5029. මා නො දෙව අවධි දාසෙ නො දෙහි ඛණ්ඩහාලස්ස, අපි නිගළබන්ධකාපි හත්ථිච්ඡකතානි උජ්ඣෙම.
5030. මා නො දෙව අවධි දාසෙ නො දෙහි ඛණ්ඩහාලස්ස, අපි නිගළබන්ධකාපි අස්සච්ඡකණානි උජ්ඣෙම.
5031. මා නො දෙව අවධි දාසෙ නො දෙහි යස්ස හොන්ති තව කාමා, අපි රට්ඨා පබ්බජිතා භික්ඛාචරියං චරිස්සාම.
5032. දිව්යං{1} උපයාචන්ති පුත්තත්ථිකා දළිද්දාපි{2} නාරියො, පටිභාණානිපි හිත්වා පුත්තෙ නහි ලභන්ති එකච්චා.
5033. අස්සාසකානි{1} කරොන්ති පුත්තා නො ජායන්තු තතො පපුත්තා, අථ නො අකාරණස්මා යඤ්ඤත්ථාය දෙව ඝාතෙසි,
5034. උපයාචිතකෙන පුත්තං ලභන්ති මා තාත නො අඝාතෙසි. මා කිච්ඡා ලද්ධකෙහි පුත්තෙහි යජිත්ථො ඉමං යඤ්ඤං.
5035. උපයාචිතකෙන පුත්තං ලභන්ති මා තාත නො අඝාතෙසි.{2} මා කපණලද්ධකෙහි පුත්තෙහි අම්මාය නො විප්පවාසෙහි.
5036. බහුදුක්ඛපොසියා චන්දං අම්ම තුවං ජිය්යසෙ පුත්තං, වන්දාමි ඛො තෙ පාදෙ ලභතං තාතො පරලොකං.
5037. හන්ද ච මං උපගූහ පාදෙ තෙ අම්ම වන්දිතුං දෙහි, ගච්ඡාමිදානි පවාසං යඤ්ඤත්ථාය එකරාජස්ස.
5038. හන්ද ච මං උපගූහ පාදෙ තෙ අම්ම වන්දිතුං දෙහි, ගච්ඡාමිදානි පවාසං මාතු කත්වා භදයසොකං.
5039. හන්ද ච මං උපගූහ පාදෙ තෙ අම්ම වන්දිතුං දෙහි, ගච්ඡාමිදානි පවාසං ජනස්ස කත්වා භදයසොකං.
5040. හන්ද ච පදුමපත්තානං මොළිං බන්ධස්සු ගොතමිපුත්ත, චම්පකදලවීතිමිස්සායො{3} එසා තෙ පොරාණියා පකති.
5041. හන්ද ච විලෙපනන්තෙ පච්ඡිමකං චන්දනං විපිම්පස්සු, යෙහි ච සුවිලිත්තො සොභසි රාජපරිසාය.{4}
5042. හන්ද මුදුකානි වත්ථානි පච්ඡිමකං කාසිකං වාසෙහි, යෙහි ච සුනිවත්ථො සොභසි රාජපරිසාය.
5043. මුත්තාමණිකනකවිභූතානි ගණ්හස්සු හත්ථාභරණානි, යෙහි ච හත්ථාභරණෙහි සොභසි රාජපරිසාය.
5044. නහනූනායං රට්ඨපාලො භූමිපති ජනපදස්ස දායාදො, ලොකිස්සරො මහත්තා පුත්තෙසු සිනෙහං ජනයති.
5045. මය්හං පියා පුත්තා අත්තාපි{1} පියො තුම්හෙ ච භරියායො. සග්ගඤ්ච පත්ථයානො තෙනාහං ඝාතයිස්සාමි.
5046. මං{2} පඨමං ඝාතෙහි මා මෙ හදයං දුක්ඛං අඵාලෙසි, අලඞ්කතො සුන්දරකො පුත්තො තව දෙව සුඛුමාලො,
5047. හන්දය්ය මං හනස්සු සලොකා චන්දියෙන හෙස්සාමි, පුඤ්ඤං කරස්සු විපුලං විචරාම උභොව පරලොකෙ.
5048. මා ත්වං චන්දෙ රුච්චි බහුකා තව දෙවරා විසාලක්ඛි, තෙ තං රමයිස්සන්ති යිට්ඨස්මිං ගොතමිපුත්තෙ.
5049. එවං වුත්තෙ චන්දා අත්තානං හන්ති හත්ථතලකෙහී, අලමත්ථු{3} ජීවිතෙන පායාමි{4} විසං මරිස්සාමි.
5050. නහනූනිමස්ස රඤ්ඤො මිත්තාමච්චා ච විජ්ජරෙ සුහදා, යෙ න වදන්ති රාජානං මා ඝාතයි ඔරසෙ පුත්තෙ.
5051. නහනූනිමස්ස රඤ්ඤො ඤාතිමිත්තා ච විජ්ජරෙ සුහදා, යෙ න වදන්ති රාජානං මා ඝාතයි අත්රජෙ පුත්තෙ.
5052. ඉමෙ තෙපි මය්හං පුත්තා ගුණිනො කායූරධාරිනො රාජ, තෙහිපි යජස්සු යඤ්ඤං අථ මුඤ්චතු ගොතමීපුත්තෙ.
5053. බිලසතම්පි මං කත්වා යජස්සු සත්තධා මහාරාජ, මා ජෙට්ඨපුත්තමවධි අදූසකං සීහසඞ්කාසං.
5054. බිලසතම්පි මං කත්වා යජස්සු සත්තධා මහාරාජ, මා ජෙට්ටපුත්තමවධී අපෙක්ඛිතං සබ්බලොකස්ස
5055. බහුකා තව දින්නා ආභරණා උච්චාවචා සුභණිතම්භි, මුත්තාමණිවෙළුරියා ඉදං තෙ පච්ඡිමකං දානං.
5056. යෙසං පුබ්බෙ ඛන්ධෙසු ඵුල්ලා මාලාගුණා විවන්තිංසු, තෙසජ්ජපීතනිසිතො නෙත්තිංසො විවත්තිසස්ති ඛන්ධෙසු.
5057. යෙසං පුබ්බෙ ඛන්ධෙස්සු චිත්රා මාලාගුණා විවත්තිංසු, තෙසජ්ජ පීත නිසිතො{1} නෙත්තිංසො විවත්තිසස්ති ඛන්ධෙසු.
5058. අචිරා{2}වත නෙත්තිංසො විවත්තිස්සති රාජපුත්තානං ඛන්ධෙසු, අථ මම හදයං න ඵලති තාව දළ්හබන්ධනඤ්ච මෙ ආසි.
5059. කාසිකසුචිවත්ථධරා කුණ්ඩලිනො අගළුචන්දනවිලිත්තා,{3} නිය්යාථ චන්දසුරියා යඤ්ඤත්ථාය එකරාජස්ස.
5060. කාසිකසුචිවත්ථධරා කුණ්ඩලිනො අගළුචන්දනවිලිත්තා, නිය්යාථ චන්දසුරියා මාතු කත්වා හදයසොකං.
5061. කාසිකසුචිවත්ථධරා කුණ්ඩලිනො අගළුචන්දනවිලිත්තා, නිය්යාථ චන්දසුරියා ජනස්ස කත්වා හදයසොකං.
5062. මංසරසභොජිනො නහාපකසුනහාතා කුණ්ඩලිනො අගළුචන්දනවිලිත්තා, නිය්යාථ චන්දසුරියා යඤ්ඤත්ථාය එකරාජස්ස.
5063. මංසරසභොජිනො නහාපකසුනහාතා කුණ්ඩලිනො අගළුචන්දනවිලිත්තා, නිය්යාථ චන්දසුරියා මාතු කත්වාහදයසොකං.
5064. මංසරසභොජිනො නහාපකසුනහාතා කුණ්ඩලිනො අගළුචන්දනවිලිත්තා, නිය්යාථ චන්දසුරියා ජනස්ස කත්වා හදයසොකං.
5065. සබ්බස්මිං උපක්ඛටස්මිං නිසීදිතෙ චන්දියස්මිං{1} යඤ්ඤත්ථාය, පඤ්චාලරාජධීතා පඤ්ජලිකා සබ්බපරිසමනුපරියායි.
5066. යෙන සච්චෙන ඛණ්ඩහාලො පාපකම්මං කරොති දුම්මෙධො, එතෙන සච්චවජ්ජෙන සමඞ්ගිනී සාමිකෙන හොමි.
5067. යෙධත්ථි අමනුස්සා යානි ච යක්ඛභූතභව්යානි, කරොන්තු මෙ වෙය්යාවටිකං සමඞ්ගිනී සාමිකෙන හොමි.
5068. යා දෙවතා ඉධාගතා යානි ච යක්ඛභූතභව්යානි, සරණෙසිනිං අනාථං තායථ මං යාචාමහං පතිමාහං අජීය්යං.{2}
5069. තං සුත්වා අමනුසෙසා අයොකූටං පරිබ්භමෙත්වාන, භයමස්ස ජනයන්තො රාජානං ඉදමවොච.
5070. ඛුජ්ඣස්ස ඛො රාජකලි මාතාහං මත්ථකං නිතාළෙමි, මා ජෙට්ඨපුත්තමවධී අදූසකං සීහසඞ්කාසං.
5071. කො තෙ දිට්ඨා රාජකලී පුත්තභරියායො හඤ්ඤමානා,{3} සොට්ඨි ව ගහපතයො අදූසකා සග්ගකාමා හි.
5072. තං සුත්වා ඛණ්ඩහාලො රාජා ව අබ්භුතමිදං දිස්වාන, සබ්බෙසං බන්ධනානි මොචෙසුං යථා තං අපාපානං.{4}
5073. සබ්බෙසු විප්පමුත්තෙසු යෙ ච තත්ථ සමාගතා තදා ආසුං, සබ්බෙ එකෙකලෙඩ්ඩුකමදංසු එස වධො ඛණ්ඩහාලස්ස.
5074. සබ්බෙ පතිංසු{1} නිරයං යථා තං පාපකං කරිත්වාන, නහි පාපකම්මං කත්වා ලබ්භා සුගතිං ඉතො ගන්තුං.
5075. සබ්බෙසු විප්පමුත්තෙසු යෙ ච තත්ථ සමාගතා තදා ආසුං, චන්දං අභිසිඤ්චිංසු සමාගතා රාජපරිසා ච.
5076. සබ්බෙසු විප්පමුත්තෙසු යෙ ච තත්ථ සමාගතා තදා ආසුං, චන්දං අභිසිඤ්චිංසු සමාගතා රාජකඤ්ඤායො.
5077. සබ්බෙසු විප්පමුත්තෙසු යෙ ච තත්ථ සමාගතා තදා ආසුං, චන්දං අභිසිඤ්චිංසු සමාගතා දෙවපරිසා ච.
5078. සබ්බෙසු විප්පමුත්තෙසු යෙ ච තත්ථ සමාගතා තදා ආසුං, චන්දං අභිසිඤ්චිංසු සමාගතා දෙවකඤ්ඤායො.
5079. සබ්බෙසු විප්පමුත්තෙසු යෙ ච තත්ථ සමාගතා තදා ආසුං, චෙලුක්ඛෙපමකාරුං සමාගතා රාජපරිසා ච.
5080. සබ්බෙසු විප්පමුත්තෙසු යෙ ච තත්ථ සමාගතා තදා ආසුං, චෙලුක්ඛෙපමකාරුං සමාගතා රාජකඤ්ඤායො.
5081. සබ්බෙසු විප්පමුත්තෙසු යෙ ච තත්ථ සමාගතා තදා ආසුං, චෙලුක්ඛෙපමකාරුං සමාගතා දෙවපරිසා ච.
5082. සබ්බෙසු විප්පමුත්තෙසු යෙ ච තත්ථ සමාගතා තදා ආසුං, චෙලුක්ඛෙපමකාරුං සමාගතා දෙවකඤ්ඤායො.
5083. සබ්බෙසු විප්පමුත්තෙසු බහු ආනන්දනො අහු වංසො, නන්දිප්පවෙසි නගරං බන්ධනා මොක්ඛො අඝොසිත්ථාති.
ඛණ්ඩහාලජාතකං පඤ්චමං.
6. භූරිදත්තජාතකං
5084. යං කිඤ්චි රතනං අත්ථි ධතරට්ඨනිවෙසනෙ, සබ්බානි තෙ උපායන්තු{1} ධීතරං දෙහි රාජිනො.
5085. න නො විවාහො නාගෙහි කතපුබ්බො කුදාචනං, තං විවාහං අසංයුත්තං කථං අම්හෙ කරොමසෙ.
5086. ජීවිතං නූන තෙ චත්තං රට්ඨං වා මනුජාධිප, න හි නාගෙ කුපිතම්භි චිරං ජීවන්ති තාදිසා.
5087. යො ත්වං දෙව මනුස්සෙසු{2} ඉද්ධිමන්තං අනිද්ධිමා, වරුණස්ස නියං පුත්තං යාමුනං අතිමඤ්ඤසි.
5088. නාතිමඤ්ඤාමි රාජානං ධතරට්ඨං යසස්සිනං, ධතරට්ඨො හි නාගානං බහුන්නමපි ඉස්සරො.
5089. අහි මහානුභාවොපි න මෙ ධීතරමාරහො, ඛත්තියො ච විදෙහානං අභිජාතා සමුද්දජා.
5090. කම්බලස්සතරා උට්ඨෙන්තු සබ්බෙ නාගෙ නිවෙදය, බාරාණසිං පවජ්ජන්තු මා ච කිඤ්චි විහෙඨයුං.
5091. නිවෙසනෙසු සොබ්භෙසු රථියා චච්චරෙසු ච, රුක්ඛග්ගෙසු ච ලබ්බන්තු{3} විතතා තොරණෙසු ච.
5092. අහම්පි සබ්බසෙතෙන මහතා සුමහං පුරං, පරික්ඛිපිස්සං භොගෙහි කාසීනං ජනයං{4} භයං.
5093. තස්ස තං වචනං සුත්වා උරගා නෙකවණ්ණිනො, බාරාණසිං පවජ්ජිංසු න ච කිඤ්චිවිහෙඨයුං.{5}
5094. නිවෙසනෙසු සොබ්භෙසු රථියා චච්චරෙසු ච, රුක්ඛග්ගෙසු ච ලම්බිංසු විතතා තොරණෙසු ච.
5095. තෙ{1} දිස්වාන ලම්බන්තෙ පුථු කන්දිංසු නාරියො, නගෙ සොණ්ඩිකතෙ දිස්වා පස්සසන්තෙ මුහුං මුහුං.
5096. බාරාණසී පව්යධිතා{2} ආතුරා සමපජ්ජථ, බාහා පග්ගය්හ පක්කන්දුං ධීතරං දෙහි රාජිනො.
නගරඛණ්ඩො.
5097. පුප්ඵාභිහාරස්ස වනස්ස මජ්ඣෙ කො ලොහිතක්ඛො විහතන්තරංසො,{3} කා{4}කම්බුකායූරධරා සුවත්ථා තිට්ඨන්ති නාරියො දස වන්දමානා.
5098. කො ත්වං බ්රහාබාහු වනස්ස මජ්ඣෙ විරොචසි ඝතසිත්තොව අග්ගි, මහෙසක්ඛො අඤ්ඤතරොසි යක්ඛො උදාහු නාගොසි මහානුභාවො.
5099. නාගොහමස්මිං ඉද්ධිමා තෙජසී දුරතික්කමො, ඩසෙය්යං තෙජසා කුද්ධො ඵීතං ජනපදං අපි.
5100. සමුද්දජා හි මෙ මාතා ධතරට්ඨො ච මෙ පිතා, සුදස්සනකනිට්ඨොස්මි භූරිදත්තොති මං විදූ.
5101. යං ගම්භීරං සදාවට්ටං රහදං භෙස්මං{5} අවෙක්ඛසි, එස දිව්යො මමාවාසො අනෙකසතපොරිසො.
5102. මයූරකොඤ්චාභිරුදං නීලොදං වනමජ්ඣතො, යමුනං පවිස මාභිතො ඛෙමං වත්තවතං සිවං.
5103. තත්ථ පත්තො සානුචරො සහපුත්තෙන බ්රාහ්මණ, පූජිතො මය්හං කාමෙහි සුඛං බ්රාහ්මණ වච්ඡසි.{6}
5104. සමා සමන්තා පරිතො බහූත{7} තගරා මහී, ඉන්දගොපකසඤ්ඡන්නා සොභතී හරිතුත්තමා.
5105. රම්මා වනචෙත්යානි රම්මා{1} හංසූපකූජිතා, ඔපුප්ඵපදමා තිට්ඨන්ති පොක්ඛරඤ්ඤො සුනිම්මිතා.
5106. අට්ඨංසා සුකතත්ථම්භා සබ්බෙ වෙළුරියාමයා, සහස්සථම්භා පාසාදා පූරා කඤ්ඤාහි ජොතරෙ.
5107. විමානං උපපන්නොසි දිබ්බං පුඤ්ඤෙහි අත්තනො, අසම්බාධං සිවං රම්මං අච්චන්තසුඛසංහිතං.
5108. මඤ්ඤෙ සහස්සනෙත්තස්ස විමානං නාභිකඞ්ඛසි, ඉද්ධී හි ත්යායං විපුලා සක්කස්සෙව ජුතීමතො.
5109. මනසාපි න පත්තබ්බො අනුභාවො ජුතීමතො, පරිවාරයමානානං සඉන්දානං වසවත්තීනං.
5110. තං විමානං අභිජ්ඣාය අමරානං සුඛෙසිනං, උපොසථං උපවසන්තො සෙමි වම්මිකමුද්ධනී.
5111. අහඤ්ච මිගමෙසානො සපුත්තො පාවිසිං වනං, තං මං මතං වා ජීවං වා නාභිවෙදෙන්ති ඤාතකා.
5112. ආමන්තයෙ භූරිදත්තං කාසිපුත්තං යසස්සිනං, තයා වො සමනුඤ්ඤාතා අපි පස්සෙමු ඤාතකෙ.
5113. එසොහි වත මෙ ඡන්දො යං වසෙසි මමන්තිකෙ, නහි එතාදිසා කාමා සුලභා හොන්ති මානුසෙ.
5114. සචෙ ත්වං න ඉච්ඡසෙ වත්ථුං මම කාමෙහි පූජිතො, මහා ත්වං සමනුඤ්ඤාතො සොත්ථිං පස්සාහි{2} ඤාතකෙ.
5115. ධාරයීමං මණිං දිව්යං පසුං පුත්තෙ ච වින්දති, අරොගො සුඛිතො හොති ගච්ඡෙවාදාය බ්රාහ්මණ.
5116. කුසලං පටිනන්දාමි වචො තව, පබ්බජිස්සාමි ජිණ්ණොස්මි න කාමෙ අභිපත්ථයෙ.
5117. බ්රහ්මචරියස්ස චෙ භඞ්ගො හොති භොගෙහි කාරියං, අවිකම්පමානො එය්යාසි බහුං දස්සාමි තෙ ධනං.
5118. කුසලං පටිනන්දාමි භූරිදත්ත වචො තව, පුනපි ආගමිස්සාමි සචෙ අත්ථො භවිස්සති.
5119. ඉදං වත්වා භූරිදත්තො පෙසෙසි චතුරො ජනෙ, එථ ගච්ඡථ උට්ඨෙථ ඛිප්පං පාපෙථ බ්රාහ්මණං.
5120. තස්ස තං වචනං සුත්වා උට්ඨාය චතුරො ජනා, පෙසිතං භූරිදත්තෙන ඛිප්පං පාපෙසුං බ්රාහ්මණං.
වනප්පවෙසකණ්ඩො.
5121. මණිං පග්ගය්හ මඞ්ගල්යං සාධු විත්තං මනොරමං, සෙලං ව්යඤ්ජනසම්පන්නං කො ඉමං මණිමජ්ඣගා.
5122. ලොහිතක්ඛසහස්සසාහි{1} සමන්තා පරිවාරිතං, අජ්ජ කාලං පදං{2} ගච්ඡං අජ්ඣගාහං මණිං ඉමං.
5123. සූපචිණ්ණො අයං සොලො අච්චිතො මහිතො සදා, සුධාරිතො සුනික්ඛිත්තො සබ්බත්ථභිසාධයෙ.
5124. උපචාරවිපන්නස්ස නික්ඛෙපෙ ධාරණාය වා, අලං{3} සෙලො විනාසාය පරිචිණ්ණො අයොනිසො.