4635. අත්ථි තෙසං උසාමන්තං අථ සාහස්ස ජීවිතං, උදකස්ස ච අලාභෙන මඤ්ඤෙ අන්ධා මරිස්සරෙ.
4636. න මෙ ඉදං තථා දුක්ඛං ලබ්භාහි පුමුනා ඉදං, යඤ්ච අම්මං න පස්සාමි තං මෙ දුක්ඛතරං ඉතො.
4637. න මෙ ඉදං තථා දුක්ඛං ලබ්භාහි පුමුනා ඉදං, යඤ්ච තාතං න පස්සාමි තං මෙ දුක්ඛතරං ඉතො.
4638. සා නූන කපණා අම්මා චිරරත්තාය රුච්ඡති,{1} අඩ්ඪරත්තෙ ච රත්තෙ වා නදීව අවසුච්ඡති.
4639. සො නූන කපණො තතො චිරරත්තාය රුච්ඡති, අඩ්ඪරත්තෙ ච රත්තෙ වා නදීව අවසුච්ඡති.
4640. උට්ඨානපාරිචරියාය පාදං{2} සම්බාහනස්ස ච, “සාම තාතා” ති විලපන්තා හිණ්ඩිස්සන්ති{3} බ්රහාවනෙ.
4641. ඉදම්පි දුතියං සල්ලං කම්පෙති හදයං මම. යඤ්ච අන්ධෙ න පස්සාමි මඤ්ඤෙ හෙස්සාමි{4} ජීවිතං.
4642. මා බාළ්හං පරිදෙවෙසි සාම කල්යාණදස්සන, අහං කම්මකරො හුත්වා භරිස්සං තෙ බ්රහාවනෙ.
4643. ඉස්සත්ථෙ චස්මි කුසලො දළ්හධම්මොති විස්සුතො, අහං කම්මකාරො හුත්වා භරිස්සං තෙ බ්රහාවනෙ.
4644. මිගානං විඝාසමන්වෙසං වනමූල ඵලානි ච, අහං කම්මකරො හුත්වා භරිස්සං තෙ බ්රහාවනෙ.
4645. කතමං තං වනං සාම යත්ථ මාතා පිතා තව, අහං තෙ තථා භරිස්සං යථා තෙ අභරී තුවං.
4646. අයං එකපදී රාජ යො යං උස්සීසකෙ මම, ඉතො ගන්ත්වා අඩ්ඪකොසං තත්ථ{1} තෙසං අගාරකං; තත්ථ මාතා පිතා මය්හං තෙ භරස්සු ඉතො ගතො.
4647. නමො තෙ කාසිරාජත්ථු නමො තෙ කාසිවඩ්ඪන, අන්ධා මාතා පිතා මය්හං භරස්සු බ්රහාවනෙ.
4648. අඤ්ජලිං තෙ පග්ගණ්හාමි කාසිරාජ නමත්ථු තෙ, මාතරං පිතරං මය්හං වුත්තො වජ්ජාසි වන්දනං.
4649. ඉදං වත්වාන සො සාමො යුවා කල්යාණදස්සනො, මුච්ඡිතො විසවෙගෙන විසඤ්ඤි සමපජ්ජථ.
4650. ස රාජා පරිදෙවෙසි බහුං කාරුඤ්ඤසංහිතං, අජරාමරො වහං ආසිං අජ්ජෙතං{2} ඤාසි නො පුරෙ; සාමං කාලකතං දිස්වා “නත්ථි මච්චුස්ස නාගමො”.
4651. යස්සු මං පතිමන්තෙති සවිසෙන සමප්පිතො, ස්වාජ්ජෙවං ගතෙ කාලෙ න කිඤ්චි මභිහාසති.
4652. නිරයං නූන ගච්ඡාමි එත්ථ මෙ නත්ථි සංසයො, තදාහි පකතං පාපං චිරරත්තාය කිබ්බිසං.
4653. භවන්ති තස්ස වත්තාරො ගාමෙ කිබ්බිසකාරකො, අරඤ්ඤෙ නිම්මනුස්සම්හි කො මං වත්තුමරහති.
4654. සාරයන්ති හි කම්මානි ගාමෙ සංගච්ඡ මානවා, අරඤ්ඤෙ නිම්මනුස්සම්හි කො නු මං සාරයිස්සති.
4655. සා දෙවතා අන්තරහිතා පබ්බතෙ ගන්ධමාදනෙ, රඤ්ඤොව අනුකම්පාය ඉමා ගාථා අභාසථ.
4656. ආගුං කරි මහාරාජ අකරා{1} කම්මදුක්කටං, අදූසකා පිතා පුත්තා තයො එකූසුනා හතා.
4657. එහි තං අනුසික්ඛාමි යථා තෙ සුගතී සියා, ධම්මෙනන්ධෙ{2} වනෙ පොස මඤ්ඤෙහං සුගතී තයා.
4658. ස රාජා පරිදෙවිත්වා බහුං කාරුඤ්ඤසංහිතං, උදකකුම්භමාදාය පක්කාමි දක්ඛිණාමුඛො.
4659. කස්ස න එසො පදසද්දො මනුස්සස්සෙව ආගතො, නෙසො{3} සාමස්ස නිග්ඝොසො කො නු ත්වමසි මාරිසං.
4660. සන්තං හි සාමො වජති සන්තං පාදානි ඤත්තති,{4} නොසො සාමස්ස නිග්ඝොසො කො නු ත්වමසි මාරිස.
4661. රාජාහමස්සමි කාසීනං පිළියක්ඛොති මං විදූ, ලොභා රට්ඨං පහත්වාන{5} මිගමෙසං{6} චරාමහං.
4662. ඉස්සත්ථෙ චස්මි කුසලො දළ්හධම්මොති විස්සුතො, නාගොපි මෙ න මුඤ්චෙය්ය ආගතො උසුපාතනං.
4663. ස්වාගතන්තෙ මහාරාජ අථො තෙ අදුරාගතං, ඉස්සරොසි අනුප්පත්තො යං ඉධත්ථි පවෙදය.
4664. තින්දුකානි පියාලානි මධුකෙ කාසුමාරියො, ඵලානි ඛුද්දකප්පානි භුඤ්ජ රාජ වරං වරං.
4665. ඉදම්පි පානීයං සීතං ආභතං ගිරිගබ්භරා, තතො පිව මහාරාජ සචෙ ත්වං අභිකඞ්ඛසි.
4666. නාලං අන්ධා වනෙ දට්ඨුං කො නු මෙ{1} ඵලමාහරී, අනන්ධස්සෙවයං සම්මා නිවාපො{2} මය්හ ඛායති.
4667. දහරො යුවා නාතිබ්රහා සාමො කල්යාණදස්සනො, දීඝස්ස කෙසා අසිතා අථො සූනග්ගවෙල්ලිතා.
4668. සො භවෙ ඵලමාහත්වා ඉතො ආදා කමණ්ඩලුං, නදිං ගතො උදහාරො මඤ්ඤෙ න දූරමාගතො.
4669. අහං තං අවධිං සාමං යො තුය්හං පරිචාරකො, යං කුමාරං පවෙදෙථ සාමං කල්යාණදස්සනං.
4670. දීඝස්ස කෙසා අසිතා අථො සූනග්ගවෙල්ලිතා, තෙසු ලොහිතලිත්තෙසු සෙති සාමො මයා හතො.
4671. කෙන දුකූලමන්තෙසී “හතො සාමො”ති වාදිනා, “හතො සාමා”ති සුත්වාන හදයං මෙ පවෙධති.
4672. අස්සත්ථස්සෙව තරුණං පවාළං මාලුතෙරිතං, “හතො සාමො”ති සුත්වාන හදයං මෙ පවෙධති.
4673. පාරිකෙ කාසිරාජායං සො සාමං මිගසම්මතෙ, කොධසා උසුනා විජ්ඣි තස්ස මා පාපමිච්ඡිම්හා.
4674. කිච්ඡා ලද්ධො පියො පුත්තො යො අන්ධෙ අභරී වනෙ, තං එකපුත්තං ඝාතිම්භි කථං චිත්තං න කොපයෙ.
4675. කිච්ඡා ලද්ධො පියො පුත්තො යො අන්ධො අභරී වනෙ, තං එකපුත්තං ඝාතිම්භි අක්කොධං ආහු පණ්ඩිතා.
4676. මා බාළ්හං පරිදෙවෙථ “හතො සාමා”ති වාදිනා, අහං කම්මකරො හුත්වා භරිස්සාමි බ්රහාවනෙ.
4677. ඉස්සත්ථෙ චස්මි කුසලො දළ්හධම්මොති විස්සුතො, අහං කම්මකරො හුත්වා භරිස්සාමි බ්රහාවනෙ.
4678. මිගානං{1} විඝාසමන්වෙසං වනමූල ඵලානි ච, අහං කම්මකරො හුත්වා භරිස්සාමි බ්රහාවනෙ.
4679. නෙස ධම්මො මහාරාජ නෙතං අම්හෙසු කප්පති, රාජා ත්වමසි අම්හාකං පදෙ වන්දාම තෙ මයං.
4680. ධම්මං නෙසාද භණථ කතා අපවිතී තයා, පිතා ත්වමසි අම්හාකං මාතා ත්වමසි පාරිකෙ.
4681. නමො තෙ කාසිරාජත්ථු නමො තෙ කාසිවඩ්ඪන, අඤ්ජලිං තෙ පගණ්හාම යාව සාමානුපාපය.
4682. තස්ස පාදෙ පමජ්ජන්තා{2} මුඛඤ්ච භුජදස්සනං, සංසුම්භමානා අත්තානං කාලමාගමයාමසෙ.
4683. බ්රහා වාළමිගාකිණ්ණං ආකාසන්තං පදිස්සති, යත්ථ සාමො හතො සෙති චන්දොව පතිතො ඡමා.
4684. බ්රහා වාළමිගාකිණ්ණං ආකාසන්තං පදිස්සති, යත්ථ සාමො හතො සෙති සුරියොව පතිතො ඡමා.
4685. බ්රහා වාළමිගාකිණ්ණං ආකාසන්තං පදිස්සති, යත්ථ සාමො හතො සෙති පංසුනා පතිකුණ්ඨිතො
4686. බ්රහා වාළමිගාකිණ්ණං ආකාසන්තං පදිස්සති, යත්ථ සාමො හතො සෙති ඉධෙව වසථ අස්සමෙ.
4687. යදි තත්ථ සහස්සානි සතානි නහුතානි ච, නෙවම්හකාං භයං කොචි වනෙ වාළෙසු විජ්ජති.
4688. තතො අන්ධානමාදාය කාසිරාජා බ්රහාවනෙ, හත්ථෙ ගහෙත්වා පක්කාමි යත්ථ සාමො හතො අහු.
4689. දිස්වාන පතිතං සාමං පුත්තකං පංසුකුණ්ඨිතං, අපවිද්ධං බ්රහාරඤ්ඤෙ චන්දංව පතිතං ඡමා.
4690. දිස්වාන පතිතං සාමං පුත්තකං පංසුකුණ්ඨිතං, අපවිද්ධං බ්රහාරඤ්ඤෙ සුරියංව පතිතං ඡමා.
4691. දිස්වාන පතිතං සාමං පුත්තකං පංසුකුණ්ඨිතං, අපවිද්ධං බ්රහාරඤ්ඤෙ කරුණං පරිදෙවයුං.
4692. දිස්වාන පතිතං සාමං පුත්තකං පංසුකුණ්ඨිතං, බාහා පග්ගය්හ පක්කන්දුං “අධම්මො කිර භො” ඉති.
4693. බාළ්හං ඛොසි තුවං සුත්තො සාමකල්යාණදස්සන, යො අජ්ජෙවං ගතෙ කාලෙ න කිඤ්චි මභිභාසසි.
4694. බාළ්හං ඛොසි තුවං මත්තො සාමකල්යාණදස්සන, යො අජ්ජෙවං ගතෙ කාලෙ න කිඤ්චි මභිභාසසි.
4695. බාළ්හං ඛොසි ත්වං පමත්තොසි{1} සාම කල්යාණදස්සන, යො අජ්ජෙවං ගතෙ කාලෙ න කිඤ්චි මභිභාසසි.
4696. බාළ්හං ඛොසි තුවං කුද්ධො{2} සාමකල්යාණදස්සන, යො අජ්ජෙවං ගතෙ කාලෙ න කිඤ්චි මභිභාසසි.
4697. බාළ්හං ඛොසි තුවං දිත්තො{3} සාමකල්යාණදස්සන, යො අජ්ජෙවං ගතෙ කාලෙ න කිඤ්චි මභිභාසසි.
4698. බාළ්හං ඛො ත්වංසි විමනොසි සාමකල්යාණදස්සන, යො අජ්ජෙවං ගතෙ කාලෙ න කිඤ්චි මභිභාසසි.
4699. ජටං වලිතං පඞ්ක{1}ගතං කොදානි සණ්ඨපෙස්සති, සාමො අයං කාලකතො{2} අන්ධානං පරිචාරකො.
4700. කො චෙ සම්මජ්ජනාදාය{3} සම්මජ්ජිස්සති අස්සමං, සාමො අයං කාලකතො අන්ධානං පරිචාරකො.
4701. කොදානි නභාපයිස්සති සීතෙනුණ්හොදකෙන ච, සාමො අයං කාලකතො අන්ධානං පරිචාරකො.
4702. කොදානි භොජයිස්සති වනමූලඵලානි ච, සාමො අයං කාලකතො අන්ධානං පරිචාරකො.
4703. දිස්වාන පතිතං සාමං පුත්තකං පංසුකුණ්ඨිතං, අට්ටිතා පුත්තසොකෙන මාතා සච්චමභාසථ:
4704. යෙන සච්චෙනයං සාමො ධම්මචාරී පුරෙ අහූ, එතෙන සච්චවජ්ජෙන විසං සාමස්ස හඤ්ඤතු.
4705. යෙන සච්චෙනයං සාමො බ්රහ්මචාරී පුරෙ අහූ, එතෙන සච්චවජ්ජෙන විසං සාමස්ස හඤ්ඤතු.
4706. යෙන සච්චෙනයං සාමො සච්චවාදී පුරෙ අහූ, එතෙන සච්චවජ්ජෙන විසං සාමස්ස හඤ්ඤතු.
4707. යෙන සච්චෙනයං සාමො මාතා පෙත්ති{4}භරො අහූ, එතෙන සච්චවජ්ජෙන විසං සාමස්ස හඤ්ඤතු.
4708. යෙන සච්චෙනයං සාමො කුලෙ ජෙට්ඨාපචායිකො, එතෙන සච්චවජ්ජෙන විසං සාමස්ස හඤ්ඤතු.
4709. යෙන සච්චෙනයං සාමො පාණා පියතරො මම, එතෙන සච්චවජ්ජෙන විසං සාමස්ස හඤ්ඤතු.
4710. යං කිඤ්චිත්ථි කතං පුඤ්ඤං මය්හං චෙව පිතුච්ච තෙ, සච්චෙන{5} තෙන කුසලෙන විසං සාමස්ස හඤ්ඤතු.
4711. දිස්වාන පතිතං සාමං පුත්තකං පංසුකුණ්ඨිතං, අට්ටිතො පුත්තසොකෙන පිතා සච්චමභාසථ:
4712. යෙන සච්චෙනයං සාමො ධම්මචාරී පුරෙ අහූ, එතෙන සච්චවජ්ජෙන විසං සාමස්ස හඤ්ඤතු.
4713. යෙන සච්චෙනයං සාමො බ්රහ්මචාරි පුරෙ අහු, එතෙන සච්චවජ්ජෙන විසං සාමස්ස හඤ්ඤතු.
4714. යෙන සච්චෙනයං සාමො සච්චවාදී පුරෙ අහූ, එතෙන සච්චවජ්ජෙන විසං සාමස්ස හඤ්ඤතු.
4715. යෙන සච්චෙනයං සාමො මාතාපෙත්තිභරො අහූ, එතෙන සච්චවජ්ජෙන විසං සාමස්ස හඤ්ඤතු.
4716. යෙන සච්චෙනයං සාමො කුලෙ ජෙට්ඨාපචායිකො, එතෙන සච්චවජ්ජෙන විසං සාමස්ස හඤ්ඤතු.
4717. යෙන සච්චෙනයං සාමො පාණා පියතරො මම, එතෙන සච්චවජ්ජෙන විසං සාමස්ස හඤ්ඤතු.
4718. යං කිඤ්චත්ථි කතං පුඤ්ඤං මය්හං ච මාතුයා ච තෙ, සච්චෙන තෙන කුසලෙන විසං සාමස්ස හඤ්ඤතු.
4719. සා දෙවතා අන්තරහිතා පබ්බතෙ ගන්ධමාදනෙ, සාමස්ස අනුකම්පාය ඉමං සච්චමභාසථ.
4720. පබ්බත්යාහං ගන්ධමාදනෙ චිරරත්තනිවාසිනී, න මෙ පියතරො කොචි අඤ්ඤො සාමා{1} න විජ්ජති. එතෙන සච්චවජ්ජෙන විසං සාමස්ස හඤ්ඤතු.
4721. සබ්බෙ වනා ගන්ධමයා පබ්බතෙ ගන්ධමාදනෙ, එතෙන සච්චවජ්ජෙන විසං සාමස්ස හඤ්ඤතු.
4722. තෙසං ලාලප්පමානානං බහුං කාරුඤ්ඤසංහිතං, ඛිප්පං සාමො සමුට්ඨාසි යුවා කල්යාණදස්සනො.
4723. සාමො හමස්මි භද්දං වො සොත්ථිනාම්හි සමුට්ඨිතො, මා බාළ්හං පරිදෙවෙථ මඤ්ජුනාභිවදෙථ මං.
4724. ස්වාගතන්තෙ මහාරාජ අථො තෙ අදුරාගතං, ඉස්සරොසි අනුප්පත්තො යං ඉධත්ථි පවෙදය.
4725. තින්දුකානි{1} පියාලානි මධුකෙ කාසුමාරියො, ඵලානි ඛුද්දකප්පානි භුඤ්ජ රාජ වර වරං.
4726. අත්ථි මං පානීයං සීතං ආභතං ගිරිගබ්භරා, තතො පිව මහාරාජ සචෙ ත්වං අභිකඞ්ඛසි.
4727. සම්මුය්හාමි පමුය්හාමි සබ්බා මුය්හන්ති මෙ දිසා, පෙතං තං සාම අද්දක්ඛිං{2} කොනු ත්වං සාම ජීවසි.
4728. අපි ජීවං මහාරාජ පුරිසං ගාළ්හවෙදනං, උපනීතමනසඞ්කප්පං ජීවන්තං මඤ්ඤතෙ මතං.
4729. අපි ජීවං මහාරාජ පුරිසං ගාළ්හවෙදනං, තං නිරොධගතං සන්තං ජීවන්තං මඤ්ඤතෙ මතං.
4730. යො මාතරං වා පිතරං වා මච්චො ධම්මෙන පොසති, දෙවාපි නං තිකිච්ඡන්ති මාතාපෙත්ති භරං ජනං{3}
4731. යො මාතරං වා පිතරං වා මච්චො ධම්මෙන පොසති, ඉධ චෙව නං පසංසන්ති පෙච්ච සග්ගෙ ච මොදති.
4732. එස භිය්යො පමුය්හාමි සබ්බා මුය්හන්ති මෙදිසා, සරණං තං සාම ගච්ඡාමි ත්වඤ්ච මෙ සරණං භව.
4733. ධම්මං චර මහාරාජ මාතාපිතුසු ඛත්තිය, ඉධ ධම්මං චරිත්වාන රාජ සග්ගං ගමිසස්සි.
4734. ධම්මං චර මහාරාජ පුත්තදාරෙසු ඛත්තිය, ඉධ ධම්මං චරිත්වාන රාජ සග්ගං ගමිසස්සි.