4832. දද්දල්ලමානා ආභෙන්ති{1} විමානා සත්ත නිම්මිතා, තත්ථ යක්ඛො මහිද්ධිකො සබ්බාභරණභූසිතො සමන්තා අනුපරියාති නාරීගණපුරක්ඛතො.
4833. විත්ති හි මං වින්දති සූත දිස්වා පුච්ඡාමි තං මාතලි දෙවසාරථි, අයං නු මච්චො කිමකාසි සාධුං යො මොදති සග්ගපත්තො විමානෙ.
4834. තස්ස පුට්ඨො වියාකාසි මාතලී දෙවසාරථි, විපාකං පුඤ්ඤකම්මානං ජානං අක්ඛාසජානතො.
4835. සොණදින්නො ගහපති එස දානපතී අහූ, එස පබ්බජිතුද්දිස්ස විහාරෙ සත්ත කාරයි.
4836. සක්කච්චං තෙ උපට්ඨාසි භික්ඛවො තත්ථ වාසිකෙ, අච්ඡාදනඤ්ච භත්තඤ්ච සෙනාසනපදිපියං; අදාසි උජුභූතෙසු විප්පසන්නෙන චෙතසා.
4837. චාතුද්දසිං පඤ්චදසිං යාව පක්ඛස්ස අට්ඨමිං, පාටිහාරියපක්ඛඤ්ච අට්ඨඞ්ගසුසමාගතං{2}
4838. උපොසථං ච උපවසි සදා සීලෙසු සංවුතො, සංයමො සංවිභාගො ච සො විමානස්මිං මොදති.
4839. පභාසති ඉදං ව්යම්භං එළිකාසු සුනිම්මිතං. නාරීවරගණාකිණ්ණං කුටාගාරවරොචිතං උපෙතං අන්නපානෙහි නච්චගීතෙහි චූභයං.
4840. විත්තී හි මං වින්දති සූත දිස්වා පුච්ඡාමි තං මාතලි දෙවසාරථි, ඉමා නු නාරියො කිමකංසු සාධුං. යා මොදරෙ සග්ගපත්තා විමානෙ.
4841. තස්ස පුට්ඨො වියාකාසි මාතලී දෙවසාරථි, විපාකං පුඤ්ඤකම්මානං ජානං අක්ඛාසජානතො.
4842. යා කාචි නාරියො ඉධ ජිවලොකෙ සීලවතියො{1} උපාසිකා, දානෙ රතා නිච්චපසන්නචිත්තා සච්චෙ ඨිතා උපොසථෙ අප්පමත්තා. සංයමා සංවිභාගා ච තා විමානස්මිං මොදරෙ.
4843. පභාසති ඉදං ව්යම්භං වෙළුරියාසු නිම්මිතං, උපෙතං භූමිභාගෙහි විභත්තං භාගසො මිතං.
4844. ආළම්බරා මුතිඞ්ගා ච නච්චගීතා සුවාදිතා, දිබ්බා සද්දා නිච්ඡරන්ති සවණෙය්යා මනොරමා.
4845. නාහං එවං ගතං ජාතු එවං සුරුචිරං පුරෙ, සද්දං සමභිජානාමි දිට්ඨං වා යදි වා සුතං.
4846. විත්තී හි මං වින්දති සූත දිස්වා පුච්ඡාමි තං මාතලී දෙවසාරථි, ඉමෙ නු මච්චා කිමකංසු සාධුං යෙ මොදරෙ සග්ගපත්තා විමානෙ.
4847. තස්ස පුට්ඨො වියාකාසි මාතලී දෙවසාරථි, විපාකං පුඤ්ඤකම්මානං ජානං අක්ඛාසජානතො.
4848. යෙ කෙචි මච්චා ඉධ ජිවලොකෙ සීලවන්තො උපාසකා, ආරාමෙ උදපානෙ ච පපා සඞ්කමනානි ච. අරහන්තෙ සීතිභූතෙ{2} සක්කච්චං පටිපාදයුං.
4849. චීවරං පිණ්ඩපාතඤ්ච පච්චයං සයනාසනං, අදංසු උජුභූතෙසු විප්පසන්නෙන චෙතසා.
4850. චාතුද්දසිං පඤ්චදසිං යාව පක්ඛස්ස අට්ඨමිං, පාටිහාරියපක්ඛඤ්ච අට්ඨඞ්ගසුසමාගතං,{1}
4851. උපොසථං උපවසුං සදා සීලෙසු සංවුතා, සඤ්ඤාමා සංවිභාගා ච තෙ විමානස්මිං මොදරෙ.
4852. පභාසති ඉදං ව්යම්භං එළිකාසු සුනිම්මිතං, නාරීවරගණාකිණ්ණං කූටාගාරවිරොචිතං.
4853. උපෙතං අන්නපානෙහි නච්චගීතෙහි චූභයං, නජ්ජො ච අනුපරියාති නානාපුප්ඵදුමායුතා.
4854. විත්තී හි මං වින්දති සූත දිස්වා පුච්ඡාමි තං මාතලි දෙවසාරථි, අයං නු මච්චො කිමකාසි සාධුං යො මොදති සග්ගපත්තො විමානෙ.
4855. තස්ස පුට්ඨො වියාකාසි මාතලී දෙවසාරථි, විපාකං පුඤ්ඤකම්මානං ජානං අක්ඛාසජානතො.{2}
4856. කිම්බිලායං ගහපති එස දානපතී අහූ, ආරාමෙ උදපානෙ ච පපා සඞ්කමනානි ච.
4857. අරහන්තෙ සීතිභූතෙ සක්කච්චං පටිපාදයි, චීවරං පිණ්ඩපාතඤ්ච පච්චයං සයනාසනං, අදාසි උජුභූතෙසු විප්පසන්නෙන චෙතසා.
4858. චාතුද්දසිං පඤ්චදසිං යාව පක්ඛස්ස අට්ඨමිං, පාටිහාරියපක්ඛඤ්ච අට්ඨඞ්ගසුසමාගතං,
4859. උපොසථං උපවසි සදා සීලෙසු සංවුතො, සඤ්ඤමො සංවිභාගො ච සො විමානස්මිං මොදති.
4860. පභාසති ඉදං ව්යම්භං එළිකාසු සුනිම්මිතං, නාරීවරගණාකිණ්ණං කූටාගාරවරොචිතං.
4861. උපෙතං අන්නපානෙහි නච්චගීතෙහි චූභයං, නජ්ජො ච අනුපරියාති නානාපුප්ඵදුමායුතා.
4862. රාජායතනා කපිත්ථා අම්බා සාලා ච ජම්බුයො, තින්දුකා{1} ච පියාලා ච දුමා නිච්චඵලා බහූ.
4863. විත්තී හි මං වින්දති සූත දිස්වා පුච්ඡාමි තං මාතලී දෙවසාරථි, අයං නු මච්චො කිමකාසි සාධුං යො මොදති සග්ගපත්තො විමානෙ.
4864. තස්ස පුට්ඨො වියාකාසි මාතලී දෙවසාරථි, විපාකං පුඤ්ඤකම්මානං ජානං අක්ඛාසජානතො.
4865. මිථිලායං ගහපති එස දානපතී අහු, ආරාමෙ උදපානෙ ච පපා සඞ්කමනානි ච. අරහන්තෙ සීතිභූතෙ{2} සක්කච්චං පටිපාදයි,
4866. චීවරං පිණ්ඩපාතඤ්ච පච්චයං සයනාසනං, අදාසි උජුභූතෙසු විප්පසන්නෙන චෙතසා.
4867. චාතුද්දසිං පඤ්චදසිං යාව පක්ඛස්ස අට්ඨමිං, පාටිහාරියපක්ඛඤ්ච අට්ඨඞ්ගසුසමාගතං,{3}
4868. උපොසථං උපවසි සදා සීලෙසු සංවුතො, සඤ්ඤමො සංවිභාගො ච සො විමානස්මිං මොදති.
4869. පභාසති ඉදං ව්යම්භං වෙළුරියාසු නිම්මිතං, උපෙතං භූමිභාගෙහි විභත්තං භාගසො මිතං.
4870. ආළම්බරා මුතිඞ්ගා ච නච්චගීතා සුවාදිතා, දිබ්බා{4} සද්දා නිච්ඡරන්ති සවණෙය්යා මනොරමා.
4871. නාහං එවං ගතං ජාතු{5} එවං සුරුචිරං{6} පුරෙ, සද්දං සමභිජානාමි දිට්ඨං වා යදි වා සුතං.
4872. විත්තී හි මං වින්දති සූත දිස්වා පුච්ඡාමි තං මාතලි දෙවසාරථි, අයං නු මච්චො කිමකාසි සාධුං යො මොදති සග්ගපත්තො විමානෙ.
4873. තස්ස පුට්ඨො වියාකාසි මාතලී දෙවසාරථි, විපාකං පුඤ්ඤකම්මානං ජානං අක්ඛාසජානතො
4874. බාරාණසියං ගහපති එස දානපතී අහූ, ආරාමෙ උදපානෙ ච පපා සඞ්කමනානි ච. අරහන්තෙ සීතිභූතෙ{1} සක්කච්චං පටිපාදයි,
4875. චීවරං පිණ්ඩපාතඤ්ච පච්චයං සයනාසනං, අදාසි උජුභූතෙසු විප්පසන්නෙන චෙතසා.
4876. චාතුද්දසිං පඤ්චදසිං යාව පක්ඛස්ස අට්ඨමිං, පාටිහාරියපක්ඛඤ්ච අට්ඨඞ්ගසුසමාගතං,
4877. උපොසථං උපවසි සදා සීලෙසු සංවුතො, සඤ්ඤමො සංවිභාගො ච සො විමානස්මිං මොදති.
4878. යථා උදයමාදිච්චො හොති ලොහිතකො මහා, තථූපමං ඉදං ව්යම්භං ජාතරූපස්ස නිම්මිතං.
4879. විත්තී හි මං වින්දති සූත දිස්වා පුච්ඡාමි තං මාතලි දෙවසාරථි, අයං නු මච්චො කිමකාසි සාධුං යො මොදති සග්ගපත්තො විමානෙ.
4880. තස්ස පුට්ඨො වියාකාසි මාතලී දෙවසාරථි, විපාකං පුඤ්ඤකම්මානං ජානං අක්ඛාසජානතො.
4881. සාවත්ථියං ගහපති එස දානපතී අහු, ආරාමෙ උදපානෙ ච පපා සඞ්කමනානි ච. අරහන්තෙ සීතිභූතෙ සක්කච්චං පටිපාදයි,
4882. චීවරං පිණ්ඩපාතඤ්ච පච්චයං සයනාසනං, අදාසි උජුභූතෙසු විප්පසන්නෙන චෙතසා.
4883. චාතුද්දසිං පඤ්චදසිං යාව පක්ඛස්ස අට්ඨමිං, පාටිහාරිය පක්ඛඤ්ච අට්ඨඞ්ගසුසමාගතං,{2}
4884. උපොසථං උපවසි සදා සීලෙසු සංවුතො, සංයමො සංවිභාගො ච සො විමානස්මිං මොදති.
4885. වෙහාසයාමෙ බහුකා ජාතරූපස්ස නිම්මිතා, දද්දල්ලමානා ආභෙන්ති විජ්ජුවබ්භඝනන්තරෙ.
4886. විත්තී හි මං වින්දති සූත දිස්වා පුච්ඡාමි තං මාතලි දෙවසාරථි, ඉමෙ නු මච්චො කිමකංසු සාධුං යො මොදරෙ සග්ගපත්තා විමානෙ.
4887. තස්ස පුට්ඨො වියාකාසි මාතලී දෙවසාරථි, විපාකං පුඤ්ඤකම්මානං ජානං අක්ඛාසජානතො.
4888. සද්ධාය සුනිවිට්ඨාය සද්ධම්මෙ සුප්පවෙදිතෙ, අකංසු සත්ථුවචනං සම්මාසම්බුද්ධසාසනං,{1} තෙසං එතානි ඨානානි යානි ත්වං රාජ පස්සසි.
4889. විදිතානි තෙ මහාරාජ ආවාසං පාපකම්මිනං, අථො කල්යාණකම්මානං ඨානානි විදිතානි තෙ; උය්යාහිදානි රාජිසි දෙවරාජස්ස සන්තිකෙ.
විමානකණ්ඩං නිට්ඨිතං.
4890. සහස්සයුත්තං හයවාහිං දිබ්බං යානං අධිට්ඨිතො, යායමානො මහාරාජා අද්දා සීදන්තරෙ නගෙ; දිස්වානාමන්තයී සූතං ඉමෙ කෙ නාම පබ්බතා.
4891. සුදස්සනො කරවීකො ඊසධරො යුගන්ධරො, නෙමින්ධරො විනතකො අස්සකණ්ණො ගිරිබ්රහා.
4892. එතෙ සීදන්තරෙ නගා අනුපුබ්බසමුග්ගතා, මහාරාජානමාවාසා යානි ත්වං රාජ පස්සසි.
4893. අනෙකරූපං රුචිරං නානාචිත්රං පකාසති, ආකිණ්ණං ඉන්දසදිසෙහි ව්යග්ඝෙහෙව සුරක්ඛිතං.{2}
4894. විත්තී හි මං වින්දති සූත දිස්වා පුච්ඡාමි තං මාතලි දෙවසාරථි, ඉමං නු ද්වාරං කිම්භිඤ්ඤමාහු (මනොරමං දිස්සති දූරතොව.){3}
4895. තස්ස පුට්ඨො වියාකාසී මාතලී දෙවසාරථි, විපාකං පුඤ්ඤකම්මානං ජානං අක්ඛාසජානතො.
4896. චිත්තකූටොති යං ආහු දෙවරාජපවෙසනං, සුදස්සනස්ස ගිරිනො ද්වාරං හෙතං පකාසති.
4897. අනෙකරූපං රුචිරං නානාචිත්රං පකාසති, ආකිණ්ණං ඉන්දසදිසෙහි ව්යග්ඝෙහෙවෙ සුරක්ඛිතං. පවිසෙතෙන රාජිසි අරජං භූමිමක්කම.
4898. සහස්සයුත්තං හයවාහිං දිබ්බං යානං අධිට්ඨිතො, යායමානො මහාරාජා අද්දා දෙවසභං ඉදං.
4899. යථා සරදෙ ආකාසො නීලොව පතිදිස්සති, තථූපමං ඉදං ව්යම්භං වෙළුරියාසු නිම්මිතං.
4900. විත්තී හි මං වින්දති සූත දිස්වා පුච්ඡාමි තං මාතලි දෙවසාරථි, ඉමං නු ව්යම්භං කිමභිඤ්ඤමාහු.
4901. තස්ස පුට්ඨො වියාකාසි මාතලී දෙවසාරථි, විපාකං පුඤ්ඤකම්මානං ජානං අක්ඛාසජානතො.
4902. සුධම්මං ඉති යමාහු පස්සෙසා දිස්සතෙ සභා, වෙළුරියා රුචිරා චිත්රා ධාරයන්ති සුනිම්මිතා.
4903. අට්ඨංසා සුකතා ථම්භා සබ්බෙ වෙළුරියාමයා, යත්ථ දෙවා තාවතිංසා සබ්බෙ ඉන්දපුරොහිතා.
4904. අත්ථං දෙවමනුස්සානං චින්තයන්තා සමච්ඡරෙ, පවිසෙතෙන රාජිසි දෙවානං අනුමොදනං.
4905. තං දෙවා පටිනන්දිංසු දිස්වා රාජානමාගතං, ස්වාගතං තෙ මහාරාජ අථො තෙ අදුරාගතං.
4906. නිසීදදානි රාජිසි දෙවරාජස්ස සන්තිකෙ, සක්කොපි පටිනන්දිත්ථ වෙදෙහං මිථිලග්ගහං.
4907. නිමන්තයි ච{1} කාමෙහි ආසනෙන ච වාසවො, සාධු ඛොසි අනුප්පත්තො ආවාසං වසවත්තිනං.
4908. වස දෙවෙසු රාජිසි සබ්බකාමසමිද්ධිසු, තාවතිංසෙසු දෙවෙසු භුඤ්ජ කාමෙ අමානුසෙ.
4909. යථා යාචිතකං යානං යථා යාචිතකං ධනං, එවං සම්පදමෙවෙතං යං පරතො දානපච්චයා.
4910. නචාහමෙතං ඉච්ඡාමි යං පරතො දානපච්චයා, සයං කතානි පුඤ්ඤානි තං මෙ ආවෙණියං ධනං.
4911. සොහං ගන්ත්වා සමුස්සෙසු කාහාමි කුසලං බහුං, දානෙන සමචරියාය සංයමෙන දමෙන ච; යං කත්වා සුඛිතො හොති න ච පච්ඡානුතප්පති.
4912. බහූපකාරො නො භවං මාතලී දෙවසාරථි, යො මෙ කල්යාණකම්මානං පාපානි{2} පටිදස්සයි.
4913. ඉදං වත්වා නිමිරාජා වෙදෙහො මිථිලග්ගභො, පුථුයඤ්ඤං යජිත්වාන සඤ්ඤමං අජ්ඣුපාගමීති.
නිමිජාතකං චතුත්ථං.
5. ඛණ්ඩහාලජාතකං.
4914. රාජාසි ලුද්දකම්මො{1} එකරාජාති පුප්ඵවතියා,{2} සො පුච්ඡි බ්රහ්මබන්ධුං ඛණ්ඩහාලං පුරොහිතං මූළ්හං.
4915. සග්ගානමග්ගමාචික්ඛ ත්වංසි බ්රාහ්මණ ධම්මවිනයකුසලො, යථා ඉතො වජන්ති සුගතිං නරා පුඤ්ඤානි කත්වාන.
4916. අතිදානං දදිත්වාන{3} අවජ්ඣෙ දෙව ඝාතෙත්වා, එවං වජන්ති සුගතිං නරා පුඤ්ඤානි කත්වාන.
4917. කිං පන තං{4} අතිදානං කෙ ච අවජ්ඣා ඉමස්මිං ලොකස්මිං, එතඤ්ච ඛො නො අක්ඛාහි යජිස්සාම දදාම දානානි.
4918. පුත්තෙහි දෙව යජිතබ්බං මහෙසීහි නෙගමෙහි ච උසභෙහි, ආජානීයෙහි චතූහි සබ්බචතුක්කෙන දෙව යජිතබ්බං.
4919. තං සුත්වා අන්තෙපුරෙ කුමාරා ච මහෙසියො ච හඤ්ඤන්තු, එකො අහොසි නිග්ඝොසො භෙස්මා{5} අච්චුග්ගතො සද්දො.
4920. ගච්ඡථ වදෙථ කුමාරෙ චන්දං සුරියං ච භද්දසෙනඤ්ච, සූරඤ්ච වාමගොත්තං පසුරා{6} කිර හොථ යඤ්ඤත්ථාය.
4921. කුමාරියොපි වදෙථ උපසෙනිං{7} කොකිලඤ්ච මුදිතඤ්ච, නන්දඤ්චාපි කුමාරිං පසුරා කිර භොථ යඤ්ඤත්ථාය.
4922. විජයම්පි මය්හං මහෙසිං එරාවතිං කෙසිනං සුනන්දඤ්ච, ලක්ඛණවරූපපන්නා පසුරා කිර හොථ යඤ්ඤත්ථාය.
4923. ගහපතයොපි වදෙථ පුණ්ණමුඛං භද්දියං සිගාලඤ්ච, වඩ්ඪඤ්චාපි ගහපතිං පසුරා කිර හොථ යඤ්ඤත්ථාය.
4924. තෙ තත්ථ ගහපතයො අවොචිංසු සමාගතා පුත්තදාර පරිකිණ්ණා, සබ්බසිඛිනො දෙව කරොහි අථවා නො දාසෙ සාවෙහි.
4925. අභයඞ්කරම්පි මෙ හත්ථිං නාලාගිරිං අච්චුතං වරුණදන්තං, ආනෙථ ඛො නෙ ඛිප්පං යඤ්ඤත්ථාය භවිස්සන්ති.
4926. අස්සරතනම්පි කෙසිං සුරාමුඛං පුණ්ණකං විනතකඤ්ච, ආනෙථ ඛො නෙ ඛිප්පං යඤ්ඤත්ථාය භවිස්සන්ති.
4927. උසභම්පි යූථපතිං අනොජං නිසභං ගවම්පතිං තෙපි මය්හං ආනෙථ, සමුපාකරොන්තු සබ්බං යජිස්සාම දදාම දානානි.
4928. සබ්බං පටියාදෙථ යඤ්ඤං පන උග්ගතම්හි සුරියම්හි, ආණාපෙථ ච කුමාරෙ{1} අභිරමන්තු ඉමං රත්තිං.