5894. අද්ධා ඉදං මන්තපදං සුදුද්දසං අත්ථො සුද්ධො නරවිරියෙන{4} දිට්ඨො, තථා හි කායො මම සම්පවෙධති{5} හිත්වා සයං කො පරහත්ථමෙස්සති.
5895. ඡන්නං හි එකාව මතී සමෙති යෙ පණ්ඩිතා උත්තමභූරිපත්තා, යානං අයානං අථවාපි ඨානං මහොසධ ත්වම්පි මතිං කරොහි.
5896. ජානාසි ඛො රාජ මහානුභාවො මහබ්බලො චූළනිබ්රහ්මදත්තො රාජා ච තං ඉච්ඡති කාරණත්ථං මිගං{6} යථා ඔකචරෙන{7} ලුද්දො.
5897. යථාපි මච්ඡො බළිසං වඞ්කං මංසෙන ඡාදිතං, ආමගිද්ධො න ජානාති මච්ඡො මරණමත්තනො.
5898. එවමෙව තුවං රාජ චූළනීයස්ස{1} ධීතරං, කාමගිද්ධො න ජානාසි මච්ඡොව මරණමත්තනො.
5899. සචෙ ගච්ඡසි පඤ්චාලං ඛිප්පමත්තං ජහිස්සසි, මිගං පථානුපන්නංව{2} මහන්තං භයමෙස්සති.
5900. මයමෙව බාලම්හසෙ එළමූගා යෙ උත්තමත්ථානි තයී ලපිම්භ, කිමෙව ත්වං නඞ්ගලකොටිවද්ධො{3} අත්ථානි ජානාසි යථාපි අඤ්ඤෙ.
5901. ඉමං ගලෙ ගහෙත්වාන නාසෙථ විජිතා මම, යො මෙ රතනලාභස්ස අන්තරායාය භාසති.
5902. තතො ච සො අපක්කම්ම වෙදෙහස්ස උපන්තිකා, අථ ආමන්තයී දූතං මාඪරං{4} සුවපණ්ඩිතං.
5903. එහි සම්ම හරීපක්ඛ{5} වෙය්යාවච්චං කරොහි මෙ, අත්ථි පඤ්චාලරාජස්ස සාළිකා සයනපාලිකා.
5904. තං පත්ථරෙන{6} පුච්ඡස්සු සා හි සබ්බස්ස කොවිදා, සා තෙසං සබ්බං ජානාති රඤ්ඤො ච කොසියස්ස ච.
5905. ආමොති සො පටිස්සුත්වා මාඪරො සුවපණ්ඩිතො, අගමාසි හරීපක්ඛො සාළිකාය උපන්තිකං.
5906. තතො, ච ඛො සො ගන්ත්වාන මාඪරො සුවපණ්ඩිතො, අථ ආමන්තයී සුඝරං සාළිකං මඤ්ජුභාණිකං.
5907. කච්චි තෙ සුඝරෙ ඛමනීයං කච්චි වෙස්සෙ{7} අනාමයං, කච්චි තෙ මධුනා ලාජා ලබ්භතෙ සුඝරෙ තව.
5908. කුසලඤ්චෙව මෙ සම්ම අථො සම්ම අනාමයං, අථො මෙ මධුනා ලාජා ලබ්භතෙ සුවපණ්ඩිත.
5909. කුතො නු සම්ම ආගම්ම කස්ස වා පහිතො තුවං, න ච මෙසි ඉතො පුබ්බෙ දිට්ඨො වා යදි වා සුතො.
5910. අහොසිං සිවිරාජස්ස පාසාදො සයනපාලකො, තතො සො ධම්මිකො රාජා බද්ධෙ{1} මොචෙසි බන්ධනා.
5911. තස්ස මෙකා දුතියාසි සාළිකා මඤ්ජුභාණිකා, තං තත්ථ අවධී සෙනො පෙක්ඛතො සුඝරෙ මම.
5912. තස්සා කාමා හි සම්මත්තො ආගතොස්මි තවන්තිකෙ, සචෙ කරෙය්යාසි ඔකාසං උභයොව වසාමසෙ.
5913. සුවොව සුවිං කාමෙය්ය සාළිකො පන සාළිකං, සුවස්ස සාළිකාය ච{2} සංවාසො හොති කීදිසො.
5914. යං යං කාමී කාමයති{3} අපි චණ්ඩාලිකාමපි, සබ්බෙහි සදිසො හොති නත්ථි කාමෙ අසාදිසො.
5915. අත්ථි ජම්බාවතී නාම මාතා සිවිස්ස{4} රාජිනො, සා භරියා වාසුදෙවස්ස කණ්හස්ස මහෙසී පියා.
5916. රථාවතී කිම්පුරිසී සාපි වච්ඡං අකාමයි, මනුස්සො මිගියා සද්ධිං නත්ථි කාමෙ අසාදිසො.
5917. හන්ද ඛොහං ගමිස්සාමි සාළිකෙ මංජුභාණිකෙ, පච්චක්ඛානුපදං හෙතං අතිමඤ්ඤසි නූන මං.
5918. න සිරී තරමානස්ස මාඪර සුවපණ්ඩිත, ඉධෙව තාව අච්ඡස්සු යාව රාජානං දක්ඛසි, සොස්සසි{5} සද්දං මුතිඞ්ගානං ආනුභාවඤ්ච රාජිනො.
5919. යො නු ඛොයං තිබ්බො සද්දො තිරොජනපදෙ සුතො, ධීතා පඤ්චාලරාජස්ස ඔසධී විය වණ්ණිනී; තං දස්සති විදෙහානං සො විවාහො භවිස්සති.
5920. නෙදිසො{6} තෙ අමිත්තානං විවාහො හොතු මාඪර, යථා පඤ්චාලරාජස්ස වෙදෙහෙන භවිස්සති.
5921. ආනයිත්වාන වෙදෙහං පඤ්චාලානං රථෙසභො, තතො නං ඝාතයිස්සති නාස්ස සක්ඛි භවිස්සති.
5922. හන්ද ඛො මං අනුජානාහි රත්තියො සත්තමත්තියො, යාවාහං සිවිරාජස්ස ආරොචෙමි මහෙසිනො, ලද්ධො ච මෙ ආවසථො සාළිකාය උපන්තිකං.
5923. හන්ද ඛො තං අනුජානාමි රත්තියො සත්තමත්තියො, සචෙ ත්වං සත්තරත්තෙන නාගච්ඡසි මමන්තිකෙ; මඤ්ඤෙ ඔක්කන්තසත්තං මං මතාය ආගමිස්සසි.
5924. තතො ච ඛො සො ගන්ත්වාන මාඪරො සුවපණ්ඩිතො, මහොසධස්ස අක්ඛාසි සාළියා{1} වචනං ඉදං.
5925. යස්සෙව ඝරෙ භුඤ්ජෙය්ය භොගං, තස්සෙව අත්ථං පුරිසො චරෙය්ය.
5926. හන්දාහං ගච්ඡාමි පුරෙ ජනින්ද, පඤ්චාලරාජස්ස පුරං සුරම්මං; නිවෙසනානි මාපෙතුං වෙදෙහස්ස යසස්සිනො.
5927. නිවෙසනානි මාපෙත්වා වෙදෙහස්ස යසස්සිනො. යදා තෙ පහිණෙය්යාමි තදා එය්යාසි ඛත්තිය.
5928. තතො ච පායාසි පුරෙ මහොසධො, පඤ්චාලරාජස්ස පුරං සුරම්මං; නිවෙසනානි මාපෙතුං වෙදෙහස්ස යසස්සිනො.
5929. නිවෙසනානි මාපෙත්වා වෙදෙහස්ස යසස්සිනො; අථස්ස පහිණී දූතං (වෙදෙහං මිථිලග්ගහං) එහිදානි මහාරාජ මාපිතං තෙ නිවෙසනං.
5930. තතො ච රාජා පායාසි සෙනාය චතුරඞ්ගියා, අනන්තවාහනං දට්ඨුං ඵීතං කම්පිල්ලියං පුරං.
5931. තතො ච ඛො සො ගන්ත්වාන බ්රහ්මදත්තස්ස පාහිණී, ආගතොස්මි මහාරාජ තව පාදානි වන්දිතුං.
5932. දදාහිදානි මෙ භරියං නාරිං සබ්බඞ්ගසොභිනිං, සුවණ්ණෙන පටිච්ඡන්නං දාසීගණපුරක්ඛතං.
5933. ස්වාගතං තෙ වෙදෙහ අථො තෙ අදුරාගතං, නක්ඛත්තඤ්ඤෙව පරිපුච්ඡ අහං කඤ්ඤං දදාමි තෙ; සුවණ්ණෙන පටිච්ඡන්නං දාසීගණපුරක්ඛතං.
5934. තතො ච රාජා වෙදෙහො නක්ඛත්තං පරිපුච්ඡථ, නක්ඛත්තං පරිපුච්ඡිත්වා බ්රහ්මදත්තස්ස පාහිණී.
5935. දදාහිදානි මෙ භරියං නාරිං සබ්බඞ්ගසොභිනිං, සුවණ්ණෙන පටිච්ඡන්නං දාසීගණපුක්ඛතං.
5936. දදාමිදානි මෙ භරියං නාරිං සබ්බඞ්ගසොභිනිං, සුවණ්ණෙන පටිච්ඡන්නං දාසීගණපුරක්ඛතං.
5937. හත්ථි අස්සා රථා පත්තී සෙනා තිට්ඨන්ති වම්මිතා{1}, උක්කා පදිත්තා ඣායන්ති කින්නු මඤ්ඤන්ති පණ්ඩිතා.
5938. හත්ථි අස්සා රථා පත්ති සෙනා තිට්ඨන්ති වම්මිතා, උක්කා පදිත්තා ඣායන්ති කින්නු කාහන්ති පණ්ඩිතා.
5939. රක්ඛති තං මහාරාජ චූළනීයො මහබ්බලො, පදුට්ඨො තෙ බ්රහ්මදත්තො පාතො තං ඝාතයිස්සති.
5940. උබ්බෙධතෙ{2} මෙ හදයං මුඛඤ්ච පරිසුස්සති, නිබ්බුතිං නාධිගච්ඡාමි අග්ගිදඩ්ඪොව ආතපෙ.
5941. කම්මාරානං යථා උක්කා අන්තො ඣායති නො බහි, එවම්පි හදයං මය්හං අන්තො ඣායති නො බහි.
5942. පමත්තො මන්තනාතීතො භින්නමන්තොසි ඛත්තිය, ඉදානි ඛො තං තායන්තු පණ්ඩිතා මන්තිනො ජනා.
5943. අකත්වාමච්චස්ස වචනං අත්ථකාමහිතෙසිනො, අන්තපීතිරතො රාජ මිගො කූටෙව ඔහිතො.
5944. යථාපි මච්ඡො බළිසං වඞ්කං මංසෙන ඡාදිතං, ආමගිද්ධො න ජානාති මච්ඡො මරණමත්තනො.
5945. එවමෙව තුවං රාජ චූළනෙය්යස්ස ධීතරං, කාමගිද්ධො න ජානාසි මච්ඡොව මරණමත්තනො.
5946. සචෙ ගච්ඡසි පඤ්චාලං ඛිප්පමත්තං{3} ජහෙස්සසි,{4} මිගං පථානුපන්නංව{5} මහන්තං භයමෙස්සති.{6}
5947. අනරියරූපො පුරිසො ජනින්ද අහීව උච්ඡඞ්ගගතො ඩසය්යෙ,{1} න තෙන මෙත්තිං කයිරාථ ධීරො දුක්ඛො හවෙ කාපුරිසෙන{2} සඞ්ගමො.
5948. යන්ත්වෙව{3} ජඤ්ඤා පුරිසං{4} ජනින්ද සීලවායං බහුස්සුතො, තෙනෙව තෙත්තිං කයිරාථ ධීරො සුඛො භවෙ සප්පුරිසෙන සඞ්ගමො.
5949. බාලො තුවං ඵළමූගොසි රාජ යො උත්තමත්ථානි මයී ලපිත්ථො, කිමෙවාහං නඞ්ගලකොටිවද්ධො අත්ථානි ජානිස්සං යථාපි අඤ්ඤෙ.
5950. ඉමං ගලෙ ගහෙත්වාන නාසෙථ විජිතා මම, යො මෙ රතනලාභස්ස අන්තරායාය භාසති.
5951. මහොසධ අතීතෙන නානුවිජ්ඣන්ති පණ්ඩිතා, කි මං අස්සං ච සම්බද්ධං{5} පතොදෙනෙව විජ්ඣසි.
5952. සචෙ පස්සසි මොක්ඛං මෙ{6} ඛෙමං වා පන පස්සසි, තෙනෙව මං අනුසාස කිං අතීතෙන විජ්ඣසි.
5953. අතීතං මානුසං කම්මං දුක්කරං දුරභිසම්භවං, න තං සක්කොමි මොචෙතුං ත්වම්පි ජානස්සු ඛත්තිය.
5954. සන්ති වෙහාසයා{7} නාගා ඉද්ධිමන්තො යසස්සිනො, තෙපි ආදාය ගච්ඡෙය්යුං යස්ස හොන්ති තථාවිධා.
5955. සන්ති වෙහාසයා අස්සා ඉද්ධිමන්තො යසස්සිනො, තෙපි ආදාය ගච්ඡෙය්යුං යස්ස හොන්ති තථාවිධා.
5956. සන්ති වෙහාසයා පක්ඛී ඉද්ධිමන්තො යසස්සිනො, තෙපි ආදාය ගච්ඡෙය්යුං යස්ස හොන්ති තථාවිධා.
5957. සන්ති වෙහාසයා යක්ඛා ඉද්ධිමන්තො යසස්සිනො, තෙපි ආදාය ගච්ඡෙය්යුං යස්ස හොන්ති තථාවිධා.
5958. අතීතං මානුසං{1} කම්මං දුක්කරං දුරභිසම්භවං, න තං සක්කොමි මොචෙතුං අන්තලික්ඛෙන ඛත්තිය.
5959. අතීරදස්සී පුරිසො මහන්තෙ උදකණ්ණවෙ, යත්ථ සො ලභතෙ ගාධං{2} තත්ථ සො වින්දතෙ සුඛං.
5960. එවං අම්භඤ්ච අඤ්ඤො ච ත්වං පතිට්ඨා මහොසධ, ත්වං නොසි මන්තිනං සෙට්ඨො අම්හෙ දුක්ඛා පමොචය.
5961. අතීතං මානුසං කම්මං දුක්කරං දුරභිසම්භවං, න තං සක්කොමි මොචෙතුං ත්වම්පි ජානස්සු{3} සෙනක.
5962. සුණොහි මෙතං වචනං පස්සසෙතං මහබ්භයං, සෙනකංදානි පුච්ඡාමි කිං කිච්චං ඉධ මඤ්ඤසි.
5963. අග්ගිං ද්වාරතො දෙම ගණ්හාමසෙ විකත්තනං,{4} අඤ්ඤමඤ්ඤං වධිත්වාන ඛිප්පං හෙස්සාම ජීවිතං. මා නො රාජා{5} බ්රහ්මදත්තො චිරං දුක්ඛෙන මාරයි.
5964. සුණොහි එතං වචනං පස්සසෙතං මහබ්භයං, පුක්කුසංදානි පුච්ඡාමි කිං කිච්චං ඉධ මඤ්ඤසි.
5965. විසං ඛාදිත්වා මීය්යාම ඛිප්පං හෙස්සාම ජීවිතං, මා නො රාජා බ්රහ්මදත්තො චිරං දුක්ඛෙන මාරයි.
5966. සුණොහි එතං වචනං පස්සසෙතං මහබ්භයං, කාවින්දංදානි පුච්ඡාමි කිං කිච්චං ඉධ මඤ්ඤසි.
5967. රජ්ජුයා බජ්ඣ මිය්යාම පපාතා පපතෙමසෙ, මා නො රාජා බ්රහ්මදත්තො චිරං දුක්ඛෙන මාරයි.
5968. සුණොහි එතං වචනං පස්සසෙතං මහබ්භයං, දෙවින්දංදානි පුච්ඡාමි කිං කිච්චං ඉධ මඤ්ඤසි.
5969. අග්ගිං ද්වාරතො දෙම ගණ්හාමසෙ විකත්තනං, අඤ්ඤමඤ්ඤං වධිත්වාන ඛිප්පං හෙස්සාම ජීවිතං. න නො සක්කොති මොචෙතුං සුඛෙනෙව මහොසධො.
5970. යථා කදලිනො සාරං අන්වෙසං නාධිගච්ඡති, එවං අන්වෙසමානා නං පඤ්හං නාජ්ඣගමාමසෙ.
5971. යථා සිම්බලිනො සාරං අන්වෙසං නාධිගච්ඡති, එවං අන්වෙසමානානං පඤ්හං නාජ්ඣගමාමසෙ.
5972. අදෙසෙ වත නො වුත්ථං{1} කුඤ්ජරානංව නොදකෙ, සකාසෙ දුම්මනුස්සානං බාලානමවිජානතං.
5973. උබ්බෙධතෙ{2} මෙ හදයං මුඛඤ්ච පරිසුස්සති, නිබ්බුතිං නාධිගච්ඡාමි අග්ගිදඩ්ඪොව ආතපෙ.
5974. කම්මාරානං යථා උක්කා අන්තො ඣායති නො බහි, එවම්පි හදයං මය්හං අන්තො ඣායති නො බහි.
5975. තතො සො පණ්ඩිතො ධීරො අත්ථදස්සී මහොසධො, වෙදෙහං දුක්ඛිතං දිස්වා ඉදං වචනමබ්රවි.
5976. මා ත්වං භායි මහාරාජ මා ත්වං භායි රථෙසභ, අහං තං මොචයිස්සාමි රාහුගහිතංව{3} චන්දිමං.
5977. මා ත්වං භායි මහාරාජ මා ත්වං භායි රථෙසභ, අහං තං මොචයිස්සාමි රාහුගහිතංව සූරියං.
5978. මා ත්වං භායි මහාරාජ මා ත්වං භායි රථෙසභ, අහං තං මොචයිස්සාමි පඞ්කෙ සත්තංව කුඤ්ජරං.
5979. මා ත්වං භායි මහාරාජ මා ත්වං භායි රථෙසභ, අහං තං මොචයිස්සාමි පෙළාබද්ධංව පන්නගං.
5980. මා ත්වං භායි මහාරාජ මා ත්වං භායි රථෙසභ, අහං තං මොචයිස්සාමි පක්ඛිං බද්ධංව පඤ්ජරෙ.
5981. මා ත්වං භායි මහාරාජ මා ත්වං භායි රථෙසභ, අහං තං මොචයිස්සාමි මච්ඡෙ ජාලගතෙරිව.
5982. මා ත්වං භායි මහාරාජ මා ත්වං භායි රථෙසභ, අහං තං මොචයිස්සාමි සයොග්ගබලවාහනං.
5983. මා ත්වං භායි මහාරාජ මා ත්වං භායි රථෙසභ, පඤ්චාලං වාහයිස්සාමි කාකසෙනංව ලෙඩ්ඩුනා.
5984. දාදු පඤ්ඤා කිමත්ථියා අමච්චො වාපි තාදිසො, යො තං සම්බාධපක්ඛන්නං දුක්ඛා න පරිමොචයෙ.
5985. එථ මාණවා උට්ඨෙථ මුඛං සොධෙථ සන්ධිනො, වෙදෙහො සහමච්චෙහි උම්මග්ගෙන{1} ගමිස්සති.
5986. තස්ස තං වචනං සුත්වා පණ්ඩිතස්සානුසාරිනො, උම්මග්ගද්වාරං විවරිංසු යන්තයුත්තෙ ච අග්ගළෙ.
5987. පුරතො සෙනකො යාති පච්ඡතො ච මහොසධො, මජ්ඣෙ ච රාජා වෙදෙහො අමච්චපරිවාරිතො.
5988. උම්මග්ගා{2} නික්ඛමිත්වාන වෙදෙහො නාවමාරුහි, අභිරූළ්හඤ්ච තං ඤත්වා අනුසාසි මහොසධො.
5989. අහං තෙ සාසුරො{3} දෙව අයං සස්සු ජනාධිප, යථා මාතු පටිපත්ති එවං තෙ හොතු සස්සුයා.
5990. යථාපි නියකො භාතා සඋදරියො එකමාතුකො, එවං පඤ්චාලචණ්ඩො තෙ දයිතබ්බො රථෙසභ.
5991. අයං පඤ්චාලචණ්ඩි තෙ රාජපුත්ති අභිජ්ඣිතා, කාමං කරොහි තෙ තාය භරියා තෙ රථෙසභ.
5992. ආරුය්හ නාවං තරමානො කින්නු තීරම්භි තිට්ඨසි, කිච්ඡා මුත්තම්හ දුක්ඛාතො යාමදානි මහොසධ.
5993. නෙස ධම්මො මහාරාජ යොහං සෙනාය නායකො, සෙනඞ්ගං පරිහාපෙත්වා අත්තානං පරිමොචයෙ.