5613. සචෙ වො රාජා කුරුඛෙත්තවාසී{1} ජනසන්ධො පුච්ඡෙය්ය පහූතකාමො,{2} කිමාභිජානාථ පුරෙ පුරාණං කිං වො පිතා අනුසාසෙ පුරත්ථා.
5614. සමාසනා හොථ මයාව සබ්බෙ කොනීධ රඤ්ඤො අබ්භතිකො මනුස්සො තමඤ්ජලිං කරිය වදෙථ එවං මාහෙව දෙව නහි එස ධම්මො, වියග්ඝරාජස්ස නිභීනජච්චො සමාසනො දෙව කථං භවෙය්ය.
පෙක්ඛනකණ්ඩො.
5615. සො ච මිත්තෙ අමච්චෙ ච ඤාතයො සුහදං ජනෙ, අලීනමනසඞ්කප්පො විධුරො එතදබ්රවි.
5616. එථය්යො රාජවසතිං නිසීදිත්වා සුණොථ මෙ, යථා රාජකුලං පත්තො යසං පොසො නිගච්ඡති.
5617. නහි රාජකුලං පත්තො අඤ්ඤාතො ලභත්ත යසං, නාසූරො{3} නපි{4} දුම්මෙධො නප්පමත්තො කුදාචනං.
5618. යදාස්ස සීලං පඤ්ඤඤ්ච සොචෙය්යඤ්චාධිගච්ඡති, අථ විස්සසතෙ ත්යම්හි ගුය්හඤ්චස්ස න රක්ඛති.
5619. තුලා යථා පග්ගහිතා සමදණ්ඩා සුධාරිතා, අජ්ඣිට්ඨො න විකම්පෙය්ය ස රාජවසතිං වසෙ.
5620. තුලා යථා පග්ගහිතා සමදණ්ඩා සුධාරිතා, සබ්බානි අභිසම්භොන්තො ස රාජවසතිං වසෙ.
5621. දිවා වා යදි වා රත්තිං රාජකිච්චෙසු පණ්ඩිතො, අජ්ඣිට්ඨො න විකම්පෙය්ය ස රාජවසතිං වසෙ.
5622. දිවා වා යදි වා රත්තිං රාජකිච්චෙසු පණ්ඩිතො, සබ්බානි අභිසම්භොන්තො ස රාජවසතිං වසෙ.
5623. යො චස්ස සුකතො මග්ගො රඤ්ඤො සුප්පටියාදිතො, න තෙන වුත්තො ගච්ඡෙය්ය ස රාජවසතිං වසෙ.
5624. න රඤ්ඤො සමකං{1} භුඤ්ජෙ කාමභොගෙ කුදාචනං, සබ්බත්ථ පච්ඡතො ගච්ඡෙ ස රාජවසතිං වසෙ.
5625. න රඤ්ඤො සදිසං වත්ථං න මාලං න විලෙපනං, ආකප්පං සරකුත්තිං වා න රඤ්ඤො සදිසමාචරෙ; අඤ්ඤං කරෙය්ය ආකප්පං ස රාජවසතිං වසෙ.
5626. කීළෙ රාජා අමච්චෙහි භරියාහි පරිවාරිතො, නාමච්චො රාජභරියාසු භාවං කුබ්බෙථ පණ්ඩිතො.
5627. අනුද්ධතො අචපලො නිපකො සංවුතින්ද්රියො, මනො පණිධිසම්පන්තො ස රාජවසතිං වසෙ.
5628. නාස්ස භරියාහි කීළෙය්ය න මන්තෙය්ය රහොගතො, නාස්ස කොසා ධනං ගණ්හෙ ස රාජවසතිං වසෙ.
5629. න නිද්දන්තං බහුං මඤ්ඤෙ{2} න මදාය සුරං පිවෙ, නාස්ස දායෙ මිගං{3} හඤ්ඤෙ ස රාජවසතිං වසෙ.
5630. නාස්ස පීඨං න පල්ලඞ්කං න කොච්ඡං න නාගං{4} රථං, සම්මතොම්භීති ආරූහෙ ස රාජවසතිං වසෙ.
5631. නාතිදූරෙ භවෙ{1} රඤ්ඤො නාච්චාසන්නෙ විචක්ඛණො, සමෙක්ඛං චස්ස{2} තිට්ඨෙය්ය සන්දිස්සන්තො සභත්තුනො.
5632. න වෙ{3} රාජා සඛා හොති න රාජා හොති මෙථුනො, ඛිප්පං කුජ්ඣන්ති රාජානො සූකෙනක්ඛීව ඝට්ටිතං.
5633. න පූජිතො මඤ්ඤමානො මෙධාවී පණ්ඩිතො නරො, ඵරුසං පතිමන්තෙය්ය{4} රාජානං පරිසං ගතං.{5}
5634. ලද්ධද්වාරො ලභෙද්වාරං නෙව රාජූසු විස්සසෙ, අග්ගීව යතො තිට්ඨෙය්ය{6} ස රාජවසතිං වසෙ.
5635. පුත්තං වා භාතරං සං වා{7} සම්පග්ගණ්හාති ඛත්තියො, ගාමෙහි නිගමෙහි වා රට්ඨෙ ජනපදෙහි වා තුණ්හී භූතො උපෙක්ඛෙය්ය{8} න භනෙ ඡෙකපාපකං.{9}
5636. හත්ථාරූහෙ අනීකට්ඨෙ රථිකෙ පත්තිකාරකෙ, තෙසං කම්මාවදානෙන රාජා වඩ්ඪෙති වෙතනං{10} න තෙසං අන්තරා ගච්ඡෙ ස රාජවසතිං වසෙ.
5637. චාපොවූනූ{11}දරො ධීරො වංසො වාපි පකම්පියො, පටිලොමං න වත්තෙය්ය ස රාජවසතිං වසෙ.
5638. චාපොවූනුදරො අස්ස මච්ඡොවස්ස අජිව්හවා,{12} අප්පාසී{13} නිපකො සූරො ස රාජවසතිං වසෙ.
5639. න බාළ්හං ඉත්ථිං ගච්ඡෙය්ය සම්පස්සං තෙජසඞ්ඛයං, කාසං සාසං දරං බල්යං ඛීණමෙධො නිගච්ඡති.
5640. නාතිවෙලං පභාසෙය්ය න තුණ්හී සබ්බදා සියා, අවිකිණ්ණං මිතං වාචං පත්තෙ කාලෙ උදීරයෙ.
5641. අක්කොධනො අසංඝට්ඨො සච්චො සණ්හො අපෙසුනො, සම්ඵං ගිරං න භාසෙය්ය ස රාජවසතිං වසෙ.
5642. මාතාපෙත්තිභරො අස්ස කුලෙජෙට්ඨාපචායිකො, හිරිඔත්තප්පසම්පන්නො{1} ස රාජවසතිං වසෙ.
5643. විනීතො සිප්පවා දන්තො කතත්තො නියතො මුදු, අප්පමත්තො සුචි දක්ඛො ස රාජවසතිං වසෙ.
5644. නිවාතවුත්ති වද්ධෙසු සප්පතිස්සො සගාරවො, සුරතො සුඛසම්භාසො ස රාජවසතිං වසෙ.
5645. ආරකා{2} පරිවජ්ජෙය්ය සහිතුං පහිතං ජනං, භත්තා රඤ්ඤෙවුදික්ඛෙය්ය අනඤ්ඤස්ස ච රාජිනො.
5646. සමණෙ බ්රාහ්මණෙ චාපි සීලවන්තෙ බහුස්සුතෙ, සක්කච්චං පයිරුපාසෙය්ය ස රාජවසතිං වසෙ.
5647. සමණෙ බ්රාහ්මණෙ චාපි සීලවන්තෙ බහුස්සුතෙ, සක්කච්චං අනුවාසෙය්ය ස රාජවසතිං වසෙ.
5648. සමණෙ බ්රාහ්මණෙ චාපි සීලවන්තෙ බහුස්සුතෙ, තප්පෙය්ය අන්නපානෙන ස රාජවසතිං වසෙ.
5649. සමණෙ බ්රාහ්මණෙ චාපි සීලවන්තෙ බහුස්සුතෙ, ආසජ්ජ පඤ්ඤෙ සෙවෙථ ආකඞ්ඛං වුද්ධිමත්තනො.
5650. දින්නපුබ්බං න හාපෙය්ය දානං සමණබ්රාහ්මණෙ, න ච කිඤ්චි නිවාරෙය්ය දානකාලෙ වණිබ්බකෙ.
5651. පඤ්ඤවා බුද්ධිසම්පන්නො විදානවිධිකොවිදො, කාලඤ්ඤූ සමයඤ්ඤූ ච ස රාජවසතිං වසෙ.
5652. උට්ඨාතා කම්මධෙය්යෙසු{3} අප්පමත්තො විචක්ඛණො, සුසංවිහිතකම්මන්තො ස රාජවසතිං වසෙ.
5653. ඛලං සාලං පසුං ඛෙත්තං ගන්තා චස්ස අභික්ඛණං මිතං ධඤ්ඤං නිධාපෙය්ය මිතඤ්ච පාචයෙ ඝරෙ.
5654. පුත්තං වා භාතරං සං වා සීලෙසු අසමාහිතං, අනඞ්ගවා හි තෙ බාලා යථා පෙතා තථෙව තෙ; චොලඤ්ච නෙසං පිණ්ඩඤ්ච ආසීනානං{1} ව දාපයෙ.
5655. දාසෙ කම්මකරෙ පෙස්සෙ{2} සීලෙසු සුසමාහිතෙ, දක්ඛෙ උට්ඨානසම්පන්නෙ ආධිපච්චස්මිං{3} ඨාපයෙ.
5656. සීලවා ච අලොලො ච{4} අනුරත්තො චස්ස රාජිනො, ආවී රහො හිතො තස්ස ස රාජවසතිං වසෙ.
5657. ඡන්දඤ්ඤූ රාජිනො අස්ස{5} චිත්තට්ඨො චස්ස රාජිනො, අසඞ්කුසකවත්තිස්ස ස රාජවසතිං වසෙ.
5658. උච්ඡාදයෙ ච{6} නහාපයෙ ධොවෙ පාදෙ අධොසිරං, ආහතොපි න කුප්පෙය්ය ස රාජවසතිං වසෙ.
5659. කුම්භම්පි පඤ්ජලිං කුරියා{7} වායසං{8} වා පදක්ඛිණං, කිමෙව සබ්බකාමානං දාතාරං ධීරමුත්තමං.
5660. යො දෙති සයනං වත්ථං යානං ආවසථං ඝරං, පජ්ජුන්නොරිව භූතානි භොගෙහි මභිවස්සති.
5661. එසය්යො රාජවසති වත්තමානො යථා නරො, ආරාධයති රාජානං පූජං ලභති භත්තුසු.
රාජවසතිකණ්ඩං.
5662. එවං සමනුසාසිත්වා ඤාතිසඞ්ඝං විචක්ඛණො, පරිකිණ්ණො සුහදෙහි{9} රාජානමුපසඞ්කමී.
5663. වන්දිත්වා සිරසා පාදෙ කත්වා ච නං පදක්ඛිණං, විධුරො අවච රාජානං පග්ගහෙත්වාන අඤ්ජලිං.
5664. අයං මං මාණවො නෙති කත්තුකාමො යථාමතිං, ඤාතීනත්ථං පවක්ඛාමි තං සුණොහි අරින්දම.
5665. පුත්තෙ ච මෙ උදික්ඛෙසි යඤ්ච මඤ්ඤං ඝරෙ ධනං, යථා පෙච්ච{1} න හායෙථ ඤාතිසඞ්ඝො මයි ගතෙ.
5666. යථෙව ඛලති භුම්යා භූමියාව පතිට්ඨති, එවෙතං ඛලිතං මය්හං එතං{2} පස්සාමි අච්චයං.
5667. සක්කා න ගන්තුං ඉති මය්හ හොතී{3} ඣත්වා වධිත්වා ඉධ කාතියානං, ඉධෙව හොහි ඉති මය්හං රුච්චති මා ත්වං අගා උත්තමභූරිපඤ්ඤ.
5668. මාහෙව ධම්මෙසු මනං පණීදහි අත්ථෙ ච ධම්මෙ ච යුත්තො භවස්සු, ධිරත්ථු කම්මං අකුසලං අනරියං යං කත්වා පච්ඡා නිරයං වජෙය්ය.
5669. නෙවෙස ධම්මො න පුනෙතං කිච්චං අයිරො හි දාසස්ස ජනින්ද ඉස්සරො, ඝාතෙතුං ඣාපෙතුං{4} අථොපි භත්තුං න ච මය්හං කොධත්ථි වජාමි චාහං.
5670. ජෙට්ඨපුත්තං උපගුය්හ විනෙය්ය හදයෙ දරං, අස්සුපුණ්ණෙහි නෙත්තෙහි පාවිසි සො මහාඝරං.
5671. සාලාව සම්පමථිතා{5} මාළුතෙන පමද්දිතා, සෙන්ති පුත්තා ච දාරා ච විධුරස්ස නිවෙසනෙ.
5672. ඉත්ථිසහස්සං භරියානං දාසිසත්තසතානි ච, බාහා පග්ගය්හ පක්කන්දුං විධුරස්ස නිවෙසනෙ.
5673. ඔරොධා ච කුමාරා ච වෙසියානා ච බ්රාහ්මණා, බාහා පග්ගය්හ පක්කන්දුං විධුරස්ස නිවෙසනෙ.
5674. හත්ථාරූහා{6} අනීකට්ඨා රථිකා පත්තිකාරකා, බාහා පග්ගය්හ පක්කන්දුං විධුරස්ස නිවෙසනෙ.
5675. සමාගතා ජානපදා නෙගමා ච සමාගතා, බාහා පග්ගය්හ පක්කන්දුං විධුරස්ස නිවෙසනෙ.
5676. ඉත්ථි සහස්සං භරියානං දාසීසත්තසතානි ච, බාහා පග්ගය්හ පක්කන්දුං කස්මා නො විජහෙස්සසි.
5677. ඔරොධා ච කුමාරා ච වෙසියානා ච බ්රාහ්මණා, බාහා පග්ගය්හ පක්කන්දුං කස්මා නො විජහෙස්සසි.
5678. හත්ථාරූහා අනීකට්ඨා රථිකා පත්තිකාරකා, බාහා පග්ගය්හ පක්කන්දුං කස්මා විජහෙස්සසි.
5679. සමාගතා ජානපදා නෙගමා ච සමාගතා, බාහා පග්ගය්හ පක්කන්දුං කස්මා නො විජහෙස්සසි.
5680. කත්වා ඝරෙසු කිච්චානි අනුසාසිත්වා සකං ජනං, මිත්තාමච්චෙ ච භච්චෙ ච පුත්තදාරෙ ච බන්ධවෙ.
5681. කම්මන්තං සංවිධෙත්වාන ආචික්ඛිත්වා ඝරෙ ධනං, නිධිඤ්ච ඉණදානඤ්ච පුණ්ණං එතදබ්රවී.
5682. අවසී තුවං මය්හ තීහං අගාරෙ කතානි කිච්චානි ඝරෙසු මය්හං, අනුසාසිතා පුත්තදාරා මයා ච කරොම කච්චාන යථා මතිං තෙ.
5683. සචෙ හි කත්තෙ අනුසාසිතා තෙ පුත්තා ච දාරා ච අනුජීවිනො ච, හන්දෙහි දානි තරමානරූපො දීඝො හි අද්ධාපි අයං පුරත්ථා.
5684. අසම්භීතොව ගණ්හාහි ආජානීයස්ස{1} වාලධිං, ඉදං පච්ඡිමකං තුය්හං ජීවලොකස්ස දස්සනං.
5685. සොහං කිස්ස නු භායිස්සං යස්ස මෙ නත්ථි දුක්කතං, කායෙන වාචා මනසා යෙන ගච්ඡෙය්ය දුග්ගතිං.
5686. සො අස්සරාජා විධුරං වහන්තො පක්කාමි වෙහාසයමන්තලික්ඛෙ, සාඛාසු සෙලෙසු අසජ්ජමානො කාළාගිරිං ඛිප්පමුපාගමාසි.
5687. ඉත්ථිසහස්සං භරියානං දාසීසත්තසතානි ච, බාහා පග්ගය්හ පක්කන්දුං යක්ඛො බ්රාහ්මණවණ්ණෙන විධුරං ආදාය ගච්ඡති. -පෙ-
5688. සමාගතා ජානපදා නෙගමා ච සමාගතා, බාහා පග්ගය්හ පක්කන්දුං යක්ඛො බ්රාහ්මණවණ්ණෙන විධුරං ආදාය ගච්ඡති.
5689. ඉත්ථිසහස්සං භරියානං දාසීසත්තසතානි ච, බාහා පග්ගය්හ පක්කන්දුං පණ්ඩිතො සො කුහිං ගතො. -පෙ-
5690. සමාගතා ජානපදා නෙගමා ච සමාගතා, බාහා පග්ගය්හ පක්කන්දුං පණ්ඩිතො සො කුහිං ගතො.
5691. සචෙ සො සත්තරත්තෙන පණ්ඩිතො නාගමිස්සති, සබ්බෙ අග්ගිං පවෙක්ඛාම නත්ථත්ථො ජීවිතෙන නො.
5692. පණ්ඩිතො ච වියත්තො ච විභාවී ච විචක්ඛණො, ඛිප්පං මොචෙස්සතත්තානං{1} මා භාථ ආගමිස්සති.
අන්තරපෙය්යාලො.
5693. සො තත්ථ ගන්ත්වාන විචින්තයන්තො උච්චාවචා චෙතනකා{2} භවන්ති, ඉමස්ස ජීවෙන නහත්ථි{3} කිඤ්චි හන්ත්වානිමං හදයං ආදියිස්සං.
5694. සො තත්ථ ගන්ත්වා පබ්බතමන්තරස්මිං අන්තො පවිසිත්වා පදුට්ඨචිත්තො, අසංවුතස්මිං ජගතිප්පදෙසෙ අධොසිරං ධාරයි කාතියානො.
5695. සො ලම්බමානො නරකෙ පපාතෙ මහබ්භයෙ ලොමහංසෙ විදුග්ගෙ, අසන්තසං{4} කුරූනං කත්තසෙට්ඨො ඉච්චබ්රවී පුණ්ණකං නාම යක්ඛං.
5696. අරියාචකාසොසි අනරියරූපො අසඤ්ඤතො සඤ්ඤතසන්තිකාසො, අච්චාභිතං කම්මං කරොසි ලුද්රං භාවෙ ච තෙ කුසලං නත්ථි කිඤ්චි.
5697. යං මං පපාතස්මිං පපාතුමිච්ඡසි කොනු තවත්ථො මරණෙන මය්හං, අමානුසස්සෙව තෙ අජ්ජ{1} වණ්ණො ආචික්ඛ මෙ ත්වං කතමාසි දෙවතා.
5698. යදි තෙ සුතො පුණ්ණකො නාම යක්ඛො රඤ්ඤො කුවෙරස්ස හි සො සජීවො,{2} භූමින්ධරො වරුණො නාම නාගො බ්රහා සුචී වණ්ණබලූපපන්නො.
5699. තස්සානුජං ධීතරං කාමයාමි ඉරන්දතිං නාම සා නාගකඤ්ඤා, තස්සා සුමජ්ඣාය{3} පියාය හෙතු පතාරයිං තුය්හ වධාය ධීර.
5700. මාහෙව ත්වං{4} යක්ඛ අහොසි මූළ්හො නට්ඨා බහූ දුග්ගහිතෙන ලොකා, කින්තෙ සුමජ්ඣාය{5} පියාය කිච්චං මරණෙන මෙ ඉඞ්ඝ සුණොම සබ්බං.
5701. මහානුභාවස්ස මහොරගස්ස ධීතුකාමො ඤාතිභතොහමස්මි,{6} තං යාචමානං සසුරො අවොච යථා මං අඤ්ඤිංසු සුකාමනීතං.
5702. දජ්ජෙමු ඛො තෙ සුතනුං සුනෙත්තං සුචිම්භිතං චන්දනලිත්තගත්තං. සචෙ තුවං හදයං පණ්ඩිතස්ස ධම්මෙන ලද්ධා ඉධමාහරෙසි එතෙන විත්තෙන කුමාරි ලබ්භා නාඤ්ඤං ධනං උත්තරිං පත්ථයාම.
5703. එවං න මූළ්හොස්මි සුණොහි කත්තෙ න චාපි මෙ දුග්ගහිතත්ථි කිඤ්චි හදයෙන තෙ ධම්මලද්ධෙන නාගා ඉරන්දතිං නාගකඤ්ඤං දදන්ති.
5704. තස්මා අහං තුය්හ වධාය යුත්තො එවං මමත්ථො මරණෙන තුය්හං ඉධෙව තං නරකෙ පාතයිත්වා හන්ත්වාන තං හදයං ආදියිස්සං.
5705. ඛිප්පං මමං උද්ධර කාතියාන හදයෙන මෙ යදි තෙ අත්ථි කිච්චං යෙ කෙචිමෙ සාධුනරස්ස ධම්මා සබ්බෙව තෙ පාතුකරොමි අජ්ජ.
5706. ස පුණ්ණකො කුරූනං කත්තසෙට්ඨං නගමුද්ධනි ඛිප්පං පතිට්ඨපෙත්වා, අස්සත්ථමාසීනං සමෙක්ඛියාන පරිපුච්ඡි කත්තාරං අනොමපඤ්ඤං.
5707. සමුද්ධටො මෙසි තුවං පපාතා හදයෙන තෙ අජ්ජ මමත්ථි කිච්චං, යෙ කෙචිමෙ සාධුනරස්ස ධම්මා සබ්බෙව මෙ පාතුකරොහි අජ්ජ.
5708. සමුද්ධටො ත්යස්මි{1} අහං පපාතා හදයෙන මෙ නදි තෙ අත්ථි කිච්චං, යෙ කෙචිමෙ සාධුනරස්ස ධම්මා සබ්බෙව මෙ පාතුකරොහි අජ්ජ.
5709. යාතානුයායී ච භවාහි මාණව අද්දඤ්ච{2} පාණිං පරිවජ්ජයස්සු, මා චස්සු මිත්තෙසු කදාචි දූභී මා ච වසං අසතීනං නිගච්ඡෙ.