4929. සබ්බං උපට්ඨපෙථ යඤ්ඤං පන උග්ගතම්හි සුරියම්හි, වදෙථදානි කුමාරෙ අජ්ජ වො පච්ඡිමා රත්තිං.
4930. තං තං මාතා අවචා රොදන්ති ආගතා{2} විමානතො, යඤ්ඤො කිර තෙ පුත්ත භවිස්සති චතූහි පුත්තෙහි.
4931. සබ්බෙපි මය්හං පුත්තා චත්තා චන්දාස්මිං හඤ්ඤමානස්මිං, පුත්තෙහි යඤ්ඤං යජිත්වාන සුගතිං සග්ගං ගමිස්සාමි.
4932. මා{3} පුත්ත සද්දහෙසි සුගති කිර හොති පුත්තයඤ්ඤෙන, නිරයානෙසො මග්ගො නෙසො මග්ගො හි සග්ගානං.
4933. දානානි දෙහි කොණ්ඩඤ්ඤ අහිංසා සබ්බභූතභව්යානං, එසමග්ගො සුගතියා න ච මග්ගො පුත්තයඤ්ඤෙන.
4934. ආචරියානං වචනා ඝාතෙස්සං චන්දඤ්ච සුරියඤ්ච, පුත්තෙහි යජිත්වාන දුච්චජෙහි සුගතිං සග්ගං ගමිස්සාමි.
4935. තං තං පිතාපි අවචා වසවත්තී ඔරසං සකං පුත්තං, යඤ්ඤො කිර තෙ පුත්ත භවිස්සති චතූහි පුත්තෙහි.
4936. සබ්බෙපි මය්හං පුත්තා චත්තා චන්දාස්මිං හඤ්ඤමානස්මිං, පුත්තෙහි යඤ්ඤං යජිත්වාන සුගතිං සග්ගං ගමිස්සාමි.
4937. මා පුත්ත සද්දහෙසි සුගතිං කිර හොති පුත්තයඤ්ඤෙන, නිරයානෙසො මග්ගො නෙසො මග්ගො හි සග්ගානං.
4938. දානානි දෙහි කොණ්ඩඤ්ඤ අහිංසා සබ්බභූතභව්යානං, එසමග්ගො සුගතියා න ච මග්ගො පුත්තයඤ්ඤෙන.
4939. ආචරියානං වචනා ඝාතෙස්සං චන්දං ච සුරියඤ්ච, පුත්තෙහි යජිත්වා දුච්චජෙහි සුගතිං සග්ගං ගමිස්සාමි.
4940. දානානි දෙහි කොණ්ඩඤ්ඤ අහිංසා සබ්බභූතභව්යානං, පුත්තපරිවුතො තුවං රට්ඨං ජනපදඤ්ච පාලෙහි.
4941. මා නො දෙව අවධි දාසෙ නො දෙහි ඛණ්ඩහාලස්ස. අපි නිගළ{1}බන්ධකාපි හත්ථි අස්සෙ ච පාලෙම.
4942. මා නො දෙව අවධි දාසෙ නො දෙහි ඛණ්ඩහාලස්ස. අපි නිගළබන්ධකාපි හත්ථිච්ඡකණානි උජ්ඣෙම.
4943. මා නො දෙව අවධි දාසෙ නො දෙහි ඛණ්ඩහාලස්ස. අපි නිගළබන්ධකාපි අස්සච්ඡකණානි උජ්ඣෙම.
4944. මා නො දෙව අවධි දාසෙ නො දෙහි ඛණ්ඩහාලස්ස. යස්ස හොන්ති තව කාමා අපි රට්ඨා පබ්බජිතා භික්ඛාචරියං චරිස්සාම.
4945. දුක්ඛං ඛො මෙ ජනයථ විලපන්තා ජීවිතස්ස කාමා හි, මුඤ්චථදානි කුමාරෙ අලම්පි මෙ හොතු පුත්තයඤ්ඤෙන.
4946. පුබ්බෙව ඛොසි මෙ වුත්තො දුක්කරං දුරභිසම්භවං චෙතං, අථ නො උපක්ඛටස්ස යඤ්ඤස්ස කස්මා කරොසි වික්ඛෙපං.
4947. සබ්බෙ වජන්ති සුගතිං{1} යෙ යජන්ති යෙපි චෙව යාජෙන්ති, යෙචාපි අනුමොදන්ති යජන්තානං එදිසං මහායඤ්ඤං.
4948. අථ කිස්ස ච නො පුබ්බෙ සොත්ථානං බ්රාහ්මණො අවාචෙසි,{2} අථ නො අකාරණස්මා යඤ්ඤත්ථාය දෙව ඝාතෙසි.
4949. පුබ්බෙව නො දහරකෙ සමානෙ න හනෙසි න ඝාතයෙසි, දහරම්භා යොබ්බනං පත්තා අදූසකා තාත හඤ්ඤාම.
4950. හත්ථිගතෙ අස්සගතෙ සන්නද්ධෙ පස්ස නො මහාරාජ, යුද්ධෙව යුජ්ඣමානෙ නහි මාදිසා සූරා හොන්ති යඤ්ඤත්ථාය.
4951. පච්චන්තෙ වාපි කුපිතෙ අටවීසු වා මාදිසෙ නියොජෙන්ති, අථ නො අකාරණස්මා අභූමිං තාත හඤ්ඤාම.
4952. යාපි හි තා සකුණියො වසන්ති තිණඝරානි කත්වාන, තාසම්පි පියා පුත්තා අථ නො ත්වං ද්වෙ ඝාතෙසි.
4953. මා තස්ස{3} සද්දහෙසි න මං ඛණ්ඩහාලො ඝාතයෙ, මමං හි සො ඝාතෙත්වා අනන්තරං තම්පි දෙව ඝාතෙය්ය.
4954. ගාමවරං නිගමවරං දදන්ති භොගං පිස්ස මහාරාජ, අථ අග්ගපිණ්ඩිකාපි කුලෙ කුලෙහෙතෙ භුඤ්ජන්ති.
4955. තෙසම්පි තාදිසානං ඉච්ඡන්ති දුබ්භිතුං මහාරාජ, යෙභුය්යෙන එතෙ අකතඤ්ඤනො බ්රාහ්මණා දෙව.
4956. මා නො ද්වෙ අවධි දාසෙ නො දෙහි ඛණ්ඩහාලස්ස, අපි නිගළබන්ධකාපි{4} හත්ථි අස්සෙ ච පාලෙම.
4957. මා නො ද්වෙ අවධි දාසෙ නො දෙහි ඛණ්ඩහාලස්ස, අපි නිගළබන්ධකාපි හත්ථිච්ඡකණානි උජ්ඣෙම.
4958. මානො ද්වෙ අවධි දාසෙ නො දෙහි ඛණ්ඩහාලස්ස, අපි නිගළබන්ධකාපි අස්සච්ඡකණානි උජ්ඣෙම.
4959. මා නො ද්වෙ අවධි දාසෙ නො දෙහි ඛණ්ඩහාලස්ස, යස්ස හොන්ති තව කාමා අපි රට්ඨා පබ්බජිතා භික්ඛාචරියං චරිස්සාම.
4960. දුක්ඛං ඛො මෙ ජනයථ විලපන්තා ජීවිතස්ස කාමා හි, මුඤ්චථදානි කුමාරෙ අලම්පි මෙ හොතු පුත්තයඤ්ඤෙන.
4961. පුබ්බෙව ඛොසි මෙ වුත්තො දුක්කරං දුරභිසම්භවං චෙතං, අථ නො උපක්ඛටස්ස යඤ්ඤස්ස කස්මා කරොසි වික්ඛෙපං.
4962. සබ්බෙ වජන්ති සුගතිං යෙ යජන්ති යෙපි චෙව යාජෙන්ති, යෙ චාපි අනුමොදන්ති යජන්තානං එදිසං මහායඤ්ඤං.
4963. යදි කිර යජිත්වා පුත්තෙහි දෙවලොකං ඉතො චුතා යන්තී, බ්රාහ්මණො තාව යජතු පච්ඡාපි යජසි තුවං රාජ.
4964. යදි කිර යජිත්වා පුත්තෙහි දෙවලොකං ඉතො චුතා යන්තී, එසො ච ඛණ්ඩහාලො යජතු සකෙහි පුත්තෙහි.
4965. එවං ජානං{1} වො ඛණ්ඩහාලො කිං පුත්තකෙ න ඝාතෙසි, සබ්බඤ්ච ඤාතිජනං අත්තානඤ්ච න ඝාතෙසි.
4966. සබ්බෙ වජන්ති නිරයං යෙ යජන්ති යෙපි චෙව යාජෙන්ති, යෙ චාපි අනුමොදන්ති යජන්තානං එදිසං මහායඤ්ඤං.
4967. කථඤ්ඤච කිර පුත්තකාමායො ගහපතයො ඝරණියො ච, නගරම්හි න උපරවන්ති රාජානං මා ඝාතයි ඔරසං පුත්තං.
4968. කථඤ්ච කිර පුත්තකාමායො ගහපතයො ඝරණියො ච, නගරම්හි න උපරවන්ති රාජානං මා ඝාතයි අත්රජං පුත්තං.
4969. රඤ්ඤොම්හි අත්ථකාමො හිතො ච සබ්බදා ජනපදස්ස, න කොචි අස්ස පටිඝං මයා ජනපදො න පවෙදෙති.
4970. ගච්ඡථ වො ඝරණියො තාතඤ්ච වදෙථ ඛණ්ඩහාලඤ්ච, මා ඝාතෙථ කුමාරෙ අදූසකෙ සීහසඞ්කාසෙ.
4971. ගච්ඡථ වො ඝරණියො තාතඤ්ච වදෙථ ඛණ්ඩහාලඤ්ච, මා ඝාතෙථ කුමාරෙ අපෙක්ඛිතෙ සබ්බලොකස්ස.
4972. යන්නූනාහං ජායෙය්යං රථකාරකුලෙ වා පුක්කුසකුලෙ වා, වෙණෙසු වා ජායෙය්යං නහජ්ජ මං රාජා යඤ්ඤත්ථාය ඝාතෙය්ය.
4973. සබ්බා සීමන්තිනියො ගච්ඡථ අය්යස්ස ඛණ්ඩහාලස්ස, පාදෙසු නිපතථ අපරාධාහං න පස්සාමි.
4974. සබ්බා සීමන්තිනියො ගච්ඡථ අය්යස්ස ඛණ්ඩහාලස්ස, පාදෙසු නිපතථ කිං තෙ භන්තෙ මයං අදූසෙම.
4975. කපණං විලපති සෙලා දිස්වා භාතරො උපනීතත්තෙ, යඤ්ඤො කිර මෙ උක්ඛීපිතො තාතෙන සග්ගකාමෙන.
4976. ආවත්තී ච පරිවත්තී ච වාසුලො සම්මුඛා රඤ්ඤො, මා නො පිතරං අවධි දහරම්භා අයොබ්බනං පත්තා.
4977. එසො තෙ වාසුල පිතා සමෙහි{1} පිතරං, දුක්ඛං ඛො මෙ ජනයසි විලපන්තො අන්තරපුරස්මිං මුඤ්චථ දානි කුමාරෙ අලම්පි මෙ හොතු පුත්තයඤ්ඤෙන.
4978. පුබ්බෙව ඛොසි දුක්කරං දුරභිසම්භවං චෙතං, අථ නො උපක්ඛටස්ස යඤ්ඤස්ස කරොසි{2} වික්ඛෙපං.
4979. සබ්බෙ වජන්ති සුගතිං යෙ යජන්ති යෙපි චෙව යාජෙන්ති, යෙ චාපි අනුමොදන්ති යජන්තාං එදිසං මහායඤ්ඤං.
4980. සබ්බරතනස්ස යඤ්ඤො{1} උපක්ඛටො එකරාජ තව පටියත්තො. අභිනික්ඛමස්සු දෙව සග්ගං ගතො ත්වං පමොදිස්සසි.
4981. දහරා සත්තසතා එතා පන චන්දකස්ස භරියායො, කෙසෙ පරිකිරිත්වාන{2} රොදන්තියො මග්ගමනුයන්ති.{3}
4982. අපරා පන සොකෙන නික්ඛන්තා නන්දනෙ විය දෙව, කෙසෙ පරිකිරිත්වාන රොදන්තියො මග්ගමනුයන්ති.
4983. කාසිකසුචිවත්ථධරා කුණ්ඩලිනො අගලුචන්දනවිලිත්තා, නීයන්ති චන්දසුරියා යඤ්ඤත්ථාය එකරාජස්ස.
4984. කාසිකසුචිවත්ථධරා කුණ්ඩලිනො අගලු{4}චන්දනවිලිත්තා, නීයන්ති චන්දසුරියා මාතු කත්වා භදයසොකං.
4985. කාසිකසුචිවත්ථධරා කුණ්ඩලිනො අගලුචන්දනවිලිත්තා, නීයන්ති චන්දසුරියා ජනස්ස කත්වා භදයසොකං.
4986. මංසරසභොජිනො නහාපකසුනහාපිතා, කුණ්ඩලිනො අගලුචන්දනවිලිත්තා; නීයන්ති චන්දසුරියා යඤ්ඤත්ථාය එකරාජස්ස.
4987. මංසරසභොජිනො නහාපකසුනහාපිතා, කුණ්ඩලිනො අගලුචන්දනවිලිත්තා; නීයන්ති චන්දසුරියා මාතු කත්වා භදයසොකං.
4988. මංසරසභොජිනො නහාපකසුනහාපිතා, කුණ්ඩලිනො අගලුචන්දනවිලිත්තා; නීයන්ති චන්දසුරියා ජනස්ස කත්වා භදයසොකං.
4989. යසසු පුබෙබ හත්ථිවරධුරගතෙ හත්ථිහි අනුවජන්ති, ත්යජ්ජ චන්දසුරියා උභොව පත්තිකා යන්ති.
4990. යස්සු පුබ්බෙ අස්සවරධුරගතෙ අස්සෙහි අනුවජන්ති, ත්යජ්ජ චන්දසුරියා උභොව පත්තිකා යන්ති.
4991. යසසු පුබ්බෙ රථවරධුරගතෙ රථෙහි අනුවජන්ති, ත්යජ්ජ චන්දසුරියා උභොව පත්තිකා යන්ති.
4992. යෙ හිස්සු පුබ්බ නිය්යංසු{1} තපනීයකප්පනෙහි{2} තුරඞ්ගෙහි, ත්යජ්ජ චන්දසුරියා උභොව පත්තිකා යන්ති.
4993. යදි සකුණි මංසමිච්ඡසි දයාස්සු{3} පුබ්බෙන පුප්ඵවතියා, යජතෙත්ථ එකරාජා සම්මූළ්හො චතුහි පුත්තෙහි.
4994. යදි සකුණි මංසමිච්ඡසි දයාස්සු පුබ්බෙන පුප්ඵවතියා,{4} යජතෙත්ථ එකරාජා සම්මූළ්හො චතුහි කඤ්ඤාහි.
4995. යදි සකුණි මංසමිච්ඡසි දයාස්සු පුබ්බෙන පුප්ඵවතියා, යජතෙත්ථ එකරාජා සම්මූළ්හො චතුහි මහෙසීහි,
4996. යදි සකුණි මංසමිච්ඡසි දයාස්සු පුබ්බෙන පුප්ඵවතියා, යජතෙත්ථ එකරාජා සම්මූළ්හො චතුහි ගහපතීහි.
4997. යදි සකුණි මංසමිච්ඡසි දයාස්සු පුබ්බෙන පුප්ඵවතියා, යජතෙත්ථ එකරාජා සම්මූළ්හො චතුහි හත්ථිහි.
4998. යදි සකුණි මංසමිච්ඡසි දයාස්සු පුබ්බෙන පුප්ඵවතියා, යජතෙත්ථ එකරාජා සම්මූළ්හො චතුහි අස්සෙහි.
4999. යදි සකුණි මංසමිච්ඡසි දයාස්සු පුබ්බෙන පුප්ඵවතියා, යජතෙත්ථ එකරාජා සම්මූළ්හො චතුහි උසභෙහි.
5000. යදි සකුණි මංසමිච්ඡසි දයාස්සු පුබ්බෙන පුප්ඵවතියා, යජතෙත්ථ එකරාජා සම්මූළ්හො සබ්බචතුක්කෙන.
5001. අයමස්ස පාසාදො ඉදං අන්තෙපුරං සුරමණීයං, තෙදානි අය්යපුත්තා චත්තාරො වධාය නින්නීතා.
5002. ඉදමස්ස කූටාගාරං සොවණ්ණං පුප්ඵමල්යවීතිණ්ණං, තෙදානි අය්යපුත්තා චත්තාරො වධාය නින්නීතා.
5003. ඉදමස්ස අසොකවනං{1} සුපුප්ඵිතං සබ්බකාලිකං රම්මං, තෙදානි අය්යපුත්තා චත්තාරො වධාය නින්නීතා.
5004. ඉදමස්ස උය්යානං සුපුප්ඵිතං සබ්බකාලිකං රම්මං, තෙදානි අය්යපුත්තා චත්තාරො වධාය නින්නීතා.
5005. ඉදමස්ස කණිකාරවනං සුපුප්ඵිතං සබ්බකාලිකං රම්මං, තෙදානි අය්යපුත්තා චත්තාරො වධාය නින්නීතා.
5006. ඉදමස්ස පාටලීවනං සුපුප්ඵිතං සබ්බකාලිකං රම්මං, තෙදානි අය්යපුත්තා චත්තාරො වධාය නින්නීතා.
5007. ඉදමස්ස අම්බවනං සුපුප්ඵිතං සබ්බකාලිකං රම්මං, තෙදානි අය්යපුත්තා චත්තාරො වධාය නින්නීතා.
5008. අයමස්ස පොක්ඛරණී සඤ්ඡන්නා පදුමපුණ්ඩරීකෙහි, නාවා ච සොවණ්ණවිකතා පුප්ඵාවලියා විචිත්තා සුරමණීයා. තෙදානි අය්යපුත්තා චත්තාරො වධාය නින්නීතා.
5009. ඉදමස්ස හත්ථිරතනං එරාවණො ගජො වරුණදන්තී,{2} තෙදානි අය්යපුත්තා චත්තාරො වධාය නින්නීතා.
5010. ඉදමස්ස අස්සරතනං එකඛුරො අස්සො, තෙදානි අය්යපුත්තා චත්තාරො වධාය නින්නීතා.
5011. අයමස්ස අස්සරථො සාලියනිග්ඝොසො සුභො රතනචිත්තො, යත්ථස්සු අය්යපුත්තා සොභිංසු නන්දනෙ විය දෙවා; තෙදානි අය්යපුත්තා චත්තාරො වධාය නින්නීතා.
5012. කථං නාම සාමසමසුන්දරෙහි චන්දනමරකතගත්තෙහි,{1} රාජා යජිස්සතෙ යඤ්ඤං සම්මූළ්හො චතූහි පුත්තෙහි.
5013. කථං නාම සාමසමසුන්දරෙහි චන්දනමරකතගත්තාහි,{2} රාජා යජිස්සතෙ යඤ්ඤං සම්මූළ්හො චතූහි කඤ්ඤාහි.
5014. කථං නාම සාමසමසුන්දරෙහි චන්දනමරකතගත්තාහි, රාජා යජිස්සතෙ යඤ්ඤං සම්මූළ්හො චතූහි මහෙසීහි.
5015. කථං නාම සාමසමසුන්දරෙහි චන්දනමරකතගත්තෙහි,{1} රාජා යජිස්සතෙ යඤ්ඤං සම්මූළ්හො චතූහි ගහපතීහි.
5016. යථා හොන්ති ගාමනිගමා සුඤ්ඤා අමනුස්සකා බ්රහාරඤ්ඤා, තථා හෙස්සති පුප්ඵවතියා යිට්ඨෙසු චන්දසුරියෙසු.
5017. උම්මත්තිකා භවිස්සාමි භූනහතා පංසුතා ච පරිකිණ්ණා, සචෙ චන්දවරං හන්ති පාණා මෙ දෙව නිරුජ්ඣන්ති.{3}
5018. උම්මත්තිකා භවිස්සාමි භූනහතා පංසුතා ච පරිකිණ්ණා, සචෙ සුරියවරං හන්ති පාණා මෙ දෙව නිරුජ්ඣන්ති.
5019. කින්නුමා න රමයෙය්යුං{4} අඤ්ඤමඤ්ඤං පියංවදා, ඝට්ටියා{5} ඔපරක්ඛී ච පොක්ඛරක්ඛී ච නායිකා;{6} චන්දසුරියෙසු නච්චන්තියො සමො තාසං න විජ්ජති.
5020. ඉමං මය්හං හදයසොකං පටිමුච්චතු ඛණ්ඩහාල තව මාතා යො මය්හං හදයසොකො චන්දස්මිං වධාය නින්නීතෙ.
5021. ඉමං මය්හං හදයසොකං පටිමුච්චතු ඛණ්ඩහාල තව මාතා, යො මය්හං හදයසොකො සුරියස්මිං වධාය නින්නීතෙ.
5022. ඉමං මය්හං හදයසොකං පටිමුච්චතු ඛණ්ඩහාල තව ජායා, යො මය්හං හදයසොකො චන්දස්මිං වධාය නින්නීතෙ.
5023. ඉමං මය්හං හදයසොකං පටිමුච්චතු ඛණ්ඩහාල තව ජායා, යො මය්හං හදයසොකො සුරියස්මිං වධාය නින්නීතෙ.
5024. මා පුත්තෙ මා ච පතිං අද්දක්ඛි ඛණ්ඩහාල තව මාතා, යො ඝාතෙසි කුමාරෙ අදූසකෙ සීහසඞ්කාසෙ.
5025. මා පුත්තෙ මා ච පතිං අද්දක්ඛි ඛණ්ඩහාල තව මාතා, යො ඝාතෙසි කුමාරෙ අපෙක්ඛිතෙ සබ්බලොකස්ස.
5026. මා පුත්තෙ මා ච පතිං අද්දක්ඛි ඛණ්ඩහාල තව ජායා, යො ඝාතෙසි කුමාරෙ අදූසකෙ සීහසඞ්කාසෙ.
5027. මා පුත්තෙ මා ච පතිං අද්දක්ඛි ඛණ්ඩහාල තව ජායා, යො ඝාතෙසි කුමාරෙ අපෙක්ඛිතෙ සබ්බලොකස්ස.
5028. මා නො දෙව අවධි දාසෙ නො දෙහි ඛණ්ඩහාලස්ස, අපි නිගළබන්ධකාපි හත්ථි අස්සෙ ච පාලෙම.