ඩිතා, ඝරෙ වසන්ති විජිතෙ යථා ත්වංසි මහොසධ.
6057. වුත්තිඤ්ච පරිහාරඤ්ච දිගුණං භත්තවෙතනං, දදාමි විපුලං භොගං භුඤ්ජ කාමෙ රමස්සු ච. මා විදෙහං පච්චගමා කිං විදෙහො කරිස්සති.
6058. යො චජෙථ මහාරාජ භත්තාරං ධනකාරණා, උභින්නං හොති ගාරය්හො අත්තනො ච පරස්ස ච; යාව ජීවෙය්ය වෙදෙහො නාඤ්ඤස්ස පුරිසො සියා.
6059. යො චජෙථ මහාරාජ භත්තාරං ධනකාරණා, උභින්නං හොති ගාරය්හො අත්තනො ච පරස්ස ච; යාව තිට්ඨෙය්ය වෙදෙහො නාඤ්ඤස්ස විජිතෙ වසෙ.
6060. දම්මි නික්ඛසහස්සං තෙ ගාමාසීතිඤ්ච කාසිසු, දාසීසතානි චත්තාරි දම්මි භරියාසතඤ්ච තෙ; සබ්බං සෙනඞ්ගමාදාය සොත්ථිං ගච්ඡ මහොසධ.
6061. යාචං දදන්තු හත්ථීනං අස්සානං ද්විගුණං විධං, තප්පෙන්තු අන්නපානෙන රථිකෙ පත්තිකාරකෙ.
6062. හත්ථි අස්සෙ රථෙ පත්ති ගච්ඡෙවාදාය පණ්ඩිත, පස්සතු තං මහාරාජා වෙදෙහො මිථිලං ගතං.
6063. හත්ථි අස්සා රථා පත්ති සෙනා පදිස්සතෙ මහා, චතුරඞ්ගිනී භිංසරූපා කින්නු මඤ්ඤන්ති පණ්ඩිතා.
6064. ආනන්දො තෙ මහාරාජ උත්තමො පතිදිස්සති, සබ්බං සෙනඞ්ගමාදාය සොත්ථිං පත්තො මහොසධො.
6065. යථා පෙතං සුසානස්මිං ඡඩ්ඩෙත්වා චතුරො ජනා, එවං කම්පිල්ලියෙ ත්යම්හා ඡඩ්ඩයිත්වා ඉධාගතා.
6066. අථ ත්වං කෙන වණ්ණෙන කෙන වා පන හෙතුනා, කෙන වා අත්ථජාතෙන අත්තානං පරිමොචයි.
6067. අත්ථං අත්ථෙන වෙදෙහ මන්තං මන්තෙන ඛත්තිය, පරිවාරයිස්සං රාජානං ජම්බුදීපංව සාගරො.
6068. දින්නං නික්ඛසහස්සං මෙ ගාමාසීති ච කාසිසු, දාසීසතානි චත්තාරි දින්නං භරියාසතඤ්ච මෙ සබ්බං සෙනඞ්ගමාදාය සොත්ථිනම්භි ඉධාගතො.
6069. සුසුඛං වත සංවාසො පණ්ඩිතෙහීති සෙනක, පක්ඛීව පඤ්ජරෙ බද්ධෙ මච්ඡෙ ජාලගතෙරිව; අමිත්තහත්ථත්ථගතෙ මොචයී නො මහොසධො.
6070. එවමෙතං මහාරාජ පණ්ඩිතා හි සුඛාවහා, පක්ඛීව පඤ්ජරෙ බද්ධෙ මච්ඡෙ ජාලගතෙරිව; අමිත්තහත්ථත්ථගතෙ මොචයී නො මහොසධො.
6071. ආහඤ්ඤන්තු සබ්බවීණා භෙරියො දෙණ්ඩිමානි ච, නදන්තු මාගධා{1} සඞ්ඛා වග්ගු වදතු{2} දුන්දුභි.
6072. ඔරොධා ච කුමාරා ච වෙසියානා ච බ්රාහ්මණා, බහුං අන්නං ච පානඤ්ච පණ්ඩිතස්සාභිහාරයුං.
6073. හත්ථාරූහා අනීකට්ඨා රථිකා පත්තිකාරකා, බහුං අන්නඤ්ච පානඤ්ච පණ්ඩිතස්සාභිහාරයුං.
6074. සමාගතා ජානපදා නෙගමා ච සමාගතා, බහුං අන්නඤ්ච පානඤ්ච පණ්ඩිතස්සාභිහාරයුං.
6075. බහුජ්ජනො පසන්නොසි දිස්වා පණ්ඩිතමාගතෙ, පණ්ඩිතම්හි අනුප්පත්තෙ චෙලුක්ඛෙපො අවත්තථාති.
මහාඋම්මග්ගකණ්ඩං.
6076. සචෙ වො වුය්හමානානං සත්තන්නං උදකණ්ණවෙ, මනුස්සබලිමෙසානො නාමං ගණ්හෙය්ය රක්ඛසො; අනුපුබ්බං කථං දත්වා මුඤ්චෙසි දකරක්ඛිනො.{3}
6077. මාතරං පඨමං දජ්ජං භරියං දත්වාන භාතරං, තතො සහායං දත්වාන පඤ්චමං දජ්ජං බ්රාහ්මණං; ඡට්ඨාහං දජ්ජමත්තානං නෙව දජ්ජං මහොසධං.
6078. පොසෙතා තෙ ජනෙත්තී ච දිඝරත්තානුකම්පිකා, ඡම්භී තයි පදුට්ඨස්මිං{4} පණ්ඩිතා අත්ථදස්සිනී; අඤ්ඤං උපනිසං කත්වා වධා තං පරිමොචයි.
6079. තං තාදිසං පාණදදිං ඔරසං ගබ්භධාරිණිං, මාතරං කෙන දොසෙන දජ්ජාසි දකරක්ඛිනො.
6080. දහරාවිය අලඞ්කාරා ධාරෙති අපිළන්ධනං දොවාරිකෙ අනීකට්ඨෙ අතිවෙලං පජග්ඝති.{1}
6081. තතොපි පටිරාජානං සයං දූතානි සාසති, මාතරං තෙන දොසෙන දජ්ජාහං දකරක්ඛිනො.
6082. ඉත්ථිගුම්බස්ස පවරා අච්චන්තපියවාදිනි,{2} අනුග්ගතා{3} සීලවතී ඡායාව අනපායිනී.
6083. අක්කොධනා පඤ්ඤවතී පණ්ඩිතා අත්ථදස්සිනී, උබ්බරිං කෙන දොසෙන දජ්ජාසි දකරක්ඛිනො.
6084. ඛිඩ්ඪාරතිසමාපන්නං අනත්ථවසමාගතං, සා මං සකානං පුත්තානං අයාචං යාචතෙ ධනං,
6085. සොහං දදාමි සාරත්තො බහුං උච්චාවචං ධනං. සුදුච්චජං චජිත්වාන පච්ඡා සොචාමි දුම්මනො; උබ්බරිං{4} තෙන දොසෙන දජ්ජාමි{5} දකරක්ඛිනො.
6086. යෙනාවිතා ජානපදා ආනීතා{6} ච පටිග්ගහං, ආභතං{7} පරරජ්ජෙහි අභිට්ඨාය බහුං ධනං.
6087. ධනුග්ගහානං පවරං සූරං තිඛිණමන්තිනං, භාතරං කෙන දොසෙන දජ්ජාසි දකරක්ඛිනො.
6088. මයොචිතා{8} ජානපදා ආනීතා ච පටිග්ගහං, ආභතං පරරජ්ජෙහි අභිට්ඨාය බහුං ධනං.
6089. ධනුග්ගහානං පවරො සූරො තිඛිණමන්ති ච, මයායං සුඛිතො රාජා අතිමඤ්ඤති දාරකො.
6090. උපට්ඨානම්පි මෙ අය්යෙ න සො එති යථා පුරෙ, භාතරං තෙන දොසෙන දජ්ජාහං දකරක්ඛිනො.
6091. එකරත්තෙන උභයො තුවං ච ධනුසෙඛවා, උභො ජාතෙත්ථ පඤ්චාලා පහායා සුසමාවයා.
6092. චරියා තං අනුබන්ධිත්ථො එකදුක්ඛසුඛො තව, උස්සුක්කො තෙ දිවාරත්තිං සබ්බකිච්චෙසු ව්යාවටො; සහායං කෙන දොසෙන දජ්ජාසි දකරක්ඛිනො.