5517. චම්පෙය්යකා නාගමාලිකා භගිනිමාලා අථමෙත්ථ කොලියා, එතෙ දුමා පරිනාමිතා සොභයන්ති උරගස්ස මන්දිරං.{7}
5518. ඛජ්ජුරෙත්ථ සිලාමයා සොවණ්ණධුවපුප්ඵිතා, බහූ යත්ථ වසතොපපාතිකො නාගරාජා වරුණො මහිද්ධිකො.
5519. තස්ස කොමාරිකා භරියා විමලා කඤ්චනවෙල්ලිවිග්ගහා, කාළා තරුණාව උග්ගතා පුචිමන්දත්ථනී චාරුදස්සනා.
5520. ලාඛාරසරත්තසුච්ඡවී කණිකාරොව නිවාතපුප්ඵිතො, තිදිවොකචරාව අච්ඡරා විජ්ජුතබ්භඝනාව නිස්සටා.
5521. සා දොහළිනී සුචිම්හිතා විධුරස්ස හදයං ධනීයති, තං තෙසං දදාමි{1} ඉස්සර තෙන තෙ දෙන්ති ඉරන්දතිං මමං.
5522. ස පුණ්ණකො භූතපතිං යසස්සිං ආමන්තය{2} වෙස්සවණං කුවෙරං, තත්ථෙව සන්තො පුරිසං අසංසි ආනෙහි ආජඤ්ඤමිධෙව යුත්තං.
5523. ජාතරූපමයා කණ්ණා කාචම්භමයා{3} ඛුරා, ජම්බොනදස්ස පාකස්ස සුවණ්ණස්ස උරච්ඡදො.
5524. දෙවවාහවහං යානං අස්සමාරුය්හ පුණ්ණකො, අලඞ්කතො කප්පිතකෙසමස්සූ පක්කාමි වෙහාසයමන්තලික්ඛෙ.
5525. සො ආගමා{4} රාජගහං සුරම්මං අඞ්ගස්ස රඤ්ඤො නගරං දුරායුතං,{5} පහූතභක්ඛං බහුඅන්නපානං මසක්කසාරං විය වාසවස්ස.
5526. මයූරකොඤ්චාගණසම්පඝුට්ඨං දිජාභිඝුට්ඨං දිජසඞ්ඝසෙවිතං, නානාසකුන්තා{6}භිරුදං සුභඞ්ගනං පුප්ඵාභිකිණ්ණං හිමවංව{7} පබ්බතං.
5527. ස පුණ්ණකො වෙපුල්ලමාභිරුච්ඡි{8} සිලුච්චයං කිම්පුරිසානුචිණ්ණං, අත්වෙසමානො මණිරතනං උළාරං තමද්දසා පබ්බතකූටමජ්ඣෙ.
5528. දිස්වා මණිං පභස්සරං ජාතිවන්තං ධනාහරං{1} මණිරතනං උළාරං, දද්දල්ලමානං යසසා යසස්සිනං ඔභාසති විජ්ජුරිවන්තලික්ඛෙ.
5529. තමග්ගහී වෙළුරියං මහග්ඝං මනොහරං නාම මහානුභාවං, ආජඤ්ඤමාරුය්හ අනොමවණ්ණො පක්කාමි වෙහාසයමන්තලික්ඛෙ.
5530. සො ආගමා නගරං ඉන්දපත්තං ඔරුය්හ චාගඤ්ඡි{2} සභං කුරූනං, සමාගමෙ එකසතං සමග්ගෙ අවෙහත්ථ යක්ඛො අවිකම්පමානො.
5531. කො නීධ රඤ්ඤං වරමාභිජෙති කමාභිජෙය්යාම වරංධනෙන,{3} කමනුත්තරං රතනවරං ජිනාම කො වාපි නො ජෙති වරංධනෙන.
5532. කුහිං නු රට්ඨෙ තව ජාතභූමි න කොරව්යස්සෙව වචො තවෙදං, අභිභොසි නො වණ්ණනිභාය සබ්බෙ අක්ඛාහි මෙ නාමඤ්ච බන්ධවෙ ච.
5533. කච්චායනො මාණවකොස්මි රාජ අනූනනාමො ඉති මව්හයන්ති, අඞ්ගෙසු මෙ ඤාතයො බන්ධවා ච අක්ඛෙන දෙවස්මි ඉධානුපත්තො.
5534. කි මාණවස්ස රතනානි අත්ථි යෙ තං ජිනන්තො හරෙ අක්ඛධුත්තො, බහූනි රඤ්ඤො රතනානි අත්ථි තෙ{4} ත්වං දළිද්දො කථමව්හයෙසි.{5}
5535. මනොහරො නාම මණී මමායං ධනාහරො{6} මණිරතනං උළාරං ඉමඤ්ච ආජඤ්ඤං අමිත්තතාපනං එතං මෙ ජෙත්වා හරෙ අක්ඛධුත්තො.
5536. එකො මණී මාණව කිං කරිස්සති ආජානීයෙකො පන කිං කරිස්සති, බහූනි රඤ්ඤො මණිරතනානි අත්ථි ආජානියා වාතජවා අනප්පකා.
දොහළකණ්ඩො.
5537. ඉදඤ්ච මෙ මණිරතනං පස්ස ත්වං දිපදුත්තම, ඉත්ථීනං විග්ගහා චෙත්ථ පුරිසානඤ්ච විග්ගහා.
5538. මිගානං විග්ගහා චෙත්ථ සකුණානඤ්ච විග්ගහා, නාගරාජෙ සුපණ්ණෙ ච{1} මණිම්හි පස්ස නිම්මිතං.
5539. හත්ථානීකං රථානීකං අස්සෙ පත්ති ධජානි ච,{2} චතුරඞ්ගිනිං ඉමං සෙනං මණිම්හි පස්ස නිම්මිතං.
5540. හත්ථාරුහෙ අනීකට්ඨෙ රථිකෙ පත්තිකාරිකෙ, බලග්ගානි වියූළ්හානි මණිම්හි පස්ස නිම්මිතං.
5541. පුරං උද්දාපසම්පන්නං{3} බහුපාකාරතොරණං, සිඞ්ඝාටකෙසු භූමියො මණිම්හි පස්ස නිම්මිතං.
5542. එසිකා පරිඛායො ච පලිඝං අග්ගලානි ච, අට්ටාලකෙ ච ද්වාරෙ ච මණිම්හි පස්ස නිම්මිතං.
5543. පස්ස තොරණමග්ගෙසු නානාදිජගණා බහූ, හංසා කොඤ්චා මයූරා ච චක්කවාකා ච කුක්කුභා.
5544. කුණාලකා බහූ චිත්රා සිඛණ්ඩී ජීවඤ්ජීවකා,{4} නානාදිජගණාකිණ්ණං මණිම්හි පස්ස නිම්මිතං.
5545. පස්ස නගරං සුපාකාරං අබ්භුතං ලොමහංසනං, සමුස්සිතධජං රම්මං සුවණ්ණවාලුකසන්ථතං.
5546. පස්ස{5} ත්වං පණ්ණසාලායො විභත්තා භාගසොමිතා, නිවෙසනෙ නිවෙසෙ ච සන්ධිබ්යුභෙ පථද්ධියො.{6}
5547. පානාගාරෙ ච සොණ්ඩෙ ච සූණා{7} ඔදනියාඝරා, වෙසී ච ගණිකායො ච මණිම්හි පස්ස නිම්මිතං.
5548. මාලාකාරෙ ච රජකෙ ගන්ධිකෙ අථ දුස්සිකෙ, සුවණ්ණකාරෙ මණිකාරෙ මණිම්හි පස්ස නිම්මිතං.
5549. ආළාරියෙ ච{1} සූදචෙ නටනට්ටකගායකෙ,{2} පාණිස්සරෙ කුම්භථූනිකෙ මණිම්හි පස්ස නිම්මිතං.
5550. පස්ස භෙරි මුතිඞ්ගා ච සඞ්ඛා පණවදෙණ්ඩිමා,{3} සබ්බඤ්ච තාළාවචරං මණිම්හි පස්ස නිම්මිතං.
5551. සම්මතාලඤ්ච වීණඤ්ච නච්චගීතං සුවාදිතං, තුරියතාළිතසංඝුට්ඨං මණිම්හි පස්ස නිම්මිතං.
5552. ලඞ්ඝිකා මුට්ඨිකා චෙත්ථ මායාකාරා ච සොභියා, චෙතාලිකෙ ච ජල්ලෙ ච මණිම්හි පස්ස නිම්මිතං.
5553. සමජ්ජා චෙත්ථ වත්තන්ති ආකිණ්ණා නරනාරිහි, මඤ්චාතිමඤ්චෙ භූමියො මණිම්හි පස්ස නිම්මිතං.
5554. පස්ස මල්ලෙ සමජ්ජස්මිං පොඨෙන්තෙ දිගුණං භුජං, නිහතෙ නිහතමානෙ ච මණිම්හි පස්ස නිම්මිතං.
5555. පස්ස පබ්බතපාදෙසු නානාමිගගණා බහූ, සීහව්යග්ඝවරාහා ච අච්ඡකොකතරච්ඡයො.{4}
5556. පලසතා ච ගවජා ච මහිසා රොහිතා රුරූ, එණෙය්යා ච වරාහා ච ගණිනො නිඞ්කසූකරා.
5557. කදලිමිගා බහු චිත්රා බිළාරා සසකණ්ණකා, නානාමිගගණාකිණ්ණං මණිම්හි පස්ස නිම්මිතං.
5558. නජ්ජායො සුපතිත්ථායො සොණ්ණවාලුකසන්ථතා, අච්ඡා සවන්ති අම්බූනි මච්ඡගුම්බනිසෙවිතා.
5559. කුම්භීලා මකරා චෙත්ථ සුංසුමාරා ච කච්ඡපා. පාඨීනා පාවුසා මච්ඡා වලජා මුඤ්චරොහිතා.
5560. නානාදූමගණාකිණ්ණා නානාදිජගණායුතා, වෙළුරියඵලකරොදායො{1} මණිම්හි පස්ස නිම්මිතං.
5561. පස්සෙත්ථ පොක්ඛරණියො සුවිභත්තා චතුද්දිසා, නානාදිජගණාකිණ්ණා පුථුලොමනිසෙවිතා.{2}
5562. සමනොදකසම්පන්නං මහිං සාගරකුණ්ඩලං, උපෙතං වනරාජෙහි{3} මණිම්හි පස්ස නිම්මිතං.
5563. පුරතො විදෙහෙ පස්ස ගොයානියෙ ච පච්ඡතො, කුරුයො ජම්බුදීපඤ්ච මණිම්හි පස්ස නිම්මිතං.
5564. පස්ස චන්දාඤ්ච සුරියඤ්ච ඔභාසෙන්තෙ{4} චතුද්දිසා, සිනෙරුං අනුපරියන්නෙ මණිම්හි පස්ස නිම්මිතං.
5565. සිනෙරුං හිමවන්තඤ්ච සාගරඤ්ච මහිද්ධිකං,{5} චත්තාරො ච මහාරාජෙ මණිම්හි පස්ස නිම්මිතං.
5566. ආරාමෙ වනගුම්බෙ ච පාටියෙ ච{6} සිලුච්චයෙ, රම්මෙ කිම්පුරිසාකිණ්ණෙ මණිම්හි පස්ස නිම්මිතං.
5567. ඵාරුසකං චිත්තලතං මිස්සකං නන්දනං වනං, වෙජයන්තඤ්ච පාසාදං මණිම්හි පස්ස නිම්මිතං.
5568. සුධම්මං තාවතිංසඤ්ච පාරිච්ඡත්තඤ්ච පුප්ඵිතං, ඵරාවණං නාගරාජං මණිම්හි පස්ස නිම්මිතං.
5569. පස්සෙත්ථ දෙවකඤ්ඤායො නභා විජ්ජුරිවුග්ගතා, නන්දනෙ විචරන්තියො මණිම්හි පස්ස නිම්මිතං.
5570. පස්සෙත්ථ දෙවකඤ්ඤායො දෙවපුත්තපලොභිනී, දෙවපුත්තෙ චරමානෙ මණිම්හි පස්ස නිම්මිතං.
5571. පරොසහස්සපාසාදෙ වෙළුරියඵලකත්ථතෙ, පජ්ජලන්තෙන වණ්ණෙන මණිම්හි පස්ස නිම්මිතං.
5572. තාවතිංසෙ ච යාමෙ ච තුසිතෙ චාපි නිම්මිතෙ, පරනිම්මිතාභිරතිනො{1} මණිම්හි පස්ස නිම්මිතං.
5573. පස්සෙත්ථ පොක්ඛරණියො විප්පසන්නොදිකා{2} සුචි, මන්දාලකෙහි සංඡන්තා පදුමුප්පලකෙහි ච.
5574. දසෙත්ථ රාජියො සෙතා දස{3} නීලා මනොරමා, ඡ පිඞ්ගලා පණ්ණරසා හළිද්දා ච චතුද්දසා.
5575. වීසතිං තත්ථ සොවණ්ණා වීසතිං රජතාමයා, ඉන්දගොපකවණ්ණාභා තාව දිස්සන්ති තිංසති.
5576. දසෙත්ථ කාළියො ඡ ච මඤ්ජෙට්ඨා{4} පණ්ණවීසති, මිස්සා බන්ධුකපුප්ඵෙහි නීලුප්පලවිචිත්තිතා.{5}
5577. එවං සබ්බඞ්ගසම්පන්නං අච්චිමන්තං පභස්සරං, ඔධිසුඞ්කං මහාරාජ පස්ස ත්වං දිපදුත්තම.
මණිකණ්ඩො.
5578. උපාගතං රාජ උපෙහි ලක්ඛං නෙතාදිසං මණිරතනං තවත්ථි, ධම්මෙන ජිය්යාම අසාහසෙන ජිතො ච නො ඛිප්පමවාකරොහි.
5579. පඤ්චාල පච්චුග්ගත සූරසෙන මච්ඡා ච මද්දා{6} සහකෙකකෙහි, පස්සන්තු නො තෙ අසඨෙන{7} යුද්ධං න නො සභායං න කාරොති කිඤ්චි.
5580. තෙ පාවිසුං අක්ඛමදෙන මත්තා රාජා කුරූනං පුණ්ණකො චාපි යක්ඛො, රාජා කලිං විචිනං අග්ගහෙසි කටමග්ගහී පුණ්ණකො නාම යක්ඛො.
5581. තෙ තත්ථ ජූතෙ උභයො සමාගතෙ රඤ්ඤං සකාසෙ සඛිනඤ්ච මජ්ඣෙ, අජෙසි යක්ඛො නරවිරියසෙට්ඨං තත්ථප්පනාදො තුමුලො බභූව.
5582. ජයො මහාරාජ පරාජයො ච ආයූහතං අඤ්ඤතරස්ස හොති, ජනින්ද ජීනොසි වරං ධනෙන ජිතො ච මෙ ඛිප්පමවාකරොහි.
5583. හත්ථි ගවාස්සා මණිකුණ්ඩලා ච යං චාපි මය්හං රතනං පථව්යා, ගණ්හාහි කච්චාන වරං ධනානං ආදාය යෙනිච්ඡසි තෙන ගච්ඡ.
5584. හත්ථි ගවාස්සා මණිකුණ්ඩලා ච යඤ්චාපි තුය්හං රතනං පථව්යා, තෙසං වරො විධුරො නාම කත්තා සො මෙ ජිතො තං මෙ අවාකරොහි.
5585. අත්තා ච මෙ සො සරණං ගතී ච දීපො ච ලෙණො ච පරායනො ච, අසන්තුලෙය්යො මම සො ධනෙන පාණෙන මෙ සදිසො එස කත්තා.
5586. චිරං විවාදො මම තුය්හමස්ස{1} කාමඤ්ච පුච්ඡාම තමෙව ගන්ත්වා, එසොව නො විචරතු එතමත්ථං යං වක්ඛතී හොතු කථා{2} උභින්නං.
5587. අද්ධා හි සච්චං භණසි න ච මාණව සාහසං, තමෙව ගන්ත්වා පුච්ඡාම තෙන තුස්සාමුභො ජනා.
5588. සච්චන්නු දෙවා විදහු කුරූනං ධම්මෙ ඨිතං විධුරං නාමමච්චං, දාසොසි රඤ්ඤො උදවාසි ඤාතී විධුරොති සඞ්ඛා කතමාසි ලොකෙ.
5589. ආමාය දාසාපි භවන්ති හෙකෙ ධනෙන කීතාපි භවන්ති දාසා, සයම්පි හෙකෙ උපයන්ති දාසා භයා පණුන්නාපි භවන්ති දාසා එතෙ නරානං චතුරොව දාසා.
5590. අද්ධා හි යොනිතො අහම්පි ජාතො, භවො ච රඤ්ඤො අභවො ච රඤ්ඤො, දාසාහං දෙවස්ස පරම්පි ගන්ත්වා. ධම්මෙන මං මාණව තුය්හං දජ්ජා.
5591. අයම්පි දුතියො විජයො මමජ්ජ පුට්ඨො හි කත්තා විවරිත්ථ පඤ්හං. අධම්මරූපො වත රාජසෙට්ඨො සුභාසිතං නානුජානාසි මය්හං.
5592. එවං චෙ නො සො විවරෙත්ථ{1} පඤ්හං දාසොහමස්මි න ච ඛොස්මි ඤාති, ගණ්හාහි කච්චාන වරං ධනානං ආදාය යෙනිච්ඡසි තෙන ගච්ඡ.
අක්ඛකණ්ඩො.
5593. විධුර වසමානස්ස ගහට්ඨස්ස සකං ඝරං, ඛෙමා වුත්ති කථං අස්ස කථන්නු අස්ස සඞ්ගහො,
5594. අව්යාපජ්ඣං කථං අස්ස සච්චවාදී ච මාණවො, අස්මා ලොකා පරං ලොකං කථං පෙච්ච{2} න සොචති.
5595. තං තත්ථ ගතිමා ධිතිමා මතිමා අත්ථදස්සිමා, සඞ්ඛාතා සබ්බධම්මානං විධුරො එතදබ්රවි:
5596. න සාධාරණදාරස්ස න භුඤ්ජෙ සාදුමෙකකො, න සෙවෙ ලොකායතිකං නෙතං පඤ්ඤාය වද්ධනං.
5597. සීලවා වත්තසම්පන්නො අප්පමත්තො විචක්ඛණො, නිවාතවුත්ති අත්ථද්ධො සුරතො සඛිලො මුදු.
5598. සඞ්ගහෙතා ච මිත්තානං සංවිභාගී විධානවා, තප්පෙය්ය අන්නපානෙන සදා සමණබ්රාහ්මණෙ.
5599. ධම්මකාමො සුතාධාරො භවෙය්ය පරිපුච්ඡකො, සක්කච්චං පයිරුපාසෙය්ය සීලවන්තෙ බහුස්සුතෙ.
5600. ඝරමාවසමානස්ස ගහට්ඨස්ස සකං ඝරං, ඛෙමා වුත්ති සියා එවං එවන්නු අස්ස සඞ්ගහො.
5601. අව්යාපජ්ඣො{4} සියා එවං සච්චචවාදී ච මාණවො, අස්මා ලොකා පරං ලොකං එවං පෙච්ච න සොචති.
ඝරාවාසපඤ්හො.
5602. එහි දානි ගමිස්සාම දින්නො නො ඉස්සරෙන මෙ, මමෙවත්ථං පටිපජ්ජ එස ධම්මො සනන්තනො.
5603. ජානාමි මාණව තයාහමස්මි දින්නොහමස්මි තව ඉස්සරෙන, තීහඤ්ච තං වාසයෙමු අගාරෙ යෙනද්ධුනා අනුසාසෙමු පුත්තෙ.
5604. තං මෙ තථා හොතු වසෙමු තීහං කුරුතං භවං අජ්ජ ඝරෙසු කිච්චං, අනුසාසතං පපුත්තදාරෙ භවජ්ජ යථා තයි පච්ඡා{1} සුඛී භවෙය්ය.
5605. සාධූති වත්වාන පහූතකාමො පක්කාමි යක්ඛො විධුරෙන සද්ධිං, තං කුඤ්ජරාජඤ්ඤහයානුචිණ්ණං පාවෙක්ඛි අන්තොපුරමරියසෙට්ඨො.
5606. කොඤ්චං මයූරඤ්ච පියඤ්ච කෙතං උපාගමී තත්ථ සුරම්ම රූපං, පහූත{2}භක්ඛං බහු අන්නපානං මසක්කසාරං විය වාසවස්ස.
5607. තත්ථ නච්චන්ති ගායන්ති අව්හයන්ති වරා වරං, අච්ඡරා විය දෙවෙසු නාරියො සමලඞ්කතා.
5608. සමඞ්ගි කත්වා පමදාහි{3} යක්ඛං අන්නෙන පානෙන ච ධම්මපාලො, අත්තත්ථමෙවානුවිචින්තයන්තො පාවෙක්ඛි භරියාය තදා සකාසෙ.
5609. තං චන්දනගන්ධරසානුලිත්තං සුවණ්ණජම්බොනදනික්ඛසාදිසං,{4} භරියංවචා එහි සුණොහි භොති පුත්තානි ආමන්තය තම්බනෙත්තෙ.
5610. සුත්වාන වාක්යං පතිනො අනුජ්ජා සුනිසං වච තම්බනඛී සුනෙත්තං, ආමන්තය වම්මධරානි{5} චෙතෙ පුත්තානි ඉන්දීවරපුප්ඵසාමෙ.
5611. තෙ ආගතෙ මුද්ධනි ධම්මපාලො චුම්බිත්වා පුත්තෙ අවිකම්පමානො, ආමන්තයිත්වාන අවොච වාක්යං දින්නාහං රඤ්ඤා ඉධ මාණවස්ස.
5612. තස්සජ්ජහං අත්තසුඛී විධෙය්යො ආදාය යෙනිච්ඡති තෙන ගච්ඡති, අහං ච වො සාසිතුං ආගතොස්මි කථං අහං අපරිත්තාය ගච්ඡෙ.