4735. ධම්මං චර මහාරාජ මිත්තාමච්චෙසු ඛත්තිය, ඉධ ධම්මං චරිත්වාන රාජ සග්ගං ගමිසස්සි.
4736. ධම්මං චර මහාරාජ වාහනෙසු බලෙසු ච, ඉධ ධම්මං චරිත්වාන රාජ සග්ගං ගමිසස්සි.
4737. ධම්මං චර මහාරාජ ගාමෙසු නිගමෙසු ච, ඉධ ධම්මං චරිත්වාන රාජ සග්ගං ගමිසස්සි.
4738. ධම්මං චර මහාරාජ රට්ඨෙසු ජනපදෙසු ච, ඉධ ධම්මං චරිත්වාන රාජ සග්ගං ගමිසස්සි.
4739. ධම්මං චර මහාරාජ සමණබ්රාහ්මණෙසු ච, ඉධ ධම්මං චරිත්වාන රාජ සග්ගං ගමිසස්සි.
4740. ධම්මං චර මහාරාජ මිගපක්ඛීසු ඛත්තිය, ඉධ ධම්මං චරිත්වාන රාජ සග්ගං ගමිසස්සි.
4741. ධම්මං චර මහාරාජ ධම්මො චිණ්ණො සුඛාවහො, ඉධ ධම්මං චරිත්වාන රාජ සග්ගං ගමිසස්සි.
4742. ධම්මං චර මහාරාජ ධම්මො චිණ්ණො සුඛාවහො, ඉධ ධම්මං චරිත්වාන ස ඉන්දා දෙවා සබ්රහ්මකා; සුචිණ්ණෙන දිවං පත්තා මා ධම්මං රාජ පමාදොති.
සාමජාතකං තතියං.
4. නිමිජාතකං
4743. අච්ඡෙරං වත ලොකස්මිං උප්පජ්ජන්ති විචක්ඛණා, යදා අහූ නිමිරාජා පණ්ඩිතො කුසලත්ථිකො.
4744. රාජා සබ්බවිදෙහානං අදා දානං අරින්දමො, තස්ස තං දදතො දානං සඞ්කෙප්පා උදපජ්ජථ. දානං වා බ්රහ්මචරියං වා කතමංසු මහප්ඵලං.
4745. තස්ස සඞ්කප්පමඤ්ඤාය මඝවා දෙවකුඤ්ජරො, සහස්සනෙත්තො පාතුරහූ වණ්ණෙන නිහතං තමං.
4746. ස ලොමහට්ඨො මනුජින්දො වාසවං අවචා නිමි, දෙවතානුසි ගන්ධබ්බො ආදු සක්කො පුරින්දදො.
4747. න ච මෙ තාදිසො වණ්ණො දිට්ඨො වා යදි වා සුතො, ආචික්ඛ මෙ ත්වං භද්දන්තෙ කථං ජානෙමු තං මයං.
4748. ස ලොමහට්ඨං ඤත්වාන වාසවො අවචා නිමිං, සක්කොහමස්මි දෙවින්දො ආගතොස්මි තවන්තිකො.
4749. අලොමහට්ඨො මනුජින්ද පුච්ඡ පඤ්හං යදිච්ඡසි.{1} සො ච තෙන කතොකාසො වාසවං අවචා නිමි.
4750. පුච්ඡාමි තං මහාබාහු සබ්බභූතානමිස්සර, දානං වා බ්රහ්මචරියං වා කතමංසු මහප්ඵලං.
4751. සො පුට්ඨො නරදෙවෙන වාසවො අවචා නිමිං, විපාකං බ්රහ්මචරියස්ස ජානං අක්ඛාසජානතො.
4752. හීනෙන බ්රහ්මචරියෙන ඛත්තියෙ උපපජ්ජති, මජ්ඣිමෙන ච දෙවත්තං උත්තමෙන විසුජ්ඣති.
4753. නහෙතෙ සුලභා කායා යාවයොගෙන කෙනචි, යො කායෙ උපපජ්ජන්ති අනාගාරා තපස්සිනො.
4754. දුදීපො සාගරො සෙලො මුචලින්දො භගීරසො, උසීනරො{2} අට්ඨකො ච අස්සකො ච පුථුජ්ජනො,
4755. එතෙ චඤ්ඤෙ ච රාජානො ඛත්තියා බ්රාහ්මණා බහු, පුථු යඤ්ඤං යජිත්වාන පෙතං තෙ නාතිවත්තිසුං.
4756. යෙ වෙ අදුතියා න රමන්ති එකිකා විවෙකජං යෙ න ලභන්ති පීතිං, කිඤ්චාපි තෙ ඉන්දසමානභොගා තෙ වෙ පරාධීනසුඛා වරාකා.
4757. අද්ධා ඉමෙ{1} අවත්තිංසු අනාගාරා තපස්සිනො, සත්තිසයො යාමහනු සොමයාගො{2} මනොජවො,
4758. සමුද්දො මාඝො භරතො ච{3} ඉසිකාලිකරක්ඛියො,{4} අංගීරසො කස්සපො ච කිසවච්ඡො අකිත්ති ච.{5}
4759. උත්තරෙන නදී සීදා ගම්භීරා දුරතික්කමා, නළග්ගිවණ්ණා ජොතන්ති සදා කඤ්චනපබ්බතා.
4760. පරූළ්හකච්ඡා තගරා රූළ්හකච්ඡා වනා නගා, තත්රාසුං දසසභස්සානි පොරාණා ඉසයො පුරෙ.
4761. අහං සෙට්ඨොස්මි දානෙන සංයමෙන දමෙන ච, අනුත්තරං වතං කත්වා පකිරචාරී සමාහිතෙ.
4762. ජාතිමන්තං අජච්චං ච අහමුජ්ජුගතං නරං, අතිවෙලං නමස්සිස්සං කම්මබන්ධු හි මාතියා.{6}
4763. සබ්බෙ වණ්ණා අධම්මට්ඨා පතන්ති නිරයං අධො, සබ්බෙ වණ්ණා නිරුජ්ඣන්ති{7} චරිත්වා ධම්මමුත්තමං.
4764. ඉදං වත්වාන මඝවා දෙවරාජා සුජම්පති, වෙදෙහං අනුසාසිත්වා සග්ගකායං අපක්කමි.
4765. ඉමං භොන්තො නිසාමෙථ යාවන්තෙත්ථ සමාගතා, ධම්මිකානං මනුස්සානං වණ්ණං උච්චාවචං බහුං.
4766. යථා අයං නිමිරාජා පණ්ඩිතො කුසලත්ථිකො, රාජා සබ්බවිදෙහානං අදා දානං අරින්දමො.
4767. තස්ස තං දදතො දානං සඞ්කප්පො උදපජ්ජථ, දානං වා බ්රහ්මචරියං වා කතමංසු මහප්ඵලං.
4768. අබ්භුතො වත ලොකස්මිං උප්පජ්ජි ලොමහංසනො, දිබ්බො රථො පාතුරහූ වෙදෙහස්ස යසස්සිනො.
4769. දෙවපුත්තො මහිද්ධිකො මාතලී දෙවසාරථි, නිමන්තයිත්ථ රාජානං වෙදෙහං මිථිලග්ගහං.
4770. එහිමං රථමාරුය්හ රාජසෙට්ඨ දිසම්පති, දෙවා දස්සනකාමා තෙ තාවතිංසා සඉන්දකා සරමානා හි තෙ දෙවා සුධම්මායං සමච්ඡරෙ.
4771. තතො ච රාජා තරමානො වෙදෙහො මිථිලග්ගහො, ආසනා වුට්ඨහිත්වාන පමුඛො රථමාරුහි.
4772. අභිරූළ්හං එථං දිබ්බං මාතලී එතදබ්රවි, කෙන තං නෙමි මග්ගෙන රාජසෙට්ඨ දිසම්පති. යෙන වා පාපකම්මන්තා පුඤ්ඤකම්මා ච යෙ නරා.
4773. උභයෙනෙව මං නෙහි මාතලී දෙවසාරථි, යෙන වා පාපකම්මන්තා පුඤ්ඤකම්මා ච යෙ නරා.
4774. කෙන තං පඨමං නෙමි රාජසෙට්ඨ දිසම්පති, යෙන වා පාපකම්මන්තා පුඤ්ඤකම්මා ච යෙ නරා.
4775. නිරයෙ{1} තාව පස්සාමි ආවාසෙ{2} පාපකම්මිනං, ඨානානි ලුද්දකම්මානං දුස්සිලානං ච යා ගති.
4776. දස්සෙසි මාතලී රඤ්ඤො දුග්ගං වෙතරණිං නදිං, කුථන්තිං{3} ඛාරසංයුත්තං තත්තං අග්ගිසිඛූපමං.
4777. නිමි හවෙ මාතලිං අජ්ඣභාසථ දිස්වා ජනං පතමානං විදුග්ගෙ, භයං හි මං වින්දති සූත දිස්වා පුච්ඡාමි තං මාතලී දෙවසාරථි ඉමෙ නු මච්චා කිමකංසු පාපං යෙමෙ ජනා වෙතරණි{1} පතන්ති.
4778. තස්ස පුට්ඨො වියාකාසි මාතලී දෙවසාරථි, විපාකං පාප කම්මානං ජානං අක්ඛාසජානතො.{2}
4779. යෙ දුබ්බලෙ බලවන්තො ජිවලොකෙ හිංසෙන්ති රොසෙන්ති සුපාපධම්මා, තෙ ලුද්දකම්මා පසවෙත්වා පාපං තෙ වෙ ජනා වෙතරණිං පතන්ති.
4780. සාමා ච සොණා සබලා ච ගිජ්ඣා කාකොළසඞ්ඝා ච අදෙන්ති භෙරවා; භයං හි මං වින්දති සූත දිස්වා පුච්ඡාමි තං මාතලි දෙවසාරථි ඉමෙ නු මච්චා කිමකංසු පාපං යයිමං ජනං{3} කාකොළා අදෙන්ති.
4781. තස්ස පුට්ඨො වියාකාසි මාතලී දෙවසාරථි, විපාකං පාපකම්මානං ජානං අක්ඛාසජානතො.
4782. යෙ කෙචි මෙ මච්ඡරිනො කදරියා පරිභාසකා සමණබ්රාහ්මණානං හිසෙන්ති රොසෙන්ති සුපාපධම්මො, තෙ ලුද්දකම්මා පසවෙත්වා පාපං තයිමං ජනං කාකොළා අදෙන්ති.
4783. සජොතිභූතා පඨවිං කමන්ති තත්තෙහි ඛන්ධෙහි ච පොථයන්ති භයං හි මං වින්දති සූත දිස්වා, පුච්ඡාමි තං මාතලී දෙවසාරථී ඉමෙ නු මච්චා කිමකංසු පාපං යෙමෙ ජනා ඛන්ධහතා සයන්ති.
4784. තස්ස පුට්ඨො වියාකාසි මාතලී දෙවසාරථි, විපාකං පාපකම්මානං ජානං අක්ඛාසජානතො.
4785. යෙ ජීවලොකස්මිං සුපාපධම්මිනො නරඤ්ච නාරිඤ්ච අපාපධම්මං; හිංසෙන්ති රොසෙන්ති සුපාපධම්මා තෙ ලුද්දකම්මා පසවෙත්ථා{1} පාපං තෙමෙ ජනා ඛන්ධහතා සයන්ති.
4786. අඞ්ගකාසුං අපරෙ ථුනන්ති නරා රුදන්තා පරිදඩ්ඪගත්තා; භයං හි මං වින්දති සූත දිස්වා පුච්ඡාමි තං මාතලි දෙවසාරථි, ඉමෙ නු මච්චා කිමකංසු පාපං යෙමෙ ජනා අඞ්ගාරකාසුං ථුනන්ති.{2}
4787. තස්ස පුට්ඨො වියාකාසි මාතලී දෙවසාරථි, විපාකං පාපකම්මානං ජානං අක්ඛාසජානතො.
4788. යෙ කෙචි පූගායතනස්ස හෙතු සක්ඛිං කරිත්වා ඉණං ජාපයන්තී; තෙ ජාපයිත්වා ජනතං ජනින්ද තෙ ලුද්දකම්මා පසවෙත්වා පාපං තෙමෙ ජනා අඞ්ගාරකාසුං ථුනන්ති
4789. සජොතිභූතා ජලිතා පදිත්තා පදිස්සති මහතී ලොහකුම්භී; භයං හි මං වින්දති සූත දිස්වා ඉමෙ නු මච්චා කිමකංසු පාපං පුච්ඡාමි තං මාතලි දෙවසාරථි යෙමෙ ජනා අවංසිරා ලොහකුම්භිං පතන්ති.
4790. තස්ස පුට්ඨො වියාකාසි මාතලී දෙවසාරථි, විපාකං පාපකම්මානං ජානං අක්ඛාසජානතො.
4791. යෙ සීලවං සමණං බ්රාහ්මණං වා හිංසෙන්ති රොසෙන්ති{3} සුපාපධම්මිනො; තෙ ලුද්දකම්මා පසවෙත්වා පාපං තොමෙ ජනා (අවංසිරා) ලොහකුම්භිං පතන්ති.
4792. ලුඤ්චෙන්ති ගීවං අථ වෙඨයිත්වා{1} උණ්හොදකස්මිං පකිලෙදයිත්වා; භයං හි මං වින්දති සුත දිස්වා පුච්ඡාමි තං මාතලි දෙවසාරථි ඉමෙ නු මච්චා කිමකංසු පාපං යෙමෙ ජනා ලුත්තසිරා{2} සයන්ති.
4793. තස්ස පුට්ඨො වියාකාසි මාතලි දෙවසාරථි, විපාකං පාපකම්මානං ජානං අක්ඛාසජානතො.
4794. යෙ ජීවලොකස්මිං සුපාපධම්මිනො පක්ඛි ගහෙත්වාන විහෙඨයන්ති තෙ හෙඨයිත්වා{3} සකුණං ජනින්ද තෙ ලුද්දකම්මා පසවෙත්වා පාපං තෙමෙ ජනා ලුත්තසිරා සයන්ති.
4795. පහුත{4} තොයා අනිඛාතකූලා{5} නදී අයං සන්දති සූපතිත්ථා; ඝම්මාභිතත්තා මනුජා පිවන්ති පිවතඤ්ච{6} තෙසං භුසං හොති පානි.
4796. භයං හි මං වින්දති සූත දිස්වා පුච්ඡාමි තං මාතලි දෙවසාරථි, ඉමෙ නු මච්චා කිමකංසු පාපං පිවතඤ්ච{6} තෙසං භුසං හොති පානි.
4797. තස්ස පුට්ඨො වියාකාසි මාතලි දෙවසාරථි, විපාකං පාපකම්මානං ජානං අක්ඛාසජානතො.
4798. යෙ සුද්ධධඤ්ඤං පලාපෙන{7} මිස්සං අසුද්ධකම්මා කයිනො දදන්ති, ඝම්මාභිතත්තානං පිපාසිතානං පිවතඤ්ච තෙසං භුසං හොති පානි.
4799. උසූහි සත්තීහි ච තොමරෙහි දුභයානි පස්සානි තුදන්ති කන්දතං, භයං හි මං වින්දති සූත දිස්වා පුච්ඡාමි තං මාතලි දෙවසාරථි ඉමෙ නු මච්චා කිමකංසු පාපං යෙමෙ ජනා සත්තිහතා සයන්ති.
4800. තස්ස පුට්ඨො වියාකාසි මාතලි දෙවසාරථි, විපාකං පාප කම්මානං ජානං අක්ඛාසජානතො.
4801. යෙ ජීවලොකස්මිං අසාධුකම්මිනො, අදින්නමාදාය කරොන්ති ජීවිකං, ධඤ්ඤං ධනං රජතං ජාතරූපං අජෙළකං චාපි පසුං මහීසං{1} තෙ ලුද්දකම්මා පසවෙත්වා පාපං තෙමෙ ජනා සත්තිහතා සයන්ති.
4802. ගීවාය බද්ධා කිස්ස ඉමෙ පුනෙකෙ අඤ්ඤෙ විකත්තා{2} බිලකතා පුනෙකෙ භයං හි මං වින්දති සූත දිස්වා පුච්ඡාමි තං මාතලි දෙවසාරථි, ඉමෙ නු මච්චා කිමකංසු පාපං යෙමෙ ජනා බිලකතා සයන්ති.
4803. තස්ස පුට්ඨො වියාකාසි මාතලී දෙව සාරථි, විපාකං පාපකම්මානං ජානං අක්ඛාසජානතො.
4804. ඔරබ්භිකා සූකරිකා ච මච්ඡිකා පසුං මහිසඤ්ච අජෙළකඤ්ච හන්ත්වාන සුනෙසු පසාරයිංසු තෙ ලුද්දකම්මා පසවෙත්වා පාපං තෙමෙ ජනා බිලකතා සයන්ති.
4805. රහදො අයං මුත්තකරීසපූරො දුග්ගන්ධරූපො අසුචි පූති වායති ඛුදා{3} පරෙතා මනුජා අදෙන්ති{4} භයං හි මං වින්දති සූත දිස්වා පුච්ඡාමි තං මාතලි දෙවසාරථි, ඉමෙ නු මච්චා කිමකංසු පාපං යෙමෙ ජනා මුත්තකරීසභක්ඛා.
4806. තස්ස පුට්ඨො වියාකාසි මාතලී දෙවසාරථි, විපාකං පාපකම්මානං ජානං අක්ඛාසජානතො.
4807. යෙ කෙචි මෙ කාරණිකා විරොසකා පරෙසං භිංසාය සදා නිවිට්ඨා තෙ ලුද්දකම්මා පසවෙත්වා පාපං මිත්තද්දුනො මීළ්හමදෙන්ති බාලා රහදො අයං ලොහිතපුබ්බපූරො දුග්ගන්ධරූපො අසුචි පූති වායති.
4808. ඝම්මාභිතත්තා මනුජා පිවන්ති භයං හි මං වින්දති සූත දිස්වා, පුච්ඡාමි තං මාතලි දෙවසාරථි, ඉමෙ නු මච්චා කිමකංසු පාපං යෙමෙ ජනා ලොහිතපුබ්බභක්ඛා.
4809. තස්ස පුට්ඨො වියාකාසි මාතලි දෙවසාරථි, විපාකං පාපකම්මානං ජානං අක්ඛාසජානතො.
4810. යෙ මාතරං වා පිතරං වා ජිවලොකෙ පාරාජිකා අරහන්තෙ හනන්ති. තෙ ලුද්දකම්මා පසවෙත්වා පාපං තෙමෙ ජනා ලොහිතපුබ්බභක්ඛා.
4811. ජිව්හඤ්ච පස්ස ඛලිසෙන විද්ධං විහතං යථා සඞ්කුසතෙන චම්මං; ඵන්දන්ති මච්ඡාව ථලම්හි ඛිත්තා මුඤ්චන්ති ඛෙළං රුදමානා කිමෙතෙ.
4812. භයං හි මං වින්දති සූත දිස්වා, පුච්ඡාමි තං මාතලි දෙවසාරථි, ඉමෙ නු මච්චා කිමකංසු පාපං යෙමෙ ජනා වඞ්කඝස්තා සයන්ති.
4813. තස්ස පුට්ඨො වියාකාසි මාතලී දෙවසාරථි, විපාකං පාපකම්මානං ජානං අක්ඛාසජානතො.
4814. යෙ කෙචි සන්ථානගතා මනුස්සා අග්ඝෙන අග්ඝං කයං හාපයන්ති{1} කූටෙන කූටං ධනලොභහෙතු, ඡන්නං යථා වාරිචරං වධාය.
4815. න හි කූටකාරිස්ස භවන්ති තාණා සකෙහි කම්මෙහි පුරක්ඛතස්ස,{1} තෙ ලුද්දකම්මා පසවෙත්වා පාපං තෙ මෙ ජනා වඞ්කඝස්තා සයන්ති.
4816. නරියො{2} ඉමා සම්පරිභින්තගත්තා පග්ගය්හ කන්දන්ති භුජෙ දුජච්චා, සම්මක්ඛිතා ලොහිතපුබ්බලිත්තා ගාවො යථා ආඝාතනෙ විකත්තා{3} තා භූමිභාගස්මිං සදා නිඛාතා ඛන්ධාතිවත්තන්ති සජොතිභූතා,
4817. භයං හි මං වින්දති සූත දිස්වා, පුච්ඡාමි තං මාතලි දෙවසාරථි, ඉමා නු නරියො කිමකංසු පාපං යා භූමිභාගස්මිං සදා නිඛාතා ඛන්ධාතිවත්තන්ති සජොතිභූතා.
4818. තස්ස පුට්ඨො වියාකාසි මාතලී දෙවසාරථි, විපාකං පාප කම්මානං ජානං අක්ඛාසජානතො.
4819. කොලිනියායො{4} ඉධ ජිවලොකෙ අසුද්ධකම්මා අසතං අචාරුං{5} තා දිත්තරූපා{6} පතිවිප්පහාය, අඤ්ඤං අචාරුං රතිඛිඩ්ඩහෙතු තා ජීවලොකස්මිං රමාපයිත්වා ඛන්ධාතිවත්තන්ති සජොතිභූතා.
4820. පාදෙ ගහෙත්වා කිස්ස ඉමෙ පුනෙකෙ අවංසිරා නරකෙ පාතයන්ති. භයං හි මං වින්දති සූත දිස්වා, පුච්ඡාමි තං මාතලි දෙවසාරථි, ඉමෙ නු මච්චා කිමකංසු පාපං යෙ මෙ ජනා අවංසිරා නරකෙ පාතයන්ති.
4821. තස්ස පුට්ඨො වියාකාසි මාතලි දෙවසාරථි, විපාකං පාපකම්මානං ජානං අක්ඛාසජානතො.
4822. යෙ ජීවලොකස්මිං අසාධුකම්මිනො පරස්ස දාරානි අතික්කමන්ති, තෙ තාදිසා උත්තමභණ්ඩථෙනා තෙ මෙ ජනා අවංසිරා නරකෙ පාතයන්ති.
4823. තෙ වස්සපූගානි බහූනි තත්ථ නිරයෙ දුක්ඛං වෙදනං වෙදයන්ති, නහි පාපකාරිස්ස භවන්ති තාණා සකෙහි කම්මෙහි පුරක්ඛතස්ස තෙ ලුද්දකම්මා පසවෙත්වා පාපං. තෙ මෙ ජනා අවංසිරා නරකෙ පාතයන්ති.
4824. උච්චාවචාමෙ විවිධා උපක්කමා නිරයෙසු දිස්සන්ති සුඝොරරූපා භයං හි මං වින්දති සූත දිස්වා, පුච්ඡාමි තං මාතලී දෙවසාරථි, ඉමෙ නු මච්චා කිමකංසු පාපං යෙ මෙ ජනා අධිමත්තා දුක්ඛා තිබ්බා ඛාරා කටුකා වෙදනා වෙදයන්ති.
4825. තස්ස පුට්ඨො වියාකාසි මාතලී දෙවසාරථි, විපාකං පාපකම්මානං ජානං අක්ඛාසජානතො
4826. යෙ ජීවලොකස්මිං සුපාපදිට්ඨිනො විස්සාසකම්මානි කරොන්ති මොහා; පරඤ්ච දිට්ඨීසු සමාදපෙන්ති තෙ පාපාදිට්ඨි පසවෙත්වා{1} පාපං තෙ මෙ ජනා අධිමත්තා දුක්ඛා තිබ්බා ඛරා කටුකා වෙදනා වෙදයන්ති.
4827. විදිතානි තෙ මහාරාජ ආවාසං පාපකම්මිනං, ඨානානි ලුද්දකම්මානං දුස්සීලානඤ්ච යා ගති; උය්යාහිදානි රාජිසි දෙවරාජස්ස සන්තිකෙ.
නිරයකණ්ඩං නිට්ඨිතං.
4828. පඤ්චථූපං දිස්සතිදං විමානං මාලා පිළන්ධා සයනස්ස මජ්ඣෙ, තත්ථච්ඡති නාරී මහානුභාවා උච්චාවචං ඉද්ධිං විකුබ්බමානා.
4829. විත්තී හි මං වින්දති සූත දිස්වා පුච්ඡාමි තං මාතලි දෙවසාරථි, අයං නු නාරී කිමකාසි සාධුං යා මොදති සග්ගපත්තා විමානෙ.
4830. තස්ස පුට්ඨො වියාකාසි මාතලී දෙවසාරථි, විපාකං පුඤ්ඤකම්මානං ජානං අක්ඛාසජානතො.
4831. යදි තෙ සුතා ඛීරණී ජිවලොකෙ ආමාය දාසී අහු බ්රාහ්මණස්ස, සා පත්තකාලං අතිථිං විදිත්වා මාතාව පුත්තං සකිමාභිනන්දි. සඤ්ඤමා සංවිභාගා ච සා විමානස්මිං මොදති.