5319. සමතුල්යානි භූතානි නත්ථි ජෙට්ඨාපචායිනො, නත්ථි බලං වා විරියං වා කුතො උට්ඨානපොරිසං,{5} නියතානි හි භූතානි යථා ගොටවිසො තථා.
5320. ලද්ධෙය්යං ලභතෙ මච්චො තත්ථ දානඵලං කුතො, නත්ථි දානඵලං දෙව අවසො දෙව වීරියො.
5321. බාලෙහි දානං පඤ්ඤත්තං පණ්ඩිතෙහි පටිච්ඡිතං, අවාසා දෙන්ති ධීරානං බාලා පණ්ඩිතමානිනො.
5322. සත්තිමෙ සස්සතා කායා අච්ඡෙජ්ජා අවිකොපිනො, තෙජො පඨවිරාපො ච{1} වායො සුඛදුඛඤ්චිමෙ ජීවෙ ච සත්තිමෙ කායා යෙසං ඡෙත්තා{2} න විජ්ජති.
5323. නත්ථි හන්තා වා ඡෙත්තා වා හඤ්ඤරෙ වාපි කොචි නං; අන්තරෙනෙව{3} කායානං සත්ථානි වීතිවත්තරෙ.
5324. යොපායං{4} සිරමාදාය පරෙසං නිසිතාසිනා, න සො ඡින්දති තෙ කායෙ තත්ථ පාපඵලං කුතො.
5325. චුල්ලාසීති මහාකප්පෙ සබ්බෙ සුජ්ඣන්ති සංසරං, අනාගතෙ තම්හි කාලෙ සඤ්ඤතොපි න සුජ්ඣති.
5326. චරිත්වාපි බහුං භද්රං නෙව සුජ්ඣන්ති නාගතෙ, පාපං චෙපි බහුං කත්වා තං ඛණං නාතිවත්තරෙ.
5327. අනුපුබ්බෙන නො සුද්ධි කප්පානං චුල්ලසීතියා,{5} නියතිං නාතිවත්තාම වෙලන්තමිව සාගරො.
5328. කස්සපස්ස වචො සුත්වා අලාතො එතදබ්රවි, යථා භදන්තො{6} භණති මය්හංපෙතෙව රුච්චති.
5329. අහංපි පුරිමං ජාතිං සරෙ සංසරිතත්තනො, පිඞ්ගලො නාමහං ආසිං ලුද්දො ගොඝාතකො පුරෙ.
5330. බාරාණසියං ඵිතාය බහුං පාපං කතං මයා, බහූ මය්හං{7} හතා පාණා මහිසා{8} සූකරා අජා.
5331. තතො චුතො ඉධ ජාතො ඉද්ධෙ සෙනාපතීකුලෙ, නත්ථි නූන ඵලං පාපෙ{9} සොහං න නිරයං ගතො.
5332. අථෙත්ථ බීජකො නාම දාසො ආසි පළච්චරී,{10} උපොසථං උපවසන්තො ගණසන්තිකුපාගමි.
5333. කස්සපස්ස වචො සුත්වා අලාතස්ස ච භාසිතං, පස්සසන්තො මුහුං උණ්හං රුදං අස්සූනි වත්තයි.
5334. තමනුපුච්ඡි වෙදෙහො කිමත්ථං සම්ම රොදසි, කින්තෙ සුතං වා දිට්ඨං වා කිං මං වෙදෙසි වෙදනං.
5335. වෙදෙහස්ස වචො සුත්වා බීජකො එතදබ්රවි, නත්ථි මෙ වෙදනා දුක්ඛා මහාරාජ සුණොහි මෙ.
5336. අහම්පි පුරිමං ජාතිං සරාමි සුඛමත්තනො, සාකෙතාහං පුරෙ ආසිං භාවසෙට්ඨි ගුණෙ රතො.
5337. සම්මතො බ්රාහ්මණිබ්භානං සංවිහාගරතො සුචි, න චාපි පාපකං කම්මං සරාමි කතමත්තනො.
5338. තතො චුතාහං වෙදෙහ ඉධ ජාතො දුරිත්ථියා, ගබ්භම්භි කුම්භදාසියා යතො ජාතො සුදුග්ගතො.
5339. එවම්පි දුග්ගතො සන්තො සමචරියං අධිට්ඨිතො, උපඩ්ඪහාගං භත්තස්ස දදාමි යො මෙ ඉච්ඡති.
5340. චාතුද්දසිං පඤ්චදසිං සදා උපවසාමහං,{1} න චාපි භූතෙ හිංසාමි ථෙය්යඤ්චාපි විවජ්ජයිං.
5341. සබ්බමෙව හි නූනෙතං සුචිණ්ණං භවති නිප්ඵලං, නිරත්ථං මඤ්ඤිදං සීලං අලාතො යථ භාසති.
5342. කලිමෙව නූන ගණ්හාමි අසිප්පො ධුත්තකො{2} යථා, කටං අලාතො ගණ්හාති කිතවො සික්ඛිතො යථා.
5343. ද්වාරං නප්පතිපස්සාමි යෙන ගච්ඡාමි සුග්ගතිං, තස්මා රාජ පරොදාමි සුත්වා කස්සපභාසිතං.
5344. බීජකස්ස වචො සුත්වා රාජා අඞ්ගාතිමබ්රවි,{3} නත්ථි ද්වාරං සුගතියා නියතිං කඞ්ඛ බීජක.
5345. සුඛං වා යදිවා දුක්ඛං නියතියා{1} කිර ලබ්භති, සංසාරසුද්ධි සබ්බෙසං මා තුරිත්ථො අනාගතෙ.
5346. අහම්පි පුබ්බෙ කල්යාණෙ බ්රාහ්මණිබ්භෙසු ව්යාවටො,{2} වොහාරමනුසාසන්තො රතිහිනො තදන්තරා.
5347. පුනපි භන්තෙ දක්ඛෙමු සඞ්ගති චෙ භවිස්සති, ඉදං වත්වාන වෙදෙහො පච්චගා සනිවෙසනං.
5348. තතො රත්යා විවසනෙ උපට්ඨානම්භි අඞ්ගති, අමච්චෙ සන්නිපාතෙත්වා ඉදං වචනමබ්රවි:
5349. චන්දකෙ මෙ විමානස්මිං සදා කාමෙ විධෙන්තු මෙ, මාමූපගච්ඡුං{3} අත්ථෙසු ගුය්හප්පාකාසියෙසු ච.
5350. විජයො ච සුනාමො ච සෙනාපති අලාතකො, එතෙ අත්ථෙ නිසීදන්තු චොහාරකුසලා තයො.
5351. ඉදං වත්වාන වෙදෙහො කාමෙ ච බහුමඤ්ඤථ, නචාපි බ්රාහ්මණිබ්භෙසු අත්ථෙ කිස්මිඤ්චි ව්යාවටො.
5352. තතො ද්වෙ සත්තරත්තස්ස වෙදෙහස්සත්රජා පියා, රාජකඤ්ඤා රුජා නාම ධාතිමාතරමබ්රවි:
5353. අලඞ්කරොථ මං ඛිප්පං සඛියො ච කරොන්තු මෙ, සුවෙ පණ්ණරසො දිබ්බො ගච්ඡං ඉස්සරසන්තිකෙ.
5354. තස්සා මාල්යං අභිහරිංසු චන්දනඤ්ච මහාරහං, මණිසඞ්ඛමුත්තරතනං නානාරත්තෙ ච අම්බරෙ.
5355. තඤ්ච සොවණ්ණයෙ පීඨෙ නිසින්නං බහුකිත්ථියො, පරිකිරිය අසොභිංසු{5} රුජං රුචිරවණ්ණිනිං.
5356. සා ච සඛීමජ්ඣගතා සබ්බාභරණභූසිතා, සතෙරතා{6} අබ්භමිව චන්දකං පාවිසී රුජා.
5357. උපසඞ්කමිත්වා වෙදෙහං වන්දිත්වා විනයෙ රතා, සුවණ්ණවිකතෙ{1} පීඨෙ එකමන්තං උපාවිසි.
5358. තඤ්ච දිස්වාන වෙදෙහො අච්ඡරානංව සඞ්ගමං, රුජං සඛිමජ්ඣගතං ඉදං වචනමබ්රවි:
5359. කච්චි රමසි පාසාදෙ අන්තො පොක්ඛරණිං පති, කච්චි බහුවිධං ඛජ්ජං සදා අභිහරන්ති තෙ.
5360. කච්චි බහුවිධං මාල්යං ඔචිනිත්වා කුමාරියො, ඝරකෙ කරොථ පච්චෙකං ඛිඩ්ඪාරතිරතා මුහුං.{2}
5361. කෙන වා විකලං තුය්හං ඛිප්පං{3} අභිහරන්තු තෙ, මානො කරස්සු කුඩ්ඩමුඛී අපි චන්දසමම්භිපි.{4}
5362. වෙදෙහස්ස වචො සුත්වා රුජා පිතරමබ්රවි: සබ්බමෙතං මහාරාජ ලබ්භතිස්සරසන්තිකෙ.
5363. සුවෙ පණ්ණරසො දිබ්බො සහස්සං ආහරන්තු මෙ, යථාදින්නඤ්ච දස්සාමි දානං සබ්බවණීසු’හං.
5364. රුජාය වචනං සුත්වා රාජා අඞ්ගාතිමබ්රවි: බහුං විනාසිතං විත්තං නිරත්ථං අඵලං තයා.
5365. උපොසථං වසං නිච්චං අන්නපානං න භුඤ්ජසි, නියතෙතං අභුත්තබ්බං නත්ථි පුඤ්ඤං අභුඤ්ජතො.
5366. බීජකොපි හි සුත්වාන තදා කස්සපභාසිතං, පස්සසන්තො{5} මුහුං උණ්හං රුදං අස්සූනි වත්තයි.
5367. යාව රුජෙ ජීවසි{6} නො මා භත්තමපනාමයි, නත්ථි භද්දෙ පරො ලොකො කිං නිරත්ථං විහඤ්ඤසි.
5368. වෙදෙහස්ස වචො සුත්වා රුජා{7} රුචිරවණ්ණිනි, ජානං පුබ්බාපරං ධම්මං පිතරං එතදබ්රවි:
5369. සුතමෙව මෙ පුරෙ ආසි සක්ඛී දිට්ඨමිදං{1} මයා, ඛාලූපසෙවී යො හොති බාලොව සමපජ්ජථ.
5370. මූළ්හො හි මූළ්හමාගම්ම භිය්යො මොහං නිගච්ඡති, පකිරූපං අලාතෙන බීජකෙන ච මුය්හිතුං.
5371. ත්වඤ්ච ද්වෙ{2} සප්පඤ්ඤො ධීරො අත්ථස්ස කොවිදො, කථං බාලෙහි සදිසං හීනං දිට්ඨිං{3} උපාගමි.
5372. සචෙ හි සංසාරපථෙන සුජ්ඣති නිරත්ථියා පබ්බජ්ජා ගුණස්ස, කීටොව අග්ගිං ජලිතං අපාපතං{4} උප්පජ්ජති මොමූහො නග්ගභාවං.
5373. සංසාරසුද්ධීති පුරෙ නිවිට්ඨා කම්මං විදූසෙන්ති{5} බහූ අජානං, පුබ්බෙ කලී දුග්ගහිතොව අත්ථා{6} දුම්මොචයා බලිසා අම්බුජොව.
5374. උපමං තෙ කරිස්සාමි මහාරාජ නවත්ථියා, උපමායපිධෙකච්චෙ අත්ථං ජානන්ති පණ්ඩිතා.
5375. වාණිජානං යථා නාවා අප්පමාණභරා ගරු, අතිභාරං සමාදාය අණ්ණවෙ අවසීදති.
5376. එවමෙව නරො පාපං ථොක ථොකම්පි ආචිනං, අතිභාරං සමාදාය නිරයෙ අවසීදති.
5377. න තාව භාරො පරිපූරො{7} අලාතස්ස මහීපති. ආචිනාති ච තං පාපං යෙන ගච්ඡති දුග්ගතිං.
5378. පුබ්බෙවස්ස කතං පුඤ්ඤං අලාතස්ස මහීපති, තස්සෙස{8} ද්වෙ නිස්සන්දො යඤ්චෙසො ලභතෙ සුඛං.
5379. ඛීයතෙවස්ස{9} තං පුඤ්ඤං තථාහි අගුණෙ රතො, උජුමග්ගං අවාහාය{10} කුම්මග්ගමනුධාවති.
5380. තුලා යථා පග්ගහිතා ඔහිතෙ තුලමණ්ඩලෙ, උන්නමෙති තුලාසීසං භාරෙ ඔරොපිතෙ සති.
5381. එවමෙව නරො පුඤ්ඤං ථොකථොකම්පි ආචිනං, සග්ගාතිමානො දාසොව බීජකො සාතවෙ{1} රතො.
5382. යඤ්චජ්ජ{2} බීජකො දාසො දුක්ඛං පස්සති අත්තනි, පුබ්බෙ තස්ස{3} කතං පාපං තමෙසො පටිසෙවති.
5383. ඛීයතෙචස්ස තං පාපං තථාහි විනයෙ රතො, කස්සපඤ්ච සමාපජ්ජ මාහෙවුප්පථ{4} මාගමා.
5384. යං යං හි රාජ භජති සතං වා යදි වා අසං, සීලවන්තං විසීලං වා වසං තස්සෙව ගච්ඡති.
5385. යාදිසං කුරුතෙ මිත්තං යාදිසඤ්චුපසෙවති, සොපි තාදිසකො හොති සහවාසො හි තාදිසො.
5386. සෙවමානො සෙවමානං සම්ඵුට්ඨො සම්ඵුසං පරං, සරො දිද්ධො{5} කලාපංව අලිත්තමුපලිම්පති උපලෙපභයා{6} ධීරො නෙව පාපසඛා සියා.
5387. පූතිමච්ඡං කුසග්ගෙන යො නරො උපනය්හති, කුසාපි පූති වායන්ති එවං බාලූපසෙවනා.
5388. තගරඤ්ච{7} පලාසෙන යො නරො උපනය්හති, පත්තාපි සුරභි වායන්ති එවං ධීරූපසෙවනා.
5389. තස්මා පලපුටස්සෙව{8} ඤත්වා සම්පාක{9} මත්තනො, අසන්තෙ නොපසෙවෙය්ය සන්තෙ සෙවෙය්ය පණ්ඩිතො අසන්තො නිරයං නෙන්ති සන්තො පාපෙන්ති සුග්ගතිං.
5390. අහම්පි ජාතියො සත්ත සරෙ සංසරිතත්තනො, අනාගතාපි සත්තෙව යා ගමිස්සං ඉතො චුතා.
5391. යා මෙ සා සත්තමී ජාති අහු පුබ්බෙ ජනාධිප, කම්මාරපුත්තො මගධෙසු අහුං රාජගහෙ පුරෙ.
5392. පාපං සභායං ආගම්ම බහුං පාපං කතං මයා, පරදාරස්ස හෙඨෙන්තො චරිම්භ අමරා විය.
5393. තං කම්මං නිහිතං අට්ඨා භස්මච්ඡත්තොව පාවකො, අථ අඤ්ඤෙහි කම්මෙහි අජායිං වංසභූමියං.
5394. කොසම්බියං සෙට්ඨිකුලෙ ඉද්ධෙ ඵීතෙ මහද්ධනෙ, එකපුත්තො මහාරාජ නිච්චං සක්කතපූජිතො.
5395. තත්ථ මිත්තං අසෙවිස්සං සහායං සාතවෙ{1} රතං, පණ්ඩිතං සුතසම්පන්නං සො මං අත්ථෙ නිවෙසයි.
5396. චාතුද්දසිං පඤ්චදසිං බහුං රත්තිමුපාවසිං,{2} තං කම්මං නිහිතං අට්ඨා නිධීව උදකන්තිකෙ.
5397. අථ පාපානං කම්මානං යමෙතං මගධෙ කතං ඵලං පරියාග තං{3} පච්ඡා භුත්වා දුට්ඨවිසං යථා.
5398. තතො චුතාහං වෙදෙහ රොරුවෙ නිරයෙ චිරං, සකම්මනා{4} අපච්චිස්සං තං සරං න සුඛං ලභෙ,
5399. බහුවස්සගණෙ තත්ථ ඛෙපයිත්වා බහුං දුඛං, භෙණ්ණකටෙ{5} අහුං රාජ ඡකලො{6} උද්ධිතප්ඵලො.
5400. සාතපුත්තා මයා වූළ්හා පිට්ඨියා ච රථෙන ච, තස්ස කම්මස්ස නිස්සන්දො පරදාරගමනස්ස මෙ.
5401. තතො චුතාහං වෙදෙහ කපි ආසිං බ්රහාවනෙ, නිලිච්ඡිත{7} ඵලොයෙව යූථපෙන පගබ්භිනා. තස්ස කම්මස්ස නිස්සන්දො පරදාරගමනස්ස මෙ.
5402. තතො චුතාහං වෙදෙහ දසණ්ණෙසු{8}, පසූ අහුං, නිල්ලච්ඡිතො ජවෙ භද්රො යොග්ගහං වූළ්හං චිරං මයා; තස්ස කම්මස්ස නිස්සන්දො පරදාරගමනස්ස මෙ.
5403. තතො චුතාහං වෙදෙහ වජ්ජීසු කුලමාගමා, නෙවිත්ථි න පුමා ආසිං මනුස්සත්තෙ සුදුල්ලභෙ, තස්ස කම්මස්ස නිස්සන්දො පරදාරගමනස්ස මෙ.
5404. තතො චුතාහං වෙදෙහ අජායිං නන්දනෙ වනෙ, භවනෙ තාවතිංසාහං අච්ඡරා කාමවණ්ණිනී.
5405. විචිත්තවත්ථාභරණා ආවුත්තමණිකුණ්ඩලා, කුසලා නච්චගීතස්ස සක්කස්ස පරිචාරිකා.
5406. තත්ථ ඨිතාහං වෙදෙහ සරාමි ජාතියො ඉමා, අනාගතෙපි සත්තෙව යා ගමිස්සං ඉතො චුතා.
5407. පරියාගතන්තං කුසලං යං මෙ කොසම්බියං කතං, දෙවෙ චෙව මනුස්සෙ ච සන්ධාවිස්සං ඉතො චුතා.
5408. සත්ත ජච්චො{1} මහාරාජ නිච්චං සක්කතපූජිතා, ථිභාවාපි{2} න මුච්චිස්සං ඡට්ඨානි ගතියො ඉමා.
5409. සත්තමී ච ගතී දෙව දෙවපුත්තො මහිද්ධිකො, පුමා දෙවො භවිස්සාමි දෙවකායසමිමුත්තමො.{3}
5410. අජ්ජාපි සන්තානමයං මාලං ගන්ථෙන්ති නන්දනෙ, දෙවපුත්තො ජවො නාම යො මෙ මාලං පටිච්ඡති.
5411. මුහුත්තො විය සො දිබ්බො ඉමානි වස්සානි සොළස, රත්තින්දිවො ච සො දිබ්බො මානුසිං සරදොසතං.
5412. ඉති කම්මානි අන්වෙන්ති අසඞ්ඛෙය්යාපි ජාතියො, කල්යාණං යදි වා පාපං නහි කම්මං පනස්සති.
5413. යො ඉච්ඡෙ පුරිසො හොතුං ජාතිජාතිං පුනප්පුනං, පරදාරං විවජ්ජය්යෙ ධොතපාදොව කද්දමං.
5414. යා ඉච්ඡෙ පුරිසො හොතුං ජාතිජාතිං පුනප්පුනං, සාමිකං අපචායෙය්ය ඉන්දංව පරිචාරිකා.
5415. යො ඉච්ඡෙ දිබ්බභොගඤ්ච දිබ්බං ආයුං යසං සුඛං, පාපානි පරිවජ්ජෙත්වා තිවිධං ධම්මමාචරෙ.
5416. කායෙන වාචා මනසා අප්පමත්තො විචක්ඛණො, අත්තනො හොති අත්ථාය ඉත්ථි වා යදි වා පුමා.
5417. යෙ කෙචිමෙ මනුජා ජීවලොකෙ යසස්සිනො සබ්බසමන්තභොගා, අසංසයං තෙහි පුරෙ සුචිණ්ණං, කම්මස්සකාසෙ පුථු පබ්බසත්තා.
5418. ඉඞ්ඝානුචින්තෙසි සයම්පි දෙව කුතො නිදානා තෙ ඉමා ජනින්ද, යා තෙ ඉමා අච්ඡරාසන්නිකාසා අලඞ්කතා කඤ්චනජාලඡන්නා.