5125. න ඉමං අකුසලො දිව්යං{4} මණිං ධාරෙතුමාරහො, පටිපජ්ජ සතං නික්ඛං දෙහිමං රතනං මමං.
5126. න වා{5} ම්යායං මණි කෙය්යො ගොහි මා රතනෙන වා,{6} සෙලො ව්යඤ්ජනසම්පන්නො නෙව කෙය්යො මණී මමං.
5127. නො චෙ තයා මණි කෙය්යො ගොහි වා රතනෙන වා, අථ කෙන මණි කෙය්යො තං මෙ අක්ඛාහි පුච්ඡිතො.
5128. යො මෙ සංසෙ මහානාගං තෙජසිං දුරතික්කමං, තස්ස දජ්ජං ඉමං සෙලං ජලන්තරිව තෙජසා.
5129. කොනු බ්රාහ්මණවණ්ණෙන සුපණ්ණො{1} පතතං වරො, නාගං ජිගිංසමන්වෙති අන්වෙසං භක්ඛමත්තනො.
5130. නාහං දිජාධිපො හොමි න දිට්ඨො ගරුළො මයා, ආසීවිසෙන විත්තොති වෙජ්ජො{2} මං බ්රාහ්මණං විදූ.
5131. කින්නු තුය්හං බලං අත්ථි කිං සිප්පං විජ්ජතෙ තව, කිස්මිං වා ත්වං පරත්ථද්ධො උරගං නාපචායසි.
5132. ආරඤ්ඤකස්ස ඉසිනො චිරරත්තතපස්සිනො, සුපණ්ණො කොසියස්සක්ඛා විසවිජ්ජං අනුත්තරං.
5133. තං භාවිතත්තඤ්ඤතරං සම්මන්තං{3} පබ්බතන්තරෙ, සක්කච්චං තං උපට්ඨාසිං රත්තින්දිවමතන්දිතො.
5134. සො තදා පරිචිණ්ණො මෙ වතවා{4} බ්රහ්මචරියවා, දිබ්බං පාතුකරී මන්තං කාමසා භගවා මමං.
5135. ත්යාහං මන්තෙ පරත්ථද්ධො නාහං භායාමි භොගිනං, ආචරියො විසඝාතානං අලම්බානොති මං විදූ.
5136. ගණ්හාමසෙ මණිං තාත සොමදත්ත විජානහි, මා දණ්ඩෙන සිරිං පත්තං කාමසා පජහිම්හසෙ.
5137. සකං නිවෙසනං පත්තං සො තං බ්රාහ්මණ පූජයි, එවං කල්යාණකාරිස්ස කිං මොහා දූභිමිච්ඡසි.
5138. සචෙ හි ධනකාමොසි භූරිදත්තො{5} පදස්සති,{6} තමෙව ගන්ත්වා යාචස්සු බහුං දස්සති තෙ ධනං.
5139. හත්ථගතං පත්තගතං නික්කිණ්ණං ඛාදිතුං වරං, මා නො සන්දිඨිකො අත්ථො සොමදත්ත උපච්චගා.
5140. පච්චති නිරයෙ ඝොරෙ මහිස්සමවදීයති,{1} මිත්තදුභී{2} හිතච්චාගී ජිවරෙචාපි සුස්සරෙ.
5141. සචෙ හි ධනකාමොසි භූරිදත්තො පදස්සති, මඤ්ඤෙ අත්තකතං වෙරං නචිරං වෙදයිස්සසි.
5142. මහායඤ්ඤං යජිත්වාන එවං සුජ්ඣන්ති බ්රාහ්මණා, මහායඤ්ඤං යජිස්සාම එවං මොක්ඛාම පාපකා.
5143. හන්දාදානි අපායාමි නාහං අජ්ජ තයා සහ, පදම්පෙකං නගච්ඡෙය්යං එවං කිම්බීසකාරිනා.
5144. ඉදං වත්වාන පිතරං සොමදත්තො බහුස්සුතො, උජ්ඣාපෙත්වාන භූතානි තම්හා ඨානා අපක්කමි.
5145. ගණ්හාහෙතං මහානාගං ආහරෙතං මණිං මම, ඉන්දගොපකවණ්ණභො යස්ස ලොහිතකො සිරො.
5146. කප්පාසපිචුරාසීව එසො කායස්ස දිස්සති,{3} වම්මිකග්ගගතො සෙති තං ත්වං ගණ්හාහි බ්රාහ්මණ.
5147. අථොසධෙහි දිබ්බෙහි ජපං මන්තපදානි ච, එවං තං අසක්ඛි සට්ඨුං{4} කත්වා පරිත්තමත්තනො.
කීළනඛණ්ඩො.
5148. මමං දිස්වාන ආයන්තං සබ්බකාමසමිද්ධිනං, ඉන්ද්රියානි අහට්ඨානි සාවං ජාතං{5} මුඛං තව.
5149. පදුමං{6} යථා හත්ථගතං පාණිනා පරිමද්දිතං, සාවං ජාතං මුඛං තුය්හං මමං දිස්වාන එදිසං.
5150. කච්චින්නු තෙ නාභිසයි කච්චි තෙ අත්ථි වෙදනා, . යෙන සාවං මුඛං තුය්හං මමං දිස්වාන ආගතං.
5151. සුපිනං තාත අද්දක්ඛිං ඉතො මාසං අධොගතං, දක්ඛිණං විය මෙ බාහං{1} ඡෙත්වා රුහිරමක්ඛිතං; පුරිසො ආදාය පක්කාමි මමං රොදන්තියා සති.
5152. යතො තං{2} සුපිනමද්දක්ඛිං සුදස්සන විජානහි, තතො දිවා වා රත්තිං වා සුඛං මෙ න උපලබ්භති.{3}
5153. යං පුබ්බෙ පරිචාරිංසු{4} කඤ්ඤා රුචිරවිග්ගහා, හෙමජාලපටිච්ඡත්තා භූරිදත්තො න දිස්සති.
5154. යං පුබ්බෙ පරිචාරිංසු නෙත්තිංසවරධාරිනො, කණිකාරා{5} විය සම්ඵුල්ලා භූරිදත්තො න දිස්සති.
5155. හන්දදානි ගමිස්සාම භූරිදත්තනිවෙසනං, ධම්මට්ඨං සීලසම්පන්නං පස්සාම තව භාතරං.
5156. තඤ්ච දිස්වාන ආයන්තිං{6} භූරිදත්තස්ස මාතරං, බාහා පග්ගය්හ පක්කන්දුං භූරිදත්තස්ස නාරියො.
5157. පුත්තං තෙය්යෙ න ජානාම ඉතො මාසං අධොගතං, මතං වා යදි වා ජීවං භූරිදත්තං යසස්සිනං.
5158. සකුණී හතපුත්තාව සුඤ්ඤං දිස්වා කුලාවකං, චිරං දුක්ඛෙන ඣායිස්සං භූරිදත්තං අපස්සති.
5159. සකුණී හතපුත්තාව සුඤ්ඤං දිස්වා කුලාවකං, තෙන තෙන පධාවිස්සං පියපුත්තං අපස්සති.
5160. කුරරී හතඡාපාව සුඤ්ඤං දිස්වා කුලාවකං, චිරං දුක්ඛෙන ඣායිස්සං භූරිදත්තං අපස්සති.
5161. සා නූන චක්කවාකීව පල්ලලස්මිං අනූදකෙ, චිරං දුක්ඛෙන ඣායිස්සං භූරිදත්තං අපස්සති.
5162. කම්මාරානං යථා උක්කා අන්තො ඣායති නො බහි, එවං ඣායාමි සොකෙන භූරිදත්තං අපස්සති.
5163. සාලාව සම්පමථිතා{1} මාලුතෙන පමද්දිතා, සෙන්ති පුත්තා ච දාරා ච භූරිදත්තනිවෙසනෙ.
5164. ඉදං{2} සුත්වාන නිග්ඝොසං භූරිදත්තනිවෙසනෙ, අරිට්ඨො ච සුභගො{3} ච උපධාවිංසු{4} අනන්තරා.
5165. අම්ම අස්සාස මා සොචි එවං ධම්මා හි පාණිනො, චවන්ති උපපජ්ජන්ති ඵසස්ස පරිණාමිතා.{5}
5166. අහම්පි තාත ජානාමි එවං ධම්මා හි පාණිනො, සොකෙන ච පරෙතස්මිං භූරිදත්තං අපස්සති.
5167. අජ්ජ චෙ මෙ ඉමං රත්තිං සුදස්සන විජානහි, භූරිදත්තං අපස්සන්ති මඤ්ඤෙ හෙස්සාමි{6} ජීවිතං.
5168. අම්ම අස්සාස මා සොචි ආනයිස්සාම භාතරං, දිසොදිසං ගමිස්සාම භාතුපරියෙසනං චරං.
5169. පබ්බතෙ ගිරිදුග්ගෙසු ගාමෙසු නිගමෙසු ච, ඔරෙන දසරත්තස්ස{7} භාතරං පස්ස ආගතං.
5170. හත්ථා පමුත්තො උරගො පාදෙ තෙ නිපතී භුසං, කච්චි{8} තං නු ඩසී තාත මා භායි සුඛිතො භව.{9}
5171. නෙව මය්හං අයං නාගො අලං දුක්ඛාය කායචි, යාවතත්ථි අභිග්ගාහා මයා භිය්යො න විජ්ජති.
5172. කොනු බ්රාහ්මණ වණ්ණෙන දත්තො පරිසමාගමා, අව්හයන්තු සුයුද්ධෙන සුණාතු පරිසා මමං.
5173. ත්වං මං නාගෙන ආලම්බ අහං මණ්ඩූකඡාපියා, හොතු නො අබ්භුතං තත්ථ ආසහස්සෙහි පඤ්චහි.
5174. අහං හි වසුමා අඩ්ඪො ත්වං දළිද්දොසි මාණව, කො නු තෙ පටිභොගත්ථි උපජූතඤ්ච{1} කිං සියා.
5175. උපජූතඤ්ච මෙ අස්ස පාටිභොගො ච තාදිසො, හොතු{2} නො අබ්භුතං තත්ථ ආසහස්සෙහි පඤ්චහි.
5176. සුණොහි මෙ මහාරාජ වචනං භද්දමත්ථු තෙ, පඤ්චන්නං මෙ සහස්සානං පාටිභොගොහි කිත්තිමා.
5177. පෙත්තිකං වා ඉණං හොති යං වා හොති සයං කතං, කිං ත්වං එවං බහුං මය්හං ධනං යාචසි බ්රාහ්මණ.
5178. ආලම්බානො{3} හි නාගෙන මමං අභිජිගිංසති,{4} අහං මණ්ඩුකඡාපියා ඩංසසිස්සාමි බ්රාහ්මණං.
5179. තං ත්වං දට්ඨුං මහාරාජ අජ්ජ රට්ඨාභිවද්ධන, ඛත්තසඞ්ඝපරිබ්බූළ්හො නිය්යාහි අහිදස්සනං.
5180. නෙව තං අතිමඤ්ඤාමි සිප්පවාදෙන මාණව, අතිමත්තොසි සිප්පෙන උරගං නාපචායසි.
5181. මයම්පි නාතිමඤ්ඤාම සිප්පවාදෙන බ්රාහ්මණං, අවිසෙන ච නාගෙන භුසං වඤ්චයසෙ ජනං.
5182. එවං චෙතං ජනො ජඤ්ඤා යථා ජානාමි තං අහං, න ත්වං ලභසි{5} ආලම්බ සත්තුමුට්ඨිං{6} කුතො ධනං.
5183. ඛරාජිනො ජටී රුම්මී{7} දත්තො{8} පරිසමාගතො, සො ත්වං එවං ගතං නාගං අවිසො අතිමඤ්ඤසි.
5184. ආසජ්ජ ඛො තං{1} ජඤ්ඤාසි පුණ්ණං උග්ගස්ස තෙජසා{2} මඤ්ඤෙ තං භස්මරාසිංව ඛිප්පමෙසො කරිස්සති.
5185. සියා විසං සිළුත්තස්ස දෙඩ්ඪුහස්ස සිලාභුනො, නෙව ලොහිතසීසස්ස විසං නාගස්ස විජ්ජති.
5186. සුතං මෙතං අරහතං සඤ්ඤතානං තපස්සිනං, ඉධ දානානි දත්වාන සග්ගං ගච්ඡන්ති දායකා; ජීවන්තො දෙහි දානානි යදි තෙ අත්ථි දාතවෙ.
5187. අයං නාගො මහිද්ධිකො තෙජසී දුරතික්කමො, තෙන තං ඩංසයිස්සාමි සො තං භස්මං කරිස්සති.
5188. මයාපෙතං සුතං සම්ම සඤ්ඤතානං තපස්සිනං, ඉධ දානානි දත්වාන සග්ගං ගච්ඡන්ති දායකා; ත්වමෙව දෙහි ජීවන්තො යදි තෙ අත්ථි දාතවෙ.
5189. අයං අච්චිමුඛී නාම{3} පුණ්ණා උග්ගස්ස තෙජසා, තෙන තං ඩංසයිස්සාමි සා තං භස්මං කරිස්සති.
5190. යා ධීතා ධතරට්ඨස්ස වෙමාතා භගිනී මම, සා දිස්සතු අච්චිමුඛී{4} පුණ්ණා උග්ගස්ස තෙජසා,
5191. ඡමායං චෙ නිසිඤ්චිස්සං බ්රහ්මදත්ත විජානහි, තිණලතානි ඔසධ්යො උස්සුස්සෙය්යුං අසංසයං.
5192. අද්ධං{5} චෙ පාතයිස්සාමි බ්රහ්මදත්ත විජානහි, සත්තවස්සානයං දෙවො න වස්සෙ න හිමං පතෙ.
5193. උදකඤ්චෙ නිසිඤ්චිස්සං බ්රහ්මදත්ත විජානහි, යාවතා{6} ඔදකා පාණා මරෙය්යුං මච්ඡකච්ඡපා.
නගරප්පවෙසනකණ්ඩං නිට්ඨිතං.
5194. ලොක්යං සජන්තං උදකං පයාගස්මිං පතිට්ඨිතං, කො මං අජ්ඣොහරි භූතො ඔගාළ්හං යමුනං නදිං.
5195. යදෙසලොකාධිපතී යසස්සී බාරාණසිම්පකිරහරී සමන්තතො, තස්සාහං පුත්තො උරගූසභස්ස සුභගොති මං බ්රාහ්මණ වෙදයන්ති.
5196. සචෙ හි පුත්තො උරගූසභස්ස කංසස්ස රඤ්ඤො අමරාධිපස්ස මහෙසක්ඛො අඤ්ඤතරො පිතා තෙ මච්චෙසු මාතා පන තෙ අතුල්යා න තාදිසො අරහති බ්රාහ්මණස්ස දාසම්පි ඔහාරිතුං මහානුභාවො.
5197. රුක්ඛං නිස්සාය විජ්ඣිත්ථො ඵණෙය්යං පාතුමාගතං, සො විද්ධො දූරමසරා{1} සරවෙගෙන සෙඛවා.{2}
5198. තං ත්වං පතිතමද්දක්ඛි අරඤ්ඤස්මිං බ්රහාවනෙ, ස මංසකාජමාදාය සායං නිග්රොධුපාගමි.
5199. සුවලාසිය{3} සඞ්ඝුට්ඨං පිංගියං{4} සන්ථතායුතං, කොකිලාභිරුදං රම්මං ධුවං හරිතසද්දලං.
5200. තත්ථ තෙ සො පාතුරහූ{5} ඉද්ධියා යසසා ජලං, මහානුභාවො භාතා මෙ කඤ්ඤාහි පරිවාරිතො.{6}
5201. සො තෙන පරිචිණ්ණො ත්වං සබ්බකාමෙහි තප්පිතො, අදුභස්ස{7} තුවං දූභි තං තෙ වෙරං ඉධාගතං.
5202. ඛිප්පං ගීවං පසාරෙහි න තෙ දස්සාමි ජීවිතං, භාතුපරිසරං වෙරං ඡෙදයිස්සාමි තෙ සිරං.
5203. අජ්ඣායකො යාචයොගො{8} ආහුතග්ගී ච බ්රාහ්මණො, එතෙහි තීහි ඨානෙහි අවජ්ඣො භවති{9} බ්රාහ්මණො.
5204. යං පුරං ධතරට්ඨස්ස ඔගාළ්හං{1} යමුනං නදිං, ජොතතෙ{2} සබ්බසොවණ්ණං ගිරිං ආහච්ච යාමුනං.{3}
5205. තත්ථ තෙ පුරිසව්යග්ඝා සොදරියා මම භාතරො, යථා තෙ තත්ථ වක්ඛන්ති තථා හෙස්සසි බ්රාහ්මණ.
සුභගඛණ්ඩො.
5206. අනිත්තරා ඉත්තරසම්පයුත්තා යඤ්ඤා ච වෙදා{4} ච සුභොග ලොකෙ, තදග්ගරය්හං හි විනින්දමානො ජහාති විත්තඤ්ච සතඤ්ච ධම්මං.
5207. අජ්ඣෙනමරියා පඨවිං ජනින්දා වෙස්සා කසිං පරිචරියඤ්ච සුද්දා, උපාගු පච්චෙකං යථා පදෙසං කතාහු එතෙ වසිනාති ආහු.
5208. ධාතා විධාතා වරුණො කුවෙරො සොමො යමො චන්දිමා වායු සුරියො, එතෙ හි යඤ්ඤං පුථුසො යජිත්වා අජ්ඣායකානං අථ{5} සබ්බකාමෙ.
5209. විකාසිතා චාපසතානි පඤ්ච යො අජ්ජුනො බලවා භීමසෙනො,{6} සහස්සබාහු අසමො පඨව්යා සොපි තදා ආදහි ජාතවෙදං.
5210. යො බ්රාහ්මණො භොජයී දීඝරත්තං අන්නෙන පාණෙන යථානුභාවං, පසන්නචිත්තො අනුමොදමානො සුභොග දෙවඤ්ඤතරො අහොසි.
5211. මහාසනං දෙවමනොමවණ්ණං යො සප්පිනා අසක්ඛි ජෙතුමග්ගිං, සො යඤ්ඤතන්තං වරතො යජිත්වා දිබ්බං ගතිං මුචලින්දජ්ඣගඤ්ඡි.
5212. මහානුභාවො වස්සසහස්සජීවී යො පබ්බජී{1} දස්සනෙය්යො උළාරො, හිත්වා අපරියන්තරථං{2} සසෙනං රාජා දුදීපොපි ජගාමං{3} සග්ගං.
5213. යො සාගරො සාගරන්තං විජිත්වා යූපං සුභං සොණ්ණමයං උළාරං, උස්සෙසි වෙස්සානරමාදහානො{4} සුභොග දෙවඤ්ඤතරො අහොසි.
5214. යස්සානුභාවෙන සුභොග ගඞ්ගා පවත්තථ{5} දධිසන්නං සමුද්දං, ස ලොමපාදො පරිචරියමග්ගිං අඞ්ගො සහස්සක්ඛපුරජ්ඣගඤ්ඡි.
5215. මහිද්ධිකො දෙවවරො යසස්සි සෙනාපති තිදිවෙ වාසවස්ස, ස සොමයාගෙන මලං විහන්ත්වා සුභොග දෙවඤ්ඤතරො අහොසි.
5216. අකාරි{6} යො ලොකමිමං පරඤ්ච භාගීරථිං{7} හිමවන්තඤ්ච ගිජ්ඣං, යො ඉද්ධිමා දෙවවරො යසස්සී සොපි තදා ආදහි ජාතවෙදං.
5217. මාලාගිරී හිමවා යො ච ගිජ්ඣො සුදස්සනො{8} නිසභො කාකනෙරු,{9} එතෙ ච අඤ්ඤෙ ච නගා මහන්තා චිත්යා කතා යඤ්ඤකරෙහි මාහු.
5218. අජ්ඣායකං මන්තගුණූපපන්නං තපස්සිනං යාචයොගොති චාහ,{10} තීරෙ සමුද්දස්සුදකං සජන්තං තං සාගරජ්ඣොහරි තෙනපෙය්යො.
5219. ආයාගවත්ථූනි පුථූ පථව්යා සංවිජ්ජන්ති බ්රාහ්මණා වාසවස්ස, පුරිමං දිසං පච්ඡිමං දක්ඛිණුත්තරං සංවිජ්ජමානා ජනයන්ති වෙදං.
5220. කලිං{1} හි ධීරානං කටං මගානං භවන්ති වෙදජ්ඣගතානරිට්ඨ, මරීචිධම්මං අසමෙක්ඛිතත්තා මායාගුණා නාති වහන්ති පඤ්ඤං.
5221. වෙදා න තාණාය භවන්තිරස්ස{2} මිත්තද්දුනො භූනහුනො නරස්ස, න තායතෙ පරිචිණ්ණො ච අග්ගි දොසන්තරං මච්චං අනරියකම්මං.